Lajme

E enjte, 12 qershor 2003

Përmbajtja:

• Me një ceremoni festive sot në Prishtinë u shënua 4-vjetori i hyrjes së trupave të NATO-s në Kosovë

• Edhe në Gjilan po zhvillohen aktivitete kushtuar katërvjetorit të hyrjes së trupave të NATO-s

• Riza Halimi falenderon Presidentin Rugova

• Çmimi "Beqir Musliu" i jipet Sabri Hamitit

• Gjykata e qarkut në Gjilan tre veta i ngarkon për veprime terroriste

• Persona të maskuar kanë vrarë Hasan Krasniqin në Vranoc të Pejës

• Kisinxher: Kosovën drejt pavarësisë po e çon evolucioni i pandalashëm

• AKM suspendoi drejtoreshën e përgjithshme të PTK-së

• PDK në Gjilan vendosi që të ngrijë marrëdhëniet me Kuvendin komunal për kohë të pacaktuar

• Forcat e KFOR-it në Kosovë do të organizojnë sot përvjetorin e katërt të hyrjes së trupave të NATO-s në Kosovë

• Forcat e KFOR-it do të përcjellin me autobusë banorët që kalojnë në pjesën veriore të Mitrovicës

• Në Prishtinë u hap panairi ndërkombëtar ekonomik

• Në finale të Kupës së Kosovës do luajnë Prishtina dhe KEK-u

• Autoritetet e Serbisë sot do të dorëzojnë kufomat e 22 shqiptarëve

• Më 18 qershor në Shkup takohen liderët e partive liberale të Ballkanit Perendimor

• Në kanalin e tretë të TV të Maqedonisë bëhen transmetimet e seancave parlamentare në gjuhën shqipe

• Korpusi i Paqes amerikane në Maqedoni do të zgjerojë veprimtarinë e vet

• BDI mori vendim për t'u bashkuar me Partinë Demokratike Kombëtare

• Policia maqedonase ka arrestuar dhjetëra persona nën dyshimin se kanë lidhje me shpërthimet e fundit

• Në Irak rrëzohet një helikopter amerikan

• "Të jetojmë në paqe - me dashuri dhe respekt të përhershëm ndaj njëri-tjetrit", ka thënë sot papa Gjon Pali i Dytë

• SARS-i së shpejti do të çrrënjoset në botë

• Hans Bliks akuzon SHBA-në për fushatë diskredituese ndaj tij

• Al-Kaida dyshohet si autore e sulmit në Kabul

• Mbi 20 të vrarë në dhunën e djeshme mes palestinezëve dhe izraelitëve

• Vazhdojnë protestat në Iran

• Gjatë një operacioni të madh në Irak, trupat amerikane kanë arrestuar rreth 400 veta

• Në pjesën indiane të Kashmirit janë vrarë tetë kryengritës

• Në Ulan Bator është zbuluar një varrezë masive të spastrimeve staliniste

• Të pakten dy civilë janë vrarë në luftimet e reja në Afganistan

• SHBA-të thonë se 15 vende s’kanë bërë fare përpjekje për të ndalë trafikimin e qenieve njerëzore

Me një ceremoni festive sot në Prishtinë u shënua 4-vjetori i hyrjes së trupave të NATO-s në Kosovë

 

Prishtinë, 12 qershor 2003 - Në katërvjetorin e hyrjes së trupave në NATO-s në Kosovë, sot në selinë e KFOR-it në Prishtinë u organizua një ceremoni festive, ku merrnin pjesë personalitetet më të larta të vendit dhe ato ndërkombëtare. Duke folur në këtë ceremoni, komandanti i KFOR-it Fabio Mini dhe shefi i UNMIK-ut Mihael Shtajner vlerësuan se misioni ushtarak dhe civil i bashkësisë ndërkombëtare në Kosovë ka qenë i suksesshëm gjatë katër viteve të kaluara, duke shtuar se ende mbetet shumë për t'u bërë në të ardhmen në mënyrë që Kosova të integrohet në BE - thanë Shtajner dhe Mini në këtë ceremoni.

   

Sipas gjeneral Minit, që nga fillimi mandati i forcave paqeruajtëse në bazë të rezolutës 1244 ishte krijimi i një mjedisi të sigurt për të gjithë qytetarët e Kosovës. "Ne e kemi bërë këtë në mënyrë që institucionet e Kosovës mund të punojnë në liri, ndërkaq njerëzit të jetojnë të lirë në shoqërinë multientike", tha Mini, duke shtuar se tani periudha e emergjencës ka kaluar.

 

"Shikuar nga aspekti i sigurisë tani nuk ekziston kërcënimi nga jashtë", tha Mini. "Tani po e fokusojmë aktivitetin tonë në luftë kundër terrorizmit, esktremizimit dhe krimit të organizuar, por ne gjithashtu duhet të fokusohemi për sigurinë e minoriteteve dhe kthimin e tyre", theksoi gjeneral Mini.

