Lajme

E premte, 13 qershor 2003

Përmbajtja:

• Shtajner sot shkon në Beograd

• Një analist i BBC-së thotë se pas disfatës që e pësoi nga NATO, Beogradi humbi kontrollin mbi Kosovën

• Pas verifikimit KFOR-i thotë se në Mirofc dhe Metehi nuk ka pasur shkelje të kufirit nga ana e serbëve

• Alush Gashi i bëri thirrje komunitetit ndërkombëtar të mbështesë përpjekjet e Kosovës për pavarësi

• Belgjika pas katër muajve përgjysmon numrin e trupave të saj në Kosovë

• Zyra amerikane: Katër vjet nga ardhja e KFOR-it në Kosovë

• Departamenti amerikan i Shtetit konstaton se trafiku njerëzor është problem serioz në Kosovë

• Kooptohen katër anëtarë të rinj në Kryesinë e Degës së LDK-së në Gjilan

• Autoritetet e Beogradit ua dorëzuan UNMIK-ut trupat e 22 shqiptarëve të vrarë gjatë vitit 1999

• Në Pishinën e Gërmisë në Prishtinë ka humbur jetën Armend Iliaz Gashi nga Kieva e Malishevës

• Policia arrestoi një polic ndërkombëtar dhe katër persona të tjerë nga Kosova dhe Mali i Zi

• Valltaret llapjane marrin pjesë në një festival ndërkombëtar në Austri

• Maroviq: Kosova dhe Mlladiqi, etapa të pakapërcyeshme në rrugën e Beogradit në integrimet evropiane

• Gjatë trazirave në Beograd janë lënduar 50 policë

• Është arrestuar Veselin Shlivançanin, i akuzuar për krime lufte nga Haga

• Raporti i Departamentit të Shtetit mbi trafikun njerëzor në Shqipëri dhe në Maqedoni

• K. Galak ka shprehur bindjen shqiptarët dhe serbët javën e ardhshme në Selanik do t'ia zgjasin dorën njëri-tjetrit

• Policia maqedonase vrau dje një shqiptar në një lagje të Shkupit

• Sipas ministrit të brendshëm malazez ka paralajmërime të disa organizatave nga Kosova për "akte terroriste"

• Çoviq u ka bërë thirrje pjesëmarrësve të samitit të Selanikut ta bojkotojnë Shtajnerin

• Anan: Paqeruajtësit e KB-së të dërgohen në Lindjen e Mesme për të ndalur ciklin e dhunës

• Forcat amerikane kanë vrarë sot 27 militantë irakianë

• Dje në moshën 87 vjeçare ndërroi jetë aktori i njohur Gregori Pek

• Gjashtë ushtarë afganë janë plagosur në një sulm me granatë në jug të vendit

• Trupat amerikane kanë vrarë të pakten 70 veta në një kamp trajnimi të "terroristëve" në Irak

• Pauell u bën thirrje udhëheqësve të Lindjes së Mesme për masa kundër grupeve ekstremiste palestineze

• Hamasi fajësohet për dhunën në Lindjen e Mesme

Shtajner sot shkon në Beograd

 

Beograd, 13 qershor 2003 - Kryeadministratori i Kosovës Mihael Shtajner shkon sot në një vizitë pune në Beograd. Sipas burimeve serbe ai do të takohet me kryaeministrin serb Zoran Zhivkoviq, zëvendëskryeministrin Nebojsha Çoviq.

 

Po këto burime theksojnë se në këto takime ata do të bisedojnë rreth situatës më të re në Kosovë si dhe për kërkesën e Beogradit që të ndërpritet bartja e kompetencave nga UNMIK-u tek institucionet e Kosovës.

 

Asambleja e Prishtinës kundërshton udhëzimet e Zyrës Qendrore të Regjistrimit Civil

Prishtinë, 13 qershor 2003 - Në mbledhjen e sotme të Asamblesë Komunale të Prishtinës, këshilltarët e saj aprovuan një deklaratë, e cila i kundërshton udhëzimet e Zyrës Qendrore të Regjistrimit Civil, të lëshuar në maj të këtij viti dhe e cila ka të bëjë lidhur me kontrollin e dëshmisë së dokumenteve të paraqitura nga aplikantët në kohën e regjistrimit si banorë të përhershëm.

Në deklaratën e aprovuar sot nga Asambleja Komunale e Prishtinës, e cila është nënshkruar nga tri grupet më të mëdha parlamentare thuhet: "Vendimi i Zyrës Qendrore të Regjistrimit Civil, i cili ka filluar të zbatohet që nga data 9 qershor, 2003 kundërshtohet nga Asambleja Komunale e Prishtinës, pasi ky vendim është diskriminues për pjesën më të madhe të qytetarëve të Prishtinës.

Nëse vazhdon të zbatohet ky Vendim, atëherë do të krijohen konflikte midis qytetarëve dhe punëtorëve që punojnë në Shërbimin Civil të Kuvendit Komunal të Prishtinës, të cilët janë viktimë e një rregullative të pamenduar dhe të pabazuar në realitetin e ri, i cili është krijuar në Kosovë.

