E marte, 10 qershor 2003

10.06.2003 - Trepca.net

Lajme

E marte, 10 qershor 2003

Përmbajtja:

Mbrëmë në Prishtinë u mbajt një akademi solemne kushtuar 125-vjetorit të Lidhjes së Prizrenit
Presidenti Moisiu uron Rugovën për Lidhjen e Prizrenit
Presidenti Rugova priti Leka Zogun
Presidenti Rugova ka dekoruar 37 personalitete të njohura nga Kosova dhe bota me "Medalje të artë të Lidhjes së Prizrenit"
Presidenti Rugova priti Leka Zogun
Rugova e Shtajner udhëtuan sot në Bruksel
Në Prizren sot u zhvilluan një varg aktivitetesh kushtuar Lidhjes së Prizrenit
I përmbylli punimet Konferenca shkencore kushtuar Lidhjes së Prizrenit
Në Prizren përfundoi festivali tradicional i SHKA "Prizreni 2003"
Policia ka arrestuar një shqiptar për vrasje dhe akte të terrorizmit
Shtyhet për më 19 qershor seanca e radhës së Kuvendit të Kosovës
Kryetari i komunës së Gjilanit ngushëlloi komandantin e KFOR-it amerikan
Me një sërë aktivitetesh vazhdojnë sot manifestimet për nder të 125-vjetorit të Lidhjes së Prizrenit
Presidenti Moisiu uron Rugovën për Lidhjen e Prizrenit
Banorët e fshatrave shqiptare që jetojnë në pjesën veriore të Mitrovicës kanë pranuar planin e KFOR-it
Parlamenti kundër dekretit të Presidentit- Bisht Palla u jipet grekëve
Shkup: Amnisti për të gjithë ata që kanë refuzuar të kryejnë shërbimin ushtarak
Greqia ka pranuar të riathesojë në Shqiqpëri pesë monumente arkeologjike
Kryeministri serb thotë se bisedimet shqiptaro-serbe të jenë nën patronatin e bashkësisë ndërkombëtare
Kidnapuesit kanë liruar 4 vëzhguesit e OKB-së, të rrëmbyer javën e kaluar
Forcat amerikane në Afganistan kanë vrarë 4 persona gjatë një shkëmbim zjarri
Lideri i lartë i Hamasit është plagosur nga helikopteri në Gaza
Në Pakistan janë vrarë katër veta, njëri syresh zyrtar policie
Sulmues të armatosur kanë kidnapuar në Peru rreth 60 punëtorë
Në një shpërthim të depos së municionit kanë humbur jetën tre irakianë
Pauell mirëpret hapat e para të Izraelit për shëmbjen e vendbanimeve të paligjshme hebraike
Presidenti Bush thotë se koha do ta provojë që Iraku zotëronte armë të ndaluara
Izraeli largon pikat e kontrrollit prej ngulimeve të paligjshme
Arrestohen në Moske 121 anëtarë të një organizate ekstremiste
Trupat amerikane vrasin dy irakianë në afërsi të Bagdatit
Në Iran ndalohet për herë të parë një gazetë islamike
Britania e Madhe jashtë Eurolandit

Mbrëmë në Prishtinë u mbajt një akademi solemne kushtuar 125-vjetorit të Lidhjes së Prizrenit


Në këtë akademi solemne foli edhe ministri i Kulturës Behxhet Brajshori, i cili tha se shënimi i 125-vjetorit të Lidhja Shqiptare të Prizrenit për herë të parë pas Kuvendit të Lezhës ka mbledhur kuvendarë e personalitete nga të gjitha trojet etnike.

Ai nënvizoi se Lidhja Shqiptare e Prizrenit me peshën e saj vazhdon të ketë rrezatime ndikuese shumplanëshe edhe në politikën e sotme të brendshme, por edhe në politikën e sotme rajonale, si dhe në politikën e sotme ndërkombëtare.
Ndërkaq në vazhdim u shfaq një program i zgjedhur artistik kushtuar kësaj ngjarjeje të rëndësishme të historisë sonë kombëtare.

Më poshtë po e japim fjalën e Presidentit Rugova mbajtur në këtë akademi solemne.



Lidhja e Prizrenit ishte përcaktuar për t'u inkuadruar me shtetin e vet shqiptar në botën perëndimore.
Më 10 qershor të vitit 1878, u mblodhën në Prizren delegatë nga të gjitha viset shqiptare, themeluan institucionet: Kuvendin kombëtar, Qeverinë, sektorin diplomatik dhe forcat mbrojtëse – ushtrinë e vet.

