Lajme

E shtune, 28 qershor 2003

Përmbajtja:

• N.Daci: Gjatë vitit 2005 Kosova duhet ta ketë plotësisht të definuar statusin e saj

• A.Kasof thotë se partitë kryesore politike në Kosovë do të bashkëveprojnë për zgjidhjen e problemeve të pakicave

• Peterson thotë se Kosova është pjesë e Ballkanit Perëndimor dhe pa të nuk mund të ketë bashkëpunim rajonal

• SHPK gradoi 35 rreshterë, 7 togerë, 2 kapitenë, 2 majorë dhe një nënkolonel

• SHBA-të përkrahin emërimin e italianit Armelini në postin e kryeadministratorit të ri të Kosovës

• Policia e UNMIK-ut ka arrestuar katër boshnjakë të dyshuar për vrasjen e një bashkëkombasi të tyre

• Ekspertët ekonomisë thonë se ka shumë paqartësi rreth procesit të privatizimit

• Një aeroplan me refugjatë që po ktheheshin në Kosovë, u kthy sërish për në Dyzeldorf

• BE-ja të martën publikon "listën e zezë" të qytetarëve të Ballkanit

• Gjatë natës në Bagdad, është vrarë një ushtar amerikan dhe katër të tjerë janë plagosur

• Në një sulm të kryengritwsve në Kashmir, janë vrarë 10 veta

• Izraeli dhe zyrtarët palestinezë thonë se kanë arritur një marrëveshje

• Shqipëria dhe Kosova do të shtojnë bashkëpunimin nëpërmjet marrëveshjeve të karakterit ekonomik

N.Daci: Gjatë vitit 2005 Kosova duhet ta ketë plotësisht të definuar statusin e saj

 

Prishtinë, 28 qershor 2003 - UNMIK-u nuk e ka një profesionalizëm që i nevojitet Kosovës për ta ristartuar ekonominë e saj në një ekomomi të tregut dhe ka interesa tejet të parcializuara në burokracinë e saj, tha Nexhat Daci, kryetari i Kuvendit të Kososvës.

Në një intervistë dhënë radios "Evropa e lirë", kryeparlamentari Daci tha, ndërkaq se do të ishte gabim të thuhet se krejt UNMIK-u është joprofesional, por ai shtoi se kritikon pikërisht atë lloj paralelizmash në institucione.

 

"Unë kam shumë vërejtje në qeverinë tonë në atë drejtim që nuk po gjen formë ta ushtrojë kapacitetin e vet veprues. Brenda Ministrisë së Financave është krijuar një segment tjetër prapë i UNMIK-ut që do ta ketë nën kthetra, të themi, financat, buxhetin e Kosovës", thotë Daci.

Duke folur rreth çështjes së pazgjidhur të stausit të Kosovës, Nexhat Daci tha se "institucionet tona kanë arritur që ta bindin bashkësinë ndërkombëtare që prolongimi i pakufijshëm i zgjidhjes së statusit të Kosovës është një porosi e keqe edhe për Evropën edhe për rajonin".

 

Kjo, sipas tij, ndodh për shumë arsye dhe se "po humbet kredibiliteti dhe kredia shumë e madhe e bashkësisë ndërkombëtare në Kosovë dhe populli i Kosovës po frustrohet me atë që nuk po sheh ndonjë përspektivë të qartë në ekonomi dhe standardin e jetës, në siguri e drejtësi".

Mirëpo, zoti Daci është shumë optimist për arsye se sot Kosova ka një përkrahje nga bashkësia ndërkombëtare që as nuk e ka imagjinuar.

 

"Do të varet kryesisht nga ne se a do ta realizojmë. Do të thotë ky mandat i institucioneve tona, duhet ta përfundojë këtë storie dhe 2005-shi, diku gjatë 2005-shit, vera e këtij vitit, duhet të jetë ajo që Kosova ta ketë plotësisht të definuar statusin e saj", thotë Daci në këtë intervistë.