Kuvendi Komunal i Prishtinës insiston që autoritetet serbe ta kthejnë tërë dokumentacionin e rrëmbyer të Kuvendit Komunal të Prishtinës, thuhet në fund të Deklaratës së aprovuar sot nga këshilltarët e Asamblesë Komunale të Prishtinës dhe të nënshrkuar nga kryetarët e tri grupeve parlamentare të Asamblesë Komunale të Prishtinës".

  

Një analist i BBC-së thotë se pas disfatës që e pësoi nga NATO, Beogradi humbi kontrollin mbi Kosovën

 

Londër, 13 qershor 2003 - Pas disfatës që e pësoi nga NATO, Beogradi humbi kontrollin mbi Kosovën. Sipas Rezolutës 1244 të KS të OKB-së Kosova administrohet nga UNMIK-u deri në zgjidhjen afatgjatë të statusit politik. Por, një zgjidhje e tillë duhet të jetë shumë larg, thotë analisti i BBC-së Gabriel Partosh.

 

Arsye kryesore për këtë janë qëndrimet diametralisht të kundërta të shqiptarëve, të cilët duan një pavarësi të menjëhershme për atë që e konsiderojnë si republikë të tyre. Ndërkohë që serbët këmbëngulin që Kosova të mos fitojë më shumë se një shkallë autonomie.

 

Sipas këtij analisti, bashkësia ndërkombëtare nuk është e gatshme që të merret me statusin e Kosovës derisa nuk parashikon një marrëveshje të pranueshme për të dyja palët. Prandaj deri tash ka këmbëngulur në atë që e quan fillimisht standardet e pastaj statusi përfundimtar i Kosovës.

 

Nën administrimin e UNMIK-ut, siç thotë analisti Gabriel Partosh ka pasura ndryshime pozitive në shumë fusha. Madje edhe vdekja e trefishtë e një familje serbe javën e kaluar, një krim që duket të jetë me prapavijë etnike paradoksalisht thekson përmirësimin e situatës së sigurisë sepse ai ka qenë krimi më i rëndë në dy vitet e fundit, thuhet mes tjerash në këtë analizë të BBC-së.

 

 

Pas verifikimit KFOR-i thotë se në Mirofc dhe Metehi nuk ka pasur shkelje të kufirit nga ana e serbëve

 

Podujevë, 13 qershor 2003 – Në konferencën e sotme për gazetarë të KFOR-it dhe policisë së UNMIK-ut në Podujevë u fol për disa incidente që po raportohen kohët e fundit lidhur me shkeljen e kufirit nga ana e serbëve për çka autoritetet e KFOR-it thanë se nuk është verifikuar asgjë.

"Çdo problem që ndodh në kufi nga të dy anët ne e verifikojmë dhe nuk bëjmë ndarje me etniteteve dhe popujve", tha zëdhënësi i Batalionit të tretë çeko-sllovak mbitogeri Mihail Prejzek. Ai pohoi se pas verifikimit të KFOR-it dhe të policisë së UNMIK-ut u vërtetua edhe nga banorët vendas se ajo informatë ishte një intrigë.

 

Kjo sipas KFOR-it ka ndodhur edhe në fshatin Metehi ku dje është raportuar nga vendësit se serbët kanë hyrë dhe kanë shqetësuar barinjtë vendas. "KFOR-i nuk mund të jetë gjithëherë dhe çdokund gjatë vijës kufitare, por ne përpiqemi t'i kryejmë detyrat tona në bazë të Rezolutës 1244 të KB-së", tha Prejzek.

 

Ndërkaq, policia rajonale e UNMIK-ut ka raportuar sot se një shqiptar e ka njoftuar policinë se 7 persona të armatosur me uniforma kanë vjedhur 15 kafshë shtëpiake, nga të cilat 9 janë kthyer më vonë. Lidhur me këtë rast u deklarua edhe komandanti i policisë së UNMIK-ut në Podujevë Uallas Skullion (Ëallace Scullion) i cili tha se ata marrin informata nga polica e Prishtinës dhe i bartin te KFOR-i çek i cili është përgjegjës për kufirin.

 

"Kohët e fundit ka pasur një ritje të ndieshme të raporteve nga vendësit për raste të tilla po rnuk dua të spekuloj", tha për QIK-in Skullion. Ai apeloi te mediat që të shpërndajnë mesazhin për kufizimin e shpejtësisë në trafik meqë vetëm këtë muaj kishte 9 aksidente trafiku dhe një grua të vdekur. Skullion njoftoi edhe për 5 vjedhje me thyerje, 6 armë ilegale të konfiskuara, 2 sulme, etj.

Zv. komandanti i KFOR-it majori Vojteh Mojzes njoftoi për 2 aksione kërkimi me ç'rast në fshatin Segash janë zbuluar një automatik, revole, thika, municion dhe fotografi e material të UÇK-së si dhe operacionin tjetër në Podujevë ku është konfiskuar një revole, një revole me gaz e municion.

