Lajme

E mërkure, 28 maj 2003

Përmbajtja:

• Shtajner dhe Mini formojnë një bord për hetime rreth përfshirjes së të mundshme të pjesëtarëve të TMK-së në AKSH

• Shtajner thotë se ai që shkon në Selanik duhet t'i pranojë rregullat e atjeshme

• Shtajner largohet nga Kosova

• Shtajner shkon në detyrë të re në Gjenevë?

• Delegacioni parlamentar i Kuvendit të Shqipërisë i dha fund vizitës triditëshe në Kosovë

• Servet Pëllumbi sot viziton Drenasin dhe Prekazin

• Kryetari i Kuvendit të Shqipërisë vizitoi Prizrenin  

• KMDLNJ shpreh shqetësim për shkak të përdorimit aq të lehtë të termit "terrorizëm"

• Shtyhet seanca gjyqësore për rastin e "Rilindjes"

• Paqeruajtësit bashkëbisedojnë për paqen me nxënësit e Gjilanit

• Në Prishtinë u diskutua për avancimin e sistemit zgjedhor në Kosovë

• Pensionistët kërcënohen me grevë urie

• Sot mbahet takimi i dytë i grupit të përbashkët për bartjen e përgjegjësive

• Në Gjilan hapet ekspozita e fëmijëve refugjatë "78 porta presin lirinë"

• Sonte zhvillohet ndeshja finale e Ligës së Kampionëve ndërmjet dy skuadrave italiane, Milan dhe Juventus

• Shqipëria analizon propozimin britanik për ngritjen e një qendre strehimi për emigrantët ilegalë

• Eshtë shënuar një shkallë në rritje e akteve të dhunës në rajonin e Kumanovës

• Irani ka mohuar pohimet amerikane për objekte sekrete bërthamore ose lidhje me Al Kaidën

• AI: Lufta kundër terrorit e ka bërë botën një vend më të rrezikshëm

• Rusia ka konfirmuar sot rastin e vet të parë të infektimit me SARS

• Ukraina dhe Shqipëria nënshkruajnë disa marrëveshje bashkëpunimi

• Deputetët shqiptarë kundërshtojnë idenë se nataliteti dhe statusi final i Kosovës rrezikojnë sigurinë e Maqedonisë

• Ministria e brendshme maqedonase ofron një shpërblim prej 25.000 eurosh për gjetjen e personave të zhdukur

• Qeveria gjermane financon procesin e ristrukturimit të qendrës së Tiranës

• Mahmud Abazi: Izraeli duhet të heqë rezervat në planin amerikan të paqes

• Në një aksident ajror në Everest të Nepalit kanë humbur jetën të pakten tre alpinistë

• Të pakten 9 persona kanë humbur jetën dhe rreth 200 të tjerë janë lënduar në termetet e reja në Algjeri

• Është arrestuar personi i dyshimtë për vrasjen e të pakten pesë grave në Luziana

• Janë arrestuar 5 burra të dyshimtë në lidhje me bombardimin vetëvrasës në Riad

• SHBA rrit presionin ndaj Iranit

Shtajner dhe Mini formojnë një bord për hetime rreth përfshirjes së të mundshme të pjesëtarëve të TMK-së në AKSH

 

Prishtinë, 28 maj 2003 - Kryeadministratori i Kosovës Mihael Shtajner dhe komandanti i KFOR-it Fabio Mini kanë vendosur të formojnë një bord special hetues, i përbërë nga pjesëtarët e UNMIK-ut dhe KFOR-it për të hetuar nëse pjesëtarët e TMK-së janë përfshirë në AKSH.

 

Ky vendim është bërë i ditur dje në një kumtesë të përbashkët të zyrave të shefit të UNMIK-ut Mihael Shtajner dhe komandantit të KFOR-it, Fabio Mini.

Ky bord do të formohet deri më 2 qershor, ka thënë zëdhënësja e UNMIK-ut, Izabela Karlovic. Ajo ka nënvizur se detyra e këtij bordi do të jetë që të hetojë në lidhje me pjesëtarët e tashëm dhe të ardhshëm të TMK-së, të cilët mund të jenë të përfshirë në organizata të tjera dhe të merren masa për largimin e tyre.

