Lajme

E premte, 27 qershor 2003

Përmbajtja:

• Kosova do të ketë status të pavarur, ose përndryshe mund të ketë luftë, tha në një dëshmi senatori Xhozef Baiden

• Robertson tha se NATO është e përkushtuar për përkrahjen e një Kosove të bashkuar dhe demokratike

• Presidenti Rugova tha se në Krans Montana do të angazhohet për mundësitë e investimeve në Kosovë

• Bërns ka theksuar përkushtimin e SHBA-ve për Kosovën

• Numan Baliq kundër Gjykatës Supreme të Kosovës

• Rrëmbyesit e Valon Dreshajt pandehen për katër vepra penale

• Gjilan: Borxhet e mëdha detyrojnë "Higjienën" ta ndërprejë grumbullimin e mbeturinave

• Dështoi seanca e Kuvendit komunal të Gjilanit meqë një grup i deputetëve të pakënaqur të LDK-së e braktisën mbledhjen

• Në Kosovë ka arritur një ekip ndërkombëtar, i cili do të merret me çështjen e pronave

• LDK në Gjermani: Kush fshihet pas iniciativës qytetare për nënshkrimin e peticionit në Gjermani?

• "Ekonomist": Kosova është duke rrëshqitur drejt një forme të pavarësisë

• Në Shqipëri aktualisht përdorin drogën mbi 30 mijë veta, kryesisht të rinj

• Janë kidnapuar dy ushtarë amerikanë në Bagdad

• Një ushtar amerikan është vrarë dhe 9 të tjerë janë plagosur në një sulm në qytetin Kufah

• Izraeli ka vrarë sot katër palestinezë

• Arrestohet autori i sulmeve në Riad

• Vazhdojnë paqartësitë lidhur me marrëveshjen për armëpushim me Izraelin

• Marrëdhëniet ndërmjet BBC-së dhe qeverisë britanike kanë arritur pikën kritike

• Nga rrëshqitja e dheut në Kinë kanë humbur jetën 17 veta dhe janë zhdukur 24 të tjerë

Kosova do të ketë status të pavarur, ose përndryshe mund të ketë luftë, tha në një dëshmi senatori Xhozef Baiden

 

Uashington, 27 qershor 2003 - Katër vjet pas përfundimit të luftës së fundit në Ballkan, rajoni ka pësuar ndryshime të rëndësishme, duke u larguar nga nacionalizmi, diktatura dhe duke ecur drejt paqes, demokracisë dhe një ardhmje drejt Evropës. Megjithatë problemet me të cilat ende ndeshet ky rajon janë të shumta.

"Ato që po e dëmtojnë më shumë rajonin janë krimi i organizuar, problemet e pazgjidhura pas konflikteve dhe ekonomia që vuan ende pasojat e komunizmit", tha Zv/ndihmës Sekretari i Shtetit Pol Xhons, në një dëshmi në Senatin amerikan.

Një nga problemet kryesore të pazgjidhura ende pas luftrave është statusi i Kosovës. Zyrtari i Departamentit të Shtetit tha se qëndrimi i administratës amerikane është se koha për fillimin e bisedimeve për statusin nuk ka ardhur ende.

"Ne besojmë se është e parakohshme të hapen tani bisedimet për statusin përfundimtar. Në Kosovë shqiptarët kërkojnë pavarësi, në Serbi kërkohet ndarja e Kosovës. Të dyja këto qëndrime janë të rëndësishme dhe mund të destabilizojnë Kosovën dhe rajonin". tha zoti Xhons.

Senatori republikan Xhorxh Voinoviç tha se në Kosovë ka ende shumë probleme dhe pa u zgjidhur çështja e të drejtave të pakicave, bisedimet për statusin përfundimtar nuk duhet të fillojnë. "Çështja e zgjidhjes përfunditare duhet të jetë e lidhur ngushtë me plotësimin e standarteve dhe me respektimin e të drjetave të pakicave.

 

Unë jam dakord me qëndirmin e Departamentit të Shtetit se në se flasim tani pëpr statusin përfundimtar kjo mund të lehtësonte trysninë ndaj politikanëve në Kosovë që të plotësojnë standartet", tha senatori Voinoviç.

