E marte, 21 maj 2003

21.05.2003 - Trepca.net

Lajme

E mërkure, 21 maj 2003

Përmbajtja:

Presidenti Rugova priti z.Pol Xhons, zyrtar i Departamentit amerikan të Shtetit
Ministria e Arsimit ndërmerr masa për kapërcimin e gjendjes në Qendrën e Studenteve
Akad.Rexhep Ismajli merr pjesë në takimin e akademive të 60 vendeve të botës që i fillon punimet sot
KFOR-i përkrah nismën për hapjen e një pike kufitare Kosovë - Maqedoni në Stançiq
Viti 2004 me siguri do të jetë viti i Kosovës
Ndihma amerikane në asfaltimin e rrugës Mamushë-Studençan, e cila përurohet nesër
Në Norvegji është kapur një bandë e rrezikshme hajnash e shqiptarëve të Kosovës
Presidenti Rugova priti anëtarët e familjes së atdhetarit Rifat Berisha
Ministria e Arsimit qorton drejtorin e Qendrës së Studentëve dhe kërkon nga ai suspendimin e shefit të mensës
Zëdhënësja e UNIMK-ut tha se Shtajneri është për pjesëmarrjen e përfaqësuesve të Kosovës në takimet ndërkombëtare
Kryeministri Rexhepi do të marrë pjesë në takimin e Forumit Ekonomik Botëror në Athinë të Greqisë
Shtajner thotë se e ka përkrahjen e BE-së që në Samitin e BE-së të ftohen edhe përfaqësuesit e Kosovës
BE ka kërkuar nga z. Shtajner që sa më parë të fillojë dialogu ndërmjet Beogradit dhe Prishtinës
Mbi 30 ekspertë të fushave të ndryshme filluan trajnimin treditor nga lëmi i planifikimit hapësinor
NATO-ja vazhdon të përkrahë sovranitetin e Maqedonisë
Në Shkup u përuruan zyrat e reja të Korpusit amerikan të Paqes
BDI dhe PDK bisedojnë për formimin e një partie të përbashkët
Mbi 190 vende kanë miratuar marrëveshjen ndërkombëtare kundër pirjes së duhanit
Amerikanët pranojnë ndryshimet në projektrezolutën për Irakun
Në luftimet e sotme në Aceh janë vrarë 13 veta, prej tyre 10 civilë
Ushtarët amerikanë kanë vrarë 3 ushtarë afganë dhe kanë plagosur komandantin e tyre afër ambasadës në Kabul
Misioni i KB në Kongo ka gjetur trupat e pajetë të 230 njerëzve, të vrarë gjatë luftimeve të fundit të fraksioneve rivale në Bunia
Ngrihet niveli i kërcënimit prej rrezikut terrorist nga i verdhë në portokalli
SHBA mbyllin ambasadën dhe dy konsullata në Arabinë Saudite për pesë ditë
Presidenti Bush zhvilloi një bisedë me kryeministrin palestinez

Presidenti Rugova priti z.Pol Xhons, zyrtar i Departamentit amerikan të Shtetit


Zoti Rugova tha se angazhohet për një Kosovë demokratike paqësore e tolerante, të integruar në strukturat veriatlantike dhe në miqësi të përhershme me SHBA-të. Presidenti Rugova me këtë rast falënderoi zotin Xhons për vizitën dhe interesimin e vazhdueshëm të SHBA-ve për Kosovën.
Zoti Xhons nga ana e tij e vlerësoi takimin me presidentin Rugova të shkëlqyeshëm, duke shtuar se kishte ardhur në Kosovë pas takimit të Grupit të kontaktit në Berlin, në të cilën është shënuar një pozicionim dakordues ndërmjet Uashingtonit dhe anëtarëve të tjerë të Grupit të kontaktit.
Pol Xhons theksoi se me Presidentin e Kosovës kishte biseduar për rrugët më të mira të implemetimit të standardeve të cilat janë përcaktuar nga misioni i OKB-së në Kosovë, para se të fillojë dialogu për statusin përfundimtar të Kosovës.

