Lajme

E enjte, 29 maj 2003

Përmbajtja:

• Daci dhe Harnish thanë se duhet filluar bisedimet me Serbinë për çështjet praktike

• D.Server thotë se kinezët dhe rusët kanë arsyet e tyre për të kundërshtuar pavarësinë e Kosovës

• Soros tha në Beograd se Serbia duhet ta njohë pavarësinë e Kosovës

• Në Kosovë sot po shënohet Dita ndërkombëtare të paqeruajtësve

• Daci: Misioni i OKB-së do të dëshironte të mbesë 200 vjet në Kosovë

• Transferohen nga UNMIK-u tek institucionet e Kosovës kompetencat në 19 fusha

• BE inkurajon shqiptarët e Kosovës që në samitin e Selanikut të thellojnë dialogun me Beogradin zyrtar

• Deputetët miratuan sot tri ligje

• KFOR-i rus në komunën e Dardanës do ta dorëzojë komandën më 1 qershor

• Protestuesit shqiptarë në veri të Mitrovicës kërkojnë nga KFOR-i të respektojë Rezolutën 1244

• Në Krushë të Madhe të Rahovcit janë zhvarrosur 85 kufoma të paidentifikuara

• Kupa e Kosovës në futboll: Sot luajnë Prishtina–Gjilani, ndërkaq dje Vëllaznimi mundi KEK-u me rezultat 3:1

• Në ndeshjen e parë gjysmëfinale, Prishtina mundi Dritën me rezultat 118:90

• Volejboll: KEK-u mbron titullin e Kampion të Kosovës

• Brukseli kërkon nga vendet e Ballkanit Perëndimor që t'u "përmbahen vlerave dhe qëndrimeve të BE-së"

• Amnesty International vlerëson se në Kosovë të drejtat e njeriut shkilen si nga ndërkombëtarët ashtu edhe nga vendorët

• Në BE ende nuk e dinë se kush do të jetë pasardhës i Shtajnerit

• Ali Sadria thotë se përgjegjegjësitë nga UNMIK-u është dashur të barteshin që nga dita e parë e punës së Qeverisë

• Banorët e fshatrave kufitare të Gjilanit thonë se depërtimi i forcave serbe brenda Kosovës është i përditshëm

• Sharon dhe Abas takohen përsëri

• Tajvani sot ka konfirmar për 50 raste të reja të SARS-it

• Bler u tha trupave britanike në Irak se ata kanë kryer një "akt shumë të rëndësishëm dhe të lartë"

• Janë vrarë 14 vetë e 12 janë plagosur në një sulm të kryengritësve në Ugandë

• Abazi tha se do të arrijë një armëpushim me Hamasin

• Është arrestuar një burrë që ka kërcënuar ekuipazhin e një aeroplani australian

• Një ushtar amerikan është vrarë sot në Irak

• De Melo do influencojë në Irak

• Bler viziton sot Irakun

• Dy të vdekur nga SARS në Toronto

• "Ka patur shumë arsye për luftën në Irak"

• Milan fiton titullin kampion të kampionëve për të gjashtën herë

Daci dhe Harnish thanë se duhet filluar bisedimet me Serbinë për çështjet praktike

 

Prishtinë, 29 maj 2003 - Pas një takimi që pati me kryetarin e Kuvendit të Kosovës Naxhat Daci, shefi i Zyrës amerikane në Prishtinë Rino Harnish tha se SHBA-të mbështesin fillimin e bisedimeve për çështjet praktike ndërmjet Prishtinës dhe Beogradit.

 

Zoti Harnish tha se dialogu është një nga standardet e kërkuara për Kosovën nga bashkësia ndërkombëtare, andaj Kosova duhet ta përmbushë edhe këtë standard.

Harnish vlerësoi se në Kosovë është bërë një përporim i dukshëm, ku funksionon një qeveri demokratike si dhe është shënuar progres në pjesëmarrjen e komuniteteve në institucionet e Kosovës nga radhët e të gjitha pakicave dhe përgjithësisht ëshët shënuar përparim në të drejtat e pakicave, tha ai.

 

Harnish shtoi se të gjitha këto përbëjnë standardet e kërkuara nga bashkësia ndërkombëtare. Prandaj, tha Harnish, është e nevojshme që të fillojnë bisedimet për çështjet teknike ndërmjet Prishtinës dhe Beogradit.

Ndërkaq, kryetari i Kuvendit të Kosovës Nexhat Daci tha se është për fillimin e bisedimeve me të gjitha vendet fqinje dhe se përfaqësuesit e Kosovës nuk duhet të kenë komplekse se me kë duhet biseduar. Z.Daci tha se në bisedime duhet shkuar të përgatitur me një strategji të qartë dhe të diskutohet me të gjitha vendet fqinje, përfshirë edhe Serbinë.

