Lajme

E hëne, 16 qershor 2003

Përmbajtja:

• Presidenti Rugova priti dje kryetarin e Akademisë Kombëtare të Shkencave të Italisë

• Në Prishtinë u nënshkrua një marrëveshje bashkëpunimi ndërmjet ASHAK-ut dhe Akademisë së Shkencave të Italisë

• Presidenti Rugova priti basketbollistët kampionë MEB Prishtina

• Ndihma Amerikane rehabiliton një rrugë dhe Hallën Sportive në Vushtrri

• Mbrëmë afër Pejës janë rrëmbyer dy të rinj nga persona të panjohur

• J. Hajndël: Perspektiva e Kosovës mund të jetë vetëm evropiane

• Lulzim Zeneli u rizgjodh kryetar i Forumit Rinor të LDK-së

• Anëtarët e Këshillit të Forumit të Rinisë të LDK-së

• Kryetari KK të Albanikut kundërshton targat e Kosovës

• Ismet Beqiri: “Nuk kam insistuar që ta dorëzoj kupën, por mirënjohjet”

• MEB Prishtina mbrojti titullin e kampionit të Kosovës në basketboll

• U vetëdorëzua Bajram Çun Malaj, i dyshuari për vrasjen e biznesmenit shqiptar Myftar Çela

• Ministri serb i drejtësisë thotë se realizimi i idesë për Serbinë e pavarur nuk ka lidhje me humbjen e Kosovës

• Partitë në koalicionin qeveritar në Maqedoni ende nuk janë pajtuar për ndarjen e përfaqësive diplomatike

• Serbia është shprehur kundër fillimit të bisedimeve shqiptaro - serbe në samitin e Selanikut

• Ministrat e BE-së diskutojnë sot në Luksemburg edhe për situatën në Ballkan

• Në jug të qytetit Balad janë plagosur disa ushtarë amerikan

• Në Irlandën e Veriut deaktivizohet bomba e rëndë 500 kg

• Mohamed el Duri e vlerëson të drejtë përmbysjen e Sadam Hyseinit

• Kryeministri i Izraelit thotë se do ta respektonte një armëpushim me ekstremistët palestinezë

• Arrestohen 8 ekstremistë dhe kapet një sasi armësh në Irak

• Dita e 6-të e protestave në Teheran

• Ministrat e jashtëm të BE-së mbështesin përdorimin e forcës kundër shteteve apo grupeve terroriste

• Irani ia ka dërguar një protestë zyrtare SHBA-së lidhur me përzierjen në punët e brendshme

• Vershimet në Indinë verilindore lanë pa shtëpi rreth 300 mijë njerëz

• Në një sulm policor në Mekë janë vrarë pesë “terroristë” dhe dy policë

• Nisin bisedimet për paqe në Lindjen e Mesme

• Amerikanët goditen në një pritë

• Bekhami mund të bëhet anëtar i Barcelonës

Presidenti Rugova priti dje kryetarin e Akademisë Kombëtare të Shkencave të Italisë

 

Prishtinë, 16 qershor 2003 - Presidenti i Kosovës Ibrahim Rugova priti dje në një takim kryetarin e Akademisë Kombëtare të Shkencave të Italisë, prof. Xhani Skarshia, i shoqëruar nga kryetari i Akademisë së Shkencave dhe Arteve të Kosovës Rexhep Ismajli.

 

Me këtë radt Presidenti Rugova ka përgëzuar kryetarët e dy akademive për nënshkrimin e marrëveshjes për bashkëpunim në mes këtyre dy akademive.

Pasi ka shprehur kënaqësinë e tij për takimin me mysafirët dhe ka përshëndetur marrëveshjen në mes dy akademive, Presidenti Rugova e ka vlerësuar si një nder të veçantë vizitën e kryetarit të Akademisë italiane i cili bëri një gjest të madh për një bashkëpunim në fushat shkencore, kulturore dhe në fushën e librave klasike, që janë të rëndësishme për kohën tonë, tha z. Rugova.

Pasi shprehu kënaqësinë për vizitën në Kosovë, për takimin me Presidentin Rugova dhe për nënshkrimin e marrëveshjes me Akademinë e Shkencave dhe Arteve të Kosovës, Dr.Xhani Skarshia Munjoza tha se është shumë i kënaqur që janë hapur mundësitë për vendosjen e marrëdhënieve në fushën e shkencës, që është baza e progresit në shoqërinë civile të Kosovës.

Nënshkrimin e marrëveshjes me Akademinë Kombëtare të Shkencave të Italisë, si shumë të rëndësishme e ka vlerësuar edhe kryetari i ASHAK-së, akademik Rexhep Ismajli.

