Lajme

E premte, 20 qershor 2003

Përmbajtja:

• Presidenti Rugova ngushëlloi familjen e gazetarit Shefki Morina

• Sot pasdite delegacioni i Kosovës niset për në Selanik

• KFOR-i shkatërroi një mjet shpërthyes në Prishtinë

• Në Prishtinë u mbajt një mbledhje komemorative me rastin e vdekjes së gazetarit Shefki Morina

• KMDLNJ: Tash dhjetë muaj në një burg të Shkupit mbahen Bedri Ramaj dhe Nexhdet Ramaj nga Istogu

• Dedaj u angazhua për nevojën e zgjerimit të BE edhe në Ballkanin Perendimor

• Kongresisti Engël ka paraqitur në Senat Ligjin për themelimin e Fondit të iniciativës kosovaro-amerikane

• Janjiq: Zgjidhja përfundimtare do të jetë pavarësia e Kosovës

• Në Prishtinë papritmas vdiq gazetari Shefki Morina

• Pesë fshatra të Pejës lidhen me sistemin e ujësjellësit të ri

• Në Fushë Kosovë tre policë morën lëndime të lehta në një përplasje me protestuesit serbë

• Kryetari i komunës së Fushë-Kosovës thotë se serbët nuk kanë nevojë të shqetësohen

• Përfaqësuesit e Gjilanit, Preshevës dhe Kumanovës janë për hapjen e rrugës Gjilan-Kumanovë

• Shtajner thotë se situata e sigurisë në gjithë Kosovën është më e mirë

• Vendet anëtare të BE-së dhe ato të Ballkanit Perëndimor filluan dje në Selanik samitin treditor

• P. Fieski thotë se burim kryesor i kontesteve pronësore është mungesa e dokumentacionit

• Shqipëri: Katër burra kanë humbur jetën në një pus uji

• Sot në Tetovë PDK u shkri në BDI

• Bisedimet e para zyrtare midis Serbisë dhe Malit të Zi pritet të fillojnë pas samitit të Selanikut

• Ministria e Jashtme shqiptare shpreh shqetësim për incidentin e në kufirin me Maqedoninë

• Policia shqiptare dhe ajo malazeze kanë ndërmarrë një operacion antitrafik për kontrollin e kufirit ujor

• Sot në Tetovë mbahet Kuvendi qendror i PDSH-së i cili mund të vendosë për heqjen e moratoriumit

• Një ushtar vritet, dy plagosen në një sulm pranë Bagdadit

• Të pakten një izraelit është vrarë dhe tre persona të tjerë janë plagosur në një pritë në Bregun Perendimor

• Në Kongo janë zhdukur dy vëzhgues të Kombeve të Bashkuara

• Një palestinez ka plagosur të pakten katër njerëz në Bregun Perendimor

• Autoritetet amerikane kanë nën vërrejtje një shofer amerikan kamioni që kishte lidhje me al-Qaidën

• Udhëheqësit e BE-së diskutojnë kushtetutën

• Pauell në Lindjen e Mesme

• Franca bllokon negociatat për reformën e BE-së në bujqësi

• Parlamenti turk miraton reforma të tjera

Presidenti Rugova ngushëlloi familjen e gazetarit Shefki Morina

 

Prishtinë, 20 qershor 2003 - Presidenti i Kosovës Ibrahim Rugova ka ngushëlluar sot familjen Morina me rastin e vdekjes së Shefki Morinës, gazetarit të redaksisë shqiptare të "Zërit të Amerikës".

"Me rastin e vdekjes së më të dashurit Tuaj, Shefki Morinës, Ju shpreh ngushëllimet e mia të thella.
Vdekja e Shefki Morinës është humbje për gazetarinë e Kosovës dhe për Redaksinë shqiptare të “Zërit të Amerikës”.

Shefki Morina do të mbetet në historinë më të re të gazetarisë sonë si një gazetar i shkëlqyer, objektiv e profesionist në punën e tij të vlefshme për shoqërinë dhe shtetin e Kosovës", thuhet në fund të telegramit të ngushëllimit të Presidentit Ibrahim Rugova dërguar familjes Morina.

 

 

Sot pasdite delegacioni i Kosovës niset për në Selanik

 

Prishtinë, 20 qershor 2003 - Delegacioni i Kosovës në përbërjen e të cilit janë Presidenti i Kosovës Ibrahim Rugova, shefi i UNMIK-ut Mihael Shtajner, kryeministri Bajram Rexhep dhe Milorad Tordoroviq, koordinator për të kthyerit, niset sot pasdite me aeroplan special nga Prishtina për në Selanik.

 

Delegacioni i Kosovës merr pjesë nesër në samitin e Selanikut në takimin ndërmjet përfaqësuesve të Bashkimit Evropian dhe liderëve të Ballkanit Perëndimor për të ardhmen e rajonit.

 

 

KFOR-i shkatërroi një mjet shpërthyes në Prishtinë

 

Prishtinë, 20 qershor 2003 - Sot para dite forcat e KFOR-it kryen një shpërthim të kontrolluar të një mjeti eksploziv, që ishte zbuluar nga një qytetar në rrugën para ndërtesës së policisë në Prishtinë.

 

Më herët një qytetar e kishte njoftuar policinë se e kishte vërejtur një mjet shpërthyes në atë pjesë të rrugës. Pjesëtarët e policisë së UNMIK-ut, të Shërbimit Policor të Kosovës si dhe të KFOR-it kishin dalë menjeherë në vendin e ngjarjes, dhe e bllokojnë atë pjesë të qytetit.