 

"Prerja ilegale e drunjve po vazhdon, është gjetur një UXO nga Lufta e Dytë Botërore dhe në fshatrat Bradash e Bajçinë janë ndaluar 2 ngasës veturash pa dokumente", njoftoi Mojzes.

Përkundër këtyre incidenteve KFOR-i dhe polica e UNMIK-ut konstatuan se gjendja e sigurisë në regjionin e Podujevës është e qetë.

 

 

Alush Gashi i bëri thirrje komunitetit ndërkombëtar të mbështesë përpjekjet e Kosovës për pavarësi

 

Londër, 13 qershor 2003 - Deputeti i Kuvendit të Kosovës nga LDK-ja, Alush Gashi, tha në një intervistë për BBC-në se katër vitet e fundit në Kosovë demonstrojnë më së miri drejtësinë e ndërhyrjes së Shteteve të Bashkuara dhe aleatëve të saj të NATO-s për ta ndërprerë gjenocidin në Kosovë dhe për të krijuar një perspektivë për qytetarët e Kosovës.

Alush Gashi i bëri thirrje komunitetit ndërkombëtar të mbështesë përpjekjet e Kosovës për pavarësi.
"Bashkësia ndërkombëtare duhet të jetë më shumë e guximshme në kuptimin e një realiteti se Kosova është në rrugën e pashmangshme të pavarësisë dhe se Kosovës i duhen dhënë ganaca më të fuqishme që kjo ditë nuk është larg," tha Gashi.

"Me një mbështetje të tillë ndërkombëtare forcat politike dhe qytetare të Kosovës do të kishin një energji shtesë për afrimin më të fuqishëm ndaj pakicave për të cilat ne kemi rezultate shumë të mira," theksoi Alush Gashi.

 

 

Belgjika pas katër muajve përgjysmon numrin e trupave të saj në Kosovë

 

Nju Jork, 13 qershor 2003 - Radio e Kombeve të Bashkuara, bëri të ditur sot se Belgjika do të përgjysmojë kontigjentin e trupave të saja paqeruajtëse në Kosovë, në kuadrin e trupave të NATO-s. Duke humbur kështu dhe komandën e batalionit Belukroko, theksuan burime ushtarake nga Kosova.

 

Forcat paqeruajtëse KFOR, siç dihet, hyn në Kosovë pikërishtë katër vjet më parë - 1999. Trupat paqeruajtëse belge do të largohen nga Kosova pas katër muajsh dhe nga 420 trupa që ka kontigjenti aktual, do të mbeten vetëm 250 trupa ushtarake.

Batalioni Belukroko, në të cilin bënte pjesë kontigjeti i paqeruajtëseve belgë është i stacionuar në veri të Kosovës, në Mitrovicë dhe tani do të kontrollohet nga Franca pasi Belgjika humbi kontrollin e saj.

 

Kështu që forcat paqeruajtëse belege të mbetura (250) do të operojnë në kuadrin e forcave franceze, theksuan burime ushtarake nga Kosova të cilave iu referua dhe Radioja e Kombeve të Bashkuara.

 

 

Zyra amerikane: Katër vjet nga ardhja e KFOR-it në Kosovë

 

Prishtinë, 13 qershor 2003 - Më 12 qershor, bashkësia ndërkombëtare dhe qytetarët e Kosovës shënojnë katërvjetorin e ditës kur për herë të parë trupat e NATO-s hynë në Kosovë dhe ndihmuan që ti ipet fund armiqësive dhe trazirave që shqetësuan rajonin me vite.

Gjatë asaj kohe, 101 ushtarë të KFOR-it dhe 26 nënpunës të UNMIK-ut dhanë jetërat e tyre në Kosovë, duke u përpjekur t'i ndihmojnë rajonit. Rasti më i fundit ishte ai i dy pilotëve amerikanë, oficerëve Andrew D. Robbins dhe Devon E. DeSouza, që humbën jetën në afërsi të Gjilanit duke ndihmuar që Kosova të jetë një vend i qetë dhe i sigurtë, - thuhet në kumtesë të Zyrës amerikane në katërvjetorin e hyrjes së trupave të KFOR-it në Kosovë.

Gjatë katër viteve të kaluara, bashkësia ndërkombëtare ndihmoi Kosovën të ecë përpara në shumë drejtime pozitive. Ne ndihmuam qytetarët që u larguan nga rajoni për tu kthyer në shtëpitë e tyre dhe ne vazhdojmë të punojmë fuqishëm në kthimin e të gjithë Kosovarëve.

 

Ne ndërtuam themelet për zhvillim ekonomik dhe krijuam një kornizë për policinë dhe sisteme gjygjësore ashtu që Kosova ti përmbahet besnikërisht sundimit të ligjit. Ne vazhdojmë të bëjmë përmirësime në këto fusha.

 

Organizuam tri zgjedhje të suksesshme lokale dhe ne vazhdojmë me përpjekjet tona të vendosim të gjithë mekanizmat që do ta bëjnë Kosovën një shoqëri funksionale demokratike.