Zyrtari amerikan tha se në takim është biseduar edhe për mënyrat më të mira për zbatimin e standardeve në praktikë, për të mirën e të gjithëve në Kosovë dhe për rajonin në tërësi. Gjithashtu ai tha se kishte vizituar edhe disa serbë të kthyer në Kosovë dhe ishte i kënaqur me fillimin e procesit të kthimit serbëve në Kosovë.


Ministria e Arsimit ndërmerr masa për kapërcimin e gjendjes në Qendrën e Studenteve

Prishtinë, 21 maj 2003 - Në mbledhjen e sotme të Qeverisë së Kosovës, Ministria e Arsimit ka paraqitur një raport për masat që ka ndërmarrë për kapërcimin e gjendjes së krijuar në Qendrën e Studentëve.

Mirëpo, kryeministri Bajram Rexhepi ka kërkuar masa më rigoroze që të mos ndodhin më gjëra të tilla pas helmimit të studentëve në mensën e tyre. Njeherit zoti Rexhepi u bëri thirrje studenëtve grevistë të ndërpresin grevën për të mos e rrezikuar shëndetin e tyre dhe t'i kthehen procesit mësimor në universitet.

Qeveria përkrah masat që i ka paraparë Ministria e Arsimit për krijimin e kushteve më të mirë dhe ajo ka marrë përsipër që deri në semestrin e ardhshëm të krijojë kushte shumë më të mira për studentët, tha ai.
Duke folur për takimin e BE-së në Selanik, Rexhepi tha se në rast të pjesëmarrjes së tij në këtë takim dhe kërkesës që të takohet me delegacion serbe atje, paraprakisht do të konsultohet me Kuvendin e Kosovës. Kjo kërkesë sipas Rexhepit është e kahmotshsme, si nga BE-ja Këshili i Sigurimit dhe në përgjithësi nga faktori ndërkombëtar, por tha se nuk do të paragjykojë.
Në vazhdim kryeministri njoftoi se gruper punuese kanë identifikuar të gjitha fushat e bartjes së kompetenvave, ndërkohë që takimi i dytë i Këshillit do të mbahet në fund të këtij muaji.
Gjithashtu në takimin e sotëm qeveria ka miratuar edhe dy projektligje të cilat mund të procedohen në parlament - projektligjin për Parkun Nacional Bjeshkët e Nemuna dhe atë për pajisjet dhe produktet mjekësore.


Akad.Rexhep Ismajli merr pjesë në takimin e akademive të 60 vendeve të botës që i fillon punimet sot

Cyrih, 21 maj 2003 - Sot në qytetin Askona Monteverita të Zvicrës i fillon punimet takimi bienal i Rrjetit Ndërkombëtar për të Drejtat e Njeriut i akademive dhe i shoqërive shkencore nga mbarë bota, në të cilin merr pjesë edhe Rexhep Ismajli, kryetar i Akademisë së Shkencave dhe të Arteve të Kosovës.
Në kuadër të këtij takimi triditësh do të mbahet edhe një simpozium me temën "Shkenca në shërbim të të drejtave të njeriut dhe të drejtat ndërkombëtare", si dhe një takim pune në mbështetje dhe në mbrojtje të shkencëtarëve për fjalën e lirë.
Pjesëmarrjen e tyre e kanë paralajmëruar kryetarët dhe përfaqësuesit e akademive nga 60 vende të botës.
Qendra e këtij Rrjeti Ndërkombëtar është në Uashington, ndërsa kryetar i Komitetit Ekzekutiv është Torsten Vizel.


KFOR-i përkrah nismën për hapjen e një pike kufitare Kosovë - Maqedoni në Stançiq

