Lajme

E marte, 20 maj 2003

Përmbajtja:

• Vendimi i Shtajnerit pengon qasjen e institucioneve të Kosovës në strukturat evropiane

• Zyrtarët e KFOR-it bënë të ditur largimin e trupave paqeruajtëse ruse nga Kosova

• Çështja e mbrojtjes së dëshmitarëve të proceseve gjyqësore është shqetësuese, tha Paskal Fieski

• L.Haziri i thotë "jo" në Këshillin e Evropës decentralizimit mbi baza etnike në Kosovë

• Shëndetësia primare e Mitrovicës me tri autoambulanca të pajisura me aparaturën e nevojshme

• Ministria e Arsimit thotë se nuk ka informacione të plota për grevistët nëse ata janë studentë të UP apo jo

• Drejtori i Qendrës së Studentëve nuk e ka ndërmend të tërhiqet nga detyra

• Këshilli i Ministrave të BE-së shpreh keqardhje për miratimin e Rezoluatës për vlerat e luftës nga Parlamenti i Kosovës

• Komandanti i trupave amerikane thotë se në Kosovë ka ende raste të izoluara të dhunës

• Për situatën e krijuar në Kosovë do të bëhet fjalë edhe sot në Bruksel

• Komisioni Parlamentar për Marrëdhënie Ndërkombëtare kërkon të mos pengohet komunkimi me botën

• Policia e UNMIK-ut konstaton se shkalla e vrasjeve me motive etnike ka shënuar rënie të dukshme

• Gjilas: Serbia po e humb Kosovën

• Në Tiranë organizohet seminari për trajnimin e mësuesve me temën "Edukimi për të drejtat e njeriut"

• Ministria serbe e policisë e quan gënjeshtër deklaratën e zv.kryeministrit serb Çoviq

• Zgjatet për disa muaj gjyqi i Millosheviqit

• Qeveritarët aktualë serbë janë të lidhur me krimin e organizuar

• Krerët e partive të djathta shqiptare e kundërshtuan deklaratën e kryeministrit Nano se komuniteti çam nuk është etnik

• Në Shqipëri PS dhe PD përfundojnë hartimin e paketës së reformës zgjedhore

• Greqia kërkon nga BE më shumë për Ballkanin

• Hetimet e shpërthimeve në Kazablankë kanë identifikuar 14 sulmues dhe lidhjen e tyre me “terrorizmin ndërkombëtar”

• Në një kampin të refugjatëve palestinezë në Liban janë vrarë 8 veta dhe janë plagosur dhe 25 të tjerë

• Tajvani ka raportuar sot edhe për 39 raste të reja të SARS-it

• Katër marinsa amerikanë kanë humbur jetën kur helikopteri i tyre është rrëzar në Irak

• Nga një shpërthim në qendër të Ankarasë është vrarë një person

• Bush: SHBA-të po bëjnë përparim në luftën kundër terrorizmit

• Rezolutë e re në OKB për Irakun

• Katër të vdekur në sulm të ri në Izrael

• Forca e BE-së e gatshme, por e kufizuar

Vendimi i Shtajnerit pengon qasjen e institucioneve të Kosovës në strukturat evropiane

 

Prishtinë, 20 maj 2003 - Në seancën e ardhshme të Kuvendit të Kosovës në rend dite do të jetë shqyrtimi i projektligjit për qasjen e dokumenteve zyrtare, atij për regjistrimin e popullsisë dhe ekonomive familjare si dhe projektligji për plehërat artificiale, u tha pas mbledhjes së sotme të Kryesisë së Kuvendit.

Ndërkaq Fatmir Sejdiu anëtar i Kryesisë, duke komentuar vendimin e shefit të UNMIK-ut Mihael Shtajner për anulimin e pjesëmarrjes së përfaqësuesve të institucioneve të Kosovës në takimet ndërkombëtare shpreson se kjo nuk do të pengojë pjesëmarrjen e Kosovës në integrimet evroperëndimore.

 

Por vendimi i Shtajnerit pengon qasjen e institucioneve të Kosovës në strukturat evropiane. "Dëshirojmë që kjo të mos marrë përmasa thjesht të atilla që do të pengojnë gravitimin e mëtejshëm të Kosovës në integrimet e përgjithshme të saj në rrjedhat evropiane", tha z.Sejdiu.

 

Ai shtoi se duhet bashkëbiseduar me kuvendin për të ecur bashkë përpara me ndërkombëtarët në rrjedhat e reja. Njëherit a kërkoi më shumë mirëkuptim nga ndërkombëtarët për rolin e kuvendit, duke e quajtur të drejtë rezolutën e miratuar javën e kaluar nga Kuvendi i Kosovës.

 

 

Zyrtarët e KFOR-it bënë të ditur largimin e trupave paqeruajtëse ruse nga Kosova

 

Prishtinë, 20 maj 2003 - Zyrtarët e KFOR-it bënë të ditur largimin e trupave paqeruajtëse ruse nga Kosova gjatë javëve të ardhshme. Përfundimisht trupat ruse duhet të largohen nga Kosova deri më 1 gusht këtij viti.