"Ajo që është kusht yni, dhe në veçanti që unë kërkoj nga bashkësia ndërkombëtare, nuk mund të ketë takime jashtë nomenklaturave, nuk mund të mendojmë një referencë të një vendi fqinjë që të bisedojë me kryeministrin tonë, me kryetarin tonë ose me kryeparlamentarin", tha Daci.

 

Sipas tij, duhet biseduar me përfaqësuesit e Serbisë për çështjet që nuk kanë të bëjnë me statusin e Kosovës, por për çështjet e problemet jetësore: qarkullimi i qytetarëve në Ballkan, në Evropë, ekonomia, ngecjet në buxhet nga ekonomia e kriminalizuar, personat e humbur etj.

 

 

D.Server thotë se kinezët dhe rusët kanë arsyet e tyre për të kundërshtuar pavarësinë e Kosovës

 

Prishtinë, 29 maj 2003 - Daniel Serwer, drejtor i Nismës Ballkanike pranë Institutit Amerikan të Paqes, thotë se nëse shqiptarët e Kosovës kërkojnë një të ardhme të begatë dhe demokratike, kjo do të arrihet, me mbështetje të BE-së dhe SHBA-ve.

 

"Vetëm një zgjidhje e negociuar është e mundshme dhe në negociata është po aq e rëndësishme të kuptosh interesat e kundërshtarëve sa edhe interesat tuaja", tha Server në një intervistë për gazetën "Bota sot". "Përkundër qëndrimit zyrtar, që bën thirrje për shtyrjen e kësaj çështjeje, mendoj se shumë njerëz në Qeverinë amerikane po e kuptojnë se po vjen koha për t'u përgatitur për negociata", thotë ai.

I pyetur se si e komenton seancën e dëgjimit për pavarësinë e Kosovës në Kongresin amerikan, Daniel Server tha:

"Seanca në Kongresin amerikan ishte e dobishme, veçanërisht për ata që angazhohen për pavarësi të Kosovës, mirëpo ishte e pabalancuar. Pikëpamjet serbe nuk u prezantuan aty. Vetëm një zgjidhje e negociuar është e mundshme dhe në negociata është po aq e rëndësishme të kuptosh interesat e kundërshtarëve sa edhe interesat tuaja.

 

Kështu, që është tejet e rëndësishme si për Kongresin amerikan ashtu edhe për shqiptarët e Kosovës, që të dëgjojnë pikëvështrimin serb. Është gabim të paramendohet, ashtu siç duket se po bëjnë disa, që qeveria amerikane do të njohë pavarësinë e Kosovës në mënyrë unilaterale. Kjo nuk do to ndodhë".

Server thotë se ai ka mbështetur idenë që një amerikan të jetë Përfaqësuesi i ardhshëm Special i Sekretarit të Përgjithshëm në Kosovë. "Ky do të ishte një sinjal i qartë se ne kemi për synim të përgatitemi për negociata rreth statusit final", tha Server.

Daniel Server tha se "kinezët dhe rusët ka kohë që kanë arsyet e tyre për të kundërshtuar pavarësinë e Kosovës: kinezët brengosen rreth lëvizjes për pavarësi në Tibet dhe rusët brengosen rreth Çeçenisë", por për të është e paqartë se cili është pozicioni francez.

 

 

Soros tha në Beograd se Serbia duhet ta njohë pavarësinë e Kosovës

 

Beograd, 29 maj 2003 - Xhorxh Soros, biznesmen amerikan me prejardhje hungareze, deklaroi dje në Beograd se Serbia duhet ta njohë pavarësinë e Kosovës për t'iu bërë e mundshme hyrja e shpejtë në Bashkimin Evropian.

Soros para gazetarëve tha se personalisht ka ardhur në Beograd për ta njohur opinionin serb me propozimin e vet që Bashkimi Evropian ta fillojë procesin e zgjidhjes së statusit të Kosovës, i cili në fund do të çojë deri te pavarësia e Kosovës. "Kosova nuk mund të jetë përsëri pjesë e Serbisë", tha Soros.

 

"Asgjë nuk është kundër Serbisë, por dëshira që t'i ndihmohet Serbisë që rruga e saj për në BE të jetë më e shpejtë se deri më tani. Duhet të jeni realistë dhe ta kuptoni se Serbia nuk do t'i bashkohet BE-së derisa të mos zgjidhet çështja e kufijve", tha Soros.

Soros tha se është takuar me kryeministrin e Serbisë Zoran Zhivkoviqin, cili nuk ëshët pajtuar me qëndrimin për pavarësinë e Kosovës.

Gjithashtu Soros ka thënë se pavarësia e Kosovë nuk do të ishte e pakushtëzuar dhe që më parë do të duhej të arrihen standardet e caktuara të cilat kanë të bëjnë me sigurinë e pjesëtarëve të pakicave.