Senatori demokrat Xhozef Baiden, nënkryetar i Komisionit për Marrëdhëniet me Jashtë të Senatit tha se ndonëse për të gjithë është i qartë rezultati i statusit përfundimtar, Kosova duhet të bëjë përparim drejt standardeve, drejt krijimit të institucioneve demokratike që populli i saj të ketë të drejtë të vendosë vetë për fatin e tij.

"Ne të gjithë e dimë se ç'do të ndodhë, në një moment a tjetër, Kosova do të ketë status të pavarur, ose përndryshe mund të ketë luftë, pra çfarë po debatoni ju në Departamentin e Shtetit? iu drejtua senatori Baiden diplomatit amerikan.

"Le të them që në fillim se ne mezi presim që Kosova të përmbushë standardet dhe të ecë përpara, cilidoqoftë statusi i saj.

 

Ne mendojmë që të gjithë në komunitetin ndërkombtar janë të hapur ndaj rezultatit të statusit përfundimtar dhe po ashtu ne jemi të jë mendimi se nuk është koha për të folurt për rezultatin, është koha që të bëhet përparim në të mirë të popullit në Kosovës. Të flasësh tani për rezultatin do të minonte përparimin drejt standardeve", tha zoti Xhones.

Senatori Baiden po paraqet një rezolutë në Senat për Kosovën, që siç tha ai, ndryshon nga rezoluta e Dhomës së Përfaqësuesve, e cila e vë statusin para standardeve.

"Rezoluta që unë do të paraqesë pasqyron mendimin e Senatit se Shtetet e Bashkuara duhet të shprehin mbështetjen e tyre për të drejtën e popullit të Kosovës të vetëvendosë për të ardhmen politike, por, vetëm pasi Kosova të ketë bërë përparimin e duhur drejt standardeve", tha senatori Baiden.

Kohët e fundit është sugjeruar që administrata amerikane të caktojë një diplomat amerikan për të drejtuar UNMIK-un në Kosovë. Por Departamenti i Shtetit është kundër kësaj ideje.

"Ne jemi të mendimit se ky post duhet t’i takojë një evropiani. Do të ishte mirë që ai të ishte nga një vend që është si anëtar i Bashkimit Evropian edhe i Natos", tha zyrtari i Departamentit të Shtetit Xhons.

Në dëshmi ishin ftuar për të dhënë mendimet e tyre edhe Drejtori i Nismës Ballkanike në Institutin e Paqes, Daniel Server, ish i dërguari për Ballkanin në administratën e presidentit Klinton Xheimes O'Brajën dhe gjenerali Uilliam Nesh i Këshillit për Marrëdhëniet me Jashtë, thuhet në një raport të "Zërit të Amerikës".

 

 

Robertson tha se NATO është e përkushtuar për përkrahjen e një Kosove të bashkuar dhe demokratike

 

Prishtinë, 27 qershor 2003 - Sekretari i përgjithshëm, Xhorxh Robertson, i shoqëruar nga 19 ambasadorët e Këshillit të NATO-s dhe shtatë ambasadorët e e vendeve që do t'i bashkohen kësaj Aleance në vitin e ardhshëm qëndruan dje në një vizitë njëditëshe në Prishtinë.

 

Ai zhvilloi takime të veçanta me udhëheqësit më të lartë ndërkombëtarë dhe vendorë, ndërkaq bashkëbiseduesve u ka përcjellë mesazhe të fuqishme se puna që duhet kryer këtu është që Kosova të jetë shumetnike, demokratike dhe e bashkuar. Robertson tha se Aleanca Veriatlantike është e përkushtuar për përkrahjen e një Kosove të bashkuar dhe demokratike.

Njëkohësisht Robertson shprehu shqetësimin e tij për dhunën ndëretnike, duke nënvizuar se NATO-ja kërkon nga shqiptarët që të ndihmojnë në luftën kundër krimit të organizuar dhe ekstremizmit.

 

"Ne besojmë në tolerancën zero për banditët dhe hajdutët dhe ne nuk jemi të përgatitur për të parë Kosovën që ishte shpëtuar nga NATO të kalojë në duar të elementëve kriminelë dhe të atyre që e shfrytëzojnë brutalitetin në emër të nacionalizmit etnik", theksoi Robertson. Ai ka shtuar se NATO u bën thirrje shqiptarëve të Kosovës që të ngriten kundër ekstremistëve.