 

Zyrtarët e KFOR-it thanë se janë duke punuar me kontigjentin paqeruajtës rus për pranim-dorëzimin e objekteve dhe hapësirave të përgjegjësive të këtyre trupave.

Zëdhënësi i KFOR-it Geri Benister Grin tha se trupat ruse do të tërhiqen deri në fund të këtij muaji nga komanda e sigurisë në aeroportin e Prishtinës. Ndërkaq funksionet dhe shërbimet e tjera tokësore do të merren nën kontrollin e forcave paqeruajtëse të administratës ndërkombëtare në muajin qershor.

Të premtën e ardhshme Komiteti ndërkombëtar ushtarak, institucioni më i lartë politik-ushtarak në NATO, do të vizitojë Shtabin qendror të KFOR-it në Kosovë.

Zyrtarët e KFOR-it kritikuan shkrimet e një gazete të Prishtinës, ("Zëri") e cila sipas zëdhënësit në një artikull të saj ka provuar të ndajë komunitetin në Kosovë me artikuj konfrontues me akuza të paqena.

Poashtu zyrtarët veçuan kritikat që i janë bërë shefit të UNMIK-ut Mihael Shtajner, kinse ai ka qenë i detyruar të përkrahë vendimin e komandantit të KFOR-it Fabio Mini të përkrahë vendimin për suspendimin e trajnimit jashtë vendit të pjesëtarëve të TMK-së.

Zëdhënësi Grin këto metoda i quajti të vjetra dhe të cilat nuk kanë vend në Kosovën e re. Ai tha se komandanti i KFOR-it nuk do të reagojë për shkrime të tilla që provokojnë konflikte personale, duke i quajtur kritika destruktive dhe të cilat dëmtojnë komunitetin në Kosovë dhe imazhin e Kosovës në botë.

 

Forcat paqeruajtëse do të përdorin ligjin dhe masat e tjera të nevojshme kundër atyre që tentojnë të destabilizojnë Kosovën, ofendojnë apo përçajnë popullatën e këtueshme.

 

 

Çështja e mbrojtjes së dëshmitarëve të proceseve gjyqësore është shqetësuese, tha Paskal Fieski

 

Prishtinë, 20 maj 2003 - Shefi i OSBE-së në Kosovë Paskal Fieski sot i dorëzoi Gjykatës Supreme të Kosovës raportin e pestë për funksionimin e sistemit gjyqësor penal në Kosovë.

 

Si pikë kryesore në raport konstatohet çështja e mbrojtjes së dëshmitarëve të proceseve gjyqësore dhe kjo është shqetësuese për gjyqësinë kosovare, tha zoti Fieski.

"Besojmë se mbrojtja e dëshmitarëve do të jetë një çështje shumë e rëndësishme për gjykatësit e Kosovës për shkak se përditë e më shumë po shtohen rastet e krimit të organizuar", tha ai.

 

"Nëse vështrojmë se çka ka ndodhur muajve të fundit, konstatojmë se është shqetësues fakti se niveli i kërcënimeve ndaj dëshmitarëve është në rritje. Ne duhet të angazhohemi për minimizimin e opinionit kosovar se sistemi gjyqësor në Kosovë nuk është në gjendje të vendosë rendin e ligjin", tha Fieski.

Mirëpo raporti i OSBE-së konstaton edhe përmirësim të dukshëm të funksionimit të sistemit gjyqësor në Kosovë.

Nga ana e tij kryetari i Gjykatës Supreme të Kosovës Rexhep Haxhimusa tha se ky raport është shumë i rëndësishëm për ndërtimin e një sistemi gjyqësor funksional.

 

Sipas tij, procedurat e gjyqësorit po arrijnë standardet dhe mekanizmat të cilat mundësojnë një efiçiencë të funksionimit të gjyqësorit, si pushtet i veçantë, i ndarë, i paanshëm, i cili po tregon një rezultat përditë e më të mirë.

Ky raport është hartuar nga monitoruesit e 0SBE-së në bashkëpunim me Departamentin e Drejtësisë të UNMIK-ut.

 

 

L.Haziri i thotë "jo" në Këshillin e Evropës decentralizimit mbi baza etnike në Kosovë

 

Strasburg, 20 maj 2003 - Lutfi Haziri, kryetar i Asociacionit të Komunave të Kosovës dhe kryetar i komunës së Gjilanit, i cili po merr pjesë në takimin e dytë vjetor të autoriteteve lokale të Europës Juglindore, që po mbahet në Strasburg të Francës, tha se Kosova nuk është kundër decentralizimit të pushtetit, siç mund të kuptohet ndonjëherë nga reagimet e ndryshme në opinion, por ajo është kundër decentralizimit mbi baza etnike, sepse një proces i tillë do të ishte i dëmshëm për të ardhmen e këtij vendi.

Këtë deklaratë, z. Haziri e bëri në sesionin e kryetarëve të asociacioneve nacionale, në cilësinë e përfaqësuesit të pushtetit lokal të Kosovës, ku ai po merr pjesë bashkë me z.Ilir Mustafa, nga shoqata "Së bashku për Kosovën" (Kosova Asamble), që është partnere implementuese e programit për Demokraci Lokale të Këshillit të Evropës.