Ndërkaq Shtajner tha se misioni i NATO-s në vitin 1999 ishte fitorja kundër regjimit të Millosheviqit dhe sigurimi i kufijve të Kosovës. Por tani që misioni i bashkësisë ndërkombëtare ka ndryshuar, tha Shtajner, ky mision është fokusuar në kthimin e refugjatëve, në luftën kundër krimit të organizuar dhe në ndërtimin e shoqërisë multietnike.

 

Shtajner tha se KFOR-i dhe UNMIK-u duhet të angazhohen për integrimin e Kosovës në Evropë. "Ardhmëria e Kosovs është në Evropë", tha Shatjne rduke nënvizuar se "perspektiva e Evropës është e vetmja rrugë që të zgjidhen problemet e shumta në Kosovë".

Duke përshëndetur në këtë ceremoni festive, Presidenti i Kosovës Ibrahim Rugova çmoi lart punën e KFOR-it dhe progresin e arritur, duke theksuar se duhet bërë më shumë në procesin e pajtimit.
Presidenti Rugova bëri të ditur se do të ndajë medaljet për shërbim ushtarak dhe civil në Kosovë.
"Sot pas katër vjetëve mund të them se kemi një progres të madh.

 

Kemi një shoqëri të integruar për të gjithë qytetarët e Kosovës, për të gjitha grupet etnike. Kemi edhe përparim, por duhet të bëjmë më shumë në procesin e pajtimit e të komunikimit mes nesh". Ai tha se si President i Kosovës - 12 Qershorin e ka shpallur Ditë të Lirisë së Kosovës.

Në këtë ceremoni u përkujtuan edhe 101 ushtarët e KFOR-it të cilët kanë dhënë jetën e tyre në misionin paqeruajtës në Kosovë.

 

 

Edhe në Gjilan po zhvillohen aktivitete kushtuar katërvjetorit të hyrjes së trupave të NATO-s

 

Gjilan, 12 qershor 2003 - Sot në Gjilan ka filluar manifestimi i shënimit të katërvjetorit të çlirimit, i titulluar "Liria e Gjilanit 2003", i cili zhvillohet më 12 e 15 maj, ditë këto kur në Gjilan hynë trupat paqeruajtëse të NATO-s.

Programi i sotëm ka filluar me vënien e kurorave dhe nderimin e përfaqësuesve komunalë te varrezat e dëshmorëve, ndërsa ka vazhduar me një vizitë në kampin ushtarak amerikan "Montith" dhe aktivitetet tjera të parapara për 12 qershor.

Lutfi Haziri, kryetar i komunës, në fjalën e rastit tha se 12 Qershori është një ditë shumë e rëndësishme në kalendarin historik të Kosovës, sepse i dha fund përgjithmonë një epoke të errët dhe të tmerrshme për shqiptarët.

Katër vitet e kaluara në liri, Gjilani punoi shumë për ta përmirësuar jetën e qytetarëve të vetë, pa dallime në baza etnike dhe sot mund të themi se është arritur një progres i mirë në këtë drejtim, tha Haziri. Sot këtu ka paqe, siguri për të gjithë qytetarët, funksionojnë institucionet, ndërsa po punohet në avancimin e progresit.

 

Deri tani janë realizuar më shumë se 270 projekte, ndërsa edhe shumë të tjera janë të gatshme dhe presin donacionet, tha ai.

"Më e rëndësishmja për të ardhmen, është se qytetarët tanë kanë një motiv të madh për të ndërtuar një jetë tjetër nga ajo që ishte dikur këtu dhe, një të ardhme më të mirë për të gjithë", tha ndër të tjera Lutfi Haziri, kryetar i komunës.

 

 

Riza Halimi falenderon Presidentin Rugova

 

Preshevë, 12 qershor 2003 - "Me rastin e dekorimit me Medaljen e artë të Lidhjes së Prizrenit më lejoni t'Ju shpreh falenderimet e mia më të sinqerta dhe kënaqësinë e posaçme për respektin dhe pranimin që Ju dhe institucioni më i lartë i Kosovës në këtë mënyrë dinjitoze po ia bëni jo vetëm veprimtarisë sime politike, por, mbi të gjitha, angazhimit të pavarur politik të shqiptarëve në Luginën e Preshevës", thuhet në një letër falenderimi të kryetarit të Partisë për Veprim Demokratik në Preshevë, Riza Halimit dërguar Presidentit të Kosovës Ibrahim Rugova.

"Medalja e artë e Lidhjes së Prizrenit, e ndarë për nder të 125-vjetorit të Lidhjes Shqiptare të Prizrenit, do të jetë për mua inspirim i posaçëm për vazhdimin me përkushtim të veprimit tim politik në kuadër të procesit që duhet t'u sigurojë shqiptarëve të këtij rajoni realizimin e plotë të të drejtave individuale dhe kolektive", thuhet në fund të letrës së Riza Halimit dërguar Presidentit Rugova.

