OPINIONE

Gazeta kombëtare “Bota Sot” ka bërë dhe po bën përpjekje maksimale për bashkim kombëtar

24 maj 2003 / Shkruan: Besim KRASNIQI

Këto ditë opinionit tonë iu servua një artikull "i guximshëm" dhe i "jashtëzakonshëm" i kryeredaktorit të javores "Zëri" i njohur me emrin Halil Matoshi, me titull ""Bota sot" dhe bota tjetër", me ç'rast ky gazetar i njohur për kukamat e tij marroçe të publikuara pas burgosjes së tij, (thuaja se vetëm ai kishte përjetuar burgun serbosllav dhe askush tjetër në Kosovë) i vërsulet stafit, gazetarëve, bashkëpuntorëve dhe lexuesve të gazetës kombëtare "Bota sot" nën moton "Të eliminohet dhe neutralizohet përfundimisht e vetmja gazetë e guximshme kombëtare në Kosovë, në troje tjera etnike dhe në diasporë, gazeta kombëtare "Bota sot""!

Meqenëse i takoj stafit të bashkëpuntorëve të ngushtë të gazetës kombëtare "Bota sot", e ndjej për obligim kombëtar, moral dhe intelektualë t'i kundërvihem shpifjeve të artikullit të lartëpërmendur, në të cilin nuk ofrohen kurfarë faktesh në relacion me atë që thuhet aty, por ka vetëm tendenca të hapura të manipulimit të një pjese të opinionit e cila i beson akoma pseudointelektualëve të shkolluar në Kumrovc në Qendrën shkollore të PKJ-së, të ushtruar në mënyrë precize dhe të rryer për propagandë demagogjike ndaj dr.Ibrahim Rugovës, Lidhjes Demokratike të Kosovës dhe ndaj gjithë atyre që kanë guximin t'i thojnë të zezës e zezë dhe të bardhës e bardhë, gjegjësisht kundër atyre gazetarëve që luftojnë kundër rrenës, trillimeve, shpifjeve dhe krimit të organizuar politik në Kosovë!

Autori fillimisht shprehet se është parimisht për fjalën e lirë, ndërsa aty për aty e zbulon veten se është kundër këtij parimi, derisa në artikullin e tij nuk e përmend askund vrasjen e bashkëpuntorëve të ngushtë të kësaj gazete siç ishin pendat më të guximshme të gazetarisë shqiptare në Kosovë Enver Maloku, Xhemail Mustafa, Shefki Popova dhe Bekim Kastrati!? A nuk është kjo gënjeshtër e kulluar e autorit të këtij shkrimi (kupto: fletë aktgjykimi), kur ky del publikisht në mbrojtje të vrasësve të mendimit dhe fjalës së lirë, derisa nuk e dënon me asnjë shkronjë vrasjen e gazetarëve të gazetës "Bota sot"?

Me fjalë të tjera, është kjo hedhje rumuzesh dhe pluhur syve opinionit shqiptar dhe asgjë tjetër! Pastaj, "Bota sot" anjëherë nuk ka shkruar se e tërë Partia Socialiste apo e tërë PDK-ja janë tradhtarë dhe terroristë (këtu shihet se ka elemente të futjes së urrejtjes kundër gazetës "Bota sot"), por ka shkruar se drejtuesit e Partisë Socialiste janë antikombëtarë (takimi i njohur i Kretës etj.) si dhe disa nga figurat kyçe të PDK-së kanë patur lidhje të drejtëpërdrejta me krimin politik gjatë dhe pas luftës në Kosovë, për çka është argumentuar me qindra herë edhe publikisht, ndërsa disa media tjera në Kosovë mund të thuhet lirisht se janë nën çdo nivel profesional dhe kombëtar mu për faktin se roli i tyre në mbrojtje të fjalës së lirë dhe kundër krimit politik ka qenë i rrejshëm dhe barazi me zero.