Rreth orës 9:30 KFOR-i kryen shpërthimin e kontrolluar. Me këtë rast nuk pati të lënduar e as dëme materiale.

 

 

Në Prishtinë u mbajt një mbledhje komemorative me rastin e vdekjes së gazetarit Shefki Morina

 

Prishtinë, 20 qershor 2003 - Me rastin e vdekjes së papritur të gazetarit Shefki Morina, korrespondent i "Zërit të Amerikës" nga Kosova, sot në Prishtinë u mbajt një mbledhje komemorative, ku merrnin pjesë përveç familjarëve të të ndjerit edhe shumë gazetarë, poltikanë e qytetarë.

 

Në këtë mbledhje u tha se jeta e gazetarit Shefki Morina u mbyll ashtu siç mbyllet gjithnjë jeta e gazetarëve profesionistë dhe nga prodhues të lajmeve ata edhe vetë bëhet lajme të hidhura.

Para të pranishmëve, veterani i gazetarisë kosovare Nehat Islami, me fjalë të zgjedhura foli për shembëlltyrën prej gazetari të Shefki Morinës, i cili me qëndresën e besimin e tij në profesionin e gazetarit të pavarur mbeti shembull edhe për gazetarët e brezave të ardhshme.

 

Ndërkaq kolegu i tij i penës Besim Abazi tha se vdekja e hershme e Shefki Morinës është e rëndë dhe humbje për gazetarinë kosovare. Ai tha se Shefiku ishte mik e shok i madh. Gjithashtu në këtë mbledhje folën edhe kolegët gazetarë Muharrem Nitaj dhe Rrahman Paçarrizi.

Varrimi i të ndjerit Shefki Morina do të bëhet sot në orën 17.00 (e jo siç ishte paralajmëruar më herët në orën 13.00) në varrezat e qytetit në Prishtinë.

 

 

KMDLNJ: Tash dhjetë muaj në një burg të Shkupit mbahen Bedri Ramaj dhe Nexhdet Ramaj nga Istogu

 

Prishtinë, 20 qershor 2003 - Tash e dhjetë muaj në burgun "Shutke" në Shkup (Maqedoni) po mbahen të paraburgosur Bedri Jashar Ramaj (25) dhe kushëriri i tij, Nexhdet Mustafë Ramaj (22), të dy nga fshati Uçë i komunës së Burimit (Istogut), të arrestuar nga policia e Maqedonisë në rrethinën e Tetovës, me ç'rast është vrarë Kastriot Vokshi nga Gjilani, ndërsa Bedriu dhe Nexhdeti janë plagosur. Ata ende i kanë plumbat në trup, njofton KMDLNJ.

Sipas këtij njoftimi, më 18 qershor 2003, Hazir Jakup Taraku nga Mitrovica, i cili një kohë të gjatë ka qëndruar në një dhomë me Nexhdetin, i ka deklaruar Qendrës Rajonale të KMDLNJ-së në Mitrovicë se Nexhdeti është në gjendje të rëndë shëndetësore.

 

Ai dhe kushëriri i tij vazhdimisht po keqtrajtohen rëndë nga policia maqedonase. Madje, sipas deklaratës së z.Taraku, Nexhdetit ia kanë nxjerrë edhe thonjët e gishtave të duarve dhe asnjëherë nuk i kanë ofruar ndihmë mjekësore. Nexhdeti dhe Bedriu po akuzohen për terrorizëm si pjesëtarë të AKSH-së.

Këshilli për Mbrojtjen e të Drejtave e të Lirive të Njeriut apelon tek OJQ-të në Maqedoni dhe tek ato ndërkombëtare që të hulumtojnë këtë rast për të ndriçuar dhe saqruar vërtetësinë e këtyre dëshmive dhe për këtë ta njoftojnë opinionin dhe familjet e të arrestuarve.

 

 

Dedaj u angazhua për nevojën e zgjerimit të BE edhe në Ballkanin Perendimor

 

Prishtinë, 20 qershor 2003 - Kryetari i Partisë Liberale të Kosovës, Gjergj Dedaj, u kthye nga Selaniku, ku mori pjesë në takimin e partive liberale dhe dmeokratike të Evropës, i cili u mbajt në prag të parapërgatitjeve për samitin e BE-së në Selanik.

Dedaj në këtë takim të lartë evropian, ku merrnin pjesë kryeministra, ministra dhe liderë të evroliberalëve, u angazhua për nevojën e zgjerimit të BE edhe në Ballkanin Perendimor, duke e përfshirë edhe Kosovën dhe si hap i parë do të ishte liberalizimi i regjimit të vizave për kosovarët në rajon dhe BE, duke i ofruar mundësi Kosovës për status special në kuadër të BE-së dhe të përfshirjes së saj në marrëveshjen e stabilizim-asocimit.

Duke pasur parasysh se në këtë takim merrnin pjesë edhe përfaqësuesit e Serbisë, Dedaj, para liderëve të mbi 25 vendeve të Evropës kërkoi zbardhjen e fatit të mijëra shqiptarëve të zhdukur gjatë luftës së fundit në Kosovë.

Kryetari i PLK-së me këtë rast u takua edhe me z.Pat Koks, president i parlamentit Evropian, të cilin e ftoi për një vizitë në Kosovë, e cila do të realizohet muajt e ardhshëm, si dhe me z.Romano Prodi, kryetar i Komisionit Evropian.

