Lajme

E shtune, 31 maj 2003

Përmbajtja:

• Shtajner emëroi një bord këshilldhënës në veriun e Mitrovicës, por atë e kundërshton pala shqiptare

• Disa policë ndërkombëtarë janë lënduar në pjesën veriore të Mitrovicës nga një grup serbësh

• Ros Xhonson thotë se çështja e pavarësisë së Kosovës duhet diskutuar para vendosjes së demokracisë

• Këshilltari i Presidentit flet për Kosovën në një takim në Londër

• Xhaz ambasadorët amerikanë vijnë në Kosovë

• Mbahen seminare për të drejtat e njeriut të komunitetit rom, ashkali e egjiptas

• UNMIK-u nuk i komenton reagimet e shqiptarëve për emërimin e Bordit Këshilldhënës në veriun e Mitrovicës

• Kroacia ka ndaluar importin e bagëtive dhe të produkteve të mishit nga gjashtë vende evropiane dhe Kanadaja

• Presidenti Bush shpall "listën e zezë" në të cilën ndodhen emrat e 150 personave nga Ballkani

• Dy ushtarë amerikanë kanë humbur jetën dhe 7 të tjerë janë lënduar në një aksident trafiku në Irak

• Dy ushtarakë rus janë vrarë sot në Çeçeni

• Bush në Poloni

• Grup i ri për gjetjen e armëve

• M.Toner: Urdhëri i ri ekzekutiv i Bushit ngodet të gjithë individët dhe organizatat që pengojnë proceset në Ballkan

• Raste të reja me SARS në Kanada

Shtajner emëroi një bord këshilldhënës në veriun e Mitrovicës, por atë e kundërshton pala shqiptare

 

Mitrovicë, 31 maj 2003 - Administratori i Kosovës Mihael Shtajner emëroi një organ këshilldhënës në veriun e Mitrovicës, i cili sipas zyrtarëve të UNMIK-ut do të ndihmojë administratën e këtij misioni në këtë pjesë të qytetit. Në këtë organ janë emëruar përfaqësues të komuniteteve që jetojnë në pjesën veriore të Mitrovicës, ndërkaq ai do të drejtohet nga Mina Javrenpaa, administratore rajonale e Mitrovicës.

Menjeherë pas shpalljes, udhëheqësit shqiptarë të Mitrovicës e kanë kundërshtuar ashpër këtë vendim të kryeadministratorit Shtajner për emërimin e një bordi në veriun e Mitrovicës, duke u shprehur të pakënaqur me emrat të cilët janë të përfshirë në këtë bord.

"Këtu janë përfshirë emrat e njerëzve të cilët janë udhëheqës të bandave. Këta emra janë përfolur shumë më herët në mediat serbe, mirëpo në atë kohë janë demantuar nga UNMIK-u", thotë Faruk Spahija, kryetar i Kuvendit Komunal të Mitrovicës. Ai e ka akuzuar kryeadministratorin Shtajner, që nuk është duke realizuar planin për bashkimin administrativ të Mitrovicës në të cilin deri tash ka besuar edhe vetë z. Spahija.

Kryetari i Komunës së Mitrovicës gjithashtu tha se bordi është formuar me sugjerimet e zëvendëskryemninistrit serb Nebojsha Çoviq.

 

Për udhëheqjen komunale një vendim i tillë është i papranueshëm, ngase në mesin e gjashtë serbëve të emëruar, ka edhe persona që janë drejtues të formacionit "Rojat e urës", të cilët kanë ushtruar dhe vazhdojnë të shkaktojnë dhunë ndaj popullatës civile shqiptare.

 

Në këtë bord ka hyrë edhe Milan Ivanoviq, i njohur si udhëheqës i "këshillit kombëtar serb" për veriun e Kosovës.

 

 

Disa policë ndërkombëtarë janë lënduar në pjesën veriore të Mitrovicës nga një grup serbësh

 

Mitrovicë, 31 maj 2003 - Disa policë ndërkombëtarë janë lënduar në pjesën veriore të Mitrovicës nga një grup serbësh. Incidenti ka ndodhur kur policia ndërkombëtare i është përgjigjur kërkesës së një qytetari shqiptar për t'i asistuar atij në bartjen e materialit ndërtimor në "Lagjen e Boshnjakëve" në veri të Mitrovicës.