"Bota sot" në vazhdim akuzohet për "monopolizim të luftës kundër dhunës politike në Kosovë" dhe për "ndarje të kombit", por nuk theksohet askund se "Bota sot" është gazeta më e rrezikuar nga falangat enveristo-titiste të tërbuara, mu për arsyen se nuk ka mundur të sillet me sens ledhatimi ndaj krimit dhe dhunës politike në Kosovë, apo edhe të presë ndoshta nga stafet e mediave majtiste lejen se çfarë mund të botojë dhe çfarë jo?! "Ndarjen e kombit" nuk e ka bërë "Bota sot" por përçarjet e brendshme i kanë bërë përfaqsuesit dhe përkrahësit e "revolucionit të vonuar demokratik" dhe anti-Rugovistët e përbetuar, të cilët asnjëherë nuk deshtën t'i njohin institucionet e Kosovës, presidentin e Kosovës, votën e lirë të qytetarëve të Kosovës, e bënë ndarjen e kombit ata të cilët u betuan se do t'i likuidojnë të gjithë ata që e përkrahin dr.Rugovën dhe LDK-në, pra ata që u treguan hapur kundër opsionit të Pavarësisë së Kosovë! H.Matoshi duket të ketë harruar se Ekrem Rexha - komandant "Drini"është viktimë e mediave që kanë bërë ndarjen dhe përçarjen brendashqiptare, vetëm e vetëm për shkak të bindjeve të tij politike, prandaj akuza të tilla demagogjike ndaj "Botës sot" nuk mund të pijnë më ujë "të çelbur" në opinionin tonë të vetëdijësuar dhe demokratik.

"Bota sot" nuk "i ka hedhur në treg plaçkash eshtrat e idealistëve shqiptarë" dhe as nuk "po i shet lirë bulevardeve", siç manipulon me lexuesin ky "kryeredaktor" i revistës javore "Zëri", ngase "Bota sot" i nderon lartë e më lartë heronjët e luftës çlirimtare që ranë për lirinë e Kosovës, duke i përkujtuar dhe lartësuar veprat heroike të tyre. Eshtë e kundërta ajo që po ndodh në Kosovë, janë mediat private dhe ideologjike (ku bën pjesë edhe "Zëri") të cilat duke tentuar t'a bindin opinionin për "patriotizmin" e tyre dhe për "mbrojtëse të vlerave" po manipulojnë me emra dëshmorësh të përvetsuar në "të tyre" dhe në "të tanët", e që historia jonë e re po tregon çdo ditë se të kujt ishin dëshmorët e Kosovës, afër kujt ishin renditur politikisht dhe për çfarë opsioni politik u angazhuan derisa ishin gjallë.

"Bota sot" ka rënë në duar dhe mendje inatçore, në mendje që bien dhe ngrihen me intencën vëllavrasës, që duan ta kallin atdheun dhe të ngrohen në flakët e tij, të vetëkënaqen në këtë lloj onanizmi patologjik, të ekzaltohen tek u kallen ato pak gjëra të çmueshme Shqipërisë dhe Kosovës, pra dy copave të atdheut të shqiptarëve: fisnikëria, bujaria dhe nera! Për burrëri, nuk kemi çfarë të flasim." - trillon në një pjesë të "fletë aktgjykimit" të tij demagogjik H. Matoshi. Po mirë ore zotëri demagog, kush ia vuri flakën Shqipërisë në vitin 1997 dhe kush ishin ata që e kallën dhe u ngrohën në flakët e atij zjarri?

Cila gazetë shqiptare në Kosovë e dënoi dhe vazhdon ta dënojë aktin terrorist të socialistëve të Shqipërisë ndaj vetë Shqipërisë i njohur si "revolucion i vonuar demokratik" dhe cilat gazeta (anti)shqiptare në Kosovë e përkrahën fuqimisht këtë revolucion dhe vazhdojnë të stimulojnë akoma revolucione të ngjajshme edhe në Kosovë, duke intervistuar figura të dyshimta e të maskuara kriminele? Cila redaksi është pra më inatçore, "patriotike" që bie dhe ngrihet me intenca të vëllavrasjes në Kosovë se ajo në emër të së cilës flisni kësaj rradhe? Këtë e fsheh autori H. Matoshi qëllimisht, për të helmuar opinionin me fjalamaninë e tij demagogjike dhe krejtësisht vëllavrasëse! Kur është fjala te listat e likuidimeve, të cilat sipas autorit i paska shpikur "Bota sot", atëherë si mund të shpjegohet lista e përgaditur me emrat e politikanëve dhe ushtarakëve me orientim të djathtë kombëtar e nënshkruar nga B. Zyrapi? Si shpjegohet fakti se në listën e likuidimeve janë emrat e atyre që u vranë gjatë periudhës së luftës dhe asaj të pasluftës në Kosovë siç ishin Ahmet Krasniqi, Azem Hajdari, Xhemail Mustafa, Enver Maloku, Smajl Hajdaraj, Tahir Zemaj etj.?