"Për Akademinë tonë kjo marrëveshje ka rëndësi të madhe, sepse është një nga të parat në historinë e marrëveshjeje që po bëjmë me akademitë e vendeve evropiane", tha akademik Ismajli, duke e konsideruar këtë marrëveshje si një rrugë për integrime në rrjedhat e akademive evropiane edhe për bashkëpunim të ndërsjellë.

Akad.Ismajlit theksoi se kjo marrëveshje ka shumë rëndësi për shkencat ekzakte, shkencat e aplikuara, siç janë shkencat bujqësore, etj. Ai shprehu optimizëm se nëpërmjet kësaj akademie do të ketë bashkëpunim të frytshëm në fushën e agrikulturës dhe të ngjashme, që janë me rëndësi për jetën në Kosovë.

 

 

Në Prishtinë u nënshkrua një marrëveshje bashkëpunimi ndërmjet ASHAK-ut dhe Akademisë së Shkencave të Italisë

 

Prishtinë, 16 qershor 2003 - Në mjediset e Akademisë së Shkencave dhe të Arteve të Kosovës, të shtunën në një ceremoni rasti është nënshkruar një marrëveshje bashkëpunimi ndërmjet ASHAK-ut dhe Akademisë së Shkencave të Italisë.

 

Këtë marrëveshje ndërmjet dy institucioneve të larta të shkencës dhe kulturës e kanë nënshkruar kryetari i ASHAK-ut, akademik Rexhep Ismajli dhe kryetari i Akademisë së Shkencave të Italisë, dr.Xhan Tomazo Skarashia.

Akademik Rexhep Ismajli tha se nënshkrimi i kësaj marrëveshjeje konfirmon vullnetin për bashkëpunim shkencor ndërmjet dy akademive si dhe të institucioneve të tjera shkencore e kulturore të të dy vendeve. "Shpresojmë se ky bashkëpunim do të jetë i frytshëm", tha ndër të tjera akademik Ismajli.

Dr.Skarashia foli për rëndësinë e nënshkrimit të kësaj marrëveshjeje, e cila do t'i ndihmojë në të ardhmen bashkëpunimit të frytshëm shkencor ndërmjet Kosovës dhe Italisë.

Përveç pranisë së akademikëve në këtë ceremoni nënshkrimi ishin të pranishëm edhe përfaqësues të Zyrës italiane në Kosovë, si dhe Ministri i Arsimit i Kosovës, Rexhep Osmani.

 

 

Presidenti Rugova priti basketbollistët kampionë MEB Prishtina

 

Prishtinë, 16 qershor 2003 - Presidenti i Kosovës Ibrahim Rugova priti sot basketbollistët dhe udhëheqjen e klubit të basketbollit MEB Prishtina, kampion dhe fitues i Kupës së Kosovës për vitin 2002/03. Presidenti Rugova përgëzoi lojtarët dhe udhëheqjen e klubit Prishtina për titullin kampion dhe sukseset e arritura sivjet në këtë sport.   Presidenti tha me këtë rast MEB Prishtina si kampion i Kosovës do ta ketë përkrahjen e Presidencës për pjesëmarrje të mëtejshme në gara dhe për një prani të sportit të Kosovës në arenën ndërkombëtare.

 

Në emër të klubit Nuredin Ibishi falendroi Presidentin Rugova për pritjen dhe i fali dy dhurata modeste sportive.

 

 

Ndihma Amerikane rehabiliton një rrugë dhe Hallën Sportive në Vushtrri

 

Prishtinë, 16 qershor 2003 – Zyra e SHBA-ve në Prishtinë njofton për përfundimin e projekteve të infrastrukturës për bashkësi, rehabilitimin e rrugës Tirana dhe rehabilitimin e Hallës Sportive të qytetit në Vushtrri.

 

Shefi i Misionit të SHBA-ve në Kosovë, Reno Harnish, do ta hapë këtë projekt zyrtarisht në emër të Shteteve të Bashkuara në një ceremoni që do të mbahet, nesër më 17 qeshor. Solemniteti i parë do të mbahet në rrugën Tirana, në orën 10:45, ndërsa ceremonia e dytë në Hallën Sprotive.

Këto projekte janë pjesë e dedikimit të Qeveris së SHBA-ve të ndihmojë zhvillimin demokratik dhe ekonomik të Kosovës.

Nëpërmjet USAID-it, populli amerikan investoi 168,897 euro për të rehabilituar një gjatësi prej 490 metra të rrugës “Tirana” e cila kalon përmes qendrës së qytetit. Kjo rrugë shërben si lidhje kyçe në mes të dy rrugëve kryesore të qytetit, andaj është me rëndësi për qytetarët e kësaj komune.

 

Rehabilitimi i kësaj rruge do të ndikoj pozitivisht në zhvillimin ekonomik të kësaj ane sepse nga ky projekt përfitojnë bizneset të cilat shtrihen përgjatë kësaj rruge.

