Reportazh nga Llapi

Përkundër se ka njerëz që vetquhen politikanë që duan të pengojnë ecjen pa zgjedhur mjetet, LDK dhe Podujeva nuk ndalen

Më kot po punohet në shkatërrimin e embrionit të LDK-së nga njerëz meskinë që për një banesë të ofruar, për mijëra euro apo për ndonjë tender të ofruar shkelin mbi votën e 60% të zgjedhësve llapjanë që i besuan LDK-së, konceptit të saj ndërtues dhe programit zhvillimor të saj. LDK në Llap gjendet para një sfide në të cilën e kanë sjellë 7-8 njerëz të pa përgjegjshëm që edhe sot i thonë vetes këshilltarë dhe që pa kurrfarë ndërgjegje shkelin parimet dhe programin e LDK-së, marrëveshjen me Kryetarin Rugova dhe gjitha parimet njerëzore, morale e kombëtare.   21 qershor 2003 / Shkruan: Bekim TOÇANI

  

Mëngjeset e verës në Llap ruajnë aromën e virgjër të një jete tjetër për të cilën llapjanët kanë ëndërruar e punojnë pandalshëm. Nisja e një dite ka shpresë e jetë, ndeshet dita pastaj me hallet e zakonshme dhe përsëritshëm mbyllet me një madhështi dhembëse e shpresëdhënëse në të njëjtën kohë. Flladi i muzgut në Llap përcjell diellin dhe hapë jetën tjetër, atë të të rinjëve që duan të jetojnë dhe ta bëjnë vërtetë tjetër atë jetë. Ndër hallegjinjtë e shumtë perëndimi i diellit mbyll edhe një tregim e përpjekje mbinjerëzore për të qenë.

 

Jo rrallë herë për Llapin është thënë se vlon nga “demokracia e çajit”. Kafe çajtoret e shumta dhe bisedat që në të shumtën janë “për politikë” i japin një ngjyrë dalluese e cila vështirë se ekziston në fjalorin shqip.

 

 

Kriza morale njerëzore sjell edhe kriza tjera

 

Njerëzit e rëndomtë dhe një pjesë e atyre që kanë unin e vet kanë një pyetje serioze dhe shumë të diskutueshme. A ka krizë institucionale apo krizë morale në Llap?! Sikur për Podujevën dhe pse jo edhe Kosovën përgjithësisht, vlenë më shumë kjo e dyta. Kriza morale është me gjithë përmasat e saj ka hyrë në poret e shoqërisë këtu në verilindje të Kosovës, në kufirin i cili ka filluar të shkilet jo vetëm nga prerësit ilegal të pyjeve, por edhe nga ata që deri dje ishin shkelës e sot i konsiderojmë si fqinj dhe asgjë më shumë. Nëse nuk është një problem i madh është shndërruar në një temë që do rrugëzgjidhje. Këtu është e mira e njeriut llapjan që kërkon zgjidhje edhe për krizat, edhe për hallet dhe problemet.

 

Kriza morale është shkaku i asaj që disa e konsiderojnë krizë institucionale vetëm pse edhe pas afro tetë muaj pas zgjedhjeve vendore, Podujeva nuk ka Qeverinë komunale. Ndërkaq ekspertët juridikë vlerësojnë se komuna e Podujevës ka institucionet dhe se nuk mund të bëhet fjalë për vakum juridik apo ngecje në punët dhe projektet e parapara. Asfaltimi i rrugës kryesore dhe hapësirat e gjelbëruara në qytet, ofrimi i shërbimeve që përditë punon për qytetarët si dhe ecja e pandalshme në kërkim të zgjidhjeve të probleme janë vetëm disa nga shembujt se Llapi, megjithate ecën. Përkundër që ka njerëz që vetquhen politikanë, ka parti dhe ka smirëzi që duan të pengojnë ecjen pa zgjedhur mjetet, Podujeva dhe Llapi nuk ndalen. Ecja e natyrshme edhe pse e ngadalshme korrespondon aq bukur me mëngjeset e çiltëra e plot diell dhe netët plot gjallëri e jetë.

