Lajme

E enjte 3 korrik 2003

Përmbajtja:

• Mesazh i Presidentit Rugova për Presidentin Bush me rastin e 4 Korrikut - Ditës së Pavarësisë së SHBA-ve

• Kofi Anan thotë se situata në Kosovë dukshëm është përmirësuar

• Në bazë të një urdhërese të Shtajnerit parapagimi për RTVK-në - 3,5 euro në muaj

• Deputetët kritikojnë procesin e privatizimit në Kosovë

• Mbi 200 invalidë të punës kanë hyrë në grevë urie

• Prej sot të gjithë personat që shfrytëzojnë pronat e huaja duhet t'i lirojnë ato

• KMDLNJ përkrah procesin e kthimit dhe të integrimit të të zhvendosurve

• Ministria e Jashtme shqiptare vlerëson apelin drejtuar personave të shpërngulur që të kthehen në Kosovë

• Gjyqi për dëbimin e «Rilindjes» nga Pallati i Rilindjes shtyhet për në fillim të shtatorit

• Koalicioni serb "Kthimi" e ka mirëpritur nismën për kthimin e të zhvendosurve

• Brukseli përshëndet apelin e liderëve shqiptarë të Kosovës për kthimin e të zhvendosurve

• Përfundoi misioni paqeruajtës i trupave ruse në Kosovë

• Çeku thotë se bashkësia ndërkombëtare nuk është e gatshme që TMK-së t'i japë detyra të sigurisë dhe mbrojtjes

• SHBA-të i kanë akorduar Maqedonisë 12 milionë dollarë për reformimin e ushtrisë së saj

• Gafurr Adili dhe Taip Mustafaj u arrestuan në Tiranë për shkak se janë në "listën e zezë" të presidentit Bush

• Janë vrarë 2 irakianë dhe janë plagosur të pakten 8 ushtarë amerikanë në Irak

• Shrëder: Berluskoni duhet të kërkojë falje

• Nga shpërthimi i fishekzjarreve kanë humbur jetën 4 persona në Florida

• Trupat izraelite kanë vrarë një militant palestinez

• Një ushtar amerikan është plagosur sot nga një granatë

• Bush: Lindja e Mesme nuk do të ketë paqe pa zhdukjen e organizatave terroriste

• Berluskoni të kërkojë falje

Mesazh i Presidentit Rugova për Presidentin Bush me rastin e 4 Korrikut - Ditës së Pavarësisë së SHBA-ve

 

Prishtinë, 3 korrik 2003 - Presidenti i Kosovës, Dr. Ibrahim Rugova, i ka dërguar Presidentit të SHBA-ve Xhorxh Bush një mesazh me rastin e 4 Korrikut - Ditës së Pavarësisë së SHBA-ve.

Në mesazhin e Presidenti Rugova thuhet:

"I dashuri President Bush,

 

Me rastin e 4 Korrikut - Ditës së Pavarësisë së Shteteve të Bashkuara të Amerikës, pranoni urimet e mia të përzemërta dhe të popullit të Kosovës.

Kemi bindje të plotë se SHBA-të, nën udhëheqjen Tuaj, edhe këtë vit kanë dalë më të forta me betejën që kanë bërë kundër të keqes, në ndërtim të paqes e të lirisë së kombeve.

Ju shprehim një falënderim të madh për kujdesin që po tregoni për Kosovën e lirë në zhvillimin e saj demokratik, që si vend i lirë të hyjë në bashkësinë e kombeve të lira.

Presim që SHBA-të të përkrahin edhe më tej Kosovën, sidomos në njohjen formale të pavarësisë së Kosovës, që do të qetësonte popullin e Kosovës dhe këtë pjesë të botës.

Populli i Kosovës Ditën e Pavarësisë së SHBA-ve e konsideron si festë të përbashkët, sepse gjithmonë ka ndjenja dashurie dhe miqësie permanente për vendin Tuaj të çmuar e të fuqishëm, simbol i lirisë, pavarësisë dhe demokracisë në botë",

 

thuhet në fund të përgëzimeve të Presidentit Rugova drejtuar Presidentit amerikan Xhorxh Bush.