 

 

A.Kasof thotë se partitë kryesore politike në Kosovë do të bashkëveprojnë për zgjidhjen e problemeve të pakicave

 

Prishtinë, 28 qershor 2003 - Udhëheqësi i Projektit për Marrëdhënie Ndëretnike Alen Kasof, në një intervistë për BBC ka theksuar se partitë kryesore politike në Kosovë do të bashkëveprojnë për zgjidhjen e problemeve të pakicave. Ai tha se takimi i katërt me radhë në Prishtinë për çështjen e marrëdhënieve ndëretnike, kishte më pak qasje konfrontuese se sa në takimet e mëparshme.

 

Kasof thekson gatishmërinë potenciale tek udhëheqësit shqiptarë në Kosovë që të merren me çështjen e sigurisë së minoriteteve, si dhe të merren me çështjen e kthimit. Është bërë progres deri diku në këto çështje, por sipas tij nuk është shënuar ndonjë sukses i madh.

 

Kasof është i mendimit se kthimi do të jetë i kufizuar, ngase siç tha, ka njerëz që janë larguar nuk kthehen, por të tjerë që duan të kthehen dhe natyrisht ekziston shqetësimi për sigurimin e atyre që janë këtu.

Në vërejtjen se siguria nuk është në duart e udhëheqjes së Kosovës, z. Kasof ka thënë se është e vërtet se siguria fizike për momentin është përgjegjësi e bashkësisë ndërkombëtare, por atmosfera politike që gjeneron incidente është në fakt çështje politike dhe kjo është në duart e udhëheqjes kosovare.

Ai ka shtuar se në tryezën e fundit për marrëdhënie ndëretnike në Prishtinë të gjithë udhëheqësit kosovarë kanë thënë gjëra të duhura, por ata duhet të bëjnë më shumë dhe duhet të zhvillojnë sipas mendimit të tij një fushatë aktive për t'i bindur ata që duan të kthehen se është e sigurt të kthehen.

 

 

Peterson thotë se Kosova është pjesë e Ballkanit Perëndimor dhe pa të nuk mund të ketë bashkëpunim rajonal

 

Prishtinë, 28 qershor 2003 - Kryesuesi i Komitetit për Migrim i Paktit të Stabilitetit për Evropën Juglindore Soren Jensen Peterson gjatë një vizite në Prishtinë ka bërë të ditur se ky organizëm ka hartuar një program për drejtimin e çështjes së emigracionit, azilit dhe kthimit të refugjatëve nga vendet e Evropës Juglindore. Ai nënvizoi se ka marrë përkrahje nga kryadministratori Shtajner dhe kryeministri Rexhepi për hartimin e këtij programi dhe në veçanti për përfshirjen e Kosovës në të.

"Kosova ka qenë një pjesëmarrëse e rëndësishme në zhvillimin e programit pavarësisht nga mosdefinimi i statusit të saj sepse nëse flasim për bashkëpunim rajonal në menaxhimin e migracionit, azilit dhe kthimit të refugjatëve, Kosova është pjesë e Ballkanit Perëndimor dhe nuk mund të ketë bashkëpunim rajonal nëse Kosova nuk është pjesë aktive", ka thënë Peterson.

Duke iu përgjigjur deklaratave politike të autoriteteve të Beogradit për kthimin e serbëve të zhvendosur në Kosovë, Peterson tha se politizimi i kthimit nuk është asnjëherë i dobishëm. Sipas tij është e rëndësishme se çdo politikan pavarësisht prej nga vjen të mos përdorë kthimin apo refugjatët në lojën politike, ose si qëndrim politik.

 

 

SHPK gradoi 35 rreshterë, 7 togerë, 2 kapitenë, 2 majorë dhe një nënkolonel

 

Prishtinë, 28 qershor 2003 - Shërbimi Policor i Kosovës gradoi dje 35 rreshterë të rinj, 7 togerë, dy kapiten, dy majorë dhe një nënkolonel. Prej sot këta pjesëtarë do të marrin përgjegjësi të reja drejt avancimit të SHPK-së.

Ndihmëskryeadministratori i Kosovës Zhan Kristian Kadi tha se me formimin e SHPK-së në fushat e specializuara të luftimit të krimit, drejtësia mund të jetë më efikase. Ai theksoi se prania e SHPK-së dhe besimi i popullatës ndaj saj kanë qenë faktorë stabilizues në gjendjen e sigurisë në Kosovë. Kadi inkurajoi pjesëtarët e SHPK-së që të vazhdojnë stabilitetin dhe sigurinë e jetesës në Kosovë.

