Lajme

E marte, 1 korrik 2003

Përmbajtja:

• Spektakël muzikor për nder të 2 Korrikut

• Me vendim të Shtajnerit "Guardi di financa" vazhdon punën në Kosovë

• I zhvilloi punimet takimi i dytë i procesit të asociim stabilizimit

• Kuvendi pasnesër diskuton procesin e privatizimit

• Nexhat Daci dënon arrestimin e djeshëm të Hashim Thaçit në Budapest

• FR i LDK-së në Podujevës mbajti mbrëmje poetike me të rinjtë

• Lirohet nga arresti sportisti Driton Kukaj

• Gjilan: Kryetari i Kuvendit komunal dhe tri subjektet politike biseduan për zhbllokimin e punës së asamblesë

• Në Prishtinë filloi takimi dyditor i delegacionit të KE për mekanizmin përcjellës të asociim-stabilizimit të Kosovës

• Dje pasdite në aeroportin e Budapestit është ndaluar Hashim Thaçi dhe më vonë është liruar

• Grupet e para në fakultetet e UP iu nënshtruan testit për regjistrim për vitin akademik 2003-2004

• Nano ka kërkuar dorëheqjen e Metës

• Qeveria e Maqedonisë ka marrë vendim për hapjen e dy vendkalimeve kufitare me Kosovën: Tanushë e Debellde

• Italia do ta ndihmojë Shqipërinë që të përmbushë kushtet e BE-së në procesin e stabilizim-asociimit

• Del Ponte është e dëshpruar me qëndrimin e Beogradit

• Bashkimi Evropian sot publikon "listën e zezë"

• Nga një sulm janë vrarë 4 ushtarë amerikanë

• Trupat izraelite kanë vrarë sot një palestinez në Bregun Perendimor

• Nga një shpërthim në Falluxha kanë humbur jetën 5 irakianë dhe janë plagosur katër të tjerë

• Gjatë protestave në Nigeri kanë humbur jetën 8 protestues

Spektakël muzikor për nder të 2 Korrikut

 

Prishtinë, 1 korrik 2003 - Me rastin e 13-vjetorit të miratimit të Deklaratës Kushtetuese për pavarësinë e Kosovës, Forumi i Rinisë i LDK-së, të mërkurën, më 2 korrik, organizon një spektakël muzikor.

Ky spektakël muzikor mbahet në amfiteatrin e pishinës Gërmia dhe fillon në orën 20:00. Marrin pjesë yjtë e estradës së Kosovës dhe hyrja është e lirë.

  

  

Me vendim të Shtajnerit "Guardi di financa" vazhdon punën në Kosovë

 

Prishtinë, 1 korrik 2003 - Kryeadministratori i Kosovës Mihael Shtajner vendosi sot që t'ia vazhdojë kontratën njësitit të specializuar italian "Guarda di financa" i cili do të kontrollojë shpërdorimet eventuale financiare në institucionet publike të Kosovës.

 

Ky njësit ka ardhur gjashtë muaj më parë në Kosovë me kërkesën e Shtajnerit dhe ishte financuar nga administrata e UNMIK-ut. Më herët ishte njoftuar se ky njësit do të largohet nga Kosova në mungesë të fondeve për financimin e aktivitetit të tij.

Por, Shtajner tha se ka kërkuar nga Qeveria italiane që nga buxheti i saj të financojë njësitin "Guarda di financa", për shkak se UNMIK-ut i mungojnë fondet e domosdoshme për të paguar këtë njësit.

 

Megjithatë, sipas Shtajnerit, edhe nëse Qeveria e italiane nuk pranon të paguajë këtë njësit, ai do të gjejë fonde brenda administratës së UNMIK-ut që "Guarda di financa" të vazhdojë punën e saj në Kosovë.

 

 

I zhvilloi punimet takimi i dytë i procesit të asociim stabilizimit

 

Prishtinë, 1 korrik 2003 - Përfaqësuesit e Komisionit Evropian së bashku me ata të institucioneve të Kosovës dhe përfaqësuesit e administratës së UUNMIK-ut, në ditën e dytë të takimin të mekanizmit përcjellës të Procesit të Asociim Stabilizimit, diskutuan kaptinat e përzgjedhura për drejtësi dhe çështje të brendshme, politikën mediatike, të telekomunikacionit dhe transportit me ekspert nga UNMIK-u dhe institucionet e Kosovës.

 

Gjithashtu në këtë takim u fol për progresin e bërë, për rekomandimet e mëhershme, të dhënat gjatë takimit të parë të mbajtur më 13 mars 2003, mbi principet themelore të demokracisë dhe sundimit të së drejtës, reformat kyçe të ekonomisë së tregut dhe politikës energjetike.

