Lajme

E shtune, 14 qershor 2003

Përmbajtja:

• Një udhëheqës i policisë së UNMIK-ut dhe tre persona vendorë akuzohen për keqpërdorim seksual të fëmijëve

• Hollbruk thotë se është për pavarësinë e Kosovës

• Nesër i zhvillon punimet Kuvendi V zgjedhor i FR të LDK-së

• Bisedimet mes Prishtinës dhe Beogradit mund të fillojnë vetëm pas samitit të Selanikut

• Ministri rus i Mbrojtjes thotë se tërheqja e trupave ruse nga Kosova do të përfundojë me një gusht

• Deri më tash në Kosovë kanë humbur 20 mijë hektarë tokë buke

• Në Prishtinë më 17 e 18 qershor mbahet konferenca ndërkombëtare me temën "Ndërmarrja moderne"

• Me moton "Stop dhunës në futbollin kosovar", zhvillohet ndeshja reviale Prishtina-Internacionalja

• Basketboll: Sonte zhvillohet ndeshja e tretë MEB Prishtina-Mabetex

• Prefekti i Haraçinës thotë se vrasja e Nexhmedin Demirit është e kurdisur nga policia maqedonase

• Në selinë e NATO-s u mbajt takim tripalësh ndërmjet ministrave të mbrojtjes të Shqipërisë, Maqedonisë e Kroacisë

• Bashkëpunimi ballkanik kundër trafiqeve dhe kriminalitetit të organizuar

• Beogradi krijon struktura të reja paralele serbe në Kosovë

• Pauell ka hedhur poshtë idenë për dërgimin e forcave paqeruajtëse në Lindjen e Mesme

• Edhe sot për të katërtën ditë me radhë kanë vazhduar protestat në Teheran

• Izraeli ka vrarë sot një anëtar të Hamasit dhe ka plagosur edhe rreth 30 palestinezë të tjerë

• Marina e Sri Lankës e ka fundosur një anije Tigrave Tamilë dhe drohet se 12 pjesëtarë kanë humbur jetën

• Sulm i ri izraelit në Rripin e Gazës

Një udhëheqës i policisë së UNMIK-ut dhe tre persona vendorë akuzohen për keqpërdorim seksual të fëmijëve

 

Prishtinë, 14 qershor - Një udhëheqës i policisë së UNMIK-ut dhe tre persona vendorë akuzohen për keqpërdorim seksual të fëmijëve. Zëdhënësi i policisë së UNMIK-ut Beri Fleçër tha se bëhet fjalë për diçka shumë serioze. Policit iu hoq imuniteti, por mbrohet në liri. Fleçër tha se të gjithë të dyshimtit do të gjykohen në Kosovë.

 

 

Hollbruk thotë se është për pavarësinë e Kosovës

 

Sofje, 14 qershor - "Rasti i Kosovës nuk mund të zgjidhet ndërsa Mali i Zi nuk ndahet. Kur Mali i Zi të ndahet, atëherë Kosova dhe Serbia duhet të krijojnë lidhje, ose Kosova do të pavarësohet", ka deklaruar diplomati i njohur amerikan Riçard Hollbruk për një gazetë bullgare. Hollbruk ka theksuar se personalisht është për pavarësinë e Kosovës.

 

 

Nesër i zhvillon punimet Kuvendi V zgjedhor i FR të LDK-së

 

Prishtinë, 14 qershor - Nesër në mjediset e hotelit "Grand" në Prishtinë, në orën 11.00 i zhvillon punimet Kuvendi i Pestë zgjedhor i Forumit të Rinisë së LDK-së. Ky Kuvend vjen si rezultat i realizimit me sukses të plotë të kuvendeve zgjedhore prej nivelit të nëndegëve dhe atij të degëve.

Në këtë Kuvend do të përfaqësohen të gjitha degët e FR të LDK-së, me mbi 300 delegatë të zgjedhur në kuvendet zgjedhore të degëve.

Kuvendin do ta përshëndesë edhe Presidenti i Kosovës Ibrahim Rugova.