Ne bëmë të gjitha këto për vetëm katër vite. Por nuk i bëmë këto vetë.

Kosovarët e të gjitha përkatësive etnike gjithashtu kanë bër shumë në këto katër vite prej kur trupat e NATO-s ndihmuan të përfundoj konflikti. Ju jeni kthyer në atdheun tuaj dhe rindërtuat shtëpitë dhe jetët tuaja. Ju keni krijuar dhe implementuar një shërbim policor multietnik i cili vazhdon t'i zgjerojë detyrat dhe profesionalizmin e vetë.

 

Në numër të madh keni participuar në zgjedhjet e lira dhe bët që zëri juaj të dëgjohet përmes kutive të votimit. Keni krijuar një sistem politik multipartiak ku idetë e ndryshme, zgjidhjet dhe vizionet për të ardhmen do të mund të bisedohen – mu ashtu si liderët e zgjedhur nga Evropa dhe SHBA-të bëjnë në parlamentet e tyre dhe në Kongres.

 

Ju, qytetarë të Kosovës, keni bër shumë për të lëvizur rajonin përpara në këto katër vite të fundit.

Shtetet e Bashkuara ishin prezente në Kosovë që nga hapja e Zyrës për Shërbime Informative të cilën Shtetet e Bashkuara e hapën këtu më 1996.

 

Ne ishim dëshmitarë të sakrificës, ne ndihmuam të lehtësohen vuajtjet dhe ne punuam me të gjithë qytetarët që dëshironin të shohin përfundimin e luftimeve dhe fillimin e pajtimit. SHBA-të do të vazhdojnë të punojnë me Kosovarët për ta çuar rajonin kah një e ardhme më e ndritshme.

Duke parë energjinë dhe entuziazmin e qytetarëve të Kosovës gjatë këtyre katër viteve, ne jemi të sigurtë se do të shohim këtë të ardhme më të ndritshme, thuhet në fund të kësaj kumetse të Zyrës amerikane në Prishtinë.

 

 

Departamenti amerikan i Shtetit konstaton se trafiku njerëzor është problem serioz në Kosovë

 

Uashington, 13 qershor 2003 - Në raportin e fundit të Departamentit amerikan të Shtetit, ku bëhet fjalë për trafikun njerëzor në Shqipëri e Maqedoni, një kaptinë i kushtohet edhe Kosovës. Në këtë raport theksohet se trafiku njerëzor është problem serioz edhe në Kosovë dhe UNMIK-u është i ndërgjegjshëm për këtë gjendje.

 

Administrata e OKB-së, thuhet në raportin e Departamentit të Shtetit, bën përpjekje kundër trafikut, ngase Kosova është destinacion për viktimat e trafikut të grave dhe vajzave kryesisht nga Moldavia, Rumania, Hungaria dhe Bullgaria.

I dërguari i posaçëm i sekretarit të përgjithshëm i OKB-së ka nxjerrë ligje dhe një njësi e specializuar e policisë për luftën kundër trafikimit të njerëzve e zbaton kuadrin ligjor në këtë aspekt, thuhet ndër të tjera në këtë raport të Departamentit të Shatetit.

 

 

Kooptohen katër anëtarë të rinj në Kryesinë e Degës së LDK-së në Gjilan

 

Gjilan, 13 qershor 2003 - Në një mbledhje të jashtëzakonshme Kryesia e Degës së LDK-së në Gjilan kooptoi katër anëtarë të rinj - Abdyl Kadriun, Fehmi Mahmutin, Musa Qerimni dhe Shefqet Aliun.

Duke i konsideruar dorëheqjet e anëtarëve të Kryesisë si akte personale, duke mos dashur të merret me kualifikimet e pabaza e të stërpërsëritura të secilit dorëheqës, Kryesia e Deges është këmbëngulëse në zbatimin e Programit, Statutit dhe vendimeve të LDK-së.

Në këtë drejtim, Kryesia e Degës e ka mbështetjen edhe të nëndegëve dhe aktiveve dhe të shumices dërmuese të anëtarësisë por edhe të strukturave të saj në organet më të larta partiake.

Duke i injoruar akuzat boshe, Dega e LDK së Gjilanit është e përcaktuar për punë dhe veprime konkrete në shërbim të asaj për të cilën është mandatuar, thuhet në një kumetsë të Degës së LDK-së në Gjilan.

 

 

Autoritetet e Beogradit ua dorëzuan UNMIK-ut trupat e 22 shqiptarëve të vrarë gjatë vitit 1999

 

Prishtinë, 13 qershor 2003 - Autoritetet e Beogradit u kanë dorëzuar dje pasdite autoriteteve të UNMIK-ut trupat e 22 shqiptarëve të vrarë gjatë konfliktit të vitit 1999. Trupat ishin zhvarrosur nga një varrezë masive në Petrovosello.