Një raport rreth përgatitjeve për procesin e reformave në administratën lokale të Kosovës, e ka paraqitur përfaqësuesi i Këshillit të Evropës në Kosovë, z. Xhorxh Bergun, zëvendës i ambasadorit Karlo Çivilieti, ndërsa kjo çështje është diskutuar pastaj edhe nga pjesëmarrësit e takimit në Strasburg.

Në fjalën e tij, z. Lutfi Haziri i ka theksuar nevojat dhe problemet e pushtetit lokal në Kosovë, ndërsa i ka vlerësuar të papranueshme tendencat për ndarje të administratës lokale mbi parime etnike e politike.

 

Reformat duhet të bazohen në nevojat reale të Kosovës, për ta shtrirë sa më afër qytetarëve të saj, një administratë që do të jetë njësoj në shërbim të të gjithëve, pa dallime e favorizime mbi motive tjera etnike, politike apo racore, ka thenë ai.

Lutfi Haziri i ka deklaruar përmes telefonit bashkëpunëtorit tonë se Këshilli i Evropës, edhe njëherë e ka

 

konfirmuar mbështetjen e vet për politikën lokale në Kosovë, duke kundërshtuar njëkohësisht çdo lloj decentralizmi mbi baza etnike ose ndarje të pushtetit lokal mbi forma tjera joreale për Kosovën.

Kryesuesi i takimit, z. Sofianski, kryetar i Sofjes, pastaj z. M. Owens, raportues i Këshillit të Evropës e të tjerë, kanë çmuar lart progresin e arritur në Kosovë si dhe rolin e kontributin e Asociacionit të Komunave të Kosovës për avancimin e pushtetit lokal.

 

 

Shëndetësia primare e Mitrovicës me tri autoambulanca të pajisura me aparaturën e nevojshme

 

Mitrovicë, 20 maj 2003 - Drejtoresha e Drejtorisë për Shëndetësi dhe Mirëqënie Sociale, dr. Sadije Asllani-Bilalli ka njoftuar se për nevojat e shëndetësisë primare në komunë, kanë arritur tri autoambulanca të reja të prodhimit francez "Reno", të pajisura me aparaturën e nevojshme komplete.

 

Mjetet në shumë prej mbi 85.000 euro për blerjen e këtyre tri autoambulancave janë siguruar nga buxheti komunal i shëndetësisë.

Dy nga këto autoambulanca janë dedikuar për shëndetësinë primare në pjesën jugore të komunës, ndërsa e treta për shëndetësinë primare në pjesën veriore të komunës.

Me sigurimin e këtyre tri autoambulancave, janë përmirësuar dukshëm kushtet për intervenim të shpejtë në transportimin e pacientëve deri te mjeku në shtëpinë e shëndetit dhe mëtutje në klinikat e Fakultetit të Mjeksisë në Prishtinë.

 

 

Ministria e Arsimit thotë se nuk ka informacione të plota për grevistët nëse ata janë studentë të UP apo jo

 

Prishtinë, 20 maj 2003 - Ministria e Arsimit, Shkencës dhe e Teknologjisë së Kosovës në një komunikatë për opinion thekson se nuk ka informacione të plota për grevistët nëse ata janë studentë të Unviersitetit të Prishtinës apo jo. Një numër i konsiderueshëm i tyre nuk figurojnë në listat e studentëve të Universitetit të Prishtinës.

 

Andaj ekziston dyshimi i bazuar se bartës dhe nxitës të grevës së studentëve janë grupe dhe individë jashtuniversitarë. Ministria sot do të publikojë masat emergjente dhe ato afatgjata që do të ndërmarrë si në aspektin e sanimit teknik të situatës në menzën e studentëve, ashtu edhe do të propozojë masa të përgjegjësisë eventuale për fajtorët që gjenden për gjendjen e krijuar.

Ministria e Arsimit u bën apel studentëve grevistë që menjëherë të ndërprejnë grevën dhe t'i kthehen jetës normale studentore. Ndërkaq, studentëve të tjerë jogrevistë u bën apel që të mos bien nën ndikimin e emisarëve të ndryshëm, të cilët me forma presioni dhe shantazhe, provokojnë studentët e tjerë, që t'i bashkangjiten grevës së studentëve grevistë.

 

 

Drejtori i Qendrës së Studentëve nuk e ka ndërmend të tërhiqet nga detyra

 

Prishtinë, 20 maj 2003 - Studentët grevistë thonë se nuk do të heqin dorë nga kërkesa e tyre për dorëheqjen e drejtorit të Qendrës së Studentëve, duke e parë atë si fajtorin kryesor për helmimin e tyre. Në anën tjetër Rektorati i Universitetit të Prishtinës dhe Ministria e Arsimit kërkojnë ndërprerjen e grevës.

Mirëpo, drejtori i Qendrës së Studentëve Nazmi Halimi nuk e ka ndërmend të tërhiqet nda detyra.

 

Ai i ka deklaruar BBC se fjala është për një fushatë të sprovuar të disa personave në Unionin e Pavarur të Studentëve dhe të kreut të këtij Unioni z. Gani Morina, që ta sulojnë atë dhe nuk është fjala për përgjegjësi objektive. "Unë shpreh brengosjen time për të gjithë ata që solidarizohen me z, Morina dhe jam i interesuar që atyre mos t'u ndodhë asgjë edhe në këtë moment.