 

 

Bisedimet mes Prishtinës dhe Beogradit mund të fillojnë vetëm pas samitit të Selanikut

 

Beograd, 14 qershor - Pas bisedimeve të kryeadministratorit Mihael Shtajner udhëheqësit e Beogradit, kryeministri serb Zoran Zhivkoviq deklaroi se Selaniku nuk është vend i përshtatshëm për bisedimet Prishtinë- Beograd. Sipas tij, këto bisedime mund të fillojnë vetëm pas samitit të Selanikut.

 

Të dy bashkëbiseduesit kanë lënë të kuptohet se së shpejti jo në samitin e Selanikut, por në Bruksel mund të zhvillohet takimi i parë midis Prishtinës e Beogradit.

Edhe Shtajner është angazhuar për fillimin e bisedimeve Prishtinë -Beograd për çështjet e rëndësishme me interes të përbashkët.

Shtajner ka paralajmëruar se në samitin e Selanikut do të shkojë me një delegacion shumetnik. Ai tha se fillimi i dialogut nuk nënkupton edhe fillimin e zgjidhjes së statusit përfundimtar të Kosovës, duke konsideruar se për këtë fazë të bisedimeve ende është herët.

 

Dialogu për statusin përfundimtar të Kosovës nuk do të nisë në këtë vit, ka thënë Shtajner, duke sqaruar se bisedimet midis Prishtinës e Beogradit. Ai shtoi se statusi përfundimtar i Kosovës është çështje, e cila do të përfshijë më shumë palë.

 

 

Ministri rus i Mbrojtjes thotë se tërheqja e trupave ruse nga Kosova do të përfundojë me një gusht

 

Bruksel, 14 qershor - Ministri rus i Mbrojtjes Sergej Ivanov ka thënë se Moska do t'i tërheqë të gjithë paqeruajtësit nga Ballkani për më pak se dy muaj. Ivanov tha se ushtarët e fundit rusë do ta braktisin Kosovën më 1 gusht, ndërsa Bosnjen për disa ditë.

 

 

Deri më tash në Kosovë kanë humbur 20 mijë hektarë tokë buke

 

Prishtinë, 14 qershor - Për të ndërprerë ndërtimet e egra në tokat bujqësore në Kosovë Ministria e Bujqësisë, Pylltarisë dhe Zhvillimit Rural në bashkëpunim me Ministrinë e Ambientit dhe Planifikimit Hapësinor, ka shpallur fushatën me moton: "Viti 2003 vit i mbrojtjes së tokave bujqësore.

Mbrojtja e tokave bujqësore është obligim i të gjitha strukturave nga ato qeveritare e deri tek ato komunale, u tha në takimin e mbajtur në Ministrinë e Shërbimeve Publike ku morën pjesë përfaqësuesit e të gjitha komunave të Kosovës.

Deri më tash, sipas të dhënave të Ministrisë së Bujqësisë, në Kosovë kanë humbur 20 000 hektarë tokë buke.

 

 

Në Prishtinë më 17 e 18 qershor mbahet konferenca ndërkombëtare me temën "Ndërmarrja moderne"

 

Prishtinë, 14 qershor - Organizuar nga Instituti për Inxhiniering dhe Menaxhim të Ndërmarrjes (IEME), më 17 dhe 18 qershor në mjediset e hotelit "Grand" në Prishtinë, mbahet konferenca ndërkombëtare me temën "Ndërmarrja moderne". Kjo konferencë organizohet në bashkëpunim me ministritë e Qeverisë së Kosovës dhe me Universitetin e Prishtinës.

 

Në Konferencë do të referojnë shumë ekspertë ndërkombëtarë dhe vendorë nga fusha e ekonomisë, inxhinierisë dhe e teknologjisë informative.

Objektiv kryesor i konferencës është që të mundësojë një forum aktiv që do të ofronte shkëmbimin e dijeve, përvojës dhe informatave për ndërmarrjet, me fokus të veçantë në menaxhimin, inxhinieringun dhe teknologjinë informative.

