Lajme

E mërkure, 18 qershor 2003

Përmbajtja:

• Rugova, Shtajner, Rexhepi e Todoroviq e përbëjnë delegacionin e Kosovës në samitin e Selanikut

• Presidenti Rugova ka marrë një letër përgëzimi nga Presidenti Moisiu me rastin e Ditës së Lirisë

• Qeveria e Kosovës kërkon anulimin e urdhëresës administrative për regjistrimin civil

• Sot u shpall konkursi për regjistrimin e studentëve të rinj në Universitetin e Prishtinës

• Sipas një sondazhi, 85,9 për qind e qytetarëve janë për Kosovën shtet i pavarur

• KMDLNJ kërkon nga UNMIK-u ta shfuqizojnë Udhëzimin Administrativ 2003/1 si akt diskriminues

• Kundërshtohet i Bordit këshilldhënës në Mitrovicë edhe me dy serbë

• Lidhja Shqiptaro-Amerikane kërkon nga administrata e presidentit Bush që Kosovës qysh tani t'i jepet pavarësia

• P. Majko thotë se pavarësia e Kosovës është e vetmja mundësi për të pasur një rajon të qetë

• Klaus Rajnhard thotë se përpara zgjidhjes së çështjes së statusit është kusht mosndarja e Kosovës

• Në Bosnjë arrestohen tre shqiptarë për trafikim me njerëz

• Masa të mëdha sigurie për samitin e Selanikut

• Priten protesta kundër samitit të Selanikut

• Trupat amerikane kanë vrarë dy protestues irakianë

• Pauell thotë se s'ka çështje me rëndësi më të madhe për SHBA-të se programet e armëve bërthamore të Koresë Veriore

• Vazhdon dhuna izraelito-palestineze

• Mbytet një anije me emigrantë në Itali

• Në Irak do të krijohet një gjykatë e re

• Vazhdojnë protestat në Iran

• Dy ish ministra britanikë akuzojnë Blerin

• OKB dërgon vëzhgues në Liberi

• Është vrarë sot në Bagdad edhe një një ushtar amerikan, kurse një tjetër është plagosur

• Çeçenët kanë vrarë sot 3 policë rusë në Grozni

• Një gjykatë në Hanoi ka dënuar me 13 vjet burg një doktor vietnamez

• Në Mozambik të paktën 87 viktima nga epidemia e kolerës

• Një grua iraniane është vetëndezur sot gjatë protestave në Paris

• Nga dy aeroplanë të rrëzuar në Floridë janë gjetur katër trupa të pajetë të viktimave

• Futboll: Sot zhvillohet ndeshja finale e Kupës së Kosovës, Prishtina - KEK-u

• Bekham do të shkojë në Real Madrid

Rugova, Shtajner, Rexhepi e Todoroviq e përbëjnë delegacionin e Kosovës në samitin e Selanikut

 

Prishtinë, 18 qershor 2003 - Kryeadministratori i Kosovës Mihael Shtajner bëri të ditur se në delegacionin e përbashkët të UNMIK-ut dhe institutucioneve të Kosovës në samitin e BE në Selanik do të marrin pjesë Presidenti i Kosovës Ibrahim Rugova, kryeministri Bajram Rexhepi dhe bashkërenduesi ndërministror në kabinetin e kryeministrit për persona të zhvendosur Milorad Todoroviq.

 

Shtajner, i cili do të kryesojë delegacionin ka publikuar këta emra në orët e vona të pasditës së djeshme në fund të një vizite në komunën e Artanës, ku u takua me anëtarët e familjeve serbe të kthyera ditë më parë në këtë lokalitet të Kosovës.

Shtajner tha se është e rëndësishme që delegacioni ka përbërje shumetnike, sikundër edhe komuna ku ai kishte zgjedhur të publikojë emrat e pjesëtarëve të delegacionit dhe kjo do të jetë një porosi e mirë që Kosova do të dërgojë në Selanik, theksoi ai. Sipas Shtajnerit, ky do të jetë një rast i mirë për institucionet e përkohshme në Kosovë që të bisedojnë me të gjithë.

