Kometi i "TEMA"

Pavarësia e Kosovës, jo më tabu për evropianët

Bruksel, 11 qershor 2003

  

Erisa ZYKAJ / korrespondente nga Brukseli

  

Nëse deri para pak kohësh, zyrtarët evropianë vinin pikëpyetjen mbi pavarësinë e Kosovës, ata e kanë kapërcyer tashmë këtë etapë dhe flasin për rrugën e arritjes së pavarësisë së Kosovës. Mbledhja e Brukselit, që nuk është zhvilluar për të shqyrtuar statusin e Kosovës, ka treguar se kjo çështje është një nga shqetësimet kryesore të europarlamentarëve të Komisionit të Punëve të jashtme, të cilët kanë pritur presidentin e Kosovës Rugova, kryeadministratorin e Kombeve të Bashkuara Steiner dhe ministrin e minoritetit serb Torovic. Në këtë mbledhje, eurodeputetë J. Svoboda kanë mbështetur me plot gojën Kosovën e pavarur, duke i kërkuar presidentit Rugova mënyrën me të cilën do të arrihet kjo pavarësi. "Lideri i Kosovës ka thënë se për të njohur pavarësinë e saj mund të gjenden mënyra të ndryshme, duke privilegjuar dukshëm mbajtjen e një konference ndërkombëtare." "Në këtë konferencë përfaqësues të Bashkimit Evropian, të Shteteve të Bashkuara të A merikës, si edhe të Beogradit duhet të njohin pavarësinë e Kosovës, pasi ky është një realitet i pamohueshëm. Kosova nuk mund të lihet mënjanë si një ishull i izoluar" është shprehur Rugova.

 

Ai nuk ka bërë komente në lidhje me lajmin, sipas të cilit shqiptarët e Kosovës kanë ndërmend të kërkojnë pavarësinë para fundit të vitit, lajm që është botuar në një nga gazetat greke. "Unë nuk i komentoj gazetat" është përgjigjur Rugova, duke përsëritur se çështja e pavarësisë së Kosovës duhet zgjidhur nëpërmjet një konference të nivelit ndërkombëtar. "Njohja zyrtare e pavarësisë së Kosovës do të kontribuojë në shuarjen e shumë frikëve të tjera siç është dhe problemi i integrimit të minoriteteve të ndryshme në Kosovë, pasi ata do të pranohen shumë më lehtë nga shumica e popullatës së Kosovës," - ka deklaruar Rugova. Sipas tij dhe eurodeputetëve të tjerë të cilët kanë ndërhyrë në diskutim, zgjidhja e statusit nuk duhet të vonohet për shumë kohë.

 

Ibrahim Rugova e ka zhvilluar edhe më tepër këtë fakt, duke thënë se shpreson që Evropa dhe Shtetet e Bashkuara të Amerikës të mbajnë të njëjtin qëndrim për këtë problem. Këtë Rugova e ka theksuar, pasi propozimet e shtetit amerikan për zgjidhjen e statusit të Kosovës janë më të përparuara se ato të Bashkimit Evropian. Kështu, eurodeputeti Langedijk ka pyetur kryeadministratorin Michael Steiner në lidhje me deklaratat e shtetit amerikan për shqyrtimin e çështjes së statusit pas zgjidhjes së problemit të kthimit të refugjatëve në Kosovë. "Kjo deklaratë nxjerr në pah se çështja e statusit të Kosovës mund të fillojë të diskutohet pas plotësimit të disa kërkesave ndër të cilat bën pjesë edhe ajo e kthimit të refugjatëve. Edhe përfaqësuesit e shtetit amerikan mendojnë se aktualisht kushtet nuk janë pjekur ende dhe se duhen arritur rezultate konkrete në disa fusha përpara zgjidhje së statusit" ka thënë Michael Steiner. Ai ka përsëritur moton e tij të preferuar "Standarde para statusit", duke i mëshuar edhe një herë faktit se për të kërkuar pavarësinë, Kosova duhet të përmbushë më parë kriteret në nivelin e stabilitetit, të demokracisë dhe të ekonomisë.

 

 

 

Më shumë ndihmë për Kosovën

 

Kryeadministratoiri i Kosovës Michael Steiner ka paraqitur një tablo të përgjithshme të situatës aktuale në Kosovë, duke prekur kështu pikat më kryesore të veprimtarisë jetësore. Në këtë drejtim, ai ka folur në mënyrë shumë pozitive për modernizimin e policisë në Kosovë dhe për rezultatet e mira që janë arritur në drejtim të luftës ndaj kriminalitetit. Nga ana tjetër, ai ka përmendur përpjekjet që janë bërë kohët e fundit për zhvillimin e administratës, apo për ekzistencën e një sistemi monetar stabël në Kosovës. "Por edhe me rezultatet e arritura deri tani, kërkohen më shumë përpjekje pothuajse në të gjitha fushat e jetës në Kosovë" është shprehur Steiner. Ai ka përmendur si problemi kryesor në Kosovë papunësinë.

 

"Në Kosovë 57% e popullsisë është e papunë. Djemtë apo vajzat e reja në moshë tetëmbëdhjetë vjeçare nuk gjejnë punë, por edhe në rastin kur ata e arrijnë një gjë të tillë, ata paguhen rreth 220 euro në muaj" ka thënë Steiner. Sipas tij ky është një fakt i trishtueshëm, pasi rinia në Kosovë nuk gjendet përpara një perspektive optimiste. "Kështu që ose Bashkimi Evropian do të përkujdeset për të sjellë në Kosovë standardet evropiane, ose të r injtë kosovarë do të vërshojnë në Evropë" ka thënë Steiner. Ai e ka vënë theksin disa herë në problemin e papunësisë, duke thënë se në një shtet evropian, një përqindje e tillë papunësie do të ishte një katastrofë e vërtetë.

