Lajme

E shtune, 21 qershor 2003

Përmbajtja:

• Presidenti Rugova tha se njohja formale e pavarësisë do të përshpejtonte procesin e integrimit të Kosovës në BE

• Presidenti Klinton nderohet me çmimin "Duart e Shpresës"

• Kris Paten thotë se integrimi në BE është në dorën e vetë shteteve të rajonit

• Presidenti Rugova e vlerësoi si të rëndësishëm pjesëmarrjen e Kosovës në samitin e BE-së

• Solana shpreson që përfaqësuesit shqiptaro - serbë do të takohen gjatë ditëve që vijnë

• Alush Gashi thotë se Ballkani Perëndimor do të ketë qetësinë e garantuar sapo Kosova bëhet shtet i pavarur

• BE takon udhëheqësit ballkanik

• Rruga e integrimit të Ballkanit në BE varet tërësisht nga vullneti i tyre për të zbatuar reformat

• Samiti i Ballkanit dhe emigracioni

• Në punimet e samitit të Selanikut u shënuan rezultatet e para lidhur me projekt-kushtetutën e BE-së

• PDSH ndërpreu moratoriumin për ngrirjen e veprimtarisë së saj politike

• Në ujërat mediterane është fundosur edhe një barkë me rreth 200 emigrantë afrikanë

• Bush ka vazhduar sanksionet për 172 individë dhe organizata që janë kërcënim i paqes dhe i stabilitetit në Ballkan

• Trupat indiane kanë vrarë shtatë kryengritës në shtetin Asam të Indisë

• Paralajmërim për një sulm terrorist në Kenia

• Forumi botëror ekonomik mblidhet në Jordani

Presidenti Rugova tha se njohja formale e pavarësisë do të përshpejtonte procesin e integrimit të Kosovës në BE

 

Selanik, 21 qershor 2003 - Përfaqësuesit e Bahskimti Evropian dhe liderët e Ballkanit Perëndimor mbajtën një konferenecë me gazetarë ku paraqitën pikëpamjet e tyre rreth punimve të samitit të Selanikut.

Përfaqësuesi i lartë i BE-së për politikë të jashtme dhe siguri Havier Solana tha se Beogradi dhe Prishtina kanë shprehur vullnetin të fillojnë bisedimet duke sakëtsuar se dialogu do të fillojë deri në fund të korrikut.

Presidenti i Komisionit Evropian Romano Prodi theksoi faktin se mungesa e statusit të Kosovës nuk duhet të jetë pengesë për integrimin e Kosovës në BE.

 

Prodi tha se e ardhmja e Kosovës është integrimi në rajonin e Ballkanit e pastaj integrimi i tërë Ballkanit në Bashkimin Evropian. Sipas tij, kjo duhet të bëhet pa marrë parasysh statusin përfundimtar të Kosovës.

Ndërkaq Presidenti i Kosovës Ibrahim Rugova, sikur edhe kryeministri Bajram Rexhepi, theksoi rëndësinë e pjesëmarrjes së Kosovës në këtë konferencë, gjë që është një avancim, krahasuar me samitin e Zagrebit, ku përfaqësuesit e Kosovës nuk ishin prezentë.

Presidenti Rugova ritheksoi edhe me këtë rast se njohja formale e pavarësisë do të ishte zgjidhja më e mirë për Kosovën dhe se kjo do të ndihmonte tërë rejonin dhe do të përshpejtonte procesin e integrimit të Kosovës në Bashkimin Evropian.

 

Përfaqësuesi serb në delegacionin e Kosovës Milorad Todoroviq tha se pavarësia e Kosovës do të jetë rrugë drejt pastrimit etnik të Kosovës nga serbët dhe pakicat e tjera.

Ndërkaq kryeadministratori Shtajner tha se në të gjitha diskutimet ka dominuar toni për çështjet konkrete, substanciale e jo ato të statusit të Kosovës, sepse ajo është lënë për më vonë.

 

 

Presidenti Klinton nderohet me çmimin "Duart e Shpresës"

 

Nju Jork, 21 qershor 2003 - Ish-Presidenti i SHBA-ve Bill Klinton u nderua të enjten me çmimin "Duart e Shpresës" nga Këshilli Kombëtar Shqiptaro-Amerikan, një organizatë lobiste që mbron çështjet shqiptare në Shtetet e Bashkuara.