 

 

LDK di si dhe ka përkrhajen e zgjedhësve për tejkalimin e gjendjes aktuale

 

Më kot po punohet në shkatërrimin e embrionit të LDK-së nga njerëz meskinë që për një banesë të ofruar, për mijëra euro apo për ndonjë tender të ofruar shkelin mbi votën e 60% të zgjedhësve llapjanë që i besuan LDK-së, konceptit të saj ndërtues dhe programit zhvillimor të saj. LDK në Llap gjendet para një sfide në të cilën e kanë sjellë 7-8 njerëz të pa përgjegjshëm që edhe sot i thonë vetes këshilltarë dhe që pa kurrfarë ndërgjegje shkelin parimet dhe programin e LDK-së, marrëveshjen me Kryetarin Rugova dhe gjitha parimet njerëzore, morale e kombëtare. Mirëpo strumbullar i gjithë kësaj mbetet karriga apo siç pëshpërisin në Podujevë taxhia e cila dikujt i është ndërpre. Kur elektorati i dha votën LDK-së në zgjedhjet e para, veprimtarët e saj të rëndomtë patën menduar se edhe po të shkrihen për atë votë pak është.

 

Dikush ka menduar të kundërtën, të vijë sa më shpejt te arka dhe kështu të pasurohet dhe të luajë me djersën e mija veprimtarëve dhe mbi 65% të votës. Tipat e tillë tashmë krijojnë aleacë me “ata që i konsideronin si vrasës” nga të cilët ka asi që në llap njihen si dhunues edhe pse u prijnë partive majtiste. Ka nga këta 7-8 jonjerëz që veten e konsiderojnë alamet burrash sa mund të merren me shit-blerje armësh por të lirohen nga pushteti serb dhe përsëri ta shohin veten “patriotë deri në lotë”, ka nga këta minj varresh edhe gra UDB-ashësh që shesin mend por kurr nuk mund ta ndërrojnë biografinë e tyre.

 

E megjithate LDK po i kthehet njerëzve që e krijuan, atyre që i thanë JO komunizimit, stalinizmit dhe majtizmit. Të 15 këshilltarët e LDK-së që i qëndruan besnik kryetarit të degës, programit të LDK-së dhe qëndrimeve të Kryetarit Rugova treguan se e djathta në LDK po pastrohet përfudnimisht nga dyftyrëshit, të pamoralshmit, melezët dhe të korruptuarit. Kjo duhej të ndodhte dhe po ndodhë sepse ndryshe gjithçka do të merrte teposhtëzën për LDK-në dhe ata mbi 60% qytetarë që votuan për LDK-në dhe për Rugovën. Mirëpo edhe në Prishtinë, ka individë që duhet të mendojnë mirë se ku i kanë mbesat dhe me kë bëjnë aleancë, pse hudhën vaj në zjarr pa ditur pse dhe pikërisht ata duhet ta mbajnë peshën e kryqit në supet e tyre dhe kështu të binden kë kanë mbrojtur dhe pse, cili ishte interesi i tyre dhe cili i LDK-së?!

 

Herët a vonë e vërteta do të dalë e zhveshur dhe pastaj mëkatarët do të rrëfehen për të pabërat e tyre. Nuk do të bëjnë punë as kërcënimet telefonike, as mesazhet fyese por as premtimet për poste drejtorësh e nëpunësish, apo për ndonjë kafshatë që mund të ngjyhet në tendera, konkurse apo benificione tjera. Për dikë do të bëhet vonë, por tjerët mund të mbështeten në moralin dhe qëndrueshmërinë e njerëzve që edhe sot përsëritshëm qëndrojnë ashtu siç ditën për 13 vjet.

 

 

A po luajnë lojë të ndytë UNMIK-u dhe OSBE-ja...?!

 

Rreziku i tensioneve në llap po rritet për shkak të lojërave të ndyta të disa përfaqësuesve të organizatave ndërkombëtare. Parasëgjithash të UNMIK-ut dhe OSBE-së që bashkërisht po përkrahin ata që 24 orë punojnë për rrënimin e institucioneve të dala nga vota e lirë. Njerëzit me të drejtë pyesin në mos UNMIK-u kështu tenton ta shtyjë afatin e qëndrimit në Kosovë, për shkak të pagave të majme por edhe për shkak të dobësimit të elementit nacionalist në LDK dhe në gjithë Kosovën?! Përfaqësuesve të këtyre dy organizatave u është bërë me dije se nëse eskalon situata përgjegjësinë do ta bartin vetë dy persona, pos atyre 7-8 individëve që ende thirren në LDK.