Këto institucione funksionuan plot tri vjet rresht. Kuvendi i Prizrenit i kundërshtoi vendimet e Kongresit të Berlinit për shkëputjen e territoreve shqiptare dhe vazhdoi ndërtimin dhe mbrojtjen e shtetit të vet në tërësinë territoriale. Për tri vjet Lidhja e Prizrenit vendosi administratën shqiptare, në Kosovë kryesisht dhe në viset e tjera.
Më 1881 Mbretëria otomane nuk mundi ta tolerojë më ngritjen e shpejt të shtetit shqiptar dhe vendosi ta shkatërrojë atë me forca të armatosura. Pas rezistencës së ashpër të forcave të Lidhjes së Prizrenit nën komandën e Sylejman Vokshit, të luftimeve që u zhvilluan sidomos në Kosovë, u shua kjo lëvizje e shkëlqyeshme.

Në këtë kohë njëri nga krerët e Lidhjes së Prizrenit Abdyl Frashëri bashkë me Ymer Prizrenin dhe Sylejman Vokshin thoshte me optimizëm dhe vizion të madh “Ne po mbjellim e të tjerët do të korrin.

Ky ishte vizioni i burrave të mëdhenj të Lidhjes së Prizrenit, të bindur se shpirti i saj do të vazhdojë të jetojë. Kështu sot mund të themi se Lidhja e Prizrenit ishte një lëvizje e kompletuar shtetërore që i aktivizoi të gjitha fuqitë e një kombi për liri, pavarësi dhe demokraci.
Pas shtypjes së Lidhjes së Prizrenit shqiptarët u forcuan dhe u konsoliduan në planin e brendshëm kulturor, diplomatik e të miqësisë. Kështu më 1899 nën drejtimin e Haxhi Zekës në Pejë u themelua “Lidhja e Pejës” si ringjallje e Lidhjes së Prizrenit që u pranua në të gjitha territoret.

Po atë vit Sami Frashëri botoi traktatin e vet një lloj kushtetute për drejtimin e shtetit shqiptar "Shqipëria ç'ka qenë, ç'është dhe ç'do të bëhet". Por edhe kjo Lidhje e Pejës u shua nga Porta e lartë.
Kështu përpjekjet për liri e pavarësi nuk pushuan as pas shuarjes së Lidhjes së Pejës. Në fillim të viteve 1900 burrat e Lidhjes së Prizrenit dhe brezi tjetër i burrave të kësaj kohe për 34 vjet rresht vazhduan përpjekjet për liri e pavarësi. Kështu më 1912 u shpall pavarësia shqiptare.

Por kjo pavarësi u cungua me mbetjen e gjysmës së territoreve shqiptare jashtë shtetit që u njoh nga fuqitë e mëdha. Kjo u sanksionua edhe pas Luftës së parë botërore, si dhe pas Luftës së dytë botërore.
Në vitet '90 me fillimin e përfundimit të Luftës së ftohtë dhe me shkatërrimin e një shteti ku u vendos me dhunë Kosova dhe territoret tjera shqiptare, në Kosovë filloi organizimi i Lëvizjes demokratike për liri, pavarësi e demokraci dhe ndërtoi shtetin e vet.
Objektiv i të gjitha partive politike të viseve shqiptare u vendos: Kosova e pavarur, shqiptarët në Maqedoni të jenë në strukturën shtetërore, shqiptarët në Mal të Zi të kenë administratë lokale dhe në Preshevë.
Lëvizja demokratike për liri e pavarësi e Kosovës ishte për integrime evropiane e veriatlantike. Në saje të përpjekjeve të përbashkëta dhe me ndërhyrjen e NATO-s më 12 qershor të vitit ’99 Kosova u lirua.
Qe katër vjet pas luftës Kosova ka pasur një progres të mirë në të gjitha fushat e jetës. Kemi bashkëpunim të mirë më UNMIK-un dhe KFOR-in e OSBE-në. Institucionet e Kosovës bashkë me UNMIK-un po përgatiten për zhvillim ekonomik të vendit.

Pra do të kemi një Kosovë të pavarur, demokratike e paqësore me garanca për minoritetet dhe të gjithë qytetarët e saj të integruar në BE, në NATO dhe në miqësi të përhershme me SHBA. Njohja formale e pavarësisë do të qetësonte këtë pjesë të Evropës e të botës dhe do të shpejtonte zhvillimin ekonomik e demokratik.
Në 125-vjetorin e Lidhjes së Prizrenit do thënë se objektivat e saj ishin legjitime për mbrojtjen e territoreve të veta, ishin objektiva humane si të çdo populli dhe nuk ishte për marrjen e territoreve e të tjerëve. Jemi krenar me Lidhjen e Prizrenit që reflekton edhe në kohën tonë për të mirë.
Nga kjo Akademi solemne përshëndesim Presidentin Bush, Kryeministrin Bler, Presdientin Shirak, Kancelarin Shrëder dhe Kryeministrin Berluskoni. Si gjithmonë përshëndesim Papa Gjon Pali II, që gjithnjë lutet për Kosovën.
Zoti e bekoftë Lidhjen e Prizrenit!
Zoti i bekoftë shqiptarët!
Zoti e bekoftë Kosovën!


