Lajme

E mërkure 2 korrik 2003

Përmbajtja:

• Presidenti Rugova ka përgëzuar qytetarët e Kosovës me rastin e 2 Korrikut

• Presidenti Rugova: Me Deklaratën e 2 korrikut janë vënë themelet e shtetit modern të Kosovës

• Shtajner përshëndet letrën e liderëve kosovarë drejtuar personave të zhvendosur që të kthehen në shtëpitë e tyre

• Për serbët edhe një afat për regjistrimin e veturave me KS

• Në Tiranë janë arrestuar dy drejtues të AKSH-së

• Gjilan: Shqiptarët nuk kanë patur asnjë motiv për t`i ruajtur deri tani dokumentat serbe

• Koloneli Newell mohon të ketë patur dje hyrje të ushtrisë serbe në Myçibabë

• Dr. Gashi: Demokracia është përcaktimi i LDK-së dhe tani ajo ndodhet në fazën e jetësimit të pavarësisë

• Bëhet renovimi i ndërtesës së Kuvendit të Kosovës

• Në tregun e veturave në Pejë zbulohen 9 vetura të shtrenjta të vjedhura në vendet evropiane

• Ashkalinjtë kërkojnë të kthehen në Kosovë

• Në pikën kufitare Kosovë-Serbi është gjetur një granate dore

• Shtajner do të raportojë sot për Kosovën në sesionin e rregullt të KS të OKB-së

• Një prokuror ndërkombëtar ka ngritur aktakuzën kundër Jetullah Qarrit

• Invalidët e punës për shkak të gjendjes së rëndë sociale prej sot do të hyjnë në grevë urie

• Në "listën e zezë" të BE-së nuk ka persona apo organizata shqiptare

• Përgënjështrim i qeverisë greke

• Një nxënës në Gjermani ka bërë vetëvrasje pasi më parë kishte plagosur arsimtarin

• Një burrë është vetëvrarë në Kabul nga mjetet plasëse

• pakten 18 veta kanë humbur jetën dhe 25 të tjerë janë lënduar në Indinë Jugore

• Një ushtar amerikan, i cili qe plagosur dje në një sulm të një konvoji ushtarak, ka vdekur nga plagët

• Një gjykatë e Sri Lankës ka dënuar me vdekje pesë persona për rolin e tyre në një masakër

• Një punëtor i një fabrike ka vrarë tre bashkëpunëtorë dhe ka plagosur edhe disa të tjerë

• Italia mori dje nga Greqia presidencën e radhës së BE-së për periudhën gjashtëmujore

• Sharon dhe Abaz: Ka shpresa për paqen

• Presidenti Bush thotë se në Irak nuk do të kthehet tirania

• Izraelitët largohen nga Bethlehemi

• Bush - nuk do të largohemi nga Iraku

Presidenti Rugova ka përgëzuar qytetarët e Kosovës me rastin e 2 Korrikut

 

Prishtinë, 2 korrik 2003 - Presidenti i Kosovës Ibrahim Rugova, me rastin e 2 korrikut - Ditës së Pavarësisë, me një mesazh i ka përgëzuar qytetarët e Kosovës.

 

"Me rastin e Ditës së Pavarësisë së Kosovës, 2 korrikut, Ju shpreh urimet e mia të përzemërta.

Dita e 2 korrikut, kur u shpall Deklarata e Pavarësisë para 13 vjetësh, është një datë e rëndësishme në historinë më të re të Kosovës.

 

Me këtë Deklaratë u vunë themelet e shtetit modern të Kosovës, që u pasua me Kushtetutën e Republikës së Kosovës, me referendumin për pavarësi, me zgjedhjet presidenciale dhe parlamentare, si dhe me akte të tjera madhore.

Për katër vjet në liri, Kosova ka bërë një progres të madh në të gjitha fushat e jetës.

 

Objektivat e institucioneve shtetërore të Kosovës, në të cilat po punohet, janë: zhvillimi ekonomik, privatizimi, investimet dhe vendet e punës për të rinjtë.

 

Poashtu, objektiv qendror është shpejtimi i integrimit në BE dhe në NATO, qenia në miqësi permanente me SHBA-të, pra njohja formale e pavarësisë së Kosovës.

Në këtë ditë, përshëndesim UNMIK-un dhe zotin Shtajner, OSBE-në me ambasadorin Fieski. Njëherësh, përshëndesim komandantët dhe ushtarët e KFOR-it/NATO-s, të drejtuar nga gjeneral Fabio Mini.