Duke marrë çmimin presidenti Klinton i bëri thirrje popullit të Kosovës që ta lërë të kaluarën pas, të falë dhe ta hedhë vështrimin nga e ardhmja.

Në ceremoninë e organizuar të enjten në Nju Jork presidenti Klinton shfrytëzoi rastin për t'i bërë një thirrje emocionale popullit të Kosovës për të falur. Kosova, tha ai, duhet të nxjerrë Mandelën e Evropës.

"Askush nuk ka vuajtur dhe nuk është keqtrajtuar më shumë se shqiptarët në shekullin e 20-të dhe deri kohët e fundit ata ishin harruar. Nëse jeni të inatosur, është e kuptueshme, se keni të drejtë. Por unë dua që Kosova të nxjerrë Mandelën e Evropës. Unë dua që Kosova të provojë se mund të jetohet së bashku. Të jeni modeli i asaj që duam të ndërtojmë në shekullin e 21.

 

Në këtë jetë, dhe unë kam kaluar vështirësitë e mia, tha presidenti Klinton, barazia nuk vendoset me hakmarrje. Hakmarrja më e mirë është t’i lini gjerat mënjanë, të vazhdoni jetën. Jepuni shpresë fëmijëve që janë brezi i ardhshëm. Mos jetoni me të kaluarën. Drejtësia nuk vendoset kurrë dhe falja nuk arrihet në se viktimat, të dëmtuarit nuk bëhen nismëtarë".

Këshilli Kombëtar Shqiptaro Amerikan dhe komuniteti shqiptar i Amerikës e nderoi presidentin Klinton për rolin e tij në ndalimin e shtypjes së shqiptarëve në Kosovë. Në një gjest simbolik atij iu dhurua tabela origjinale e rrugës që mban emrin Bill Klinton në Kosovë dhe piktura e një vajze kosovare që shprehte dhimbjen e shqiptarëve gjatë konfliktit. Autori i pikturës dhe vetë vajza ishin të pranishëm në takim.

Kosova, tha presidenti Klinton, duhet të ketë të drejtën të vendosë vetë si të dojë për fatin e saj. Por pas vetëvendosjes shtrohet pyetja se si do të ecë në të ardhmen. Presidenti Klinton foli edhe për vizionin e tij për rajonin e Evropës Juglindore.

 

Sot kur lufta kundër terrorizmit është përparësia kryesore e Amerikës, presidenti Klinton tha se Evropa Juglindore ku jetojnë popuj me fe myslimane e të krishterë, mund të shërbejë si një portë për Lindjen e Mesme, për pajtimin e islamit me fetë e tjera.

Në takimin vjetor të Këshillit Kombëtar Shqiptaro Amerikan morrën pjesë edhe senatori Bob Dole, një nga përkrahësit më të fortë të shqiptarëve të Kosovës gjatë viteve që ishte në senat. Në takim ai theksoi përsëri se zgjidhjen e Kosovës ai e sheh tek pavarësia.

Këshilli Kombëtar Shqiptaro Amerikan nderoi me çmimin “Arritje Gjatë Jetës”, biznesmenin e njohur shqiptaro-amerikan Xhim Xhema dhe me Çmimin për Shërbim të Lartë, Ilir Zherkën, i cili deri para një viti ishte drejtor ekzekutiv i këtij Këshilli.

Kjo ishte mbrëmja e 7 vjetore që organizon Këshilli Kombëtar Shqiptaro Amerikan dhe siç u shpreh ligjvenësi Eliot Engel, i cili gjithashtu ishte i pranishëm, takimi tregoi se komuniteti shqiptar, me organizatat e tij lobiste, po bëhet më i efektshëm, njofton "Zëri i Amerikës".

 

 

Kris Paten thotë se integrimi në BE është në dorën e vetë shteteve të rajonit

 

Selanik, 21 qershor 2003 - Integrimi në BE është në dorën e vetë shteteve të rajonit, ka deklaruar komesioneri për Politikë të Jashtme të BE-së Kris Paten në prag të samitit të sotëm evro-ballkanik në Selanik, duke shtuar se bashkimi i Evropës nuk do të jetë komplet pa Ballkanin. Paten ka theksuar se këto shtete duhet të vazhdojnë të ecin në rrugën e reformave dhe të ndajnë të njëjtat vlera me BE-në.