 

 

Kongresisti Engël ka paraqitur në Senat Ligjin për themelimin e Fondit të iniciativës kosovaro-amerikane

 

Uashington, 20 qershor 2003 - Kongresisti Eliot Engël, bashkëkryesues i Komitetit të Kongresit për çështje shqiptare, ka paraqitur në Senat Ligjin për themelimin e Fondit të iniciativës kosovaro-amerikane, i cili do të ndihmojë bizneset e vogla dhe të mesme në Kososvë nëpërmjet kredive dhe formave të tjera të ndihmave financiare. Ligji ndan 30 milionë dollarë si shumë fillestare për të filluar operacionin.

 

Ligji i këtij Fondi fillimisht është paraqitur në Senat nga senatorët Hillari Klinton dhe Miç Mëkkonell, të cilëve pastaj iu kanë bashkuar kongresistët Eliot Engël, Sju Kelli, Xhon Olver, Mark Kirk, Xhim Mëkgavern dhe Ed Tauns.

 

Gjatë paraqitjes së këtij Ligji, Engël tha: "Derisa Kosova të bëhet shtet i pavarur, që unë e mbështes fuqimisht, Amerika ka nevojë të ndihmojë popullin e Kososvës në çfarëdo mënyre që mundemi. Fondi i Iniciativës kosovaro-amerikane është një hap i rëndësishëm në këtë drejtim”, tha ai.

 

 

Janjiq: Zgjidhja përfundimtare do të jetë pavarësia e Kosovës

 

Këln, 20 qershor 2003 - Dushan Janjiq, kryetar i Forumit për Raporte Etnike në Beograd, i pyetur se kur mund të pritet hapja e statusit të Kosovës, tha se kjo çështje është hapur kaherë dhe aty qëndron esenca e krizës. "Këto çështje janë manifestuar shumë hapur në fund të viteve 80 dhe në fillim të viteve 90.

 

Në veçanti me Kushtetutën e Kaçanikut, në Kushtetutën e Milloshevqit dhe natyrisht me referendumin në Kosovë. Pra, çështja është e hapur", thotë Janjiq. Megjithatë ai mendon se kjo do të ndodhë brenda dy - tri vjetësh, por sipas tij edhe sot po vendoset nëse Kosova do të jetë e pavarur ose jo.

 

"Sa i përket konferencës përfundimtare për zgjidhjen e statusit, propozimi im është që të zhvillohet vitin e ardhëshëm", thekson Janjiq.

Në pyetjen direkte se cili do të jetë statusi i Kosovës, Janjiq tha: "Mendoj se çështja do të zgjidhet brenda dy - tri vjetësh dhe se zgjidhja përfundimtare do të jetë - pavarësia e Kosovës. Se cilët kufij të jashtëm do t'i ketë dhe me çfarë strukture të brendshme, kjo është një çështje të cilën duhet të vendosin aktorët lokalë", tha Janjiq në një intervistë dhënë "Dojçe veles".

 

 

Në Prishtinë papritmas vdiq gazetari Shefki Morina

Prishtinë, 20 qershor 2003 - Sot në orët e para të mëngjesit papritmas vdiq gazetari Shefki Morina (47-vjeçar), i cili kishte pësuar një sulm në zemër. Ai ishte korrespondent i radios "Zëri i Amerikës" nga Prishtina.   Shefki Morina ka qenë një gazetar me përvojë shumëvjeçare, i cili deri në vitin 1990 punoi në Radio Prishtina. Pas mbylljes së këtij mediumi nga regjimi i atëhershëm serb, ai punoi për mjete të ndryshme të informimit në gjuhën shqipe.

I ndjeri ka lënë bashkëshorten dhe tre fëmijë.

Varrimi i gazetarit Shefki Morina do të bëhet sot në orën 13,00 në varrezat e Prishtinës.

 

 

Pesë fshatra të Pejës lidhen me sistemin e ujësjellësit të ri

 

Pejë, 20 qershor 2003 - Në fshatin Dardhishtë, ish-Kryshec të Pejës, u bë përurimi i sistemit të ujësjellsit më të madh, të cilin organizata CDF e ka realizuar deri më sot në Kosovë. Ujësjellësi i ri do të furnizojë me ujë pesë fshatra të rajonit të Pejës dhe Deçanit.

 

Ky ujësjellës në gjatësi prej 23 kilometrash ka kushtuar 669 mijë euro, prej të cilave 450 mijë euro i ka siguruar Qeveria e Holandës, ndërkaq mjetet tjera Kuvendi komunal i Pejës dhe Deçanit si dhe banorët e këtyre pesë fshatrave.

Inaugurimin e këtij projekti e kanë bërë kryeministri i Kosovës Bajram Rexhepi dhe kryetari i Asamblesë komunale të Pejës, Ali Lajçi dhe drejtoresha e CDF-it Flaka Surroi.

 

 

Në Fushë Kosovë tre policë morën lëndime të lehta në një përplasje me protestuesit serbë

 

Fushë-Kosovë, 20 qershor 2003 - Në Fushë Kosovë dje pasdite pati përleshje ndërmjet mjekëve dhe qytetarëve serbë me pjesëtarë të policisë ndërkombëtare dhe vendore, pas largimit nga spitali ushtarak të forcave ruse.