Robertson tha gjithashtu se NATO-ja ende nuk e ka përfunduar punën e vet në Kosovë, andaj sipas tij Aleanca do të mbetet e përkushtuar ndaj Kosovës. Ai tha se do të ketë shkurtime të forcave, por mbetet një forcë e mjaftueshme dhe se shkurtimi i trupave nuk nënkupton edhe shkurtimin e standardeve.

 

Robertson me këtë rast ka përkrahur edhe nismën për bisedime ndërmjet Prishtinës dhe Beogradit, ndonëse siç është shprehur është ende herët të bisedohet për statusin përfundimtar të Kosovës.

 

Ndërkaq, duke potencuar rëndësinë e TMK-së si një organizatë për emergjencë civile, Roberston tha se TMK nuk mund të përbëjë embrionin e një ushtrie dhe se sipas tij ajo duhet të çlirohet nga krimi e korrupsioni.

Kryeadministratori Shtajner pas takimin me lordin Robertson ka thënë se në këtë takim është biseduar për situatën në Kosovë, për vështirësitë që janë hasur, por edhe për përparimet që janë bërë në Kosovë. Shtajner këtë vizitë të Robertsonit e vlerësoi si shumë të rëndësishme.

 

Ai tha se është i inkurajuar me faktin që Robertson dhe Këshilli i NATO-s e përkrahin politikën e UNMIK-ut, por edhe vendimet e samitit të Selanikut për fillimin e dialogut Prishtinë -Beograd për çështje praktike, ka thënë Shtajner.

Lordi Robertson ka pasur takime të veçanta edhe me komandantin e KFOR-it Fabio Mini, me presidentin e Kosovës Ibrahim Rugova, me kryeministrin Bajram Rexhepin si dhe me komandantin e TMK-së gjeneralin Agim Çeku, të cilët tha Robertson i kanë shprehur përkrahjen për ndërtimin e një Kosove demokratike.

"Presidenti Rugova dhe kryeministri Rexhepi kanë shprehur qëndrim të qartë lidhur me ekstremizmin dhe kanë shprehur gatishmërinë për ndërtimin e në shoqërie demokratike dhe shumetnike", tha Robertson.

"Lordin Robertson e njoftova me objektivat për zhvillimin ekonomik, privatizimin dhe për vende të reja të punës, sidomos për të rinjtë e Kosovës.

 

Po ashtu insistova që Kosova të njihet sa më shpejt si vend i pavarur ku do të integrohej në BE, në NATO dhe në miqësi të përhershme me Shtetet e Bashkuara të Amerikës", ka thënë presidenti Rugova pas takimit me Robertsonin.

 

 

Presidenti Rugova tha se në Krans Montana do të angazhohet për mundësitë e investimeve në Kosovë

 

Prishtinë, 27 qershor 2003 - Presidenti i Kosovës Ibrahim Rugova me dy ministrat e qeverisë së Kosovës Zef Morinën dhe Ali Sadriun ka udhëtuar dje pasdite për në Krans Montana të Zvicrës, ku do të marrë pjesë në samitin e Forumit botëror ekonomik.

 

Para nisjes, presidenti Rugova në aeroportin e Prishtinës, ka deklaruar se në këtë samit do të prezentojë arritjet e zhvillimit ekonomik në Kosovë dhe përshpejtimin e procesit të privatizimit. Ai po ashtu ka theksuar se Kosova tashmë është gati për investime dhe ka shtuar:

"Do të duhet të gjejmë një modalitet me UNMIK-un që të bëjmë sigurinë e investimeve. Në takimet që do të zhvillojë me zyrtarë qeveritarë, me organizata ndërkombëtare dhe përfaqësuesit e kompanive financiare, bankare, financiare dhe industriale, do të bisedojmë për mundësitë e investimeve në Kosovë", tha presidenti Rugova.