 

Selaniku do të ketë rregullat e veta të lojës që nënkupton se të gjithë duhet të flasin me të gjithë, prandaj kjo do të mundësojë që të dëshmohet se përparimi në Kosovë është i mundshëm megjithë vështirësitë ekzistuese. Ai tha se në këtë takim do të ketë kontakte edhe ndërmjet Prishtinës dhe Beogradit, ndërkaq dialogu i mirëfilltë do të fillojë së shpejti për zgjidhjen e çështjeve teknike me interes të dyanshëm.

Shtajner citohet po ashtu të ketë thënë se qëllimi i përfaqësuesve të Kosovës në Selanik do të jetë që t'i bindin udhëheqësit e BE-së se e ardhmja e Kosovës është në Evropë. Sipas tij udhëheheqësit evropianë duhet të pranojnë dhe të njohin rëndësinë e Ballkanit dhe përgjegjësitë që kanë ndaj këtij rajoni.

 

 

Presidenti Rugova ka marrë një letër përgëzimi nga Presidenti Moisiu me rastin e Ditës së Lirisë

 

Prishtinë, 18 qershor 2003 - Presidentit të Kosovës, Ibrahim Rugova, i ka arritur një letër përgëzimi nga Presidenti i Shqipërisë Alfred Moisiu, me rastin e 12 Qershorit - Ditës së Lirisë së Kosovës. Në këtë letër përgëzimi thuhet:

I nderuari Zoti President Rugova,

Me rastin e Ditës së Lirisë, katërvjetorit të hyrjes së trupave të NATO-s në Kosovë, kam kënaqësinë T'ju uroj përzemërsisht Juve personalisht dhe nëpërmjet Jush të gjithë qytetarëve të Kosovës.

12 qershori do të mbahet mend gjatë dhe do të kujtohet me respekt e nderim të veçantë, nga të gjithë shqiptarët, banorët e Kosovës dhe mbarë admiruesit e paqes e të humanizmit në botë.

 

Ajo shënoi çlirimin e Kosovës nga regjimi i Milosheviçit, duke parandaluar një prej katastrofave më të mëdha humanitare, si dhe duke hapur një epokë të re paqeje, ndryshimesh demokratike, bashkëjetese dhe integrimi për të gjithë banorët e Kosovës dhe të rajonit tonë.

Ne të gjithë i jemi mirënjohës koalicionit ushtarak të NATO-s, të udhëhequr nga SHBA, për rolin e tyre vendimtar në këtë ngjarje me rëndësi historike. Nderimi ynë në këtë përvjetor shkon tek ato bij e bija të Kosovës që dhanë jetën e tyre që Kosova të jetë e lirë dhe të jetojë realitetin e sotëm.

Unë shpreh kënaqësinë time, i dashur Rugova, që të konstatoj se brenda një kohë të shkurtër Kosova ka ndryshuar shumë në rrugën e saj drejt një shoqërie të bazuar mbi vlerat demokratike.

 

Arritjet e shënuara nga Ju dhe UNMIK në zhvillimin e demokracisë, realizimin e zgjedhjeve, formimin e institucioneve si dhe parimit të bashkëjetesës, janë të admirueshme dhe një përgjigje domethënëse ndaj përpjekjeve të miqve dhe aleatëve tanë ndërkombëtarë që më 1999 mundësuan çlirimin e Kosovës nga ushtria e Millosheviqit.

Shpreh bindjen time se Kosova dhe banorët e saj do të arrijnë t'ia dalin me sukses në përpjekjet e tyre për forcimin e shoqërisë demokratike e shumetnike, si dhe bashkimin e saj me rrjedhat integruese.
Edhe njëherë, zoti President, gëzuar festën dhe mbarësi për Ju e popullin e Kosovës.

Me respekt të veçantë,

Alfred Moisiu, - thuhet në fund të letrës së Presidentit të Shqipërisë.

 

 

Qeveria e Kosovës kërkon anulimin e urdhëresës administrative për regjistrimin civil

 

Prishtinë, 18 qershor 2003 - Qeveria e Kosovës ka kërkuar anulimin e urdhëresës administrative të Shtyllës së Dytë të UNMIK-ut për regjistrimin civil sipas së cilës qytetarët e Kosovës duhet të rikonfirmojnë dokumentet e tyre nëpërmjet dokumenteve të mëparshme të Serbisë apo ish-Jugosllavisë.

 

Qeveria thotë se kjo urdhëresë ka konotacione negative politike dhe se kjo mund të ndërlidhet me tendencën që në shtetet e Evropës t'u bëhet presion qytetarëve të Kosovës të shkojnë nëpër konsullata dhe të pajisen me dokumentacione serbe.