Se ka ekzistuar shërbimi sekret dhe eskalioni mafiozë kriminelë në Kosovë, mjaftojnë të shohim se kush dhe për çfarë po dënohet sot në Kosovë dhe do të bindemi se shërbime të tilla kanë ekzistuar dhe vepruar kundër "demokratëve" të Kosovës dhe "për rrëzimin e pushtetit të Rugovës"! 

Këtu shihet qartë se kush e kishte marrë në dorë vetëgjyqësinë dhe vendoste mbi atë se kush ka merita e kush jo, se kush është patriot dhe kush tradhtar, se kush është përçarës dhe kush bashkues, se kush, prap sipas tyre, është kriminelë dhe kush viktimë, se kush i gëzohej vrasjeve të burrave më të devotshëm të Kosovës e kush qante për ta, se kush i përvetësonte vlerat e luftës dhe kush luftonte për ruajtjen e tyre, se kush lëshonte çërtifikata për patriotizëm dhe kush për tradhëti, se kush e kishte monopolizuar të drejtën për ta dashur atdheun e kush e kishte të ndaluar, se kush e kishte shëndrruar atdheun në çiflig privat dhe kush vdiste për të, se kush i këndonte mjellmës së varreve të reja dhe kush qante pranë funebrës së bijëve më të shtrenjët të kombit, se kush ngrehte kurtha dhe kush ishin "peshqit" e zënë në to, se kush vriste dhe kush ishin të vrarët, dhe kështu me rradhë deri në pafundësi!?

Pastaj, shkrimi i këtij autori me stilin e përdorur, gjuhën dhe logjikën e formulimit të fjalive dhe periudhave, me shprehjet shizofrenike të pa konstruktuara mirë gjuhësisht dhe as politikisht, a nuk dëshmon se është pikërisht kjo metodë e përdorur viteve të fundit me të cilën është nxitur dhe ushqyer vëllavrasja, me të cilën gjuhë bastarde është sulmuar pandërprerë gazeta kombëtare "Bota sot", e cila jo vetëm se ka bërë përpjekje maksimale për bashkim kombëtar, por me gjithë qenjën e saj, bile edhe me gjakun e gazetarëve të saj dhe me mund të madh ka luftuar për realizimin e aspiratave kombëtare të kombit shqiptar, për zgjidhjen e kauzës nacionale shqiptare ende të pazgjidhur.

Pendat, analistët politikë dhe ushtarakë, komentatorët, publicistët dhe gazetarët e saj janë të gjithë njerëz me biografi të pastër morale dhe kombëtare, janë atdhetarë dhe patriotë të shquar të cilët nuk janë pajtuar dhe as nuk kanë mundur të pajtohen kurrë, si disa pseudointelektualë shqiptarë, me rrenën, me aktrimin e rrejshëm në gazetari, me krimin dhe vrasjet politike, se nuk i ka lejuar ndërgjegja që të pajtohen as me sjelljet dhe logjikën servile prezente tek një pjesë e mediave shqiptare ndaj padronëve të tyre politikë, të cilat jo vetëm se nuk e kanë luftuar krimin politik në Kosovën e pasluftës, por sipas të gjitha gjasave e kanë stimuluar me shkrime dhe qendrime të cilat në esencë e kanë favorizuar dhe trimëruar mendësinë e vrasjeve politike, dhe si duket këtë e kanë bërë vetëm se "bota tjetër", 70 përqind e popullit (pjesa analfabete, sipas R. Qosjes dhe A. Demaçit) e ka përkrahur politikën e udhëhequr nga lideri kombëtar dr. I. Rugova, pastaj janë vrarë ata gazetarë dhe është sulmuar "Bota Sot" vetëm se i ka thënë NDAL krimit dhe vrasjeve politike në Kosovë.

"Bota Sot" është sulmuar dhe është urrejtur vetëm pse e ka luftuar logjikën që e ka monopolizuar historinë, luftën dhe vlerat e saja, vetëm pse i ka mbrojtur institucionet shtetërore të Kosovës, vetëm se e ka njohur dr. I. Rugovën për president të Kosovës, vetëm pse e ka thënë të vërtetën për luftën çlirimtare dhe aktorët realë të saj, vetëm se ka dashur ta zbardh realitetin në Kosovë ashtu siç është dhe jo të profilizuar sipas tekeve dhe interesave të klaneve uzurpuese dhe mafioze.

