E premte, 30 maj 2003


	30.05.2003 - Trepca.net
	Lajme
	E premte, 30 maj 2003

	Përmbajtja: Shtajner thotë se UNMIK-u është duke përparuar për ta bërë Mitrovicën qytet normal evropian Shefi i UNMIK-ut thotë se duhet krahasuar situatën e sotme në Kosovë me atë në vitin 1999 N.Daci: Nuk ka hezitime të mëdha të bashkësisë ndërkombëtare ndaj pavarësisë së Kosovës GNK: Çelës për pavarësimin e Kosovës - respektimi i të drejtave të pakicave Komuna e Gjilanit e rikujton Parlamentin e Kosovës në premtimin e harruar për 5 milionë euro Trajkoviq lirohet nga akuza për krime lufte dhe dënohet për tentim vrasjeje dhe armëmbajtje pa leje Shqipe Thaçi u zgjodh kryetare e FR të LDK-së në Podujevë Mërgimtarët tanë Gjermani nënshkruajnë një peticion për të realizuar disa të drejta të tyre Mbrëmë në Prishtinë u mbajt manifestimi qendror me rastin e Ditës Ndërkombëtare të Paqeruajtësve Shtajner në një lagje të Prishtinës përuroi Parkun e Paqes Fieski thotë se Kosova është ende vendosmërisht në agjendën ndërkombëtare të punëve të papërfunduara Dr.Alush Gashi: Kosova tashmë i përmbush kushtet për pavarësi Ndeshja e parë gjysmëfinale e Kupës së Kosovës: Prishtina – Gjilani 3:1 Liga ABK në basketboll, gjysmëfinalja: Dukagjini – Mabetex 84:78 Maqedonia dhe Kosova do të hapin vendkalime të reja kufitare Franko Simatoviq - Frenki sot i është dorëzuar Tribunalit të Hagës Shqipëria ende nuk ka vendosur nëse do të ngrisë kampe refugjatësh T. Tomasheviq: Ne dëshirojmë të ndërtojmë një Ballkan dhe rajon ndryshe nga ky i sotmi Presidenti Bush ka shfuqizuar urdhërin për sanksionet ekonomike ndaj Beogradit dhe Podgoricës Ali Ahmeti, Gëzim Ostreni dhe Fazli Veliu hiqen nga lista e e zezë Berisha: Kodi zgjedhor është i standardeve ndërkombëtare Dy persona kanë humbur jetën nga shpërthimi i një autobombe në Spanjë Në një shpërthim në Çeçeni janë vrarë 3 veta dhe janë plagosur 8 të tjerë Toni Bler u ka bërë thirrje polakëve të votojnë në favor të bashkimit me BE-në Tajvani ka bërë të ditur edhe shtatë raste të reja me virusin SARS Një student është vrarë dhe rreth 50 të tjerë janë plagosur në demonstratat në Peru Udhëheqësi izraelit dhe ai palestinez bisedojnë për planin e paqes Presidenti Bush niset për takimin e tetëshes në Francë Takime në Shën Petërburg

	Shtajner thotë se UNMIK-u është duke përparuar për ta bërë Mitrovicën qytet normal evropian Mitrovicë, 30 maj 2003 - Kryeadministratori i Kosovës Mihael Shtajner ka thënë se UNMIK-u është duke përparuar në përpjekjet për ta bërë Mitrovicën qytet normal evropian, por ai ka theksuar se kjo nuk mund të arrihet brenda natës, duke përsëritur qëndrimin e tij se kjo do të bëhet brenda vitit 2003. Shtajner i bëri këto komente gjatë qëndrimit të djeshëm në pjesën veriore të Mitrovicës ku pati takime me udhëheqësit e administratës ndërkombëtare në atë pjesë të qytetit. UNMIK-u së bashku me strukturat e tjera ndërkombëtare ka bërë punë të madhe në aspektin e sigurisë dhe në krijimin e raporteve më të mira ndëretnike, por ka pasur edhe gabime gjatë misionit të tij në Kosovë, tha Shtajner. "Kosova duhet t'i bashkohet Evropës. Kemi takimin e Selanikut në ditët e ardhshme dhe sipas mendimit të tij tash është koha që Kosova t'i bashkohet Evropës", theksoi shefi i UNMIK-ut. Shefi i UNMIK-ut thotë se duhet krahasuar situatën