Para disa ditësh edhe tri grupet parlamentare të komunës së Prishtinës përmes një deklarate të përbashkët kanë kundërshtuar ashpër urdhëresës administrative të Shtyllës së Dytë të UNMIK-ut për regjistrimin civil.

 

 

Sot u shpall konkursi për regjistrimin e studentëve të rinj në Universitetin e Prishtinës

 

Prishtinë, 18 qershor 2003 - Universiteti i Prishtinës ka shpallur sot konkursin për regjistrimin e studentëve të rinj në vitin e ri akademik 2003/04.

 

Kështu në vitin e parë të studimeve në këtë universitet do të regjistrohen 5516 studentë të rregullt. Në fakultete do të regjistrohen 5011 ndërkaq në shkolla të larta 505 studentë.

Në rektoratin e UP thonë se provimet pranuese do të jenë të mgjashme me ato të vitit të kaluar, ndërkohë që nuk paralajmërohen krijime të departamenteve të reja në UP.

Studentët e viseve të tjera shqiptare do të trajtohen si edhe studentët e Kosovës.

Konkursi i UP sot është publikuar në shtypin e përditshëm të Kosovës me hollësitë e nevojshme për kushtet dhe afatet për provimin pranues dhe dokumentet e nevojshme.

 

 

Sipas një sondazhi, 85,9 për qind e qytetarëve janë për Kosovën shtet i pavarur

 

Prishtinë, 18 qershor 2003 - Sipas një sondazhi të organizatës joqeveritare KACI (Aksioni Kosovar për Shoqëri Civile) të Prishtinës, 85,9 për qind të qytetarëve të anketuarve nga të gjitha komunitetet janë të mendimit se Kosova duhet të bëhet shtet i pavarur, i përfshirë në strukturat euroatlantike.

 

Ndërkaq 61 për qind e konsiderojnë shumë të rëndësishëm takimin e Selanikut, por vetëm 30 për qind janë pro takimir të përfaqësuesve të Kosovës me ata serbë në Selanik, e 28% janë kundër, ndërkohë që 95% janë shprehur pro pjesëmarrjes së delegacionit të Kosovës në samitin e Selanikut.

 

 

KMDLNJ kërkon nga UNMIK-u ta shfuqizojnë Udhëzimin Administrativ 2003/1 si akt diskriminues

 

Prishtinë, 18 qershor 2003 - Miratimi i Udhëzimit Administrativ 2003/1 nga Zyra Qendrore për regjistrim civil e UNMIK-ut ka ngjallë shumë pakënaqësi te qytetarët e Kosovës. Shkak për këtë është se me këtë udhëzim, qytetarëve të interesuar për marrjen e dokumenteve të udhëtimit të UNMIK-ut (dhe për vazhdimin e tyre) pos dokumenteve të tjera, po u kërkohet edhe një dokument i ish-Jugosllavisë (letërnjoftimi apo pasaporta).

Arsyetimi i zyrtarëve të UNMIK-ut se miratimi i udhëzimit administrativ paraqet shtim të masave të kontrollit të dëshmive me shkrim të aplikuesve për regjistrim si banorë të përhershëm të Kosovës dhe për nxjerrjen e dokumenteve të udhëtimit, për shkak se “një numër i madh i rasteve të regjistrimit është i bazuar në dëshmi të falsifikuara” dhe se “dokumetet e udhëtimit janë marrë në mënyrë të paligjshme” është mjaft jobindëse dhe tejet provokative për qytetarët e Kosovës dhe lirisht mund të thuhet se ka prapavijë politike, thuhet në një prononcim të KMDLNJ-së.

Pro KMDLNJ thekson se nëse dikush nga qytetarët e Kosovës ka paraqitur dëshmi të rrejshme për regjistrim civil dhe për dokument të udhëtimit atëherë ai duhet të përballet me normat ligjore. Mundësia e paraqitjes eventuale të ndonjë shënimi të rrejshëm ose jo të plotë nuk guxon kurrsesi të rezultoj me sanksione të përgjithshme ndaj të gjithë qytetarëve të Kosovës, siç është rasti me Udhëzimin Administrativ 2003/1.

