Votën e lirë të zgjedhësve e shkelin  9 këshilltarë të LDK-së me ndihmën e UNMIK-ut dhe OSBE-së

Podujevë, 19 qershor 2003 (TN) – Seanca urgjente e KK të Podujevës e cila u thirr nga kryetari Agim Veliu u anulua për shkak se 15 këshilltarë të LDK-së kërkuan që ajo të anulohet pasi që më parë zv. përfaqësuesja e UNMIK-ut An Sofi i kishte dërguar një shkresë kryetarit Veliu.

 

Në arsyetimin për anulimin e kësaj mbledhjeje nga ana e zv. përfaqësueses së UNMIK-it thuhet se Kuvendi komunal që ju  e thirrët (drejtuar kryetarit ), më datën 18 qershor në ora 10.30 nuk mund të mbahet për shkak të disa parregullsive.

 

“Prandaj në bazë të nenit 42.2 të Statutit dhe nenit 15.2 të Rregullores 2000/45, 23 këshilltarët e Kuvendit komunal më parë kanë thirrur mbledhjen e Kuvendit komunal për t’u mbajtur seancë urgjente në të njëjtën ditë dhe kohë”, thuhet në shkresën e z. Sofi.

 

Sipas saj çdo mbledhje e jashtëzakonshme duhet të thirret në bazë të kërkesave të nenit 15.3 të Rregullores 2000/45, nenit 42 alinea 3 të Statutit të komunës dhe nenit 13 të Rregullave komunale për mbajtjen e mbledhjes sipas së cilës  tri ditë pune janë të nevojshme për thirrjen e saj.

 

Ndërkaq në prononcimin e grupit të këshilltarëve të LDK-së thuhet se në takimin e grupit të këshilltarëve të LDK-së ku morën pjesë 15 këshilltarë, pas shqyrtimit të situatës konsiderohet se vërejtja për afatin prej 3 ditësh qëndron.

 

Prandaj grupi i këshilltarëve të LDK-së kërkon nga kryetari që kjo mbledhje me këtë rend dite të anulohet dhe të thirret seanca e radhës sipas Rregullave të parapara me Statut, Rregullores 2000/45 dhe rregullave të procedurës. “Sa për mbledhje tjetër me rend tjetër të punës, sipas shkresës së zv. përfaqësueses së UNMIK-ut, ne nuk kemi marrë kurrëfarë materiali dhe nuk jemi në dijeni”, thuhet në arsyetimin e grupit të këshilltarëve.

 

Kryetari Veliu dhe 15 këshilltarë dolën nga salla, kurse për 24 këshilltarë mbajtën mbledhje në restaurantin “Beni Dona” pas paralajmërimit për mjetin shpërthyes për çka policia e UNMIK-ut zbrazi ndërtesën e komunës.

 

Përkundër takimit të para dy ditëve me kryetarin Rugova që e patën përfaqësuesit e degës së LDK-së në Podujevë, fraksioni i LDK-së në krye me Skender Gashin dhe Vehbi Rushitin, Mustafë Halitin, Adlie Hamitin, Fahri Hoxhën, Bajram Hoxha, Ibadete Syla, Ilmie Cakiqi dhe Shefki Zeqiri qëndruan në një seancë tjetër me 12 këshilltarët e PDK-së, 1 të BK, AAK-së dhe të PD-së.

 

Fraksioni i LDK-së që tashmë publikisht u rreshtua pas opozitës duke shkelur mbi votën e lirë të 60% të elektoratit llapjan u ndihmua edhe nga zv. përfaqësuesja e UNMIK-ut  Anne-Sophie Ducreux dhe përfaqësuesit e OSBE-së.

 

Në pyetjen si mund të nënshkruajë për materialin ish kryeshefi ekzekutiv Ejup Visoka (anëtar i kryesisë së degës së LDK-së) në vend të këshilltarit të AAK-së Bajrush Ibishi, z. An Sofi nuk diti ta sqarojë përveç se ajo mendon se çdo gjë nga ana ligjore është në rregull.

 

Elektorati i LDK-së në Llap vlerëson se ky është një tentim grushteti në Kuvendin e komunës së Podujevës dhe shkelje e vrazhdë e votës së lirë, kurse për veprimet e UNMIK-ut dhe të OSBE-së përgjegjësinë për implikimet e mëtejshme dhe tensionimin e gjendjes në Llap do ta mbajnë Anne-Sophie Ducreux dhe Catherin Clarke të cilat edhe kanë merita të veçanta për gjendjen e rëndë që po mbretëron në Podujevë.

Copyright©2000-2003 Trepca.net - Të gjitha të  drejtat e rezervuara.