 

 

Çmimi "Beqir Musliu" i jipet Sabri Hamitit

 

Gjilan, 12 qershor 2003 - Fitues i çmimit "Beqir Musliu" që jepet për vlera letrare, sivjet do të jetë shkrimtari Sabri Hamiti. Kështu ka vendosur juria letrare, në përbërje dr Ali Aliu, Ibrahim Kadriu e Sabit Rrustemi.

Sabri Hamiti ka dëshmuar përkushtim të jashtëzakonshëm në fushën e poezisë, kritikës letrare, dramës, prozës dhe vlerësohet si një nga figurat më komplete të letrave shqipe, thuhet në një arsyetim të shkurtër të juries.

Çmimi "Beqir Musliu", i cili sivjet jepet për herë të dytë, Sabri Hamitit do t`i dorëzohet në një ceremoni solemne, më 24 qershor.

 

 

Gjykata e qarkut në Gjilan tre veta i ngarkon për veprime terroriste

 

Gjilan, 12 qershor 2003 - Gjykata e qarkut në Gjilan i ngarkon tre shqiptarë për disa veprime terroriste në rajonin e Luginës së Preshevës. Këta tre persona janë arrestuar nga policia e UNMIK-ut dhe janë me preardhje nga komuna e Bujanocit, por me vendbanim në Kosovë.

 

Këta janë: Basri Sinan Xhemajli, Rasim Bajrami dhe Asllan Bajrami, njofton shtypi i sotëm.

Ndërkohë një gjykatës ndërkombëtar po i kryen hetimet në lidhje me incidentin më 7 mars afër kufirit Kosovë-Serbi, te gryka e Koçulit. Siç dihet në atë incident policia serbe pat vrarë dy shqiptarë.

 

 

Persona të maskuar kanë vrarë Hasan Krasniqin në Vranoc të Pejës

 

Pejë, 12 qershor 2003 - Mbrëmë rreth orës 23, në Vranoc të Pejës, persona të maskuar kanë vrarë me armë zjarri Hasan Krasniqin, 33- vjeçar, punëtor i pompës së benzinës në këtë fshat. "Maskat" e kanë vrarë atë duke hipur në veturën e tij për të shkuar në shtëpi pas përfundimit të orarit të punës.

 

I ndieri është goditur me një breshëri plumbash dhe ka vdekur rrugës gjatë dërgimit në spitalin e Pejës. Në vendin e ngjarjes kanë dalë, pas rreth dy orësh, pjesëtarët e KFOR-it dhe të policisë së UNMIK-ut. Motivet e kësaj vrasjeje ende mbeten të pasqaruara.

 

 

Kisinxher: Kosovën drejt pavarësisë po e çon evolucioni i pandalashëm

 

Vjenë, 12 qershor 2003 - Duke folur në një tubim në Vjenë, sekretari i dikurshëm amerikan i Shtetit Henri Kisinxher, i pyetur nëse Kosova do të bëhet e pavarur dhe nëse këtë e mëbshtet Shtëpia e Bardhë, ka thënë:

 

"Nuk e di nëse e Amerika e mbështet (pavarësinë e Kosovës), por drejt pavarësisë Kosovën po e çon evolucioni i pandalashëm". Ai ka shtuar që vështirë se Kosova të mbetet pjesë e Serbisë. Ndarja e Kosovës nga Serbia është e pashmangshme.

Kisinxher këto komente i bëri në një takim të mbajtur dje në Vjenë të quajtur "Evropa forum 2003", në të cilin vulën kryesore ia dhanë dy veteranët e njohur të politikës botërore - Henri Kisinxher dhe Hans Ditri Gensher, ministër i dikurshëm i jashtëm gjerman.

 

Bota nuk mund të jetë stabile pa punën e përbashkët të Amerikës dhe Evropës, as që Amerika dhe Evropa kanë cilindo më të afërt sesa që janë njëra me tjetrën, andaj është e logjikshme të pritet që këto dy palë do të bëjnë çmos që është në fuqinë e tyre që lidhjet e ndërsjella të riparohen pas fërkimeve rreth Irakut dhe çështjeve të tjera - kanë konkluduar Kisinxher dhe Gensher në këtë takim duke folur për tensionet ndërmjet Amerikës dhe Evropës.

 

 

AKM suspendoi drejtoreshën e përgjithshme të PTK-së

 

Prishtinë, 12 qershor 2003 - AKM-ja ka suspenduar nga puna drejtoreshën e përgjithshme të Postelekomit të Kosovës, Leme Xhema, pas kontrollit që bëri të martën njësia elite e UNMIK-ut antikorrupsion në zyrën dhe në shtëpinë e saj.

 

Në një njoftim të PTK theksohet se në bazë të vendimit të kryesuesit të Bordit të AKM-së u suspendua përkohësisht zonja Leme Xhema nga pozita e saj aktuale si drejtoreshë e përgjithshme e PTK-së deri në përfundim të procesit të hetimeve. Ushtruesi i detyrës së drejtorit të përgjithshëm i PTK-së do të jetë i punësuari nga Agjencioni kosovar i Mirëbesimit për PTK-në, Erik Mekkenlli.

