E hëne, 9 qershor 2003

9.06.2003 - Trepca.net

Lajme

E hëne, 9 qershor 2003

Përmbajtja:

Presidenti Rugova priti trashëgimtarët e pjesëmrrësve të Lidhjes së Prizrenit
Presidenti Rugova priti sekretarin e Komitetit të Biznismenëve të Turqisë
Presidenti Rugova sot zhvillon një sërë aktivitesh me rastin e 125-vjetorit të Lidhjes së Prizrenit
Leka Zogu mbajti një tribunë me qytetarët dhe u takua me kryeparlamentarin Daci
Në Prizren po i zhvillon punimet një konferencë shkencore për Lidhjen e Prizrenit
P.Mur: Beogradit nuk i duhet dhënë asnjë rol në bisedimet për statusin final të Kosovës
Në Gjilan për herë të dytë ndahet çmimi letrar "Beqir Musliu"
Sot fillojnë manifestimet kushtuar 125-vjetorit të Lidhjes së Prizrenit
Leka Zogu I po vazhdon me vizitën disaditëshe në Kosovë
Dy ushtarë amerikanë të KFOR-i kanë humbur jetën pas rrëzimit të një helikopteri
Një grup i punëtorëve të fabrikës së materialit ndërtimor "Përparimi" tash pesë ditë ka hyrë në grevë urie
Një zëdhënës finlandez i KFOR-it thotë se Kosova është një vend shumë i sigurt
Dy gra janë rrëmbyer në rajonin e Tetovës
Shqipëria dhe Maqedonia kanë nënshkruar marrëveshjen për luftën kundër krimit të organizuar
Ministri amerikan i Mbrojtjes më 10 qershor do të vizitojë Shqipërinë
Papa përfundon vizitën në Kroaci
Kryeqyteti i Mauritanisë është dridhur edhe sot nga buçitjet e granatimit
Një ushtar amerikan është vrarë në Irak
Helikopterët ushtarkë kanë filluar të evakuojnë qytetarët evropianë dhe amerikanë nga kryeqyteti i Liberisë
Abasi ka dënuar sulmet e së dieles kur u vranë 5 ushtarë iztraelitë dhe 5 sulmuesit e armatosur palestinezë
U kap sasi e madhe e drogës
Amnesti për kryenigritësit çeçenë
Numri i të vdekurve nga SARS në Kanada rritet në 33
Të pakten tre afganë janë vrarë kur një bombë ka shpërthyer në makinën e tyre
Pauell: Veprimtaritë terroriste nuk mund të ndalin përpjekjet e SHBA-së për të çuar përpara planin e paqes
Sharon tha se nuk do t'u bëjë lëshime palestinezëve
Polonia i tha po anëtarësimit në BE
Tigrat e Tamilit-rol udhëheqës
Vriten katër izraelitë dhe tre palestinezë

Presidenti Rugova priti trashëgimtarët e pjesëmrrësve të Lidhjes së Prizrenit


Trashëgimtarët e pjesëmarrësve të Lidhjes së Prizrenit e falënderuan Presidentin Rugova për pritjen dhe për organizimin e 125-vjetorit të Lidhjes së Prizrenit që është bërë nën patronatin e tij, tha pas takimit Avdyl Hoxha, trashëgimtar i Ymer Hoxhës nga Juniku.

Në këtë takim ishte edhe trashëgimtar i Binak Alisë, i cili ka qenë anëtar i Këshillit Drejtues të Lidhjes së Prizrenit, pastaj Skënder Korenica, trashëgimtar i Ahmet Korenicës, Rrustem Mulosmani (76 vjeç) nga Malsia e Gjakovës (Shqipëri), trashëgimtar i Mic Sokolit, i cili tha se ndien veten shumë krenar që pati mundësinë të vijë në këtë përvjetor të rëndësishëm dhe për herë të parë po e shkelte tokën e Kosovës.