 

 

Kofi Anan thotë se situata në Kosovë dukshëm është përmirësuar

 

Nju Jork, 3 korrik 2003 - Situata në Kosovë dukshëm është përmirësuar, veçanërisht në realizimin e autonomisë së qëndrueshme dhe qeverisjes, siç është parashikuar me rezolutën 1244, thotë sekretari i përgjithshëm i Kombeve të Bashkuara, Kofi Anan në raportin e tij më të ri për Kosovën, i cili do të shqyrtohet sot në Këshillin e Sigurimit.

Anan thekson se Përfaqësuesi i tij special në Kosovë dhe UNMIK-u në zgjidhjen e të gjitha sfidave rreptësisht do t'u përmbahen parimeve "standardet para statusit" dhe me vendosmëri do të përpiqen që të gjitha rrjedhat të zhvillohen në pajtim me Rezolutën 1244 dhe ligjet ekzistuese dhe Kornizën kushtetuese.

Thirrjet e njëanshme të shqiptarëve e serbëve të Kosovës dhe të Beogradit për zgjidhjen e çështjes së të ardhmes së Kosovës, "sipas mënyrës e cila për palën tjetër është e papranueshme", po vazhdojnë dhe nuk i kontribuojnë pajtimit, thotë Anan.

Ai thotë se udhëheqja e shqiptarëve të Kosovës edhe më tutje po insiston në rrugën e përshpejtuar për pavarësi, ndërkaq Beogradi po përpiqet ta ndajë administratën me UNMIK-un dhe duke i përkrahur strukturat paralele, po ndihmon bojkotimin e vendimeve dhe programit të UNMIK-ut.

Mirëpo Anan përshëndet paralajmërimet e udhëheqësve të Beogradit dhe Prishtinës të t'i fillojnë bisedimet për çështjet e "ndërsjella praktike të rëndësishme" dhe i ftoi të dy palët që ato biseda t'i zhvillojnë në mënyrë konstruktive.

Poashtu Anan konsideron se Kuvendi i Kosovës kohë pas kohe po i tejkalon kompetencat e veta dhe po merret me çështjet për të cilat nuk është i autorizuar. Raporti flet edhe për pozitën e pakënaqshme të sigurisë së pakicave, e veçanërisht serbëve, dhe nevojës për krijimin e kushteve për kthimin e refugjatëve dhe të personave të shpërngulur.

 

 

Në bazë të një urdhërese të Shtajnerit parapagimi për RTVK-në - 3,5 euro në muaj

 

Prishtinë, 3 korrik 2003 - Posta dhe Telekomi i Kosovës dhe Radio Televizioni i Kosovës kanë nënshkruar një marrëveshje mirëkuptimi, siç thuhet, për implementimin e plotë teknik dhe operativ të urdhëresës administrative për parapagimin e Radio Televizionit të Kosovës.

 

Në bazë të urdhëresës Administrative të nënshkruar nga kryadministatori Mihael Shtajner pagesa mujore për Radio Televizionin publik do të jetë 3.5 euro në muaj, thuhet në një njoftim të RTV Kosova.

Interpretuar në një gjuhë më të thjeshtë, kjo do të thotë se qytetarët e Kosovës që kanë televizor tash e tutje janë të detyruar të paguajnë taksën mujore prej 3,5 euro në muaj në emër të parapagimit për RTVK dhe kjo do të bëhet përmes postës.

Më herët kishin dështuar bisedimet ndërmjet KEK-ut e RTV Kosova që parapagimi të bëhej nëpërmjet faturës së energjisë elektrike.

 

 

Deputetët kritikojnë procesin e privatizimit në Kosovë

 

Prishtinë, 3 korrik 2003 - Deputetët e Kuvendit të Kosovës në seancën e sotme diskutuan për procesin e privatizimit në Kosovë dhe ndërkohë me shumicë votash miratuan ligjin për mjedisin dhe planifikimin hapësinor. Lidhur me procesin e privatizimit në këtë seancë folën përfaqësuesit e Agjencisë Kosovare të Mirëbesimit (AKM).