Poashtu përshëndesim përfaqësitë diplomatike në Prishtinë.

Në këtë ditë të shënuar për ne, përshëndesim Presidentin Bush, Kryeministrin Bler, Presidentin Shirak, Kancelarin Shreder dhe Kryeministrin Berluskoni.

Si gjithmonë përshëndesim Atin e Shenjtë, Papa Gjon Palin II, që gjithnjë lutet për Kosovën.

Zoti e bekoftë Ditën e Pavarësisë, 2 korrikun!

Zoti e bekoftë Kosovën!", thuhet në fund të këtij mesazhi të Presidentit Rugova.

 

 

Presidenti Rugova: Me Deklaratën e 2 korrikut janë vënë themelet e shtetit modern të Kosovës

 

Prishtinë, 2 korrik 2003 - Presidenti i Kosovës Ibrahim Rugova, për nder të 2 korrikut - Ditës së pavarësisë së Kosovës, priti sot në një takim deputetët e Kuvendit të Kosovës, të cilët para 13 vjetësh e shpallën Deklaratën Kushtetuese të Pavarësisë së Kosovës, më 2 korrik të vitit 1990. Ky akt shumë i rëndësishëm, tha me këtë rast Presidenti Rugova, pastaj u pasua edhe me aktet e tjera madhore, siç ishte Kushtetuta e Republikës së Kosovës, Referendumi i pavarësisë më 1991, zgjedhjet nacionale dhe aktet e tjera të mbrojtjes së Kosovës.

 

Presidenti Rugova 2 korrikun e vlerësoi një ditë të rëndësishme për Kosovën dhe historinë e saj më të re.

 

Me këtë Deklaratë janë vënë themelet e shtetit modern të Kosovës, përkujtoi Presidenti Rugova, duke u shprehur mirënjohje të gjithë deputetëve të asaj legjislature që e shpallën këtë deklaratë dhe shfaqi shpresën se së shpejti kjo ditë e rëndësishme do të jetë edhe ditë nacionale.

 

Presidenti Rugova vlerësoi pozitivisht hapat përpara që po bën Kosova sot, dhe pret njohjen formale të pavarësisë në të cilën ai insiston vazhdimisht.

 

Këto ditë, tha në vazhdim ai, në Selanik Kosova u përfaqësua nga zoti Shtajner dhe një delegacion i Kosovës, ndërkaq në Krans Montana këto ditë ishte një debat për Evropën Juglindore dhe Qendrore, ku Kosova u radhit në pjesën e shteteve, tha Presidenti Rugova, duke e vlerësuar këtë pjesëmarrje si një moment të rëndësishëm.

"Ne insistojmë për njohjen formale të pavarësisë së Kosovës, e cila do ta qetësonte rajonin e Evropës Juglindore dhe të kësaj pjese të botës, të integruar në NATO, në BE dhe në miqësi të përhershme me SHBA-të", theksoi Presidenti Rugova para deputetëve, duke i përgëzuar edhe njeherë për Ditën e pavarësisë.

Iliaz Ramajli, në emër të deputetëve të legjislaturës së atëhershme të Kuvendit të Kosovës, falënderoi Presidetin Rugova për ftesën e bërë për ta shënuar këtë datë të rëndësishme bashkarisht për Kosovën dhe qytetarët e saj.

 

Zoti Ramajli tha se ky është edhe një mesazh i fuqishëm, për faktorin ndërkombëtar, për të gjithë ata që merren me çështjen e Kosovës, sepse ajo po ecën drejt qëllimit të saj përfundimtar që të bëhet shtet sovran dhe i pavarur.

Edhe zoti Ramajli Deklaratën Kushtetuese të 2 korrikut 1990 e vlerësoi se ditë të rëndësishme, e cila, siç u shpreh ai, "është një bazë dhe një fillim i cili u pasua pastaj me akte madhore dhe me shumë ngjarje të tjera të rëndësishme që ne sot të jetojmë të lirë dhe ndodhemi në një fazë përfumditare të realizimit të qëllimeve tona që Kosova të bëhet shtet i pavarur".

Duke e falënderuar Presidentin Rugova për këtë pritje Iliaz Ramajli tha: "Ne besojmë thellësisht se ju me këtë rast po rikujtoni një kontribut të gjeneratave më të hershme që u angazhuan për lirinë dhe pavarësinë e Kosovës".