 

Shefi i Zyrës së UNMIK-ut për persona të zhdukur Hoze Pablo Baraibar u tha gazetarëve në vendkalimin kufitar të Merdarit se kufomat janë nga rajoni i Drenicës, konkretisht nga komuna e Skënderajt dhe e Gllogocit dhe se ishin vrarë gjatë masakrës së Izbicës në vitin 1999.

 

Z. Baraibar shprehu pakënaqësinë për zvarritjen në transferimin e kufomave të zbuluara dhe tha se nga rreth 1000 trupa të zhvarrosur deri më tash janë kthyer në Kosovë vetëm 183.

 

Kjo është 6 për qind e atyre kufomave që gjenden në Serbi, tha ai dhe shtoi se bashkë me këto kufoma janë sjellë edhe të gjitha rrobat, të cilat janë gjetur në Petrovosello. Sipas tij, së shpejti do të ketë edhe një ekspozitë të rrobave në mënyrë që të bëhet identifikimi.

Zyra e UNMIK-ut për persona të zhdukur ka të dhëna për 3961 persona që rezultojnë të zhdukur, nga të cilët 3150 janë shqiptarë, ndërkaq 853 joshqiptarë.

 

 

Në Pishinën e Gërmisë në Prishtinë ka humbur jetën Armend Iliaz Gashi nga Kieva e Malishevës

 

Prishtinë, 13 qershor 2003 - Dje pasdite rreth orës 16.15 në Pishinën e Gërmisë së Prishtinës ka humbur jetën Armend Iliaz Gashi, 26-vjeçar nga Kieva e komunës së Malishevës me profesion ekonomist.

 

Këtë lajm e konfirmoi Ismail Kosumi menaxher, përkatësisht përgjegjës i Pishinës së Gërmisë. I riu Armend Gashi rreth orës 14.00 është futur në pishinën e Gërmisë në thellësi rreth afro katër metrave, mirëpo vdekja e tij është hetuar rreth orës 16.15. Të gjitha ekipet e policisë dhe të hetuesisë kanë dalë në vendin e ngjarjes.

 

 

Policia arrestoi një polic ndërkombëtar dhe katër persona të tjerë nga Kosova dhe Mali i Zi

 

Pejë, 13 qershor 2003 - Gjatë bastisjes së një lokali në qytetin e Pejës është arrestuar një oficer i policisë së OKB-së nga Pakistani bashkë me katër persona të tjerë nga Kosova dhe Mali i Zi, si të dyshuar për trafikimin e fëmijëve.

 

Policia beson se këta pesë persona i takojnë një rrjeti që mendohet se është më i madh. Zyrtarët e OKB-së thanë se pas bastisjes disa fëmijë nën moshën 15 vjeç mbaheshin të mbyllur dhe gjatë bastisjes ata janë liruar dhe janë vendosur në një vend të sigurtë. Një zëdhënës i OKB-së në Kosovë tha se arrestimet janë pjesë e një hetimi që po vazhdon.

Zëdhënsi i policisë së UNMIK-ut në Prishtinë, Derek Çapell, konfirmoi arrestimin e pesë personave dhe njëri prej tyre është polic ndërkombëtar. Zyrtarët e policisë po ashtu kanë theksuar se operacioni i bastisjes së një lokali në Pejë është bërë në kuadër të hetimeve për trafikimin e të miturve.

 

Sipas mediave lokale, kjo nuk është hera e parë që policë ndërkombëtarë të përfshihen në veprime të paligjshme dhe është konfirmuar se së paku 9 policë të OKB-së janë përfshirë në prostitucion në Kosovë.

 

Në të gjitha rastet ata janë përjashtuar nga detyra e tyre dhe janë kthyer andej kah kanë ardhur pa u ballafaquar me organet e drejtësisë.

 

 

Valltaret llapjane marrin pjesë në një festival ndërkombëtar në Austri

 

Podujevë, 13 qershor 2003 – Një grup valltaresh dhe drejtori i Qendrës së Kulturës i Podujevës Nexhmi Balaj udhëtuan sot në Insbruk të Austrisë ku do të marrin pjesë në festivalin ndërkombëtar të quajtur "Magjia kolektive për paqe" ku do ta prezantojnë Kosovën. Grupi i valltareve do të paraqitet me vallen e paqes, me koreografi të z.Balaj.

 

Pos valles grupi nga Kosova do ta përcjellë edhe një mesazh paqeje në shqip, gjermanisht dhe anglisht. Me këtë rats do të ekspozohen edhe rroba kombëtare, instrumente autoktone popullore shqiptare me çka do ta identifikohet kultura e pasur shqiptare në Austri.

Do theksuar se pjesëmarrja e grupit të valleve nga Podujeva në Austri është ndihmuar nga ministri në Qeverinë e Tirolit, Peter Logar dhe zonja Melita Duma.

 

 

Maroviq: Kosova dhe Mlladiqi, etapa të pakapërcyeshme në rrugën e Beogradit në integrimet evropiane

 

Beograd, 13 qershor 2003 - Sipas presidentit të Unionit Serbi - Mali i Zi, Svetozar Maroviq, zgjidhja e problemit të Kosovës dhe arrestimi i Ratko Mlladiqit janë etapa të pakapërcyeshme në rrugën e Beogradit në integrimet evropiane.