 

 

Shtajner thotë se ai që shkon në Selanik duhet t'i pranojë rregullat e atjeshme

 

Prishtinë, 28 maj 2003 - Ai që shkon në Selanik duhet t'i pranojë rregullat e atjeshme, ndërkaq ai që dëshiron të shkojë në Evropë duhet t'i pranojë rregullat e Evropës, ka deklaruar kryeadministratori i Kosovës, Mihael Shtajner.

 

Sipas tij, çdo i ftuar në samitin e Selanikut, duhet të jetë i gatshëm për të biseduar me pjesëmarrësit e tjerë. Kjo duhet të vlejë edhe për delegacionet e UNMIK-ut dhe të Beogradit, ka thënë Shtajner.  

  

  

Shtajner largohet nga Kosova

 

Berlin, 28 maj 2003 - Qeveria gjermane ka vendosur sot që shefi i UNMIK-ut në Kosovë Mihael Shtajner të jetë përfaqësues i Gjermanisë në Kombet e Bashkuara në Gjenevë, bëri të ditur sot në mesditë radioja gjermane "Dojçe vele", duke cituar zëdhënësen e qeverisë.

Shtajner do të zëvendësojë ambasadorin e gjertanishëm gjerman në selinë e OKB-së në Gjenevë Valter Levalter.

Sipas të njëjtës radio Shtajner në Gjermani njihet se diplomat i rryer, por është i njohur edhe për të ashtuquajturën "aferë të kaviarit", e cila në vitin 2001 i kushtoi me karrierë, duke humbur postin e këshilltarit të kancelarit gjerman, Shrëder.

 

 

Shtajner shkon në detyrë të re në Gjenevë?

 

Hamburg, 28 maj 2003 - Emërimi i shefit të UNMIK-ut në Kosovë Mihael Shtajner në krye të përfaqësuesit të përhershëm të Gjermanisë pranë Kombeve të Bashuara në Gjenevë duhet të miratohet sot, shkruan gazeta gjermane "Bild".

 

Kjo gazetë saktëson se Këshilli i Ministrave në Berlin duhet të miratojë vendimin që Shtajner të zëvendësojë përfaqësuesin e përhershëm gjerman në OKB Valter Levalter, i cili shkon në pension kah fundi i muajit qeshor, transmeton Frans Press.

Ndërkohë në Prishtinë shtypi spekulon se në vend të Shtajnerit mund të vijë italiani Stafano Sanini.

 

 

Delegacioni parlamentar i Kuvendit të Shqipërisë i dha fund vizitës triditëshe në Kosovë

 

Prishtinë, 28 maj 2003 - Delegacioni parlamentar i Kuvendit të Shqipërisë i dha fund vizitës triditëshe në Kosovë. Gjatë ditës së sotme ky delegacion në krye me kryeparlamentarin Servet Pëllukmbi, vizitoi Drenicën dhe në Drenas mori pjesë në zbulimin e bustit të komanadanti të Brigadës "Fehmi Ladrovci" në shkollën fillore të këtushme.

Pastaj delegacioni vizitoi lagjen e Jasharajve në Prekaz ku bënë homazhe dhe vunë kurora lulesh në varrezat e dëshmorëve dhe të komandantit Adem Jashari, si dhe vizituan familjen Jashari.

 

 

Servet Pëllumbi sot viziton Drenasin dhe Prekazin

 

Prishtinë, 28 maj 2003 - Kryetari i Kuvenditë Shqipërisë, Servet Pëllumbi, sot do të vizitojë Drenasin dhe do të marrë pjesë në zbulimin e përmendores së dëshmorit të lirisë, komandantit të njohur të UÇK-së, Fehmi Lladrovci dhe pastaj do të bëjë homazhe në varrezat e Jasharajve në Prekaz.

Sot delegacioni i Kuvendit të Shqipërisë i jep fund vizitës triditëshe në Kosovë delegacioni i Kuvendit të Shqipërisë.