 

Mirëpo, formën dhe fushatën e tij nuk mund ta pranoj, sepse kam përgjegjësi institucionale dhe jamë njëri ndër personat, i cili do të kontribuojë shumë që kjo çështje të jetë vetëm institucionale", ka thënë z. Halimi.

 

 

Këshilli i Ministrave të BE-së shpreh keqardhje për miratimin e Rezoluatës për vlerat e luftës nga Parlamenti i Kosovës

 

Bruksel, 20 maj 2003 - Këshilli i Ministrave të BE-së ka kritikuar ashpër Rezolutën e Kuvendit të Kosovës në mbrojtje të vlerave të luftës dhe i dha përkrahje të plotë idesë së kryeadministratorit Shtajner për mospjesëmarrje të liderëve të Kosovës këtë javë në Bruksel dhe në Ohër.

Në këtë takim të Këshillit të Ministrave u theksua se institucionet e Kosovës, duhet të kenë kujdes dhe të mos kapërcejnë kompetencat e tyre.

 

Nga Brukseli njoftohet se ministrat e jashtëm të BE-së duket se po shqyrtojnë mundësinë që ta thellojnë edhe më shumë masën e ndëshkimit, duke anuluar edhe pjesëmarrjen e udhëheqësve të Kosovës në samitin e kryetarëve të shteteve dhe qeverive të vendeve evropiane që do të mbahet në Selanik të Greqisë më 20 qershor.

 

Në konkluzionet e Këshillit të ministrave të BE-së kushtuar Ballkanit në pjesën ku trajtohet gjendja në Serbi dhe forcimi i marrëdhënieve të saj me Malin e Zi përfshihej në një kapitull të veçantë, ndërkaq Kosova bënte pjesë në kapitullin e përbashkët Serbi - Mali i Zi - Kosovë.

Në konkluzionet përfundimtare për Kosovën ndër të tjera thuhet se BE-ja u bën thirrje të gjitha palëve që të heqin dorë nga ndërmarrja e nismave të njëanshme që mund të dëmtojnë stabilitetin në rajon.

 

Me këtë rast Këshilli i Ministrave të BE-së shpreh keqardhjen e tij ndaj miratimit në Parlamentin e Kosovës i Rezolutës për vlerat e luftës, duke e konsideruar atë si "përçarëse dhe mospërfillëse" ndaj politikës së ripajtimit dhe këshillon klasën politike në Kosovë të përqëndrohet në kompetncat e saj.

 

 

Komandanti i trupave amerikane thotë se në Kosovë ka ende raste të izoluara të dhunës

 

Bonstill, 20 maj 2003 - Komandanti i trupave amerikane, gjenerali Daniel Kif thotë se në Kosovë ka ende raste të izoluara të dhunës që mund ta dëmtojë demokracinë e brishtë, duke u bërë thirrje qytetarëve të Kosovës që të kundërshtojnë veprimet kriminale, veprime këto që duan ta kthejnë Kosovën në të kaluarën.

 

Ai i bëri këto komente në konferencën e djeshme me gazetarë në kampin e forcave amerikane në kampin "Bondstill" afër Ferizajt. Sipas tij, gjendja e sigurisë në zonën lindore të Kosovës është e qëndrueshme, por shtoi se aktet kriminale mund ta dëmtojnë demokracinë edhe ashtu të brishtë në Kosovë.

Ai u bëri thirrje qytetarëve që t'i kundërshtojnë këto veprime për hir të së ardhmes së Kosovës. Në këtë kontekst gjenerali Kif dënoi vrasjen e pjesëtarit të komunitetit serb në rrethana të pasqaruara në fshatin Vërboc të komunës së Vitisë.

Ai shtoi se gjatë këtij vitin në zonën e lindjes e cila kontrollohet nga forcat amerikane kanë ndodhur shumë pak raste të dhunës që do të ishin normale për shumë vende të rajonit, mirëpo sipas tij ato duken më të rënda për shkak të demokracisë ende të brishtë në Kosovë. Gjenerali Kif tha se situata e sigurisë megjithatë është shumë më e mirë se sa në të kaluarën.

Komandanti i trupave amerikane hodhi poshtë pohimet e zëvendëskryeministrit serb Çoviq sipas të cilit ish-udhëheqësi i kryengritësve shqiptarë të Luginës së Preshevës Shefket Musliu po mbahet në kampin "Bonstell" për t'u stërvitur me trupat amerikane për veprimtari terroriste. Ai hodhi poshtë çdo mundësi që arrestimi i z. Musliut të ketë ndonjë lidhje me fletarrestin e lëshuar nga autoritetet serbe.

 

 

Ministria serbe e policisë e quan gënjeshtër deklaratën e zv.kryeministrit serb Çoviq

 

Beograd, 20 maj 2003 - Ministria serbe e Punëve të Brendshme dhe Shërbimi sekret serb e kanë quajtur gënjeshtër deklaratën e zv.kryeministrit serb Nebojsha Çoviq se udhëheqësit e vrarë të klanit të Zemunit, Dushan Spasojeviq dhe Milorad Lukoviq kanë marrë pjesë në arrestimin e Sllobodan Millosheviqit.