 

Ata thanë se procesi i privatizimit është i rëndësishëm jo vetëm për të përfituar nga shitja e ndërmarrjeve por për arritjen e një zhvillimi ekonomik, i cili nuk mund të qëndrojë me një import prej 80 për qind dhe me një eksport prej vetëm 15 për qind.

Pas ekspozesë së përfaqësuesve të AKM-së, me tone mjaft kritike diskutuan deputetët e Kuvendit. Në diskutime u shtrua pyetja se pse po zhvillohet procesi i privatizimit pa pjesëmarrjen e Qeverisë së Kosovës apo pse në listën për privatizim gjenden shumë ndërmarrje nga Mitrovica?

 

Gjithashtu u kërkua që para privatizimit të sqarohet statusi i pronës së ndërmarrjeve, sepse kjo më vonë do të shkaktojë probleme të shumta. Poashtu deputetët vunë në dyshim të drejtën për ndërrimin e titullarit të pronës, ngase UNMIK-u ka të drejtë vetëm të menaxhojë me pronën.

Pas një debati të zhvilluar në këtë temë, kryetari i Kuvendit të Kosovës kërkoi që të formulohet një qëndrim i përbashkët me shkrim rreth procesit të gjertanishëm të privatizimit dhe pastaj t'i dorëzohet AKM-së si qëndrim zyrtar i Kuvendit të Kosovës.

Gjithashtu në seancën e sotme, deputetët pas shqyrtimit të dytë, me shumicë votash miratuan ligjin për mjedisin dhe planifikimin hapësinor.

 

 

Mbi 200 invalidë të punës kanë hyrë në grevë urie

 

Prishtinë, 3 korrik 2003 - Në lokalet e Shoqatës së Invalidëve të Kosovës në Prishtinë dje mbi mbi 200 invalidë të punës nga të gjitha pjesët e Kosovës kanë hyrë në një grevë urie. Ndërkaq numri i tyre është duke u shtuar. Ata kërkojnë pagesën e pensioneve të tyre prej 1 korrikut të vitit 2002.

 

Për vitin 2002 ata kërkojnë t'u paguhen pensionet prej 28 eurosh, ndërkaq për vitin 2003 nga 35 euro. Invalidët kërkojnë gjithashtu edhe pagesa për dëmtime trupore, pagesa për ilaçe dhe për kontrollime mjekësore, pagesa për pajisje protetike e ortopedike, lirimin e tyre nga të gjitha taksat doganore dhe obligimet komunale.

 

 

Prej sot të gjithë personat që shfrytëzojnë pronat e huaja duhet t'i lirojnë ato

 

Prishtinë, 3 korrik 2003 - Tashmë ka skaduar afati për mbledhjen dhe dorëzimin e kërkesave për pronën e humbur në Drejtoratin e UNMIK-ut për Çështje Pronësore e Banesore. Ndërkaq, prej dje të gjithë ata persona, të cilët shfrytëzojnë pronat e huaja duhet t'i lirojnë ato, ndryshe do të ballafaqohen me largim të dhunshëm nga objektet e uzurpuara.

 

 

KMDLNJ përkrah procesin e kthimit dhe të integrimit të të zhvendosurve

 

Prishtinë, 3 korrik 2003 - Këshilli për Mbrojtjen e të Drejtave e të Lirive të Njeriut përshëndet dhe mbështet fuqishëm letrën e udhëheqësve të Kosovës drejtuar të gjithë të zhvendosurve që të kthehen në Kosovë, duke e vlerësuar këtë si hap të drejtë dhe të qëlluar.

 

Kjo, sipas KMDLNJ-së, tekefundit, është dhe duhet të jetë interes i përbashkët jo vetëm i të zhvendosurve, por i të gjithë qytetarëve të Kosovës në interes të së sotmes dhe të ardhmes së Kosovës.