e sotme në Kosovë me atë në vitin 1999 Prishtinë, 30 maj 2003 - "Nuk e di nëse duhet folur për trashëgiminë personale. Këtu kemi të bëjmë me trashëgiminë e bashkësisë ndërkombëtare dhe duhet krahasuar situatën e sotme në Kosovë me situatën kur erdhëm këtu më 1999. Kemi qeverinë, kemi zhvilluar tri herë zgjedhje, përqindja e krimeve në mënyrë specifike e krimeve të rënda, kanë shënuar rënie masive. Kemi shkolla për 400 mijë nxënës, kemi policinë që është e suksesshme, ka filluar procesi i kthimit të minoriteteve, serbëve. Duam të krijojmë një shoqëri shumetnike", ka deklaruar për BBC-së kryeadministratori i Kosovës Mihael Shtajner. N.Daci: Nuk ka hezitime të mëdha të bashkësisë ndërkombëtare ndaj pavarësisë së Kosovës Prishtinë, 30 maj 2003 - Statusi përfundimtar i Kosovës do të përshpejtohet shumë më shpejt sesa ka menduar bashkësia ndërkombëtare, sepse statusi përfundimtar nuk ka asnjë alternativ, tha në një prononcim kryeparlamentari i Kosovës Nexhat Daci. "Në të gjitha bisedat dhe aktivitetet që kam me bashkëbiseduesit nuk ka hezitime të mëdha të bashkësisë ndërkombëtare ndaj pavarësisë së Kosovës", theksoi zoti Daci. Sipas tij ka hezitime vetëm në faktin që "ne nuk po ushtrojmë kapacitet të mjaftueshëm në realizimin e të drejtave rreth minoriteteve dhe obligimeve ndaj tyre, e posaçërisht ndaj serbëve". Ai akuzoi Beogradin se po manipulon me serbët e Kosovës dhe nuk lejon kthimin e tyre në normal. Por, sipas kryeparlamentarit Daci, me bartjen e përgjegjësive tek institucionet vendore në disa fusha do të jetë më i shpejtë edhe kthimi i serbëve. "Unë nuk shoh probleme dhe në realizimin e strategjisë për statusin përfundimtar të Kosovës", nënvizoi Nexhat Daci në këtë pronocim për "Dojçe velen". GNK: Çelës për pavarësimin e Kosovës - respektimi i të drejtave të pakicave Prishtinë, 30 maj 2003 - Grupi Ndërkombëtar i Krizave në raportin më të ri për Kosovën ka konstatuar se UNMIK-u ka aplikuar në Kosovë një politikë jorealiste dhe si pasojë ka dështuar në krijimin e një shoqërie shumetnike. Sipas këtij raporti, çelës për pavarësimin e Kosovës është respektimi i të drejtave të pakicave. Gjithashtu në këtë raport jipen shumë propozime për kapërcimin e ndarjes së aspiratave të shqiptareve dhe serbëve për të ardhmen e Kosovës. Grupi Nderkombetar i Krizave ka bërë një propozim konkret për të kapërceyr situatën ekzistuesee, duke propozuar nënshkrimin e një të ashtuquajtur "kontratë shoqërore", ndërmjet shqiptarëve dhe serbëve dhe Beogradit. Thelbi e kësaj "kontrate" do të ishte që qeveria të pranoje dhe të mbrojë të drejtat e pakicave, ndërkaq serbët ta njohin autoritetin e qeverisë së Kosovës. Nga Beogradi kërkohet të heqë dorë nga deklaratat tendencioze e konfliktuoze për ndarjen e Kosoves dhe ta përkrahë misionin e KB-se, për krijimin e një mjedisi stabil politik në Kosovë. Sipas kësaj kontrate, shumica shqiptare duhet të heqë dorë nga deklarimi verbal për mbrojtjen e të drejtave të pakicave dhe të njohë dhe të mbrojë ato të drejta. Por raporti vlerëson se deri më tani është bërë shumë pak në integrimin e pakicave në Kosovë dhe në krijimin e një jete të përbashkët. Madje thuhet se dilemat etnike jane thelluar akoma më shumë. Sipas raportit dilema etnike në Kosove është përkeqësuar nga deshtimet e shumicës shqiptare për të respektuar