Presidenti Moisiu uron Rugovën për Lidhjen e Prizrenit

Tiranë, 10 qershor 2003 - Presidenti Moisiu nuk do të jetë i pranishëm në festimet me rastin e 125 -vjetorit të Lidhjes Shqiptare të Prizrenit. Në një telegram urimi dërguar presidentit të Kosovës, Moisiu shprehet se për shkak të angazhimeve të konfirmuara më përpara, nuk ka mundësi të jetë i pranishëm në këto ditë festimesh në Prizren.

Moisiu uron Rugovën për këtë datë të shënuar dhe vlerëson Lidhjen Shqiptare të Prizrenit, si një burim të pashtershëm frymëzimi për të gjithë shqiptarët në përpjekjet e tyre titanike për pavarësi.
"Brezat e sotëm e të ardhshëm e kujtojnë dhe do ta nderojnë atë, si një moment madhor dhe krenarie në historinë tonë kombëtare", shprehet Moisiu në telegramin e tij.

Duke përfunduar ai shkruan: "Më lejoni me këtë rast, zoti President, t'ju uroj Ju, dhe nëpërmjet Jush, të gjithë qytetarëve të Kosovës, gëzuar festën, mbarësi dhe suksese në përpjekjet Tuaja të mëdha për ndërtimin dhe forcimin e shoqërisë demokratike në Kosovës", transmetojnë mediat e Tiranës.


Presidenti Rugova ka dekoruar 37 personalitete të njohura nga Kosova dhe bota me "Medalje të artë të Lidhjes së Prizrenit"


Dekorimi i tyre është në procedurë e sipër sepse duhet përgatitu. Presidenti i Kosovës, po kështu, për herë të parë ka dekoruar 37 personalitete të njohura nga Kosova dhe vende të ndryshme të botës me dekoratën "Medalja e artë e Lidhjes Shqiptare të Prizrenit".
Në arsyetimin e kësaj dekorate, presidenti Ibrahim Rugova tha se dekorata "Medalja e artë e Lidhjes së Prizrenit" u jepet personaliteteve të njohura të shqiptarëve të Kosovës dhe institucioneve me motivacion për kontrbut në të mirë të shtetit të Kosovës dhe të popullit shqiptar në përgjithësi, për bashkëpunim dhe mirëkuptim për shqiptarët dhe integrime shqiptare si dhe për integrimin evropiane e evroatlantike.

Kjo medalje do t'u jepet edhe personaliteteve të jashtmem, miqtë e Kosovës dhe të popullit shqiptar për kontributin e tyre në ndriçimin e historisë, kulturës dhe jetës së shqiptarëve dhe personaliteteve që e ndihmojnë progresin e Kosovës, tha me këtë rast presidenti Rugova.
Të dekoruarit me "Medaljen e artë të Lidhjes Shqiptare të Prizrenit" nga Presidenti i Kosovës janë këto personalitete:
Kosovë:
Idriz Ajeti,
Mark Krasniqi,
Fehmi Agani,
Adem Jashari,
Ali Hadri,
Imzot Nikë Prela,
Anton Çetta,
Mehmet Gjevori,
Zekeria Cana,
Pajazit Nushi,
Sabri Hamiti,
Rexhep Ismajli,
Muhamet Shukriu,
Eqrem Kryeziu,
Jusuf Gërvalla.
SHBA:
Xhim Xhema,
Sami Repishti,
Xhozef Diogardi.
Maqedoni:
Shukri Rrahimi,
Ali Aliu.
Mali i Zi:
Mehmet Bardhi,
Ferhat Dinosha.
Preshevë:
Riza Halimi.
Itali - arbëreshët:
Antonio Bellushi
Shqipëri:
Presidenti i Shqipërisë Alfred Moisiu,
Eqrem Çabej,
Ismail Kadare,
Bujar Hoxha,
Azem Hajdari,
Naltmadhnia e Tij Leka I-rë,
Ernest Koliqi.
Nga bota:
Noel Malkolm,
Mishel Ruks,
Robert Elsie,
Leonard Foks.
Nga tradita:
At Gjergj Fishta,
At Shtjefën Gjeçovi.