Maroviq në një intervistë me Frans Press-in është shprehur për fillimin sa më shpejt të dialogut për të ardhmen e Kosovës, në të cilin sipas tij, përveç Beogradit dhe Prishtinës do të merrnin pjesë edhe përfaqësuesit e bashkësisë ndërkombëtare.

 

Gjatë trazirave në Beograd janë lënduar 50 policë

Beograd, 13 qershor 2003 - Gjatë përleshjeve gjatë natës së kaluar në Beograd janë lënduar rreth 50 policë dhe shumë më pak civilë, ka deklaruar ministri serb i policisë Dushan Mihajloviq, i cili paralajmëroi ndjekje penale kundër pjesëmarrësve në këto trazira.

Këto përleshje u shkaktuan gjatë trazirave me rastin e arrestimit të ish-oficerit të armatës jugosllave Veselin Shlivançanin, i akuzur për krime lufte nga Tribunali i Hagës.

Një mjek ka thënë se nga Qendra emergjente 8 policë të lënduar janë dërguar në Akademinë mjekësore ushtarake në Beograd, ndërkaq sipas tij nga civilët vetëm dy vetë kanë marrë lëndime të rënda.

  

Është arrestuar Veselin Shlivançanin, i akuzuar për krime lufte nga Haga

 

Beograd, 13 qershor 2003 – Komandosët e policisë serbe kanë hyrë sot heret në mëngjes (e premte) furishëm në një apartament në Beograd dhe e kanë arrestuar të dyshimtin e lartë për krime lufte dhe me këtë rast policia u ndesh me përleshje të ashpra me mbështetësit e vijës së fortë nacionaliste në rrugë, njofton Rojter.

 

Një burim i lartë i Ministrisë së Brendshme serb ka konfirmuar se ish-koloneli i Armatës jugosllave, Veselin Shlivançanin është arrestuar dhe është dërguar në burg, duke iu përgjigjur kështu kërkesës amerikane për ta kapur atë nëse Serbia dëshiron që Uashingtoni t'i ofrojë mëtej ndihma.

Shlivançanin është akuzuar më 1995 nga Tribunali i Hagës për krime lufte për pjesëmarrje në masakrën e 200 kroatëve dhe civilëve të tjerë joserbë pasi trupat jugosllave e kanë pushtuan portin e Danubit në Vukovar më 1991.

 

 

Raporti i Departamentit të Shtetit mbi trafikun njerëzor në Shqipëri dhe në Maqedoni

 

Uashington, 13 qershor 2003 – Në botë çdo vit trafikohen 800 mijë deri në 900 mijë njerëz. Në raportin që Departamenti i Shtetit nxori mbi trafikun njerëzor, thuhet se ky lloj trafiku minon autoritetin e qeverive, lidhet me krime të tjera dhe është në thelb një formë terrorizmi. Në këtë raport përfshihen edhe komente mbi gjendjen në Shqipëri dhe Maqedoni në këtë drejtim.

Megjithëse në raport flitet për përpjekje të Shqipërisë në luftën kundër trafikut, mesa duket ato nuk kanë qenë të mjaftueshme për ta radhitur Shqipërinë mes vendeve që i plotësojnë standardet minimale për eliminimin e trafikut njerëzor.

Në një sistem me tre nivele, ku në të parin bëjnë pjesë vendet që i plotësojnë standardet minimale në luftën kundër trafikut dhe në të tretin ata që nuk i plotësojnë dhe që nuk po bëjnë përpjekje, ashtu si edhe vitin e kaluar Shqipëria bën pjesë në nivelin e dytë, të atyre vendeve që nuk i plotësojnë standardet minimale për eliminimin e trafikut, por që po bëjnë përpjekje të konsiderueshme.

Në pjesën e raportit për Shqipërinë thuhet se ajo shërben si vend burimi dhe tranziti për trafikimin e grave dhe fëmijëve për shfrytëzim seksual dhe për të lypur. Viktimat femra, thuhet në raport çohen në Itali, Greqi dhe vende të tjera të Bashkimit Evropian, si Belgjika, Franca, Britania dhe Hollanda.

 

Femrat që trafikohen përmes Shqipërisë kryesisht vijnë nga Bullgaria dhe Ukraina. Ndërsa fëmijët sipas njoftimeve trafikohen nga Shqipëria për në Itali dhe Greqi për të lypur në rrugë.

Ndërkaq në raportin vjetor të Departamentit amerikan të Shtetit për Maqedoninë thuhet se ky vend është shtet për kalimin por dhe destinacion për gra e fëmijë të trafikuar për prostitucion nga ish Bashkimi Sovjetik dhe Evropa Lindore, në veçanti nga Ukraina, Moldavia, Rumania dhe Bullgaria. Disa viktima mbeten në Maqedoni derisa të tjerët trafikohen në Shqipëri, Kosovë ose Itali, thuhet në raport.