Ndërkaq, duke folur për statusin përfundimtar të Kosovës, Paten tha se përkrah qëndrimin e shefit të UNMIK-ut, Mihael Shtajner, se më parë duhet të plotësohen standardet e pastaj të diskutohet për statusin përfundimtar të Kosovës. Sipas Patenit, komuniteti i Kosovës duhet të dijë se përmbushja e standardeve dhe arritja e vlerave të përbashkëta evropiane do t'u ndihmojë për t'u integruar në Evropë.

 

"Ne po shohim se në Kosovë po punohet me entuziazëm në këtë drejtim", ka thënë Paten. Ai ka përsëritur se pa marrë parasysh mungesën e statusit final të Kosovës ajo nuk do të lejohet që të bëhet një gropë e zezë në Ballkan dhe BE do t'i ndihmojë edhe asaj për t'u integruar në rrjedhat evropiane ndërmjet mekanizmave në kuadër të procesit të stabilizim-asociimit.

Paten premtoi një prani më të madhe evropiane në rajon dhe nënvizoi se për vitet 2004-2006 do të bëhen investime që do të kapin shumën 4.6 miliardë euro, ndërkaq më retrospektivën e viteve të fundit tha se vendeve të Ballkanit u janë dakordur 7 miliardë dollarë, ndërkaq vetëm Beogradit pas rënies së Millosheviqit iu kanë dhënë rreth një miliard dollarë.

 

 

Presidenti Rugova e vlerësoi si të rëndësishëm pjesëmarrjen e Kosovës në samitin e BE-së

 

Prishtinë, 21 qershor 2003 - Në orët e pasditës së djeshme delegacioni katëranëtarësh nga Kosova udhëtoi për në samitin e Selanikut. Presidenti i Kosovës Ibrahim Rugova para nisjes e vlerësoi si të rëndësishëm pjesëmarrje e Kosovës në samitin e BE-së.

"Është me rëndësi që Kosova po merr pjesë në këtë samit së bashku me UNMIK-un. Përfaqësimi i Kosovës në këtë samit të rëndësishëm dhe mund të ketë takime të ndryshme. Kryesore është që Kosova po përfaqësohet në këtë samit të BE-së", tha Presidenti Rugova.

Ndërkaq, kryeministri i Kosovës Bajram Rexhepi tha se pjesëmarrja e vendit tonë në këtë samit tregon se pozicioni i Kosovës po avancohet. "Edhe pse nuk është ajo çfarë ne dëshirojmë, ne do të jemi në rolin e vëzhguesit bashkë me delegacionin e UNMIK-ut dhe do të ketë mundësi vetëm z. Shtajner tre minuta t'i prezentojë synimet e Kosovës dhe në axhendë nuk kemi diçka tjetër, por do të ketë mundësi të kemi ndonjë kontakt me delegacione të ndryshme në këtë samit", ka thënë kryeministri Rexhepi.

Delegacioni nga Kosova do të paraqitet në sesionin e sotëm të samitit. Presidenti Rugova dhe kryeministri Rexhepi thanë se gjatë samitit do të ketë edhe takime dypalëshe me përfaqësues të vendeve të ndryshme. Mirëpo, ata thanë se me siguri nuk do të ketë një takim me palën serbe.

 

 

Solana shpreson që përfaqësuesit shqiptaro - serbë do të takohen gjatë ditëve që vijnë

 

Selanik, 21 qershor 2003 - Bashkimi Evropian ende nuk ka hequr dorë nga mundësia që të realizohet kontakti mes Prishtinës dhe Beogradit, nëse jo në Selanik atëherë shumë shpejt në ndonjë vend tjetër.

Përfaqësuesi i BE-së për Politikë të Jashtme e Siguri, Havier Solana tha se pritjet aq të mëdha nga dita e sotme për fillimin e bisedimeve ndërmjet Prishtinës dhe Beogradit po zbehen.

 

Solana shfaqi shpresën se përfaqësuesit shqiptaro - serbë do të takohen gjatë ditëve që vijnë, mirëpo nuk beson se sot është momenti i takimit. "Unë me ata tashmë e kam përpiluar planin për bisedime,por nëse shqiptarët dhe serbët nuk takohen sot në Selanik, kjo do të realizohet gjatë ditëve që vijnë", deklaroi Solana.