Presidenti Rugova priti Leka Zogun


Ai tha me këtë rast se ka njoftuar Naltmadhninë me progresin që është bërë në Kosovë, me objektivat e institucioneve tona për zhvillimin ekonomik dhe me atë që ai insiston që Kosova të njihet sa më parë si një vend i pavarur, sepse në këtë mënyrë, tha presidenti Rugova, do të shpejtoheshin proceset ekonomike dhe demokratike.

"Por në të njëjtën kohë punojmë ngushtë me UNMIK-un që t'i realizojmë objektivat tona", tha presidenti Rugova, duke falënderuar Naltmadhninë e tij për shumë vite që ka përkrahur dhe ka mbrojtur çështjen e Kosovës dhe ka ndihmuar Kosovën dhe lëvizjen tonë në vitet 90-ta për liri dhe pavarësi.
Ndërkaq, Naltmadhnia e Tij Leka Zogu i Parë, pas takimit me presidentin Rugova uroi që sa më parë të realizohet vullneti i popullit të Kosovës për pavarësi, për të cilën siç u shpreh ai, populli i Kosovës ka sakrifikuar shumë, por ai shprehu dëshirën që Kosova dhe Shqipëria të jenë një shtet i përbashkët.


Rugova e Shtajner udhëtuan sot në Bruksel

Prishtinë, 10 qershor 2003 - Presidenti i Kosovës Ibrahim Rugova dhe shefi i UNMIK-ut Mihael Shtajner udhëtuan sot në mëngjes për në Bruksel ku do të flasin para Komitetit për Politikë të Jashtme të Parlamentit Evropian për situatën aktuale në Kosovë.


Në Prizren sot u zhvilluan një varg aktivitetesh kushtuar Lidhjes së Prizrenit


Duke folur në këtë tubim ministri i Kulturës Behxhet Brajshori tha: "Jemi këtu në Prizrenin e lashtë, në të cilin para 125 vjetëve u mbajt Kuvendi gjithëkombëtar dhe në të cilin morën pjesë delegatët nga të gjitha krahinat shqiptare".

Z. Brajshori tha se ky ishte kuvend i unitetit të të gjithë shqiptarëve të lodhur nga luftërat. Sikurse sot edhe atëherë, ishin prizrenasit bujarë ata të cilët i pritën në mënyrën më dinjitoze burrat më në zë të kombit për ta bërë kuvendin, tha ai.
Kryetari Asamblesë komunale të Prizrenti Eqrem Kryeziu, pasi përcolli përshëndetjet e Presidentit Rugova (i cili ndodhet jashtë vendit), për punët që kanë vajtur kaq mirë në përgatijet e kremtimit të këtij përvjetori, përshëndeti pjesëmarrësit e këtij tubimi nga të gjitha viset shqiptare.
Si sot para 125 vjetëve nisi shtegtimin e saj ngjarja e më e rëndësishme e popullit shqiptar në historinë më të re, tha Kryeziu. Ndërkaq, 120 e një vit më vonë gjenerali britanik Majk Xhekson, në të njëjtën ditë, natën ndërmjet 9 e 10 qershorit vuri firmën në dokumentin e Kumanovës, tha z.Kryeziu dhe pyeti athua Zoti luan me shifra?
Duke u përgjegjur, z.Kryeziu tha se sipas 10 qershorëve të Prizrenit duket se po.
"Kur historianët flasin për Lidhjen e Prizrenit ata shkruajnë për shoprtallimin, për disfatën e saj, por ne besojmë se LP pati një mision tjetër. Është si një lloj ajsbergu, ajo maja që shihet nuk është dhe ajo që nuk shihet është.

Dhe në këto raste historia e mirëfilltë bëhet pikërisht nga ajo që nuk shihet", theksoi Kryeziu. "Ne mendojmë se ka veprime, zhvillime ose ngjarje një dimensionale, afatshkurta, por ka edhe të tilla, shumëdimensionale afatgjate dhe njëra prej tyre ishte edhe Lidhja e Prizrenit", tha mes tjerash Eqrem Kryeziu, duke përkujtuar qëllimin e ndritshëm të krerëve të Lidhjes.
I ftuar të përshëndesë këtë tubim, Naltmadhnia e Tij Leka Zogu I përcolli përshëndetjet e përzemërta, siç tha, nga vëllezërit që janë në do troje të tjera.

Ai tha se e di se çka kanë bërë krerët e Lidhjes së Prizrenit për një atdhe e një komb të përbashkët, duke urur pjesëmarrësit që të kenë atë komb të përbashkët një ditë dhe gjithë të mirat për popullin shqiptar kudo që ndodhet, përfundoi Leka Zogu, duke thirrë: "Rroftë kombi shqiptar"!
Në vazhdim të këtij manifestim u shfaq një program i pasur artistik.
Po sot në Prizren për nder të këtij prëvjetori të Lidhjes së Prizrenit në galerinë e arteve në hamamin e qytetit u hap një eksçozitë me fotografi.
Ndërkaq po në këtë qytet i mbylli punimet konferenca shkencore kushtuar Lidhjes së Prizrenit, në të cilën morën pjesë me kumtesa historianë të vendit dhe nga bota.