"Ne kemi biseduar për shumë çështje teknike të rëndësishme për integrimet evropiane", tha pas takimit drejtori për Ballkanin Perëndimor në Komisionin Evropian Rainhard Pribe.

 

Çështja e pazidhidhur e statusit të Kosovës nuk e pengon që edhe ajo të jetë pjesë e integrimeve evropiane, tha Pribe. Kosova, tha ai, duhet të jetë më afër politikave evropiane dhe strandardeve.

 

 

Kuvendi pasnesër diskuton procesin e privatizimit

 

Prishtinë, 1 korrik 2003 - Kuvendi i Kosovës në seancën e së enjtes do të diskutojë procesin e privatizimit dhe do të shqyrtojë për herë të dytë projektligjin për planifikim hapësinor. Kështu vendosi kryesia e Kuvendit në takimin e rregullt.

 

Ndonëse më herët ishte paraparë që të enjten të shqyrtohet rregullorja për kodin doganor të Kosovës dhe shqyrtimi i dytë i projektligjit për prokurim publik, këto çështje u shtynë për më vonë për shkak të përgatitjeve të pamjaftueshme.

 

 

Nexhat Daci dënon arrestimin e djeshëm të Hashim Thaçit në Budapest

 

Prishtinë, 1 korrik 2003 - Kryetari i Kuvendit të Kosovës Nexhat Daci ka dënuar arrestimin e djeshëm të kryetarit të PDK-së Hashim Thaçi në Budapest. Daci ka thënë se është e papranueshme që policia e një vendi evropian të arrestojë liderin e një partie të Kosovës në bazë të aktakuzës nga e kaluara të një regjimi i cili është dënuar nga mbarë bota.

 

Veprimet e tilla janë në kundërshtim të bashkëjetesës së ardhshme të serbëve dhe shqiptarëve në Kosovë dhe dialogut direkt të Prishtinës dhe Beogradit, për të cilin angazhohet edhe zoti Thaçi, ka thënë Daci.

Ndërkaq, mbrëmë në një prononcim të Muhamet Hamitit, zëdhënës i Presidentit të Kosovës, lidhur me ndalimin i Thaçit, thuhet se "është akt krejtsisht i papranueshëm i autoriteteve hungareze ndalimi për një kohë i shtetasit të Kosoëvs, figurës së njohur politike të vendit, z.Hashim Thaçi, në bazë të fletarrestit të Serbisë, të ndërtuar mbi akuza politike të kohës së rezistencës ndaj okupimit serb".

Përmes një komonikate edhe Aleanca për Ardhmërinë e Kosovës e konsideron "të papërgjegjshëm ndalimin e djeshëm nga policia hungareze në aeroportin e Budapestit dhe mbajtjen për disa orë nën arrest të politikanit dhe emrit të njohur të luftës për liri dhe demokraci në Kosovë, z. Hashim Thaçi".

"Aktin e djeshëm në Aeroportin e Budapeshtit, AAK-ja e konsideron si papërgjegjësi të organeve të punëve të brendshme dhe të qeverisë së Hungarisë, e cila duket që s'e ka kuptuar se në Ballkan kanë ndryshuar epokat dhe se edhe vetë ajo është në rrugën drejt Bashkimit Evropian", thuhet në këtë komunikatë.

 

 

FR i LDK-së në Podujevës mbajti mbrëmje poetike me të rinjtë

 

Podujevë, 1 korrik 2003 - Në vazhdën e aktiviteteve kulturore verore dhe me qëllim të nxitjes së të rinjve për t'u marrë me krijimtari letrare dhe aktivitete kulturore, mbrëmë në Podujevë, FR i LDK-së, mbajti një mbrëmje poetike me të rinjët. Në konkursin letrar për këtë moshë krijuesish kishin arritur mbi 30 poezi.

 

Juria në përbërje Fadil Halimi, poet, Mynavere Abdullahu, poete dhe Zekri Mulliqi, anëtar i Kryesisë së FR të LDK-së në Podujevë, pas vlerësimit të të gjitha poezive të arritura në konkurs, bëri të ditur se kishte vendosur që çmimin e parë, në vlerën prej 50 euro, ta shpërblejë poezinë "Më mirë është", të Blertë Havollit, të dytin poezisë “Jeta”, të Zejnie Musës dhe të tretin poezisë “Në pritje”, të Bahrie Muçollit.