KMDLNJ në një prononcim të sotëm thekson se përherë është angazhuar për integrimin e pakicave në Kosovë, për tolerancë dhe dialog ndëretnik si dhe për kthimin dhe riintegrimin e të zhvendosurve pa dallime.

 

Kontributi i KMDLNJ-së në këtë drejtim është i njohur për opinionin vendor e ndërkombëtar në përgjithësi dhe për institucionet dhe organizmat vendorë e ndërkombëtarë në veçanti.

KMDLNJ në fund të këtij prononcimi edhe një herë shpreh gatishmërinë për të vazhduar angazhimin maksimal, të sinqertë dhe konkret si dhe mbështetjen për të gjitha institucionet që angazhohen dhe kontribuojnë në këtë drejtim, duke kërkuar nga to dhe nënshkruesit e letrës që të vazhdojnë të kontribuojnë konkretisht për ato që janë theksuar në letrën drejtuar të zhvendosurve.

 

 

Ministria e Jashtme shqiptare vlerëson apelin drejtuar personave të shpërngulur që të kthehen në Kosovë

 

Tiranë, 3 korrik 2003 - Ministria shqiptare e Punëve të Jashtme shpreh vlerësimin e saj për nismën e ndërmarrë në bllok nga udhëheqësit politikë dhe institucionalë të Kosovës, të cilët u kanë bërë apel publik të gjithë personave të shpërngulur të kthehen në Kosovë.

Ky veprim është një dëshmi konkrete se drejtuesit kosovarë kanë përqafuar frymën e re integruese që ka pëfshirë të gjithë rajonin dhe janë bërë katalizatorë të proceseve të brendshme të bashkëpunimit dhe mirëkuptimit të ndërsjelltë, duke hedhur edhe një hap tjetër në përmbushjen e standarteve të bashkëjetesës ndëretnike.

 

 

Gjyqi për dëbimin e «Rilindjes» nga Pallati i Rilindjes shtyhet për në fillim të shtatorit

 

Prishtinë, 3 korrik 2003 - Gjyqi për dëbimin e gazetës tradicionale të Kosovës «Rilindja» nga Pallati i Rilindjes u shty deri në fillimin e shtatorit, për shkak se përfaqësuesi i palës së paditur nuk erdhi në seancën e shqyrtimit kryesor të ftuar për sot në Gjykatën Komunale të Prishtinës.

Seanca e sotme u shty deri në fillim të shtatorit meqë nuk kishte ardhur përfaqësuesi i AKM-së, njoftoi avokati mbrojtës i «Rilindjes», Ilaz Ramajli, i cili pas padisë fillestare të «Rilindjes» ndaj UNMIK-ut si palë të paditur ka specifikuar edhe Agjencinë Kosovare të Mirëbesimit (AKM), që aktualisht ka kompetencat për ndërmarjet shoqërore.

«Rilindja» detyrimisht është mbyllur më 21 Shkurt 2002 pasi Pallati i Rilindjes u mor nga UNMIK-u për ndërtesë qeveritare, pa gjetur zgjidhje alternative për lokale pune, edhe pse ishte premtuar nga autoritetet.

Punonjësit e "Rilindjes" përmes gjyqit kërkojnë të drejtën e kthimit në lokalet e tyre të punës apo të gjendet një zgjidhje alternative për lokale pune, të drejtën e vazhdimit të punës që u është ndërprerë, thonë ata. Njëherit kërkojnë edhe dëmshpërblim: për hedhjen nga puna në rrugë, për mbetjen pa punë e pa rroga qe më se një vit e gjysmë.

"Ne mendojmë se rasti i Rilindjes është një shkelje e të drejtave në përmasa të rënda, përfshirë edhe të drejtën për ekzistencë dhe të drejtën e shtypit të lirë. Për këtë, presim që fjalën ta thotë drejtësia dhe ftojmë palën e paditur që t'i përgjigjet ballafaqimit me drejtësinë", thuhet në një njoftim të "Rilindjes".