Në një komunikatë të përbashkët thuhet se pasoja e kësaj gënjeshtre ëshët teza se shërbimi sekret dhe policia kanë bashkëpunuar në mënyrë aktive me Lukoviqin dhe Spasojeviqin edhe gjatë mandatit të qeverisë së tashme republikane që gjë është akuzë serioze të cilën duhet dëshmuar, duke e quajtur njëherit trillim të rëndë e cila paraqet vepër penale, thuhet në këtë komunikatë duke kërkuar nga Çoviqi që menjeherë të ofprojë prova për këtë.

 

 

Zgjatet për disa muaj gjyqi i Millosheviqit

 

Hagë, 20 maj 2003 - Gjykatësit në Gjykatën Ndërkombëtare për Krimet e Luftës në Hagë i kanë dhënë më shumë kohë prokurorëve për të paraqitur padinë e tyre ndaj ish-presidentit jugosllav Sllobodan Millosheviq.

Prokurorëve u janë dhënë 100 ditë gjykimi shtesë. Fillimisht, prokurorëve u ishte dhënë kohë deri më 16 maj për të përfunduar rastin e tyre që lidhet me akuzat për gjenocid dhe krime kundër njerëzimit.

Ata kishin kërkuar më shumë kohë, për të vazhduar deri në shkurt të vitit të ardhshëm, por gjykatësit thanë se kjo gjë do ta bënte gjyqin tepër të gjatë e të lodhshëm dhe u kërkuan prokurorëve për ta përfunduar rastin e tyre deri në fund të vitit.

Millosheviçit do t'i jepet e njëjta kohë për të paraqitur rastin e tij, që pritet të shkojë deri në vitin 2005.
Në fund mund të dalë që ky të jetë procesi më i gjatë para kësaj gjykate.

 

 

Për situatën e krijuar në Kosovë do të bëhet fjalë edhe sot në Bruksel

 

Bruksel, 20 maj 2003 - Për situatën aktuale në Kosovë do të bëhet më shumë fjalë edhe sot në Bruksel, ku në një takim të BE-së do të marrë pjesë edhe kryeadministaratori Mihael Shtajner.

 

Është paraparë që Shtajner të bisedojë me krerët e BE-së Havier Solanin dhe Kris Patenin, ku temë kyçe do të jenë pasojat e miratimit të Rezolutës për mbrojtjen e vlerave të luftës në Parlamentin e Kosovës.

 

Ndërkaq, të mërkurën Shtajner do t'i drejtohet Këshillit të Përhershëm të NATO-s, ku ai do të paraqesë qëndrimet e tij rreth situatës së sigurisë në Kosovë.

 

 

Komisioni Parlamentar për Marrëdhënie Ndërkombëtare kërkon të mos pengohet komunkimi me botën

 

Prishtinë, 20 maj 2003 - Komisioni Parlamentar për Marrëdhënie Ndërkombëtare në mbledhjen e udhëhequr nga Sabri Hamiti, kryetar, e ka vlerësuar shumë të vlefshëm seminarin e përbashkët dyditor me parlamentarët holandez, rreth zhvillimeve demokratike në Kuvend i cili gjatë tetorit do të vazhdojë në Holandë.

 

Komisioni, ndërkaq ka shprehur keqardhje për bllokimin e udhëtimit të përfaqësuesve të katër partive politike në sesionin e majit të Parlamentit Evropian në Bruksel.

Në këtë mbledhje është thënë se suksesi i UNMIK-ut në Kosovë mund të rritet duke ndihmuar komunikimin e parlamentarëve dhe jo duke bllokuar atë. Komisioni e sheh të domosdoshme që në Samitin e Selanikut të BE-së të marrin pjesë përfaqësuesit e institucioneve të Kosovës, qoftë në kuadër të delegacionit të UNMIK-ut, qoftë si delegacion i veçantë.

 

Komisioni mbështet iniciativat e fundit në Kongresin dhe në Senatin amerikan lidhur me statusin politik të Kosovës dhe mënyrën e realizimit të tij.

 

 

Policia e UNMIK-ut konstaton se shkalla e vrasjeve me motive etnike ka shënuar rënie të dukshme

 

Prishtinë, 20 maj 2003 - Shkalla e vrasjeve me motive etnike sipas policisë së UNMIK-ut ka shënuar rënie të dukshme krahasuar me vitet e mëparshme. Sipas statistikave të policisë gjatë këtij viti në Kosovë nga 23 vrasje, është shënuar vetëm një vrasje e pjesëtarëve të minoritetit serb dhe sipas policisë as për këtë vrasje ende nuk dihet nëse është e motivuar etnikisht.

Zëdhënësi i policisë së UNMIK-ut Beri Fleçër tha se ende nuk dihet as motivi e as kryesi i vrasjes së një serbi në Vërboc atë Vitisë. "Viktima vërtetë është serb, por është ende herët për të kualifikuar si vrasje me motive etnike", tha zëdhënësi Fleçër. Ai shtoi se me kalimin e kohës po shënohet ftohja e urrejtjes dhe pasioneve ndërmjet grupeve të ndryshme etnike.