Përveç z. Harnish, në këtë ceremoni do të flasin: z. Muharrem Shabani, kryetar i Kuvendit Komunal të Vushtrisë; dhe Behxhet Brajshori, ministër për Sport dhe Kulturë, thuhet në një njoftim të Zyrës amerikane në Prishtinë.

 

 

Mbrëmë afër Pejës janë rrëmbyer dy të rinj nga persona të panjohur

 

Pejë, 16 qershor 2003 - Mbrëmë rreth orës 21,00 në aksin rrugor Pejë-Prishtinë, afër doganës së Pejës, nga persona të panjohur janë rrëmbyer Valon Dreshaj (20) dhe Liridona Gashi (20), që të dy nga Peja.

 

Pas një kohe rrëmbyesit e kanë liruar Liridona Gashin, ndërkaq Valon Gashi e kanë marrë me vete dhe kanë shkuar në drejtim të panjohur. Valoni është i biri i biznismenit Muçë Dreshaj, pronar i firmës "Interkop" nga Peja.

Policia rajonal e Pejës është njoftuar për rastin dhe po i vazhdon hetimet.

 

 

J. Hajndël: Perspektiva e Kosovës mund të jetë vetëm evropiane

 

Berlin, 16 qershor 2003 - Johanes Hajndël, drejtues i Shtabit të Posaçëm për Ballkanin Perëndimor në Ministrinë Gjermane të Punëve të Jashtme vlerëson se që nga viti 1999 në Kosovë është arritur shumë.

 

Ai këtë e ilustron me faktin që të gjithë shqiptarët e dëbuar kanë mundur të kthehen në Kosovë, rindërtimi ka ecur shumë përpara, dëmet e luftës praktikisht janë eliminuar, ndërkaq emergjenca e pasluftës është kapërcyer, ngritja e policisë dhe drejtësisë shumetnike pothuaj ka përfunduar, ka filluar procesi i privatizimit dhe janë marrë masa për luftën kundër krimit të organizuar, tha ky zyrtar gjeman për "Dojçe velen".

Duke folur për angazhimin konkret të Gjermanisë në Kosovë, Johanes Hajndël thotë se "ne jemi shumë të pranishëm dhe të përfaqësuar në të gjitha fushat, qoftë në plan dypalësh qoftë në plan ndërkombëtar në forumet, instancat dhe organizatat në Kosovë".

 

Gjermanët, tha ai, përbëjnë kontigjentin më të madh të trupës policore ndërkombëtare në Kosovë, një nga kontingjentet më të mëdha të Kf0R-it dhe në tetor do të marrim sipas radhës dhe komandën e KFOR-it.

 

"Ne jemi shumë të angazhuar në procesin e kthimit të të dëbuarve dhe përmes Ministrisë Gjermane për Bashkëpunim ekonomik në fushën energjitike. Pra unë besoj se kemi një listë të gjatë të angazhimesh dhe tani ndihemi përgjegjës për suksesin në Kosovë", theksoi ky zyrtar gjerman.

I pyetur se ku po shkon Kosova, Johanes Hajndël, tha se udhëtimi mund të çojë vetëm në Evropë. Kosova ashtu si dhe gjithë Ballkani perëndimor po kalon një proces të dhimbshëm transformimi.

 

Duhen kapërcyer shtypjet e dekadave të kaluara dhe duhen zbatuar reforma politike, ekonomike dhe shoqërore. Sipas mendimit të tij, perspektiva e Kosovës mund të jetë vetëm evropiane, tha mes tjerash në këtë intervistë, Johanes Hajndël.

 

 

Lulzim Zeneli u rizgjodh kryetar i Forumit Rinor të LDK-së

 

Prishtinë, 16 qershor 2003 - Në Prishtinë dje pasdite i zhvilloi punimet Kuvendi i Pestë Zgjedhor i Forumit të Rinisë së LDK-së. Në këtë kuvend morën pjesë rreth 300 delegatë të zgjedhur në kuvendet e degëve. Punimet e Kuvendit të FR të LDK-së i përshëndeti presidenti i Kosovës dhe kryetari i Lidhjes Demokratike të Kosovës, Ibrahim Rugova. Duke folur në këtë kuvend, Presidenti Rugova tha me këtë rast se Forumi Rinor i LDK-së është e ardhmja dhe fuqia kryesore e LDK-së, por edhe e vetë Kosovës.

 

"Forumi Rinor i LDK-së gjatë ekzistimit të vet, sidomos tash në vitet e fundit ka kultivuar një frymë shumë të lartë demokratike, pastaj një kulturë demokratike dhe një kulturë shtetërore", vlerësoi Presidenti Rugova, duke shtuar se të rinjtë e LDK-së kanë treguar edhe një aktivitet shumë të rëndësishëm në bashkëpunim me organizatat e tjera rinore të Kosovës dhe të botës shqiptare në planin ndërkombëtar.