 

 

Koalicioni serb "Kthimi" e ka mirëpritur nismën për kthimin e të zhvendosurve

 

Beograd, 3 korrik 2003 - Koalicioni serb "Kthimi" e ka mirëpritur nismën e udhëheqësve të Kosovës për kthimin e pakicave të zhvendosura në Kosovë. Deputeti Oliver Ivanoviq tha se shpreson që kjo letër të mos mbetet vetëm një nismë por ajo të konkretizohet edhe me angazhimin konkret të udhëheqësve kosovarë në terren.

Ndërkaq, Partia Demokratike e Serbisë vlerëson se thirrja e liderëve shqiptarë të Kosovës drejtuar serbëve që të kthehen në shtëpitë e tyre, pa garancione për sigurinë e tyre, paraqet, siç thuhet, "kulmin e cinizmit dhe një truk të tejdukshëm politik".

 

 

Brukseli përshëndet apelin e liderëve shqiptarë të Kosovës për kthimin e të zhvendosurve

 

Bruksel, 3 korrik 2003 - Thirrja e liderëve shqiptarë të Kosovës drejtuar refugjatëve serbë dhe pakicave të tjera të kthehen në shtëpitë e tyre, është një shenjë e mirë që do të duhej të pasohet edhe me hapa konkret, kanë thënë zyrtarët e Bashkimit Evropian. Ata kanë nënvizuar se kthimi i refugjatëve në territorin e ish-Jugosllavisë është edhe prioritet i angazhimit të bashkësisë ndërkombëtare atje.

 

 

Përfundoi misioni paqeruajtës i trupave ruse në Kosovë

 

Prishtinë, 3 korrik 2003 - Dje përfundoi misioni paqeruajtës katërvjeçar i trupave ruse në Kosovë me një ceremoni lamtumirëse të mbajtur në aeroportin e Prishtinës, ku merrnin pjesë zyrtarë ushtarakë nga Rusia, komandanti i krahut jugor të NATO-s, Gregori Xhonson, komandanti i KFOR-it Fabio Mini, komandantët e njësiteve shumkombëshe të forcave paqeruajtëse dhe kryeministri i Kosovës Bajram Rexhepi.

"Së bashku me forcat e tjera të KFOR-it i shërbyem një qëllimi: vendosjen e paqes së paluhatëshme në rajon. U dëshirojmë paqe dhe përparime popujve të Kosovës", ka thënë komandanti i kontigjentit rus në Kosovë Nikollaj Krivencov, duke folur në këtë solemnitet.

Me këtë rast komandanti i KFOR-i, gjenerali Fabio Mini ka lavdëruar kontributin rus për sigurimin e paqes në Kosovë.

Trupat ruse kishin arritur më 11 qershor 1999, para trupave të NATO-s dhe pushtuan aeroportin.

 

 

Çeku thotë se bashkësia ndërkombëtare nuk është e gatshme që TMK-së t'i japë detyra të sigurisë dhe mbrojtjes

 

Prishtinë, 3 korrik 2003 - Grupi i lartë për zhvillim të TMK-së shqyrtoi dje çështjet e infrastrukturës si dhe përfshirjen e institucioneve të Kosovës në punën e TMK-së.

Komandanti i TMK-së, gjenerali Agim Çeku tha se këto fusha janë vetëm hap i parë dhe nën mandatin aktual të TMK-së, sepse siç tha ai, bashkësia ndërkombëtare në këtë moment nuk është e gatshme që t'i japë TMK-së detyra nga fusha e sigurisë dhe mbrojtjes. Ai shtoi se mbetet që në grupe punuese të identifikohen konkretisht të gjitha detyrat.

Në takimin e këtij grupi punues morën pjesë përfaqësuesit e UNMIK-ut, KFOR-it dhe zyrave të pesë vendeve perëndimore më me ndikim në Kosovë. Në këtë takimi ishte i pranishëm edhe komandanti i krahut jugor të NATO-s, admirali Gregori Xhonson.