 

 

Bërns ka theksuar përkushtimin e SHBA-ve për Kosovën

 

Prishtinë, 27 qershor 2003 - Ambasadori amerikan në NATO Nikolas Bërns, në një konferencë për shtyp në Zyrën amerikane në Prishtinë, ka theksuar përkushtimin e SHBA-ve për Kosovën si dhe mbështetjen për popullin dhe liderët kosovarë në përmbushjen e standardeve të vendosura nga Kombet e Bashkuara.

"Ne mbesim të angazhuar në KFOR-in së bashku me partnerët tanë në NATO dhe do ta mbajmë përkushtimin e trupave tona në Kosovë në mënyrë që të sigurohet një mjedis i sigurtë", tha ambasadori Bërns.

 

Ai ka përkujtuar se SHBA-të kanë ndarë 14 milion dollarë për kthimin e të zhvendosurve në shtëpitë e tyre. "Jam posaçërisht i kënaqur me punën e mirë që kanë bërë trupat e SHBA-ve në sektorin e Lindjes, në përkrahjen e procesit të kthimit", ka thënë Bërns.

"Çështja e TMK-së është gjithashtu një çështje që na preokupon. Duke punuar nën kryeadministratorin Shtajner dhe komandantin e KFOR-it, Fabio Mini, TMK-ja është aktivisht duke punuar në planin që të shndërrohet në një organizatë mbrojtëse civile, efektive dhe bashkëkohore", Bërns. Ai deklaroi se është i impresionuar me përparimin që ka bërë Kosova, por shtoi se ende është herët të flitet për statusin përfundimtar.

Bërns tha se SHBA-të përkrahin idenë për bisedime me Beogradin për çështje praktike. Kjo është edhe një standard i rëndësishëm për Kosovën dhe SHBA-të janë të gatshme të përkrahin në përmbushjen e tij, si dhe në për përmbushjen e gjitha standardeve të tjera, ka thënë ndër të tjera Bërns.

 

 

Numan Baliq kundër Gjykatës Supreme të Kosovës

 

Prishtinë, 27 qershor 2003 - Marek Antoni Nowicki, Ombudsperson i Kosovës, në lidhje me rastin e ish-ministrit të Shëndetësisë, Numan Baliq, i ka drejtuar një letër Rexhep Haxhimusës, kryetar i Gjykatës Supreme të Kosovës. Novicki në këtë letër shkruan:

"Unë kam pranuar kërkesën e lartëshënuar me 24 qershor 2003. Nga kërkesa kuptohet se parashtrusi i kërkesës ankohet në lidhje më ngecjen e procedurës, të inicuar para gjykatës së lartpërmendur më 11 mars 2003".

"Prandaj duke patur parasysh interesin publik lidhur me rastin e lartpërmendur dhe në mënyrë që të vazhdojmë më tejë me hetimet tona mbi këtë çështje, do të ishte e nevojshme të na informoni në lidhje me fazën në të cilën ndodhet procedura në çështjen e kërkuesit, si dhe cilat veprime janë ndërmarrë nga gjykatë e juaj ose janë duke u planifikuar të ndërmirren që kjo qështje të vendost më shpejt", thuhet në funs të letrës së Novckit drejtuar kryetarit të Gjykatës Supreme të Kosovës.

 

 

Rrëmbyesit e Valon Dreshajt pandehen për katër vepra penale

 

Pejë, 27 qershor 2003 - Gjykata e Qarkut në Pejë ka caktuar masën e paraburgimit për tre rrëmbyesit e Valon Dreshajt. Kjo masë është caktuar për Arton Sylejmanin nga fshati Vranidol i Prishtinës, Driton Sylejmanin dhe Bashkim Hazirin nga Prishtina, të cilët janë arrestuar gjatë aksionit të lirimit të Valon Dreshajt.

 

Identiteti i tyre i bë i ditur pasi prokurori ndërkombëtar bëri kërkesë për fillimin e hetimeve në Gjykatën e Qarkut në Pejë. Të pandehurit ngarkohen se kanë kryer katër vepra penale: rrëmbim, mbajtje e paligjshme e armëve, përdorim i paligjshëm i armëve dhe sulm kundër policisë në detyrë.

Të përkujtojmë se rrëmbyesit kishin kërkuar nga familja Dreshaj 2 milionë euro për lirimin e Valonit.