 

PTK ka theksuar se zonja Leme Xhema nuk është shkarkuar nga pozita e saj, por vetëm është suspenduar. Ky veprim është ndërmarrë si masë e përkohshme për të mbrojtur interesat e AKM-së, PTK-së dhe zonjës Leme Xhemës, thuhet në komunikatë.

 

 

PDK në Gjilan vendosi që të ngrijë marrëdhëniet me Kuvendin komunal për kohë të pacaktuar

 

Gjilan, 12 qershor 2003 - Dega e Partisë Demokratike në Gjilan pas paralajmërimeve të mëhershme vendosi që të ngrijë marrëdhëniet me Kuvendin komunal për kohë të pacaktuar, siç thuhet në shenjë pakënaqësie me rrjedhën e punëve në kuvend dhe komitetet e tij.

 

Shkaku kryesor i këtij hapi është zgjedhja e kryetarit të ri në Komitetin për Urbanizëm dhe Planifikim Hapësinor, që është një mjek nga radhët e LDK-së pa shkarkuar fare kryetarin e mëparshëm një inxhinier i ndërtimtarisë nga radhët e PDK-së.

Ndryshe PDK në Asamblenë komunale të Gjilanit ka 13 këshilltarë.

 

 

Forcat e KFOR-it në Kosovë do të organizojnë sot përvjetorin e katërt të hyrjes së trupave të NATO-s në Kosovë

 

Prishtinë, 12 qershor 2003 - Forcat paqeruajtëse të KFOR-it në Kosovë do të organizojnë sot përvjetorin e katërt të hyrjes së trupave të NATO-s në Kosovë,tha zëdhënësi i KFOR-it, majori Vill Bekman. Ceremonia e përvjetorit të katërt të hyrjes së trupave të NATO-s në Kosovë do të mbahet sot në Shtabin kryesor të KFOR-it në Prishtinë.

 

 

Forcat e KFOR-it do të përcjellin me autobusë banorët që kalojnë në pjesën veriore të Mitrovicës

 

Mitrovicë, 12 qershor 2003 - Forcat paqeruajtëse të KFOR-it do të përcjellin me autobusë civilë banorët që kalojnë në pjesën veriore të Mitrovicës. Këta autobusë do të qarkullojnë tri herë në ditë. Ata thanë se ky akt është normal në përpjekje për të rikthyer jetën normale për këta banorë të cilët deri më tash kanë qarkulluar në relacionin veri-jug me kamionë të KFOR-it.

 

 

Në Prishtinë u hap panairi ndërkombëtar ekonomik

 

Prishtinë, 12 qershor 2003 - Në Prishtinë u hap panairi ndërkombëtar ekonomik "Prishtina 2003", në të cilin po marrin pjesë mbi 80 firma nga vendet e rajonit.

 

Zyrtarët ekonomikë të Kosovës thanë se ky panair është manifestimi më i rëndësishëm ekonomik në Kosovë, pasi krijohen mundësi për paraqitjen e kapaciteteve tona prodhuese dhe tregtare si dhe për krijimin e bashkëpunimit të mirëfilltë ekonomik në nivel partneriteti me vendet e rajonit.

Për herë të parë në këtë panair marrin edhe firmat e njohura të jashtme të industrisë së automobilave. Panairi do të qëndrojë i hapur deri më 14 qershor dhe hyrja është falur.

 

 

Në finale të Kupës së Kosovës do luajnë Prishtina dhe KEK-u

 

Gjilan, 12 qershor 2003 – Dje në stadiumin e qytetit në Gjilan, ku ishin të pranishëm rreth 1000 shikues, u zhvillua takimi i dytë gjysmëfinal i Kupës së Kosovës, ndërmjet Gjilanit dhe Prishtinës.

 

Këtë ndeshje e fituan gjilanasit me rezultat 1:0, me golin që e shënoi Arben Zeqiri në minutën e 90 të ndeshjes.

Përkundër kësaj fitoreje në finale të Kupës së Kosovës në futboll për edicionin 2002/2003 u kualifikua Prishtina pasi që në ndeshjen e parë, Prishtina ka mundur Gjilanin me rezultat 3:1.

 

Në finale Prishtina do të takohet me anëtarin e ri të Ligës së parë të Kosovës, KEK-un e Kastriotit (ish Obiliqit), i cili në gjysmëfinalen e zhvilluar para një jave, pat deklasuar Vëllaznimin e Gjakovës, duke e mundur me rezultat 5:1.

Ndeshja finale Prishtina – KEK-u, do të zhvillohet më 18 qershor.

 

 

Autoritetet e Serbisë sot do të dorëzojnë kufomat e 22 shqiptarëve

 

Beograd, 12 qershor 2003 - Autoritetet e Serbisë sot në pikëkalimin kufitar me Kosovën në Merdar do të dorëzojnë kufomat e 22 shqiptarëve. Këto kufoma të shqiptarëve të vrarë më 1999 janë zbuluar në Petrovosello.