të drejtat e pakicave, si dhe nga politika jo realiste e UNMIK-ut, për të krijuar një shoqëri shumetnike. Në raport propozohet krijimi e nje komiteti për shërbimin e pakicave i cili do të mbikqyrte edhe shpërberjen e strukturave paralele. Komuna e Gjilanit e rikujton Parlamentin e Kosovës në premtimin e harruar për 5 milionë euro Gjilan, 30 maj 2003 - Kuvendi Komunal i Gjilanit ka miratuar në seancën e të enjtës një vendim që i detyron bizneset e këtushme në një kontribut shtesë për sanimin e pasojave të tëmetit të 24 prillit 2002. Lartësia e këtij kontributi, të cilit i obligohen rreth 3 mijë biznese të regjistuara në komunën e Gjilanit, do të jetë 50 për qind nga vlera e detyrimit të rregullt vejtor. Kryetari Lutfi Haziri tha se komuna e Gjilanit është e detyruar ta ndërmarrë një hap të këtillë, sepse solidariteti i deritashëm nuk mjaftoi për të renovuar as minimumin e infrastrukturës së dëmtuar. Kanë mbetur më shumë se 7 mijë familjarë që shpresojnë në ndihmë tonë, tha ai. Haziri tha se ishte e domosdoshme që të hulumtohen edhe pak mundësitë e biznesit të këtushëm, ndërsa ka riprësitur kërkesën për Kuvendin e Kosovës, që të lejojë me urgjencë ndihmën prej 5 milionë euro, të premtuar për Gjilanin nga kryetari Nexhat Daci. As këto mjete dhe as ato që mund të grumbullohen gjatë këtij viti nga komuniteti i biznesit, nuk do të mjaftojnë për t`iu dhënë fund halleve të familjarëve të komunës së Gjilanit, me infrastrukturën e banimit, por në të ardhmen, komuna do ta ketë më lehtë të përballet me pasojat e mbetura. Trajkoviq lirohet nga akuza për krime lufte dhe dënohet për tentim vrasjeje dhe armëmbajtje pa leje Gjilan, 30 maj 2003 - Gjykata e qarkut në Gjilan, e përbërë nga ndërkombëtarët, në mungesë provash e ka liruar Momçilo Trajkoviqin, ish-komandant të stacionit policor në Kamenicë, nga akuza për krime lufte kundër njerëzimit. Por gjykata e ka shpallur fajtor Trajkoviqin për tentim vrasjeje dhe armëmbajtje pa leje. Ky është rigjykim kundër Trajkoviqit, i cili në procesin e parë ishte dënuar me 20 vjet burgim, por Gjykata Supreme e Kosovës e kishte anuluar vendimin e shkallës së parë. Trajkoviq i ka kaluar në paraburgim 34 muaj. Shqipe Thaçi u zgjodh kryetare e FR të LDK-së në Podujevë Podujevë, 30 maj 2003 – Mbrëmë i përfundoi punimet Kuvendi V zgjedhor i FR të LDK-së në Podujevë me zgjedhjen e kryesis së re dhe të delegatëve për Kuvendin qendror në Prishtinë. Kuvendi zgjodhi kryesinë prej 11 anëtarësh me kryetare znj. Shqipe Thaçi. Në këtë tubim morën pjesë edhe kryetari i FR Lulzim Zeneli e nënkryetari Sejdë Tolaj, ndërkaq raportin për punën në mes dy kuvendeve e lexoi ushtruesi i detyrës së kryetarit të degës së FR të LDK të Podujevës Naser Rama. Ndërkaq kryetari i kësaj organizate Lulzim Zeneli, duke përshëndetur tubimin, ndër të tjera tha se zgjedhjet në Forumin e Rinisë tregojnë për riorganizim, fuqizim dhe forcim të LDK-së. Mërgimtarët tanë Gjermani nënshkruajnë një peticion për të realizuar disa të drejta të tyre Shtutgart, 30 maj 2003 - Ditë më parë në qytetin gjerman Ditzingen afër Shtutgartit, nga një grup intelektualësh mërgimtarë është themeluar "Këshilli Koordinues i Iniciativës Qytetare" të mërgimtarëve nga Kosova. Ky këshill ka vendosur që t'i drejtohet Bundestagut të Gjermanisë me një peticion, në të cilin