 

 

Kryetari i Kuvendit të Shqipërisë vizitoi Prizrenin

 

Prizren, 28 maj 2003 - Kryetari i Kuvendit të Shqipërisë Servet Pëllumbi, i shoqëruar nga kryeparlamentari i Kosovës, Nexhat Daci, dje pasdite ka vizituar Prizrenin, ku janë takuar me kryetarin e Kuvendit Komunal të Prizrenit, Eqrem Kryeziu.

Delegacioni i përbashkët shqiptaro-shqiptar ka vizituar monumentin e Lidhjes Shqiptare të Prizrenit dhe selinë e Ipeshkvisë së Kosovës, ku u pritën nga ipeshkvi imzot Mark Sopi.

 

 

KMDLNJ shpreh shqetësim për shkak të përdorimit aq të lehtë të termit "terrorizëm"

 

Prishtinë, 28 maj 2003 - Të martën, më 26 maj, policia e UNMIK-ut, me anë të një kumtese, ka njoftuar për arrestimin e një të riu shqiptar (23) në Mitrovicë për “konspiracion për të kryer vrasje” dhe për “akte të terrorizmit”.

 

Po sipas kësaj kumtese, arrestimi është bërë në bazë të fletarrestimit të lëshuar nga një gjykatës i Kosovës dhe ka të bëjë me krime të kryera në fillim të vitit 2003, thuhet në një prononcim të KMDLNJ-së.

Duke mos mohuar aspak të drejtën e policisë që të arrestojë personat e dyshimtë për kryerjen e veprave penale, Këshilli për Mbrojtjen e të Drejtave e të Lirive të Njeriut në Prishtinë në prononcimin e tij shpreh shqetësimin për shkak të përdorimit aq të lehtë dhe të shpeshtë të termit “terrorizëm” në akuzat e policisë ende pa u bërë hetimi i rasteve.

Cilësimet e policisë, sidomos kur është fjala për raste të rënda, para se të dëshmohen akuzat duhet të jenë të mbështetura në prova të besueshme, e të mos ndodhë si në këtë apo edhe në rastet e tjera të mëparshme që një kualifikim aq i rëndë si akuzimi për “terrorizëm” më vonë të demantohet nga vetë policia.

 

Rastet e këtilla mund të shkaktojnë huti të panevojshme, për të mos thënë edhe të dëmshme te opinioni, thuhet në fund të këtij prononcimi të KMDLNJ-së.

 

 

Shtyhet seanca gjyqësore për rastin e "Rilindjes"

 

Prishtinë, 28 maj 2003 - Kryetari i Këshillit Drejtues edhe u.d. kryeredaktori i "Rilindjes", Behlul Jashari, me avokatin mbrojtës z. Ilaz Ramajli, iu përgjigjen sot ftesës së Gjykatës Komunale të Prishtinës për shqyrtimin kryesor lidhur me dëbimin e gazetës “Rilindja” nga Pallati i Rilindjes.

Gjykatësja Sanije Muçolli kumtoi vendimin se seanca e shqyrtimit kryesor shtyhet për datën 24 qershor 2003 meqë pala e paditur – UNMIK-u nuk e ka pranuar ftesën e gjykatës me arsyetim se nuk është precizuar se cilës strukturë të UNMIK-ut i është adresuar ftesa.

"Mbetet që ne të precizojmë padinë dhe të identifikojmë se cila strukturë brenda UNMIK-ut do të jetë konkretisht palë e paditur.

“Rilindja” kërkon që t'i jepet fund mbylljes së gazetës tradicionale të Kosovës, kërkon të drejtën lokaleve të punës – pronës dhe të dëmshpërblimit", thonë drejtuesit e "Rilindjes".

Gazetës “Rilindja” detyrimisht i është ndërprerë botimi më 21 Shkurt 2002 me zbatimin e vendimit të UNMIK-ut për marrjen e Pallatit të Rilindjes për ndërtesë qeveritare. Zgjidhja alternative për lokale pune që i ishte premtuar “Rilindjes” ende nuk është bërë.