 

Në këtë lokalitet janë ekshumuar gjithsej 77 trupa, nga të cilët 11 janë dorëzuar më herët në Kosovë. Autoritetet serbe kanë premtuar se pas një muaji do të dorëzojnë edhe 20 kufoma të tjera.

Ndryshe nga tri varreza masive në Serbi janë ekshumuar gjithsej 930 trupa të shqiptarëve të Kosovës.

 

 

Më 18 qershor në Shkup takohen liderët e partive liberale të Ballkanit Perendimor

 

Shkup, 12 qershor 2003 - Fondacioni Proliberal i Gjermanisë "Friedrich Nauman Stiftung" ka ftuar në një takim të përbashkët më 18 qershor liderët e partive liberale të Ballkanit Perendimor nga Shqipëria, Bosnja dhe Hercegovina, Kosova, Kroacia, Maqedonia, Mali i Zi dhe Serbia, për të diskutuar bashkarisht për platformën të cilën do ta paraqesin liderët dhe ministrat evroliberalë në Samitin e Bashkimit Evropian i cili do të zhvillojë punimet në Selanik.

Kryetari i PLK-së, z.Gjergj Dedaj, ka konfirmuar pjesëmarrjen e tij në takimin e liderëve të Ballkanit Perendimor në Shkup, si dhe pjesëmarrjen në takimin e liderëve, kryeministrave dhe ministrave të partive liberale të Evropës, i cili do të mbahet në prag të samitit të BE-së në Selanik.

Liderët e partive liberale të Ballkanit Perëndimor do të hartojnë një platformë të përbashkët për integrimin sa më të shpejtë të këtyre vendeve në BE dhe pritet të nënshkruajnë një Deklaratë të përbashkët, e cila do t'u prezentohet liderëve euroliberalë në prag të samitit të BE-së në Selanik.

 

 

Në kanalin e tretë të TV të Maqedonisë bëhen transmetimet e seancave parlamentare në gjuhën shqipe

 

Shkup, 12 qershor 2003 - Prej dje në Televizionin shtetëror të Maqedonisë në kanalin e tretë bëhen transmetimet e seancave parlamentare, të cilat përkthehen në gjuhën shqipe në kohën kur flasin deputetët maqedonas.

 

Me ndryshimet kushtetuese dhe të Rregullores së Parlamentit të Maqedonisë, deputetë shqiptarë mund të flasin shqip në seancë, por më herët gjatë transmetimeve në televizion fjalimet e tyre mbuloheshin nga zëri i përkthyesit maqedonas. Tani seancat e parlamentit transmetohen edhe në kanalin e dytë ku përkthehen fjalimet nga shqip në maqedonisht.

Nga ana tjetër vlerësohet se pas mundësisë për të marrë lejenjoftimet në dy gjuhë, transmetimet edhe në gjuhën shqipe të seancave të Parlamentit të Maqedonisë, janë një nga realizimet praktike të Marrëveshjes kornizë të Ohrit.

 

 

Korpusi i Paqes amerikane në Maqedoni do të zgjerojë veprimtarinë e vet

 

Shkup, 12 qershor 2003 - Korpusi i Paqes, i cili numëron 18 vullnetarë amerikanë në Maqedoni do të zgjerojë veprimtarinë e vet. Në muajin shtator pritet të mbërrijnë në këtë vend edhe 33 vullnetarë të tjerë amerikanë, ndërkohë që numri i përgjithshëm pritet të jetë rreth 60 vullnetarë.

 

Ambasadori amerikan në Shkup Lorens Batler pohon se kërkesat për vullnetarë amerikanë në Maqedoni janë në rritje.

"Optimizmi amerikan për të ardhmen e Maqedonisë zotëron. Kemi shpresë shumë të madhe për një marrëdhënie të qëndrueshme të pandërprerë në vitet që vijnë", thotë ambasadori amerikan Batler.

Ndërkaq, presidenti maqedonas, Boris Trajkovski thotë se Korpusi i Paqes ka rëndësi të veçantë për Maqedoninë, duke shtuar se ky korpus me vullnetarët e tij do të ndihmojnë në forcimin e bashkëpunimit midis Maqedonisë dhe Shteteve të Bashkuara të Amerikës nëpërmjet realizimit të detyrave të tyre.

 

 

BDI mori vendim për t'u bashkuar me Partinë Demokratike Kombëtare

 

Shkup, 12 qershor 2003 - Kryesia e Bashkimit Demokratik për Integrim e Ali Ahmetit ka marrë vendim për t'u bashkuar me Partinë Demokratike Kombëtare të Kastriot Haxhirexhë.

 

Për bashkimin praktik të të dy partive tash duhet të vendosë edhe PDK-ja, e cila duhet të pranojë programin e BDI-së dhe të fillojë procedurën ligjore të pezullimit të aktiviteteve të saja politike. Bashkimi i këtyre dy partive shqiptare do të vazhdojë të mbajë emrin Partia Bashkimi Demokratik për Integrim.