Presidenti Rugova priti sekretarin e Komitetit të Biznismenëve të Turqisë

Prishtinë, 9 qershor 2003 - Presidenti i Kosovës Ibrahim Rugova priti sot sekretarin e Komitetit të Biznismenëve të Turqisë z. Xhelaletin Elmezxhan, i cili tubon 76 biznismenë të fushave të ndryshme ekonomike.
Zoti Elmezxhan, një biznismen me preardhje nga Kosova, duke folur në emër të afaristësve turq tha se ata janë të interesuar që kapitalin e tyre ta investojnë në Kosovë, si në miniera, në infrastrukturën rrugore e ndërtimore, kozmetikë, galanteri etj.
Ai tha se së shpejti një grup biznismenësh turq do të vizitojnë Kosovën për bisedime konkrete në dikasterë të ndryshëm për të investuar në Kosovë.


Presidenti Rugova sot zhvillon një sërë aktivitesh me rastin e 125-vjetorit të Lidhjes së Prizrenit

Prishtinë, 9 qershor 2003 - Presidenti i Kosovës Ibrahim Rugova në kuadër të shënimit të 125-vjetorit të Lidhjes së Prizrenit sot zhvillon një sërë aktivitesh.
Kështu në orën 13.30 Presidenti Rugova pret në një takim pasardhësit e pjesëmarrësve nga Kosova të Lidhjes së Prizrenit, ngjarjes historike të para 125 vjetëve.
Ndërkaq, në orën 16.30 Presidenti Rugova pret Naltmadhninë e Tij Leka Zogu I, i cili ndodhet në Kosovë me ftesë të Presidentit të Kosovës.
Poashtu sot pasdite në orën 17.00 në rezidencën e Presidentit do të zhvillohet ceremonia e dhënies së Medaljes së Artë të Lidhjes së Prizrenit që Presidenti Rugova u ka akorduar figurave të njohura kombëtare.
Sonte në Teatrin Kombëtar në Prishtinë Presidenti i Kosovës Ibrahim Rugova mban fjalën kryesore në Akademinë Solemne me rastin e shënimit të 125-vjetorit të Lidhjes së Prizrenit, që mbahet nën patronatin e Presidentit.


Leka Zogu mbajti një tribunë me qytetarët dhe u takua me kryeparlamentarin Daci


Gjatë ditës së sotme Leka Zogu I është takuar edhe me kryeparlamentarin e Kosovës Nexhat Daci, i cili tha se me Naltmadhninë e tij Leka Zogu kishin pikëpamje identike për të ardhmen e shqiptarëve dhe të rajonit në përgjithësi. Daci shtoi se Naltamdhnia e tij e njeh shumë mirë historinë dhe të kaluarën dhe të sotmen e shqiptarëve.


Në Prizren po i zhvillon punimet një konferencë shkencore për Lidhjen e Prizrenit

Prizren, 9 qershor 2003 - Kremtja e madhe për shqiptarët - manifefestimi i 125-vjetorit të Lidhjes SHqiptare e Prizrenit, sot filloi në Prizren dhe pikërisht në amfiteatrin e SHLP-së "Xhevdet Doda" me konferencën shkencore me temën "LSHP-ja dhe vendi i saj në histori", konferencë kjo e cila ka mbledhur studiues nga të gjitha trevat shqiptare dhe diaspora si dhe studiues të huaj në krye me dr. Noel Malkolm.
Konferencën e hapi akademik Rexhep Ismaili, kryetar i Akademisë së Shkencave dhe të Arteve të Kosovës, i cili veç tjerash tha se LSHP-ja shkoi drejt emancipimit të përgjithshëm dhe drejt krijimit të shtetit të pavarur kombëtar si dhe i dha një hov të ri zhvillimeve të tërësishme midis shqiptarëve.
I pari me kumtesën me titull "LSHP-ja dhe vendi i saj në historinë e kombit shqiptar" në këtë konferenc shkencore u paraqit dr. Jusuf Bajraktari, i cili veç tjerash tha se Lidhja e Prizrenit ishte organizatë e përgjithshme shqiptare e cila e udhëhoqi luftën e popullit shqiptar për mbrojtjen e tërësisë territoriale të vendit dhe për autonominë kombëtare në kohën e krizës lindore dhe i dha vulën e vet të pashlyeshme kësaj periudhe historike.
Në këtë konferenc me kumtesat e tyre u paraqitën edhe referues të tjerë si akademik Kristaq Prifti nga Tirana me temën "Koncepti i Lidhjes së Prizrenit për shtetin shqiptar", Dr. Noel Malcolm me temën "Diplomatët britanikë dhe Lidhja e Prizrenit në vitet 1878-1880" si dhe studiues të tjerë nga të gjitha trevat shqiptare.