 

 

Në Kosovë sot po shënohet Dita ndërkombëtare të paqeruajtësve

 

Prishtinë, 29 maj 2003 - UNMIK-u dhe KFOR-i po shënojnë sot Ditën ndërkombëtare të paqeruajtësve, ndërkaq kjo ditë sivjet në Kosovë po i kushtohet paqeruajtësve spanjollë dhe ukrainas të cilët humbën jetën në një aksident ajror në Turqi.

Në kishën e Shën Ndout në Prishtinë u mbajt një meshë përkujtimore kushtuar ushtarëve të vdekur spanjollë në Turqi, duke u kthyer nga misioni paqeruajtës në Afganistan. Në këtë ceromoni morën pjesë edhe shefi i UNMIK-ut Mihael Shtajner dhe komandanti i KFOR-it Fabio Mini.

Zëdhënësi i KFOR-it Benister Grin foli për rëndësinë e kësaj dite që ka për paqeruajtësit kudo në botë e sidomos në vendosjen e paqes në Kosovë. Grin tha se gjatë katër viteve të kaluara në Kosovë kanë humbur jetën 99 ushtarë të KFOR-it.

Ndërkaq në mbrëmje në Pallatin e Rinisë dhe Sporteve në Prishtinë do të mbahet një ceremoni përkujtimore kushtuar kësaj dite, ku do të marrin pjesë edhe përfaqësuesit më të lartë vendorë.

 

 

Daci: Misioni i OKB-së do të dëshironte të mbesë 200 vjet në Kosovë

 

Londër, 29 maj 2003 - "Misioni i Kombeve të Bashkuara do të dëshironte që të mbesë 200 vjet (në Kosovë) sepse funksionarët e saj kanë rroga më të mëdha se të senatorëve amerikanë; rojet e tyre fitojnë më shumë se ministrat tanë; dy qeveritë, e UNMIK-ut dhe e Kosovës, nuk mund të funksionojnë paralelisht", ka deklaruar për gazetën londineze "Gardian", kryetari i Kuvendit të Kosovës Nexhat Daci.

 

 

Transferohen nga UNMIK-u tek institucionet e Kosovës kompetencat në 19 fusha

 

Prishtinë, 29 maj 2003 - Institucionet e Kosovës që nga dita e sotme do të kenë më shumë pushtet në fushë të ekonomisë, shëndetësisë, bujqësisë dhe energjetikës. Këtë e bënë të ditur kryeadministratori Mihael Shtajner dhe kryeministri Bajram Rexhepi, pas takimit të Këshillit të Përbashkët për bartjen e kompetencave nga administrata e UNMIK-ut tek institucionet e Kosovës.

Shtajner tha se deri në fund të muajit të ardhshëm do të barten kompetencat nga 19 fusha, ndërkaq dorëzimi i 17 fushave të tjera do të bëhet sa më shpejt që të jetë e mundur. Por në kompetencë të UNMIK-ut megjithatë mbesin edhe mëtutje përgjegjësi të rezervuara.

 

Bajram Rexhepi tha se qeveria pretendon të marrë sa më shumë kompetenca nga administrata e UNMIK-ut, duke theksuar se kapitulli i pestë faktikisht ka përfunduar dhe tashmë kjo është çështje e implementimit. Rexhepi shtoi se qeveria ka ambicie që të ketë rol aktiv edhe në kompetencat e rezervuara. Sipas tij ky proces do të realizohet me sukses nëse UNMIK-u dhe qeveria bashkëpunojnë.

UNMIK-u nuk ka miratuar kërkesën e qeverisë për punë të jashtme dhe për drejtësi që do të bashkërendoheshin nga UNMIK-u dhe institucionet vendore.

Takimi i ardhshëm i Këshillit të Përbashkët të UNMIK-ut dhe institucioneve të Kosovës do të mbahet pas një muaji. Sipas paralajmërimeve të UNMIK-ut deri në fund të vitit tek institucionet vendore duhet të barten të gjitha kompetencat që lejohen me Rezolutën 1244 të KS të OKB-së.

 

 

BE inkurajon shqiptarët e Kosovës që në samitin e Selanikut të thellojnë dialogun me Beogradin zyrtar

 

Bruksel, 29 maj 2003 - Bashkimi Evropian inkurajon shqiptarët e Kosovës që në samitin e Selanikut të thellojnë dialogun me Beogradin zyrtar. Sa më parë që të fillon dialogu mes Prishtinës dhe Beogradit, aq më mirë është për dy palët. BE premton se nëse dialogu vërtet fillon në Selanik, atëherë BE-ja do të bëjë çmos që të ndihmojë Prishtinën dhe Beogradin në vazhdimin e kontakteve.

Përderisa i tërë rajoni po u ofrohet strukturave të BE-së nuk është në rregull që Prishtina dhe Beogradi të mos flasin mes veti, thonë zyrtarët në Bruksel. Ata janë të mendimit se shqiptarët dhe serbët duhet të bisedojnë për çështje që janë në interes të Prishtinës dhe Beogradit.