 

Turma e serbëve të zemëruar me të parë policinë ndërkombëtare, duke ndihmuar këtë banor shqiptar që po drejtonte automjetin me targa të Kosovës, ka fillur të qëllojë me gurë dhe gjësende të tjera policinë. Ndërkohë, një nga policët është grushtuar nga një sulmues serb.

 

Policia në Mitrovicë ka njoftuar se i dyshuari është arrestuar, ndërkaq policët e lëndaur nuk janë në gjendje të rëndë shëndetësore. Po ashtu njoftohet se qytetari shqiptar ka pësuar lëndime gjatë konfliktit dhe është dërguar për trajtim mjekësor në spital.

 

 

Ros Xhonson thotë se çështja e pavarësisë së Kosovës duhet diskutuar para vendosjes së demokracisë

 

Uashington, 31 maj 2003 - Çështja e pavarësisë së Kosovës duhet diskutuar para vendosjes së demokracisë, apo ekonomisë së tregut, thotë Ros Xhonson nga instituti amerikan "Huver", i cili për shumë vite i ka mbuluar zhvillimet në Ballkan dhe është botues i studimeve mbi rajonin.

Duke u përgjigjur në pyetjen, se cila sipas tij, është e ardhmja e Kosovës dhe cili është qëndrimi i bashkësisë ndërkombëtare në këtë çështje, z. Xhonson ka thënë se bashkësia ndërkombëtare duhet t'i drejtohet çështjes së të ardhmes së Kosovës dhe të statusit të saj më mirë herët se sa vonë. Ai shtoi se para se të vijnë investimet serioze nga jashtë, duhet të thuhet qartë çfarë është Kosova dhe cili do të jetë statusi i saj.

Xhonson ka theksuar se bashkësia ndërkombëtare duhet të diskutojë këtë çështje më herët sesa kanë qenë debatet rreth kësaj teme. Ai ka shtuar se çështja e Kosovës nuk mund të lihet me një anë pafundësisht, pasi ky do të ishte vërtetë një gabim.

"Aktualisht administrata amerikane ka shumë shqetësime në pjesë të tjera të botës, por çështja e Kosovës ka nevojë për më shumë vëmendje", i ka deklaruar, veç tjerash "Evropës së lirë", Ros Xhonson nga instituti amerikan "Huver".

 

 

Këshilltari i Presidentit flet për Kosovën në një takim në Londër

 

Prishtinë, 31 maj 2003 - Skender Hyseni, këshilltar i lartë i Presidentit të Kosovës Ibrahim Rugova, do të flasë të hënën, më 2 qershor në Londër për gjendjen aktuale dhe të ardhmen e Kosovës.

Me ftesë të drejtorit të Institutit të Bosnjës (The Bosnian Institute), z. Kuintin Oeër (Quintin Oare) dhe historianit të njohur, anëtar i Bordit të këtij Instituti, Dr. Noel Malkolm (Malcolm), z. Hyseni do t'i drejtohet forumit të rregullt mujor të Institutit, që mbahet në Universitetin Uestminstër, në bashkëpunim me Qendrën për Studim të Demokracisë (Center for the Study of Democracy).

 

 

Xhaz ambasadorët amerikanë vijnë në Kosovë

 

Prishtinë, 31 maj 2003 - Zyra e SHBA-ve në Prishtinë njofton ardhjen e zhaz ambasadorëve - Bob Albanese dhe Cafe Simpatico – të cilët do të mbajnë koncerte në Prishtinë dhe Prizren. Në Prishtinë ky bend do të mbajë një koncert në amfiteatrin e pishinës së Gërmisë, të mërkurën, më 4 qershor, në ora 20:00.

 

Grupi poashtu do të ketë një paraqitje koncertale të premten, më 6 qershor, në ora 19:00, në Shtëpinë e Kulturës në Prizren. Kuarteti do të ekzekutojë kompozime të llojllojshme të xhazit latin, duke përfshirë këtu edhe kompozimet e z. Albanese.

Bob Albanese filloi të ekzekutojë në piano në moshën tetëvjeçare. Ai ka punuar si muziktar në Nju Jork, Havaje, Porto Riko dhe ka pasur turne nëpër Shtetet e Bashkuara dhe Francë. Përvoja e tij e madhe ka bërë që të interpretojë me grupe të ndryshme, sikur me Buddy Rich dhe Big Band-in e tij në vitin 1994, dhe me Orkestrën Simfonike të Havajeve si solo pianist.