P.Mur: Beogradit nuk i duhet dhënë asnjë rol në bisedimet për statusin final të Kosovës

Pragë, 9 qershor 2003 - "Ka disa gjëra praktike që duhen diskutuar, si për shembull për kufijtë mes pronave, pasi është një gardh që duhet rregulluar, etj.

Dhe kjo është diçka që Kosova duhet të diskutojë me Serbinë, Malin e Zi, Maqedoninë, Shqipërinë, do të duhet të diskutojë strukturën e vendkalimeve kufitare. Kjo është absolutisht normale dhe e qartë si çështje", thotë analisti i radios "Evropa e lirë" Patrik Mur në lidhje me bisedimet mes Prishtinës dhe Beogradit.
Duke komentuar mendimet e shprehura që Beogradit duhet t'i jepet një rol në çështjen e statusit final të Kosovës, analisti Mur thotë se "kjo është helm"!
"Së pari për serbët në Kosovë, pasi i inkurajon që të shikojnë nga Beogradi për të patur përgjigje për problemet e tyre. Atyre i'u bë e qartë nga Gjingjiqi dhjetorin e kaluar që e ardhmja e Kosovës do të vendoset në Kosovë dhe jo në Dedinje dhe që do të duhet të shikojnë nga Kosova si burim të zgjidhjes së çështjes së tyre", thotë ky analist.

Sipas tij, "çdo përpjekje për të përfshirë Beogradin, thjesht krijon një iluzion për serbët në Kosovë që qendra e tyre politike vazhdon të mbetet në Beograd".
Ai është e mendimit se "për serbët e Serbisë ky problem është gjithashtu i rrezikshëm, pasi ata kanë mjaft probleme me të cilat u duhet të përballen, si krimi i organizuar, korrupsioni, mafia, situata jo e qëndrueshme politike. Nuk u nevojitet dhe ngritja e një çështjeje nacionaliste në Kosovë", thotë Mur.
"Çështjet praktike me të gjithë fqinjët janë diçka normale. Por Beogradi e humbi luftën për Kosovën dhe të gjithë ata që humbin luftëra duhet të pranojnë që humbin edhe territore dhe kjo është ajo që po ndodh. Procesi i dekolonizimit dhe i shpërbërjes së Jugosllavisë po vazhdon dhe Beogradit nuk i duhet dhënë asnjë rol në bisedimet për statusin final të Kosovës", nënvizon analisti i "Evropës së lirë", Patrik Mur.


Në Gjilan për herë të dytë ndahet çmimi letrar "Beqir Musliu"

Gjilan, 9 qershor 2003 - Që nga viti i kaluar, në shenjë nderimi për shkrimtarin e njohur, Beqir Musliu, komuna e Gjilanit ka filluar të ndajë çmimin letrar për veprimtari jetësore, i cili u jipet autorëve më eminente të letrave shqipe dhe atyre botërore, në bazë të vendimit të një jurie të veçantë.
Ky çmim letrar do të jepet edhe sivjet, gjatë muajit qershor, kur janë përvejtorët e lindjes dhe të vdekjes së shkrimtarit Beqir Musliu, ndërsa organizatori tashmë ka emëruar edhe jurinë (dr. Ali Aliu, kritik letrar dhe anëtar i ASHAK-ut, Ibrahim Kadriu, shkrimtar dhe Sabit Rrustemi, shkrimtar), cila së shpejti do të komunikojë edhe fituesin e radhës.
Çmimi letrar "Beqir Musliu", që jepet për veprimtari jetësore letrare, autorit fitues do t'i dorëzohet me 24 qershor, nga kryetari i komunës, gjatë një akademie solemne.
Fitues i parë i këtij çmimi, që filloi të ndahet nga viti i kaluar, ishte poeti i mirënjohur Ali Podrimja.