 

Me këtë rast janë lënduar 3 policë ndërkombëtarë të cilët u sulmuan me gurë dhe mjete të tjera nga disa protestues serbë, që kishin tentuar të okupojnë ndërtesën shëndetësore, ku deri tani ndodhej spitali ushtarak rus.

Thuhet se është nënshkruar një marrëveshje midis rusëve dhe mjekëve serbë që ata të përkujdesën për pacientët pas largimit të forcave ruse nga Kosova. Rreth orës 13.00 policia e UNMIK-ut dhe ajo e SHPK-së kanë kërkuar nga personeli i këtij spitali të braktisin objektin, por ata nuk e përfillën urdhërin dhe për këtë ndodhi një konflikt ndërmjet mjekëve serbë dhe policisë, e cila u detyrua që të përdorte lotësjellës me çrast u lënduan lehtë 10 protestues serbë dhe tre policë ndërkombëtarë.

Zëdhënësi i policisë së UNMIK-ut, Beri Fleçër tha se protestuesit kanë arritur të okupojnë një pjesë të spitalit nga frika e mbylljes së tij pas largimit të ushtarëve rusë dhe se janë në negociata me ta.

 

Por që nga dita e pardjeshme këtë spital e kanë marrë nën mbikëqyrje administrata ndërkombëtare.
Deri më tash këtë spital e kanë kontrolluar forcat ruse në kuadër të KFOR-it që është shfrytëzuar kryesisht për kurimin e pjesëtarëve të komunitetit serb.

 

 

Kryetari i komunës së Fushë-Kosovës thotë se serbët nuk kanë nevojë të shqetësohen

 

Fushë-Kosovë, 20 qershor 2003 - Kryetari i Kuvendit komunal të Fushë-Kosovës Skënder Zogaj tha se pjesëtarët e komunitetit serb nuk duhet të shqetësohen sepse qeveria komunale ka themeluar stacionin shëndetësor shumetnik ku do të punojnë 70 punëtorë shqiptarë dhe 53 të tjerë të përkatësisë kombëtare serbe.

 

Zogaj thotë se ky objekt shëndetësor tash e tutje do të administrohet nga komuna, ndërkohë që Ministria e Shëndetësisë do të udheheqë një pjesë për prodhimin e infuzioneve. Prandaj qytetarët serbë nuk duhet të brengosen dhe se ata nuk do të mbesin pa spital.

 

 

Përfaqësuesit e Gjilanit, Preshevës dhe Kumanovës janë për hapjen e rrugës Gjilan-Kumanovë

 

Gjilan, 20 qershor 2003 - Përfaqësuesi komunalë të Gjilanit, Preshevës dhe Kumanovës, pas një takimi të përbashkët në Gjilan, thanë se janë dakorduar për bashkëpunim më të mirë të këtij mikro rajoni dhe për hapjen e rrugës që lidh Gjilanin me Kumanovën, si një kusht i integrimeve pa pengesa.

 

 

Shtajner thotë se situata e sigurisë në gjithë Kosovën është më e mirë

 

Prishtinë, 20 qershor 2003 - Kryeadministratori i Kosovës Mihael Shtajner në një intervistë për agjencinë Rojter tha se situata e sigurisë në gjithë Kosovën, përfshirë këtu minoritetet dhe komunitetin serb, padyshim çdo vit është më e mirë dhe se numri i vrasjeve është ulur shumë.

 

Shtajner ka shfaqur shpresën se zyrtarët shqiptarë dhe serbë do të nisin së shpejti bisedimet për çështjet praktike me interes të përbashkët, siç janë bashkëpunimi në fushën e transportit e energjisë.

 

Shefi i UNMIK-ut po kështu ka përsëritur se ende nuk ka ardhur koha për të diskutuar çështjen kryesore, atë të statusit përfundimtar të Kosovës. Sipas Shtajnerit diskutimi për statusin mund të fillojnë në pesë vitet e ardhshme, pasi kjo çështje nuk mund të lihet me një anë pafundësisht.

 

 

Vendet anëtare të BE-së dhe ato të Ballkanit Perëndimor filluan dje në Selanik samitin treditor

 

Selanik, 20 qershor 2003 - Përfaqësuesit e 15 vendeve anëtare të BE-së si dhe të vendeve të Ballkanit Perëndimor filluan dje në Selanik samitin treditor që është i pari i këtij niveli. Një prej temave boshte janë edhe marrëdhëniet me vendet ballkanike, që synojnë për t'iu bashkaur familjes evropiane.

 

Në këtë samit të shtunën do të marrë pjesë edhe delegacioni nga Kosova në përbërje, Mihael Shtajner, presidentit Ibrahim Rugova, kryeministrit Bajram Rexhepi, si dhe përfaqësuesi serb Millorad Todoroviq.

Në ditën e parë, ky samit nga pjesëmarrësit u kualifikua si jashtëzakonisht i rëndësishëm për faktin se në vend të 15 shteteve kësaj radhe marrin pjesë 25 liderë pasi që familja evropiane po zgjerohet me dhjetë anëtarë të ri.

Ndërkohë kolegëve evropianë të shtunën do t'u bashkangjiten edhe liderët e shteteve të Ballkanit Perëndimor, në mesin e të cilëve për herë të parë të kësaj natyre do të jenë edhe përfaqësuesit e Kosovës, ndonëse ata do të marrin pjesë si vëzhgues në delegacionin e UNMIK-ut.