I përmbylli punimet Konferenca shkencore kushtuar Lidhjes së Prizrenit


Në fund të konferencës Dr. Jusuf Bajraktari, drejtor i Institutit të Historisë në Prishtinë dhe organizator i konferencës falenderoi pjesëmarrësit dhe ligjëruesit për referimet, siç tha ai, mjaft të qëlluara dhe u shpreh shumë i kënaqur me rrjedhën e kësaj konference.
Ndërkaq, Dr. Ana Lalaj, drejtoreshë e Institutit të Historisë në Tiranë përmbylli konferencën shkencore. Ajo në këtë kontekst përmendi luftën dhe sakrificat e popullit shqiptar që bënë të mundur mbledhjen e të gjithë shqiptarëve këtu për të festuar festat në liri, siç është edhe kremtimi i 125-vjetorit të LSHP-së.


Në Prizren përfundoi festivali tradicional i SHKA "Prizreni 2003"

Prizren, 10 qershor 2003 - Më 7,8 dhe 9 qershor, me rastin e 125-vjetorit të Lidhjes së Prizrenit, në Prizren u mbajt festivali tradicional i SHKA "Prizreni 2003", i organizuar nga Forumi i Rinisë i LDK-së.
Veçanti e sivjetme ishte se për herë të parë festivali u mbajt në Kalanë e vjetër të qytetit në Prizren. Pjesëmarrës në këtë festival ishin shoqëritë kulturo- artistike nga të gjitha trevat shqiptare.
Në natën e tretë finale, për më të mirët u ndanë shpërblime, Çmimi i parë "Shoqëria më e kompletuar" për nga origjinaliteti, koreografia dhe interpretimi iu nda SHKA “Emin Duraku” nga Zhuri.
Edhe më këtë rast Forumi i Rinisë i LDK-së dëshmoi se di t'i çmojë dhe t'i kultivojë vlerat e mirëfillta tradicionale e autoktone të folklorit shqiptar.


Policia ka arrestuar një shqiptar për vrasje dhe akte të terrorizmit

Gjilan, 10 qershor 2003 - Policia ka arrestuar një shqiptar 23-vjeçar nën akuzën "konspiracion për vrasje dhe akte të terrorizmit". Hetuesit nga njësia e hetimeve të krimeve, të mbështetur nga njësitë speciale e kanë arrestuar të dyshimtin dje në një lokalitet të Gjilanit, njoftojn mediat lokale.

Arrestimi ishte pjesë e një operacioni të gjerë ku ishin bastisur disa shtëpi.
Arrestimi është vazhdimësi e hetimeve për incidentin e ndodhur më 7 mars në kufirin Kosovë-Serbi, ku policia serbe kishte vrarë dy persona të cilët po bartnin mjete shpërthyese në makinën e tyre.


Shtyhet për më 19 qershor seanca e radhës së Kuvendit të Kosovës

Prishtinë, 10 qershor 2003 - Kuvendi i Kosovës nuk do të mblidhet të enjtën e arshme në seancë plenare, pasi çështjet që është dashur të diskutohen nuk janë përgatitur ende.

Ndryshe në këtë seancë është dashur të diskutohet për procesin e privatizimit, rreth një platfome të përfaqësimit të Kosovës në samitin e Selanikut dhe për raportin lidhur me gjendjen në KEK. Pra takimi i radhës së Kuvendit të Kosovës do të mbahet më 19 qershor.
Kryetari i Kuvendit dhe katër anëtarë të Kryesisë kanë shkuar sot në Paris me ftesë të Senatit francez.


Kryetari i komunës së Gjilanit ngushëlloi komandantin e KFOR-it amerikan

Gjilan, 10 qershor 2003 - Kryetari i komunës së Gjilanit, Lutfi Haziri i ka dërguar një telegram ngushëllimi gjeneralit amerikan Daniel Kif, komandant i Brigadës Shumëkombëshe të Lindjes, në të cilin ai ndër të tjera thekson se aksidenti tragjik i dy ushtarëve amerikanë, është një ngjarje e dhembshme jo vetëm për familjet, ushtrinë dhe shtetin amerikan, por edhe për Kosovën dhe popullin e saj, ku ndodheshin në mision këta dy paqeruajtës.
"Se edhe ruajtja e paqes, ndonjëherë është po aq e vështirë sa edhe bërja e saj, dëshmon edhe ky rast që ndodhi në hapësirën ajrore të Kosovës.
Në emrin tim, të komunës dhe të qytetarëve të Gjilanit, juve z. gjeneral dhe familjeve të ushtarëve u shprehim ngushëllimet tona më të thella, me dëshirë që në Kosovë të mos ndjeni kurrë më dhembje të këtilla", thuhet në ngushëllimin e z. Haziri për gjeneralin Kif.