do të përfshihen disa kërkesa. Mes tjerash me këtë peticion do të kërkohet që të njihen dokumentet e udhëtimit të lëshuar nga UNMIK-u, për qytetarët që jetojnë në Gjermani; të hapet një përfaqësi zyrtare e Kosovës në Gjermani; t'u pranohet dyshtetësia të gjithë mërgimtarëve nga Kosova; familjarëve të tyre t'u jepet viza me një procedurë më të shpejtë në Prishtinë. Me këtë rast ky këshill fton të gjithë mërgimtarët tanë (nga mosha 16 vjeç) të cilët jetojnë në Gjermani, që ta nënshkruajnë këtë peticion, që do të zgjasë deri më 22 qershor 2003. Mbrëmë në Prishtinë u mbajt manifestimi qendror me rastin e Ditës Ndërkombëtare të Paqeruajtësve Prishtinë, 30 maj 2003 - Manifestimi qendror me rastin e Ditës Ndërkombëtare të Paqeruajtësve të OKB-së është mbajtur mbrëmë në Pallatin e Rinisë dhe Sporteve në Prishtinë, ku morën pjesë përfaqësuesit më të lartë të KFOR-it, të UNMIK-ut dhe të institucioneve të Kosovës: presidenti i Kosovës Ibrahim Rugova, kryeparlamentari Nexhat Daci, Kryeministri Bajram Rexhepi, kryeadministratori Mihael Shtajner, komandanti i KFOR-it Fabio Mini, komandanti i TMK-së Agim Çeku. Me këtë rast studentët e Akademisë së Arteve të Prishtinës shfaqën një koncert muzikor, duke përmbyllur manifestimet e djeshme me rastin e shënimit të Ditës së paqeruajtësve ndërkombëtarë. Poashtu për rëndësinë e kësaj dite folën përfaqësuesit më të lartë të UNMIK-ut, KFOR-it dhe të institucioneve vendore. Mihael Shtajner: - Pjesëtarët e Misionit të UNMIK-ut kanë ardhur nga 122 vende për të ndihmuar popullin e Kosovës. Këta ambasadorë prej 122 vendeve kanë sjellë botën në Kosovë. Tash Kosova duhet të shkojë në Evropë. Sot është dita jonë, dita për t'i festuar përpjekjet dhe arritjet ndërkombëtare. Është dita për të proklamuar krenarinë tonë që i takojmë një armate të vogël, e cila po rritet për të ndërtuar paqen rreth e rreth botës. Fabio Mini: - Misioni paqeruajtës në Kosovë është më i veçanti në tërë botën. Është një shembull i shkëlqyer i partnershipit mes NATO-s dhe OKB-së. Ne në KFOR jemi të kënaqur të punojmë krah për krah me pjesëtarët e UNMIK-ut dhe të organizatave të tjera. Personalisht jam i kënaqur me secilin nga ushtarët e KFOR-it. Ata kujdesen që të ketë një siguri të nevojshme për të rritur zhvillimin e një Kosove më të mirë. Ibrahim Rugova: - Duke përkujtuar këtë ditë të rëndesishme u shpreh mirënjohje të veçantë ushtarëve dhe komandantëve të KFOR-it, që janë paqeruajtës dhe paqekrijues në Kosovë. Ne, populli i Kosovës dhe qytetarët e Kosovës e dimë mirë rolin e shenjtë të paqeruajtësve që e prezenton KFOR-i këtu. Pra paqeruajtësit e Kosovës janë NATO dhe forcat e rendit e të tjera, që e kryejnë punën e vet me profesionalizëm dhe me dashuri. Bajram Rexhepi: - Deri më tash është bërë një punë e madhe, por na mbetet një punë e madhe e përbashkët me Misionin e UNMIK-ut, që Kosovën ta zhvillojmë më shpejt drejt një vendi demokratik dhe një perspektivë për të gjithë qytetarët e Kosovës. Kisha dëshiruar që në botë të ketë sa më pak misione paqësore dhe që të jenë sa më të shkurtëra dhe më efikase në misionet e tyre. Nexhat Daci: - Dëshiroj që shumë shpejt edhe TMK-ja bashkarisht me NATO-n dhe KFOR-in si shenjë falenderimi për atë që për katër vite po bën KFOR-i dhe UNMIK-u në Kosovë, që të falenderojmë bashkësinë ndërkombëtare