Ndryshe raportin për punën e FR të LDK-së ndërmjet dy kuvendeve e paraqiti Lulzim Zeneli, kryetar.

 

Ai theksoi se për 13 vjet të veprimit FR i LDK-së ka dhënë një kontribut për afirmimin dhe avancimin e vlerave pozitive të shoqërisë së Kosovës dhe për realizimin e aspiratave të popullit të Kosovës për liri, pavarësi e demokraci.

 

Gjithashtu Zeneli tha se të rinjtë e LDK-së edhe kësaj u gjenden para shumë sfidave që i shtroi koha, që imponuan rrethanat dhe kushtet në të cilën zuri shtrat e zhvillohej demokracia në Kosovë, jeta plurale si dhe përpjekjet e vazhdueshme për të krijuar hapësira të reja drejt një perspektive të sigurt për të ardhmen e rinisë së Kosovës.

 

Gjithashtu Zeneli tha se nuk është e rastit që FR i është dhënë epitetit i promotorit të zhvillimeve poizituive brenda LDK-së dhe më gjerë në hapësita e zhvillimeve politike dhe shoqërore në Kosovë.

 

Të rinjët e LDK_së ishin ata që ngritën kundër dhunës me motive politike, ishin ata që kërkuan më shumë hapësirë për veprim dhe avancim të brezit të ri në të gjitha sferat e organizimit dhe të zhvillimit të vendit, tha ems tjerash Lulzim Zenel kryetar i FR të LDK-së.

Kuvendi i Pestë i Forumit Rinor të LDK-së zgjodhi Këshillin drejtues 51 anëtarësh. Kryetari i FR të LDK-së u rizgjodh me shumicë votash Lulzim Zeneli.

 

 

Anëtarët e Këshillit të Forumit të Rinisë të LDK-së

 

Prishtinë, 16 qershor 2003 - Në Kuvendin e pestë të Forumit të Rinisë së LDK-së që i përfunodi punimet mbërëmë vonë në Prishtinë, u zgjodhën edhe anëtarët e Këshillit të Përgjithshëm. Më poshtë po e japim listën e plotë me anëtarët e zgjedhur me vota të fshehta.

Sejdë Tolaj, Avni Gashi, Astrit Kurtaj, Sali Morina, Valon Bytyçi, Fadil Hoti, Trime Hajdaraj, Arian Krasniqi, Nderim Gashi, Asim Rraci, Merita Gashi, Florian Dushi, Arben Geci, Malësore Gashi, Blerim Grainca, Shkodran Manaj, Jakup Haxhiu, Mimoza Rexhepi, Afrim Namani, Ilir Fetahu, Hyke Rexhaj, Bujar Kuqi, Valdet Hoxha, Anita Morina, Gjriokastra Barani, Arben Mehmeti, Bekim Kryeziu, Demush Bajraktari, Blerim Gashi, Merita I.Gashi, Abdyl Halimi, Petrit Makolli, Xhevdet Zekaj, Orhan Gashi, Agron Thaqi, Afërdita Balaj, Heroina Saraçi, Besim Morina, Amir Ademaj, Safet Kamberi, Migjen Selmani, Albana Ramadani, Faruk Nura, Burim Preteni, Galdim Krasniqi, Blerim Bajraktari, Valbona Idrizaj, Nexhat Haziri, Nexhat Hajrullahu, Besart Jashari.

 

 

Kryetari KK të Albanikut kundërshton targat e Kosovës

 

Albanik, 16 qershor 2003 - Përfaqësuesit e Kuvendit të Komunës se Albanikut, ish-Leposaviqit dhe të policisë së UNMIK-ut nuk kanë arritur marrëveshje rreth riregjistrimit të makinave me targa të Kosovës.

 

Kryetari Kuvendit komunal të Albanikut, Nebojsha Radulloviq ka deklaruar pas bisedimeve të pasuksesshme se targat janë element i shtetësisë dhe serbët nga targat e Kosovës nuk do të kenë dobi, sepse me ato nuk mund të shkojnë askund!

 

 

Ismet Beqiri: “Nuk kam insistuar që ta dorëzoj kupën, por mirënjohjet”

 

Prishtinë, 16 qershor 2003 - Kryetari i Kuvendit Komunal të Prishtinës, Ismet Beqiri i dha sot Zyrës për Informim të Kuvendit Komunal të Prishtinës lëshoi sot një deklaratë përmes së cilës sqaron mosmarrëveshjet që lindën midis tij dhe z.Behlul Beqaj, kryetar i Federatës së Basketbollit, në fund të ndeshjes finale të Kupës së Kosovës midis MEB Prishtinës dhe Mabetexit, e cila u zhvillua të shtunën më 14 qershor të këtij viti në Pallatin e Rinisë në Prishtinë.