 

 

Paqeruajtësit bashkëbisedojnë për paqen me nxënësit e Gjilanit

 

Gjilan, 28 maj 2003 - Dita ndërkombëtare e paqeruajtësve, edhe në Kosovë, ku ata i shërbejnë paqes dhe sigurisë që prej katër vitesh, do të shënohet me një varg aktivitetesh.

Sipas njoftimeve nga Divizoni për informata në UNMIK, një grup i paqerujatësve elitë, të njohur me emrin "All Star" (Të gjithë yjet), do të vizitojnë gjimnazin "Zenel Hajdini" në Gjilan, ku do të takohen me nxënësit e këtushëm për të bashkëbiseduar për paqen në botë.

Takimi i "yjeve të paqes" me nxënësit e kësaj shkolle të Gjilanit do të mbahet të enjten, më 29 maj, nga orën 15 deri në 16.

 

 

Në Prishtinë u diskutua për avancimin e sistemit zgjedhor në Kosovë

 

Prishtinë, 28 maj 2003 - Përfaqësuesit e mekanizmave ndërkombëtarë, të partive politike, të organizatave joqeveritare dhe të asociacioneve të ndryshme profesionale mbështetën ndryshimin e sistemit zgjedhor në Kosovë. Në konferencë me temën: "Reformimi i sistemit zgjedhor në Kosovë", u dhanë disa rekomandime lidhur me këto ndryshime.

 

Gjithashtu u tha se ndryshimet në sistemin zgjedhor janë të domosdoshme, ngase tani në Kosovë është krijuar një situatë e re dhe sistemi zgjedhor i aplikuar në zgjedhjet e kaluara nuk u përshtatet kushteve dhe rrethanave të reja. Me këtë rast po ashtu u theksua se sistemi zgjedhor në Kosovë është e drejtë e rezervuar e përfaqësuesit special e sekretarit të përgjithshëm.

Grupi punues i OSBE-së është duke marrë rekomandime për procesin e ardhshëm zgjedhor në mesin e të cilave do të përfshihen edhe struktura e partive politike, financimi, kandidatët e tjerë, u shpreh Suzan Danduf, drejtoreshë e operacioneve zgjedhore në OSBE. Ajo theksoi se OSBE-ja do të fokusohet në krijimin e një trupi implementues lokal, që i referohet trupit zgjedhor menaxhues.

 

 

Pensionistët kërcënohen me grevë urie

 

Prishtinë, 28 maj 2003 - Shoqata e Invalidëve të Punës është kërcënuar se nëse deri në 16 qershor të këtij viti nuk përmbushen kërkesat e tyre për pensione, më 17 qesrhro do të hynë në një grevë urie, deklaroi kryetari Këshillit grevist Avdi Uka.

 

Ai ka akuzuar me radhë kryeadministratorët e Kosovës, prej Kushnerit, Hakerupit, Shtajnerit e deri te ministri Ahmet Isufi, duke i bërë përgjegjës për shkeljen e të drejtave të pensionistëve dhe të invalidëve të punës në Kosovë.

 

 

Sot mbahet takimi i dytë i grupit të përbashkët për bartjen e përgjegjësive

 

Prishtinë, 28 maj 2003 - Sot mbahet takimi i dytë i grupit të përbashkët të UNMIK-ut dhe qeverisë së Kosovës për bartjen e përgjegjësive.

 

Përfaqësuesit vendorë kërkojnë përshpejtimin e këtij procesi, ndërsa autoritetet ndërkombëtare thonë se deri në fund të vitit pritet kalimi i të gjitha përgjegjësive të parapara me ligj përveç atyre që mbeten të rezervuara për shefin e UNMIK-ut. Kundër këtij procesi vazhdojnë të jetë përfaqësuesit politikë sërbë.

 

 

Në Gjilan hapet ekspozita e fëmijëve refugjatë "78 porta presin lirinë"

 

Gjilan, 28 maj 2003 - Për nder të 1 qershorit, ditës ndërkombëtare të fëmijëve, në Gjilan, më 31 maj, do të hapet ekspozita e fëmijëve nga kjo komunë, që ishin refugjatë në kampin Stankovec të Maqedonisë, gjatë luftës në Kosovë.

