Podujeva sot shënon ditën e çlirimit

Podujevë, 19 qershor 2003 (TN) – Katër vjet pas hyrjes së forcave të NATO-s Podujeva sot shënon ditën e çlirimit. Përkundër gjendjes së rëndë këshilli organizativ ka paraparë një varg aktivitetesh e manifestimesh.

 

Programi fillon me koncertin për fëmijë, kurse delegacionet e KK të Podujevës do të bëjnë homazhe dhe do të vendosin lule në varret dhe lapidarët e dëshmorëve.

 

Programi qendror fillon me fjalën përshëndetëse të kryetarit të komunës dhe pastaj mbahet një koncert me këngëtarë të estradës kur pritet të marrin pjesë grupe të muzikës folklorike dhe populllore (Nysret Muçiqi, Afrim Muçiqi, Sabri Fejzullahu, etj).

 

Në programin e pasditës do të zhvillohet finalja e turneut të futbollit të vogël me rastin e Ditës së Podujevës  si dhe do të hapet ekspozita njëditëshe e studentëve të arteve nga Podujeva.

 

Programi festiv përfundon me premierën “Antigona” të Teatrit të qytetit regjinë e së cilës e ka bërë Agron Gërguri.

 

Isuf Deda u.d i detyrës së drejtorit të drejtorisë për rini, kulturë e sport ka njoftuar se gjitha manifestimet do të duhej të mbahen tek pishat, mirëpo për shkak të shiut lokacioni mund të ndërrohet.

Copyright©2000-2003 Trepca.net - Të gjitha të  drejtat e rezervuara.