 

 

Gjilan: Borxhet e mëdha detyrojnë "Higjienën" ta ndërprejë grumbullimin e mbeturinave

 

Gjilan, 27 qershor 2003 - Nga dita e shtunë e javës së kaluar, "Higjiena" në Gjilan ka ndërprerë grumbullimin e mbeturinave në pjesën më të madhe të qytetit e sidomos në lagjet ku janë të përqëndruara objektet e banimit kolektiv.

Arsyeja kryesore për një masë kaq të ashpër, sipas Halit Zymberit, drejtor i shërbimeve publike, ka qenë shkalla tepër e ulët e përmbushjes së obligimeve nga qytetarët.

Zymberi tha se vendimin e ndërmarrjes "Higjiena" nuk e konsideron si zgjidhje të qëlluar, sidomos tani kur temperaturat janë të larta, ndërsa Gjilani përballet edhe me mungesën e ujit, por ka shprehur brengosje ndaj faktit që mbi 70 për qind e qytetarëve e refuzojnë një obligim që është i domosdoshëm për të mbajtur një mjedis të pastër dhe pa mbeturina.

 

 

Dështoi seanca e Kuvendit komunal të Gjilanit meqë një grup i deputetëve të pakënaqur të LDK-së e braktisën mbledhjen

 

Gjilan, 27 qershor 2003 - Kuvendi komunal i Gjilanit ka dështuar të mbajë seancën e radhës pasi një grup i deputetëve të pakënaqur të LDK-së me Kryesinë e Degës e lëshuan mbledhjen.

 

Ata dolën me kërkesa për ndryshimin e rendit të punës, duke kërkuar interpelancë nga kryeshefi ekzekutiv dhe raport të punës nga drejtorët e drejtorive, anulimin e konkursit për drejtorë të tri drejtorive, të cilat aktualisht udhëhiqen nga ushtruesit.

Këta këshilltarë të LDK-së kanë kërkuar shpalljen e konkursit për të gjitha drejtoritë e disa kërkesa të tjera, mirëpo kryetari i KK të Gjilanit Lutfi Haziri tha se kjo nuk mund të bëhet në këtë mbledhje, por në atë të radhës.

Ndërkaq këshilltarët e PDK-së fare nuk kanë marrë pjesë, meqë më herët kanë paralajmëruar se do të bojkotojnë punën e Kuvendit, ngase, siç thuhet, edhe ata janë të pakënaqur me rrjedhat e Kuvendit komunal të Gjilanit.

Pas ndërprerjes së punëve të seancës në mungesë të forumi, kryetari i Asamblesë komunale të Gjilanit, Lutfi Haziri u deklaroi gazetarëve se kjo është sfida e parë dhe më e madhe që ka pasur KK në kthimin e funksionalizimit të institucionit më të lartë vendimmarrës në komunë.

 

 

Në Kosovë ka arritur një ekip ndërkombëtar, i cili do të merret me çështjen e pronave

 

Prishtinë, 27 qershor 2003 - Në Kosovë ka arritur një ekip ndërkombëtar i cili do të merret me çështjen e pronave të ndërmarrjeve publike dhe shoqërore. Ky ekip përbëhet nga tre gjykatës ndërkombëtarë dhe dy vendorë. Ky grup i posaçëm do të merret me ankesat rreth çështjeve të pronave dhe me çështjet kontestuese në ndërmarrjet publike dhe ato shoqërore.

 

 

LDK në Gjermani: Kush fshihet pas iniciativës qytetare për nënshkrimin e peticionit në Gjermani?

 

Frankfurt, 27 qershor 2003 - Në Frankfurt të Gjermanisë u mbajt mbledhja e zgjeruar e Kryesisë së Degës së LDK-së, ku morën pjesë edhe kryesitë e nëndegëve të LDK-së në Gjermani.

 

Në këtë mbledhje që u kryesua nga Hazir Krasniqi, kryetar, u përkujtua fytyra, aktiviteti politik, profesional e luftarak i heroit Sali Çekaj, ish-nënkryetar i Degës së LDK-së në Gjermani dhe komandant i UÇK-së.