 

 

Deputetët miratuan sot tri ligje

 

Prishtinë, 29 maj 2003 - Në seancën e sotme të Kuvendit të Kosovës me shumicë votash u miratua Ligji për rrugët, pas një shqyrtimi paraprak nen për nen të tij. Poashtu u miratua në parim edhe Projektligji për prokurimin publik, i cili fillimisht u prezentua nga ministri i dekasterit respektiv.

Deputetët sot miratuan edhe ndryshimet e propozuara nga Përfaqësuesi Special i OKB-së në Ligjin e miratuar për themelimin e regjistrit të të drejtave në pronën e paluajtshme.

 

 

KFOR-i rus në komunën e Dardanës do ta dorëzojë komandën më 1 qershor

 

Dardanë, 25 maj 2003 - KFOR-i rus i stacionuar në Komunën e Dardanës do t'i dorëzojë komandën atij amerikan më 1 qershor, kurse ushtarët me pajisjet e tyre përfundimisht do të largohen më 25 qershor nga kjo komunë.

 

Ata do të zëvendësohen me një kompani spanjolle që vepron në kuadër të KFOR-it amerikan. Kjo u bë e ditur dje në një takim lamtumirës që komandanti i KFOR-it rus pati me kryetarin e Komunës së Dardanës, Shaip Surdullin, ku mori pjesë edhe komandanti i kampit amerikan në Gjilan.

 

 

Protestuesit shqiptarë në veri të Mitrovicës kërkojnë nga KFOR-i të respektojë Rezolutën 1244

 

Mitrovicë, 29 maj 2003 - Vendimi i KFOR-it për ndalimin e qarkullimit të banorëve të pesë fshatrave shqiptare të veriut të Mitrovicës nëpër fshatin Suhadoll i Epërm, është cilësuar i padrejtë nga banorët e atjeshëm. Ata nëpërmjet një proteste të mbajtur dje kanë kërkuar nga KFOR-i francez që të respektojë Rezolutën 1244 e cila garanton lëvizjen e lirë të qytetarëve.

 

 

Në Krushë të Madhe të Rahovcit janë zhvarrosur 85 kufoma të paidentifikuara

 

Rahovec, 29 maj 2003 - Në Krushë të Madhe të komunës së Rahovcit dje është bërë zhvarrimi i 85 kufomave të paidentifikuara. Sipas shtypit të sotëm këto kufoma supozohet se janë të banorëve të Krushës së Madhe, të cilët janë vrarë dhe masakruar nga forcat serbe më 1999.

 

Zhvarrimi është bërë gjatë tri ditëve të kaluara, ndërkaq kufomat janë dërguar në morgun e Institutit të Mjekësisë Ligjore në Rahovec për identifikim.

 

 

Kupa e Kosovës në futboll: Sot luajnë Prishtina–Gjilani, ndërkaq dje Vëllaznimi mundi KEK-u me rezultat 3:1

 

Prishtinë, 29 maj 2003 – Në takimin e parë gjysmëfinal të Kupës së Kosovs në futboll, që u zhvillua dje në Gjakovë, futbollistët Vëllaznimi mundën KEK-un me rezultat 3:1. Golashënues për Vëllaznimin ishin:

 

Zhubi 16’, Patoku 28’ dhe Radoniqi 49’, ndërkaq të vetmin gol për KEK-un e shnëoj B.Hashani në minutën e 88. Ndeshja e kthimit do të zhvillohet pas një jave në Kastriot.

Sot në ora 17 në stadiumin e qytetit në Prishtinë, do të zhvillohet ndeshja e dytë gjysmëfinale e Kupës së Kosoëvs, kundërshtarë do të jenë Prishtina dhe Gjilani.

 

 

Në ndeshjen e parë gjysmëfinale, Prishtina mundi Dritën me rezultat 118:90

 

Prishtinë, 29 maj 2003 - Mbrëmë u zhvillua ndeshja e parë gjysmëfinale e garës përfundimtare (play-off) të Ligës ABK, në mes të MEB Prishtins dhe Dritës. Fitore, siç edhe është pritur, shënuan basketbollistët e MEB Prishtinës me rezultat të lartë 118:90.

 

Basketbollistët e Dritës, vetëm në çerekun e parë dhe në fillim të çerekut të dytë ishin kundërshtarë të barabartë me basketbollistët vendas, por sa kalonte koha, MEB Prishtina diktonte ritmin e lojës. Kështu ishte vetëm pikëpyetje se sa do të jetë diferenca në pikë në fund të takimit, pasi që fituesi shihej qartë se do të jetë skuadra vendase.

Basketbollistët më efikas në radhët e MEB Pristinës ishin Dejmon Forney me 34 Florian Myftari me 27 dhe Edmond Azemi me 23 pikë të shënuara. Ndërkaq për Dritën mbi 85% të pikëve i shënuan dy amerikanët, Ederik Vomak 48, dhe Villson 29 pikë.

Takimi i kthimit do zhvillohet të shtunën në Gjilan.