Fatushe Haliti, koordinatore e Asamblesë së fëmijëve në Gjilan thotë se ekspozita përbëhet nga 78 vizatime të fëmijëve dhe një numër i fotografive, të cilat gjatë luftës në Kosovë, i ka grumbulluar në kampin Stankovec të Maqedonisë, përfaqësuesja e organizatës "Merci Cor", Rreze Duli.

Ekspozita është titulluar "78 porta presin lirinë", ndërsa pasqyron ëndrrat dhe vizionet e fëmijëve refugjatë për lirinë e Kosovës, kryesisht të atyre nga Përlepnica, Malisheva, Llashtica dhe disa vendbanime tjera të kësaj komune.

Ekspozita do të jetë e hapur deri më 8 qershor.

 

 

Sonte zhvillohet ndeshja finale e Ligës së Kampionëve ndërmjet dy skuadrave italiane, Milan dhe Juventus

 

Prishtinë, 8 maj 2003 - Sonte në stadiumin "Old Traffod" të Mançesterit do të zhvillohet ndeshja finale e Ligës së Kampionëve të Evropës, ku kundërshtarë janë dy skuadra italiane, Milan dhe Juventus.

Kjo është hera e parë që në finale Ligës së Kampionëve dy ekipe Italiane do të luajnë kundër njëra tjetrës.

Për kundër faktit se në këtë finale Milan do të luajë pa Pipo Inzagin ndërkaq Juventusi do të luajë pa Pavel Nedvedin, shpresojmë se kjo ndeshje do të jetë mjaft interesante.

Milan deri më tash pesë herë ka qenë kampion evropian, mirëpo për herë të fundit kampion evropian ka qenë në vitin 1994.

 

Ndërkaq Juventusi, pasi që ka siguruar titullin e kampionit në Ligën italiane (Seria A) synimet e tij janë që edhe për herë të tretë të stoliset me këtë titull. Herën e fundit Kampion i Evopës, Juventusi ishte në vitin 1996.

 

 

Shqipëria analizon propozimin britanik për ngritjen e një qendre strehimi për emigrantët ilegalë

 

Tiranë, 28 maj 2003 - Përfshirja e Shqipërisë në propozimin e Britanisë së Madhe si një nga vendet ku do të mund të ngriten qendra të strehimit për emigrantët ilegalë të diktuar në zonën e BE- së, po merr formë zyrtare.

I pyetur për qëndrimin e Shqipërisë për këtë çështje, ministri i Jashtëm, Ilir Meta, tha se çështja nuk mund të kapërcehet vetëm me masa restriktive.

"Në këto momente ne po e studiojmë këtë propozim. Është e rëndësishme të kuptohet se problemet e emigracionit ilegal nuk mund te zgjidhen vetëm me masa restriktive, pavarësisht nga angazhimet e mëdha që ne kemi marrë në këtë drejtim dhe nga progresi i shënuar në vitet e fundit.

 

Mënyra më efikase dhe më afatgjatë është angazhimi i BE-së për të mbështetur më tej zhvillimin e vendeve tona dhe integrimin e tyre në Bashkimin Evropian", tha zëvendëskryeministri shqiptar.

Rrjedhimisht, ende nuk janë dhënë hollësi se në ç'përmasa është menduar të jenë këto qendra të strehimit, kur mund të ngrihen dhe me çfarë rregullash do të mund të funksionojnë.

 

 

Eshtë shënuar një shkallë në rritje e akteve të dhunës në rajonin e Kumanovës

 

Shkup, 28 maj 2003 - Sipas OSBE-së në Shkup, është shënuar një shkallë në rritje e akteve të dhunës në rajonin e Kumanovës dhe në ish-rajonet e krizës. Kështu ka deklaruar zëdhënësi i OSBE-së Volfgang Greven, në takim të përbashkët për media të NATO-s, të OSBE-së dhe të Bashkimit Evropian.