Sot fillojnë manifestimet kushtuar 125-vjetorit të Lidhjes së Prizrenit

Prishtinë, 9 qershor 2003 - Sot fillojnë manifestimet e ndryshme kushtuar 125-vjetorit të Lidhjes së Prizrenit, të cilat do të vazhdojnë edhe më 10 e 11 qershor.
Në Prizren sot pardite i zhvillon punimet një konferencë shkencore e titulluar "Lidhja Shqiptare e Prizrenit dhe vendi i saj në histori".
Ndërkaq, në orën 20,00 në Prishtinë në Teatrin Kombëtar mbahet një akademi solemne kushtuar kësaj date të rëndësishme të historisë sonë, ku do të flasë Presidenti i Kosovës Ibrahim Rugova.


Leka Zogu I po vazhdon me vizitën disaditëshe në Kosovë

Prishtinë, 9 qershor 2003 - Pretendenti i fornit shqiptar Leka Zogu I po vazhdon vizitën disaditëshe në Kosovë. Të shtunën ai ka vzitituar Prizrenin, Gjakovës dhe Pejën, dhe kudo është pritur ngrohtësisht ithtarët e tij. Ndërka të dielën Leka Zogu ka vizituar kompleksin memorial të Jasharajve në Prekaz, dhe ka vënë lule mbi varrin e komandantit Adem Jashari.
Dje pasdite Leka Zogu ka arritur në Prishtinë dhe gjatë ditës së sotme do të zhvillojë takime me udhëheqësit e Kosovës.
Ai ka ardhur në këtë vizitë me ftesë të presidentit të Kosovës Ibrahim Rugova dhe do të marrë pjesë në manifestimin qendror kushtuar 125-vjetorit të Lidhjes Shqiptare të Prizrenit.


Dy ushtarë amerikanë të KFOR-i kanë humbur jetën pas rrëzimit të një helikopteri

Bonstill - Ferizaj, 9 qershor 2003 - Dy pjesëtarë paqeruajtëse amerikane në Kosovë kanë humbur jetën në orët e mëngjesit të djeshëm pas rrëzimit të një helikopteri, njofton KFOR, duke mos dhënë hollësi rreth vendit të rrezikut, por kanë përjashtuar mundësinë e ndonjë aktiviteti armiqësor.

Ende nuk është bërë i ditur identiteti i ushtarëve të vdekur, derisa të njoftohen familjet e tyre. Siç njoftuan zyrtarët nga kampi ushtarak amerikan në "Bondstill", ku janë të vendosur pjesëtarët e KFOR-it amerikan, hetimet rreth këtij rasti janë në zhvillim e sipër. Ndërkaq hetimet e para nuk tregojnë se ky akt ka të bëjë me ndonjë qëllim armiqësor.
Një zyrtare për informim në KFOR-in amerikan në Bonstill, majorja Luton tha për BBC-në se rrethanat në të cilat ka ndodhur kjo fatkeqësi ajrore janë të pasqaruara. "I vetmi informacion që kam tash është se herët në mëngjes një helikopter 'Apaç' është rrëzuar dhe me këtë rast kanë humbur jetën dy pilotë", tha majorja Luton. Ajo njoftoi se në momentin kritik në helikopter përveç dy paqeruajtësve tashmë të vdekur nuk ka pasur persona të tjerë.
Deri më tash në incidente të ndryshme në Kosovë kanë humbur jetën mbi 100 paqeruajtës të KFOR-it gjatë shërbimit të tyre në kuadër të misionit paqeruajtës në Kosovë.


Një grup i punëtorëve të fabrikës së materialit ndërtimor "Përparimi" tash pesë ditë ka hyrë në grevë urie

Skënderaj, 9 qershor 2003 - Në fabrikën e materialit ndërtimor "Përparimi" në Skënderaj, 25 punëtorë tash pesë ditë po vazhdojnë grevën e urisë me kërkesën kryesore për dorëheqje të Bordit drejtues. Gjendja e tyre shëndetësore gjithnjë e më shumë po keqësohet.