 

Për jetën dhe veprën e Sali Çekajt foli bashkëpunëtori i tij Hafiz Gagica, i cili me këtë rast tha se vepra e Sali Çekajt, është vepër e një biri të popullit i cili jetën dhe veprën e tij ia kushtoi çështjes kombëtare. Ai u nis për të luftuar, pasi që popullit i kërcënohej rreziku i eliminimit të përgjithshëm. Ai me sukses ka ndikuar në formimin e grupeve ushtarake.

 

Bashkë me kolonel Ahmet Krasniqin ai ka përpunuar strategjinë për zhvillimin e suksesshëm të luftës për çlirimin e Kosovës. Sali Çekaj ishte jo vetëm funksionar politik i LDK-së por veprimtar i devotshëm për çështje të atdheut. Për shënimin e ditëlindjes së tij në të ardhmen do të organizohen manifestime sipas rotacionit nëpër të gjitha nëndegët e LDK-së në Gjermani, tha Hafiz Gagica.

Në vazhdim kryetari i degës Hazir Krasniqi informoi të pranishmit për organizimin e 125-vVjetorit të Lidhjes Shqiptare të Prizrenit nën patronatin e kryetarit dr. Ibrahim Rugova, me ç'rast i përshëndeti organizatorët.

 

Ai poashtu njoftoi me bisedat që në Prishtinë ka zhvilluar me udhëheqës të LDK-së të cilët janë të interesuar që edhe në diasporë të mbajnë këtë organizim politik që e kemi në 10-12 vjetet e fundit.
Në këtë mbledhje nga Isa Shabani, anëtar i kryesisë u paraqit edhe një propozim i programit të punës së mëtejme të Degës.

Në vazhdim me nga një raport të shkurtër u paraqitën kryetarët e komisioneve të Degës.
Një çështje tjetër që zgjoi interesimin e pjesëmarrësve ishte iniciativa e një grupi nga Gjermania që në emër të shqiptarëve të organizojnë nënshkrimin e një peticioni e t´ia dërgojnë Bundestagut. Me këtë rast u tha se prapa këtij grupi fshihen ish-bashkëpunëtorë të ambasadave jugosllave dhe komunistë të rryer.

 

Prandaj me këtë rast u tha se Dega e LDK-së në Gjermani nuk e organizon dhe as nuk e ndihmon këtë iniciativë, pasi që ajo me kohë në një rrugë zyrtare dhe deri tash shumë transparente është angazhuar në realizimin e disa kërkesave të bashkatdhetarëve tanë në Gjermani.

 

Lidhur më këtë janë mbajtur disa tubime me strukturat përkatëse vendëse dhe se shumë lande në Gjermani kanë njohur dokumentet e UNMIK-ut.

 

Në shumë sosh poashtu njíhet e drejta e dy nënshtetësive prandaj tri nga katër kërkesat e paraqitura në atë peticion nuk jenë fare të drejta dhe përmes këtij penticioni forca të caktuara ndaj çështjes së Kosovës dëshirojnë të mjegullojnë edhe më situatën.

 

Njoftohet anëtarësia se rreth këtyre çështjeve nuk ka nevojë të nënshkruhet kurrëfarë peticioni ngase para kësaj asnjë grup formal apo joformal nuk është konsultuar me LDK-në që është fuqia më e madhe në diasporë.

Në fund u vendos që në një kohë të shkurtër të organizohen tubime me aktivistë nëpër të gjitha nëndegët e LDK-së në Gjermani, njofton Shërbimi për informim i Degës së LDK-së në Gjermani.

 

 

"Ekonomist": Kosova është duke rrëshqitur drejt një forme të pavarësisë

 

Londër, 27 qershor 2003 - Ndërsa vendet tjera të Ballkanit gradualisht janë duke forcuar lidhjet me Bashkimin Evropian, Kosova ka mbetur jashtë këtij procesi, ndihet e vetmuar dhe në ankth, shkruan gazeta londineze "Ekonomist".

Pavarësisht nga kjo, shkruan më tutje gazeta, liderët kosovarë shpresojnë se gjërat mund të ndryshohen. Shqiptarët shpresojnë se së shpejti do të fillojnë bisedimet me qeverinë serbe, mbase muajin e ardhshëm, që do të ishte një hap i madh përpara, sepse do të mund të zgjidhen çështje praktike me interes të përbashkët.

