Mesazh i Presidentit Rugova drejtuar popullit të Kosovës për 12 Qershorin - Ditën e Lirisë

 

Bruksel, 11 qershor 2003 - Presidenti i Kosovës, Dr. Ibrahim Rugova, me rastin e 12 Qershorit - Ditës së hyrjes së trupave të NATO-s në Kosovë, i ka drejtuar këtë mesazh popullit të Kosovës.

"Me rastin e 12 Qershorit - Ditës së hyrjes së trupave të NATO-s/KFOR-it në Kosovë dhe përfundimit të luftës, që e kam shpallur Ditë të Lirisë së Kosovës, Ju shpreh urimet e mia të përzemërta.

Më 12 qershor mbushen katër vjet qëkur Kosova është një vend i lirë. Dhe sot mund të themi se për katër vjet Kosova ka pasur një progres të madh në të gjitha fushat e jetës.

  

Gjendja e përgjithshme e sigurisë është më e mirë dhe stabiliteti politik është më i madh me funksionimin demokratik të institucioneve dhe me mirëkuptimin e përkrahjen tuaj.

Këtë progres e kemi arritur së bashku me UNMIK-un, OSBE-në dhe KFOR-in, si dhe me ndihmën e shumë qeverive, si asaj të SHBA-ve, të Bashkimit Evropian, dhe të vendeve të tjera.

Objektivat e institucioneve të Kosovës janë dhe kanë filluar të realizohen në planin e zhvillimit ekonomik, të privatizimit, të iniciativës së lirë, të krijimit të vendeve të punës për të rinjtë, si dhe integrimi i minoriteteve në shoqërinë dhe shtetin e Kosovës.

Njohja formale e pavarësisë së Kosovës do t'i shpejtonte proceset ekonomike dhe demokratike. Pra, të kemi një Kosovë demokratike, tolerante, të integruar në BE, në NATO dhe në miqësi të përhershme me SHBA-të.
 

Në këtë Ditë të lirisë, urime të sinqerta i shprehim UNMIK-ut dhe zotit Shtajner, OSBE-së dhe ambasadorit Fieski. Urime të sinqerta u shprehim komandantëve dhe ushtarëve të KFOR-it të drejtuar nga Gjeneral Fabio Mini.

Njëherësh urime të përzemërta u drejtojmë përfaqësive diplomatike në Prishtinë.

Në këtë ditë të lirisë, përshëndesim Presidentin Bush, Kryeministrin Bler, Presidentin Shirak, Kancelarin Shreder, dhe Kryeministrin Berluskoni.

Si gjithmonë, përshëndesim Atin e Shenjtë, Papa Gjon Pali II, që lutet shumë për Kosovën.

 

Gëzuar Dita e Lirisë!

Zoti i bekoftë miqtë e Kosovës!

Zoti e bekoftë Kosovën!", thuhet në fund të mesazhit të Presidentit të Kosovës Dr. Ibrahim Rugova.

Copyright©2000-2003 Trepca.net - Të gjitha të  drejtat e rezervuara.