Me një sërë aktivitetesh vazhdojnë sot manifestimet për nder të 125-vjetorit të Lidhjes së Prizrenit

Prishtinë/Prizren, 10 qershor 2003 - Me një sërë aktivitetesh vazhdojnë sot manifestimet për nder të 125-vjetorit të Lidhjes së Prizrenit.
Në orën 12.00 do të bëhet përurimi i kompleksit të Lidhjes së Prizrenit. Ndërkohë në Prizren ditën e dytë po i vazhdon punimet konferenca shkencore kushtuar Lidhjes së Prizrenit.

Ndërkaq në orën 13.00 hapet ekspozita e fotografive në galerinë "Hamami". Po në Prizren në mbrëmje shfaq një koncert ansambli i këngëve dhe i valleve "Shota".
Në Teatrin Kombëtar në Prishtinë sonte për nder të 125-vjetorit të Lidhjes së Prizrenit do të shfaqet premiera e operas "Dasma arbëreshe".
Edhe në qytete të tjera të Kosovës organizohen aktivitete të ndryshme për nder të përvjetorit të Lidhjes së Prizrenit.


Banorët e fshatrave shqiptare që jetojnë në pjesën veriore të Mitrovicës kanë pranuar planin e KFOR-it

Mitrovicë, 10 qershor 2003 - Banorët e fshatrave shqiptare që jetojnë matanë Ibrit në pjesën veriore të Mitrovicës kanë pranuar planin e KFOR-it që ka të bëjë me lëvizjen e qytetarëve përgjatë aksit rrugor Suhodoll -ura kryesore e Ibrit në Mitrovicë.

Ky plan parasheh qarkullimin e qytetarëve në këmbë prej orës katër të mëngjesit deri në orën 20:00, ndërkaq për makinat deri në orën 24.00. Siç dihet aksi rrugor Suhodoll - Mitrovicë ishte i ndaluar për qarkullim nga ana e KFOR-it pas disa incidenteve ndëretnike që ndodhën në fillim të muajit maj.


Parlamenti kundër dekretit të Presidentit- Bisht Palla u jipet grekëve

Tiranë, 10 qershor 2003 - Parlamenti shqiptar mbrëmë ka hedhur poshtë me shumicë votash një dekret të presidentit të vendit, Alfred Moisiu, i cili kërkonte të rishikohej një marrëveshje dypalëshe shqiptaro-greke për ristrukturimin e bazës ushtarake të Bisht Pallës, në afërsi të Durrësit. Deputetët e maxhorancës votuan kundër, ndërsa ata të opozitës pro dekretit presidencial.
Ministri shqiptar i mbrojtjes, Pandeli Majko, tha se kjo nuk është një kundërvënie midis intitucionesh, por praktikë normale parlamentare.
Marrëveshja mes dy ministrive të mbrojtjes, të Shqipërisë dhe Greqisë, për rikonstruksionin e bazës me një fond grek prej afro 5 milionë eurosh u ratifikua fillimisht nga parlamenti në fillim të muajit mars.
Prej tre muajsh kanë vijuar pas kësaj debatet nëse duhet apo jo Shqipëria ta lërë në dorë të palës greke njërën prej bazave të saj më të rëndësishme detare e cila në fakt prej vitesh ka mbetur pas dore dhe nuk kryen ndonjë funksion.
Kritikët e marrëveshjes me palën greke shprehin rezerva lidhur me statusin e ushtarakëve grekë në territorin e Shqipërisë. Sekretari për marrëdhënie me publikun në PD, Spartak Ngjela ka argumentuar se momenti politik është kundër marrëveshjes, duke saktësuar se e ka fjalën për mospërfshirjen e Greqisë në luftën e Irakut.