Gazeta më tutje shkruan se Kosova, që nga përfundimi i luftës, me parlamentin dhe qeverinë e zgjedhur, ka bërë një hap të madh përpara. Por, megjithatë gazeta konstaton se institucionet e saj mbeten të brishta, ndarjet etnike të ashpra, 57 për qind të kosovarëve janë të papunë, ndërsa të ardhurat mesatare janë vetëm 220 dollarë.

Sipas gazetës "Ekonomist", procesi i afrimit me Bashkimin Evropian tashmë ka filluar, ashtu siç ka filluar edhe në vendet tjera ballkanike, por shumë probleme në Kosovë madje nuk mund as të shestohen pa qartësimin e statusit final.

Pasi shtron pyetjn - pavarrësia e plotë, ndarja, apo diç në mes, gazeta thotë se disa serbë kanë filluar të mendojnë për pavarësinë, me autonomi të garantuar për serbët në pjesën veriore dhe me një status special për manastiret serbe në jug të Kosovës.

Statusi i Kosovës, sipas gazetës, megjithatë nuk mund të zgjidhet nëse më parë Serbia dhe Mali i Zi nuk zgjidhin problemin e marrëdhënieve të tyre të ndërsjella. Duke e mbyllur këtë koment gazeta konstaton: "Pavarësisht, nga të gjitha, Kosova është duke rrëshqitur drejt një forme të pavarësisë".

 

 

Në Shqipëri aktualisht përdorin drogën mbi 30 mijë veta, kryesisht të rinj

 

Tiranë, 27 qershor 2003 - Në një raport të emetuar mbrëmë nga Tirana në masmediat e huaja shfaqet shqetësimi i përdorimit të drogës nga të rinjtë shqiptarë në këtë vend. Në këtë kontekst u tha se në Shqipëri aktualisht mbi 30 mijë të rinj janë përdorues të drogës.

 

Madje përdoruesit e drogës në Shqipëri nga viti në vit po shtohet. Sipas disa studimeve mosha mesatare e përdoruesve të drogës është nga 17 deri 25 vjet.

 

Ndërkaq, sipas disa të dhënave qytetet më të prekura janë Tirana, Durrësi, Kavaja, Shijaku, Shkodra dhe Vlora. Strukturat e shtetit mbetën të përqëndruara ende kryesisht në luftën kundër trafikut dhe trafikantëve të drogës.

 

 

Janë kidnapuar dy ushtarë amerikanë në Bagdad

 

Bagdad, 27 qershor 2003 – Forcat amerikane kanë filluar sot (e premte) kërkimin e dy ushtarëve, të cilët janë zhdukur në pjesën veriore të Bagdadit, njofton BBCWorld. Dy ushtarët amerikanë nuk i janë përgjigjur kontrollit të komunikimit dhe është konstatuar se janë zhdukur me automjetet, armët dhe pajimet e tyre.

 

Në vendin e ngjarjes është gjetur gjak, kurse një zyrtar amerikan anonim i mbrojtjes ka deklaruar se të dy ushtarët duket “të jenë kidnapuar në një farë mënyre”. Në operacionin e kërkimit po marrin pjesë edhe helikopterët.

 

 

Një ushtar amerikan është vrarë dhe 9 të tjerë janë plagosur në një sulm në qytetin Kufah

 

Kufah, Irak, 27 qershor 2003 – Një ushtar amerikan është vrarë dhe 9 të tjerë janë plagosur në një sulm të sotëm (e premte) në qytetin irakian Kufah, njofton AFP. Incidenti ka ndodhur në një kohë që trupat amerikane po hulumtonin në qytetin verior Balad dy ushtarët e zhdukur, të befasuar sesi dikush ka mund të kidnapojë ushtarët dhe automjetet e tyre të blinduara.

 

Patrulla ushtarake, thuhet mëtej në njoftim, është sulmuar nga persona të armatosur në qytetin Kufah, afër qytetit të shenjtë shit Naxhaf, 130 kilometra në jug të Bagdadit.