Pos fitueseve të këtij konkursi letrar, krijimet e tyre i lexuan edhe Qefser Sadiku, Minavere Abdullahu, Shkurtë Kadriu, Vlorë Luta, Egzonë Muçolli, Blertë Thaqi e Qëndresë Hyseni.

 

 

Lirohet nga arresti sportisti Driton Kukaj

 

Pejë, 1 korrik 2003 - Është liruar nga arresti sportisti Driton Kukaj, pasi prokurori ndërkombëtar ka hequr dorë nga akuza, ka bërë të ditur avokati i tij. Driton Kukaj është arrestuar dy muaj më parë në Pejë dhe ai akuzohej për vrasje gjatë vitit 1999.

 

 

Gjilan: Kryetari i Kuvendit komunal dhe tri subjektet politike biseduan për zhbllokimin e punës së asamblesë

 

Gjilan, 1 korrik 2003 - Është bërë një përpjekje e kryetarit Kuvendit komunal në Gjilan Lutfi Haziri me udhëheqës të tri subjekteve politike që përfaqësohen në asamble për të zhbllokuar punën e Kuvendit.

Seanca e fundit ishte ndërprerë pasi tetë anëtarë të asamblesë nga radha e LDK-së e braktisën sallën ku mbahej mbledhja, ndërsa ata të PDK-së nuk merrnin pjesë fare për shkak të mospajtimeve që kanë shfaqur rreth udhëheqjes së Komiteteit për planifikim, resurse natyrore, urbanizëm dhe ambient.

Pas këtij takimi, z. Haziri deklaroi se në një debat konstruktiv, është biseduar për gjendjen e tashme si dhe mundësitë për tejkalimin e bllokadës në Kuvendin e Komunës.

Si angazhim i përbashkët dhe me qëllim të funksionalizimit të Kuvendit, u arrit marrëveshje që të punohet veç e veç me grupe të këshilltarëve dhe përmes një fryme të bashkëpunimit të gjendet zgjidhja e domosdoshme, tha Lutfi Haziri.

 

 

Në Prishtinë filloi takimi dyditor i delegacionit të KE për mekanizmin përcjellës të asociim-stabilizimit të Kosovës

 

Prishtinë, 1 korrik 2003 - Në Prishtinë filluan bisedimet dyditore të delegacionit të Komisionit Evropian me përfaqësuesit e Kosovës për mekanizmin përcjellës të asociim-stabilizimit, ku Kosova në kuadër të këtij procesi të integrimeve evropiane është përfshirë si etnitet në vete.

 

Ndërkaq delegacioni i Komisionit Evropian kryesohet nga drejtori për Ballkanin Perëndimor Rejnhard Pribe. Bëhet e ditur se në këtë takim, ku po marrin pjesë edhe përfaqësuesit e Misionit të OKB-së, Qeverisë së Kosovës, si dhe përfaqësuesit e zyrave të vendeve të BE-së në Prishtinë, ku po shqyrtohet mundësia e përfshirjes së Kosovës në strukturat evropiane, pavarësisht se cili do të jetë statusi i saj i ardhshëm politik.

Ky takim është i dyti me radhë në kuadër të mekanizmit të ri dhe do të vazhdojë edhe sot punën e filluar me dyer të mbyllura, kur edhe pritet publikimi i rezultateve të bisedimeve.

 

 

Dje pasdite në aeroportin e Budapestit është ndaluar Hashim Thaçi dhe më vonë është liruar

 

Budapest, 1 korrik 2003 - Dje pasdite në aeroportin e Budapest është ndaluar Hashim Thaçi, kryetar i PDK-së. Disa orë më vonë autoritetet hungareze e kanë liruar Thaçin dhe ai e ka vazhduar rrugën për në Paris.

 

Sipas zyrtarëve të PDK-së, Thaçi është ndaluar në bazë të një fletarresti të lëshuar nga autoritetet serbe në vitin 1993 dhe se ai është liruar pas ndërhyrjes së kryeadministratorit Mihael Shtajner.

Ndërkaq Ministria e Jashtme e Hungarisë konfirmoi largimin e Thaçit drejt Francës dhe tha se ndalimi i tij nuk ishte arrestim. Në anën tjetër, zëdhënësja e Tribunalit të Hagës për krime lufte Florans Hartman deklaroi se arrestimi i Thaçit në Budapest nuk ka të bëjë me Hagën.

 

 

Grupet e para në fakultetet e UP iu nënshtruan testit për regjistrim për vitin akademik 2003-2004

 

Prishtinë, 1 korrik 2003 - Grupet e para në disa fakultete të Universitetit të Prishtinës iu nënshtruan dje testit për regjistrim në vitin akademik 2003-2004. Konkurrenca për regjistrim në vitin e ri akademik ishte e madhe.