Shkup: Amnisti për të gjithë ata që kanë refuzuar të kryejnë shërbimin ushtarak

Shkup, 10 qershor 2003 - Qeveria e Maqedonisë ka miratuar të hënën propozim-ligjin për të amnistuar të gjithë ata që kanë refuzuar të kryejnë shërbimin ushtarak e të cilët janë të moshës nga 27-30 vjeçe.
Sipas qeverisë, në këtë grup-moshë hyjnë të gjithë, pavarësisht nëse ndaj tyre janë ngritur padi penale ose jo. Shërbimi ushtarak në Maqedoni është i detyrueshëm për të gjithë meshkujt mbi 18 vjet, por siç thotë qeveria kjo amnesti ka aspektin qytetëruar dhe human.
Zëdhënësi, Sasho Çollakovski thotë: "Me këtë propozim-ligj, rregullohet çështja e amnistisë, për të gjithë ata që duhej të kryenin shërbimin ushtarak nga viti 1992, si dhe personat me moshë nga 27 deri më 30, ndaj të cilëve nuk ka ndjekje penale".
Pritet që me këtë akt të përftojnë mbi 15 mijë vetë.
Muajin e kaluar, Parlamenti në Shkup miratoi ligjin për shërbimin ushtarak, sipas të cilit u zvogëlua afati i shërbimit nga nëntë në gjashtë muaj.


Greqia ka pranuar të riathesojë në Shqiqpëri pesë monumente arkeologjike

Tiranë, 10 qershor 2003 - Greqia ka pranuar të riathesojë pesë monumente arkeologjike të grabitura në qytetin antik të Butrintit. Drejtori i Departamentit Arkeologjik të Sarandës Dimitër Çondi tha se pas bisedimeve me palën greke pritet që këto monujmente arkeologjike të identifikuara të kthehen në Shqipëri.
Ekspertët shqiptarë dhe ata grekë kanë ballafaquar pak ditë më parë informacionet për objektet që pala shqiptare i ka vlerësuar si autentike dhe të grabituara gjatë trazirave të vitit 1997 në Muzeun Arkeologjik të Butrintit.
Ndër objektet arkeologjike të grabitura me mjaft vlera konsiderohet shtatorja e Aleksandrit të Maqedonisë "Koka e dheut" dhe shtatorja e Apollonit që të gjitha të grabitura në Butrint.


Kryeministri serb thotë se bisedimet shqiptaro-serbe të jenë nën patronatin e bashkësisë ndërkombëtare

Beograd, 10 qershor 2003 - Kryeministri i Serbisë Zoran Zhivkoviq në një intervistë dhënë për të përditshmen serbe "Danas" ka thënë se bisedimet shqiptaro-serbe të jenë nën patronatin e bashkësisë ndërkombëtare, duke shtuar se ka shumë tema për bisedime, por siç ka thënë pas vrasjes që ka ndodhur në Obiliq siguria është tema e parë.

Sipas kryeministrit serb nuk është koha për implementimin e statusit përfundimtar të Kosovës. "Por sigurisht se është koha për fillimin e bisedimeve për statusin përfundimtar" citohet të ketë thënë Zhivkoviq.


Kidnapuesit kanë liruar 4 vëzhguesit e OKB-së, të rrëmbyer javën e kaluar

Tbilisi, 10 qershor 2003 – Kidnapuesit kanë liruar sot (e martë) katër vëzhguesit e Kombeve të Bashkuara, të cilët qenë rrëmbyer javën e kaluar derisa po mbikëqyrnin kufirin ndërmjet Gruzisë dhe provincës Abkhazia, e cila synon pavarësinë, ka bërë të ditur televizioni gruzian, njofton Rojter. Vëzhguesit e OKB-së, të liruar sot, janë dy gjermanë një holandez dhe përkthyesi i tyre vendës.


Forcat amerikane në Afganistan kanë vrarë 4 persona gjatë një shkëmbim zjarri

Bagram, 10 qershor 2003 – Forcat e udhëhequra nga amerikanët në Afganistan kanë vrarë sot (e martë) katër persona gjatë një shkëmbim zjarri prej tri-katër orësh afër kufirit me Pakistanin, njofton Rojter.

Kolonel Rodni Dejvis u ka thënë reporterëve në bazën ajrore të Bagramit, që gjendet në veri të Kabulit, se një numër luftëtarsh të panjohur kanë hapur zjarr në një patrullë afër bazës amëerikane në Shkin, në provincën juglindore Paktika, që kufizohet me Pakistanin. Viktima të ushtarëve amerikanë dhe të koalicionit s'ka pasur.
Ndërkaq, një zyrtar i sigurimit afgan, nga ana tjetër, ka thënë se trupat e pajetë të gjashtë luftëtarëve talibanë janë gjetur afër qytetit kufitar afgan, Spin Bodak. Ata shihet qartë se kanë pësuar plagë gjatë një beteje të madhe javën e kaluar ndërmjet forcave afgane dhe mbeturinave talibane, ku qenë vrarë rreth 40 talibanë, ka thënë ky zyrtar.


Lideri i lartë i Hamasit është plagosur nga helikopteri në Gaza

Gaza, 10 qershor 2003 – Lideri i lartë i Hamasit, Abdel Aziz al-Rantishi, është plagosur sot (e martë) nga të shtënat e shkrehura nga helikopteri në automjetin e tij në qytetin Gaza, ka thënë një burim i Hamasit, njofton Rojter.