 

 

Me moton "Stop dhunës në futbollin kosovar", zhvillohet ndeshja reviale Prishtina-Internacionalja

 

Prishtinë, 14 qershor – Sot, në stadiumin e qytetit në Prishtinë, në ora 17.30 do të zhvillohet një ndeshje reviale, ku do të takohen skuadra e Prishtinës e viteve të arta dhe futbollistët shqiptarë që kanë luajtur në arenën ndërkombëtare. Kjo ndeshje zhvillohet me moton "Stop dhunës në futbollin kosovar".

 

Në përbërjen e skuadrës së Prishtinës do të jenë këta futbollistë: Fadil Vokrri, Agim Cana, Kujtim Shala, Edmond Rugova, Fadil Muriqi, Shefqet Sinani, Neshet Zhaveli, Ramadan Cimili, Skender Shengyli, Xhevdet Muriqi, Ramiz Krasniqi, Jusuf Tortoshi, Sahit Kelmendi, Faruk Domi, Mensur Nexhipi, Bedredin Gjinali, Gani Llapashtica, Arbnor Morina, Fadil Berisha, Afrim Toverlani, Avdyl Bellopoja dhe Isa Sadriu.

Trajner: Mirosllav Blazheviq – Qira

Ndërkaq në skuadrën Internacionalja do të luajnë këta futbollistë: Vilson Gjoni, Ardian Kozniku, Erdogan Celina, Sokol Hadri, Sami Ahmeti, Fisnik Ademi, Shukri Paqarda, Rafet Prekazi, Sokol Kushta, Sylejman Demollari, Bruno Ceka, Burhan Beadini, Aqif Mehmeti, Gajur Sadiku, Aqif Shehu, Rexhep Gaxholli, Zenun Brovina, Luan Prekazi, Shefqet Lajqi, Harun Isa, Muharrem Sahiti dhe Bashkim Abdullahu.

Trajner: Luan Prekazi

Gjyqtarë të kësaj ndeshjeje do të jenë: Shinasi Berisha, e fillon ndeshjen, ndërkaq e vazhdojnë: Ismet Shurdhani, Fikri Krivaqa, Nijazi Shuleta dhe Rushit Selimi.

 

 

Basketboll: Sonte zhvillohet ndeshja e tretë MEB Prishtina-Mabetex

 

Prishtinë, 14 qershor – Sonte në Pallatin e Sporteve e Rinisë në Prishtinë zhvillohet ndeshja e tretë finale e garës përfundimtare të Ligës ABK në basketboll, ndërmjet MEB Prishtina dhe Mabetex. MEB Prishtina në dy ndeshjet e zhvilluara me Mabetexin udhëheq me rezultat 2:0.

 

Nëse sot MEB Prishtina shënon fitore ndaj Mabetexit kjo do të jetë fitorja e tretë dhe njëkohësisht edhe mbrojtje e titullit të kampionit.

 

Mirëpo, duhet të presim orën 20.15 kur edhe do të zhvillohet takimi, pasi Mabetexi përkundër dy humbjeve nga MEB Prishtina është skuadër me shumë e fortë që në në radhët e veta ka basketbollistë mjaftë cilësor, tq cilët dijnë të befasojnë çdo skuadër të Ligës ABK.

Ndeshja fillon në ora 20.15 dhe RTK do të bëjë transmetimin e drejtëpërdrejtë.

Sot gjithashu zhvillohet edhe takimi i parë final i Ligës së parë në basketboll në konkurrencën e femrave, ndërmjet Universitetit dhe Bashkimit.

Ky takim fillon në ora 16.00.

 

 

Prefekti i Haraçinës thotë se vrasja e Nexhmedin Demirit është e kurdisur nga policia maqedonase

 

Shkup, 14 qershor - Prefekti i komunës së Haraqinës, Reshat Ferati thotë se vrasja e Nexhmedin Demirit nga Haraçina e Shkupit nga policia maqedonase ka tensionuar dukshëm gjendjen e atjeshme. Sipas tij vrasja e Nexhmedin Demirit është një punë e kurdisur nga policia maqedonase.