Sonte në Pejë duke filluar nga ora 20.15, gjithashtu do të zhvillohet edhe takimi i parë i gjysmëfinalës së dytë ndërmjet Dukagjinit dhe Mabetexit.

 

 

Volejboll: KEK-u mbron titullin e Kampion të Kosovës

 

Prishtinë, 29 maj 2003 – Dje u zhvillua edhe takimi i tretë përcaktues i paly-off-it të Ligës së Parë të Kosovës në volejboll në mes të KEK-ut dhe Ejona Pejës. Në këtë takim fitore shënuan volejbollistët e KEK-ut me rezultat 3:1, dhe fituan titullin e më të mirit edhe për edicionin e sivjemë.

Rezultati nëpër seta ishte: 25:14, 25:12, 18:25 dhe 25:23.

 

 

Brukseli kërkon nga vendet e Ballkanit Perëndimor që t'u "përmbahen vlerave dhe qëndrimeve të BE-së"

 

Bruksel, 29 maj 2003 - Krerët e Bashkimit Evropian u kanë drejtuar një letër shteteve të Ballkanit Perëndimor në të cilën kërkohet nga ato që t'u "përmbahen vlerave dhe qëndrimeve të BE-së" në bisedimet me SHBA-të për mosdorëzimin e qytetarëve amerikanë në Gjykatën Penale Ndërkombëtare në Hagë.

 

Në letër theksohet se "në të ardhmen të gjitha këto vende të rajonit - disa më shpejt, e disa në ngadalë - do të bëhen anëtare të BE-së", andaj është "normale që të kuptojnë dhe të respektojnë parimet e tij (BE-së)", deklaroi zëdhënësi i presidencës greke me BE-në, Rusos Konduros.

Ai tha se kryesuesi i radhës së BE-së, Jorgos Papandreu e ka shkruar këtë letër "i bindur se shtetet e Ballkanit Perëndimor, të cilat tani janë më afër Evropës, do të repektojnë rekomandimet evropaine".

 

 

Amnesty International vlerëson se në Kosovë të drejtat e njeriut shkilen si nga ndërkombëtarët ashtu edhe nga vendorët

 

Londër, 29 maj 2003 - Në Kosovë të drejtat e njeriut shkelen si nga ndërkombëtarët dhe nga vendoret theksohet në raportin e fundit i Amnesty International (AI). Në këtë raport që përfshin periudhën janar-dhjetor 2002, në kapitullin e posaçëm që i kushtohet Kosovës kjo organizatë për të drejtat e njeriut është përqëndruar në problemet e krimeve të luftës, për shqiptarët në burgjet e Serbisë, personat e zhdukur dhe të rrëmbyer, trafikun e qenieve njerëzore e dënimeve të paligjshme nga KFOR-i dhe abuzimeve nga përfaqësuesit e segmenteve të ndryshme të administratës ndërkombëtare.

Raporti thekson se serbët e dënuar për krime lufte nga gjykatat vendore, ku shumica e gjyqtarëve kanë qenë shqiptarë, kanë apeluar në gjykatat e shkallës më të lartë. Kështu me gjykimet e shkallës së dytë dënimet e tyre kryesisht janë ulur. Sa u përket gjendjes së pakicave në Kosovë, në raport nënvizohet se ndonëse kanë vazhduar sulmet kundër tyre ato kanë qenë në një shkallë më të ulët se më parë. Ndërkaq sa u përket të zhvendosurve vetëm një numër i kufizuar prej tyre është kthyer.

Ndërkaq mbi shqiptarët në burgjet e Serbisë raporti nënvizon se në periudhën mars - maj 2002, 160 të burgosur janë kthyer në Kosovë, nga të cilët 106 janë liruar. Lirimi i tyre ka ndodhur pasi gjyqtarët ndërkombëtarë kanë vlerësuar se akuzat e ngritura ndaj tyre ishin të motivuara politikisht dhe etnikisht.

 

Lidhur me çështjen e personave të zhdukur njësia e posaçme brenda administratës së UNMIK-ut ka bërë pak përparim, theksohet në raportin vjetor të Amnesty International. Raporti e identifikon si një problem të ndieshëm në Kosovë edhe trafikimin e grave dhe vajzave të cilat përdorën kryesisht për shfrytëzim seksual. Rreth 60 për qind e viktimave sipas statistikave të kësaj organizate janë nga Moldavia. Po në këtë raport theksohet fakti se KFOR-i, forca ndërkombëtare e sigurisë në Kosovë ka kryer arrestime të paligjshme.

Lidhur me të drejtat e njeriut në Serbi raporti përmend edhe rastet e zbulimit e varrezave masive me viktimat shqiptare, apo gjyqet kundër tre anëtarëve të ish-ushtrisë jugosllave të dënuar për vrasje të shqiptarëve. Sipas këtij raporti opinioni publik serb kishte reaguar kundër dënimit të tyre për krimet e kryera ndaj shqiptarëve.