Ismet Beqiri thotë se për finalen e Kupës së Kosovës midis dy klubeve basketbollistike MEB Prishtinës dhe Mabetexit i ka përgatitur mirënjohjet për t'i ndarë në emër të Kuvendit Komunal të Prishtinës dhe për cilindo klub që do ta fitonte Kupën e Kampionit të Kosovës. "Unë i kisha mirënjohjet e përgatitura për këto dy ekipe dhe lidhur me këtë, unë e kam njoftuar edhe z. Beqaj rreth dhjetë minuta para se të fillonte ndeshja", thotë Beqiri dhe shton:

"Afërsisht një minutë para se të përfundonte ndeshja, z. Beqaj më informoi se ju do ta dorëzoni kupën e kampionit, por jo edhe mirënjohjet!. Arsyetimi i tij për mosdorëzimin e mirënjohjeve për mua ishte i papranueshëm, ndërkohë që z. Beqaj pohonte se më pas mund të organizosh një ceremoni në Kuvendin Komunal të Prishtinës, ku do t'ua dorëzonit mirënjohjet dhe se sipas tij për këtë është dashur që ai të informohej me kohë! Një gjë e këtillë për mua ishte e papranueshme, sepse për dorëzimin e mirënjohjeve unë isha i informuar nga Kryesia e KB MEB Prishtina dhe simpatizantët e këtij Klubi nëse ata fitojnë", pohon kryetari Beqiri.

Në fund kryetari i KK të Prishtinës, Ismet Beqiri, thekson se ai nuk ka insistuar që ta dorëzojë Kupën, siç është përfolur në opinion, por ka insistuar që t'i dorëzojë mirënjohjet për cilindo klub që do ta fitonte Kupën e Kampionit të Kosovës dhe dorëzimin e mirënjohjeve do ta bënte në emër të kryeqytetit të Kosovës.

 

 

MEB Prishtina mbrojti titullin e kampionit të Kosovës në basketboll

 

Prishtinë, 16 qershor 2003 – Edhe në takimin e tretë final të Ligës ABK në basketboll, MEB Prishtina mundi skuadrën Mabetex. Me këtë fitore MEB Prishtina mbrojti titullin e kampionit të Kosovës. Kjo është kurora e dytë me të cilën stolisen basketbollistët e MEB Prishtina në këtë edicion, sepse ajo ka fituar edhe Kupën e Kosovës.

Ndeshja u zhvillua në një atmosferë sportive me një rivalitet të madh në parket, ku skuadra e Mabetexit gjatë gjithë takimit ishte në epërsi dhe ishte shumë afër që të shënonte fitoren e parë dhe të zvoglonte rezultatin në 2:1 (me ndeshje të fituara).

 

Mirëpo, në këtë takim vendosi eksperienca e basketbollistëve të MEB Prishtinës të cilët vetëm 52 sekonda para përfundimit të takimit barazuan rezultatin 72:72. Në vazhdim të ndeshjes Mazreku i Mabetexit shënon dhe edhe një herë e sjell në epërsi skuadrën e tij.

 

Pastaj shkaktohet gabim personal ndaj Edmond Azemit i cili nga dy gjuajtje të lira shënon vetëm njërën. Nën koshin e Mabetexit topin e merr Forny dhe ia pason Azemit i cili menjëherë nga distanca 6,25 gjuan, dhe vetëm një sekondë para përfundimit të ndeshjes shënon për tri pikë 76:74. Me këto pikë të Azemit MEB Prishtina shënon fitoren e tretë dhe njëherit fiton edhe titullin e kampionit të Kosovës në baskëtboll për edicionin 2002/2003.

Këtë atmosferë të mirë sportive pak e zbehu një mosmarrëveshje që ndodhi në mes të kryetarit të Federatës së Basketbollit të Kosovës, Behlul Beqaj, dhe kryetarit të Kuvendit Komunal të Prishtinës, Ismet Beqiri rreth dorëzimit të mirënjohjeve për basketbollistët e MEB Prishtinës dhe Kupës së Kampionit fituesit. Megjithatë pas një vonesë rreth 15 minutëshe Kupën MEB Prishtinës ia dorëzoi Ismet Beqiri.

 

 

U vetëdorëzua Bajram Çun Malaj, i dyshuari për vrasjen e biznesmenit shqiptar Myftar Çela

 

Shkodër, 16 qershor 2003 - Biznesmeni i njohur dhe presidenti i Klubit të fudbollit "Vëllaznia" e Shkodrës, Myftar Çela është vrarë të shtunën në mbrëmje, në qytezën e Tuzit në Mal të Zi. Vetëm disa orë pas ngjarjes, njëri prej atentatorëve është vetëdorëzuar në policinë e Podgoricës.

 

Po kështu dje pasdite policia malazeze ka arrestuar edhe djalin e xhaxhait të Bajram Çun Mulajt, i cili ka qenë i pranishëm në momentin e vrasjes.

Vrasja e z. Çela ka arritur shqetësimin në rrethet e biznesit shqiptar.