 

Ai shtoi se bisedimet shqiptaro-serbe do të fillojnë sipas të gjitha gjasave kësaj vere, përkatësisht para përfundimit të muajit korrik.

 

 

Alush Gashi thotë se Ballkani Perëndimor do të ketë qetësinë e garantuar sapo Kosova bëhet shtet i pavarur

 

Prishtinë, 21 qershor 2003 - Deputeti i Parlamentit të Kosovës Alush Gashi nga LDK-ja, duke u prononcuar për radion "Evropa e lirë" rreth stabilitetit në rajonin e Ballkanit Perëndimor, ka thënë se Ballkani Perëndimor do të ketë qetësinë e garantuar sapo Kosova bëhet shtet i pavarur.

I pyetur se si e sheh përfaqësimin e Kosovës në samitin e BE-së në Selanik, z. Gashi tha se ëshë mirë që BE ka ftuar Kosovën të marrë pjesë në samitin e Selanikut. Ai shtoi se do të ishte më mirë që Kosova të ishte pjesëmarrëse aktive e jo vetëm si vëzhguese.

 

Megjithatë, është mirë që Kosova në samitin e Selanikut ka karrigën e vetë dhe e ka kohën e vet të prezentimit. Ai ka shtuar se Kosova duhet t'i ketë kompetencat që i kanë vendet e tjera përreth saj.

 

 

BE takon udhëheqësit ballkanik

 

Selanik, 21 qershor 2003 - Udhëheqësit e pesë vendeve ballkanike po takohen me liderët e Bashkimit Evropian në samitin i cili mund të përshpejtojë integrimin e tyre në BE.

Liderët e BE-së, të cilat sapo ranë dakort rreth kushtetutës së zgjerimit të unionit duan të inkurajojnë pesë vendet - Shqipërinë, Bosnjën, Kroacinë, Maqedoninë dhe Serbinë e Malin e Zi se edhe ato mund t'i bashkohen kësaj organizate në të ardhmen.

 

Por në samit këtyre vendeve do t'ju bëhet e qartë se para se të ndodhë kjo ato do të duhet t'i nënshtrohen reformave ekonomike dhe demokratike.

 

 

Rruga e integrimit të Ballkanit në BE varet tërësisht nga vullneti i tyre për të zbatuar reformat

 

Selanik, 21 qershor 2003 – Liderët e pesë shteteve të Ballkanit janë takuar për herë të parë me homologët e tyre të Bashkimit Evropian në një samit njëditor, për të cilin shpresojnë se do të përshpejtojë integrimin e tyre në BE, njofton AFP.

 

Liderët evropianë, menjëherë pas pajtimit për draftin e kushtetutës për një BE të zgjeruar, dëshirojnë që në këtë drejtim të bëjnë edhe një shtytje të re me këto pesë shtete: Shqipërinë, Bosnën e Hercegovinën, Kroacinë, Maqedoninë dhe Serbinë e Malin e Zi.

 

Por, ato duan t'ua bëjnë të ditur sot (e shtunë) këtyre vendeve se rruga e integrimit varet tërësisht nga vullneti i tyre për të zbatuar reformat. "Ato duhet të vazhdojnë procesin e reformës politike dhe ekonomike, që e kanë filluar.

 

Por, ne dëshirojmë të jemi më shumë duar, që u ndihmojnë atyre në këtë proces", ka thënë komesioneri për marrëdhënie të jashtme, Krist Paten.

Për t'u dhënë këtyre zhvillimeve një impuls, liderët e BE-së pritet të zotohen për të akorduar në vitet 2004-2006 edhe 200 milionë euro ekstra për të ndihmuar zhvillimin e rajonit. Që nga viti 1991, BE u ka dhënë këtyre pesë vendeve të Ballkanit mbi shtatë miliardë euro.

Duke folur në këtë samit shefi i UNMIK-ut Mihael Shtajner ripërsëriti gatishmërinë e palës kosovare për dialog me Beogradin për çështje praktike. Shtajner tha se prej tetë standardeve të UNMIK-ut është edhe hapja e dialogut direkt me Beogradin për çështjet praktike për interesin reciprok.