 

 

Në BE ende nuk e dinë se kush do të jetë pasardhës i Shtajnerit

 

Bruksel, 29 maj 2003 - Zyrtarët e BE-së në Bruksel pohojnë se së shpejti do të caktohet pasardhësi i kryeadministratorit të Kosovës, Mihael Shtajner, pasi që Shtajner do të largohet nga Kosova gjatë dy muajve të ardhshëm. Aktualisht në Bruksel ka vetëm spekulime rreth emrave se kush do të mund të jetë pasaardhës i Shtajnerit.

Në qarqet e BE-së është përmendur si pasardhës i Shtajnerit ambasadori i tashëm i Suedisë në OKB, Pjer Shori. Mirëpo, thuhet se amerikanët nuk kanë qenë të gatshëm ta mbështesin kandidaturën e ambasadorit Shori në atë post për shkak të disa qëndrimeve kritike që ai i ka pasur për ndërhyrjen në Irak.

Në BE-së pohojnë se më së shumti gjasa për t'u bërë kryeadministrator i Kosovës ka diplomati francez Alan lë Rua, me një përvojë në Ballkan. Ai ishte një kohë administrator i Pejës, por edhe i dërguari i posaçëm i BE-së në Maqedoni.

 

 

Ali Sadria thotë se përgjegjegjësitë nga UNMIK-u është dashur të barteshin që nga dita e parë e punës së Qeverisë

 

Prishtinë, 29 maj 2003 - Lidhur me takimin e djeshëm të Këshillit të Përbashkët për bartjen e kompetencave nga administrata e UNMIK-ut tek institucionet e Kosovës, ministri i ekonomisë dhe financave në Qeverinë e Kosovës, Ali Sadrija thotë se në Kosovë vazhdon të jetë aktuale çështja e transferit të përgjegjësive nga ndërkombëtarët tek vendorët.

Ai tha se të gjitha kompetencat është dashur të barteshin që nga dita e parë e punës së Qeverisë, por kjo është penguar me një rregullore që është nxjerrë pas Kornizës Kushtetuese. Këto kompetenca kanë të bëjnë me çështjen e politikave ekononike, fiskale, në industri, tregti, telekomunikacion, arsim, shëndetësi, shërbime publike dhe administratë. "Pra kemi të bëjmë me pjesët që realisht është dashur të jenë të bartura në momentin e formimit të institucioneve vetëqeverisëse të Kosovës", tha z. Sadrija.

Sipas tij është shënuar një përparim i theksuar sidomos në bartjen e kompetencave nga UNMIK-u në pushtetin lokal. Kështu 24 komuna janë certifikuar dhe ato kanë autorizimin për menaxhimin e procesit finaciar apo buxhetor. Sadrija nënvizoi se nuk sheh pengesa në bartjen e kompetencave edhe në shtatëmbëdhjetë fusha të tjera, siç konstatuam në takimin e djeshëm.

 

 

Banorët e fshatrave kufitare të Gjilanit thonë se depërtimi i forcave serbe brenda Kosovës është i përditshëm

 

Gjilan, 29 maj 2003 - Banorët e fshatrave kufitare të komunës së Gjilanit si Muçibabë, Lipovicë, Buricë, Kukaj e Muhaxher të Stublicës thanë se kalimi i kufirit dhe depërtimi i forcave serbe brenda territorit të Kosovës është bërë i përditshëm. Mirëpo, burimet e KFOR-it nuk kanë dhënë asnjë prononcim lidhur me këto pohime të banorëve shqiptarë të fshatrave të sipërshënuara.

 

 

Sharon dhe Abas takohen përsëri

 

Tel Aviv, 29 maj 2003 - Udhëheqësit izraelitë dhe palestinezë kanë në plan të takohen të enjten, para takimit të tyre të javës së ardhshme me Presidentin Bush në Jordani, për diskutime rreth përpjekjeve të paqes në Lindjen e Mesme.

 

Takimi midis kryeministrit izraelit, Ariel Sharon, dhe homologut të tij palestinez, Mahmud Abas, do të jetë i dyti që ata zhvillojnë gjatë dy javëve të fundit.

 

Pritet që ata të diskutojnë rreth një propozimi për armëpushim, sipas të cilit zoti Sharon do të pranojë të tërheqë forcat nga disa zona palestineze. Kurse Izraeli kërkon që Autoriteti Palestinez të ndalë sulmet e grupeve ekstremiste kundër izraelitëve.

 

 

Tajvani sot ka konfirmar për 50 raste të reja të SARS-it

 

Tajpeh, 29 maj 2003 - Ministria e Shëndetësisë Tajvanit sot ka konfirmar për 50 raste të reja të SARS-it. Deri më tani në Tajvan janë evidentuar 550 raste të kësaj sëmundjeje, por dyshohet se numri i vërtetë është 1158.