Raportet e ndërkombëtarëve siç është ai i "Amnesty International" shohin nga e kaluara, por situata tash ka ndryshuar rrënjësisht dhe krimet serioze etnike janë shumë të ralla, ka nënvizuar Fleçër.
Policia ndërkombëtare në Kosovë i ka mohuar spekulimet në masmediat serbe se kinse në trupin e serbit të vrarë Zoran Mirkoviq, është gjetur një material prove të AKSH-së, që dëshmon motivet etnike të kësaj vrasje.

 

 

Gjilas: Serbia po e humb Kosovën

 

Beograd, 20 maj 2003 - Jetë të përbashkët ndërmjet serbëve dhe shqiptarëve nuk ka, dhe nga kjo çështje duhet hequr dorë nëse duhet shikuar realisht gjërat, ka thënë për mediat e Beogradit analisti dhe sociologu Aleksa Gjilas (i biri i disidentit më të njohur jugosllav Milovan Gjilas). Sipas tij kjo është vështirë të pranohet kur dihet se serbët janë të lidhur historikisht për "Serbinë e vjetër" (Kosovën).

 

Gjilasi mendon se në një afat të gjatë kjo nënkupton se Serbia po e humb Kosovën. Por edhe vendet e tjera gjatë historisë i kanë humbur territoret e dikurshme, thotë Gjilas, duke marrë si shembull sesi një ep polak e fillon strofën "Lituani, atdheu im", apo grekët që kanë jetuar në Azi të Vogël, Keninsbergu që gjendet në Rusi po ashtu ka qenë qytet i gjermanëve etj.

Gjilas thekson se Beogradi ka marrë premtime nga bashkësia ndërkombëtare se Kosova do të jetë shumetnike, dhe kjo jep të drejtën që të kërkohet mbrojtja e plotë të popullsisë joshqiptare e cila mund të ketë autonominë dhe sigurimin e vet.

Mirëpo, Kosova është shumë e pazhvilluar, me shkallë më të lartë të natalitetit në Evropë, dhe nëse shikohet nga ky kënd as vendet më shumë të zhvilluara nuk do të mund të arrinin përparim më të shpejtë të atij territori, thotë Gjilas dhe konstaton se nga pikëpamja ekonomike zhvillimi i Serbisë pa Kosovën është më i sigurt.

 

 

Në Tiranë organizohet seminari për trajnimin e mësuesve me temën "Edukimi për të drejtat e njeriut"

 

Prishtinë, 20 maj 2003 - Qendra Shqiptare për të Drejtat e Njeriut me seli në Tiranë, në kuadër të Rrjetit Ballkanik për të Drejtat e Njeriut (BHRN), prej 12 - 14 qershor 2003 organizon në Tiranë seminarin treditor të trajnimit të mësuesve shqipfolës të rajonit "Edukimi për të drejtat e njeriut".

Në këtë trajnim do të marrin pjesë nga katër mësimdhënës dhe nga një përfaqësues të OJQ-ve që merren me të drejtat e njeriut nga Shqipëria, Kosova, Maqedonia dhe Mali i Zi.

Nga radha e mësimdhënësve do të jenë 2 meshkuj dhe 2 femra të mëshës deri në 35 vjeç. Kandidatët duhet të japin mësim nxënësve të moshës 10 - 15 vjeçare në njërën nga këto lëndë: edukatë qytetare, histori, gjeografi, letërsi dhe gjuhë shqipe.

Kandidatët e interesuar nga Kosova për pjesëmarrje në trajnimin në Tiranë duhet të paraqiten në lokalet e KMDLNJ-së deri më 24 maj 2003 (e shtune) ose në në tel. 038/ 249 006 dhe 038/ 244 029 apo në tel. mobil 044/ 500 502 dhe 044/112 128, thuhet në një njoftim të Shërbimit për Informim të KMDLNJ-së në Prishtinë.

 

 

Qeveritarët aktualë serbë janë të lidhur me krimin e organizuar

 

Beograd, 20 maj 2003 - Guvernatori i Bankës Popullore serbo-malazeze Mlagjan Dinkiq, anëtar i partisë G-17, ka deklaruar se disa anëtarë të Qeverise serbe janë të lidhur me kriminalitetin dhe për këtë arsye qeveria në përbërjen e tanishme nuk mund të udhëheqë luftën kundër krimit të organizuar. Dinkiq thotë se në qeverinë serbe bëhen edhe intriga.

Këto fjalë të Dinkiqit në një mënyrë i vërteton edhe z.kryeministri serb Nebojsha Çoviq, i cili ka thënë se Dushan Spasojeviq, i quajtur "Shiptar" dhe Mile Lukoviq i quajtur "Kum", udhëheqës të vrarë të klanit të Zemunit, kanë marrë pjesë në arrestimin e Sllobodan Millosheviqit më 31 mars të vitit 2001.

Çoviq i ka thënë një agjencie beogradase të lajmeve se ai vetë është takuar disa herë me kreun e njësistit famëkeq "Beretat e kuqe", Milorad Lukoviq "Legija". Por Çoviq thotë se me Lukoviqin është takuar më pak sesa disa të tjerë, duke mos saktësuar se për cilët njerëz është fjala.