Ata kërkojnë nga AKM-ja që të mos privatizohet pasuria e kësaj fabrike pa pëlqimin e tyre, ndërkaq nga drejtuesit e këtij kolektivi kërkojnë që të përmbushën të ardhurat personale të tyre. Grevistë thonë se nuk do ta ndërprejnë grevën e urisë deri sa të përmbushën të drejtat e tyre.


Një zëdhënës finlandez i KFOR-it thotë se Kosova është një vend shumë i sigurt

Prishtinë, 9 qershor 2003 - Një zëdhënës i kontigjentit finlandez i KFOR-it thotë se Kosova është një vend shumë i sigurt pavarësisht nga vrasja e tre serbëve që ka ndodhur në Kastriot.

Majori Tuan Ape ka deklaruar për "Evropën e lirë" se KFOR-i është në Kosovë për t'iu ofruar mbrojtje të gjithë qytetarëve të Kosovës e jo vetëm familjeve serbe. Këto komente i bëri pas një vendimi të serbëve në Kastriot apo Obiliq, që të shpërngulen kolektivisht nga Kosova. Sipas mendimit të tij Kosova ende është një vend shumë i sigurt për të jetuar, pasi vrasja në Obiliq ishte një incident i vetmuar.
Ky zëdhënës ka shtuar se vetëm 500 - 600 mijë njerëz jetojnë vetëm në rajonin e Prishtinës po aq sa jetojnë edhe në Helsinki në kryeqytetin e Finlandës.
"Në vendin tim në Finlandë ne kemi shumë më shumë akte kriminale dhe shumë më shumë vrasje dhe të gjithë e konsiderojnë atë një vend të sigurt. Dhe dua të them se Kosova është një vend i sigurt për të jetuar kosovarët" tha majori Tuanape, duke u bërë thirrje serbëve që të qëndrojnë në shtëpitë e tyre.


Dy gra janë rrëmbyer në rajonin e Tetovës

Tetovë, 9 qershor 2003 - Dy gra janë rrëmbyer të shtunën në mbrëmje në rajonin e Tetovës. Gratë, njëra shtetase bullgare dhe tjetra me shtetësi maqedonase kanë punuar si kamariere në një kafiteri të fshatit Trebosh.

Burimet policore kanë bërë të ditur se katër persona të armatosur me pushkë automatike kishin ardhur në atë mbrëmje në kafiterinë "Pelaria" dhe dy prejt tyre kishin urdhëruar rreth 20 mysafirët e pranishëm, që të largoheshin.

Rrëmbyesit morën me vete dy gra dhe i kishin futur në një autoveturë. Policia ende nuk e ka bërë të ditur identitetin e sulmuesve dhe as motivet e tyre, ndërkaq ata gjenden në arrati.


Shqipëria dhe Maqedonia kanë nënshkruar marrëveshjen për luftën kundër krimit të organizuar

Tiranë, 9 qershor 2003 - Shqipëria e dhe Maqedonia kanë nënshkruar në Pogradec marrëveshjen e bashkëpunimit për luftën kundër krimit të organizuar të trafiqeve.

Nga pala shqiptare këtë marrëveshje e kanë firmosur zëvendësdrejtori i përgjithshëm i sektorit për zbulimin e krimeve Shelqim Thaçi dhe drejtori i antidrogës shqiptre Arben Noce, ndërkaq na pala maqedonase dy zyrtarë të lartë të Ministrisë së Brendshme Drago Jankovski dhe Rade Jankovski. Kjo është marrëveshja e parë në këtë fushë midis dy vendeve që nga ardhja në pushtet e Branko Cërvenkovski.
Këto dy vende do të angazhohen në luftë kundër krimit të organizuar dhe trafikut. Pikë e veçantë ishin edhe trafiqet me mjete motorike, sidomos përgjatë Liqenit të Pogradecit si dhe nga persona që kalojnë tranzist nga Maqedonia n ë Shqipëri.


Ministri amerikan i Mbrojtjes më 10 qershor do të vizitojë Shqipërinë

Tiranë, 9 qershor 2003 - Ministri amerikan i Mbrojtjes Donald Ramsfeld do të vizitojë ditët e ardhshme Shqipërinë. Gjatë kësaj vizite që pritet të realizohet më 10 qershor synohet që t'i shprehet falënderimi Shqipërisë për mbështetjen e dhënë gjatë luftës në Irak.