Këshilli për Mbrojtjen e të Drejtave e të Lirive të Njeriut e konsideron Udhëzimin Administrativ të UNMIK-ut 2003/1 si dokument me të cilin cenohen të drejtat e qytetarëve të Kosovës për t'u regjistruar si banorë të përhershëm të Kosovës dhe për t’u pajisur me dokumente përkatëse të identifikimit dhe të udhëtimit dhe si rrjedhojë e pamundëson në masë të mafdhe lëvizjen jashtë territorit të Kosovës, duke ua mohuyar të drejtën e posedimit të dokumentit për udhëtim.

KMDLNJ kërkon nga autoritetet ndërkombëtare ta shfuqizojnë Udhëzimin Administrativ 2003/1 si akt diskriminues të drejtuar kundër shumicës së qytetarëve të Kosovës në përgjithësi dhe shqiptarëve në veçanti. KMDLNJ po ashtu kërkon përgjegjësi për përpiluesit e këtij udhëzimi si dhe ndaj atyre që janë duke e zbatuar.

 

 

Kundërshtohet i Bordit këshilldhënës në Mitrovicë edhe me dy serbë

 

Mitrovicë, 18 qershor 2003 - Faruk Korenica i vetmi shqiptar në Bordin këshilldhënës në pjesën veriore të Mitrovicës i emëruar nga kryeadministratori Mihael Shtajner i ka dërguar një letër administratores komunale të Mitrovicës nëpërmjet së cilës kundërshton idenë për zgjerimin e Bordit nga 7 në 9 anëtarë.

 

Ai e ka quajtur këtë ndërrim të qëndrimit të administratës së UNMIK-ut për zgjerimin e këtij Bordi si hapje të "Kutisë së Pandorës".

Ai ka rikujtuar administratoren ndërkombëtare në Mitrovicë se në vnedimin e z. Shtajner theksohet se Këshilli multietnik do të përbëhet nga katër serbë, një shqiptar, një boshnjak dhe një ndërkombëtar dhe ka shfaqur habinë për gatishmërinë e saj për zgjerimin e këtij këshilli edhe me dy anëtarë serbë, ka thënë Korenica.

 

 

Lidhja Shqiptaro-Amerikane kërkon nga administrata e presidentit Bush që Kosovës qysh tani t'i jepet pavarësia

 

Nju-Jork, 18 qershor 2003 - Lidhja lobisete shqiptaro-amerikane po përpiqet t'i përcjellë administratës së Presidenti Bush mesazhin e saj se Kosovës duhet t'i jepet qysh tani pavarësia e plotë.

 

Lidhja Qytetare Shqiptaro-Amerikane me qendër në Nju-Jork, siç ka njoftuar mbrëmë "Zëri i Amerikës", ka konstatuar se synimi i saj është që çështja e pavarësisë së Kosovës, e cila tash për tash kundërshtohet nga Departamenti i Shtetit të qëndrojë në platformën e politikës së jashtme të administratës amerikane.

Ky mesazh, doli nga një solemnitet, që u mbajt në Kongresin amerikan në Uashington, ku iu dhuruan tri mirënjohje tre përkrahësve të njohur të pavarësisë së Kosovës: Tom Lantosh, Henri Hajd dhe Benxhemin Gilman.

 

 

P. Majko thotë se pavarësia e Kosovës është e vetmja mundësi për të pasur një rajon të qetë

 

Tiranë, 18 qershor 2003 - Ministri i Mbrojtjes të Shqipërisë, Pandeli Majko, ka theksuar se pavarësia e Kosovës nuk është një nga mundësitë, pavarësia e Kosovës është e vetmja mundësi për të pasur një rajon të qetë, të stabilizuar dhe për të kaluar dramat e të së kaluarës.

 

Kriza aktualisht nuk qëndron te padurimi i shqiptarëve të Kosovës për të pasur pavarësinë e tyre, por qëndron tek një lloj krize e institucioneve serbe të Beogradit, i cili tashmë duhet të mësohen të kuptojnë se është Beogradi i Serbisë dhe jo i Jugosllavisë, ka thënë ministri Majko në një intervistë për "Dojçe velen".