 

 

SHBA-të i kanë akorduar Maqedonisë 12 milionë dollarë për reformimin e ushtrisë së saj

 

Shkup, 3 korrik 2003 - Shtetet e Bashkuara të Amerikës i kanë akorduar 12 milionë dollarë ndihmë Maqedonisë për reformimin e ushtrisë së saj, theksoi ministri maqedonas i Mbrojtjes Vllado Buçkovski.

 

I ngarkuari i Pentagonit për Evropën Juglindore Xhon Erak thekson se Maqedoninë në të ardhmen e pret një punë e vështirë pasi për anëtarësimin e saj në NATO duhet të përmbushen të gjitha kriteriet dhe standardet e parashikuara.

 

 

Gafurr Adili dhe Taip Mustafaj u arrestuan në Tiranë për shkak se janë në "listën e zezë" të presidentit Bush

 

Tiranë, 3 korrik 2003 - Organet policiore në Shqipëri kanë konfirmuar se kanë arrestuar në periferi të Tiranës dy veprimtarët kryesorë të AKSH-së. Gafurr Adili dhe Taip Mustafaj, të dy shqiptarë nga Maqedonia u arrestuan për shkak të pranisë së tyre në listën e zezë të përpiluar një vit më parë nga Departamentit i Shtetit, e firmosur nga vetë presidenti amerikan Xhorxh Bush.

 

Burimet e policisë thonë se ndaj Adilit dhe Mustafajt është ngritur akuzë për nxitje të urrejtjes nacionaliste mes kombeve, si dhe për krijimin e bandave të armatosura.

 

Të njëjtat burime theksojnë se Gafurr Adili që është sekretar politik i AKSH-së në Maqedoni dhe bashkëpuntori i tij Taip Mustafaj, tash disa ditë kishin hyrë në Shqipëri dhe ishin strehuar në një banesë në periferi të Tiranës, duke vepruar në ilegalitet.

Katër muaj më parë Gafurr Adili është ndaluar të futet në Shqipëri nëpërmjet aeroportit ndërkombëtar "Nëna Terezë" në Tiranë, pasi ai udhëtonte në linjën Cyrih - Tiranë.

 

 

Janë vrarë 2 irakianë dhe janë plagosur të pakten 8 ushtarë amerikanë në Irak

 

Bagdad, 3 korrik 2003 – Lidhur me zhvillimet e sotme në Irak bëhet e ditur se është goditur me lëndë shpërthyese një kamion ushtarak amerikan në perëndim të Badadit. Në këtë incident janë plagosur gjashtë ushtarë amerikanë.

 

Po kështu, në një incident tjetër të sotëm janë plagosur edhe dy ushtarë të tjerë amerikanë, kanë bërë të ditur zyrtarët amerikanë. Ndërkaq, në një shpërthim gjatë demonstratave të sotme në Bakouba, 35 mila në verilindje të Bagdadit, është vrarë një irakian dhe janë plagosur edhe pesë të tjerë. Demonstruesit protestonin kundër një shpërthimi të djeshëm, gjoja amerikan, në qytetin fetar shit.

Po sot në mengjes, një sulmues ka gjuajtur nga prita me granatë autokolonën ushtarake amerikane, që shkonte përposh Bagdadit, duke plagosur një ushtar, por trupat amerikane në shkëmbim zjarri kanë vrarë një këmbësor, kanë thënë dëshmitarët.

 

Njoftohet se ushtarët amerikanë kanë vrarë sot edhe një shofer të një automjeti, nga i cili është gjuajtur me granatë një kamion ushtarak amerikan. Ushtarët kanë kërcyer me të shpejtë prej tij dhe kështu kanë shpëtuar nga më e keqja, duke u plagosur vetm një ushtar, njofton AP.

 

 

Shrëder: Berluskoni duhet të kërkojë falje

 

Berlin, 3 korrik 2003 - Kancelari gjerman Gerhard Shrëder ka kërkuar sot ndjesë të plotë të kryeministrit italian Silvio Berluskoni për shkak të deklaratës së djeshme në të cilën Berluskoni një përafqësues gjerman në Parlamentin Evropian e ka krahasuar me komandantin e kampit nacist.