Sipas marrëveshjes një anëtar i PDK-së do të jetë kryetar i BDI-së, ndërkaq pesë anëtarë të saj do të jenë anëtarë të kryesisë.

 

 

Policia maqedonase ka arrestuar dhjetëra persona nën dyshimin se kanë lidhje me shpërthimet e fundit

 

Shkup, 12 qershor 2003 - Burimet maqedonase kanë bërë të ditur se policia maqedonase ka arrestuar dje dhjetëra persona të cilët dyshohen të kenë lidhje me një numër shpërthimesh të fundit në të cilat u vranë disa njerëz në Maqedoni.

 

Ministria e Punëve të Brendshme të Maqedonisë thotë se shpërthimet që ndodhën në periudha të ndryshme javët e fundit lokalitete të ndryshme si në Strugë, Sopot, Kumanovë dhe Vaksincë, janë vepra të një strukture kriminale.

Sipas kësaj ministrie këta persona kanë lidhje të forta, me siç thuhet nëntokën e krimit në Maqedoni dhe në rajon. Pjesëtarët e kësaj strukture konstaton Ministria e rendit janë shtetas të Maqedonisë dhe motivet e saj kryesisht janë për përfitime financiare.

Në shpërthimet e ndodhura përveç dëmeve materiale ka pasur edhe viktima. Ministria Punëve të Brendshme konstaton se kjo strukturë nuk ka përkrahje nga popullësia lokale në Maqedoni.

 

 

Në Irak rrëzohet një helikopter amerikan

 

Bagdad, 12 qershor 2003 - Një helikopter ushtarak amerikan është rrëzuar në perëndim të Irakut. Amerikanët thonë se mesa duket, ai është qëlluar.

Autoritetet ushtarake amerikane thonë se kanë arritur me sukses që të evakuojnë ekuipazhin e helikopterit Apaçi prej dy vetësh.

Sipas tyre, helikopterë të tjerë amerikanë u desh të qëllonin disa forca armike në terren.

Po ashtu, aeroplanë amerikanë në Irak kanë kryer disa sulme nga ajri si pjesë e një fushate në vazhdim që sipas amerikanëve, bëhet kundër elementëve besnikë të partisë Baath.

Zyrtarët amerikanë thanë se aeroplanët luftarakë gjuajtën mbi një kamp ku stërviteshin terroristët, 150 km në veriperëndim të Bagdadit.

 

 

"Të jetojmë në paqe - me dashuri dhe respekt të përhershëm ndaj njëri-tjetrit", ka thënë sot papa Gjon Pali i Dytë

 

Qytet i Vatikanit, 12 qershor 2003 - Ati i Shenjtë - papa Gjon Pali i Dytë ka organizuar dhe realizuar sot në Selinë e Shenjtë një audiencë të jashtëzakonshme, me besimtarë e shtegtarë të ardhur nga shumë vende të botës, kushtuar predikimit të Fjalës së Zotit, në njëqind vizitat e tija pastorale, nëpër botë (jashtë Italisë), gjatë periudhës çerekshekullore të papatit të Tij.

Në këtë audiencë, të organizuar mbas përmbushjes së shtegtimit të tij të njëqindët - javën e kaluar në Kroaci, Shentëria e Tij ka thënë se në këto shtegtime baritore është ndier si Apostulli Pjetër, duke predikuar Fjalën e Zotit, me porositë për paqe dhe dashuri ndërmjet njerëzve, pa dallime racore, rajonale apo fetare.

 

"Në këto predikime kam ndier sa kënaqësi, aq edhe përgjegjësi" - ka thënë Papa, duke përshkruar disa raste të veçanta, përfshirë edhe vizitat e tij në Ballkan (në Shqipëri, në Bosnje e Hercegovinë dhe tash së fundi në Kroaci).

Papa Gjon Pali i Dytë ka thënë se kënaqësinë më të madhe, në këto udhëtime, e ka përjetuar në takimet e tij me përfaqësuesit e kishave të tjera të krishtera (jokatolike), si dhe me përfaqësuesit e besimeve jo të krishtera - të hebrenjve, myslimanëve e të besimeve të tjera, duke i përmendur hyrjet dhe lutjet në tempujt e këtyre besimeve.

 

Ai nuk ka harruar edhe me këtë rast porosinë e përhershme të tij, drejtuar njeëzimit mbarë: "Të jetojmë në paqe - me dashuri dhe respekt të përhershëm ndaj njëri-tjetrit!"

 

 

SARS-i së shpejti do të çrrënjoset në botë

 

Manila/Tajpeh/ Pekin, 12 qershor 2003 - Organizata Botërore e Shëndetësisë (OBSH) ka vlerësuar sot se epidemia e sindromës së rëndë respirator - SARS - së shpejti do të çrrënjoset, duke mos përjashtuar mundësinë e shpërthimit të saj të sërishëm.