Mediat shqiptare citojnë burime nga Ministria e Mbrojtjes të Shqipërisë të thonë se vizita e Ramsfeldit në Tiranë do të ketë objekt edhe gatishëmërinë e shprehur nga Shqipëria për të vendosur në territorin e saj një prej bazave ushtarake amerikane. Kohët e fundit Pentagoni ka bërë të ditur planet për një rishpërndarje të bazave amerikane të vendosura në Evropë.


Papa përfundon vizitën në Kroaci

Zarë, 9 qershor 2003 - Me një meshë në qytetin bregdetar Zara, Papa Gjon Pali përfundon të hënën vizitën e tij në Kroaci. Me kët rast pritet të mblidhen dhjetra mijëra besimtarë. Një ditë më parë kreu i kishës katolike ishte takuar me kryeminsitrin kroat Ivica Raçan.

Raçan nga vizita e Papës shpreson për një antarësim të shpejtë të Kroacisë në BE. Vizata në Kroaci ishte udhëtimi i njëqind në botë i kreut 83 vjeçar të kishës katolike.


Kryeqyteti i Mauritanisë është dridhur edhe sot nga buçitjet e granatimit

Nouakchott, 9 qershor 2003 – Kryeqyteti i Mauritanisë është dridhur sot (e hënë) nga buçitjet e granatimit derisa trupat puçiste po luftonin me trupat lojale të presidentit të këtij vendi veriperendimor afrikan, i cili është një mik i rrallë arab i Izraelit, njofton Rojter.

Luftimet në disa fronte: në qendër të qytetit, në aeroport dhe në periferitë jugore, që ndodhën pas një nate të qetë dhe vetëm disa orë pasi një zyrtarë i lartë kumtoi se tentim grushtshteti kishte marrë fund dhe ishin arrestuar puçistët.

Ky ishte kërcënimi më serioz ndaj presidentit Maouja Ould Sid Ahmed Taja që kur e ka marrë pushtetin me grushtshtet pa gjakderdhje, më 1984.


Një ushtar amerikan është vrarë në Irak

Bagdad, 9 qershor 2003 – Një ushtar amerikan është vrarë në Irak me armë të vogla zjarri derisa po rregullonte trafikun në një pikë kontrollii në Kaim në kufi me Sirinë, kanë bërë të ditur sot (e hënë) zyrtarët ushtarakë, njofton Rojter.

Në njoftim thuhet se disa sulmues iu kanë afruar pikës së kontrollit dhe kanë kërkuar ndihmë për një person në automjet dhe pastaj dy persona të armatosur me revole kanë dalë nga makina dhe e kanë vrarë ushtarin.

Ushtatrët në pikën e kontrollit ua kanë kthyer zjarrin sulmuesve dhe kështu kanë vrarë njërin syresh, një tjetër e kanë arrestuar, kurse së paku një sulmues ka ikur me makinë, thuhet në deklaratën e ushtrrisë amerikane.


Helikopterët ushtarkë kanë filluar të evakuojnë qytetarët evropianë dhe amerikanë nga kryeqyteti i Liberisë

Monrovia, Liberi, 9 qershor 2003 – Helikopterët ushtarkë kanë filluar të evakuojnë qytetarët evropianë dhe të SHBA-ve nga kryeqyteti i Liberisë, i cili është rrrethuar nga forcat kryengritëse, njofton BBCWorld.

Trupat franceze, të armatosura rëndë kanë dalë nga helikopterët pasi kishin ateruar në bazën e BE-së në Monrovia para se të merrnin perendiomorët në anijet franceze, të cilat prisnin në bregdet. Luftëtarët kryengritës i kanë dhënë të dielën presidentit Çarl Tejlor një ultimatum për dorëheqje brenda 72 orësh ose të përballet me rifillimin e sulmeve.