 

 

P. Fieski thotë se burim kryesor i kontesteve pronësore është mungesa e dokumentacionit

 

Prishtinë, 20 qershor 2003 - Shefi i Misionit të OSBE-së, Paskal Fieski ka paraqitur dje në Prishtinë raportin e tretë lidhur me të drejtat pronësore. Në këtë raport, veç tjerash, vlerësohet se burim kryesor i kontesteve pronësore është mungesa e dokumentacionit, që është zhdukur pas përfundimit të luftës në Kosovë.

Shefi i OSBE-së ka shpjeguar se ndërtesa ku mbahej takimi me gazetarë është ndërtuar në mënyrë të paligjshme dhe se pronari i saj ka bërë kërkesë për ta legalizuar atë. Megjithatë pronësia e truallit nuk mund të përcaktohej kështu, ngase kjo ndërtesë nuk mund të legalizohet nga komuna, tha z. Fieski.

Duke krahasur raportin e këtij viti me ato të mëparshme, nëpërmjet këtij ilustrimi z. Fieski bëri të ditur se në të drejtat pronësore, qytetarët përballen me probleme ligjore megjithë faktin se janë arritur disa përmirësime.

Ai këtë raport, ia dorëzoi Ministrisë së Shërbimeve Publike.

 

 

Shqipëri: Katër burra kanë humbur jetën në një pus uji

 

Tiranë, 20 qershor 2003 - Kanë hyrë për të nxjerrë ujë, por në vend të tij kanë gjetur vdekjen. Katër burra të familjes Reka në Yzberisht afër Tiranës, kanë humbur jetën pardje në mënyrë tragjike nga gazi i çliruar nga pusi i ujit në oborrin e shtëpisë së tyre. Ilmi Reka, 50-vjeç, djali i tij Saimiri 26-vjeç, Hysen Reka, 47-vjeç dhe i biri Gerti Reka 21-vjeç kanë vdekur njëri pas tjetrit brenda pak minutash pasditen e djeshme rreth orës 18.00.

 

Tragjedia e rëndë për familjen Reka që sot hap katër varre dyshohet të ketë ndodhur si pasojë e shpërthimit nga thellësia e pusit të një gazi akoma të paidentifikuar. Trupat pa jetë të katër burrave janë nxjerrë nga thellësia rreth 15 metër pas gati dy orë përpjekjesh të bëra nga policia dhe grupet e shpëtimit të gjeologji minierave.

 

 

Sot në Tetovë PDK u shkri në BDI

 

Tetovë, 20 qershor 2003 - Në Tetovë sot u mbajt konventa e bashkimit të dy partive shqiptare në Maqedoni, përkatësisht Partia Demokratike Kombëtare u shkri në partinë Bashkimi Demokratik për Integrim të Ali Ahmetit.

 

Me këtë rast kryetari i PDK Kastriot Haxhirexha dhe ai BDI-së Ali Ahmeti nënshkruan një deklaratë të përbashkët në të cilën thuhet se subjekti i ri politik do të veprojë me programin, statutin, paltformën politike dhe simbolet e BDI-së.

 

 

Bisedimet e para zyrtare midis Serbisë dhe Malit të Zi pritet të fillojnë pas samitit të Selanikut

 

Strategjia e UNMIK-ut dhe Bashkimit Evropian për hapa graduale në integrimin e vendeve ballkanike në strukturat evropiane po jep rezultatet e para.

Shkruan: Auron DODI

Këmbëngulja e administratës së OKB-së në Kosovë dhe e BE për ta filluar dialogun midis Beogradit dhe Prishtinës gjatë takimit të BE në Selanik kontriboi shumë për ta çuar përpara këtë çështje të komplikuar. Kosovarët janë të ndërgjegjshëm për forcën simbolike të ftesës së parë për të marrë pjesë në një takim të nivelit të lartë të BE, edhe nëse në kuadër të delegacionit të UNMIK-ut.

 

Ata ndihen të konfirmuar në identitetin e tyre kosovar, si rrjedhojë në një pozicion më të fortë se sa në samitin e fundit, BE-Ballkan, ku ata nuk figuronin në listën e të ftuarve. Prandaj nuk të çudit fakti kur kryetari i parlamentit të Kosovës, Nexhat Daci i këshillon bashkëkombasit e tij të mos e prishin tani me bashkësinë ndërkombëtare dhe të fillojnë bisedime me Beogradin.

 

Daci tha në Prishtinë se ishte "momenti më i përshtatshëm dhe momenti më i fundit për ta fituar për vete bashkësinë ndërkombëtare. Shqiptarët duhet të diskutojnë edhe me përfaqësues të Serbisë dhe të flasin me ta për cështje që nuk prekin statusin", kërkoi ai.

Dhe qeveria kosovare iu fut punës dhe hartoi ditët e fundit një platformë negociatash për "bisedime teknike", siç u tha, me Beogradin. Kjo është platforma e parë konkrete që hartohet në Prishtinë për bisedime me Beogradin, dhe një platformë e cila i respekton formulimet e rezolutës 1244 të KS të OKB-së për Kosovën. Për shqiptarët e Kosovës ky është një hap i madh përpara, një lloj thyerjeje tabuje, në një kohë që pas luftës zyrtarët e Prishtinës thanë se me Beogradin mund të diskutohet vetëm pas zgjidhjes së statusit të Kosovës.