Zëdhënësi i OSBE=së nuk ka ndonjë përgjigje për shkaqet e rritjes së dhunës, por thotë se zgjidhje e mundshme për këtë problem janë prania e shtuar e forcave policore, progresi ekonomik dhe infrastruktura e mirë.

Zëdhënësi i OSBE-së mendon se shenjë pozitive është ajo që në këto rajone kërkohet prani e përforcuar e forcave të policisë, gjë që tregon se po rritet besimi ndaj pushtetit.

 

Ndërkaq, shkatërrimi dhe vandalizmi mbi shtëpitë e rindërtuara në ish-rajonet e krizës ka prapavijë kriminele e jo politike, ka vlerësuar zëdhënësi Greven, njofton MIA në gjuhën shqipe.

 

 

Irani ka mohuar pohimet amerikane për objekte sekrete bërthamore ose lidhje me Al Kaidën

 

Teheran, 28 maj 2003 – Irani ka mohuar sot (e merkurë) pohimet amerikane për objekte sekrete bërthamore ose lidhje me Al Kaidën dhe ka akuzuar Uashingtonin për standarde të dyfishta në luftën kundër terrorizmit, njofton Rojter.

 

Zyrtarët amerikanë kanë shtuar trysninë në ditët e fundit në Teheranin, duke e akuzuar atë për ndërmarrje të pamjaftueshme të hapave për të zbuluar anëtarët e Al Kaidës në Iran, të cilët mund të kenë luajtur rol në bombardimet vetëvrasëse në Arabinë Saudite në fillim të këtij muaji.

 

 

AI: Lufta kundër terrorit e ka bërë botën një vend më të rrezikshëm

 

Londër, 28 maj 2003 - Lufta kundër terrorit që e kanë shpallur liderët e Perëndimit e ka bërë botën një vend më të rrezikshëm, ka vlerësuar organizata joqeveritare ndërkombëtare për të drejtat e njeriut Amnesti Interneshënell (AI).

 

Në një raport vjetor të publikuar në Londër konstatohet se njerëzit anembanë botës sot janë më pak të sigurt sesa në cilëndo qoftë periudhë pas përfundimit të luftës së ftohtë.

 

Amnesti Interneshënell paralajmëron se nën pretekstin e luftës kundër terrorizmit qeveritë anembanë botës kanë forcuar represionin politik gjë që ka shkaktuar rrezikimin e të drejtave të njeriut, thotë AI.

 

 

Rusia ka konfirmuar sot rastin e vet të parë të infektimit me SARS

 

Moskë, 28 maj 2003 – Rusia ka konfirmuar sot (e merkurë) rastin e vet të parë të infektimit me SARS të një burri në kufirin e saj të largët lindor me Kinën, njofton Rojter. Personi i diagnozuar me SARS është nga Blagoveshensku në breglumin Amur, i cili është kufi natyror me Kinën.

 

 

Ukraina dhe Shqipëria nënshkruajnë disa marrëveshje bashkëpunimi

 

Kiev, 28 maj 2003 - Në takimin e zhvilluar dje, më 27 maj në Kiev, Ukrainë, mes Zv.Kryeministrit dhe minister i Puneve te Jashtme, z. Ilir Meta, me ministrin e Puneve te Jashtme te Ukraines, z. Anatolij Zlenko, te dy bashkebiseduesit shprehen vullnetin dhe identifikuan hapat konkretë per te zhvilluar me tej marredheniet midis dy vendeve qe kane njohur nje progres te vazhdueshem gjate vitit te fundit.

Ata shprehen kenaqesine e tyre per realizimin e disa marreveshjeve te rendesishme bilaterale se fundi, si dhe ndane te njejtin mendim per nevojen e plotesimit te shpejte te kuadrit ligjor te bashkepunimit.

 

Ata vleresuan progresin e bere ne fushen e shkembimeve tregtare dhe ekonomike, te cilat do te marrin nje impuls te ri pas nenshkrimit, prej Kryetareve te Dhomave te Tregtise te dy vendeve, te Protokollit te Bashkepunimit midis tyre.

