OPINIONE

Kundër klanizimit të brenshëm të LDK-së

FORCAT PROGRESIVE BRENDA LDK-së NUK DUHET TË HESHTIN

Kur është fjala te largimi i "detyrueshëm" i veprimtarëve të LDK-së nga rradhët e saj, të cilët u treguan mjaft të shkëlqyeshëm në organizimin e brendshëm politik, është detyrë urgjente e udhëheqjes së lartë të LDK-së në Prishtinë të formojë një "komision për çështje emergjente brendapartiake", i cili do të merrej me sqarimin e rasteve të njohura të largimit të disa aktivistëve të LDK-së nga ky organizim politik si dhe i cili do të merrej me shkarkimin e fajtorëve respektivisht të shkaktarëve të krijimit të pakënaqësive brendapërbrenda rradhëve të LDK-së.

27 qershor 2003 / Shkruan: Besim KRASNIQI

Si subjekti më i organizuar politik shqiptar dhe me anëtarësi më masive në Kosovë është padyshim Lidhja Demokratike e Kosovës, e cila për fat të keq ka patur në rradhët e saj vazhdimisht individë të tillë, të cilët për interesa të veta meskine apo grupore, por në emër të kinse "dashurisë së madhe" ndaj LDK-së kanë qenë dhe janë vënë në shërbim të staginimit të proceseve demokratike brenda vetë LDK-ës, që do ta qonin këtë subjekt politik deri te transformimi edhe më i cilësor i tij. Të mos themi shumë herë, por ka ndodhur që individë të tillë të jenë kapur edhe në majat e udhëheqjes së LDK-së në nivele të ndryshme organizative të kësaj partie, për t'i arritur qëllimet e tyre të mbrapshta.

Përgjatë tendencave për realizimin e qëllimeve të errëta të tyre (bllokimi i aktivitetit të anëtarëve tjerë të LDK-së, marrja e vendimeve pa e pyetur kryesinë e ngushtë apo atë qendrore apo edheanëtarësinë e aktivit, mospërfillja e propozimeve të anëtarëve tjerë, manipulimet gjatë zgjedhjeve brenda aktivit, moslejimin e depërtimit të veprimtarëve të dalluar dhe intelektualëve të rinjë në udhëheqje etj.) janë krijuar klane qoftë familjare apo edhe farefisnore, të cilat e dëmtonin vazhdimisht imazhin pozitiv të LDK-së para vetë anëtarësisë së gjerë të LDK-së por edhe para subjekteve tjera opozitare, të cilat padyshim se të gjitha këto dukuri negative të këtyre individëve të pandërgjegjshëm dhe të uritur për "karrierë partiake"  i kanë shfrytëzuar për krijimin e poentave të veta politike.

Lidhja Demokratike e Kosovës që nga themelimi i saj është dëshmuar me të drejtë si subjekti më i përkrahur politik nga shumica e shqiptarëve të Kosovës, sidomos falë aktivitetit dhe angazhimit të pjesës më të madhe të intelektualëve shqiptarë brenda rradhëve të saj dhe veprimtarëve të saj të dëshmuar për korrektësi, besueshmëri, besnikëri, trimëri dhe atdhedashuri. Këto janë disa nga elementet pozitive që e karakterizuan  në të kaluarën dhe e karakterizojnë famitrësisht edhe sot e kësaj dite LDK-në, sepse brenda LDK-së kemi shumë e shumë aktivistë të devotshëm të çështjes kombëtare, intelektualë të spektreve të ndryshme profesionale, anëtarë të gatshëm çdoherë për nisma të reja e progresive në dobi të realizimit të besimit të dhënë nga qytetarët shumicë të saj.

Andaj, dukuria negative e kohëve të fundit, sikurse që është tërheqja e veprimtarëve të dalluar nga organizimi i brendshëm i LDK-së mu për shkak të bajraktarizimit dhe klanizimit të individëve të caktuar në disa nëndegë dhe  degë të LDK-së në Kosovë dhe diasporë nga ana e drejtuesve të tyre karrieristë, duhet të ndalet sa më parë, dhe kjo arrihet vetëm nëse LDK-ja lirohet apo thënë më konkretisht spastrohet nga individë të tillë brenda rradhëve të saj.

Kur është fjala te largimi i "detyrueshëm" i veprimtarëve të LDK-së nga rradhët e saj, të cilët u treguan mjaft të shkëlqyeshëm në organizimin e brendshëm politik, dhe për t'a respektuar gjithë atë aktivitet të tyre të pandalshëm kombëtar, është detyrë urgjente e udhëheqjes së lartë të LDK-së në Prishtinë (Kryesia Qendrore) të formojë një "komision të përkohshëm" për çështje emergjente brendapartiake, i cili do të merrej me sqarimin e rasteve të njohura të largimit pa dëshirë të disa aktivistëve të LDK-së nga ky organizim politik, si dhe i cili do të merrej me shkarkimin e menjëhershëm fajtorëve respektivisht të shkaktarëve të krijimit të pakënaqësive brendapërbrenda rradhëve të LDK-së.

Ky "spastrim" nga karrierisët, servilët, shpirtëngushtët por edhe nga shpirtëshiturit tek partitë e së majtës ekstreme duhet të ndodhë sa më parë, në qoftë se duam që edhe në të ardhmen të kemi një LDK stabile, vitale, serioze dhe me vlerë kombëtare. Të gjithë ata aktivistë dhe veprimtarë të LDK-së dhe simpatizantët e saj që i janë besnik parimeve kombëtare të LDK-së si dhe që e duan të kenë një parti politike të moderuar nuk duhet të brengosen gjithaq për ndonjë shkarkim eventual të ndonjë individi nga pozita e tij e deritanishme, që mund të ndërmerr Kryesia Qendrore në të ardhmen e afërt, sepse me këtë nuk dëmtohet organizimi politik i LDK-së, por përkundrazi do t'i lirohej vendi atyre veprimtarëve të vjetër por edhe të rinjë që dijnë t'i çmojnë vlerat e demokracisë, e me këtë edhe të respektojnë vullnetin edhe të bashkëveprimtarëve të tyre që kanë merita të mëdha në organizimin e jetës politike në Kosovën e paraluftës dhe të pasluftës, kuptohet si kuadër politik i LDK-së.

Me veprime dhe masa energjike të Kryesisë Qendrore ndaj stopuesve të rritjes së aktivitetit të LDK-së në shërbim të Kosovës dhe qytetarëve të saj do të humbej edhe dyshimi mbi atë se këta keqdashës të këtij subjekti politik e kanë përkrahjen edhe "nga lartë", pra nga Kryesia Qendrore e LDK-së...!?

Copyright©2000-2003 Trepca.net - Të gjitha të  drejtat e rezervuara.