 

 

Klaus Rajnhard thotë se përpara zgjidhjes së çështjes së statusit është kusht mosndarja e Kosovës

 

Berlin, 18 qershor 2003 - Ish-komandanti i KFOR-it në Kosovë, gjenerali gjerman, Klaus Rajnhard, duke shfaqur qëndrimin e tij rreth statusit përfundimtar të Kosovës tha se "çështja e statusit politik të Kosovës nuk mund të shtyhet në një periudhë afatgjatë.

"Kusht përpara zgjidhjes së çështjes së statusit është sipas mendimit tim mosndarja e Kosovës. Kosova nëpërmjet shumicës duhet t'u japë pakicave siguri ligjore të tillë, që të mos gjenden në një presion të madh.

 

Nëse kjo nuk zgjidhet e kam të pamundur të paraftyroj një status që ofron mëvetësi, apo edhe mundësinë e integrimit të Kosovës në federatën serbo-malazeze", ka thënë gjenerali gjerman, Klaus Rajnhard.

 

 

Në Bosnjë arrestohen tre shqiptarë për trafikim me njerëz

 

Sarajevë, 18 qershor 2003 - Policia e Bosnjës e Hercegovinës ka arrestuar dy persona për të cilët dyshohet se janë organizatorë të një zinxhiri të orginizuar të trafikut me njerëz, ka njoftuar Ministria e Brendshme e B e H.

Ndërprerja e këtij trafiku me njerëz është bërë më 14 qershor kur përveç dy vendorëve janë arrestuar edhe tre shqiptarë, identiteti i të cilëve nuk është dhënë.

 

 

Masa të mëdha sigurie për samitin e Selanikut

 

Selanik, 18 qershor 2003 - Autoritetet greke kanë marrë masa të mëdha sigurie në prag të fillimit të punimeve të samitit të Bashkimit Evropian që nis të enjten në ishullin e Halkidikit afër Selanikut.

Këto masa, sipas autoriteteve imponohen sidomos nga demonstratat e paralajmëruara të rreth 100 mijë aktivistëve antiglobalistë që pritet të mbërrijnë të mërkurën në Greqi nga gjithë Europa.

Operacioni për sigurinë e samitit vlerësohet si një provë gjenerale edhe për sigurinë e Lojërave Olimpike që do të zhvillohen në Athinë vitin e ardhshëm.

Sipas burimeve të cituara nga shtypi, shuma e shpenzimeve për samitin e BE-së, kap shifrën 34 milionë euro, por përgatitjet për të pritet të përfundojnë në sekondën e fundit.

Të mërkurën pasdite në Greqi do të mbërrijnë udhëheqësit e 25 vendeve anëtare të BE-së. Ky do të jetë samiti i parë pas nënshkrimit në Athinë para dy muajsh të Traktatit të Zgjerimit të BE-së me 10 anëtarë të rinj.

 

 

Priten protesta kundër samitit të Selanikut

 

Selanik, 18 qershor 2003 - Lëvizjet antiglobaliste do të zhvillojnë antisamitin e tyre në Selanik, 120 kilometra nga Porto Karasi dhe do të tentojnë të demostrojnë edhe pranë mjediseve ku do të zhvillohet takimi i nivelit të lartë i BE-së.

Në Selanik pritet që deri pasdite të mbërrijnë rreth 100.000 aktivistë të majtë. Këta do të vendosen në kampe të posaçme, të cilat janë financuar nga fonde të qeverisë greke dhe të pushtetit lokal.

Policia ka bërë të ditur se askush që nuk disponon akreditimet e posaçme, nuk do të lejohet të kalojë pranë këtyre mjediseve.

Shtetet e Bashkuara të Amerikës këshilluan shtetasit amerikanë që gjatë tri ditëve të samitit, të evitojnë qarkullimin nëpër zonat e nxehta.

Por zëdhënësi i qeverisë greke shprehu pezmatim për këtë, duke thënë se nuk është nevoja për rekomandime të tilla, pasi Greqia është një vend i sigurt.

 

 

Trupat amerikane kanë vrarë dy protestues irakianë

 

Bagdad, 18 qershor 2003 – Irakianët kanë protestuar sot (e merkurë) afër zyrave qendrore amerikane në Bagdad, andaj trupat amerikane kanë hapur zjarr në turmë dhe kështu kanë vrarë dy veta dhe kanë plagosur edhe dy të tjerë, njofton Rojter.

 

Protestuesit kanë thënë se viktimat janë marrë brenda ndërtesës presidenciale, që tash shërben si seli e administratës së udhëhequr nga amerikanët, e cila qeveris Irakun.