Ministrat vleresuan gjithashtu nenshkrimin e Marreveshjes ne fushen e “Luftes Kunder Krimit te Organizuar dhe Trafiqeve te Paligjshme”, Arsimit dhe Mjekesise, te cilat do te zgjerojne dhe konkretizojne bashkepunimin edhe ne keto fusha te reja midis dy vendeve.

Po kështu, Ilir Meta theksoi se komuniteti shqiptar qe jeton ne Ukraine, duhet te gezoje te gjithe te drejtat qe I takojne ne nje vend demokratik, duke u bere nje faktor tjeter per forcimin e marredhenieve midis dy vendeve.

Me pas bashkebiseduesit shkembyen mendime rreth situates ne rajon, si dhe per zhvillimet e rendesishme ne fushen nderkombetare.

Presidenti i Ukraines, z. Leonid Kuchma priti ne nje takim te veçante Zv/kryeministrin dhe Ministrin e Puneve te Jashtme, Ilir Meta.

 

 

Deputetët shqiptarë kundërshtojnë idenë se nataliteti dhe statusi final i Kosovës rrezikojnë sigurinë e Maqedonisë

 

Shkup, 28 maj 2003 - Deputetët shqiptarë në Parlamentin e Maqedonisë e quajnë të papranueshme inkuadrimin e natalitetit dhe statusit përfundimtar të Kosovës si rrezik për sigurinë e Maqedonisë në konceptin nacional për siguri dhe mbrojtje të vendit, është i papranueshëm.

Deputetët shqiptarë në Komisionin për miratimin e këtij dokumenti për konceptin e mbrojtjes dhe të sigurisë së Maqedonisë i ka irituar paraqitja e deputetit të VMRO-DPMN Zoran Jovanov, i cili në propozimin e tij ka kërkuar që në koncept të inkoorporohet qëndrimi me këtë përmbajtje: "Statusi i padefinuar i Kosovës, paraqet rrezik potencial për sigurinë e Maqedonisë".

Duke kundërshtuar këtë spekulim deputeti i BDI-së, Talat Xhaferi lidhur me këtë propozim është shprehur se "aktualisht Kosova e ka statusin e protektoratit ndërkombëtar të OKB-së dhe ajo ka përgjegjësi për gjithçka që ndodh në atë territor", duke shtuar se zgjidhja e statusit të Kosovës nuk ka kurrëfarë implikimi në sigurinë e Maqedonisë dhe nuk do të ketë kurrëfarë ndikimi me konotacion negativ, tha ky deputet shqiptar.

 

 

Ministria e brendshme maqedonase ofron një shpërblim prej 25.000 eurosh për gjetjen e personave të zhdukur

 

Shkup, 28 maj 2003 - Ministria e Punëve të Brendshme të Maqedonisë ka ofruar një shpërblim prej 25 mijë eurosh për personat që japin informacione që do të çonin në gjetjen e personave të rrëmbyer dhe të zhdukur gjatë konfliktit të armatosur në këtë vend, ose në gjetjen e varrezave ku ata janë varrosur.

 

Deri më tash nuk ka pasur asnjë njoftim në lidhje me zhdukjet misterioze të 20 personave megjithë kërkimet që janë bërë në rrethinën e Tetovës ku dyshohej se mund të ishte një varrezë masive, por kjo doli e pavërtetë.

 

 

Qeveria gjermane financon procesin e ristrukturimit të qendrës së Tiranës

 

Tiranë, 28 maj 2003 - Qeveria gjermane do të financojë gjithë procesin e konkurrimit ndërkombëtar për ristrukturimin e qendrës së Tiranës. Përveç kësaj pala gjermane do të financojë dy çmimet e para të arkitektëve që do të shpallen fitues në konkurs.

 

Ndërkohë në Tiranë ka mbërritur një konsulent nga bashkësia e Frankfurtit i kontraktuar nëpërmjet organizatës gjermane për ndihmë teknike GTZ që vepron në Shqipëri në kuadër të bashkëpunimit gjermano-shqiptar.

