NË LEKO (LECCO- ITALI), MBAS TRI DITË GREVË URIE NË FAMILJEN SHQIPTARE QOKAJ, DRAMA MBYLLET ME NJË FIJE SHPRESE:

GJYKATA PEZULLON DEKRETIN E KUESTURËS PËR DËBIMIN E FAMILJES PESËANËTARËSHE NGA ITALIA

Leko (Lecco) ITALI, 21 qershor 2003 / QIKSH Albeuropa / Engjëll KOLIQI

 

Familja Qokaj, Drita me bashkëshortin dhe tre fëmijët, nga peripecitë e varfërisë në Shqipëri, në vitin 1998 bashkë me një grup kosovarësh të ikur nga lufta, nga Shqipëria kishin mbërritur në qytetin e Lecco-s. Ata në organet e punëve të brëndshme të Italisë, nga frika se do t'i rikthejnë për Shqipëri, ishin paraqitur si kosovarë dhe kishin marrë lejeqëndriomin me motiv për mbrojtje të përkohshme, sipas dekretit të Ministrisë së Brëndshme të Italisë, që vlente vetëm për qytetarët e Kosovës.

 

Sikurse edhe kosovarët që nuk ishin kthyer pas luftës, edhe familja Qokaj, ishin integruar mirë në rrethin shoqëror - burrë e gua ishin punësuar, kurse fëmijët vijonin mësimet në shkollat italiane. Një integrim dhe një sistemim për t'u pasur lakmi.

 

Mirëpo sikur (s')ishte pritur, prapë familja Qokaj u gjend para peripecive të reja. Derisa qytetarët e Kosovës, që ishin sistemuar si ata, mbas luftës - tashmë kishin sjellur në kuesturë dokumente personale nga Kosova, ata nuk mund t'i sillnin ato, sepse ishin qytetarë të Shqipërisë. Pas kërkesave të përsëritura të zyrtarëve të Kuesturës së Lecco-s, ata detyrohen të tregojnë të vërtetën dhe i paraqesin dokumentet personale, të lëshuara nga administrata civile e Shqipërisë.

 

Sapo kuptuan se janë qytetarë të Shqipërisë, zyrtarët e kuesturës së Leccos, pa u hamendur përgatisin dekretin, me të cilin familja pesëanëtarëshe - Qokaj, urdhërohen ta lëshojnë territorin e Italisë, në akuzat për falsifikim dokumentesh dhe mashtrim të institucioneve shtetërore italiane. Ishin të kota shpjegimet dhe arsyetimet e bashkëshortëve Qokaj. Përgjigja e organeve, gjithnjë ishte kërcënuese: "do ikni vetë, apo po prisni dëbimin e forcuar!?" Ata ishin shumë të vendosur: "pë së gjalli nuk na dëboni dot! Mund të na dërgoni në Shqipëri, vetëm në arkivole!".

 

Edhepse të dy bashkëshortët punojnë me të gjitha rregullat dhe paguajnë kontribute shtetit italian, edhepse fëmijët vijojnë mësimet në shkollën publike italiane, organet administrative të Kuesturës së Lecco-s nuk lëshojnë pe. Duke mos pasur tjetër zgjidhje, Znj Drita Qokaj merr vendim të preerë dhe shumë të guximshëm. Të mërkurën e 18 qershorit, bashkë me të tre fëmijët, në banesën e saj fillon grevën e urisë, me afat të pacaktuar - derisa të shfuqizohet dekreti për dëbimin e tyre, ose deri në vdekje!!!

 

Avokati i Familjes Qokaj - Marcello Perillo, alarmon në të gjitha instancat shtetërore të Rrethit të Lecco-s. Duke u gjetur para një sfide të paparamenduar, organet e pushtetit mobilizohen, për të gjetur një zgjidhje. Njëfarë gjysmëzgjidhje gjendet dje (të premten pasdite) në Gjykatën e Lecco-s, ku gjykatësi Gianmarco De Vincenzi - siç ka thënë - për motive humanitare pezullon dekretin e Kuesturës për dëbimin e Fmiljes Qokaj nga Italia. Mirëpo ky pezullim është i përkohshëm.

 

Gjykatësi i ka caktuar avokatit të Familjes Qokaj afatin prej 15 ditësh për ta bërë kërkesën për zgjidhjen e këtij problemi, në gjykatën për të miturit, ku mund të merret një vendim i favorshëm, duke pasur parasysh të drejtat dhe liritë qytetare të fëmijëve, mbi të cilat, në një vend demokratik, është vështirë të shkilet.

 

Shoqata Shqiptare "Nëna Tereze" në Lecco dhe Qendra Koordinuese Integruese Kulturore e Humanitare "Albeuropa", edhepse të informuara vonë me dramën e Familjes Qokaj, kanë ndërmarrë masa. Të dy kryetarët e këtyre dy organizmave shqiptare kanë ndërhyrë sot në insitucionet shtetërore në Leko dhe kanë paralajmëruar protesta publike dhe denoncim të institucioneve italiane për shkeljen e të drejtave të njeriut, nëse nuk zgjidhet ky problem në favor të Familjes Qokaj, që dosido tashmë janë integruar mirë në shoqërinë italiane dhe se niuk ekziston kurrëfarë arsye për dëbimin e tyre. Tash kur e dijmë këtë problem - familja Qokaj nuk është më vetëm, por do të ketë çdo përkrahje të mijëra bashkëkombasve që janë të sistemuar në këto anë - na thanë përfaqësuesit e këtyre dy organizmave shqiptare.

Copyright©2000-2003 Trepca.net - Të gjitha të  drejtat e rezervuara.