Gjilan, 21 maj 2003 - Xhemajl Hyseni, zëvendëskryetar i komunës së Gjilanit tha të mërkurën, pas takimit me kolonelin amerikan Dejvid Sejxh, se KFOR-i e ka përkrahur nismën për hapjen e një pike kufitare në Stançiq, e cila do të lehtësonte lëvizjen e banorëve nga të dy anët e kufirit Kosovë - Maqedoni, e sidomos të atyre nga fshatrat e Grykës së Karadakut.
"Ne vlerësojmë se kjo do të jetë një pikënisje e rëndësishme në bashkëpunimin ndërkufitar të rajonit, projekt ky që ka mbështetjen edhe të Paktit të Stabilitetit dhe Këshillit të Evopës, të cilët kanë vizituar edhe më herët komunat Gjilan - Preshevë - Kumanovë, për të inkurajuar këtë proces", tha z. Hyseni.
Në të ardhmen, Kosova shpreson të jetë një vend që reflekton paqen dhe progesin në rajon. Hapja e kësaj pike kufitare dhe ndërtimi i rrugës Gjilan - Stançiq - Kumanovë, e cila do ta lidhte Kosovën me koridorin e tetë ndërkombëtar, vetëm sa do t`i përshpejtonin këto procese.
Përndryshe, koloneli Dejvid Sejxh e ka vlerësuar të mirë gjendjen e sigurisë në komunën e Gjilanit, gjatë takimit të sotëm me zëvendëskryetarin e komunës, Xhemjal Hyseni.


Viti 2004 me siguri do të jetë viti i Kosovës

Bruksel, 21 maj 2003 - Zyrtarët perëndimorë po shqyrtojnë mundësinë për fillimin e bisedimeve të cilat mund të rezultonin me pavarësinë e Kosovës, njofton Rojter nga Brukseli, duke iu referuar burimeve diplomatike.
Vendet evropiane të cilat një kohë të gjatë kanë kundërshtuar çfarëdo lloj ndarjesh të tjera në Ballkan, tani gjithnjë më shumë e pranojnë idenë se është më mirë që sa më shpejtë të jetë e mundur të zgjidhet statusi i Kosovës, sesa ajo të mbetet "protektorat jofunksional i Kombeve të Bashkuara".
Intoleranca është në rritje, ndërkaq njerëzit kanë filluar të kuptojnë se misioni i KB-ve në Kosovë nuk funksionon, se ai është pjesë e problemeve, e jo pjesë e zgjidhjeve dhe se nuk arrin të bëjë asgjë për përmirësimin e situatës, ka theksuar një zyrtar i lartë perëndimor.
Zyrtarët evropianë theksojnë se hapi i parë i domosdoshëm në zgjidhjen e statusit të Kosovës është fillimi i dialogut të drejtpërdrejtë ndërmjet Prishtinës dhe Beogradit.
"Kemi filluar ta shqyrtojmë këtë çështje dhe duhet ta zgjidhim sa më shpejtë të jetë e mundur, si dhe të përgatitemi për këtë", ka deklaruar një diplomat i lartë i panjëjtësuar evropian. Sipas tij, pikënisje do të jetë takimi i BE-së në Selanik më 21 qershor.
Viti 2004 me siguri do të jetë viti i Kosovës, ka nënvizuar ky diplomat, duke theksuar se kjo nuk do të thotë se Kosova patjetër do ta fitojë pavarësinë, por megjithatë ka shtuar se shqiptarët e Kosovës nuk do të pranonin ndonjë zgjidhje tjetër.


Ndihma amerikane në asfaltimin e rrugës Mamushë-Studençan, e cila përurohet nesër

Prishtinë, 21 maj 2003 – Zyra e SHBA-ve në Prishtinë njofton për përfundimin e një projekti të infrastrukturës për asfaltimin e rrugës Mamushë-Studençan. Drejtori i Agjencisë së Shteteve të Bashkuara për Zhvillim Ndërkombëtar (USAID), Misioni në Kosovë, Dejll Fajfer, do ta përurojë këtë projekt zyrtarisht në një ceremoni që do të mbahet më 22 maj.
Ky projekt është pjesë e angazhimit të qeverisë së SHBA-ve për të ndihmuar në zhvillimin demokratik dhe ekonomik të Kosovës.
Nëpërmjet USAID-it, populli amerikan investoi 440,188 euro për ta asfaltuar një pjesë të rrugës në gjatësi prej 3.7 km, që shkon prej Piranës në komunën e Prizrenit deri në qytetin e Suharekës.

Kjo është rruga kryesore për popullin e kësaj zone, të cilët shpesh e shfrytëzojnë atë si rrugë tranzit që i lidh dy rrugët kryesore Gjakovë-Prizren dhe Prizren-Prishtinë. Para se të rindërtohej nga USAID-i, rruga e dëmtuar nuk i plotësonte nevojat e kësaj zone për transport, thuhet në këtë njoftim.