 

Qeveria është treguar e efektshme në zbatimin e masave ligjore në zonat e banuara nga shqiptarët, të cilat nuk ishin nën kontroll të qeverisë gjatë konfliktit në vitin 2001, dhe në pjesët ku mbizotëronin aktivitetet e trafikut, thuhet më tej në raport.

 

Raporti permend shqetësimet e shtypit dhe opinionit publik që vënë në dyshim integritetin e gjykatësve për shkak të përqindjes së ulët të dënimeve.

Ambasadori amerikan në Shkup Batler thotë se në disa raste gjyqësia maqedonase është treguar shumë e butë me trafikantët.

 

 

K. Galak ka shprehur bindjen shqiptarët dhe serbët javën e ardhshme në Selanik do t'ia zgjasin dorën njëri-tjetrit

 

Bruksel, 13 qershor 2003 - Bashkimi Evropian thotë se pavarësisht nga deklaratat e fundit të politikanëve serbë kontakti i parë ndërmjet përfaqësuesve serbë dhe atyre shqiptarë do të ndodhë në Selanik.

Prononcimet e fundit të politikanëve serbë se ndoshta do të refuzojnë kontaktin e parë me delegacionin e Kosovës në Selanik, mbase nuk paraqesin qëndrimin final të palës serbe, pohuan zyrtarët e BE-së në Bruksel, duke thënë se megjithatë ka ende kohë për ndryshim të vendimeve.

Zëdhënësja e Havier Solanës, Kristina Galak, deklaroi se qëndrimet e BE-së dhe porositë që madje edhe vetë Solana i përcolli javën e kaluar në rajon nuk kanë ndryshuar. "Qëllimi ynë është që vendet e Ballkanit t'i afrohen BE-së", ka deklaruar Galak.

Galak ka shprehur bindjen e saj se megjithatë shqiptarët dhe serbët javën e ardhshme në Selanik do t'ia zgjasin dorën njëri-tjetrit.

 

 

Policia maqedonase vrau dje një shqiptar në një lagje të Shkupit

 

Shkup, 13 qershor 2003 - Policia maqedonase vrau dje pasdite një shqiptar të identifikuar me emrin Nexhmedin D. në një lagje të Shkupit, gjatë tentimit për ta arrestuar.

 

Sipas autoriteteve maqedonase viktima nuk kishte pranuar të ndalej në urdhërin e policisë, por siç thuhej kishte tentuar të nxirrte revolen dhe t'i qëllojë policët dhe se ai sipas policisë kishte tre vjet që po kërkohej nga një gjykatë.

 

Si pasojë e kësaj vrasjeje popullata e fshatit Haraçinë prej nga ishte ky shqiptar i vrarë është revoltuar.

 

 

Sipas ministrit të brendshëm malazez ka paralajmërime të disa organizatave nga Kosova për "akte terroriste"

 

Podgoricë, 13 qershor 2003 - Ministri i brendshëm malazez Milan Filipoviq, ka deklaruar në një konferencë me gazetarë se ka paralajmërime të disa organizatave nga Kosova për akte terroriste në disa lokalitete të Malit të Zi.

 

Ai tha se disa organizata të cilat janë të njohura si destabilizuese në Kosovë, të cilat edhe atje organizojnë akte terroriste janë sipas të dhënave që posedon, duke përgatitur akte terroriste në pikat kufitare të Malit të Zi, kryesisht në trevat e banuara me shqiptarë.

 

Filipoviq tha se Ministria e Punëve të Brendshme edhepse nuk beson se do të realizohen këto paralajmërime, megjithatë ka shtuar masat e sigurisë në këtë vend, në veçanti në komunat e banuara me shqiptarë.

 

 

Çoviq u ka bërë thirrje pjesëmarrësve të samitit të Selanikut ta bojkotojnë Shtajnerin

 

Beograd, 13 qershor 2003 - Zëvendëskryeministri serb Nebojsha Çoviq u ka bërë thirrje pjesëmarrësve në Samitin e Selanikut ta bojkotojnë shefin e UNMIK-ut në Kosovë, Mihael Shtajner dhe në këtë mënyrë të tregojnë pakënaqësinë e tyre me politikën e tij në Kosovë.

 

 

Anan: Paqeruajtësit e KB-së të dërgohen në Lindjen e Mesme për të ndalur ciklin e dhunës

 

Nju Jork, 13 qershor 2003 – Paqeruajtësit e Kombeve të Bashkuara duhet të dërgohen në Lindjen e Mesme që të përpiqen të ndalin përshpejtimin e ciklit të dhunës atje, ka thënë sekretari i përgjithshëm i OKB-së, Kofi Anan, njofton BBCnews.

 

Ai gjithashtu ka thënë se forca prej 51 vëzhguesish amerikanë, që priten ta arrijnë javën e ardhshme “është vetëm fillimi”, por vetëm një forcë e armatosur “amortizuese” do të mund të ndalte përshkallëzimin e dhunës.

 

Në një intervistë në një gazetë izraelite, Anan gjithashtu ka nxitur Izraelin të kufizojë përgjigjet në sulmet palestineze “në masë proporcionale”, ndonëse e di se “kjo është shumë vështirë”.