 

Përveç punës interpretuese dhe incizimit të albumeve, z. Albanese ligjëron edhe lëndën e xhazit latin në Universitetin e Nju Jorkut. Gjatë qëndrimit në Kosovë, ai dhe bendi i tij do të takohen edhe me studentët dhe profesorët e muzikës në Universitetin e Prishtinës.

Anëtarët e Café Simpatico-s janë Jay Collins, flautist dhe saksofonist, (ka punuar me Andrew Hill, Gregg Allman nga Allman Brothers Band dhe me Bobby Sanabria-n); David Meade, daullist, (ka punuar me Aretha Franklin-in, The Mammas and Pappas dhe me Bobby McFerrin-in); dhe Eric Stiller, basist, i cili është anëtar i Greenwich Village Orchestra të qytetit të Nju Jorkut, thuhet në një njoftim të Zyrës amerikane në Prishtinë.

 

 

Mbahen seminare për të drejtat e njeriut të komunitetit rom, ashkali e egjiptas

 

Prishtinë, 31 maj 2003 - Kryeministri i Kosovës z. Bajram Rexhepi, të hënën do të hapë një nga pesë seminaret që do të mbahen në lidhje me implementimin e të të drejtave të njeriut të komunitetit rom, ashkali e egjiptas.

 

Seminaret i organizon Komisariati i Lartë i KB-ve për Refugjatë (UNHCR) dhe Këshilli i Evropës (Council of Europe) nga data 2 deri më 6 qershor. Seminari i parë nis në Mitrovicë, dhe pastaj do të vazhdojë në regjione të ndryshme të Kosovës, ndërsa mbyllet në Prishtinë, ku do të paraqiten konkluzionet dhe rekomandimet.

Qëllim i seminareve është të ofrojë mirëkuptim të zgjeruar të të drejtave të njeriut si kornizë bazë për trajtimin e çështjeve të minoriteteve dhe diskutimin e temave të veçanta, e po ashtu gjetjen e zgjidhjeve të mundshme të problemeve të komunitetit rom, ashkali e egjiptas në kontekst të Kosovës.

 

Pjesëmarrës do të jenë zyrtarë të lartë qeveritar dhe përfaqësuesit e organizatave relevante ndërkombëtare. Ekspertë nga Këshilli i Evropës nga Strasburgu, do të drejtojnë diskutimin për mbrojtjen e të drejtave të njeriut të romëve, ashkalive e egjiptasve konform me standardet evropiane.

 

 

UNMIK-u nuk i komenton reagimet e shqiptarëve për emërimin e Bordit Këshilldhënës në veriun e Mitrovicës

 

Prishtinë, 31 maj 2003 - Zyrtarët e UNMIK-ut, nuk i kanë komentuar reagimet e strukturave komunale shqiptare të Mitrovicës vendimin e kreut të UNMIK-ut Mihael Shtajner të një organi këshilldhënës në veriun e Mitrovicës, ngase, ata mendojnë se këshilli është shumetnik.

Zëdhënësja e UNMIK-ut, Izabela Karlovic tha se ky këshilli përbën gjashtë pjesëtarë të komunitetit serb, një shqiptar dhe një boshnjak. Sipas saj, Këshilli nuk ka kurrëfarë fuqie vendimarrëse, por vetëm do t'i ofrojë ndihmë administratës së UNMIK-ut, kryesisht në problemet që kanë të bëjnë me jetën e përditshme të qytetarëve të Mitrovicës.

 

 

Kroacia ka ndaluar importin e bagëtive dhe të produkteve të mishit nga gjashtë vende evropiane dhe Kanadaja

 

Zagreb, 31 maj 2003 - Kroacia ka ndaluar importin e bagëtive të gjalla dhe të produkteve me prejardhje shtazore nga gjashtë vende evropiane dhe Kanadaja për shkak të "lopëve të çmendura" (futjes së encofalopatisë spongiforme transmisive).

 

Ndalimi i importit ka të bëjë me Hungarinë, Poloninë, Çekinë, Sllovakinë, Rumaninë dhe Bullgarinë pasi që ato vende në një tubim në Lubjanë kanë pranuar se në ushqimin e kafshëve përdorin miellin e ndaluar prej mishit dhe eshtrave. Ndalimi ka të bëjë me gjedhet, delet, dhitë, shpezët shtëpiake dhe peshqit e gjallë.