Fjalori që ka përdorur z. Matoshi në shkrimin e tij shpifës fletë qartë se i cilës gjuhë është,  cilit "zhanër" politik i takon, i cilës çmenduri politike është, ngase vetë stili i përdorur "gazetaresk" është i tipit që vretë, i metodës që linçon, i mënyrës që atyre që kanë pikëpamje tjera politike t'ua mbyllë gojën me dhunë. Janë vetë gjuha dhe "argumentet" që përdorë autori faktet më bindëse që zbulojnë qëllimin dhe fytyrën e të pafytyrëve të cilët me çdo mjet e luftuan dhe vazhdojnë ta vrasin gazetën dhe gazetarët e "Bota Sot".

Vetë "faktet" që ka përdoruar autori janë argumente të forta që flasin se është pikërishtë stafi i "Zërit" (të qyqeve) ai i cili injorancën politike e kanë "adutin" më të fortë të vetëdijes qorre kombëtare, që lavirësinë e pikëpamjeve politike e ka shprehi të punës së përditëshme, se ky staf vetë është dëshmuar si punëtori më i zellshëm për zbatimin në mesin shqiptar të formulës serbe "përçaj e sundo", se është vetë ky staf i cili e ka terrorizuar deri në çmenduri opinionin shqiptar me rrena dhe gënjeshtra të paskrupullta përmes paraqitjeve në opinion të opsioneve "të moderuara" politike për zgjidhjen e çështjes së Kosovës, plotësisht në frymën e "bashkimvëllazërimit" socialist jugosllavë. Pastaj, opinionit i ka ofruar "analiza" me të cilat është ushqyer në rrënjë logjika dhe mendësia e teorisë staliniane për "spastrimin e oborreve" duke u kamufluar në opinion nën petkun e "gazetarisë moderne" se ja ne nuk hudhim në fushë të gjitha të palarat tona, që në realitet s'ishte tjetër veçëse punë pazari me gjakun e mijëra dëshmorëve të kombit.

Të shkretët, mendonin se "Bota Sot" nuk ka sy që t'i sheh këto hile dhe pazarllëqë që bëheshin dhe që vazhdojnë të luhen mbi kurrizin e varfër të popullit shqiptar, se kjo ka qenë gjuha më perfide (katile) që ka njohur ndonjëherë opinioni shqiptar, gjuha e cila ka kurdisur me perfiditet prita dhe pusia mortit, nga të cilat janë sulmuar burrat më të mëdhenjë të kombit, intelektualët dhe patriotët të cilët dhanë dhe hartuan opsionin më kombëtar për thyerjen njëherë e përgjithmonë të prangave të robërisë sllave, dhe vetë fakti se vrahet një minstër i mbrojtjes së Kosovës, një deputet i parlamentit, një kryetar komune, një gazetarë, një kryekomandant lufte, një kryekëshilltarë, etj, është i mjaftuar për të kuptuar se cila ishte prapavija e këtyre vrasjeve të heshtura, në mos edhe të dëshiruara nga disa "intelektualë" e tipit dhe sojit Matoshi and Company. Janë pikërishtë musketarët e këtillë ata të cilët duke e sulmuar "Botën Sot" deshën ta vrasin krahun më të përkushtuar kombëtar të intelektualëve dhe liderëve politikë të Kosovës.

Dhe e gjithë ajo ç'është shkruar në mediat e verdha të Kosovës kundër këtij krahu nuk na qenka "hyrje në ujërat e thella të përçarjes kombëtare", por vetëm ajo që shkruajnë gazetarët e "Bota Sot", ajo që kanë shkruar (trilluar) mediat majtiste kundër kryetarit të Kosovës nuk na qenkan "impenjim kundër Kosovës dhe lirisë së saj", por vetëm ajo që shkruhet në "Bota sot" në përkrahje dhe njohje të presidentit legjitim të Kosovës, ajo që shkruan ky artikullshkrues i porositur nuk na qenka "terrorizëm që fillon në gjuhë dhe me gjuhë", por vetëm ajo çka shkruajnë gazetarët e "Bota sot" dhe kështu me rradhë deri në pafund të pafytyrësisë së tyre intelektuale dhe politike?! Shtrohet pyetja vetëm deri ku e ka kufirin durimi njerëzor?

Copyright©2000-2003 Trepca.net - Të gjitha të  drejtat e rezervuara.