Në Norvegji është kapur një bandë e rrezikshme hajnash e shqiptarëve të Kosovës

Oslo, 21 maj 2003 - Në Norvegjinë Jugore është kapur një bandë e rrezikshme hajnash prej tetë vetash, e përbërë nga shqiptarët e Kosovës, që kishte operuar kryesisht nëpër dy qytete, në Stavnger dhe Sandnes. Kjo bandë vjedhjet dhe thyerjet e shtëpive i kishte kryer kryesisht gjatë festës së Pashkëve.
Sipas mediave norvegjeze gjatë kontrollit policor që u është bërë hajnave nëpër shtepite e tyre u është gjetur sasi e madhe e gjësendeve të çmuara, stoli ari, rroba superluksoze, pajisje elektronike si dhe pistoletë gazi.
Policia norvegjeze kishte kohë që ishte nën ndjekjen e kësaj bande hajnash. Edhe pse të gjitha vilat dhe shtëpitë ishin të pajisura me sistemin e alarmit, kjo nuk ishte ndonjë propblem për hajnat specialistë. Policia ka arrestuar dy pjesëtarë të kësaj bande në flagrancë.

Dy pjesëtarë të saj do të dëbohen që nesër nga Norvegjia për në Kosovë, pasi që këta kishin statusin e azilkërkuesit, ndërkaq anëtarët e tjerë të kësaj bande ndodhen në burgun hetues.


Presidenti Rugova priti anëtarët e familjes së atdhetarit Rifat Berisha

Prishtinë, 21 maj 2003 - Presidenti i Kosovës Ibrahim Rugova priti dje pasdite Muamer dhe Ylber Berishën, bijtë e atdhetarit të njohur Rifat Berisha. Të pranishëm në pritje ishin edhe anëtarë të tjerë të familjes Berisha.
Presidenti Rugova i siguroi familjarët e Rifat Berishës se autoritetet e Kosovës do të kujdesën për të nderuar kujtimin dhe veprën e veprimtarëve që luftuan për një Kosovë demokratike dhe të mëvetësishme.
Rifat Berisha është vrarë në maj të viti 1949 së bashku me vëllezërit dhe nipin e vetë Islam, Mustafë dhe Brahim Berisha në përleshje me forcat jugosllave në Gajrak të Malishevës. Rivarrimi i tyre u bë në vendlindjen e tyre me 17 maj të këtij viti në Berishë të Malishevës.


Ministria e Arsimit qorton drejtorin e Qendrës së Studentëve dhe kërkon nga ai suspendimin e shefit të mensës

Prishtinë, 21 maj 2003 - Ministria e Arsimit ka ndërmarrë masa, por jo edhe të plota në kërkesë të studentëve, sepse ka konsideruar se punën të cilën e ka bërë drejtori aktual i Qendrës së Studentëve ka qenë punë jashtëzakonisht e mirë dhe në dobi të studentëve.

Kështu u shpreh ministri i Arsimit të Kosovës në një konferencë me gazetarë. Ai njoftoi se drejtori i Qendrës Nazmi Halimi përkundër sukseseve të jashtëzakonshme për shkak të përgjegjësisë objektive që bart si njeriu i parë i Qendres qortohet publikisht që nuk ishte sa duhet rigoroz ndaj përgjegjësve të menses. Kërkohet nga drejtori Nazmi Halimi që menjëherë të suspendojë nga puna shefin e mensës së studentëve dhe dy shefat e ndërrimit.
Ministri Osmani shtoi se Ministria e Arsimit si masë e parë obligohet që gjatë pushimeve verore të bëjë ndërrimin e pajisjeve dhe të interierit në mensë, që dyshohet të jetë bartës kryesor të papastërtisë në këtë objekt.