 

Dy problemet e tjera në të cilat është ndalur Steiner ka qënë ai i multnietnicitetit dhe kthimit të refugjatëve. Ai ka thënë parpara Komisionit të punëve të jashtme se pjesëmarrja e minoriteteteve është deri në 20% në nivelin e qeverisë dhe parlamentit, ashtu si dhe 50% në policinë funksionuese në Kosovë. "Por qëllimi për të realizuar një Kosovë multietnike deri tani nuk është i kënaqshëm" ka thënë hapur Stenier, duke shpjeguar se shumica e banorëve të Kosovës dhe minoritetet duhet të mësojnë të jetojnë së bashku. Ai ka folur me të njëjtat tone dhe për problemin e kthimit të refugjatëve, duke thënë se ky proces është kryer me ritme shumë të ngadalta, pasi është një proces shumë i kushtueshëm. "Ne e kemi strukturën për kthimin e refugjatëve, por Bashkimi Evropian duhet të na ndihmojë në këtë drejtim, pasi ne nuk kemi fondet e duhura. BE na ka premtuar në nëntor 37,5 milion euro për kthimin e refugjatëve dhe ne kemi nevojë për këtë ndihmë" ka thënë Steiner. Ministri i minoritetit serb ka thënë se ai shpreson që në ardhmen të bëhen më shumë përpjekje për integrimin e vërtetë të minoriteteve në Kosovë, pasi deri tani janë bërë disa hapa, por mbetet ende për të bërë. "Jashtë Kosovës pret një numër i konsiderueshëm i minoriteteve të cilët presin të kthehen në shtëpitë e tyre" ka thënë ai.

 

Michael Steiner ka folur më tutje për luftën ndaj krimit të organizuar, duke thënë se edhe pse deri tani janë bërë shumë përpjekje në këtë drejtim, rasti i fundit i vrasjes së tre anëtarëve të një familje serbe tregon se Kosova nuk është ende multietnike.

 

Përsa i përket procesit të privatizimit, kryeadministratori Michael Steiner ka shpjeguar, se mënyra që është zgjedhur për të ruajtur të drejtat e pronësisë në Kosovë është studiuar gjatë nga juristët më të mirë botërorë. "Ne kemi kërkuar ndihmën e specialistëve të Komisionit Evropian apo të Bankës Botërore dhe na janë dashur plot tre vjet që të gjejmë mënyrën se si mund të zhvillohej procesi i privatizimit, duke përdorur një agjenci besimi.

 

I pyetur nga kryetarja e Komisionit të jashëtm për Evropën Juglindore Doris Pack për përsenë e ekzistencës së agjensisë së besimit në Kosovë, Steiner është përgjigjur se përpara se të krijohej kjo agjenci në Kosovë kanë falimentuar plot 400 ndërmarrje të vogla dhe tashmë kanë mbetur vetëm 100, të cilat mund të shpëtohen. "Ky fond besimi është krijuar për pronarët e ardhshëm ose ndryshe për pronarët eventualë, pasi nuk ka asnjë investitor që të blejë tokat. Kështu që kur të vijë momenti për privatizimin, paratë janë aty" ka shpjeguar Steiner.

 

 

 

Një president optimist

 

Ndërkohë që kryeadministratori Steiner ka servirur anët më problematike të situatës në Kosovë, Presidenti Ibrahim Rugova ka transmetuar një imazh më pozitiv aktual të Kosovës. Ai u ka thënë eurodeputetëve të Komisionit të jashtëm të Parlamentit Evropian se Kosova në këto katër vjet ka njohur progrese dhe se ajo tashmë e ka kaluar fazën e emergjencës. "Në mënyrë të veçantë siguria publike është rritur në mënyrë të dukshme në Kosovë, në sajë të të gjitha organizmave ndërkombëtarë, të cilët operojnë në Kosovë" është shprehur presidenti Rugova. Ai ka thënë se policia në Kosovë ka dhënë rezultate shumë të mira në drejtim të luftës ndaj kriminalitetit. Ai ka thënë gjithashtu se Kuvendi i Kosovës dhe qeveria e saj e kanë kaluar provën e parë dhe se ato kanë treguar se funksionojnë në mënyrë normale. "Minoritetet marrin pjesë si në Parlamentin e Kosovës, ashtu edhe në qeveri, ashtu siç ata marrin pjesë në pushtetin lokal" ka thënë Rugova. Sipas tij, edhe procesi i privatizimit është duke ecur pozitivisht. "Kosova ka hyrë në jetën normale, ajo përjeton tolerancën dhe shpreson që të integrohet sa më shpejt në Bashkimin Evropian dhe NATO-n është shprehur Rugova.

 

Michael Steiner ka përfituar nga rasti i këtij takimi për të deklaruar se ai do të marrë pjesë në samitin e Selanikut së bashku me një delegacion multietnik të Kosovës. Ai ka folur edhe për mundësinë e një takimi të përveçëm midis përfaqësuesve serbë dhe kosovarë gjatë samitit të Selanikut.

 

Copyright©2000-2003 Trepca.net - Të gjitha të  drejtat e rezervuara.