 

Mirëpo, Çoviq kohë më parë pat akzuuar zv.kryeministrin aktual serb Çedomiq Jovanoviq se në një rast ka ndërhyrë në lirimin e kriminelit të njohur Dushan Spasojeviq nga burgu.

 

 

Krerët e partive të djathta shqiptare e kundërshtuan deklaratën e kryeministrit Nano se komuniteti çam nuk është etnik

 

Tiranë, 20 maj 2003 - Krerët e partive të djathta në Shqipëri e kanë kundërshtuar deklaratën e kryeministrit Fatos Nano se komuniteti çam nuk është etnik. Ata e cilësuan këtë deklaratë një spekulim të radhës të kryeministrit Nano. Krerët e partive të djathta u shprehën se Nano qëllimisht i paraqet të djathtët si armiq të minoriteteve dhe të zgjidhet në mënyrë institucionale problemi çam.

 

 

Në Shqipëri PS dhe PD përfundojnë hartimin e paketës së reformës zgjedhore

 

Tiranë, 20 maj 2003 - Në Shqipëri dy partitë kryesore, ajo socialiste dhe Partia Demokratike, përfunduan hartimin e paketës së reformës zgjedhore. Dy drejtuesit e komisionit dypalësh nënshkruan dje në zyrën e OSBE-së në Tiranë një marrëveshje për çështjet e mbetura.

 

Paketa me ndryshimet në kodin zgjedhor është tashmë e gatshme për të kaluar e plotë në parlament. Këto ndryshime u realizuan sipas rekomandimeve të ODHIR-it, pas zgjedhjeve parlamentare të vitit 2001.

 

 

Greqia kërkon nga BE më shumë për Ballkanin

 

Bruksel, 20 maj 2003 - Greqia u ka bërë thirrje qeverive të tjera të BE-së që të bien dakord të shpenzojnë deri treqind milionë euro më shumë për të mbështetur shtetet ballkanike.

Greqia, e cila është kryesuese e radhës e BE-së deri në fund të qershorit, dëshiron të shtojë gjasat e shteteve të Ballkanit për t'u përgatitur për anëtarësim në BE.

Greqia dëshrion që samiti i radhës i BE-së në Selanik në qershor të vërë pesë shtetet e Ballkanit, Shqipërinë, Bosnjën, Kroacinë, Maqedoninë dhe Serbinë e Malin e Zi, në një kurs të pakthyeshëm drejt anëtarësimit në BE. Për momentin, ato përshkruhen si kandidatë potencial.

Anëtarësimi i dhjetë shteteve kryesisht të Evropës qëndrore në BE vitin e ardhshëm do të lërë 1.8 miliardë euro në buxhetin vjetor të caktuar nga BE-ja për zgjerim, njofton BBC.

 

 

Hetimet e shpërthimeve në Kazablankë kanë identifikuar 14 sulmues dhe lidhjen e tyre me “terrorizmin ndërkombëtar”

 

Kazablanka, 20 maj 2003 – Hetimet e bombardimeve vetëvrasëse në javën e kaluar në Kazablankë kanë rezultuar me identifikimin e 14 sulmuesve dhe lidhjen e tyre me "terrorizmin ndërkombëtar", ka bërë të ditur ministri i Brendshëm maroken, njofton AFP.

 

Arrestimi i dy terroristëve ka mundësuar përparimin e hetimeve dhe ka zbuluar se 12 sulmues, jo 13 siç është raportuar, kanë vdekur gjatë sulmeve të tyre të premten, ndërsa dy syresh kanë mbijetuar.

 

Njëri nga sulmuestit është arrestuar menjëherë pas sulmit dhe përgjigjet për 28 jetë të pafajshme, kurse tjetri është arrestuar të dielen, ka thënë ministri Sahel, i cili njëherësh ka falenderuar shërbimet e sigurimit të vendeve mike për ndihmën e dhënë në identifikimin e terroristëve.

 

 

Në një kampin të refugjatëve palestinezë në Liban janë vrarë 8 veta dhe janë plagosur dhe 25 të tjerë

 

Ain El-Helvih, Liban, 20 maj 2003 - Në kampin e refugjatëve palestinezë Ain El-Helvih në jug të Libanit është kthyer më në fund qetësia pas një dite shumë të përgjakshme kur u vranë tetë persona dhe u plagoson edhe 25 të tjerë, bën të ditur sot (e martë) një burim palestinez, njofton AFP.

 

Anëtarët e Lëvizjes Fatah të liderit palestinez, Jaser Arafat, gjashtë pjesëtarë të së cilës janë vrarë në përleshjet e të hënës ndërmjet fraksioneve të ndryshme, kanë nënshkruar marrëveshjen e armëpushimit me grupin fundamentalist Osbat al- Nour dhe Osbat al-Ansar, të cilat gjenden në listën amerikane të organizatave terroriste.

 

 

Tajvani ka raportuar sot edhe për 39 raste të reja të SARS-it

 

Tajpeh, 20 maj 2003 - Tajvani ka raportuar sot (e martë) edhe për 39 raste të reja të SARS-it, që është rekord i ri ditor dhe ngrit numrin e rasteve të tilla në 383 sosh, njofton BBCWorld. Pothuajse një e katërta e rasteve në ujëdhesë janë shënuar nga e diela.