 

 

Pauell thotë se s'ka çështje me rëndësi më të madhe për SHBA-të se programet e armëve bërthamore të Koresë Veriore

 

Pnom Pen, 18 qershor 2003 – Sekretari amerikan i Shtetit, Kolin Pauell, ka deklaruar sot (e merkurë) në një takim me ministrat e jashtëm të ASEAN-it se s'ka çështje me rëndësi më të madhe për Shtetet e Bashkuara se programet e armëve bërthamore të Koresë Veriore komuniste, ka bërë të ditur një zyrtar i lartë i Departmentit të Shtetit, njofton Rojter.

"Ne nuk mund të ndihmojmë Korenë e Veriut derisa nuk heq dorë nga qëllimi për të pasur armë bërthamore", ka shtuar ai.

 

 

Vazhdon dhuna izraelito-palestineze

 

Gaza, 18 qershor 2003 - Një vajzë izraelite 7 vjeçare u vra dhe motra e saj 5 vjeçare u plagos rëndë nga një sulm me të shtëna armësh në Izraelin qendror afër Bregut Perëndimor.

Nga sulmi dje vonë përgjatë një autostrade të madhe afër qytetit palestinez Kalkilja u plagos edhe shoferi i veturës. Asnjeri nuk ka marrë përgjegjësinë për të sulmin, por ushtria izraelite thotë se beson që të shtënat erdhën nga Bregu Perëndimor.

Zyrtari i qeverisë izraelite, Zalman Shoval, tha se të shtënat provojnë që Izraeli duhet të veprojë për të ndaluar terrorizmin palestinez.

 

 

Mbytet një anije me emigrantë në Itali

 

Romë, 18 qershor 2003 - Një anije me rreth 70 emigrantë ilegalë në bord është mbytur në bregdetin jugor të Italisë.

Ekipet e shpëtimit, që vazhdojnë kërkimet, kanë mundur të gjejnë deri tani trupat e shtatë personave nga anija e mbytur pranë ishullit Lampeduza.

Dihet se tre persona të tjerë kanë shpëtuar dhe ekziston frika se të gjithë të tjerët mund të jenë mbytur.

Sipas BBC-së, nëse konfirmohet numri atyre që mund të jenë mbytur, ky do të ishte një nga aksidentet më të rënda me emigrantë që përpiqen të mbërrijnë në Itali.

Besohet se të gjithë pasagjerët kanë qenë nga Afrika qëndrore dhe veriore.

Ndërsa numri i emigrantëve ilegalë që mbërrijnë në Itali ka rënë vitin e shkuar, këtë muaj në Lampeduza kanë mbërritur disa mijëra vetë.

 

 

Në Irak do të krijohet një gjykatë e re

 

Bagdad, 18 qershor 2003 - Shtetet e Bashkaura njoftuan krijimin e një gjykate të re në Irak në përpjekje për të gjykuar kriminelët më të rrezikshëm dhe besnikët e Sadam Huseinit.

Kryeadministratori amerikan për Irakun, Pol Bremer, tha se ngritja e gjykatës synon t'uu tregojë irakianëve se sigurimi në vend është një aspekt shumë serioz për Shtetet e Bashkuara.

 

Gjykata do të gjykojë të akuzuarit për vepra penale të kryera pas fillimit të luftës së koalicionit të udhëhequr nga Shtetet e Bashkuara më 19 mars kundër Sadam Huseinit.

 

Gjykata do të respektojë shtetin juridik dhe të drejtat e njeriut. Provat e siguruara përmes torturës do të konsiderohen të papranueshme.

 

 

Vazhdojnë protestat në Iran

 

Teheran, 18 qershor 2003 - Në kryeqytetin Tehran ka vazhdur edhe në ditën e tetë protestat e nisura të studentëve kundër qeverisë së vendit. Sipas njoftimeve të korrespondentëve, në mbrëmje demonstruesit janë shprndarë më qetë se ditëve të tjera.

 

Ndërkaq, në Gjermani janë arrestuar 50 protestues iranianë, të cilët gjatë protestës së tyre para konsullatës iraniane në Hamburg kishin pasur sjellje vandaliste. Sipas të dhënave të policisë, demonstruesit kishin pasur për qëllim të përkrahnin demonstratat në Iran dhe të reagonin për arrestimin e një disidenti të Iranit në Francë.