për këtë. Shpresoj që edhe Kosova në një të ardhme të afërt të ketë forcat e saja që do të kenë rolin paqeruajtës. Shtajner në një lagje të Prishtinës përuroi Parkun e Paqes Prishtinë, 30 maj 2003 - Me rastin e Ditës Ndërkombëtare të Paqeruajtësve të OKB-së, kryeadministratori, Mihael Shtajner së bashku me Kryeministrin Bajram Rexhepin në lagjen Ulpiana të Prishtinës përuruan Parkun e Paqes. Parku është ndërtuar në kompleksin e banesave ku së bashku jetojnë komunitete të ndryshme. "Është koha që Kosova të vijë në Evropë", deklaroi me këtë rast shefi i UNMIK-ut Mihael Shtajner. Fieski thotë se Kosova është ende vendosmërisht në agjendën ndërkombëtare të punëve të papërfunduara Vjenë, 30 maj 2003 - Shefi i Misionit të OSBE-së në Kosovë, ambasadori Paskal Fieski ka folur dje për zhvillimet e fundit politike në vendin tonë para Këshilit të Përhershëm të OSBE-së në Vjenë. Ai citohet të ketë thënë se situata vazhdon të ndryshohë shpejt, por Kosova është ende vendosmërisht në agjendën ndërkombëtare të punëve të papërfunduara, ka deklaruar Paskal Fieski. Ai ka shtuar se institucionet e Kosovës janë themeluar, por standardet demokratike, të drejtat e njeriut dhe sundimi i ligjit duhet edhe mëtej të institucionalizohen. Fieski ka theksuar se qëllimet kryesore për Kosovën kanë mbetur të njëjta për çdo vit. Një shoqëri demokratike ku njerëzit e etniteteve të ndryshme mund të jetojnë së bashku në pranim të ndërsjellt, vetëqeverisje të përgjegjshme dhe integrim në rajon dhe në Evropë. "Ne përkujtojmë për çod vit në Kosovë se historia është armiku", tha shefi i OSBE-së në Kosovë, ambasadori Paskal Fieski. Dr.Alush Gashi: Kosova tashmë i përmbush kushtet për pavarësi Prishtinë, 30 maj 2003 - Duke komentuar raportin e fundit të Grupit Ndërkombëtar të Krizave (ICG), Dr.Alush Gashi, sekretar për Marrëdhënie me Jashtë i LDK-së dhe deputet i Kuvendit të Kosovës, vlerëson se ai është një raport konstruktiv dhe i argumentuar për pavarësinë e Kosovës. "Ky është një raport konstruktiv në vazhdën e përpjekjeve të institucioneve të pavarura ndërkombëtare në argumentimin e domosdoshëm për njohjen e pavarësisë së Kosovës", tha Dr.Gashi, duke nënvizuar se "Kosova tashmë i përmbush kushtet për pavarësi, të cilën disa e quajnë edhe të kushtëzuar". Ndeshja e parë gjysmëfinale e Kupës së Kosovës: Prishtina – Gjilani 3:1 Prishtinë, 30 maj 2003 – Futbollistët e Prishtinës me një lojë shmë të mirë dhe të pëlqyeshme, mundën Gjilanin me rezultat 3:1. Me këtë rezultat prishtinasit krijuan një epërsi, e cila u mundëson që në ndeshjen e kthimit, që do të zhvillohet pas një jave në Gjilan, të udhëtojnë më të qetë dhe me gjasë reale për t’u kualifikuar në finale të Kupoës së Kosovës. Ndeshja u zhvillua në një ambient me shumë pak shikues. Në stadiumin e qytetit ishin mbledhur vetëm 200-300 shikues, por numri i shikuesve rritej pas fillllit të takimt. Ndoshta, në numrin kaq të vogël të shikuesve, ndikoi edhe rrebeshi i shiut që ra pak çaste para se të fillonte takimi. Golat për Prishtinën i shënuan: Krusha 11’, Plepolli 52’ dhe Llumnica në minutën e 65, ndërkaq të vetmin gol për Gjilanin, i cili sado pak iu jep shpresë gjilansve për takimin e kthimit, e shënon Muji në minutën e 89 të takimit. Liga ABK në basketboll, gjysmëfinalja: Dukagjini – Mabetex 84:78 Pejë, 