Në bazë të rezultateve që priten nga Instituti Kombëtar i Shëndetit Publik për identifikimin e bartësve të bakteries masat e përgjegjësisë mund të zgjerohen edhe më tutje, ose ndaj këtyre personave ose të tjerëve.
Ministri ka ripërsëritur se greva e studëntëve është e politizuar dhe ka theksuar se ajo është është përgatitur më parë ndoshta edhe jashtë vetë qarqeve studentore dhe jashtë institucioneve ku studentët banojnë dhe jetojnë.
Ministria e Arsimit do të kërkojë nga organet kompetenate hetuese inicimin e hetimeve të plota rreth keqpërdorimeve në Qendrën e Studentëve.


Zëdhënësja e UNIMK-ut tha se Shtajneri është për pjesëmarrjen e përfaqësuesve të Kosovës në takimet ndërkombëtare

Prishtinë, 21 maj 2003 - Zyrtarë të UNMIK-ut thonë se shefi i këtij Misioni Mihael Shtajner është në favor të pjesëmarrjes së institucioneve të Kosovës në takimet ndërkombëtare, porse kjo do të varet nga organizatorët e takimeve.

Sipas zëdhënëses Izabela Karlovic, shefi i UNMIK-ut gjithmonë është në favor të pjesëmarrjes së përfaqësuesve të institucioneve të përkohshme vetëqeverisëse në zhvillimet ndërkombëtare.


Kryeministri Rexhepi do të marrë pjesë në takimin e Forumit Ekonomik Botëror në Athinë të Greqisë

Prishtinë, 21 maj 2003 - Kryeministri i Kosovës Bajram Rexhepi do të marrë pjesë në takimin e Forumit Ekonomik Botëror për Evropën Juglindore në Athinë të Greqisë në fund të këtij muaji, ka njoftuar zëdhënësja e UNMIK-ut.

Shefi i shtyllës të BE-së në Kosovë, Endi Birpark në takimin e Athinës do të marrë me vete edhe kryeministrin Bajram Rexhepin dhe koordinatorin e Kosovës të Paktit të Stabilitetit, Besim Beqajn.
Kjo do të jetë edhe veprimtaria e parë jashtë vendit pas pezullimit të veprimtarive të tilla nga ana e shefit të UNMIK-ut, Mihael Shtajner, pas miratimit të një Rezolute për njohjen e vlerave të luftës nga ana e Parlamentit të Kosovës.


Shtajner thotë se e ka përkrahjen e BE-së që në Samitin e BE-së të ftohen edhe përfaqësuesit e Kosovës

Bruksel, 21 maj 2003 - Në bisedimet e kryeadministratorit të Kosovës Mihael Shtajner me përfaqësuesit e lartë të BE-së dje në Bruksel, është bërë fjalë për zhvillimet e fundit politike në Kosovë.

Shtajner ka deklaruar se ka përkrahjen e BE-së që në Selanik, në Samitin e BE-së dhe vendeve të Ballkanit të ftohen në kuadër të delegacionit të UNMIK-ut edhe përfaqësuesit e institucioneve të Kosovës.

Sipas Shtajnerit me këtë do të dëshmohet se masat që janë ndërmarrë për mospjesëmarrjen e përfaqësuesve të institucioneve të Kosovës në konferencat ndërkombëtare kanë qenë të përkohshme dhe të kufizuara vetëm për një javë.

Ai megjithatë ka thënë se me Solanën janë pajtuar se institucionet e Kosovës duhet të tregojnë më shumë përgjegjësi në punën e tyre, më shumë pjekuri politike.
Shtajner është takuar dje në Bruksel edhe me eurokomesarin Kris Paten.


BE ka kërkuar nga z. Shtajner që sa më parë të fillojë dialogu ndërmjet Beogradit dhe Prishtinës

Bruksel, 21 maj 2003 - BE ka kërkuar nga kryeadministratori i Kosovës Mihael Shtajner që sa më parë të fillojë dialogu ndërmjet Beogradit dhe Prishtinës për çështje të interesit të përbashkët.
"Ne nuk dëshirojmë të flasim për afate, por do të kishim dashuar që deri në samitin e Selanikut të shohim lëvizje në këtë drejtim edhepse i kuptojmë rrethanat e vështira", citohet të ketë thënë një diplomat evropian.
Edhe Shtajner ka thënë se në Kosovë ekziston vetëdija se duhet biseduar madje edhe me ata që kanë mendime diametralisht të kundërta. "Nëse nuk pajtohemi për shumë gjëra, kjo nuk do të thotë se nuk duhet të bisedojmë", ka thënë ai.
Kryeadministratori i Kosovës sot do të flasë para Këshillit të NATO-s.