Abasi ka dënuar sulmet e së dieles kur u vranë 5 ushtarë iztraelitë dhe 5 sulmuesit e armatosur palestinezë

Ramallah, 9 qershor 2003 – Kryeministri palestinez, Mahmud Abas, ka dënuar sulmet e reja të grupeve militante, që kërcënojnë planin e paqes të mbështetur nga SHBA-të dhe është zotuar të përpiqet për të bindur ata të pajtohen me armëpushimin, njofton Rojter.

"Pozita e qeverisë është dënimi i të dy sulmeve", ka deklaruar Abas në një konferencë shtypi, të mbajtur në Ramallah të Bregut Perendimor pas sulmeve të së dieles, në të cilat u vranë 5 ushtarë iztraelitë, kurse trupat vranë 5 sulmuesit e armatosur palestinezë.

Lidhur me përpjekjet për të bindur militantët, ai tha se nuk do të detyroje askë për bisedime, por u shpreh se "për ne s'ka alternativë dialogu".


U kap sasi e madhe e drogës

Londër, 9 qershor 2003 - Në Britani të Madhe është kapur një sasi heroine dhe kokaine në vlerë prej 50 milionë euro. Autoritetet doganore dhe ato të policisë gjatë një aksioni kanë zbuluar dhe konfiskuar një sasi prej 400 kg heroinë me një vlerë të shitjes në rrugë prej 42 milionë euro dhe 120 kilogramë kokainë në vlerë prej 11 milionë euro.

Siç njoftojnë burime të doganës, janë arrestuar 14 persona, të cilët janë të ndërlikuar në rrjetin e kontrabandës me drogë. Këto sasi të mëdha janë kontrabanduar në portin Felikstaun në Anglinë jugore.


Amnesti për kryenigritësit çeçenë

Moskë, 9 qershor 2003 - Pas aprovimit të Parlamentit rus të një amnistie të kufirzuar për kryengritësit çeçenë, sipas njoftimeve ushtarake është dorëzuar seperatisti i parë.

Një person nga pjesa juglindore e Groznit u është dorëzuar bashkë me armën e tij autoriteteve zyrtare, ka cituar agjencia Interfaks një zëdhënës të ushtrisë ruse. Parlamenti rus të premtën ka aprovuar një amnesti të kufizuar për kryengritësit rusë, të propozuar nga presidenti Putin.

Amnistia vlen për ata kryengritës që dorëzojnë armët deri më një shtator. Amnistia gjithashtu vlen edhe për ushtarët rusë në Çeçeni, të cilët nga organizatat për drejtët e njeriut akuzohen për krime kundër popullatës civile.


Numri i të vdekurve nga SARS në Kanada rritet në 33

Toronto, 9 qershor 2003 - Në Kanada kanë vdekur edhe dy persona të tjerë nga sëmundja e mushkrive Sars. Siç njoftojnë autoritetet zyrtare numri i të vdekurve nga kjo sëmundje në Kanada rritet në 33. Aktualisht edhe 21 persona ndodhen në gjendje kritike.

Në përgjithësi në trajtim mjeksor ndodhen 68 persona. Kanadaja duke përjashtuar vendet aziatike, është vendi më i goditur nga sëmundja Sars. Sipas Organizatës Botërore të Shëndetësisë, deri më tani në tërë botën janë njoftuar 8.400 raste të sëmundjes Sars.


Të pakten tre afganë janë vrarë kur një bombë ka shpërthyer në makinën e tyre

Kabul, 9 qershor 2003 – Të pakten tre afganë janë vrarë kur një bombë ka shpërthyer në makinën e tyre, me të cilën udhëtonin, kanë bërë të ditur sot (e hënë) mediat shtetërore, njofton Rojter. Shpërthimi ka ndodhur në distriktin Panxhuej të Kandaharit.

Provinca e Kandaharit ka qenë vatër e një sërë sulmesh dhe shpërthimesh që nga fillimi i vitit dhe qerveria për këtë ka fajësuar mbeturinat e regjimit taliban dhe të rrjetit të Al Kaidës, që veprojnë nga Pakistani, ku janë të strehuar.