 

Ai thotë se incidentet e tilla shkojnë në favor të përkeqësimit të situatës dhe sigurisë në vend. Por falë angazhimit të autoriteteve vendore dhe para se gjithash përfaqësuesve të misionit "Konkordia" të BE-së gjatë ditës së djeshme në Haraçinë gjendja ishte normale dhe e qetë.

Qytetarët kanë sulmuar ekipin e gazetarëve të TV të Maqedonisë dhe atë të Televizionit Sitel. Gjatë këtij sulmi gazetarët kanë marrë lëndime të lehta dhe të njëjtit me ndihmen e përfaqësuesve të misionit "Konkordia" janë dërguar në spitalin e qytetit.

 

 

Në selinë e NATO-s u mbajt takim tripalësh ndërmjet ministrave të mbrojtjes të Shqipërisë, Maqedonisë e Kroacisë

 

Bruksel, 14 qershor - Në selinë e NATO-s në Bruksel është zhvilluar një takim tripalësh ndërmjet ministrave të mbrojtjes të Shqipërisë, Maqedonisë e Kroacisë. Ministri shqiptar i Mbrojtjes Pandeli Majko tha pas këtij takimi se është riafirmuar gatishmëria e këtyre vendeve për të çuar përpara bashkëpunimin ushtarak midis këtyre vendeve.

 

Majko tha se ky takim ishte me mjaft interes, duke shtuar se për Shqipërinë ishte e veçanta që u konformua koncepti i Kartës së Adriatikut, përkatësisht të pjesëmarrjes në rrugën e reformave në forcat e armatosura.

 

 

Bashkëpunimi ballkanik kundër trafiqeve dhe kriminalitetit të organizuar

 

Tiranë, 14 qershor - Ministri shqiptar i rendit publik Luan Rama u propozoi kolegëve të tij ballkanikë krijimin e një forumi ministror ballkanik me pjesëmarrjen e gjithë ministrave të brendshëm për të bashkërenduar veprimet dhe bashkëpunimin rajonal kundër trafiqeve dhe kriminalitetit të organizuar.

 

Luan Rama i bëri këto komente gjatë një takimi që mbajti mbrëmë me ministrat e brendshëm të Maqedonisë, Serbisë, Malit të Zi dhe një përfaqësuesi për sigurinë dhe drejtësinë në administratën e UNMIK-ut në Kosovë.

 

 

Beogradi krijon struktura të reja paralele serbe në Kosovë

 

Beograd, 14 qershor - Nënkryetari i qeverisë serbe Nebojsha Çoviq ka deklaruar të premtën se serbët që ndodhen në Kosovë dhe ata që janë zhvendosur në Serbi dhe në Mal të Zi, bashkë me qeveritë e bashkësisë së shteteve do të jenë të lidhur nëpërmjet koordinatorëve rajonalë, komunalë dhe lokalë.

Çoviq ka biseduar, siç thuhet, me "përfaqësuesit e rretheve të Kosovës, Pejës dhe Prizrenit", krijesa dikur këto të regjimit të Milloshevqit në Kosovë dhe u ka dhënë hollësitë e modelit të funksionimit të rrjetit të ashtuquajturës "bashkësi nacionale serbe në Kosovë".

Çoviq këta "koordinatorë" i ka quajtur "institucione reale të organizimit dhe vetorganizimit të bashkësisë serbe", dhe sipas tij kjo mundësohet edhe në bazë të rezolutës 1244 të KS dhe Kornizës Kushtetuese të Kosovës.
E gjithë kjo tregon se Beogradi jo që nuk pezullon strukturat paralele serbe në Kosovë, por ato i nxit dhe i mbështet.

 

 

Pauell ka hedhur poshtë idenë për dërgimin e forcave paqeruajtëse në Lindjen e Mesme

 

Uashington, 14 qershor - Sekretari amerikan i Shtetit Kolin Pauell ka hedhur poshtë idenë për dërgimin e forcave paqeruajtëse në Lindjen e Mesme për të ndalë dhunën ndërmjet izraelitëve dhe palestinezëve.