 

 

Ministri serb i drejtësisë thotë se realizimi i idesë për Serbinë e pavarur nuk ka lidhje me humbjen e Kosovës

 

Beograd, 16 qershor 2003 - Ministri serb i drejtësisë dhe kryetari i Partisë Demokristiane të Serbisë Vlladan Batiq ka deklaruar se realizimi i idesë për Serbinë e pavarur nuk ka lidhje thelbësore shkak-pasojë me sovranitetin eventual dhe me humbjen e Kosovës.

 

Pohimet e disa politikanëve se Sërbia do të humbë Kosovën me realizimin e idesë për pavarësinë e saj, pra të Serbisë, i arsyetoj si arsyetime të thjeshta dhe të lira.

 

 

Partitë në koalicionin qeveritar në Maqedoni ende nuk janë pajtuar për ndarjen e përfaqësive diplomatike

 

Shkup, 16 qershor 2003 - Partitë në koalicionin qeveritar LSDM dhe BDI në Maqedoni edhe pas shtatë muaj të formimit të këtij koalicioni, nuk janë pajtuar lidhur me emërimet, përkatësisht nuk kanë arritur të ndajnë përfaqësitë diplomatike.

 

Sipas BDI-së është i rëndësishëm fakti se partia e tyre duhet të prezentohet me 23 për qind në diplomaci, aq sa është edhe numri i shqiptarëve në Maqedoni.

Burimet partiake bëjnë të ditur se subjekti politik shqiptar në qeveri kërkon që të udhëheqë me njërin nga pëfaqësitë mlutlaterale, ndërkaq interesim të veçantë ka për njërin nga dy misionet kyçe: Aleancën Veriatlantike apo Kombet e Bashkuara.

BDI-ja insiston që të ketë ambasadorë në të gjitha nivelet.

 

 

Serbia është shprehur kundër fillimit të bisedimeve shqiptaro - serbe në samitin e Selanikut

 

Prishtinë - Beograd, 16 qershor 2003 - Kryeministri i Serbisë Zoran Zhivkoviq dhe zëvendësi i tij Nebojsha Çoviq ia kanë dërguar një letër shefit të BE-së për Polikë të Jashtme dhe Siguri Havier Solana ku janë shprehur kundër fillimit të bisedimeve shqiptaro - serbe në samitin e Selanikut.

 

Në fakt zyrtarët e lartë të Qeverisë serbe kanë përkrahur fillimin e bisedimeve shqiptaro-serbe, por vetëm pas samitit të Selanikut, përkatësisht kah fundi i qershorit ose fillimi i korrikut. Ata kanë propozuar në këtë letër si vendtakim Beogradin, por kanë thënë se edhe Brukseli është plotësisht i pranueshëm.

 

 

Ministrat e BE-së diskutojnë sot në Luksemburg edhe për situatën në Ballkan

 

Luksemburg, 16 qershor 2003 - Ministrat e vendeve të BE-së do të diskutojnë sot në Luksemburg edhe për situatën në Ballkan. Ndërkaq për sa i përket samitit të Selanikut ministrat e vendeve të BE-së do të shyrtojnë propozimin e Greqisë për një bashkëpunim më të ngushtë me shtetet e Ballkanit Perëndimor dhe për një ndihmë më të madhe financiare për këto vende.

 

Greqia ka propozuar që 300 milionë euro nga buxheti i dhjetë shteteve që do të anëtarësohen, të livrohen për nevojat e vendeve të Ballkanit.

 

 

Në jug të qytetit Balad janë plagosur disa ushtarë amerikan

 

Bagdad, 16 qershor 2003 - Në Irak është sulmuar një konvoj ushtarak amerikan pasi që ushtarët kishin filluar me aksione anekend vendit në mbledhjen e armëve të ndaluara. Si pasojë e sulmit që ka ndodhur në jug të qytetit Balad janë plagosur disa ushtarë amerikan.

 

Pas kalimit të afatit dyjavor për dorëzimin vullnetar të armëve trupat amerikane filluan dje me operacionin e tyre për mbledhjen e armëve që ende ndodhen në duart e personave civilë në Irak. Njëkohësisht ushtarët amerikanë vazhdojnë kërkimet intenzive të ithtarëve të diktatorit irakian Sadam Hysein.

 

 

Në Irlandën e Veriut deaktivizohet bomba e rëndë 500 kg

 

Belfast, 16 qershor 2003 - Në Irlandën veriore është evituar një sulm terrorist me një mjet shpërthyes. Siç njoftojnë zyrtarë të policisë, ekspertët kanë pasur sukses në deaktivizimin e një autobombe të rëndë 500 kilogramë. Bomba ishte fshehur në një makinë transporti e cila ishte vendosur në afërsi të një ure.