Mjekët dhe burimet e Hamasit kanë thënë se Rantishi, një nga figurat më të njohura publike të lëvizjes militante islamike, është në gjendje të "mirë", po një grua, që po kalonte andejpari, është vrarë.

Po kështu, njoftohet se edhe rreth 10 persona të tjerë janë plagosur. Sulmi, me siguri, ka zemruar Hamasin dhe mund të provokojë dhunë të re.


Në Pakistan janë vrarë katër veta, njëri syresh zyrtar policie

Kueta, 10 qershor 2003 – Persona të armatosur kanë vrarë katër veta, njëri syresh zyrtar policie, në jugperendim të Pakistanit, vetëm një ditë pas sulmit kur u vranë 11 rekrutë policie në rajonin e njëjtë, njofton Rojter.

Një zyrtar policie ka thënë sot (e martë) se të armatosur të paidentifikuar kanë hapur zjarr në makinën e Abdul Azizit, shef policie në Sibi të provincës Baluçistan, i cili ka vdekur në vend. Edhe shoferi dhe një truproje e tij janë vrarë në vend, ka shtuar një tjetër zyrtar policie.

Po kështu, bëhet e ditur se në një incident tjetër është vrarë shoferi i një veture, kurse janë plagosur katër policë të tjerë dhe besohet se incidenti është i lidhur me rivalitetet fisnore.


Sulmues të armatosur kanë kidnapuar në Peru rreth 60 punëtorë

Lima, 10 qershor 2003 – Sulmues të armatosur kanë kidnapuar dje rreth 60 punëtaorë të punësuar në një kompani argjentinase, që ndihmon ndërtimin e gazsjellësit natyral në juglindje të Perusë, bëhet e ditur në një njoftim të sotëm (e martë) të qeverisë, njofton Rojter.

"Ata po kërkojnë një milion dollarë, pajime lidhjesh të nivelit të lartë teknik dhe lëndë shpërthyese", ka thënë sot (e martë) një zyrtar policie në Ajacuço, 360 km nga Lima.


Në një shpërthim të depos së municionit kanë humbur jetën tre irakianë

Bagdad, 10 qershor 2003 – Një shpërthim në një depo municioni ka pasur për rrjedhojë vrasjen e tre itrakianëve dhe plagosjen e dy të tjerëve, ka bërë të ditur sot (e martë) Komanda qendrore amerikane, njofton Rojter. Shpërthimi ka ndodhur në Ad Divanjah, rreth 75 mila nga Bagdadi. Njoftohet se forcat e koalicionit amerikan s’kanë pësuar viktima në këtë shpërthim.

Shkaku i shpërthimit ende nuk dihet, por nuk besohet të jetë “vepër armiqësore”. Po kështu njoftohet se në një incident tjetër, një zjarr ka shkaktuar një sërë shpërthimëesh në një depo municioni afër qytetit Qerbela, por s’ka shkaktuar viktima.


Pauell mirëpret hapat e para të Izraelit për shëmbjen e vendbanimeve të paligjshme hebraike

Uashington, 10 qershor 2003 - Sekretari amerikan i shtetit Kolin Pauell mirëpriti hapat e para të Izraelit për shëmbjen e vendbanimeve të paligjshme hebraike në Bregun Perëndimor.

Sekretari i shtetit tha se është i kënaqur që Izraeli bëri realitet zotimin e kryeministrit Ariel Sharon në takimin e nivelit të lartë javën e kaluar në Jordani. Zoti Paull përshëndeti gjithashtu zotin Sharon për shëmbjen e pikave të kontrollit, megjithë kërcënimet e kolonëve për demonstrata.


Presidenti Bush thotë se koha do ta provojë që Iraku zotëronte armë të ndaluara

Uashington, 10 qershor 2003 - Presidenti Bush thotë se koha do ta provojë që Iraku zotëronte një program armësh të shkatërrimit në masë. Presidenti thotë se historia do të tregojë se ai mori vendimin e duhur, kur urdhëroi për ndërhyrje ushtarake kundër Sadam Huseinit.
Adminitsrata e Presidentit Bush vazhdon të mbrohet ndaj akuzave se ka ekzagjeruar provat për armë të shkatërrimit në masë me qëllim që të justifikojë ndërhyrjen ushtarakë në Irak.
Pardje, zyrtarë të lartë të administratës hodhën poshtë akuzat në programe të rrjeteve televizive kombëtare dhe thanë se raporte të përsëritura tregonin që udhëheqësi irakian, Sadam Husein, kishte armë të shkatërrimit në masë dhe përpiqej t'i fshihte ato.