 

 

Shtajner përshëndet letrën e liderëve kosovarë drejtuar personave të zhvendosur që të kthehen në shtëpitë e tyre

 

Prishtinë, 2 korrik 2003 - Kryeadministratori, Mihail Shtajner përshëndet, siç tha, hapat pozitivë nga ana e liderëve kosovarë që përmes një letre publike u janë drejtuar personave të zhvendosur të Kosovës, të cilët gjenden në Serbi, në Maqedoni dhe Mal të Zi, duke i ftuar ata që të kthehen në shtëpitë e tyre.

Apeli është nënshkruar nga të gjithë liderët jo-serbë të Kosovës, përfshirë këtu, presidentin Ibrahim Rugova, kryeparlamentarin, Nexhat Daci, kryeministrin Bajram Rexhepi, liderin e PDK-së, Hashim Thaçi dhe liderin e AAK-së, Ramush Haradinaj.

"Kjo është ajo e cila na nevojitet për të kthyerit. Ky apel është një thyerje e gjuhës së të kaluarës dhe një hap pozitiv drejt ndërtimit të një Kosove shumetnike dhe drejt integrimit evropian", tha Shtajner para nisjes në Nju Jork, ku do t'i drejtohet për herë të fundit Këshillit të Sigurimit të OKB-së, në cilësinë e kryeadministratorit të Kosovës.

 

                         

Për serbët edhe një afat për regjistrimin e veturave me KS

 

Mitrovicë, 2 korrik 2003 - Pronarët veturat e të cilëve janë të regjistruara në Serbi apo në Mal të Zi mund të marrin targat e regjistrimit të Kosovës pa paguar doganë dhe taksa të tjera deri më 31 gusht të këtij viti.

 

Kjo u bëhet e mundshme atyre nëpërmjet një vendimi të administratës së UNMIK-ut 2003\5.

 

Me këtë vendim shtyhet afati i regjistrimit të autovetuave civile në pjesën veriore të Kosovës deri më 31 gusht, ka thënë zëdhënësi i UNMIK_ut në Mitrovicë Xhorxhi Kakuk.

 

Kjo është shyrja e tretë me radhë dhe serbët në dy afatet e mëparshme kanë bojkotuar regjistrimin e autovetura të tyre me targa të Kosovës.

 

 

Në Tiranë janë arrestuar dy drejtues të AKSH-së

 

Tiranë, 2 korrik 2003 - Në Tiranë janë arrestuar dy drejtues të AKSH-së, Gafurr Adili, i cili njihet si komandant i lartë dhe një drejtues tjetër i AKSH-së, emri i të cilit nuk u bë i ditur. Ndërkohë autoritetet shqiptare priten të përcaktojnë çështjen hetimore dhe t'ua përcjellin gjykatës këta dy persona.

 

Gjithashtu nga Tirana njoftohet se Gafur Adili mund të përballet me akuzën për nxitjen e urrejtjes ndëretnike dhe krim të formacioneve të armatosura.

 

Sipas policisë ai ka pasur pasaportë falco dhe dukumente të tjera. Gafurr Adili ndodhet në "listën e zezë" të presidentit amerikan dhe kjo është hera e dytë që ai ka problem në Shqipëri.

 

 

Gjilan: Shqiptarët nuk kanë patur asnjë motiv për t`i ruajtur deri tani dokumentat serbe

 

Gjilan, 2 korrik 2003 - Rregullorja e administratës ndërkombëtare në Kosovë, e cila i detyron aplikuesit e dokumentacionit personal që të dëshmohen me pasaportat ose letërnjoftimet e dikurshme të Serbisë, ka shkaktuar revoltë edhe në komunën e Gjilanit.

Këtë problem e ka diskutuar sot edhe Bordi i Drejtorëve, në mbledhjen e kryesuar nga kryeshefi Enver Muja, ku iu dha përkrahje reagimit të Qeverisë së Kosovës ndaj kësaj rregulloreje të UNMIK-ut, e cila i ka irituar pa masë qytetarët.