Qeveria e parë serbe e epokës pas Miloshevicit u duk që në krye e interesuar për të pasur kontakte me Prishtinën. Në një marrëveshje në nëntor 2001, të refuzuar nga shqiptarët shefi i atëhershëm i UNMIK-ut, Hans Hakkerupp dhe zv.kryeminstri serb, Nebojsa Covic ranë dakord të ngrenë edhe një grup pune të përbashkët, ku edhe përfaqësues të Kosovës të diskutonin çështje të bashkëjetesës me serbët në Kosovë. Por shqiptarët e quajtën këtë grup jolegjitim e që nuk respektonte institucionet e Kosovës prandaj nuk dërguan kurre përfaqësues të tyre aty.

Konture më të qarta politika serbe e pasluftës ndaj Kosovës mori megjithatë vetëm në shkurt të këtij viti. Presidenti ndërkohë i vrarë serb, Zoran Xhinxhiç kërkoi në një letër dërguar Xhorxh Bushit, Toni Blerit dhe Vladimir Putinit sqarimin e statusit të Kosovës në një konferencë ndërkombëtare.

 

Më tej, në letrën e tij ai paralajmëroi që në rast se shqiptarët e Kosovës do të shpallnin pavarësinë, Serbia do t'i vinte pikëpyetje marrëveshjes së paqes së Dejtënit të vitit 1995. Me këtë Zoran Xhinxhiç reagoi edhe ndaj një kërkese të 42 deputetëve të parlamentit të Kosovës, të cilët të revoltuar që Kosova përmendej si pjesë e Serbisë në kushtetutën e bashkësisë së re, Serbi dhe Mali i Zi, kërkuan nga parlamenti i Kosovës që të shpallte pavarësinë.

Në korrik 2002 Xhinxhici qe përpjekur të fillonte bisedime edhe me krahun "më radikal" në Kosovë, me ish-komandantët e UCK-së, Hashim Thaci dhe Agim Çeku, për të sqaruar me ta fatin e serbëve të zhdukur gjatë luftës.

Asnjë nga iniciativat e Xhinxhiçit nuk u realizuan, por propozimi i tij i fundit, i parë me sytë e sotëm, vuri në lëvizje një proces që do të hapte rrugën për bisedime midis Beogradit dhe Prishtinës.

Rugova dhe Daci, por edhe Rexhepi dhe Thaçi nënshkruan në fund të shkurtit në Prishtinë një deklaratë në të cilën tregojnë gatishmërinë e tyre për bisedime me të gjithë fqinjët, edhe me Serbinë. Hashim Thaci madje shkoi edhe më larg dhe kërkoi një moratorium në diskutimin e statusit të Kosovës, për të krijuar mundësinë e diskutimit të problemeve të tjera konkrete.

Vrasja e Zoran Xhinxhiçit e largoi përkohësisht vëmendjen nga çështja e bisedimeve. Qëndrimi i parë i qeverisë së kryeministrit të ri, Zoran Zhivkoviq për Kosovën ishte kërkesa drejtuar UNMIK-ut për të ndaluar transferimin e kompetencave nga organet e UNMIK-ut në institucionet kosovare. Kjo kërkesë mori përgjigje negative.

Afrimi i samitit të Selanikut e solli cështjen e bisedimeve sërish mbi tryezë. Havier Solana nguli këmbë veçanërisht gjatë vizitave të tij javët e fundit në Beograd dhe Prishtinë që bisedimet të fillojnë. Kryeministri i ri i Serbisë, Zoran Zhivkoviq formuloi në një intervistë pozicionin e ri të qeverisë serbe për dialogun´:

 

"Unë do ta respektoj mendimin e bashkësisë ndërkombëtare se nuk ka ardhur ende koha për të sqaruar cështjen e statusit, por për ngritjen e standardeve, pra para së gjithash për përmirësimin e sigurisë së njerëzve që jetojnë atje dhe që duan të kthehen."

Në Prishtinë ky qëndrim përkthehet si një ndryshim i qëndrimit të deritashëm të Beogradit ndaj Kosovës. Këshilltari politik i kryetarit të parlamentit të Kosovës, Nexhat Daci, Ramush Tahiri i tha Deutsche Welles:"Ka një klimë të përshtatshme për bisedime,ka edhe një ndryshim mentaliteti të Serbisë ndaj Kosovë, pasi tani pranohet prej tyre realiteti i institucioneve ne Kosove".

Se cilat do të jenë pikërëndesat në axhendat e bisedimeve të ardhshme, për këtë Beogradi dhe Prishtina nuk janë ende të të njëjtit mendim. Në një kohë që shqiptarët e Kosovës ngulin këmbë për një dialog për "çështje teknike", si për dokumentat e identifikimit, njohjen e targave të automjeteve, pensionet etj, Beogradi kërkon një fokusim në cështje të sigurisë, si garanci për lëvizje të lirë të serbëve në Kosovë, sqarimi i fatit të të humburve dhe decentralizimi i Kosovës. Shumë nga këto cështje nuk janë vetëm praktike, por edhe politike.

Largimi i bisedimeve Prishtinë-Beograd nga samiti i Selanikut e largon edhe mundësinë që problematika e Kosovës të ndikojë direkt në Selanik në bisedimet për integrim të Serbisë dhe Malit të Zi në BE. Pra zbut në njëfarë mase rizyrtarizimin e karakterit ndërkombëtar të çështjes së Kosovës.
Mbetet të shihet se si do të zhvillohet pas Selanikut dialogu i projektuar.