Pauell: Veprimtaritë terroriste nuk mund të ndalin përpjekjet e SHBA-së për të çuar përpara planin e paqes

Uashington, 9 qershor 2003 - Sekretari amerikan i Shtetit, Kolin Pauell thotë se Shtetet e Bashkuara nuk do të lejojnë që një sulm vdekjeprurës nga tri grupe estremiste palestineze ndaj trupave izraelite të minojë prosecin e paqes në Lindjen e Mesme.
Zoti Pauell tha se veprimtaritë terroriste nuk mund të ndalin përpjekjet e Shteteve të Bashkuara për ta çuar përpara planin e paqes. Ai shtoi se Shtetet e Bashkuara do të bëjnë gjithçka të mundëshme për të ndihmuar Kryeministrin palestinez, Mahmoud Abaz që të ndalë sulmet terroriste kundër izraelitëve.
Kryeministri izraelit, Ariel Sharon, tha se Izraeli nuk do të bëjë asnjë lëshim ndaj palestinezëve deri sa zoti Abbaz të marrë masa vendimtare kundër terrorit.


Sharon tha se nuk do t'u bëjë lëshime palestinezëve

Tel Aviv, 9 qershor 2003 - Kryeministri izraelit, Ariel Sharon ka thënë se vendi i tij nuk do t'u bëjë lëshime palestinezëve sipas planit të ri të paqes derisa ata t'i japin fund dhunës.

Zoti Sharon gjithashtu hodhi poshtë në mënyrë kategorike kërkesën palestineze për të lejuar refugjatët të kthehen në Izrael.
Komentet e tij vijnë pas një sulmi të përbashkët të tre grupeve palestineze që vranë katër ushtarë izraelitë në postbllokun kufitar në Rripin e Gazës.
Një zyrtar i lartë palestinez, Nabil Abu Rudeina tha se komentet e zotit Sharon tregonin se Izraeli nuk dëshironte paqe dhe nuk donte të vazhdonte me planin e ri të paqes.


Polonia i tha po anëtarësimit në BE

Varshavë, 9 qershor 2003 - Në Poloni numri më i madh i votuesve i ka thënë "Po" antarësimit në BE. Komisioni që ka numëruar votat ka njoftuar se tre të katërtat, ose rreth 75,6 për qind e zgjedhësve u dëklaruan për antarsim në BE gjatë referendumit dy ditor.

Rezultati definitiv do të dihet të hënën në mbrëmje. Në pallatin presidenacial dhe në zyrën e kryeministrisë ka patur festime pas njoftimit të këtyre rezultateve.

Në rrugët e Varshavës kanë festuar edhe shumë të rinj në shenjë të rezultateve të referndumit. Presidenti polak Aleksander Kvasnievski theksoi se polakët tani iu kthyen prapë Evropës.


Tigrat e Tamilit-rol udhëheqës

Tokio, 9 qershor 2003 - Kryeministri i Sri Lankës, Ranil Wickremesinghe i ka ofruar rebelëve të Tigrave të Tamilit një rol të përkohshëm administrativ në mbikqyrjen dhe drejtimin e rindërtimit të bastijës së tyre në veri dhe lindje.

Ai e bëri këtë ofertë në një takim të konferencës së donatorëve në Tokio e cila po mundohet të sigurojë ndihma financiare për Sri Lankën pas dy dekadave të luftës civile.
Tigrat e Tamilit u larguan nga bisedimet paqësore muajin e kaluar duke thënë se përparimi ka qenë shumë i ngadaltë dhe refuzuan të marrin pjesë në konferencën e Tokios.


Vriten katër izraelitë dhe tre palestinezë

Tel Aviv, 9 qershor 2003 - Në një sulm të palestinezëve ndaj një posti të ushtrisë në kalimin kufitar Erez në Rripin e Gazës, sipas të dhënave të qeverisë izraelite janë vrarë katër izraelitë. Edhe tri sulmuesit u humbën jetën. Ky ishte atentati i parë që prej takimit të nivelit të lartë të Akabës të mërkurën e kaluar, takim në të cilin të gjitha palët ranë dakord për vënien sa më shpejt në jetë të planit të paqes.

Tri grupe palestinezësh e morën përgjegjësinë për aksionin. Me të ata donin të bënin të qartë se kryengritja e armatosur do të vazhdojë, deklaruan së bashku Hamasët, Xhihadi Islamik dhe brigadat Al Aksa