 

Autoritetet mendojnë se sulmi ka qenë plan i të ashtuquajturës "IRA e vërtetë", krah i ndarë ky i Organizatës ilegale republikane irlandeze IRA. Ajo edhe më tej vazhdon të refuzoj procesin paqësor për Irlandën e veriut.

 

 

Mohamed el Duri e vlerëson të drejtë përmbysjen e Sadam Hyseinit

 

Uashington, 16 qershor 2003 - Ish-ambasadori irakian në Kombet e Bashkuara Mohamed el Duri e ka vlerësuar si të drejtë përmbysjen nga pushteti të presidentit Sadam Hysein.

 

Megjithatë ndërrimi i pushtetit në Bagdat është dashur të bëhet nga populli irakian e jo nga amerikanët dhe britanikët, tha El Duri për stacionin televiziv britanik BBC. Irakianët janë të gëzuar që më nuk qeverisen nga Sadam Hyseini por nuk janë të lumtur me trupat pushtuese në vendin e tyre.

 

 

Kryeministri i Izraelit thotë se do ta respektonte një armëpushim me ekstremistët palestinezë

 

Tel Aviv, 16 qershor 2003 - Kryeministri i Izraelit, Ariel Sharon, thotë se do ta respektojë një armëpushim me ekstremistët palestinezë, por do të vazhdojë ta godasë të ashtuquajturën "bombë me sahat".

Një zyrtar i kabinetit izraelit tha se Kryeministri deklaroi në takimin javor të kabinetit dje se Izraeli do të ndërpresë vrasjet e udhëheqësve terroristë, në qoftë se Hamasi dhe Xhihadi Islamik, shpallin një armëpushim.

Por zyrtari tha se zoti Sharon u zotua se do të vazhdojë ta mbajë në shënjestër atë që Izraeli e quan “bombë me sahat”, një terrorist i gatshëm të godasë dhe komandantin që dha urdhër për sulmin.

 

 

Arrestohen 8 ekstremistë dhe kapet një sasi armësh në Irak

 

Bagdad, 16 qershor 2003 - Trupat amerikane në Irak arrestuan 8 ekstremistë dhe kapën një sasi armësh ditën e parë të një operacioni të ri për të shtypur përkrahësit besnikë të Saddam Husseinit.

Komanda Qendrore e Shteteve të Bashkuara e quan operacionin që po zhvillohet në veri dhe në perëndim të Bagdadit, Akrepi i Shkretëtirës. Qindra ushtarë amerikanë hynë në qytetin Fallujah mbrëmë gjatë natës. Shumë banorë të qytetit Fallujah u ankuan se ishin detyruar të ngriheshin nga krevati në mes të natës dhe të shtriheshin në dysheme.

Trupat amerikane çuan në Falluxha më vonë një kamion të mbushur me ushqime, ujë dhe lodra. Forcat amerikane ndërmorën Operacionin Akrepi i Shkretëtirës pasi skadoi afati që irakianët të dorëzonin armë.

 

 

Dita e 6-të e protestave në Teheran

 

Teheran, 16 qershor 2003 - Protestuesiit kanë proestuar edhe të dielwn nëpër rrugët e kryeqytetit Teheran duke kërkuar reforma politike. Protesta erdhi pasi rreth 250 intelektualë iranianë nëshkruan një letër të hapur ku kritikojnë ashpër udhëheqjen e klerikëve në Iran.

 

Ata thonë se njerëzit kanë të drejtë të mbikëqyrin, kritikojnë veprimet e pushtetarëve dhe t'i shkarkojnë ata nëse është nevoja.

Presidenti amerikan Bush e ka mirëpritur valën e protestave në Iran kundër autoriteteve si një zhvillim pozitiv.

 

 

Ministrat e jashtëm të BE-së mbështesin përdorimin e forcës kundër shteteve apo grupeve terroriste

 

Luksemburg, 16 qershor 2003 - Ministrat e jashtëm të Bashkimit Evropian kanë mbështetur sot përdorimin e forcës kundër shteteve apo grupeve terroriste në rastet kur me rrugë diplomatike nuk është e mundur të pengohen që ato të shtien në dorë ose të përdorin armët bërthamore, biologjike dhe kimike.

 

 

Irani ia ka dërguar një protestë zyrtare SHBA-së lidhur me përzierjen në punët e brendshme

 

Teheran, 16 qershor 2003 – Irani ka thënë sot (e hënë) se ia ka dërguar një protestë zyrtare SHBA-së lidhur me, siç e ka quajtur, përzierjen në punët e brendshme pasi Uashingtoni ka inkurajuar protestat gjashtëditore prodemokratike, njofton Rojter.

 

Pas luftës në Irak, Uashingtoni ka bërë trysni mbi Iranin, duke akuzuar për armë bërthamore, për mbështetje të terrorizmit dhe ka përshëndetur demonstratat kundër qeverisjes së klerikëve islamikë, të cilat shpërthyen javën e kaluar.