 

 

Forcat amerikane kanë vrarë sot 27 militantë irakianë

 

Bagdad, 13 qershor 2003 – Forcat amerikane kanë vrarë sot (e premte) 27 irakianë, të cilët kanë sulmuar një patrullë tankesh në veri të Bagdadit, ka bërë të ditur një zëdhënës ushtarak, njofton Rojter. Irakianët kanë hapur zjarr antitank kundër patrullës në qytetin Balad.

 

Tanket ua kanë kthyer zjarrin dhe kështu kanë vrarë katër itrakianë. Automjetet e blinduara, të ndihmuara nga zjarri prej helikopteri, kanë ndjekur pjesën e mbetur të grupit dhe kështu kanë vrarë edhe 23 syresh, thuhet në deklaratën e zëdhënësit në fjalë.

 

 

Dje në moshën 87 vjeçare ndërroi jetë aktori i njohur Gregori Pek

 

Llos Anxhellos, 13 qershor 2003 - Ylli i filmit amerikan, aktori Gregori Pek, ndërroi jetë dje në shtëpinë e tij në Los Anxheles në moshën 87-vjeçare. Pek fitoi çmimin Oskar për filmin "Të vrasësh zogun shpotitës" dhe shumë mirënjohje tjera në fushën e filmit për rolet e tij të shkëlqyera.

 

 

Gjashtë ushtarë afganë janë plagosur në një sulm me granatë në jug të vendit

 

Kandahar, Afganistan, 13 qershor 2003 – Gjashtë ushtarë afganë janë plagosur në një sulm me granatë në jug të vendit, ka bërë të ditur sot (e premte) një zyrtar provincial, njofton Rojter. Sulmi ka ndodhur gjatë natës në rrethin Girishk të provincës Hlemand kur një grup luftëtarësh talibanë të dyshimtë kanë hedhur një granatë në dhomën ku flinin ushtarët.

 

"Tre nga të plagosurit janë transportuar në Pakistan për shërimin e plagëve të rënda dhe tre të tjerë po shërohen në spitalin vendor", ka thënë zyrtari i lartpërmendur. Është jashtë çdo dyshimi se luftëtarët talibanë e kanë kryer këtë sulm, ka shtuar ai.

 

 

Trupat amerikane kanë vrarë të pakten 70 veta në një kamp trajnimi të "terroristëve" në Irak

 

Bagdad, 13 qershor 2003 – Trupat amerikane kanë vrarë të pakten 70 veta në një kamp trajnimi të "terroristëve" në Irak, ka njoftuar zëdhënësi ushtarak amerikan në një prononcim të sotëm (e premte), njofton Rojter.

 

Ai ka thënë se një ushtar amerikan është plagosur gjatë operacionit, i cili është ende në vazhdim e sipër. Armata ka thënë se sulmi në kamp, që ndodhet 90 mila në veriperendim të Bagdadit, është pjesë e "përpjekjeve të vazhdueshme për çrrënjosjen e lojalistëve të partisë Baath, të grupeve paramilitare dhe elementëve të tjerë subversivë", por s'ka dhënë detaje të tjera për kampin.

 

 

Pauell u bën thirrje udhëheqësve të Lindjes së Mesme për masa kundër grupeve ekstremiste palestineze

 

Uashington, 13 qershor 2003 - Sekretari amerikan i Shtetit, Kolin Pauell, po u bën thirrje udhëheqësve të Lindjes së Mesme që të veprojnë kundër grupeve ekstremiste palestineze, që siç tha ai po përpiqen të bllokojnë procesin e paqes mes izraelitëve dhe palestinezëve.

Pauell foli dje në telefon me udhëheqësit e Izraelit, Jordanisë, Arabisë Saudite dhe Egjiptit dhe u kërkoi atyre të ngrenë zërin për të ndaluar transferimin e fondeve për grupet ekstremiste Hamas, Xhihadi Islamik dhe grupe të tjera, që i përshkroi si elemente të vendosur që të përdorin terrorin për të ndaluar procesin e paqes.

 

 

Hamasi fajësohet për dhunën në Lindjen e Mesme

 

Uashington, 13 qershor 2003 - Administrata e presidentit amerikan Xhorxh Bush ka kritikuar ashpër grupin militant palestinez, Hamas. Zëdhënësi i Shtëpisë së Bardhë, Ari Fleisher, tha se dhuna e vazhdueshme nuk ishte faj i Izraelit apo Autoritetit Palestinez, por i Hamasit.

Një zëdhënës i Hamasit, Ismail Abu Shanab, i tha BBC-së se grupi mund të kryente sulme të tjera brenda Izraelit për të parandaluar sulmet izraelite kundër palestinezëve.

Paralajmërimi u bë një ditë pasi Hamasi bëri një sulm vetëvrasës në Jeruzalem nga i cili vdiqën 16 vetë.

Copyright©2000-2003 Trepca.net - Të gjitha të  drejtat e rezervuara.