Përhapja e e sëmundjes duket se është ndalë në Kinë, por kjo nuk është bërë plotësisht në Tajvan, ka deklaruar Hitoshi Oshitani, një zyrtar i selisë rajonale të OBSH në Manilë në luftë kundër SARS-it në Azi.

 

Sipas të dhënave të OBSH, SARS-i deri më tash ka marrë jetën e 789 njerëzve ndërkaq numri i të infektuarve ka arritur në 8.437.

 

 

Hans Bliks akuzon SHBA-në për fushatë diskredituese ndaj tij

 

Nju Jork, 12 qershor 2003 - Kryeinspektori i Kombeve të Bashkuara për armët, Hans Bliks, kritikoi Shtetet e Bashkuara për atë që ai e cilësoi si fushatë për ta diskredituar atë në prag të luftës kundër Irakut. Në komentet që u botuan në gazetën britanike, "Guardian", Bliks thotë se disa zyrtarë amerikanë përhapën, nëpërmjet mjeteve të informimit, gjëra të pakëndshme rreth tij.

 

Ai tha gjithashtu se Shtetet e Bashkuara i kishin bërë trysni që të përdorte gjuhë më të ashpër në raportet e tij mbi armët irakiane të shkatërrimit në masë. Zoti Bliks do të dalë në pension në fund që qershorit, pasi kryesoi ekipet e inspektimit të armëve gjatë tre vjetëve të fundit.

 

 

Al-Kaida dyshohet si autore e sulmit në Kabul

 

Berlin, 12 qershor 2003 - Ministri gjerman i Mbrojtjes, Peter Shtruk, tha se terroristë të rrjetit Al-Kaida ishin pas shpërthimit vdekjeprurës të javës së kaluar që shkaktoi vdekjen e 4 paqeruejtësve gjermanë në kryeqytetin afgan. Zoti Shtruk tha që autori i shpërthimit ishte anëtar i al-Kaidës dhe kishte lidhje me lëvizjen Taleban dhe mbështetej nga forca renegate.

 

Ai tha se të tre grupet po përpiqen të detyrojnë Forcën Ndërkombëtare të Sigurisë të largohet nga Afganistani. Ushtarët gjermanë po largoheshin nga Afganistani, kur autori i shpërthimit vetëvrasës iu afrua me makinë autobusit të paqeruejtësve dhe aktivizoi lëndët plasëse.

 

 

Mbi 20 të vrarë në dhunën e djeshme mes palestinezëve dhe izraelitëve

 

Gaza, 12 qershor 2003 - Pas një ditë sulmesh të dhunshme midis Izraelit dhe palestinezëve që lanë më shumë se 20 njerëz të vdekur, ushtria Izraelite ka ndërmarrë një tjetër sulm me helikopterë në Rripin e Gazës.
Në mbrëmje vonë sulmet me raketa bënë shkrumb e hi një makinë duke vranë dy anëtarë të Hamasit brenda saj. Në një rrugë me shumë dyqane, kalimtarë të rastit thuhet të jenë midis viktimave. Sulmet izraelite erdhën pas një sulmi vetëvrasës në një autobus në Jeruzalem ku u vranë të paktën 16 vetë dhe u plagosën shumë të tjerë.

Udhëheqësi palestinez Jaser Arafat që është lënë jashtë bisedimeve për paqe prej izraelitëve dhe amerikanëve, vazhdon të ketë më shumë ndikim mbi palestinezët sesa kryeministri Abu Mazen.
Zoti Arafat i dënoi sulmet vetëvrasëse në Jeruzalem si terroriste nga ana tjetër ai dënoi vrasjet e civilëve në Gaza.

Kryeministri palestinez në kundërpërgjigje të rritjes së numrit të viktimave nga rradhët e të dyja palëve ka bërë thirrje për ndalimin e menjëhershëm të dhunës.

 

 

Vazhdojnë protestat në Iran

 

Teheran, 12 qershor 2003 - Në Iran për të dytën natë radhazi mijëra protestues - shumica studentë kanë vazhduar demonstratat kundër qeverisë në kryeqytetin e vendit Teheran.

Protestuesit kanë dënuar udhëheqësit fetarë të vendit dhe kanë kërkuar dorëheqjen e Ajatollahut Ali Khameni.
Sikurse edhe të mërkurën demonstratat nisën në qytetin e studentit të universitetit të Teheranit, ku studentët protestuan kundër planeve për privatizimin e kolegjit iranian.

Sipas njoftimeve pati përleshje mes grupeve rivale, të cilat hodhën gurë mbi njëra-tjetrën.

Studentëve shumë shpejt iu bashkuan mijëra qytetarë që dëgjuan për lajmin prej kanaleve televizive satelitore amerikane.