 

 

Presidenti Bush shpall "listën e zezë" në të cilën ndodhen emrat e 150 personave nga Ballkani

 

Uashington, 31 maj 2003 - Me një urdhër të presidentit amerikan Xhorxh Bush, që u publikua nëpërmjet Zyrës për Kontrollin e pasurive të huaja, përmenden personat dhe organizatat që shihen si pengesë për zbatimin e Marrëveshjes së Dejtonit, Rezolutës së KS të OKB -së për Kosovën, Marrëveshjes së Ohrit dhe punën e Gjykatës së Hagës.

 

Në urdhërin ekzekutiv të presidentit amerikan Xhorxh Bush është përfshirë edhe ish-ministri i brendshëm maqedonas, Lubo Boshkovski, aktualisht deputet në Parlamentin e Maqedonisë. Në listën e re gjenden emra të ri ndërkohë që kanë mbetur një numër personash që ishin përfshirë në listën e mëparshme.

Lista i përfshin mbi 150 emra të personave dhe organizatave, të cilat Gjykata Penale Ndërkombëtare për ish-Jugosllavi i ka akuzuar se materialisht po i mbështesin të të akuzuarit dhe ata të cilët i përurojnë institucionet të cilat janë jashtë sistemit ligjor, e të cilat e pengojnë procesin paqësor ose i ofrojnë përkrahje materiale dhunës dhe obstruksioneve në rajon.

Nga Kosova dhe lugina e Preshevës në listë janë: Marko Jakshiq, Haradin Balaj, Skender Habibi, Daut Haradinaj, Rrustem Mustafa, Milan Ivanoviq, Ismet Kryeziu, Ramiz Lladrovci, Sabit Gashi, Sait Rushiti, Emrush Suma, Sami Ukshini, Fatmir Limaj, Sami Lushtaku, Azem Syla, Maliq Ndrecaj, Xhavit Morina, Isak Musliu, Jonuz Musliu, Shefqet Musliu, Tahir Dalipi, Daut Rexhepi, Rexhep Selimi, Shaqir Shaqiri, Emrush Xhemajli dhe Muhamet Xhemajli. Ndërkaq nga Shqipëria: Spiro Butka dhe Idejet Beqiri.
Nga Maqedonia në këtë listë ndodhen: Xhevat Ademi, Gafurr Adili, Nuri Bexheti, Daut Rexhepi, Kastriot Haxhirexha, Nevzat Halili, Xhemail Hyseni, Xhavit Hasani dje ish-ministri maqedonas i policisë Lube Boshkovski.

Nga organizatat, në listë janë: Armata Kombëtare e Shqiptarëve, Armata e Republikës së Iliridës, Fronti i Unitetit Kombëtar Shqiptar, Ushtria Çlirimtare e Preshevës, Medvegjës dhe Bujanocit, Komiteti Kombëtar për Lirimin dhe Mbrojtjen e Shtetit Shqiptar, Armata Çlirimtare Kombëtare, Lëvizje Popullore për Lirinë e Kosovës, Këshilli Politik i Preshevës, Medvegjës dhe Bujanocit dhe Lëvizja Popullore e Kosovës.

Ky urdhër ekzekutiv ose siç njihet ndryshe "lista e zezë", bllokon pasuritë e personave të caktuar në Shtetet e Bashkuara të Amerikës.

 

 

Dy ushtarë amerikanë kanë humbur jetën dhe 7 të tjerë janë lënduar në një aksident trafiku në Irak

 

Bagdad, 31 maj 2003 – Dy ushtarë amerikanë kanë humbur jetën sot (e shtunë) dhe shtatë të tjerë janë lënduar në një aksident trafiku në Irakun verior, kanë bërë të ditur burimet ushtarake, njofton AP.

 

Në deklaratën e shkurtër thuhet se ushtarët ishin pjesëtarë të një njësiti të Divizionit 101 të Armatës amerikane, kurse aksidenti ka ndodhur gjatë rrugës ndërmjet qyteteve Mosul dhe Tikrit. Emrat e të aksidentuarve, thuhet se do të jipen pasi të njoftohen famijet e tyre. Detaje të tjera nuk janë dhënë.