Drejtoria e sigurisë e sheh të nevojshme që të shtohet mbikëqyrja në qendrën e regjistrimit civil, nga punëtorët e saj, në mënyrë që të pengohen situatat e padëshirueshme që mund të ndodhin gjatë procedurave të aplikimit për dokumentacion personal. Drejtori Hazir Mustafa tha se zyrtarët e kësaj qendre ndihen të kërcënuar kur ua kërkojnë qytetarëve letërnjoftimet ose pasaportat e vjetra serbe.

Shqiptarët nuk kanë patur asnjë motiv për t`i ruajtur edhe tash, katër vite pas luftës dokumentat serbe që mbanin shenjën e një pushteti që e shkatërroi Kosovën dhe e tmerroi popullin e saj, tha Mustafa, duke i vlerësuar të arsyeshme reagimet e qytetarëve.

Ndërsa Agim Mustafa, shef i shërbimit të ofiqarisë e ka quajtur këtë rregullore të UNMIK-ut si dokumentin më diskriminues ndaj shqiptarëve. Duke shprehur mospajtim me sqarimet e këshilltarit komunal të UNMIK-ut, z. Bob Simons se dokumentacioni i vjetër është i nevojshëm për të hequr dyshimet në falsifikimet që mund të bëhen, z. Mustafa tha se nëse qëndron ky konstatim, atëherë dokumentacioni i administratës së UNMIK-ut paska qenë jolegjitim deri tani.

Bob Simons tha se UNMIK-u është duke u munduar që të krijojë lehtësi në këtë procedurë, por sqaroi se shtetet tjera kërkojnë dokumentacion të vlefshëm dhe për t`i hequr dilemat e tyre, është e nevojshme të bëhet kështu.

 

 

Koloneli Newell mohon të ketë patur dje hyrje të ushtrisë serbe në Myçibabë

 

Gjilan, 2 korrik 2003 - Kryetari i komunës, Lutfi Haziri dhe komandanti i kampit "Montith", koloneli Newell e vlerësuan të mirë gjendjen e sigurisë në rajonin e Gjilanit, në një takim të shkurtër që patën sot me gazetarët.

Koloneli Newell, i cili para disa ditësh e ka zëvendësuar komandantin e mëparshëm të kampit, Dejvid Sejxh, në kuadër të ndërrimeve të zakonshme të brigadave që bëhen nga KFOR-i, tha se patrullat e tij, prej 7 deri në 10 ditët e fundit, nuk kanë njohuri për hyrjen e ushtrisë serbe në territorin e Kosovës.

Ai tha se qytetarët e Myçibabës duhet të njoftojnë Shërbimin Policor të Kosovës ose KFOR-in, nëse vërejnë lëvizje të dyshimta të makinave ose personave në pjesën e këndejme të kufirit.

"Neve na duhen detaje identifikuese që t`i gjejmë ata", tha koloneli Newell, duke shtuar se nganjëherë ndodh që një person të thotë se ka parë diçka të dyshimtë dhe për këtë i ka treguar fqinjit të vet dhe kjo shkon nga njëri te tjetri, por askush prej tyre nuk lajmëron KFOR-in ose SHPK-në.

Informata e djeshme nga Myçibaba, duket se nuk ishte shumë serioze. Kryetari Haziri tha se komuna u jep përkrahje banorëve të atjeshëm që të mbeten në pronat dhe shtëpitë e tyre, sepse KFOR-i do të garantojë sigurinë e përgjithshme për ta.

 

 

Dr. Gashi: Demokracia është përcaktimi i LDK-së dhe tani ajo ndodhet në fazën e jetësimit të pavarësisë

 

Klinë, 2 korrik 2003 - Dr. Alush Gashi, anëtar i Kryesisë qendrore dhe deputet i Kuvendit të Kosovës vizitoi dje degën e LDK-së në Klinë dhe mori pjesë në një takim pune me kryesinë e kësaj dege, e në të cilin u fol për zhvillimet politike dhe aktivitetin partiak.

Duke folur në këtë takim dr. Alush Gashi tha se demokracia është përcaktimi i kahmotshëm i LDK-së dhe se tani ajo ndodhet në fazën të jetësimit të pavarësisë.

Në vazhdim dr.Gashi tha se LDK-ja nuk i ndryshonte opsionet sipas nevojave ditore. "Edhe përkundër presioneve dhe tentim izolimit diplomatik, ne qëndrojmë fuqimisht në opsion të pavarësisë dhe kërkesës për njohje ndërkombëtare të Kosovës - shtet i pavarur, me anëtarësim të plotë në NATO dhe OKB dhe me përkushtim për arritje të standardeve të Bashkimit Evropian", nënvizoi Dr. Gashi.