 

Sa për rolin destruktiv të PDK-së nuk ka nevojë të shkruhet nëse shikohet struktura e atyre që ngrisin gishtin për rrënim! Një mori njerëzish që pa ego bëjnë punën e robotëve duke shpresuar në 5 drejtori siç kanë lidhur marrëveshje me ish funskionarë të LDK-së që nuk kanë marrë besimin madje as në aktivin ku jetojnë si fizikum si dhe me biznesmenë që kanë investuar aq shumë për shkatërrimin e LDK-së. Pyetja kapitale që shtrohet është se a thua Kreta në një farë mënyre ka filluar të prodhojë krimba edhe në Llap, pse jo edhe në Kosovë?! Shërbime të ndryshme ortodokse që në histori kanë provuar se janë kundër shqiptarëve dhe rrjeti mafiozo-politik kanë krijuar një strukturë të pistë që “rrevolucionin demokratik” ta bartin edhe këtu. Çdo konkludim tjetër do të ishte i mirëseardhur dhe pse të gjitha rrugët dhe njerëzit kanë emër dhe mbiemër.

 

Në gjithë këtë peisazh janë njerëzit ata që influentohen nga përgjegjësia apo mospërgjegjësia e atyre që hapërojnë pandalshëm dhe atyre që përsëritshëm pengojnë. Mbi 70 % e qytetarëve janë të papunë, çmimet dhe jeta janë shtrenjtuar tej mase dhe shpesh mendohet që mbijetesa është vetëm një term gjuhësor. Por njerëzit janë gjallë, askush nuk vuan nga uria dhe fundja jeta nuk po ndalet siç nuk po ndalen kurr së qarkulluari gjithë ajo mori veturash që nënkupton shpenzime. “Dikush bre vlla ka sepse punon, dikush tjetër është pasuruar me djersën e tjerëve, ka asi që jetojnë me para të pista dhe jemi ne që jetojmë ndershëm edhe me varfërinë tonë”, thotë Salihu – një ish luftëtar i lirisë që edhe pa punë mbanë familjen e tij 4 anëtarëshe duke ecur tehut të shpatës dhe ekzistencës. Madhështia e tij qëndron në racionalitetin dhe buzëqeshjen e tij që nuk i mungojnë edhe kur nuk ka 15 cent për çaj apo mbetet pa duhan. Ai mendon se kriza morale prodhon edhe krizat tjera që dëmtojnë shoqërinë “demokratike” llapjane.

 

 

Kujdesi për njeriun dhe jetën në Llap

 

Megjithate kafenetë e shumta dhe kafiteritë që janë shndërruar në monotoni dhembëse janë përplot. Janë plot edhe rrugët me femrat e bukura që ua kanë tejkaluar me modën edhe evropianeve dhe me meshkujt që pëshpërisin për anomalitë dhe fshehin me mund ndjesitë përballë të së bukurës dhe shëmtisë. Askush saktësisht nuk e di a mund të flitet në këtë atmosferë për krizën morale, bukurinë apo vizionin për një jetë tjetër.

 

Askush as përafërisisht nuk ka dhënë ndonjë vlerësim se ku është dhe nga vete shoqëria llapjane, askush nuk flet për vlerat dhe jovlerat që kanë vërshuar ndër ne. Është ndjeshmërisht prekës fakti se ne shohim dhe prekim jetën, anomalitë dhe realitetin pa diskutuar së paku për kufirin në mes të normales, varfërisë, amoralitetit, papërgjegjësisë dhe anës së kundërt të atyre që u përmendën. Zëra të paktë flasin e përpiqen ti eksplorojnë këto tema dhe gjithë  biseda mbytet në një tavolinë çaji e duhani. Tragjedia është se ne harrojmë njeriun e rëndomtë, që nuk ka hapsirë për tu shprehur dhe për të dhënë mendimin e lirë, kritikën apo rrugëzgjidhjen.

 

Prandaj edhe Llapi e Kosova me krijimin e hapësirës për njeriun, për njeriun shqiptar që përballet me jetën, problemet dhe dëshirën e mundësinë për të ecur, po bën hapin e parë. Ai hap që ka munguar meqë “të mëdhenjtë medial” merren me probleme “e mëdha” duke harruar kështu atë që gazetaria dhe shoqëria e civilizimi e kanë pikënisje NJERIUN.

 

Ti kthehemi njeriut se kështu luftojmë banalitetet, anomalitë dhe krizën e rrezikshme morale jo vetëm në Llap. LDK ka strumbullar njeriun, politika e saj e udhëhequr nga dr. Rugova këtë e kanë provuar pa ekuivoke këtë filozofi praktike. Prandaj, para se të bëhet vonë, njerëzit e LDK-së duhet ti emërojnë fajtorët, duhet të dalin nga kjo krizë pa “melezët dhe dyftyrshat” dhe kështu të vazhdojnë me kujdesin për jetën e njeriut llapjan.

Copyright©2000-2003 Trepca.net - Të gjitha të  drejtat e rezervuara.