OPINIONE

Pse qohet aq shumë pluhur rreth fotografisë së presidentit Rugova

 

Tashmë nuk ka asnjë dilemë se fitorja bindëse e subjektit politik Nr.1 të Kosovës, pra e Lidhjes Demokratike të Kosovës në zgjedhet e lira pas çlirimit të Kosovës, ishte një fiasko dhe nokdaun (grusht i rëndë) për subjektet e vogla politike të spektrit të majtë politik përkatësisht ndaj grupeve politike të ish-"Qeverisë së Përkohshme", të përfaqsuara sot edhe në Parlamentin e Kosovës. Kjo fiasko dhe "trullimi" i ish-QPK-istëve u reflektua dhe po vazhdon akoma të reflektohet qoftë në skenën e politikës së Kosovës apo qoftë edhe në jetën e përditshme institucionale ku LDK-ja e ka fjalën kryesore.

Mosgatishmëria e partive opozitare të spektrit të majtë për të pranuar realitetin politik respektivisht vullnetin e shumicës së qytetarëve të Kosovës është shprehur në mënyra dhe forma të ndryshme, duke filluar me qëndrime aspak dashamirëse dhe kontradiktore ndaj aktiviteteve të kuvendeve komunale ku dominon LDK-ja, pa përfillur në asnjë mënyrë rregullat ligjore dhe institucionale për qeverisje. Me këto veprime kundërinstitucionale, opozita e majtë politike i ka sjellur dëme të pakompensueshme institucioneve të Kosovës në të gjitha nivelet e veprimit, duke penguar në këtë mënyrë drejtëpërdrejtë ndryshimet e mëdha pozitive në dobi të qytetarëve të Kosovës, në mënyrë që dështimet e mundshme t'i atribuohen partisë politik në pushtet, pra LDK-së.

Si rrjedhim i konflikteve të paraprogramuara politike nga ana e opozitës majtiste, Kosova u përball me shumë vrasje politike ndaj figurave të shquara të LDK-së dhe të bashkëmendimtarëve të saj, që nënkupton shkuarjen deri në ekstremizëm edhe të vetë anëtarëve të partive të majta politike kundër veprimtarëve të LDK-së. Kjo armiqësi partiake e së majtës politike tregon shumë qartë se ajo ka humbur qysh moti vetëkontrollin e saj politik, si dhe për të fshehur dobësimin e ndikimit të saj të vazhdueshëm politik ndaj një pjese të qytetarëve të Kosovës, të cilët i besuan propagandës së saj të bërë mbi kurriz të luftës çlirimtare, kjo opozitë e mjerë politike vazhdon të sabotojë haptazi institucionin më të lartë të Kosovës, Presidentin e Kosovës dr.Ibrahim Rugovën, pavarësisht çmimit që mund t'i kushtojë procesit real të shtetëzimit të Kosovës, proces ky i pavarësimit të Kosovës, në të cilin po merr pjesë aktive edhe një pjesë e bashkësisë ndërkombëtare e prirë nga mikja e shqiptarëve SHBA-ja.

Të dhënat nga terreni njoftojnë se nëpër disa Kuvende Komunale, që njihen si organe më të larta institucionale të një komune të pavarur, si dhe nëpër institucione tjera të niveleve të ndryshme institucionale akoma mungon fotografia e Presidentit të Kosovës, e cila është figurë qendrore e jona që simbolizon identitetin e shtetit të Kosovës. Kjo dukuri e shëmtuar tregon qartë për nivelin e ulët të vetëdijes demokratike të opozitarëve nëpër komunat përkatëse të Kosovës, për xhelozinë patologjike mbi përkatësinë partiake të presidentit Rugova, edhe pse çështja e përkatësisë partiake e presidentit të shtetit do të duhej të ishte çështje e dorës së dytë. Opozitarët majtistë para se të denigrojnë figurën e presidentit të Kosovës, ata do të duhej ta dinin se:

a) presidenti i Kosovës përfaqson interesat e gjithmbarshme kombëtare të mbarë popullit shqiptar të Kosovës;

b) presidenti i Kosovës përfaqson shtetin e Kosovës në raport me bashkësinë ndërkombëtare dhe me këtë është edhe identifikimi i parë i shtetit të Kosovës në rangun botëror;

c) presidenti i Kosovës ambiciet kombëtare të Kosovës padyshim i vë mbi interesat partiake të partisë të cilës i takon;

d) presidenti i Kosovës është figurë që simbolizon homogjenizimin e klasës politike të Kosovës;

e) presidenti i Kosovës nuk ka pushtet absolut, por pushteti i tij është shprehje e vullnetit të lirë të qytetarëve të Kosovës.

Ishin pra këto disa nga parimet themelore që do të duhej t'i kishin parasysh të gjitha subjektet politike, posaçërisht ato të spektrit të majtë politik dhe simpatizuesve të pakët të tyre, të cilët po dallohen për zhurmën e tyre neverike kundër prezencës së fotografisë së presidentit Rugova nëpër objektet dhe institucionet tona zyrtare të anekënd Kosovës. Kur është fjala tek vetëdija shtetërore, kundërshtarët e Rugovës nuk do të duhej të vepronin sipas thënies "për shkak të resë më vdektë djali"!

Copyright©2000-2003 Trepca.net - Të gjitha të  drejtat e rezervuara.