 

Që kur është paraqitur në nëntor në Kinën jugore, virusi i SARS-it ua ka marrë jetën rreth 643 njerëzve në mbarë botën dhe ka infektuar mbi 7.800 njëtrëz, kryesisht në Azi.

 

 

Katër marinsa amerikanë kanë humbur jetën kur helikopteri i tyre është rrëzar në Irak

 

Qerbela, 20 maj 2003 – Katër marinsa amerikanë kanë humbur jetën dje kur helikopteri ityre CH0-46 “Konti i detit” (“Sea Knight”) është rrëzar në një lum të lundrueshëm afër Qerbelasë në Irak, kanë bërë të ditur zyrtarët e mbrojtjes, njofton Rojter. Zyrtarët, që s'kanë dashur të identifikohen, kanë thënë se 4 marinsat kanë qenë vetëm në bordin e helikopterit. Pentagoni s'ka dhënë detaje për shkakun e rrëzimit të helikopterit, por s'ka indikacione për farë incidenti me armë zjarri nga toka.

 

 

Nga një shpërthim në qendër të Ankarasë është vrarë një person

 

Ankara, 20 maj 2003 – Një shpërthim ka ndodhur sot (e martë) në një kafe në qendër të kryeqytetit turk, Ankara, duke vrarë kështu një person dhe plagosur edhe një tjetër, njofton Rojter. Shkaku i shpërthimit, ende nuk është i qartë.

 

Televizioni ka dhënë pamje të copave të xhamave të thyer të shtëpive dhe lokaleve të tjera afariste përgjatë rrugës afër vendit të ngjarjes.

 

 

Bush: SHBA-të po bëjnë përparim në luftën kundër terrorizmit

 

Uashington, 20 maj 2003 - Presidenti amerikan Xhorxh Bush tha se Shtetet e Bashkuara po bëjnë përparim në luftën kundër terrorizmit, pavarësisht nga shpërthimet në Arabinë Saudite dhe në Marok, të cilat shkaktuan 75 të vrarë.

Presidenti tha se rrjeti ndërkombëtar terrorist Al-Kaida po shpërbëhet gradualisht. Ai i bëri këto komente dje, disa orë para se ambasadori i Arabisë Saudite në Shtetet e Bashkuara shprehu shqetësim se së shpejti mund të kryhet një sulm i madh terrorist kundër vendit të tij ose Shteteve të Bashkuara.

 

 

Rezolutë e re në OKB për Irakun

 

Nju Jork, 20 maj 2003 - Rezoluta e re do të zgjerojë kuadrin kohor të programit të OKB-së naftë-për-ushqim që siguron furnizimet thelbësore për popullin irakian.

Ambasadori britanik në OKB, Xheremi Grinstok, thotë se projektrezoluta e re mund të votohet gjatë javës.

"Shpresoj se anëtarët e tjerë të Këshillit do ta shohin se projekt-rezoluta është përmirësuar në mënyrë të konsiderueshme duke pasqyruar shumë prej shqetësimeve të tyre," tha ambasadori britanik.

 

 

Katër të vdekur në sulm të ri në Izrael

 

Tel Aviv, 20 maj 2003 - Në Izrael ka ndodhur të hënën pasdite një sulm tjetër vetëvrasës me bombë, i dyti gjatë ditës dhe i pesti brenda dy ditëve të fundit.

Sulmi ndodhi në një qendër tregtare në qytetin verior Afula.

Katër vetë kanë vdekur, përfshirë sulmuesin, dhe të paktën 30 të tjerë janë plagosur, disa rëndë.

Autori i sulmit është identifikuar si një grua nga Xhenini, që mendohet se është anëtare e grupit militant, Xhihadi Islamik.

Dy organizata militante kanë marrë përgjegjësinë për këtë sulm - Xhihadi Islamik dhe Brigada e Martireve 'Al Aqsa'. Të dyja këto organizata kanë prani të fuqishme në qytetin Xhenin të Bregut Përendimor, i cili ndodhet shumë afër qytetit Afula.

 

 

Forca e BE-së e gatshme, por e kufizuar

 

Bruksel, 20 maj 2003 - Bashkimi Evropian thotë se 60.000 trupat e Forcës së tij për Reagim të Shpejtë janë të gatshme për detyra paqëruajtjeje por ministrave të mbrojtjes u është thënë se duhet bërë shumë më shumë për ta bërë forcën të efektshme ushtarakisht. Shefi i politikës së jashtme të BE-së, Havier Solana, tha se duhet shqyrtuar me urgjencë nevojat e saj.

Ministrat e mbrojtjes, në takim në Bruksel, pranuan se forca ishte e ngarkuar për shkak të boshllëqeve në aftësitë ushtarake të BE-së.

BBC thotë se forca e BE-së do të kishte vështirësi në ndërhyrje të shpejtë, apo në mbrojtje të vetvetes në rast të përkeqësimit të papritur të konfliktit.

Copyright©2000-2003 Trepca.net - Të gjitha të  drejtat e rezervuara.