Mbi 30 ekspertë të fushave të ndryshme filluan trajnimin treditor nga lëmi i planifikimit hapësinor

Prishtinë, 21 maj 2003 - Mbi 30 arkitektë, inxhinierë, ekonomistë, socilogë dhe ekspertë ligjorë të Insitutit të Planifikimit Hapësinor kanë filluar trajnimin treditor nga lëmi i planifikimit hapësinor, të cilin e organizuan Ministria e Ambientit dhe Planifikimit Hapësinor dhe organizata e OKB-së "Habitat".
Planifikimi hapësinor për Kosovën ka rëndësi të posaçme, ngase Kosova është territor mjaft të vogël, andaj edhe planifikimi duhet të jetë gjithëpërfshirës, duke inkuadruar në të ekspertë nga sa më shumë fusha.
Organizata e OKB-së "Habitat" ka dhënë kontribut të çmueshëm në hartimin e ligjit për planifikimin hapësinor të Kosovës, i cili pas debatit publik tashmë është në duar të deputetëve të Parlamentit të Kosovës dhe pritet të miratohet shpejt.


NATO-ja vazhdon të përkrahë sovranitetin e Maqedonisë

Shkup, 21 maj 2003 - Konferenca rajonale për sigurinë dhe administrimin e kufijve në Ohër nuk ka të bëjë me ndryshimin e kufijve, por me menaxhimin e tyre, ka thënë Mark Lejti, zëdhënës i NATO-s në Bruksel, në një konferencë të përbashkët për media të Aleancës, të BE-së, të OSBE-së dhe të Misionit evropian "Konkordia", njofton MIA në gjuhën shqipe.
"Kufijtë nuk duhet të ndryshohen. Nuk shohim kurrfarë nevoje për këtë gjë. Çdoherë e kemi respektuar dhe e respektojmë sovranitetin e Maqedonisë", ka thënë Lejti, duke theksuar se NATO-ja vazhdon me përkrahjen e sovranitetit të Maqedonisë.
Sipas tij, gjatë dy viteve të kaluara, përparësi më e madhe për KFOR-in ishte mbrojtja e kufirit të Maqedonisë me Kosovën, ndërsa e gjithë kjo në koordinim me autoritetet e Maqedonisë.


Në Shkup u përuruan zyrat e reja të Korpusit amerikan të Paqes

Shkup, 21 maj 2003 - Korpusi i Paqes Agjencia amerikane që ka sy synim të nxisë paqen botërore dhe miqësinë me vendet e tjera do të zgjerojë veprimtarinë e saj në Maqedoni.

Dje në Shkup u përuruan zyrat e reja të Korpusit të Paqes në një ceremoni ku morën pjesë ambasadori amerikan në Shkup Lorens Batler dhe presidenti maqedonas Boris Trajkovski.
Në këtë ceremoni u theksuar se veprimtaria e Korpusit të Paqes në Maqedoni do të zgjerohet dhe se do të ketë një numër madh vullnetarësh.
Ndërkaq, ambasadori amerikan në Shkup Lorens Batler ritheksoi angazhimin dhe dedikimin e Korpusit të Paqes për Maqedoninë dhe nënvizoi se bazë bashkëpunimi është marrëveshja e arritur midis dy vendeve në vitin 1996.


BDI dhe PDK bisedojnë për formimin e një partie të përbashkët

Shkup, 21 maj 2003 - Bashkimi Demokratik për Integrim dhe Partia Demokratike Kombëtare i kanë filluar bisedimet për formimin e një subjekti të përbashkët politik. Këtë e konfirmoi Hysni Shaqiri, kryetar i komisionit negociues nga radhët e BDI-së në pushtet. Ai ka shtuar se gjatë bisedimeve është arritur të tejkalohen të gjitha divergjencat që ekziston ndërmjet këtyre dy partive.