 

 

Dy ish ministra britanikë akuzojnë Blerin

 

Londër, 18 qershor 2003 - Dy ish ministra britanikë kanë akuzuar kryeministrin Toni Bler se në rastin e luftës së Irakut ka zhgënjyer opinionin britanik. Para një komisioni hetimor ish-minsitri Robin Kuk ka theksuar se deri më tani në Irak nuk janë gjetur kurrfarë armë të shkatërrimit në masë Ish ministrja për zhvillim Klara Short ka theksuar se qeveria qëllimisht ka bërë një seleksionim të materialeve të shërbimeve të fshehta, për të përligjur luftën kundër Irakut.

 

Aleanca midis SHBA-së dhe Britanisë së Madhe ishte argumentuar veçmas me luftën kundër armëve biologjike dhe kimike, të cilat thuhej se i posedonte regjimi i Sadam Huseinit.

 

 

OKB dërgon vëzhgues në Liberi

 

Nju Jork, 18 qershor 2003 - Pas nënshkrimit të një marrveshje për armpushim në Liberia, Kombet e Bashkura kanë vendosur dërgimin e një trupe vëzhguesish në këtë vend. Në Liberia, Qeveria dhe kryengritësit pas një lufte trevjçare kanë aritur një marrëveshje për armëpushim. Marrëveshja parashikon dorëheqjen e presidneit Çarls Tejlor dhe formimin e një qeverie transitore.

 

 

Është vrarë sot në Bagdad edhe një një ushtar amerikan, kurse një tjetër është plagosur

 

Bagdad, 18 qershor 2003 – Një ushtar amerikan është vrarë sot (e merkurë), kurse një tjetër është plagosur nga një zjarr, që është shkrehur nga një automjet në lëvizje, njofton Rojter.

 

Ky është rasti më i ri i sulmeve dhe pritave të ushtarëve amerikanë dhe ngre numrin e ushtarëve të vrarë në të pakten 42 sish që nga përfundimi i luftës në Irak. Prapa serisë së sulmeve të fundit besohet të jenë lojalët guerilë, por shumë irakianë thonë se dhuna rrjedh nga armiqësia e gjerë kundër forcave okupuese.

 

 

Çeçenët kanë vrarë sot 3 policë rusë në Grozni

 

Moskë, 18 qershor 2003 – Tre policë janë vrarë sot (e merkurë) në një veturë, e cila është sulmuar me pushkomitralez dhe granata dore në kryeqytetin e Çeçenisë seperatiste, njofton Rojter sipas agjencisë ruse Itar-Tass. Këto vrasje në Grozni ndodhën pas amnestisë për kryengritësit çeçenë, që ishte një përpjekje ruse për të sjellë paqen pas luftimeve dhjetëvjeçare.

 

 

Një gjykatë në Hanoi ka dënuar me 13 vjet burg një doktor vietnamez

 

Hanoi, 18 qershor 2003 – Një doktor vietnamez, i akuzuar për botimin e teksteve kundërqeveritare në internet, përfshirë këtu edhe përkthimin e eseve amerikane për demokraci është dënuar me 13 vjet burg për spiunazh nga një gjykatë e Hanoit, njofton Rojter. Fam Hong Son, përpos dënimit prej 13 vjetësh, do të vuajë edhe 3 vjet të tjera burg shtëpiak, pas vuajtjes së dënimit, thuhet në aktgjykimin e gjykatës.

 

 

Në Mozambik të paktën 87 viktima nga epidemia e kolerës

 

Johanesburg, 18 qershor 2003 - Të paktën 87 njerëz kanë vdekur nga kolera në Mozambik që nga fillimi i këtij viti, njoftoi sot radioja e Afrikës Jugore, duke u mbështetur në shënimet zyrtare të Organizatës Botërore të Shëndetësisë.

Në këtë periudhë janë shënuar 11.796 raste të sëmundjes nga kolera, prej të cilëve vdekshmëria më e lartë është shënuar në provincën Maputo, ku ndodhet edhe qyteti po me ketë emër.

 

Epidemia e kolerës ka përfshirë edhe disa rajone në Afrikën Jugore dhe në Svazilend, që ndodhen në fqinjësi të drejtpërdrejtë të Mozambikut.