 

Sipas tij, pavarësia është e panegociueshme, por ai tha se LDK mbështet bisedimet me fqinjët për implementimin e çështjeve me rëndësi të posaçme për Kosovën - shtet i pavarur dhe faktor i stabilitetit.

"Nga LDK-ja në Klinë kërkojmë punë të përditshme në mbështetje të organeve demokratike, në mënyrë që pushteti të jetë në shërbim të qytetarëve dhe, mbi të gjitha, angazhim për siguri dhe hapje të vendeve të reja të punës", tha ai.

Alush Gashi duke folur lidhur me kthimin e të zhvendosurve dhe refugjatëve, tha se LDK-ja mbështet përcaktimin e OKB-së për të drejtën e kthimit në vendin e origjinës për të gjithë dhe insiston që kjo çështje mos të politizohet.

Sa i përket krimeve që i kanë bërë forcat serbe dhe civilët në këtë pjesë të Kosovës, dr.Gashi tha se të gjithë ata që kanë të dhëna për krime, le të ngrisin padi në gjyq. Drejtësia duhet ta thotë fjalën e vet për ata që kanë bërë krime, pavarësisht se ku gjenden aktualisht, tha mes tjerash dr. Alush Gashi.

 

 

Bëhet renovimi i ndërtesës së Kuvendit të Kosovës

 

Prishtinë, 2 korrik 2003 - Siç bëhet e ditur, kah gjysma e muajit korrik Kuvendi i Kosovës i fillon pushimet verore. Parashihet që pushimet të zgjasin rreth dy muaj dhe kjo bëhet për shkak të renovimeve të nevojshme në ndërtesën e Kuvendit.

 

 

Në tregun e veturave në Pejë zbulohen 9 vetura të shtrenjta të vjedhura në vendet evropiane

 

Pejë, 2 korrik 2003 - Në një aksion të policisë së trafikut, në tregun e veturave ndërmjet Pejës sdhe Deçanit, janë zbuluar nëntë autovetura të vjedhura nëpër vendet e ndryshme të Evropës.

 

Policia më parë kishte mbyllur tregun dhe pasi kontrollon 100 vetura, nëntë vetura të shtrenjta janë zbuluar të vjedhura dhe ato do t'u kthehen pronarëve, thuhet në një njoftim të SHPK-së.

 

 

Ashkalinjtë kërkojnë të kthehen në Kosovë

 

Gjermani, 2 korrik 2003 - Një shoqatë hashkalinj/egjiptian në Gjermani u është drejtuar institucionve të Kosovës me nje letër në të cilët kërkohet që të bëhet i mundshëm kthimi i këtij komuniteti në Kosovë.

Pjesëtarët e komunitetit hashkalinj/egjiptian të Kosovës janë të vetëdijshëm se institucionet e Kosovës kanë probleme të shumta në zgjidhjen e çështjeve të përdishme të qytetarëve, por pjesëtarët e këtij komuniteti janë duke u përballur me probleme ekzistenciale në kampe të ndryshme refugjatësh e sidomos në kufirin maqedonas-grek, thuhet në letër.

 

Ndërkaq, në Kosovë shtëpitë dhe pronat e pakta që i kanë poseduar ata janë shkatërruar nga lufta ose janë uzurpuar nga personat e pandërgjegjëshëm.

"Popullata hashkalinj/egjiptiane ka jetuar me shekuj në Kosovë dhe e ndiejnë veten banorë autoktonë të Kosovës, andaj i lutemi institucioneve përkohshme të Kosovës të marrin masa të shpejta të për zgjidhjen sa më të shpejtë të problemeve të shumta që e preokupojnë popullatën tonë nëpër kampe ballkanike, në qoftë se i konsideroni si qytetarë të Kosovës", thuhet në këtë letër të kësaj shoqate të nënshkruar nga kryetari i saj, Xhemail Mustafa.

 

 

Në pikën kufitare Kosovë-Serbi është gjetur një granate dore

 

Mitrovicë, 2 korrik 2003 - Magjistralja e Ibrit dje ka qenë e bllokuar përreth tri orë për shkak të gjetjes së një granate dore në afërsi të kufirit Kosovë- Serbi, kanë njoftuar burimet e policisë ndërkombëtare në Mitrovicë. Por, ky burim nuk dha hollësi të tjera se çfarë ka ndodhur me atë granatë dore.