 

Sipas tij, delegacioni i Kosovës qysh tash është i gatshëm të bisedojë me Beogradin për çështje praktike, por është Beogradi ai që ka refuzuar kontaktin me Prishtinën.

 

 

Samiti i Ballkanit dhe emigracioni

 

Selanik, 21 qershor 2003 - Udhëheqësit e BE-së pritet të mbështesin propozimet e Komisionit Evropian për të ndarë më shumë se 250 milion euro për të luftuar imigracionin e jashtëligjshëm dhe përpunimin e kërkesave të azilkërkuesve anëkënd BE-së.

Por duket se mbështetja është e kufizuar për një plan britanik për krijimin e të ashtuquajturave "zona rajonale të mbrojtjes" në zonat e jostabilitetit dhe konfliktit në mënyrë që të pengohen migrantët të mos mbërrijnë në Evropë në rend të parë.

 

 

Në punimet e samitit të Selanikut u shënuan rezultatet e para lidhur me projekt-kushtetutën e BE-së

 

Selanik, 21 qershor 2003 - Në punimet e samitit të Selanikut u shënuan rezultatet e para pozitive që kanë të bëjnë me diskutimin e projekt-kushtetutës së Bashkimit Evropian. Udhëheqësit e cilësuan projektin një bazë të mirë për Kushtetutën e BE-së që pritet të miratohet brenda këtij viti. Por ata ishin të një mendjeje se duhet punuar ende për dokumentin dhe kanë lënë të kuptohet se priten ende negociatat më të vështira në muajt e ardhshëm për projektin.

Po kështu bëhet e ditur se është e gatshme edhe deklarata që do të publikohet pas këtij samiti. Deklarata nënvizon evoluimin pozitiv që është bërë në rajonin e Ballkanit Perëndimor prej samitit të Zagrebit dhe konfirmon se shtetet e Ballkanit kanë perspektivë të anëtarësimit në BE.

Kosova do të përmendet vetëm në disa rreshta në këtë deklaratë dhe as këto fjalë nuk do të sjellin ndonjë gjë të re për Kosovën sepse në to do të përsëriten se liderët e BE-së dhe vendeve të Ballkanit mbështesin Rezolutën 1244 të KS të OKB-së dhe politikën e UNMIK-ut të formuluar me fjalët: standardet para statusit.

 

 

PDSH ndërpreu moratoriumin për ngrirjen e veprimtarisë së saj politike

 

Tetovë, 21 qershor 2003 - Partia Demokratike Shqiptare në Kuvendin e saj qendror ka ndërprendër moratoriumin për pezullimin e veprimtarisë së saj politike. Me vendimin e ri që e mori PDSH në Kuvendin e djeshëm pesë deputetët e saj do të kthehen në Parlamentin maqedonas. PDSH me moratoriumin, siç thanë drejtuesit e saj, binte ndesh me faktorin ndërkombëtar.

Në arsyetimin e Kuvenit qendror të partisë thuhet se vendimi është marrë për shkak të presioneve të bashkësisë ndërkombëtare dhe anëtarësisë. Bëhet e ditur se këtij vendim i ka parapri një letër e ambasadorëve të Shteteve të Bashkuara dhe BE në të cilën është kërkuar që kjo PDSH të kthehet në skenën politike meqë moratoriumi e vë në pyetje zbatimin e Marrëveshjes Kornizë të Ohrit.

Në anën tjetër, Arbër Xhaferi, kryetar në dorëheqje tha se partia do të zhvillojë veprimtarinë dhe kontributin e vyeshëm, siç tha në procesin politik. Ndërkaq, dilemat mbi dorëheqjen e kryetarit të PDSH-së Arbër Xhaferi dhe nënkryearit të saj, Menduh Thaçi, pritet t'i zgjidhë Kongresi i PDSH-së, që është paralajmëruar të mbahet më 5 korrik të këtij viti.

 

 

Në ujërat mediterane është fundosur edhe një barkë me rreth 200 emigrantë afrikanë

 

Tunis, 21 qershor 2003 – Ekipet shpëtimtare tuniziane kanë gjurmuar sot (e shtunë) në ujërat mediterane për të kërkuar rreth 200 emigrantë afrikanë, barka e të cilëve ka qenë e lidhur për anijen italiane të fundosur për shkak të motit të keq, kur u mbyten 12 vetë, njofton Rojter.