Por sipas tij Kosova përballet me dy probleme kryesore: krimin e organizuar dhe korrupsionin. "Andaj si policë të SHPK-së ju duhet t'i luftoni këto dukuri dhe të jeni efikas në mënyrë që Kosova të jetë një vend më i mirë dhe më i sigurt për jetë", tha Zhan Kristian Kadi para oficerëve të graduar të SHPK-së.

 

 

SHBA-të përkrahin emërimin e italianit Armelini në postin e kryeadministratorit të ri të Kosovës

 

Uashington, 28 qershor 2003 - Shtetet e Bashkuara të Amerikës përkrahin propozimin që italiani Antonio Armelini të emërohet kryeadministrator i ri i Kosovës, i cili në këtë post do të zëvendësonte shefin e UNMIK-ut Mihael Shtajner.

 

Emërimin e tij pritet ta bëjë sekretari i përgjithshëm i OKB-së Kofi Anan. Përkrahja amerikane ishte moment vendimtar që Armelini ta zëvendësojë Mihael Shtajnerin. Shefi aktual i UNMIK-ut, Mihael Shtajner do ta përfundojë misionin e tij në Kosovë më 30 qershor.

 

 

Policia e UNMIK-ut ka arrestuar katër boshnjakë të dyshuar për vrasjen e një bashkëkombasi të tyre

 

Leposaviq, 28 qershor 2003 - Katër qytetarë boshnjakë janë arrestuar nga policia e UNMIK-ut si të dyshuar për vrasjen e një bashkëkombasi të tyre në një fshat të Leposaviqit. Vrasja e një pjesëtarit të përkatësisë boshnjake kishte ndodhur para du ditëve.

Zëdhënësja e policisë në Mitrovicë Reis Beker tha se arrestimet janë kryer në fshatin Klen dhe Raska të Leposaviqit, ndërkaq njëri nga personat e arrestuar dyshohet edhe për një vrasje tjetër që kishte ndodhur më herët në Novi Pazar.

 

 

Ekspertët ekonomisë thonë se ka shumë paqartësi rreth procesit të privatizimit

 

Prishtinë, 28 qershor 2003 - Ekspertët shoqërorë dhe ekspertët ekonomisë theksuan në takimin e djeshëm në Prishtinë se ka shumë paqartësi rreth procesit të privatizimit. Ata kërkuan shpjegime plotësuese nga Agjencia Kosovare e Mirëbesimit, ndërkaq nga institucionet e Kosovës kërkuan që në bisedime me Serbinë të kërkohet kthimi i dokumenteve kadastrale. Fituesit e tenderëve për privatizimin e gjashtë ndërmarrjeve të para shoqërore tëKosovës do të shpallen me 14 korrik.

 

 

Një aeroplan me refugjatë që po ktheheshin në Kosovë, u kthy sërish për në Dyzeldorf

 

Dyzeldorf, 28 qershor 2003 - Një aeroplan me pasagjerë të cilët nga Gjermania po ktheheshin në Kosovë u desh të kthehen sërish për në Dyzeldorf. Administrata në Prishtinë nuk i dha leje që aeroplani të aterojë në aeroportin e Sllatinës, pasi ajo nuk ishte në dijeni për riatdhesimin e planifikuar, kanë njoftuar organet në Dyzeldorf. Sipas tyre, 64 refugjatë janë kthyer në vendet e tyre të banimit në Gjermani.

 

 

BE-ja të martën publikon "listën e zezë" të qytetarëve të Ballkanit

 

Bruksel, 28 qershor 2003 - Pas SHBA-ve edhe Bashkimi Evropian ka hartuar "një listë të zezë" të qytetarëve nga Ballkani që shkelin Marrëveshjen e Dejtonit, ofrojnë mbështetje për të dyshuarit për krime lufte dhe marrin pjesë në krimin e organizuar. Kristina Galak, zëdhënëse e përfaqësuesist të lartë për politikë të jashtme dhe siguri Havier Solana, citohet të ketë deklaruar se kjo listë do të bëhet e ditur të martën.