 

 

Shtajner do të raportojë sot për Kosovën në sesionin e rregullt të KS të OKB-së

 

Prishtinë, 2 korrik 2003 - Kryeadministratori i Kosovës, Mihael Shtajner dje pasdite është nisur për në Nju-Jork ku do të raportojë sot për Kosovën në sesionin e rregullt të KS të OKB-së. Është ky raportimi i fundit i Shtajnerit në këtë cilësi, ngase ai që nga java e ardhshme do të përfundojë mandatin e tij në Kosovë.

 

 

Një prokuror ndërkombëtar ka ngritur aktakuzën kundër Jetullah Qarrit

 

Prizren, 2 korrik 2003 - Burimet e Misionit të OKB-së bënë ditur se një prokuror ndërkombëtar në Prizren ka akuzuar një shqiptar për armëmbajtje pa leje. Jetullah Qarri 44-vjeçar ish-pjesëtar i UÇK-së i njohur me emrin e luftës si komandant "Guri" është arrestuar në muajin shkurt të këtij viti meqë në shtëpinë e tij ishte gjetur një sasi e armëve dhe municionit, veç tjerash 40 mina antikëmbësorike dhe po aq mina antitank.

Ndërkaq, zëdhënësi i Misionit të UNMIK-ut, Andrea Anjeli, citohet të ketë thënë se gjykimi i të akuzuarit Jetullah Qarrit, pritet të fillojë gjatë verës në Gjykatën e Qarkut në Prizren.

 

 

Invalidët e punës për shkak të gjendjes së rëndë sociale prej sot do të hyjnë në grevë urie

 

Prishtinë, 2 korrik 2003 - Invalidët e punës të pakënaqur me gjendjen e rëndë sociale për sot kanë paralajmëruar grevë urie në lokalet e selisë së tyre në Prishtinë. Këtë lajm e konfirmoi edhe Shefki Miftari, sekretar i Organizatës së Invalidëve të Punës së Kosovës.

 

Ai tha se prej sot çkado që do të ndërmarrin pushtetarët e Kosovës, përfshirë këtu edhe ministrin Ahmet Isufi, invalidët e punës, nuk do të tërhiqen nga greva e urisë, ngase ata aktualisht ndodhen në një gjendje të mjerueshme sociale. Ata kërkuan që t'u paguhen pensionet e tyre nga 100 euro.

 

 

Në "listën e zezë" të BE-së nuk ka persona apo organizata shqiptare

 

Bruksel, 2 korrik 2003 - Në listën e Bashkimit Evropian që u publikua dje, nuk ndodhet asnjë shqiptar apo organizatë shqiptare nga Kosova, Shqipëria, apo nga Maqedonia.

Në këtë listë të zezë janë përfshirë emrat e 14 personave të cilët janë qytetarë serbë të Bosnjes, por edhe të Serbisë dhe Malit të Zi për të cilët dyshohet se kanë ndihmuar të arratisurit nga Tribunali i Hagës dhe më së shumti Radovan Karaxhiqit, të kërkuarit kryesor për krime lufte në territorin e Bosnje e Hercegovinës.

 

Në këtë listë ndodhen edhe zyrtarë të lartë të Kishës ortodokse serbe për të cilët dyshohet se në manastirët e tyre kanë strehuar Karaxhiqin. Nga ana tjetër, në këtë listë janë edhe emrat e dy kroatëve të cilët kanë ndihmuar, siç thuhet strehimin e të akuzuarit Ante Gotovina në territorin e Hercegovinës.

Është bërë e ditur se personave nga kjo listë do t'u ndalohet hyrja në vendet e Bashkimit Evropian.

Lista evropiane nuk ka të bëjë fare me listën e mëparshme të ngjashme që ka miratuar presidenti amerikan Xhorxh Bush, sepse kjo listë ka të bëjë vetëm me persona që kanë ndihmuar të ikurit nga Tribunali i Hagës.

Qëllimi i kësaj liste është që shtetet e rajonit të Ballkanit Perëndimor të përmbushin obligimin e tyre për të bashkëpunuar sa më shumë me Tribunalin e Hagës.

 

 

Përgënjështrim i qeverisë greke

 

Athinë, 2 korrik 2003 - Qeveria greke ka përgënjeshtruar zërat se ka dhënë shtyrje afati për dorëzimin e dokumentave nga emigrantët me qëllim rinovimin e lejes së qëndrimit.