Pala serbe përfytyron Brukselin si vend të parë takimi dhe kosovarët duan t'i shohin në vjeshtë të nënshkruara marrëveshjet e para. Sidoqoftë, strategjia e BE për t'i sjellë pranë kundërshtarët e dikurshëm mund të dalë me sukses: përmes hapave të vegjël në integrimin e këtyre vendeve në strukturat evropiane.

(Autori është gazetar i radio Dojçe Veles)

 

 

Ministria e Jashtme shqiptare shpreh shqetësim për incidentin e në kufirin me Maqedoninë

 

Tiranë, 20 qershor 2003 - Ministria e Punëve të Jashtme shqiptare, thirri dje në një takim të ngarkuarin me punë në Ambasadën e Maqedonisë në Tiranë, Trajçe Ilievski, të cilit i shprehu shqetësimin në lidhje me incidentin e rëndë kufitar që ndodhi dje (18 Qershor), ku nga forcat kufitare maqedonase u vra shtetasi shqiptar, Agron Sherif Skënderi dhe u plagos Arben Qamil Kaja, të dy nga fshati Gjoric i Bulqizës.

Ministria e Jashtme shqiptare "një ngjarje të tillë e konsideron edhe më të rëndë, në një kohë kur marrëdhëniet e fqinjësisë së mirë dhe bashkëpunimit mes dy vendeve po intensifikohen".

Po ashtu, MPJ nënvizon se kjo ngjarje vjen në një kohë kur po bëhën përpjekje të krijohet një sistem i ri vlerash, një frymë të re bashkëjetese, bashkëpunimi dhe integrimi në rajon.

Ministria e Jashtme shqiptare kërkon që ngjarje të tilla të rënda të mos përsëriten në të ardhmen.
Të përkujtojmë se rojet kufitare maqedonase, hapën zjarr me armë automatike mëngjesin e së mërkurës ndaj dy shtetasve shqiptarë, të cilët po ktheheshin nga Dibra e Madhe për në shtëpitë e tyre, në fshatin Gjoricë të rrethit të Bulqizës.

 

 

Policia shqiptare dhe ajo malazeze kanë ndërmarrë një operacion antitrafik për kontrollin e kufirit ujor

 

Tiranë - Podgoricë, 20 qershor 2003 - Policia shqiptare së bashku me policinë malazeze kanë ndërmarrë një operacion të gjerë për kontrollin e kufirit ujor, që përshkohet nëpërmjet Liqenit të Shkodrës. Kjo zonë është e përfolur për kontrabandë dhe trafiqe të jashtligjshme që vazhdojnë të zhvillohen në kufirin mes Shqipërisë dhe Malit të Zi.

 

Në përfundim të operacionit policia shqiptare ka arritur të bllokojë dy mjete të mëdha lundruese të prodhimit të artizanateve që shërbenin për kontrabandë, ndërkohë që nga ana e policisë të Malit të Zi ende nuk është dhënë ndonjë njoftim zyrtar në lidhje me rezultatet e këtij operacioni.

Operacione të tilla të përbashkëta do të vazhdojnë edhe në të ardhmen mes forcave të policisë së Shkodrës dhe Podgoricës në përpjekje për të luftuar veprimtaritë kriminale.

Në fillim të këtij muaji policia shqiptare zbuloi në bregun e liqenit të Shkodrës një tjetër mjet lundrues mbi 600 kilogram marihuanë e cila po transportohej ilegalisht në drejtim të Malit të Zi.

 

 

Sot në Tetovë mbahet Kuvendi qendror i PDSH-së i cili mund të vendosë për heqjen e moratoriumit

 

Tetovë, 20 qershor 2003 - Sot në Tetovë pritet të zhvillohet Kuvendi qendror i Partisë Demokratike Shqiptare, i cili do të vendosë për heqjen e moratoriumit që kohë më parë kishte pezullua veprimtarinë politike të kësaj partie.

 

Megjithatë, ende nuk është e qartë çfarë do të bëhet me udhëheqjen e PDSH-së ndërkohë që kryetari i saj Arbër Xhaferi dhe nënkryetari Menduh Thaçi kanë paraqitur dorëheqje, duke thënë se pikëpamjet e tyre personale nuk përputhen me programin e partisë. Ndërkohë, që organet drejtuese të PDSH-së nuk i kanë miratuar dorëheqjet e tyre.

 

 

Një ushtar vritet, dy plagosen në një sulm pranë Bagdadit

 

Bagdad, 20 qershor 2003 - Në sulmin që u krye dje kundër trupave amerikane në jug të Bagdadit, i treti brenda 24 orësh kundër forcave të Shteteve të Bashkuara në Irak, një ushtar mbeti i vrarë. Dy ushtarë të tjerë amerikanë u plagosën në këtë incident. Sulmi i djeshëm u krye në të njëjtën zonë, ku të mërkurën u vra një ushtar tjetër amerikan.

Zyrtarët amerikanë fajësojnë për serinë e kohëve të fundit të sulmeve, bandat besnike të Sadam Huseinit. Sekretari amerikan i Mbrojtjes, Donald Ramsfeld, tha se goditjet e kohëve të fundit të forcave të koalicionit kundër atyre që besohet të fshihen pas këtyre sulmeve janë të domosdoshme për të mbrojtur trupat amerikane dhe për t’i hapur rrugën rindërtimit të Irakut.

 

 

Të pakten një izraelit është vrarë dhe tre persona të tjerë janë plagosur në një pritë në Bregun Perendimor

 

Jerusalem, 20 qershor 2003 – Të pakten një izraelit është vrarë sot (e premte) dhe tre persona të tjerë janë plagosur, kur vetura e tyre ra në një pritë palestineze në Bregun Perendimor, ka bërë të ditur armata izraelite, njofton Rojter.

