NË LECCO PO PUNOHET PËRKUSHTIMISHT NË PËRGATITJEN E MANIFESTIMIT TË DENJË E TË MADH DYDITOR, KUSHTUAR NËNËS TEREZE:

« BIJA SHQIPTARE - NËNA E BOTËS MBARË - SHENJTËRESHA E DASHURISË »

Manifestimi i madh, që do të fillojë të shtunën e 12 korrikut në ora 17 e do të zgjasë deri të dielën e 13 korrikut në mbrëmje, po e përgatit Shoqata Kulturore Humanitare «NËNA TEREZE» e Lecco-s, në koordinim me QIKSH «ALBEUROPA» Hyrja do të jetë e lirë (gratis), kurse ofertat vullnetare të mjeteve financiare do t'u bashkangjiten mjeteve në fondin e Maratonës Humanitare të Shoqatës «Nëna Tereze», në shërbim nevojave të fëmijëve jetimë dhe të sëmuar të Kosovës.

 

Leko (Lecco - Itali), 24 qershor 2003 / Engjëll KOLIQI

 

Nënë Tereza

Ka rreth një muaj që Shoqata Kulturore Humanitare «Nëna Tereze», në koordinim me QKIKH «Albeuropa» ka filluar përgatitjet për manifestimin e madh të Mërgatës Shqiptare, kushtuar Shën Terezes Shqiptare, që do të mbahet më 12 e 13 korrik 2003 në Lecco - qytet pitoresk rrëzë Alpeve, në Lombardi.   Të shtunën do të fillohet në ora 17, me një defile nëpër qytet dhe do të vazhdohet me Akademinë Solemne, në ora 19, në një sallë teatri. Fjalën kryesore në akademi do ta ketë biografi numër një i Nënës Tereze - Dr Dom Lush Gjergji, i cili ka botuar dhjetëra libra, në shumë gjuhë botërore e në miliona kopje, kushtuar Shenjtëreshës Shqiptare. Do të ligjërojë edhe Dom Valentino Salvoldi - bashkautor i disa librave me Dom Lushin e mik i madh i popullit shqiptar, si dhe Dr Antonella Lucchini, nga Novara, e cila kohë më parë ka mbrojtur disertacionin mbi Nënën Tereze dhe ka fituar titullin doktor shkence.   Në akademi janë ftuar edhe drejtori i shtëpisë botuese «Vellar» nga Bergamo, që ka botuar miliona kopje librash mbi Nënën Tereze, ipeshkëvi i Dioçezit të Lecco-s, përfaqësuesit e pushtetit lokal të Rrethit (Provincës) të Lecco-s, të të gjitha komunave përrreth, përfaqësueset e Shtëpisë së Misionareve të Dashurisë (motrat e NënësTereze) nga Milano, përfaqësues të pushtetit të Krahinës së Lombardisë, si dhe përfaqësuesit e të gjitha shoqatave dhe organizatave joqeveritare të rrethit.

 

Do të ftohen edhe përfaqësuesit  të gjitha bashkësive shqiptare në Itali dhe në mbarë Mërgatën tonë - prej Europe e deri në Amerikë.

 

Do të dëshmojë poashtu edhe e mbesa e Nënës Tereze - Age Bojaxhiu, e bija e Lazrit (e vetmja anëtare e Familjes Bojaxhiu, e gjallë). Akademia, poashtu do të freskohet edhe me program kulturo-artistik, ku do të marrin pjesë artistë shqiptarë të njohur, por edhe grupe të bashkësive etnike nga India e nga Afrika, me pikat e tyre karakteristike folklorike. Poashtu do të hapet edhe një ekspozitë e vizatimeve të fëmijëve mbi NënënTereze dhe një gazetë muri me shkrime kushtuar Shenjtëreshës Shqiptare!!!

 

Të dielën paradite do të celebrohet Mesha Solemne kushtuar Nënës Tereze, me pjesëmarrjen e ipeshkëvit të Lecco-s, të priftërinjëve shqiptarë - misionarë në vende të ndryshme të Europës dhe të priftërinjëve vendas. Mbas meshe do të fillohet me orën letrare dhe me programin kulturo-artistik, kushtuar Nënës Tereze. Do të organizohet poashtu edhe banketi-koktej, ku do të ketë ushqime e pije për të gjithë pjesëmarrësit. Në programin kulturo-artistik do të marrin pjesë edhe grupe folklorike të bashkësive etnike nga India dhe nga Afrika.

 

Programi kulturo-artistik dhe kokteji të dielën do të vazhdojnë deri në orët e mbrëmjes. Për mysafirëtqë vijnë nga larg, organizatorët kanë menduar dhe kanë gjetur zgjidhjen më të mirë - sistemohen nëpër familhet shqiptare. Në këtë mënyrë, edhe rritet dashuria ndërshqiptare, sipas porosisë edhe të Shën Terezës, edhe lindin miqësi të reja, edhe kursehen paratë!!! Askush nga pjesëmarrësit nuk do tëguajë hyrjen për të përcjellur programin kulturo-artistik në këtë manifestim, as ushqimin, as pijet. Do të vëhet aty një arkëz dhe një komision.

 

Të gjithë ata që duan të hedhin ofertat e tyre garantohen se ato mjete do të bëhen pjesë e mjeteve të Maratonës Humanitare «Shën Tereza e Shqiptarëve» dhe do t'u dhiurohen fëmijëve pa prindër dhe të sëmuar të Kosovës - thonë në Këshillin Organizativ të Manifestimit «Bija Shqiptare - Nëna e Botës Mbarë - Shenjtëresha e Dashurisë» në Lecco.

Copyright©2000-2003 Trepca.net - Të gjitha të  drejtat e rezervuara.