 

Me këtë vrasje, shifra e ushtarëve amerikanë të vrarë arrin në 57 sish që kur presidenti Bush e ka deklaruar të përfunduar luftën në Irak, më 1 maj. Nëntëmbëdhjetë syresh janë vrarë nga plumbat, kurse pjesa tjetër kanë humbur jetën aksidentalisht.

 

 

Izraeli ka vrarë sot katër palestinezë

 

Gaza, 27 qershor 2003 – Izraeli ka vrarë sot ( e premte) tre militantë palestinezë dhe një këmbësor civil gjatë përpjekjes për të kapur prodhuesin e bombave të Hamasit, që është edhe një grusht tjetër kundër përpjekjeve për të shpëtuar planin e ri të paqes për Lindjen e Mesme, njofton Rojter.

 

 

Arrestohet autori i sulmeve në Riad

 

Riad, 27 qershor 2003 - Personi që dyshohet se ishte organizatori i sulmeve me bomba në kryeqytetin e Arabisë Saudite në muajin maj, është në arrest. Zyrtarë sauditë deklaruan se Ali Abdulrahman Al-Gamdi, iu vetëdorëzua zëvendësministrit të Brendshëm saudit.

I dyshuari tani ndodhet në arrest në Arabi Saudite.

Gjithsej 39 vetë, përfshirë këtu dhe nëntë sulmuesit, humbën jetën gjatë sulmeve vetëvrasëse me bomba në lagjen saudite ku jetojnë shtetas britanikë dhe amerikanë.

 

 

Vazhdojnë paqartësitë lidhur me marrëveshjen për armëpushim me Izraelin

 

Ramallah, 27 qershor 2003 - Paqartësitë lidhur me njoftimin për marrëveshje midis grupeve radikale palestineze për armëpushim me Izraelin vazhdojnë. Presidenti palestinez Jaser Arafat tha se pret që brenda pak orësh të publikohet një deklaratë e përbashkët e organizatave Fatah, Xhihad dhe Hamas.

 

Thuajse njëkohësisht zëdhënës të Hamasit dhe të Xhihadit i përgënjeshtruan lajmet për marrëveshje në këtë çështje. Sipas përfaqësuesit të Fatahut tre grupet udhëheqëse radikale palestineze ishin marrë vesh parimisht dje për armëpushim me Izraelin.

 

 

Marrëdhëniet ndërmjet BBC-së dhe qeverisë britanike kanë arritur pikën kritike

 

Londër, 27 qershor 2003 - Sipas gazetës "Tajms", marrëdhëniet ndërmjet BBC-së dhe qeverisë britanike kanë arritur pikën kritike. Kontesti rreth mënyrës me të cilën BBC ka raportuar për luftën në Irak kërcënon të shndërrohet në një konflikt të hapur ndërmjet drejtorit të përgjithshëm të BBC-së Greg Dajk dhe kryeministrit Toni Bler.

Greg Dajk është betuar se nuk do të lëshojë pe, siç thuhet, para presionit pa presedencë dhe personalisht ka lejuar komunikatën e hartuar ashpër me të cilën hidhet poshtë kërkesa e njërit nga bashkëpunëtorët më të ngushtë të kryeministrit Alister Kambel për BBC-në që deri në mesnatë të ofrojë përgjigje në një sërë çështjesh kontestuese.

 

 

Nga rrëshqitja e dheut në Kinë kanë humbur jetën 17 veta dhe janë zhdukur 24 të tjerë

 

Pekin, 27 qershor 2003 – Rrëshqitja e dheut, e shkaktuar nga rrebeshet e shirave, ka shkaktuar vdekjen e të pakten 17 njerëzve dhe zhdukjen 24 të tjerëve në Kinën qendrore dhe jugperendimore, kanë bërë të ditur sot (e premte) zyrtarët dhe mediat vendore, njofton Rojter.

 

Kështu, vetëm në provincën e Seçuanit shirat e dy ditëve të fundit kanë shkaktuar mbi 150 rrëshqitje dheu, të cilat kanë pasur për rrjedhojë edhe shembjen e 14 mijë shtëpive, rrëzimin e shumë urave dhe shkatërrimin e shumë rugëve.

Copyright©2000-2003 Trepca.net - Të gjitha të  drejtat e rezervuara.