30 maj 2003 – Mbrëmë në palestrën e sporteve "Karagaçi" në Pejë, ishin tubur rreth 2000 adhurues të basketbollit për të përcjell ndeshjen e parë gjysmëfinale (të garës përfundimtare – play-off) të Ligës ABK në basketboll. U takuan Dukagjini dhe Mabetex-i. U zhvillua një lojë shumë e mirë dhe me rivalitet të madh deri në fund të takimit. Fituesin e kësaj ndeshjeje e përcaktuan minutat e fundit të ndeshjes, ku basketbollistët e Dukagjinit ishin më të qetë dhe më të saktë në gjuajtje nga distanca. Takimi përfundoi me rezultat 84:78 në të mirë të vendësve. Basketbollistët më efikas në radhët e Dukagjinit ishin Haxhibulliq me 22 dhe Prajs me 19 pikë të shënuara, ndërkaq në rradhët e Mabetex-it, më efikasët ishin Bond me 24 dhe Spaqi me 18 pikë të shënuara. Ndeshja e dytë zhvillohet të dielen, më 1 qershor, në Prishtinë. Maqedonia dhe Kosova do të hapin vendkalime të reja kufitare Shkup, 30 maj 2003 - Ekspertët ndërkombëtarë të UNMIK-ut për çështje të kufirit dhe ata të Maqedonisë kanë filluar dje një vizitë në zonën kufitare në mes Kosovës dhe Maqedonisë. Në mesin e tyre nuk ka ekspertë nga Serbia, ka njoftuar Ministria e Jashtme e Maqedonisë. Mediat e Shkupit kanë njoftuar se marrëveshja për hapjen e vendaklimeve të reja kufitare mes Kosovës dhe Maqedonisë është arritur gjatë takimit të mbajtur në Ohër ndërmjet Ministrisë së Jashtme maqedonase Mitreva dhe kryeadministratorit të Kosovës Shtajner. Pritet që të arrihet një marrëveshje për hapjen e pikave të reja të vendkalimit kufitar në afërsi të Vitisë dhe në fshatin Restelicë afër Tetovës. Franko Simatoviq - Frenki sot i është dorëzuar Tribunalit të Hagës Hagë, 30 maj 2003 - Ish-komandanti i forcave speciale famëkeqe serbe "Beretat e kuqe" Franko Simatoviq - Frenki, sot i është dorëzuar në Hagë Tribunalit dhe ai tashmë ndodhet në paraburgim në Sheviningen. Simatoviq është akuzuar për krime lufte dhe krime kundër njerëzimit. Shqipëria ende nuk ka vendosur nëse do të ngrisë kampe refugjatësh Tiranë, 30 maj 2003 - Shqipëria nuk ka vendosur ende t'i përgjigjet propozimit britanik për të ngritur kampe refugjatësh në territorin e saj. Burime nga Ministria e Jashtme thonë se Qeveria po e studion këtë propozim dhe është e mendimit që Bashkimi Evropian duhet ta zgjidhë problemin e emigracionit, duke ndihmuar zhvillimin e vendeve jashtë BE-së nga të cilat vijnë emigrantët ilegalë. T. Tomasheviq: Ne dëshirojmë të ndërtojmë një Ballkan dhe rajon ndryshe nga ky i sotmi Gjirokastër, 30 maj 2003 - "Ne dëshirojmë të ndërtojmë një Ballkan dhe rajon ndryshe nga ky i sotmi. Për këtë po ndërtojmë kapacitete të duhura për një të ardhme evropiane pa konflikte, pa gjykime e nacionalizma". Kështu ka theksuar Tomisllav Tomasheviq udhëheqës i organizatave rinore kroate gjatë një takimi të organizatave rinore të Evropës Qendrore dhe Juglindore të organizuar në Shqipëri. Takimi i organizatave rinore nga Evropa ka filluar më 25 maj në Gjirokastër dhe do të përfundojë punimet gjatë ditës së sotme. Presidenti Bush ka shfuqizuar urdhërin për sanksionet ekonomike ndaj Beogradit dhe Podgoricës Uashington, 30 maj 2003 - Presidenti amerikan Xhorxh Bush në një letër dërguar Kongresit amerikan, thotë se po e shfuqizonte urdhërin për heqjen e sanksioneve ndaj Beogradit. Në këtë letër presidenti Bush thotë se aksioni