 

 

Dy ushtarakë rus janë vrarë sot në Çeçeni

 

Moskë, 31 maj 2003 – Dy ushtarakë rus janë vrarë sot (e shtunë) dhe disa të tjerë janë plagosur në Çeçeni kur kryengritësit hapën zjarr pushkomitralozi në makinat e tyre, ka bërë të ditur Ministria e Mbrojtjes, njofton Rojter.

 

Incidenti ka synuar të prish solemnitetin e shënimit të 300-vjetorit të San Petersburgut, ku janë mbledhur për të kremtuar 40 liderë të botës dhe Çeçenia është në agjendën e takimit të tyre.

 

 

Bush në Poloni

 

Varshavë, 31 maj 2003 - Presidenti Bush do t'i adresohet sot gjatë ditës popullit polak për t'i falenderuar ata për përkrahjen për luftën në Irak. Në një fjalim nga kështjella Wawel në Krakov Bush do të lexojë një mesazh që më vonë do të përsëritet në Rusi dhe në samitin e G8 në Francë i cili thotë se ka ardhur koha për të lënë prapa ndarjet që u krijuan nga lufta në Irak dhe të punojnë së bashku në ndjekje të qëllimeve të përbashkëta.

Presidenti amerikan ka zgjedhur Poloninë për të filluar turin e tij në Evropë dhe Lindjen e Mesme pasi ajo kontribuoi me trupa në forcat e koalicionit në Irak duke thyer lidhjen Francë - Gjermani.

 

 

Grup i ri për gjetjen e armëve

 

Uashington, 31 maj 2003 - Ndërkohë që ende vazhdojnë kundërthëniet mbi dështimin për gjetjen e armëve të shkatërrimit në masë në Irak, Pentagoni po fillon një operacion të ri për të kryer kërkimet. Pentagoni bëri të ditur kohë më parë se po krijonte të ashtuquajturin Grupi Irakian i Survejimit.

Në një konferencë për shtyp të Pentagonit, personi që do të jetë në krye të grupit, Keith Dejton tha se ekipi i tij do të realizojë një rritje të dukshme të kërkimit të armëve. Kjo nuk do të thotë më shumë kontrolle në vend, por do të ketë deri në 1400 personel nga SHBA, Britania dhe Australia nën drejtimin e tij në lokacione të ndryshme në Irak, Kuvajt dhe Katar.

 

 

M.Toner: Urdhëri i ri ekzekutiv i Bushit ngodet të gjithë individët dhe organizatat që pengojnë proceset në Ballkan

 

Londër, 31 maj 2003 - Urdhëri i ri ekzekutiv për Ballkanin i presidentit Bush është kombinim i të gjitha urdhërave ekzekutive të mëhershme dhe godet të gjithë individët dhe organizatat që pengojnë proceset në Ballkan, i ka deklaruar BBC-së, zëdhënësi i Byrosë për Evropën në Departamentin amerikan të Shtetit, Mark Toner.

Ai tha se në urdhërin e ri ekzekutiv janë shtuar edhe emrat e tjerë të, siç tha, të ekstremistëve që duan të destabilizojnë Ballkanin.

"Urdhëri i ri rithekson përkushtimin e thellë të SHBA-ve të emërojë dhe sanksionojë këta individë, pa marrë parasysh përkatësinë kombëtare ose vendin ku ndodhen në Ballkanin Perëndimor", tha Toner.

 

 

Raste të reja me SARS në Kanada

 

Toronto, 31 maj 2003 - Ndërsa autoritetet shëndetësore të Torontos vazhdojnë të risigurojnë publikun, raste të tjera të SARS-it janë shfaqur midis njerëzve që nuk janë punonjës të shërbimit shëndetësor.
 

Problematik po paraqitet një djalë, rasti i të cilit ka çuar në mbylljen e shkollës ku ai studionte. Nëna e tij, një punonjëse shëndetësie është në gjendje kritike. Djali gjithashtu është shtruar në spital. Ka njoftime shqetësuese për studentë që kanë shkelur karantinën 10 ditore.

Autoritetet thonë se fundjava do të jetë provë nëse e keqja ka ikur apo jo.

Copyright©2000-2003 Trepca.net - Të gjitha të  drejtat e rezervuara.