 

"Numri i gjithmbarshëm i studentëve që duhet të pranohen në këtë vit akademik është 5516, kurse në disa fakultete numri i atyre që kanë aplikuar është dyfish më i madh",- thotë prorektori i UP Musli Bajraktari.

 

Në Fakultetin Juridik janë paraqitur mbi 2500 kandidatë për 500 vende, në Fakultetin e Arkitekturës për 40 vende janë paraqitur 300 kandidatë. Ka raste që për një indeks konkurrojnë 8 e ndoshta më shumë kandidatë.

Dje janë mbajtur provimet pranuese në Fakultetin Juridik, në Arkitekturë, Elektronikë, dega kompjuteristike dhe në Fakultetin Filologjik, dega e anglishtes.

Edhepse ishte njoftuar se në këtë vit akademik UP do të regjistrojë studentë me vetëfinancim prej 1000 eurosh, kjo gjë nuk do të ndodhë, thonë përgjegjësit në UP.

 

 

Nano ka kërkuar dorëheqjen e Metës

 

Tiranë, 1 korrik 2003 - Duket se kanë përfunduar përkohësisht polemikat rreth mosmarrëveshjeve midis krerëve të Partisë Socialiste në pushtet. Mbledhja e filluar të hënën pas dite ka zgjatur plotë tetë orë dhe ka përfunduar me miratimin e një rezolute për inkurajimin e ndërmarrjes së reformave në sektorët më jetikë të vendit.

Kjo nënkupton konsolidimin dhe forcimin e bashkëpunimit edhe me partitë që përbëjnë bllokun "Aleanca për Shtetin", por edhe ndryshime në qeveri.

Diskutimet e zhvilluara ishin në fakt vazhdim i polemikave të nisura të premten midis zëvendëskryeministrit e ministër i jashtëm Ilir Meta dhe kreut të socialistëve e të qeverisë, Fatos Nano.

 

Kryeministri Nano madje ka kërkuar edhe dorëheqjen e Metës, kërkesë kjo që është hedhur poshtë nga ky i fundit.

 

 

Qeveria e Maqedonisë ka marrë vendim për hapjen e dy vendkalimeve kufitare me Kosovën: Tanushë e Debellde

 

Shkup, 1 korrik 2003 - Qeveria e Maqedonisë ka marrë vendim për hapjen e dy vendkalimeve kufitare me Kosovën. Këto vendkalime të reja kufitare do të jenë në pikat Tanushë-Debellde dhe Trezimir-Restelicë. Kabineti i kryeministrit maqedonas është i mendimit se tashmë ka ardhur çasti për hapjen e këtyre dy vendkalimeve kufitare.

 

Qeveria ka angazhuar Ministrinë e Transportit dhe Lidhjeve t'i rregullojë punët teknike, ndërkaq Ministrinë e Punëve të Brendshme të sigurojë personelin i cili do të punojë në vendkalimet kufitare në Tanushë dhe Debellde. Këto vendkalime kufitare do të punojnë vetëm gjatë ditës e jo edhe natën.

 

Zëdhënësi i Qeverisë maqedonase Sasho Çollakovski deklaroi se fillimi i punës në këto dy pika kalimi do të pengojë kalimet ilegale të kufirit, ndërkaq banorëve të këtij brezi kufitar do t'i mundësohet që t'i punojnë arat e tyre në të dy anët e kufirit.

 

 

Italia do ta ndihmojë Shqipërinë që të përmbushë kushtet e BE-së në procesin e stabilizim-asociimit

 

Tiranë, 1 korrik 2003 - Italia do të përpiqet ta ndihmojë Shqipërinë që të përmbushë kushtet e Bashkimit Evropian në procesin e stabilizim-asociimit, deklaroi ministri i jashtëm italian Franko Fratini. Ai i bëri këto komente në Tiranë në një konferencë të përbashkët shtypi me ministrin e jashtëm shqiptar Ilir Meta në përfundim të një takimi të ministrave të jashtëm të rajonit për Korridorin e tetë.

Ministri Fratini tha se vendet e BE-së kanë të drejtën dhe detyrën që t'i kërkojnë vendeve mike të Ballkanit Perëndimor, që të bëjnë shumë më tepër për të përparuar me reformat, sidomos në sektorët e drejtësisë, të ligjeve të të drejtës, të administratës publike dhe të korrupsionit dhe në luftën kundër krimit të organizuar, por edhe t'u japim shenja besimi dhe nxitje.