Ndërsa edhe për emigrantët që i kanë dorëzuar prej kohësh dokumentat, dhe ndodhen në pritje të lejes, ministri i brendshëm Kostas Skandalidis tha se këta nuk kanë të drejtë të udhëtojnë jashtë Greqisë.

Dje gjithë media greke ka përcjellë lajmin se është akorduar një shtyrje katërmujore për dorëzimin e kërkesave me qëllim rinovimin e lejeve të qëndrimit. Por qeveria reagoi pasdite, duke e përgënjeshtruar këtë lajm.

 

 

Një nxënës në Gjermani ka bërë vetëvrasje pasi më parë kishte plagosur arsimtarin

 

Koburg, Bavari, 2 korrik 2003 – Një nxënës i shkollës së mesme në Koburg të Bavarisë, 145 mila nga Munihu, ka bërë vetëvrasje pasi më parë kishte qëlluar me armë zjarri arsimtarin, të cilin e kishte plagosur në këmbë, ka bërë të ditur zëdhënësja e policisë, njofton BBCnews.

 

Nxënësi 16-vjeçar kishte nxjerrë në klasë armën dhe kishte kërcënuar arsimtarin. Djaloshi ka shtënë në një arsimtare tjetër, që kishte hyrë në klasë për të intervenuar dhe e kishte plagosur në këmbë. Emri i nxënësit ende nuk është publikuar. Nxënës të tjerë nuk janë lënduar.

 

 

Një burrë është vetëvrarë në Kabul nga mjetet plasëse

 

Kabul, 2 korrik 2003 – Një burrë është vrarë në periferi të kryeqytetit Kabul kur mjetet plasëse, që i kishte mbështjellë për brezin e trupit, kanë shpërthyer, ka bërë të ditur sot (e merkurë) policia, njofton Rojter.

 

Shpërthimi ka ndodhur pak para mesnatës, rreth dy mila nga baza, që përdoret nga trupat amerikane dhe franceze për trajnimin e ushtarëve afganë. Edhe baza e paqeruajtësve gjermanë është gjithashtu në këtë zonë. Megjithatë, thuhet në njoftim, nuk dihet nëse shpërthimi ka ndodhur aksidentalisht apo i vrari ka pasur për qëllim ndonjë sulm vetëvrasës.

 

 

Të pakten 18 veta kanë humbur jetën dhe 25 të tjerë janë lënduar në Indinë Jugore

 

Hajdarabad, 2 korrik 2003 – Të pakten 18 veta kanë humbur jetën dhe 25 të tjerë janë lënduar kur një tren ka rënë nga ura në Indinë jugore, njofton BBCWorld. Dy vagona dhe lokomotiva e trenit ekspres është përplasur në rrugë poshtë, kurse shumë vagona të tjerë kanë mbetur të kacavarur.

 

Aksidenti ka ndodhur afër stacionit hekurudhor Varangal, rreth 170 km në veri të kryeqytetit Hajdarabad të shtetit Andra Pradesh. Gjashtë nga të vdekurit janë udhëtarë të trenit, ndërsa të tjerët këmbësorë në rrugë nën urën hekurudhore.

 

 

Një ushtar amerikan, i cili qe plagosur dje në një sulm të një konvoji ushtarak, ka vdekur nga plagët

 

Bagdad, 2 korrik 2003 – Një ushtar amerikan, i cili qe plagosur dje në një sulm të një konvoji ushtarak, ka vdekur nga plagët, ka bërë të ditur sot (e merkurë) ushtria amerikane, njofton Rojter. Kështu, numri i ushtarëve të vrarë në luftimet armiqësore ëshhtë ngritur në 23 sish që kur presidenti Bush i ka shpallur të përfunduara luftimet në Irak.

 

 

Një gjykatë e Sri Lankës ka dënuar me vdekje pesë persona për rolin e tyre në një masakër

 

Kolombo, 2 korrik 2003 – Një gjykatë e Sri Lankës ka dënuar me vdekje pesë persona, ndër të cilët janë dy policë, për rolin e tyre në një masakër në një kamp përqendrimi, ku mbaheshin kryengritësit e dyshimtë të Tigrave Tamilë dhe fëmijët e ish-ushtarëve, njofton Rojter. Dënimi me vdekje i tyre është shndërruar menjëherë në dënim të përjetshëm pasi Sri Lanka e ka hequr dënimin me vdekje që nga viti 1976.