Mbi 190 vende kanë miratuar marrëveshjen ndërkombëtare kundër pirjes së duhanit

Gjenevë, 21 maj 2003 – Mbi 190 vende kanë miratuar për herë të parë sot (të merkurën) marrëveshjen ndërkombëtare kundër pirjes së duhanit, përfshirë edhe ndalesën e reklamimit, që ka për qëllim shuarjen e shprehisë, e cila mbyt rreth pesë milionë njerëz në vit, njofton Rojter.

Asambleja Botërore e Shëndetësisë në takimin vjetor të Organizatës Botërore të Shëndetësisë, ku përfaqësoheshin 192 vende, njëzëri ka miratuar Konventën e Kontrollit të Duhanit, duke i vënë kështu vetvetes për detyrë, siç thuhet shprehimish, luftimin e rrjedhojave shkatërruese të konsumimit dhe të ekspozimit publik të duhanit.


Amerikanët pranojnë ndryshimet në projektrezolutën për Irakun

Kombet e Bashkuara, 21 maj 2003 - Amerikanët kanë pranuar të rishikojnë projektrezolutën për të ardhmen politike dhe ekonomike të Irakut, dokument të cilën bashkë me Britaninë ia kanë paraqitur Këshillit të Sigurimit.
Kjo lëvizje erdhi disa orë pas diskutimeve në Këshillin e Sigurimit në Nju Jork, ndërsa votimi për të pritet të bëhet të enjten.
Pikat kryesore të projektrezolutës origjinale janë heqja e sanksioneve ndaj Bagdadit dhe marrja në kontroll nga ana e amerikanëve dhe britanikëve të të ardhurave nga nafta e vendit.
Megjithatë, ambasadori amerikan në Kombet e Bashkuara, John Negroponte tha se ai ishte i hapur për disa ndryshime, ndërsa homologu i tij rus Sergei Lavrov, tha se duheshin bërë disa ndryshime në çështjet e çarmatimt të Irakut.


Në luftimet e sotme në Aceh janë vrarë 13 veta, prej tyre 10 civilë

Xhakartë, 21 maj 2003 – Luftime të rrepta janë zhvilluar sot (e merkurë) në provincën indoneziane Aceh dhe si duket janë përleshjet më të përgjakshme, që kur trupat qeveritare kanë ndërmarrë një ofensivë të madhe kundër kryengritësve separatistë, njofton BBCWorld.

Zëdhënësi i Lëvizjes për Acehun e Lirë (Gam) ka thënë se në sulmin e sotëm ushtarak afër qytetit Bireuen, janë vrarë 13 veta, prej tyre 10 civilë. Ndërkaq, zëdhënësi ushtarak indonezian ka konfirmuar se është në vazhdim një operacion në këtë rajon, por s'ka dhënë detaje.


Ushtarët amerikanë kanë vrarë 3 ushtarë afganë dhe kanë plagosur komandantin e tyre afër ambasadës në Kabul

Kabul, 21 maj 2003 – Ushtarët amerikanë kanë vrarë sot (e merkurë) tre ushtarë afganë dhe kanë plagosur komandantin e tyre afër ambasadës amerikane në Kabul, kanë bërë të ditur zyrtarët e sigurimit afgan, njofton Rojter.

Një zyrtar afgan zbulimi ka thënë se ushtarët amerikanë, duke ruajtur ambasadën, kanë hapur zjarr kur kanë vërejtur se afganët po lëvizin armët nga kazerma ushtarake përballë ambasadës. Ai e ka quajtur këtë incident si "keqkuptim".

Ndërkaq, zëdhënësi i forcave paqëruajtëse ka thënë se ka pasur një shkëmbim zjarri. Zëdhënësi i ambasadës ka thënë se njëherë për njëherë s’ka koment.


Misioni i KB në Kongo ka gjetur trupat e pajetë të 230 njerëzve, të vrarë gjatë luftimeve të fundit të fraksioneve rivale në Bunia

Bunia, 21 maj 2003 – Të dhëna të reja kanë dalë në lidhje me dhunën e përgjakshme në Kongo dhe kështu ka shkaktuar shqetësimet për gjenocid potencial në Republikën qendrore të Afrikës, njofton BBCworld.