 

Sipas saj, "lista e zezë" tani ndodhet në fazën e fundit të përgatitjes, ndërkaq të martën do të publikohet edhe formalisht. Zonja Galak thotë se lista nuk do të jetë përfundimtare, por mund të zgjerohet me personat të cilët janë të akuzuar për krime lufte apo që merren me krimin e organizuar.

 

 

Gjatë natës në Bagdad, është vrarë një ushtar amerikan dhe katër të tjerë janë plagosur

 

Bagdad, 28 qershor 2003 – Një ushtar amerikan është vrarë dhe katër të tjerë janë plagosur në një sulm gjatë natës (e shtunë) në Bagdad, duke ngritur kështu në 22 numrin e ushtarëve amerikanë të vrarë në luftimert armiqësore në Irak qëkur zyrtarisht ka përfunduar lufta atje, kanë bërë të ditur sot (e shtunë) zyrtarët, njofton Rojter.

 

Po kështu, bëhet e ditur se një përkthyes që punonte me armatën amerikane është plagosur në një sulm të djeshëm në pjesën veriore të Bagdadit. Të premten heret gjithashtu është qëlluar në kokë një ushtar tjetër amerikan dhe është plagosur rëndë duke blerë në një shitore në Bagdad.

 

 

Në një sulm të kryengritwsve në Kashmir, janë vrarë 10 veta

 

Xhamu, Indi, 28 qershor 2003 – Dhjetë veta, ndër të cilët tetë ushtarë, janë vrarë dhe katër të tjerë janë plagosur kur dy kryengritës muslimanë kanë sulmuar sot (e shtunë) një kamp ushtarak në Kashmirin indian, ka bërë të ditur policia vendore, njofton Rojter.

 

Kjo dhunë e re ka ndodhur gjatë vizitës së presidentit indian Abdul Kalam në rajonin e Himalajeve. "Operacioni ka përfunduar. Të dy militantët janë vrarë", ka deklaruar zyrtari i policisë.

 

 

Izraeli dhe zyrtarët palestinezë thonë se kanë arritur një marrëveshje

 

Qyteti i Gazës, 28 qershor 2003 - Izraeli dhe zyrtarët palestinezë thonë se kanë arritur një marrëveshje në parim, që pjesë të Rripit të Gazës dhe qytetit të Betlehemit në Bregun Perëndimor, duhet të kthehen nën kontroll të Autoritetit Palestinez.

Udhëheqësi shpirtëror i grupit militant palestinez, Hamas, Sheiku Ahmed Jasin, tha se organizata e tij ka vendosur që të pezullojë operacionet luftarake. Por zyrtarë të Hamasit thanë se fjalët e tij nuk paraqesin një armëpushim zyrtar.

Këshilltarja amerikane për siguri kombëtare, Kondoliza Rais, ndërkaq, pritet të arrijë në rajon gjatë ditës dhe pritet që të zhvillojë bisedime fillimisht me kryeministrin palestinez, Mahmoud Abbas dhe pastaj me udhëheqësin izraelit, Ariel Sharon.

 

 

Shqipëria dhe Kosova do të shtojnë bashkëpunimin nëpërmjet marrëveshjeve të karakterit ekonomik

 

Tiranë, 28 qershor 2003 - Shqipëria dhe Kosova do të shtojnë bashkëpunimin nëpërmjet marrëveshjeve të karakterit ekonomik. Kështu u tha në takimin ndërmjet ministrit të ekonomisë së Shqipërisë, Arben Malaj dhe këshilltarit të kryeamdinistratorit Shtajner, Andreja Vitkovski.

 

Ai u shpreh se shumë shpejt pritet të arrihet marrëveshja për bashkëpunimin ekonomik, marrëveshja për shtimin e investimeve dhe marrëveshja për eliminimin e tatimeve të dyfishta. Vitkovski po ashtu ka theksuar se Shqipëria është partner shumë i rëndësishëm për integrimin e Kosovës dhe se vet marrëveshja është një nismë e mbarë për Kosovën.

Ndërkaq, ministri Malaj tha se këto marrëveshje do të shtojnë ndikimin për rritjen e përfitimeve që dalin nga marrëveshja e tregtisë së lirë, që u arrit teknikisht pas dyditë bisedimesh në Sarandë, disa ditë më parë.

Copyright©2000-2003 Trepca.net - Të gjitha të  drejtat e rezervuara.