 

 

Një punëtor i një fabrike ka vrarë tre bashkëpunëtorë dhe ka plagosur edhe disa të tjerë

 

Xheferson siti, SHBA, 2 korrik 2003 – Një punëtor i një fabrike përpunuese ka qëlluar me armë zjarri dhe ka vrarë tre bashkëpunëtorë dhe ka plagosur edhe disa të tjerë në këtë fabrikë në pereiferi të qytetit, ka bërë të ditur policia.

 

Vrasësi i dyshimtë pastaj është vrarë afër stacionit policor rreth pesë mila nga vendi i ngjarjes gjatë disa shkëmbimeve të zjarrit, por nuk dihet ende në është vrarë nga policia apo ka bërë vetëvrasje.

 

 

Italia mori dje nga Greqia presidencën e radhës së BE-së për periudhën gjashtëmujore

 

Romë, 2 korrik 2003 - Italia ka marrë dje nga Greqia presidencën e radhës së Bashkimit Evropian për periudhën e ardhshme gjashtëmujore. Presidenti i Komisionit Evropian Romano Prodi deklaroi se pret që marrëdhëniet midis presidencës së re italiane të BE-së të prirë nga kryeministri italian Silvio Berluskoni dhe zyrës së tij të jenë kooperative dhe të ngushta.

 

 

Sharon dhe Abaz: Ka shpresa për paqen

 

Tel Aviv, 2 korrik 2003 - Udhëheqësit izraelitë dhe palestinezë që u takuan dje në Jerusalem thanë se ka shpresa të reja për paqe.

Kryeministri izraelit Ariel Sharon dhe ai palestinez Mahmoud Abbas i bënë deklaratat pak para se të fillonin bisedimet duke qendruar pranë njëri-tjetrit.

Zoti Sharon tha se përparimi varet nga ndalja e plotë e sulmeve terroriste. Udhëheqësi izraelit deklaroi se është i gatshëm të paguajë çmimin e paqes. Ai shtoi se është e domosdoshme të bëhen kompromise për tu dhënë shpresa popujve të të dy vendeve, të Izraelit dhe të shtetit të ardhshëm palestinez.

Nga ana e tij, zoti Abas tha se Izraeli duhet të lirojë të burgosurit palestinezë, t’u japë fund vrasjeve të udhëheqësve ekstremistë palestinezë dhe bastisjeve në zonat vetqeverisëse palestineze.

 

 

Presidenti Bush thotë se në Irak nuk do të kthehet tirania

 

Uashington, 2 korrik 2003 - Presidenti amerikan Xhorxh Bush tha se në Irak nuk do të kthehet tirania. Presidenti Bush tha se besnikët e Sadam Husienit fshihen pas sulmeve thuajse të përditshme kundër forcave të koalicionit të udhëhequr nga Shtetet e Bashkuara. Ai shtoi se ata që kërcënojnë rendin dhe qëndrueshmërinë e Irakut do të përballen me shkatërrimin, ashtu si u përball regjimi i Sadam Huseinit.

 

 

Izraelitët largohen nga Bethlehemi

 

Betlehem, 2 korrik 2003 - Forcat palestineze të sigurisë pritet të marrin nën kontroll qytetin e Betlehemit në Bregun Perëndimor në një hap tjetër drejt zbatimit të planit më të fundit të paqes në Lindjen e Mesme.

Trupat izraelite do të transferojnë kompetencat e sigurisë si pjesë e një marrëveshjeje që prosupozon që ata të tërhiqen në pozicionet që mbanin para fillimit të kryengritjes palestineze në vitin 2000.

 

 

Bush - nuk do të largohemi nga Iraku

 

Uashington, 2 korrik 2003 - Presidenti amerikan Xhorxh Bush thotë se Shtetet e Bashkuara nuk do të detyrohen që të largohen nga Iraku megjithë sulmet e vazhdueshme mbi forcat amerikane atje.

Duke folur para një auditori ushtarak, zoti Bush tha se angazhimi amerikan në Irak ishte nje misison jetëgjatë dhe se trupat nuk do te largohen derisa, siç tha ai të vednoset liria.

Copyright©2000-2003 Trepca.net - Të gjitha të  drejtat e rezervuara.