 

Shrëder në fillimi të një fjalimi në Bundestagun gjerman ka deklaruar se krahasimi i Berluskonit është i pahijshëm dhe plotësisht i papranueshëm.

 

 

Nga shpërthimi i fishekzjarreve kanë humbur jetën 4 persona në Florida

 

Majami, Florida, 3 korrik 2003 – Një kamion i mbushur përplot fishekzjarre të 4 Korrikut ka shpërthyuer dje në parkingun shtetëror në qytetin bregdetar Bonita Springs në Florida, duke i vrarë kështu katër persona, ka bërë të ditur organizatori i kremtimeve të Ditës së Pavarësisë amerikne në këtë qytet, njofton Rojter.

 

Fishekzjarret në momentin e shpërthimit transferoheshin nga një kamion në tjetrin. Një tjetër person është plagosur në vendngjarje, kurse një tjetër ka shpëtuar nga shpërthimi duke kërcyer në ujë të detit.

 

 

Trupat izraelite kanë vrarë një militant palestinez

 

Kelkilia, 3 korrik 2003 – Trupat izraelite kanë vrarë sot (e enjte) një militant palestinez në Bregun Perendimor, vetëm disa orë pasi presidenti Bush lavdëroi shtetin izraelit për dorëzimin e Betlehemit sipas planit amerikan të paqes, njofton Rojter.

 

Burimet e forcave të sigurimit palestinez kanë thënë se ushtarët kanë vrarë në qytetin Kelkilia një anëtar të Brigadave të Martirëve Al Aksa, që kanë lidhje me fraksionin Al Fatah të presidentit palestinez, Jaser Arafat. Armata izraelite ka thënë se trupat kanë vrarw një palestinez të armatosur gjatë një operacioni arrestimi.

 

 

Një ushtar amerikan është plagosur sot nga një granatë

 

Bagdad, 3 korrik 2003 – Një ushtar amerikan është plagosur sot (e enjte) kur një granatë raketore ka goditur automjetin e tij “Hamvi” në qendër të Bagdadit, njofton Rojter sipas pohimeve të dëshmitarëve. Po kështu, dëshmitarët oklularë në vendin e ngjarjes kanë thënë se në këtë incident, që ka ndodhur në një rrugë të Haifas, janë plagosur edhe disa kalimtarë irakianë të rastit.

 

 

Bush: Lindja e Mesme nuk do të ketë paqe pa zhdukjen e organizatave terroriste

 

Uashington, 3 korrik 2003 - Presidenti amerikan Bush tha se është i kënaqur me zhvillimet e fundit në Lindjen e Mesme, por paralajmëroi se ende ka grupe ekstremiste që kërkojnë të ndërpresin procesin e paqes.

Reagimi i Bushit ndaj ngjarjeve të fundit në Lindjen e Mesme është zakonisht optimist. Gjithsesi, thotë ai, është një lloj optimizmi i përzier me një dozë të fortë realizmi.

 

 

Berluskoni të kërkojë falje

 

Bruksel, 3 korrik 2003 - Udhëheqësit partiakë në Parlamentin Evropian, kanë kërkuar nga kryeministri italian, Silvio Berluskoni, që të kërkojë ndjesë formale pas sugjerimeve të tij për politikanin gjerman se duhet të luajë rolin e gardës në një film të ri për kampet naciste të përqëndrimit.

Zoti Berluskoni i bëri këto komente gjatë paraqitjes në Parlamentin Evropian për të shënuar marrjen e presidencës së rradhës nga Italia.

Berluskoni tha se ishte i befasuar që komentet e tij kanë prekur ndjenjat e qytetarëve gjermanë.
  

Politikanët italianë kanë reaguar me zemërim, ndërkaq të gjelbërit kanë kërkuar dorëheqjen e Berluskonit.

Copyright©2000-2003 Trepca.net - Të gjitha të  drejtat e rezervuara.