është përgjigje ndaj zotimeve të forta për reforma politike dhe ekonomike që kanë treguar zyrtarët e lartë në Qeverinë e Serbisë dhe Malit të Zi. Ai ka thënë se urdhëri drejtuar Kongresit do të inkurajojë liderët e orientuar për reforma në atë vend. Ali Ahmeti, Gëzim Ostreni dhe Fazli Veliu hiqen nga lista e e zezë Shkup, 30 maj 2003 - Zyrtarët amerikanë bëjnë të ditur se janë bërë ndryshime në një listë personash, të cilët konsiderohen kërcënim për stabilizimin e rajonit. Nga kjo listë janë hequr emrat e Ali Ahmetit, Gëzim Ostrenit dhe Fazli Veliut, ish udhëheqësit më të lartë të Ushtrisë Çlirimtare Kombëtare, tashmë të çmobilizuar. Në listë janë shtuar një numër emrash të rinj, midis të cilëve edhe ish ministri i brendëshëm maqedonas, Lube Boshkovski. Berisha: Kodi zgjedhor është i standardeve ndërkombëtare Shkodër, 30 maj 2003 - Mbrëmë në Shkodër, kryetari i Partisë Demokratike, Sali Berisha, deklaroi se tashmë kodi zgjedhor është i standardeve ndërkombëtare dhe se ai shmang manipulimin e votës. Zoti Berisha e vlerësoi si vendimtar rolin e intelektualëve për reformimin e institucioneve dhe daljen nga kriza. Ndërkohë, në takimet që po zhvillojnë në rrethet veriore, socialistët po i kushtojnë vemendje programeve lokale që përmirësojnë jetën e banorëve. Dy persona kanë humbur jetën nga shpërthimi i një autobombe në Spanjë Madrid, 30 maj 2003 – Dy persona kanë humbur jetën sot (e premte) kur një autobombë ka shpërthyer në rajonin verior të Spanjes, Navare, kanë bërë të ditur zyrtarët qeveritarë lokalë, njofton Rojter. Sulmin e ka kryer grupi seperatist bask ETA. Sulmi është bërë pas zgjedhjeve komunale të së dieles në mbarë vendin, që ishin të parat qëkur Madridi kishte ndaluar partinë seperatiste radikale Batasuna, që në të vërtetë është pjesë e ETA-s, të cilën SHBA-të dhe BE e kanë radhitur në grupin terrorist. Në një shpërthim në Çeçeni janë vrarë 3 veta dhe janë plagosur 8 të tjerë Grozni, 30 maj 2003 – Në një rajon të Çeçenisë ka ndodhur sot (e premte) një shpërthim në një autobus, i cili barte punëtorë në bazën kryesore ushtarake ruse dhe kështu janë vrarë tre veta dhe janë plagosur edhe 8 të tjerë, kanë bërë të ditur burimet zyrtare vendore, njofton Rojter. Sulmi ka ndodhur në kohën kur një duzinë liderësh shtetesh kishin filluar të arrinin në San Petersburg për manifestimet e shënimit të 300-vjetorit të këtij qyteti rus. Në autobus ndodheshin rreth 20 punëtorë, që shkonin në bazën ushtarake ruse Kankala, fare afër kryeqytetit çeçen Grozni. Toni Bler u ka bërë thirrje polakëve të votojnë në favor të bashkimit me BE-në Varshavë, 30 maj 2003 – Kryeministri britanik, Toni Bler, gjatë vizitës në Poloni, i ka bërë thirrje popullit polak që të votojë në favor të bashkimit me Bashkimin Evropian, njofton BBCWorld. Polonia është vendi më i madh nga dhjetë sosh që do t'i bashkohen BE-së në vitin e ardhshëm dhe për këtë do të mbajë referendum, më 7 qershor. Në konferencën e përbashkët me liderin polak, Leshek Miler, z. Bler tha se vota “po” është e rëndësisë jetike për Poloninë dhe mbarë Evroopën. Z.Bler do të mbajë sot edhe një fjalim në Varshavë, ku do të paraqesë vizionin e vendit të Britanisë në BE dhe vendin e organizatës në botë dhe kështu do të përpiqet të përvetësojë dhe të bëjë pqër vete sërish popullin britanik. Tajvani