Propozimi e ka paraqitur sekretari i përgjithshëm i OKB-së Kofi Anan.

Pauell ka theksuar se më e rëndësishme është që të gjitha palët të fillojnë të përmbushin obligimet në pajtim me planin paqësore të hartuar nën patronazhin e Shteteve të Bashkuara, i njohur si harta e rrugës së paqes.

 

 

Edhe sot për të katërtën ditë me radhë kanë vazhduar protestat në Teheran

 

Teheran, 14 qershor – Forcat e sigurimit dhe përkrahësit e vijës së fortë të udhëheqjes konservative të Iranit janë përleshur me një turmë ta madhe demonstruesish në kryeqytetin iranian, Tëheran, ku kanë proteshtuar edhe sot (e shtunë) për të katërtën ditë me radhë, kundër qeverisjes së klerikëve, njofton BBCWorld. Për shpërndarjen e protestuesve janë përdorur gas lotsjellës, shkopinj dhe dorëza hekuri.

 

Policia dhe ithtarët e tyre kanë nxjerrë njerëzit nga makinat dhe i kanë rrahur. Janë dëgjuar edhe të shtëna nga armë zjarri. Lideri iranian Hamnei ua ka tërhequr vërejtjen demonstruesve se pushteti nuk do të tregojë mëshirë nëse vazhdojnë protestat e tyre.

 

 

Izraeli ka vrarë sot një anëtar të Hamasit dhe ka plagosur edhe rreth 30 palestinezë të tjerë

 

Gaza, 14 qershor – Izraeli ka vrarë sot (e shtunë) një anëtar të grupit militant islamik Hamas dhe ka plagosur edhe rreth 30 palestinezë të tjerë në dy sulme raketore nga dy helikopterë në qytetin Gaza, njofton BBCWorld.

 

Në sulmin e parë, kanë thënë dëshmitarët, predha e ka goditur veturën dhe ka vrarë 26-vjeçarin Fuad al-Lidavi. Burimet ushtarke izraelite kanë thënë se në veturën e Hamasit ka pasur raketa për sulme në Izrael.

 

 

Marina e Sri Lankës e ka fundosur një anije Tigrave Tamilë dhe drohet se 12 pjesëtarë kanë humbur jetën

 

Kolombo, 14 qershor – Marina e Sri Lankës e ka fundosur sot në orët e hershme të mëngjesit (e shtunë) një anije të dyshimtë të kryengritësve Tigrat Tamilë dhe siç kanë thënë vëzhguesit e armëpushimit drohet se të 12 pjesëtarët e bordit kanë humbur jetën, njofton Rojter.

 

Njoftohet se ka qenë një shpërthim në anije dhe pastaj ajo është fundosur. Ky aksident mund të jetë një grusht për procesin e paqes së brishtë të ujëdhesës.

 

 

Sulm i ri izraelit në Rripin e Gazës

 

Gaza, 14 qershor - Helikopterë izraelitë kanë lansuar sulme të reja me raketa në Rripin e Gazës. Sipas dëshmitarëve palestinezë, të paktën dy raketa janë shkrepur në sulmin e fundit.

Një burim ushtarak izraelit e përshkroi shënjestrën si një depo të armëve, por palestinezët njoftojnë se ajo ishte shtëpia e një anëtari të dyshuar të Hamasit.

Nuk kishte njoftime për pasoja.

Më heret një anëtar i Hamasit u vra dhe të paktën tridhjetë persona të tjerë u plagosën pas një sulmi të helikopterëve izraelitë mbi një makinë në Rripin e Gazës.

Sulmi me raketa mbi makinën e një anëtari të Hamasit ishte i gjashti me rradhë brenda javës ndaj shënjestrave palestineze nga forcat izraelite.

Copyright©2000-2003 Trepca.net - Të gjitha të  drejtat e rezervuara.