 

 

Mahmud Abazi: Izraeli duhet të heqë rezervat në planin amerikan të paqes

 

Jerusalem, 28 maj 2003 – Kryeministri palestinez, Mahmud Abazi, ka deklaruar sot (e merkurë) se Izraeli duhet të heqë rezervat në planin amerikan të paqes dhe të tumir atë si një rast historik për t'i dhënë fund gjakderdhjes gati trivjeçare, njofton Rojter.

 

Abazi ka paraqitur kështu pozicionin e tij negocues në një intervistë të tij të parë një gazete izraelite që kur e ka marrë pozitën e kryeministrit palestinez. Ai do të takohet me kryeministrin izraelit, Ariel Sharon, si duket, të enjten, para takimit me presidentin Bush, që pritet të bëhet në javën e ardhshme.

 

 

Në një aksident ajror në Everest të Nepalit kanë humbur jetën të pakten tre alpinistë

 

Katmandu, 28 maj 2003 – Një helikopter është përplasur sot (e merkurë) duke u përpjekur për të ateruar në kampin bazë në Everest në Nepal dhe në këtë aksident kanë humbur jetën të pakten tre dhe janë lënduar rëndë një numër të tjerësh, njofton BBCWorld.

 

Atje po kremtohej jubileu i artë i ngjitjes së parë në Monteverest. Heliopteri po kthente prapa ekipin e alpinistëve në kryeqytetin nepalez Katmandu.

 

 

Të pakten 9 persona kanë humbur jetën dhe rreth 200 të tjerë janë lënduar në termetet e reja në Algjeri

 

Algjer, 28 maj 2003 – Të pakten 9 persona drohet se kanë humbur jetën dhe rreth 200 të tjerë janë lënduar në termetet e reja, që kanë goditur Algjerinë pas termetit të fuqishëm të javës së kaluar kur humben jetën 2.200 njerëz, njofton Rojter.

 

Njoftohet gjithashtu se janë shkatërruar edhe mëtej shumë ndërtesa banimi dhe janë tmerruar sërish qytetarët algjerianë, të cilët nga paniku kanë dalë në rrugë.

 

 

Është arrestuar personi i dyshimtë për vrasjen e të pakten pesë grave në Luziana

 

Atlanta, 28 maj 2003 – Policia e Atlantës ka arrestuar personin e dyshimtë për vrasjen e të pakten pesë grave në Luziana, bëjnë të ditur burimet policore, njofton Rojter. I arrestuasri është Derrik Li, 34-vjeçar, i cili është dërguar në burg nga depatrtmenti i policisë së FBI-së së Atlantës pa ndonjë incident.

 

 

Janë arrestuar 5 burra të dyshimtë në lidhje me bombardimin vetëvrasës në Riad

 

Riad, 28 maj 2003 – Autoritetet saudite kanë arrestuar pesë burra të dyshimtë në lidhje me sulmin vetëvrasës vdekjesjellës në Riad, kur u vranë 34 persona, kanë bërë të ditur burimet saudite në një njoftim të sotëm (e merkurë), njofton Rojter.

 

Njëri nga të arrestuarit besohet të jetë kryeorganizator. Të gjithë janë arrestuar në qytetin e shenjtë musliman Medina, por nuk janë dhënë detaje të tjera.

 

 

SHBA rrit presionin ndaj Iranit

 

Uashington, 28 maj 2003 - Sekretari amerikan i Mbrojtjes Donald Ramsfeld e ka paralajmëruar përsëri Iranin që të mos ndërhyjë në punët e Irakut të pasluftës.

Komentet e zotit Ramsfeld erdhën në një kohë që vazhdon retorika e ashpër e Uashingtonit drejtuar Teheranit.
Ka dyshime se Uashingtoni po vazhdon të ruajë presionin verbal ndaj Teheranit. Nuk është ende e qartë nëse kjo do të thotë më shumë se ç'provon në këto momente.

Ka lëvizje për bisedime ku administrata pritet të ashpërsojë tonin ndaj Iranit.

Megjithatë nuk ka shenja për atë që do të përkthehej si një politikë e re ndaj Iranit.

Copyright©2000-2003 Trepca.net - Të gjitha të  drejtat e rezervuara.