 

Zëdhënësi i kolonëve ka thënë se dy nga të plagosurit janë amerikanë, të cilët kanë ardhur dje në Izrael për të vizituar të afërmit. Ende s'e ka marrë kush përgjegjësinë.

 

 

Në Kongo janë zhdukur dy vëzhgues të Kombeve të Bashkuara

 

Bunia, Kongo, 20 qershor 2003 - Dy vëzhgues të Kombeve të Bashkuara janë zhdukur në qytetin kongolez verilindor, Beni, 70 mila nga qyteti Bunia, pasi nga personat e paidentifikuar i kishin marrë nga zyra e tyre dhe ishin dërguar në drejtim të panjohur, ka bërë të ditur sot (e premte) një zëdhënës i OKB-së, njofton Rojter.

 

Misioni i Kombeve të Bashkuara ka thënë se s'ka informacione se kush i ka marrë vëzhguesit dhe s'ka pranuar të zbulojë nacionalitetin e tyre.

 

 

Një palestinez ka plagosur të pakten katër njerëz në Bregun Perendimor

 

Jerusalem, 20 qershor 2003 – Një palestinez i armatosur ka plagosur sot (e premte) me armë zjarri të pakten katër njerëz në Bregun Perendimor në një kohë kur sekretari amerikan i Shtetit, Kolin Pauell, po takohej me kryeministrin izraelit, Ariel Sharon, në Jerusalem, njofton Rojter.

 

Sulmi ka ndodhur në rrugën, që përdoret nga kolonët hebraikë afër qytetit palestinez Ramallah. Informacione të tjera më të hollësishme ende nuk janë dhënë.

 

 

Autoritetet amerikane kanë nën vërrejtje një shofer amerikan kamioni që kishte lidhje me al-Qaidën

 

Uashington, 20 qershor 2003 - Zyrtarët amerikanë të drejtësisë thonë se një shofer amerikan kamioni që kishte lidhje me al-Qaidën pranoi fajësinë nën akuzat se ishte i implikuar në një komplot për të hedhur në erë një aeroplan amerikan dhe një urë në Nju Jork.

Prokurori i Përgjithëshëm, Xhon Ashkroft, tha dje se shoferi ishte Imin Faris nga Kolumbos e Ohajos. Ai tha se Farisi ishte imigrant nga Kashmiri, por kishte marrë shtetësinë amrikane.

 

 

Udhëheqësit e BE-së diskutojnë kushtetutën

 

Selanik, 20 qershor 2003 - Ish presidenti francez, Valeri Zhiskar Desten, pritet të paraqesë projektkushtetutën e Bashkimit Evropian para udhëheqësve të tij, që janë mbledhur në afërsi të qytetit grek Selanik.

Projektkushtetuta parasheh ndryshime të thella, përfshirë edhe emërimin e një presidenti të Evropës dhe një ministri të jashtëm të Bashkimit Evropian.

Presidenca greke e Bashkimit Evropian thotë se korniza do ta bëjë Evropën një partner të barabartë me Shtetet e Bashkuara në çështjet botërore.

 

 

Pauell në Lindjen e Mesme

 

Jerusalem, 20 qershor 2003 - Sekretari amerikan i shtetit, Kolin Pauell, do të vizitojë Izraelin dhe Bregun Perëndimor, të okupuar, me qëllim që t'i jap një shtytje planit paqësor ndërkombëtar - të paraqitur më heret gjatë këtij muaji.

Pauell do të zhvillojë bisedime me kryeministrin izraelit, Ariel Sharon dhe me homologun e tij palestinez, Mahmoud Abbas (të njohur si Abu Mazen), që të bindë të dyja palët ta zbatojnë planin.

 

 

Franca bllokon negociatat për reformën e BE-së në bujqësi

 

Luksemburg, 20 qershor 2003 - Presidenti francez Zhak Shirak sipas informacioneve nga qarqet e negociuesve në Këshillin e BE-së për Bujqësinë në Luksemburg, ka ndaluar negociatat për një reformë në politikën agrare.

 

Shirak në një bisedë me kancelarin gjerman Gerhard Shrëder dhe kryeministrin grek Kosta Simitis e ka argumentuar këtë me interesat vitale kombëtare u tha nga qarqet e delegacionit. Franca refuzon në rradhë të parë një propozim kompromisi të Komisionit të BE-së.

 

Komisari i BE-së për Bujqësinë Franc Fishler ka hedhur idenë e shkëputjes së subvencioneve për sipërmarrjet bujqësore nga sasia e prodhimit.

 

 

Parlamenti turk miraton reforma të tjera

 

Ankara, 20 qershor 2003 - Parlamenti turk ka vendosur ndërmarrjen e reformave të tjera në kuadër të përpjekjeve për anëtarësim në BE. Kështu, stacioneve radio-televizive iu është lejuar të transmetojnë programe në gjuhën kurde.

 

Ndër të tjera është shfuqizuar një ligj i cili parashikonte deri tre vjet heqje lirie për shrehje favorizuese ndaj separatistëve kurdë. Familjet kurde mund t'u vënë këtej e tutje fëmijëve emra kurdë, gjë që deri tani ishte e ndaluar nga autoritetet.

Copyright©2000-2003 Trepca.net - Të gjitha të  drejtat e rezervuara.