 

Ndërkaq nga SARS-i në këtë vend kanë vdekur 81 veta, gjë që e vë Tajvanin në vendin e tretë me numrin e viktimave, menjeherë pas Kinës dhe Hongkongut.

 

 

Bler u tha trupave britanike në Irak se ata kanë kryer një "akt shumë të rëndësishëm dhe të lartë"

 

Bagdad, 29 maj 2003 – Kryeministri britanik, Toni Bler, u ka thënë trupave britanike në Irak se ata po marrin pjesë në një "akt shumë të rëndësishëm dhe të lartë" në çlirimin e vendit nga Sadam Hyseini, njofton BBCWorld. Z. Bler ka thënë se historia do të shikojë konfliktin e Irakut si "një nga momentet vendimtarë të shekullit".

Kryeministri britanik është lideri i parë perendimor që e ka vizituar Irakun që kur është përmbysur regjimi i Sadamit. Duke iu drejtuar 400 trupave britanike pranë njërit nga ish-pallatet presidenciale të Sadamit në Basra, Bler ka thënë: "Unë dëshiroj vetëm të shpreh krenarinë që ka çdonjëri në Britani për punën e madhërishme që keni bërë".

 

Bleri ka takuar përfaqësuesin e ri britanik në Irak, Xhon Sauers dhe udhëheqësin e Zyrës amerikane për rindërtim dhe ndihmë humanitare, Pol Bremer.

 

 

Janë vrarë 14 vetë e 12 janë plagosur në një sulm të kryengritësve në Ugandë

 

Kampala, 29 maj 2003 - Janë vrarë 14 udhëtarë ndërkaq 12 janë plagosur në një sulm të kryengritësve ndaj një autobusi të mërkurën në veri të Ugandës, ka bërë të ditur zëdhënësi i Armatës ugandeze. Ai ka theksuar se kryengritësit e Armatës së zotit të lëvizjes së rezistencës, nga pusia kanë sulmuar autobusin në afërsi të Pakvaçës, rreth 340 km në veriperëndim të kryeqytetit Kampala.

 

 

Abazi tha se do të arrijë një armëpushim me Hamasin

 

Jerusalem, 29 maj 2003 – Kryeministri palestinez, Mahmud Abazi, ka thënë në një intervistë të sotme (e enjte) për një gazetë izraelite se ai do të arrijë një armëpushim me lëvizjen islamike të vijës së fortë, Hamas, brenda javës së ardhshme, njofton AFP.

 

Ai i ka bërë këto komente vetëm disa orë para takimit vendimtar me kryeministrin izraelit, Ariel Sharon, ku do të diskutohet zbatimi i planit ndërkombëtar për paqe, me të cilin do t'i jipet fund dhunës aktuale. "Pas marrëveshjes me Hamasin, shpresoj se do të arrij një marrëveshje edhe me Tanzimin dhe Xhihadin islamik, me të cilat ende s'kemi pasur rast të takohemi", ka thënë kryeministri Abazi.

 

 

Është arrestuar një burrë që ka kërcënuar ekuipazhin e një aeroplani australian

 

Melburn, 29 maj 2003 – Dy shoqërues të fluturimit janë trajtuar në spital pasi janë sulmuar nga një burrë me një mjet të mprehtë druri gjatë një fluturimi vendor me një aeroplan në Australi, njofton Rojter. Ministri australian i Transportit, Xhon Anderson, ka deklaruar sot (e enjte) se një burrë i moshës 40-vjeçare ka hyrë në kabinë dhe ka kërcënuar për të rrëzuar aeroplanin.

 

Z. Anderason ka thënë se ndonëse incidenti duket të jetë i paramenduar, s'ka të dhëna se është akt terrorist. Incidenti ka ndodhur në bordin e aeropanit 1737, fill pasi është nisur nga Melburni. Sulmuesi ka qenë i armatosur me dy shtiza druri. Ai është arrestuar pasi aeroplani është kthyer në vendin e nisjes pas incidentit. Dy udhëtarë gjithashtu kanë pësuar lëndime të lehta dhe janë trajtuar në aeroport.

 

 

Një ushtar amerikan është vrarë sot në Irak

 

Bagdad, 29 maj 2003 – Një ushtar amerikan është vrarë sot (e enjte) nga forcat armiqësore në Irak, ka bërë të ditur Komanda qendrore amerikane, njofton Rojter. Në deklaratën e kësaj Qendre thuhet se ushtari u qëllua me armë zjarri kur po udhëtonte me automjet në autostradë.

 

Emri i viktimës nuk është bërë i ditur. Ai është dërguar në spital, ku është shpallur se ka vdekur. Deklarata nuk jep lokacionin e vrasjes, por incidenti është nën hetime. Nuk janë dhënë detaje të tjera më të hollësishme.

 

 

De Melo do influencojë në Irak

 

Nju Jork, 29 maj 2003 - Përfaqësuesi i veçantë i Kombeve të Bashkuara për Irakun Serxho Viera de Melo thotë se do ta shfrytëzojë postin e tij të ri në Irak për t'i udhëhequr britanikët dhe amerikanët në drejtimin e duhur.