 

“Ne i kemi dërguar notë zyrtare amerikanëve nëpërmjet Ambasadës së Zvicrës dhe kemi kundërshtuar aksionet e tyre”, ka thënë zëdhënësi i Ministrisë së Jashtme të Iranit në një konferencë të sotme shtypi.

 

 

Vershimet në Indinë verilindore lanë pa shtëpi rreth 300 mijë njerëz

 

Guajati, Indi, 16 qershor 2003 – Turma fshatarësh janë përleshur në një shesh para ndërtesës qeveritare pas vershimeve në Indinë verillindore, të cilat lanë pa shtëpi rreth 300 mijë njerëz, ka bërë të ditur sot (e hënë) një zyrtar, njofton Rojter.

 

Vershimet në shtetin e largët Asam kanë shkaktuar shirat e monsuneve stinore, të cilat i kanë shkatërruar ose i kanë dëmtuar rreth 300 fshtara, knë rrënuar rrugë, ura dhe dhe hekurudha. Për ditët e ardhshme parashikohen edhe mqë shumë të reshura.

 

Në një sulm policor në Mekë janë vrarë pesë “terroristë” dhe dy policë

 

Mekë, Arabia Saudite, 16 qershor 2003 – Televizioni saudit ka njoftuar se forcat e sigurimit mbrëmë kanë sulmuar një grup terroristësh, që kanë banuar në Mekë, të cilët kishin planifikuar një sulm terrorist, i cili do të kryhej së shpejti, njofton Rojter.

 

Gjatë përleshjeve me rastin e këtij sulmi policor janë vrarë pesë “terroristë” dhe dy policë. Në apartment janë gjetur 72 bomba, pushkomitraloza, munidcion, mjete komunikimi dhe substanca kimike. Po kështu. njoftohet se janë arrestuar edhe pesë militantë të tjerë.

 

 

Nisin bisedimet për paqe në Lindjen e Mesme

 

Jerusalem, 16 qershor 2003 - Një ditë negociatash intensive përgatitet të hënën për të çuar përpara përpjekjet e nisura në kuadër të planit të ri për paqe në Lindjen e Mesme.

I dërguari i posaçëm i presidentit Bush në Lindjen e Mesme, John Wolf, pritet të takohet pas disa orësh me kryeministrin izraelit Ariel Sharon.

Kryeministri palestinez, Mahmud Abbas, pritet të zhvillojë bisedime në Gaza me grupe palestineze, që vijnë pas bisedimeve të djelën mes negociatorëve egjiptianë dhe grupit militant Hamas.

Egjiptianët po përpiqen ta bindin Hamasin të ndalë sulmet kundër izraelitëve.

 

 

Amerikanët goditen në një pritë

 

Bagdad, 16 qershor 2003 - Një numër ushtarësh amerikanë janë plagosur në një sulm mbi kolonën e tyre ushtarake që po shkonte nga Bagdadi për në qytetin verior Balad.

Një kamion i ushtrisë amerikane u pa të digjej pas sulmit që ndodhi rreth 70 kilometra larg Bagdadit.

Heliktopterë Apaçi u thirrën në ndihmë për të kërkuar autorët e këtij sulmi që i kapën në befasi ushtarët amerikanë të pambrojtur duke udhëtuar të shkujdesur në karocerinë e kamionit.

 

 

Bekhami mund të bëhet anëtar i Barcelonës

 

Barcelonë, 16 qershor 2003 - Ekipi spanjoll i Barcelonës ka zgjedhur si president të ri Huan Laportën, i cili e bazoi të gjithë fushatën e tij në premtimin për të blerë kapitenin e Anglisë, Dejvid Bekham, nga kampionët e Mançester Junajtedit.

Mançesteri ka thënë se është i gatshëm ta shesë Bekhamin, por lojtari ka thënë se nuk ka në plan të takohet me zotin Laporta.

Bekham ka një vlerë prej rreth 50 milion dollarësh. Besohet se rivalët spanjollë të katalonjasve, Reali i Madridit, mbetet favoriti në blerjen e yllit anglez, njofton BBC.

Laporta ndodhet tani nën presion të konsiderueshëm për të mbajtur premtimin që duket se i solli fitoren, për të punuar për të sjellë në ekip yllin e Mançesterit.

"Na duhet të bindim përfaqësuesit e Dejvid Bekhamit dhe shpresoj se tani që fituam do të jemi në gjendje të bindim përfaqësuesit e tij dhe lojtarin," tha Laporta.

Festimet e fitores për Laportan do të jenë të shkurtra. Përveç hapjes së negociatave të menjëhershme me përfaqësuesit e Dejvid Bekhamit, atij i duhet të përballet edhe me borxhin prej rreth 220 milion eurosh të klubit.

Copyright©2000-2003 Trepca.net - Të gjitha të  drejtat e rezervuara.