 

 

Një grua iraniane është vetëndezur sot gjatë protestave në Paris

 

Paris, 18 qershor 2003 – Një grua iraniane është vetëndezur sot (e merkurë) gjatë protestave në Paris kundër arrestimit masiv të emigrantëve iranianë në Francë një ditë më parë, përfshirë edhe lideren Merijam Raxhavi, njofton Rojter.

 

Marzie Babakhani, e cila është vetëndezur duke protestuar para Ministrisë së brendshme afër Kullës së Ajfelit, është dërguar në spital me disa plagë të rënda djegieje.

 

"Ne dënojmë marrëveshjen e turpshme me mullahët", kanë brohoritur protestuesit duke akuzuar Francën për arrestimet në favor të Republikës islamike, të cilën e kundërshtojnë. Babakhanit, 40-vjeçare, autoritetet iraniane ia kanë vrarë dy vëllezër dhe jeton si refugjate në Francë.

 

 

Nga dy aeroplanë të rrëzuar në Floridë janë gjetur katër trupa të pajetë të viktimave

 

Majami, 18 qershor 2003 – Dy aeroplanë të vegjël njëmotorësh janë rrëzuar gjatë natës pasi kishin prekur krahët njëri me tjetrin në ajër mbi bregdet në Florida, njofton Rojter. Sipas një zyrtari të Rojes bregdetare, katër trupa të pajetë, dy meshkuj dhe dy femra, janë gjetur nga një varkëtar privat.

 

Nuk dihet ende se sa veta kanë qenë në bordin e të dy aeroplanëve, por nuk mund të bëhet fjalë për të shpëtuar nga ky aksident.

 

 

Futboll: Sot zhvillohet ndeshja finale e Kupës së Kosovës, Prishtina - KEK-u

 

Prishtinë, 18 qershor 2003 - Sot në stadiumin e qytetit në Prishtinë, do të zhvillohet ndeshja finale e Kupës së Kosovës në futboll. Finalistë të edicionit të sivjemë, janë Prishtina dhe anëtari i Ligës së Parë të Kosovës KEK-u nga Kastrioti (ish Obiliqi).

 

Favorit i këtij takimi është Prishtina, pasi nuk arriti të kurorëzohet me titillin e kampionit ajo të gjitha forcat i ka përqendruar në këtë takim, por nuk duhet harruar as faktin se skuadra e KEK-ut është mjaft cilësore e cila di të befasojë.

 

Këtë më së miri e dëshmoi në gjysmëfinale të garave të Kupës, kur pas humbjes në Gjakovë me rezultat 3:1, në ndeshjen e kthimit KEK-u, deklasoi Vëllaznimin duke e mundur me rezultat bindës 5:1 dhe kualifikohet në finale.

Ndeshja fillon në ora 17.00 dhe hyrja për shikues është gratis. Gjithashtu ndeshja transmetohet drejtpërdrejt në RTV21.

 

 

Bekham do të shkojë në Real Madrid

 

Londër, 18 qershor 2003 - Klubi anglez i futbollit Mançester Unajted dhe ai spanjoll Real i Madridit kanë arritur një marrëveshje me kusht për transferimin e kapitenit të kombëtares angleze, David Beckham me një vlerë prej 40 milionë dollarësh. Ky hap vjen pas shumë njoftimeve të mëparshme se Real i Madridit do të ishte destinacioni eventual i yllit të Manchester United para pretendimeve për të nga ekipi i Barcelonës. Tani duket se 2 korriku do të shënojë formalisht fundin e karrierës së David Beckham në Old Trafford të Mançesterit. Reali i Madridit njihet se blen emrat më të famshëm të futbollit - atje luan Zinedin Zidane, Ronaldo, Raul dhe Figo, por blerja e Dejvid Bekhamit do t'i shtojë llogarisë së tyre financiare emrin më të madh të marketingut të lojës futbollit në këtë moment. Por shitja e tij është bixhoz i madh për trajnerin e Mançesterit, sër Aleks Ferguson. Si ai ashtu dhe Bekham i bënë komplimenta njëri-tjetrit përmes deklaratave të përgatitura me shumë kujdes, por marrëdhëniet mes tyre së fundmi ka qenë shumë të ndera.

Copyright©2000-2003 Trepca.net - Të gjitha të  drejtat e rezervuara.