ka bërë të ditur edhe shtatë raste të reja me virusin SARS Tajpeh, 30 maj 2003 – Tajvani ka bërë të ditur sot (e peremte) edhe shtatë raste të reja me virusin SARS dhe ky është numri më i lartë në këtë vend në 11 ditët e fundit, njofton Rojter. Kështu, numri i të infektuarve me SARS në Taivan, sipas Departmentit të Shëndetësisë është rritur në 667 raste, kurse numri i të vdekurve mbetet 81 veta. Taivani aktualisht ka mbetur vetëm prapa Kinës dhe Hong Kongut. Një student është vrarë dhe rreth 50 të tjerë janë plagosur në demonstratat në Peru Lima, 30 maj 2003 – Një student është vrarë dhe rreth 50 të tjerë janë plagosur gjatë përleshjeve me trupat peruane në demonstratat, që ishin më të dhunshmet që kur presidenti Alesandro Toledo e ka shpallur gjendjen e jashtëzakonshme kësaj jave për të frenuar valën e grevave dhe të protestave, njofton BBCWorld. Zyrtarët kanë bërë të ditur se ushtarët dhe policët kanë hapur zjarr në studentët në Univesitetin e qytetit jugor Puno, ndërsa në qytetin Arekipa policia ka hedhur gaz lotsjellës mbi arsimtarët, që po bëjnë grevë tasht 18 ditë, por që kjo grevë është shpallur e paligjshme. Njoftohet gjithashtu se janë arrestuar rreth 100 protestues. Udhëheqësi izraelit dhe ai palestinez bisedojnë për planin e paqes Jerusalem, 30 maj 2003 - Kryeministri i Izraelit, Ariel Sharon, dhe homologu i tij palestinez, Mahmoud Abbaz, kanë zhvilluar bisedime që janë përshkruar si pozitive, ndërkohë që ata përgatiten për takimin e nivelit të lartë të javës së ardhëshme me Presidentin Bush lidhur me "hartën rrugore" drejt paqes. Gjatë takimit të tyre prej dy orësh e gjysmë dje, të dy udhëheqësit ranë dakord për të marë disa masa për uljen e tensionit. Sharon tha se do të lehtësojë kushtet e udhëtimit për palestinezët dhe të lirojë disa të burgosur palestinezë. Ai tha gjithashtu se trupat izraelite do të tërhiqen nga disa zona të Bregut Perëndimor dhe të Rripit të Gazës për të lejuar forcat palestineze të sigurimit që të marrin në dorë vendosjen e rendit. Presidenti Bush niset për takimin e tetëshes në Francë Uashington, 30 maj 2003 - Presidenti Bush niset sot për në Evropë, ku do të ndjekë takimin e nivelit të lartë ekonomik të 7 vendeve të industrializuara të botës dhe Rusisë, para se të shkojë në Lindjen e Mesme për bisedime me udhëheqësit izraelitë dhe palestinezë. Zoti Bush do ta presë shkurt qëndrimin e tij në takimin e nivelit të lartë të tetëshes në Evian të Francës, për të shkuar në Lindjen e Mesme. Kjo do të jetë vizita e parë e Presidentit amerikan në rajon, që kur mori presidencën dhe takimi i tij i parë i drejt për drejtë me Kryeministrin palestinez, Mahmoud Abbaz. Takime në Shën Petërburg Peterburg, 30 maj 2003 - Mbi 40 udhëheqës të botës po mblidhen në qytetin e dytë të Rusisë, Shën Petërburg për tre ditë me samite dhe takime. Këto takime, sipas zyrtarëve do të ofrojnë një shans për pajtim pas tensioneve që shkaktoi lufta në Irak. Të premten zhvillohet një samit jozyrtar i ish-republikave sovjetike që tani bëjnë pjesë në Komunuelthin e Shteteve të Pavarura. Të shtunën, kur të takohen Rusia dhe vendet anëtare të Bashkimit Evropean, pritet që presidenti rus Vladimir Putin, të kërkojë lidhje më të ngushta mes vendit të tij dhe BE-së.

	Copyright©2000-2003 Trepca.net - Të gjitha të drejtat e rezervuara.