I ngarkuar me këtë përgjegjësi nga Sekretari i Përgjithshëm i OKB-së Kofi Anan, zoti de Mello do ta kryejë këtë detyrë për katër muaj.

Përfaqësuesit të posaçëm të Kombeve të Bashkuara do t'i duhet të gjejë ekuilibrin për të vepruar si një zë i pavaruar që do të merret me autoritetet britanike dhe amerikane që drejtojnë Irakun.

 

 

Bler viziton sot Irakun

 

Londër, 29 maj 2003 - Toni Bler sot ësht nisur për një vizitë në Irak dhe kështu bëhet udhëheqësi i parë perëndimor që shkon në këtë vend që prej luftës.

Një vizitë simbolike por historike, e cila do të vërë në provë aftësinë e tij politike dhe prirjen për të rekomanduar.

Vizita ka si qëllim të falenderojë trupat dhe të peshojë detyrën e rindërtimit të Irakut, jo të triumfit - siç është shprehur kryeministri Bler.

 

 

Dy të vdekur nga SARS në Toronto

 

Toronto, 29 maj 2003 - Dy persona të tjerë kanë vdekur nga SARS-i në Toronto, për të cilët zyrtarët thanë se ishin dy gra të moshuara që kishin vdekur në spital. Autoritetet kanadeze këmbëngulin se po e mbajnë epideminë në kontroll, nëpër spitale.

Por lajmi se një shkollë 8-vjeçari u mbyll për shkak të SARS-it ka rritur shqetësimet.

Një nga nxënësit e një shkolle në periferi të Torontos kishte shfaqur simptoma të SARS-it tre ditë përpara se zyrtarët të urdhëronin mbylljen e shkollës duke çuar 1700 mësues dhe nxënës në karantinë.

 

 

"Ka patur shumë arsye për luftën në Irak"

 

Uashington, 29 maj 2003 - Zëvendëssekretari amerikan i mbrojtjes, Pol Uolfovic, është cituar të ketë thënë se çështja e armëve nuk ishte arsyeja e vetme e fillimit të luftës kundër Irakut.

Por ai tha se kjo ishte çështja për të cilën çdokush pajtohej, dhe ishte aprovuar për shkak të, siç e quajti, arsyeve burokratike.

Në një intervistë për një javore, zoti Uolfovic, tha se një nga faktorët madhor ishte edhe se një sulm mbi Irakun do t'i mundësonte Shteteve të Bashkuara që të tërheqin trupat e tyre nga Arabia saudite, duke zgjidhur atë që ishte ankesa më e madhe për Al-Kaidën.

 

 

Milan fiton titullin kampion të kampionëve për të gjashtën herë

 

Mançester, 29 maj 2003 – Mbrëmë në stadiumin “Old Trafford” të Mançesterit ishin mbledhur mbi 63.000 shikues për të përcjellë ndeshjen finale të Ligës së Kampionëve evropian, në mes të të dy skuadrave italiane, Juventus dhe Milan.

 

Takimi në kohën e rregullt përfundoi pa gola (0:0) dhe u desht të zhvillohet koha shtesë dy herë nga 15 minuta në pritje të "golit të argjendtë", por as në kohën shtesë nuk u përcaktua kampioni i kampionëve të Evropës.

Pas ekzekutimit të penalltive Milan mundi Juventusin me rezultat 3:2, dhe fitoi titullin kampion të kampionëve të Evropës për të gjashtën herë.

 

Ekzekutimi i penalltive ishte shumë interesant, ndoshta ngarkesa e madhe e bëri të vetën ku madje 5 penallti nuk arritën të konkretizohen. Në njërën anë, portieri i Milanit, braziliani Dida arriti të mbrojë 3 penallti, ai ndali gjuajtjet e Trezegesë, Zallejetës dhe Monteros, ndërkaq portieri i Juventusit, Bufon mbrojti gjuajtjet e Sedorfit dhe Kalaxes. Penalltinë e pestë,vendimtare, për Milanin e realizoi reprezentusi ukrainas, Andri Shevçenko.

 

Për Milanin gjithashtu shënuan edhe Serzhinjo dhe Nesta, ndërkaq për Juventusin të saktë nga penalltita ishin Birindeli dhe Del Piero.

Kupën e Ligës së Kampionëve, Paolo Maldinit, kapitenit të Milanit, ia dorëzoi Lenart Johanson, president i UEFA-së.

Futbollistët e Milanit nga klubi i tyre Milan, për këtë triumf fituan secili nga 250.000 euro, kurse trajneri Ançeloti, për të cilin, ky është trofeu i parë i Ligës së Kampionve fitoi madje 400.000 euro.

Copyright©2000-2003 Trepca.net - Të gjitha të  drejtat e rezervuara.