 

 

Del Ponte është e dëshpruar me qëndrimin e Beogradit

 

Berlin, 1 korrik 2003 - Kryeprokurorja e Tribunalit të Hagës, Karla del Ponte është e dëshpruar me qëndrimin e Serbisë dhe Malit të Zi pasi konsideron se pushteti në Beograd nuk po i plotëson premtimet lidhur me dorëzimin e të gjithë të akuzuarve për krime lufte.

 

Në një konferencë për media në Berlin, Del Ponte ka thënë se informatat më të reja se i akuzuari Ratko Mlladiq ndodhet në Serbi nuk i ka dërguar në Beograd por në instanca të tjera pasi autoritetet në Beograd deri tash nuk kanë reaguar në informacione të tilla.

 

 

Bashkimi Evropian sot publikon "listën e zezë"

 

Bruksel, 1 korrik 2003 - Bashkimi Evropian do të publikojë sot në Bruksel listën e personave të cilëve do t'u ndalohet hyrja apo kalimi nëpër vendet e BE-së. Mediat njoftojnë se në listë ndodhen 12 persona nga B e H të cilët i bëjnë obstruksione Marrëveshjes së Dejtonit dhe financiarisht apo politikisht mbështesin të akuzuarit për krime lufte.

Mirëpo, nga Komisioni Evropian bëjnë me dije se personat nga "lista e zezë" nuk do të ndodhen nën sanksione financiare çfarë i kanë aplikuar SHBA-të. Nga Brukseli bëhet e ditur se në këtë listë mund të gjenden rreth 100 persona. Ndërkaq sipas gazetës "Zëri" në këtë listë nuk ndodhet asnjë shqiptar.

 

 

Nga një sulm janë vrarë 4 ushtarë amerikanë

 

Bagdad, 1 korrik 2003 – Katër ushtarë amerikanë janë vrarë sot (e martë) dhe dy të tjerë janë plagosur nga një sulm me granatë raketore në automjetin e tyre, të cilin e kanë kryyer sulmues të panjohur në qendër të Bagdadit, njofton AFP.

 

Viktimat janë hequr menjëherë nga vendi i ngjarjes. Po këhtu, në këtë incident është plagosur edhe një civil irakian, i cili është dërguar në spital. Ndërkaq, një autobus i parkuar afër stacionit të gasit, është djegur tërësisht. Për sulmin dhe viktimat ende s’ka pasur konfirmim nga ushtria amerikane.

 

 

Trupat izraelite kanë vrarë sot një palestinez në Bregun Perendimor

 

Jerusalem, 1 korrik 2003 – Trupat izraelite kanë vrarë sot (e martë) një palestinez, i cili kishte shtënë më parë me revole nqë ushtarët, që kujdestaronin në pikën e kontrollit në pjesën veriore të Bregut Pderendimor, njofton Rojter. Burimet e sigurimit palestinez kanë thënë se 20-vjeçari është vrarë nga ushtarët në pikën e kontrollit ndërmjet qyteteve Tulkarem dhe Kelkilia, por s'kanë detaje të tjera për incidentin.

 

 

Nga një shpërthim në Falluxha kanë humbur jetën 5 irakianë dhe janë plagosur katër të tjerë

 

Falluxha, Irak, 1 korrik 2003 – Një shpërthim gjatë natës në qytetin irakian Falluxha ka shkatërruar xhaminë dhe ka shkaktuar vdekjen e së paku pesë irakianëve dhe plagosjen edhe të katër të tjerëve, kanë bërë të ditur sot (e martë) dëshmitrët dhe zyrtarët, njofton AP. Shpërthimi ka ngritur tensionet në rajon, ku edhe kështu po ndërmerren vazhdimisht aktivitete kundëramerikane.

 

 

Gjatë protestave në Nigeri kanë humbur jetën 8 protestues

 

Lagos, Nigeri, 1 korrik 2003 – Forcat e sigurimit kanë vrarë 4 nigerianë, kurse 4 të tjerë kanë humbur jetën nga shpejtësia e automjeteve gjatë protestave në rrugë lidhur me çmimet e lëndëve djegëse, ka bërë të ditur sot (e martë) policia vendore, njofton Rojter.

 

Policia ka thënë se 4 viktimat janë vrarë në kryeqytetin Abuxha, kur policia ka hedhur gaz lotsjellës dhe ka shtënë me armë zjarri ndaj protestuesve gjatë përleshjeve të ndërsjella. Ndërsa 4 viktimat e tjera kanë humbur jetën kur automjetet me shpejtësi të madhe janë përplasur aksidentalisht në një grup demonstruesish gjatë protestave në Lagos.

Copyright©2000-2003 Trepca.net - Të gjitha të  drejtat e rezervuara.