 

Roja bregdetare tunisiane ka ndihmuar peshkatarët vendës për të bartur 41 të shpëtuar dhe 12 trupat nga ujërat fill pas aksidentit, që ndodhi të premten në mengjes. Supozohet se rreth 250 njerëz nga disa shtete afrikane kanë qenë barkë.

 

 

Bush ka vazhduar sanksionet për 172 individë dhe organizata që janë kërcënim i paqes dhe i stabilitetit në Ballkan

 

Uashington, 21 qershor 2003 - Presidenti amerikan Xhorxh Bush ka vazhduar vendimin për gjendjen e krizës nacionale në Ballkanin Perëndimor. Bush ka deklaruar se veprimi i individëve që punojnë kundër paqes e stablitetit të rajonit rrezikojnë interesat e Shteteve të Bashkuara të Amerikës.

 

Në një letër drejtuar Kongresit amerikan, në të cilën arsyeton vendimin e tij, Bush ka thënë se kriza në Ballkanin Perëndimor, për shkak të së cilës ka marrë vendimin e mëhershëm, ende nuk ka pushuar.

 

Si krijues të krizës ai thekson personat të cilët ndihmojnë, nxisin ose janë padronë të dhunës ekstremiste në Maqedoni, pengojnë zbatimin e Marrëveshjes së Dejtonit, të rezolutës së OKB-së për Kosovën dhe të Marrëveshjes së Ohrit për Maqedoninë.

 

Presidenti Bush me këtë vendim ka vazhduar edhe sanksionet për 172 individë dhe organizata në vendet e ish-Jugosllavisë, të cilët janë kërcënim i paqes dhe i stabilitetit në Ballkanin Perëndimor.

 

 

Trupat indiane kanë vrarë shtatë kryengritës në shtetin Asam të Indisë

 

Guajati, 21 qershor 2003 – Trupat indiane kanë vrarë shtatë kryengritës dhe kanë zbuluar një sasi të madhe armësh dhe municioni në shtetin e largët verilindor Asam, ka bërë të ditur sot (e shtunë) zëdhënësi i Mrojtjes, njofton Rojter.

 

Ushtarët kanë sulmuar gjatë natës kampin e kryengritësve në rrethin Kaçar dhe kanë vrarë kryengritësit në fjalë, kur ata u përpoqën të ikin. Po kështu, njoftohet se në në një incident tjetër, seperatistët kanë hedhur në erë me një shpërthim një cisternë të zbraztë dhe kanë vrarë dy roje të sigurimit.

 

 

Paralajmërim për një sulm terrorist në Kenia

 

Najrobi, 21 qershor 2003 - Departamenti amerikan i Mbrojtjes ka paralajmëruar për rrezikun e një sulmi të shpejtë terrorist në Kenia, gjë që shkaktoi mbylljen e ambasadës amerikane në Najrobi, për të paktën disa ditë. Zyrtarët e Pentagonit thonë se objektivat dhe metodat e këtyre sulmeve të mundëshme janë mësuar nga autoritetet por ato po mbahen sekret.

Një zëdhënës i Departamentit amerikan të Shtetit, tha se ambasada në Najrobi po rishikon masat e sigurimit në dritën e këtij paralajmërimi. Ambasadat amerikane në Kenia dhe Tanzani u shkatërruan pothujse njëkohësisht nga shpërthimet e makinave bombë në vitin 1998. Rrejti terrorist al-Qaida i Osama bin Ladenit u akuzua për sulmet në të cilat më shumë se 200 vetë u vranë.

 

 

Forumi botëror ekonomik mblidhet në Jordani

 

Aman, 21 qershor 2003 - Liderët botëror dhe biznesmenë të rëndësishëm fillojnë sot më vonë bisedime në Jordani për të diskutuar çështje ekonomike dhe politike para së cilave ndodhet ky rajon pas luftës në Irak si dhe inisijativës më të fundit paqësore të Shteteve të Bashkuara për Lindjen e Mesme.

Forumi ekonomik është një iniciativë e sektorit privat që financohet nga korporatat e mëdha që e mbështesin atë.

Copyright©2000-2003 Trepca.net - Të gjitha të  drejtat e rezervuara.