 

 

Gjatë një operacioni të madh në Irak, trupat amerikane kanë arrestuar rreth 400 veta

 

Bagdad, 12 qershor 2003 - Duke zbatuar masat energjike kundër lojalistëve të Sadam Hyseinit, trupat amerikane kanë arrestuar rreth 400 veta dhe ky është operacioni më i madh ushtarak që kur është përmbysur regjimi irakian dy muaj më parë, njofton BBCWorld.

 

Komanda qendrore amerikane ka njoftuar se gjatë disa ditëve të kaluara janë ndërmarrë një sërë operacionesh, në të cilat kanë marrë pjesë ekipet sulmuese ajrore, forcat tokësore, kurse motoskafët patrollues kanë kryer operacione përgjatë lumit Tigër afër qytetit Balad, rreth 70 kilometra në veri të Bagdadit.

 

Zyrtarët kanë thënë se qëllimi ka qenë, siç e kanë përshkruar ata, çrrënjosja e lojalistëve të ish-qeverisë së partisë Baath dhe e grupeve paramilitare. Njoftohet se mbi tremijë forca amerikane kanë marrë pjesë në këto operacione, në të cilat janë vrarë edhe katër irakianë, ndërsa janë plagosur katër ushtarë amerikanë.

 

 

Në pjesën indiane të Kashmirit janë vrarë tetë kryengritës

 

Shrinigar, 12 qershor 2003 - Armata indiane sot ka njoftuar se në luftimet në pjesën indiane të Kashmirit natën e kaluar janë vrarë tetë kryengritës, nga të cilët katër kanë tentuar të kalojnë kufirin e këtij territori të ndarë nga ana pakistaneze.

 

Sipas deklaratës së përfaqësuesit ushtarak indian, të cilën e citon agjencia Rojter, gjatë natës konlfikte ka pasur në dy pjesë të provincës Kupvara, rreth 90 km në veriperendim të Shrinagarit, ku ushtarët indianë kanë vrarë katër separatistë në provincat Kalaros dhe Langate.

 

 

Në Ulan Bator është zbuluar një varrezë masive të spastrimeve staliniste

 

Ulan Bator, 12 qershor 2003 – Në kryeqytetin mongol Ulan Bator është zbuluar një varrezë masive, ku janë varrosur qindra priftërinj budistë gjatë spastrimeve staliniste në vitet e 1930-ta, ka bërë të ditur sot (e enjte) një ekip hetuesish, njofton Rojter. Në këtë varrezë janë varrosur të pakten 575 viktima, por numri i tyre mund të jetë deri në njëmijë sish.

 

Ndërkaq, janë zbuluar 348 kafka me zgavra të plumbave në qafë. Historianët thonë se të pakten 30 mijë intelektualë, disidentë, fisnikë dhe priftërinj kanë qenë vrarë në pastrimet Partisë Revolucionare të Popullit Mongol në vitet 193-ta. Mbi 700 manastire dhe tempuj budistë kanë qenë shkatërruar në Mongoli, e cila më 1921 bëhet shteti i dytë komunist në botë nën dominimin e Bashkimit Sovjetik.

 

 

Të pakten dy civilë janë vrarë në luftimet e reja në Afganistan

 

Mazari Sherif, Afganistan, 12 qershor 2003 – Të pakten dy civilë janë vrarë dhe një tjetër është plagosur në luftimet e reja të mbrëmshme ndërmjet forcave të fraksioneve lojale dhe rivale në Afganistanin Verior, kanë konfirmuar sot (e enjte) të dy palët ndërluftuese, njofton Rojter. Luftimet janë zhvilluar në distriktin Sholgara, në jug të Mazari Sherifit.

 

 

SHBA-të thonë se 15 vende s’kanë bërë fare përpjekje për të ndalë trafikimin e qenieve njerëzore

 

Uashington, 12 qershor 2003 – Shtetet e Bashkuara kanë emërtuar 15 vende, që s’kanë bërë kurrëfarë përpjekjesh të rëndësishme për të ndalë trafikimin e qenieve njerëzore, që përshkruhet si formë e robërisë së ditëve moderne, njofton BBCWorld.

 

Departmenti i amerikan i Shtetit ka thënë se shtetet e tilla, ndër të cilat edhe Greqia dhe Turqia, mund të ballafaqohen me sanksionet e qeverisë amerikane. Ndërkaq, pos këtyre, edhe 74 vende të tjera janë emërtuar se s’kanë bërë as minimumin për të ndalë këtë tregti, ndonëse kanë bërë përpjekje të rëndësishme në këtë drejtim.

 

Duke e kumtuar këtë raport të Departmentit të Shtetit, Pauell ka thënë se trafikimi i qenieve njerëzore është tmerrues në botë, ku njëherësh “liria dhe demokracia po zgjerohen në të gjitha kontinentet”.

 

Qeveria amerikane ka vlerësuar se 800 deri në 900 mijë njerëz lëvizin në vit nëpër kufijt ndërkombëtarë në gjithë botën, nga të cilët 18 deri në 20 mijë kalojnë në Amerikë.

Copyright©2000-2003 Trepca.net - Të gjitha të  drejtat e rezervuara.