Misioni i Kombeve të Bashkuara në Kongo ka thënë sot (e merkurë) se ka gjetur trupat e pajetë të 230 njerëzve, të vrarë gjatë luftimeve të fundit të fraksioneve rivale në kryeqytetin provincial, Bunia.

Refugjatët civilë në Ugandë, që kanë ikur për t’i shpëtuar dhunës, kanë njoftuar për mizoritë e mëdha, që kanë kryer milicitë etnike. Që kur kanë filluar konfliktet e atjeshme mw1999, rreth 50 mijë njerëz kanë humbur jetën dhe rreth gjysmë milioni të tjerë janë zhvendosur.


Ngrihet niveli i kërcënimit prej rrezikut terrorist nga i verdhë në portokalli

Uashington, 21 maj 2003 - Qeveria amerikane e ngriti nivelin kombëtar të gatishmërisë ndaj rrezikut terrorist në "të lartë", ndërsa ekziston frika se vala e fundit e sulmeve terroriste në Arabinë Saudite dhe Marok mund të përhapet në Shtetet e Bashkuara.
Niveli i kërcënimit nga rreziku terrorist u rrit nga i verdhë në portokalli. Ky është një shkallë më poshtë nivelit më të lartë të gatishmërisë.
Vendimi për të ngritur nivelin e gatishmërisë u mor pasi zyrtarë të lartë të administratës së Presidentit Bush rishikuan të dhënat e zbulimit të bazuara në përgjimin e komunikimeve që tregojnë për një rritje të mundësisë për sulme terroriste në Shtetet e Bashkura.


SHBA mbyllin ambasadën dhe dy konsullata në Arabinë Saudite për pesë ditë

Riad, 21 maj 2003 - Shtetet e Bashkuara po mbyllin ambasadën e tyre dhe dy konsullata në Arabinë Saudite për të paktën pesë ditë për shkak të shqetësimeve se sulme të tjera terroriste mund të kryhen kundër interesave amerikane në atë vend. Departamenti amerikan i Shtetit thotë se ky vendim nuk pasqyron pakënaqësinë me përpjekjet saudite të sigurimit pas sulmeve vetëvrasëse të javës së kaluar në Rijad, ku humbën jetën 34 veta, mes tyre edhe 8 amerikanë.
Zëdhënësi i Departamentit të Shtetit Riçard Bauçer tha se vendimi për të mbyllur ambasadën në Riad dhe konsullatat amerikane në Jeda dhe në Dharan është një hap i matur pas asaj që ai e quajti informacion i besueshëm se sulme të tjera terroriste po planifikohen kundër objekteve në Arabinë Saudite.
Shtetet e Bashkuara po evakuojnë pjesëtarët e familjeve të diplomatëve dhe po lënë vetëm një personel të kufizuar në Arabinë Saudite.


Presidenti Bush zhvilloi një bisedë me kryeministrin palestinez

Uashington, 21 maj 2003 - Gjatë një bisede telefonike që zhvilloi të martën me kryeministrin palestinez, Mahmud Abas, Presidenti Bush theksoi nevojën për të luftuar terrorizmin. Këto ishin bisedimet e para që Presidenti Bush zhvillon me kryeministrin palestinez.
Një zëdhënës i Shtëpisë së Bardhë tha se të dy udhëheqësit nuk diskutuan rreth çështjeve specifike, por presidenti Bush theksoi përsëri vizionin e tij të një shteti palestinez që jeton në paqe përkrah Izraelit.
Zëdhënësi i Shtëpisë së Bardhë, Ari Fleisher, tha se Presidenti Bush ritheksoi nevojën e domosdoshme që të gjitha palët të luftojnë terrorizmin dhe të marrin hapa konkrete për krijimin e kushteteve të prështatshme për paqe e siguri.
Biseda telefonike u zhvillua ndërkohë që një valë e re shpërthimesh vetëvrasëse palestineze dhe sulmesh nga forcat izraelite të sigurimit pasoi paraqitjen e planit të ri të paqes për Lindjen e Mesme, që parashikon krijimin e një shteti palestinez deri në vitin 2005.