Lajme

E hëne, 19 maj 2003

Përmbajtja:

• P.Mur: Kosova nuk do të bëhet kurrë një demokraci e qëndrueshme nëse komuniteti ndërkombëtar vazhdon t'i trajtojë kosovarët si fëmijë

• Senatori Bajden kërkon që banorët e Kosovës nëpërmjet referendumit të përcaktojnë të ardhmen politike

• KMDLNJ dënon vrasjen në Vërboc të Vitisë

• Në fshatin Vërboc të Vitisë u gjet i vrarë një serb

• Në Prishtinë themelohet Instituti Ligjor i Kosovës

• Sipas Dr. Dedushajt, helmimi i studentëve është shkaktuar nga një bakterie e grupit të salmonelave

• Qytetarët e Kaçanikut paralajmërojnë një protestë më 25 maj kur Shkupi do të vërë gurët e kufirit

• Shkrimtari amerikan Ollen Batller do të ligjërojë nesër në Prishtinë

• U zgjodh udhëheqësia e re e Shoqatës së të Burgosurve Politikë të Kosovës

• KFOR-it në Prizren i bashkohen 147 paqeruajtës nga Gjeorgjia

• Privatizimi i pronës siguron pronarët e ardhshëm

• Greva e studentëve të Universitetit të Prishtinës ka hyrë në ditën e pestë

• Basketboll: Në garat përfundimtare të Ligës ABK do të luajnë këto skuadra: MEB Prishtina, Dukagjini, Mabetex-i dhe Drita

• Kryeministri i Serbisë e përjashton mundësinë që Kosova të bëhet e pavarur

• Nxënësit shqiptarë sërish bllokuan hyrje-daljet e Kumanovës

• AKSH-ja ka marrë përgjegjësinë për sulmin me disa projektile kundër kazermave të ushtrisë në Tetovë

• Ish-presidenti slloven Kuçan do të dëshmojë në procesin gjyqësor kundër Millosheviqit

• Truproja e Osama bin Ladenit të pakapshëm është bërë komandant ushtarak i Al Kaidës

• Britaniku i lidhur me sulmin në Tel Aviv është gjetur i vdekur

• Dështojnë bisedimet për paqe me separatistët në Indonezi

• Dollari ka rënë sot në paritetin më të ulët në katër vitet e fundit kundrejt euros

• Dy shpërthime godasin Jerusalemin

• U martua pasi bëri grevë urie

• Dy vëzhgues të Misionit të Kombeve të Bashskuara janë vrarë egërsisht në Kongo

• Një palestinez vetëvrasës në biçikletë ka sulmuar sot trupat izraelite me bombë

• Në tri aksidente të veçanta në Irak janë vrarë tre ushtarë amerikanë

• Numri i të vdekurve në vershimet në Sri Lanka është ngritur sot në të pakten 200 veta

• Papa Gjon Pali i Dytë festoi 83-vjetorin e lindjes

• Izraeli kufizon lëvizjen e palestinezëve

• Ushtria indoneziane fillon ofanzivën në Aceh

• Vërshime të mëdha në Shri Lankë

P.Mur: Kosova nuk do të bëhet kurrë një demokraci e qëndrueshme nëse komuniteti ndërkombëtar vazhdon t'i trajtojë kosovarët si fëmijë

 

Pragë, 19 maj 2003 - Duke komentuar një deklaratë të bashkërenduesit të Paktit të Stabilitetit, Erhard Busek, se BE-ja duhet të marrë përgjegjësinë për Kosovën, analisit i radios "Evropa e lirë" Patrik Mur tha se "kjo nuk është një kohë e përshtatshme për t'u sugjeruar amerikanëve politikisht që të heqin dorë nga diçka për të cilën kanë çfarë të thonë përmes Kombeve të Bashkuara".

"Dhe sinqerisht mendoj se kalimi i diçkaje të komplikuar si puna e Kosovës në duart e Bashkimit Evropian do të ishte një 'pasaportë për katastrofën'", thotë Mur. Sipas tij, Bashkimi Evropian funksionon në një mënyrë shumë të ngadaltë dhe mënyra se si e kanë trajtuar Unionin e imponuar Serbi - Mali i Zi, tregon që atyre nuk u interesojnë pikëpamjet e njerëzve në rajon.

 

"Nëse Bashkimi Evropian do të merrte përgjegjësinë për Kosovën kam frikë se aty nuk do zgjidhej asgjë për shumë vite me rradhë. Dhe kjo nuk është ajo për çka ka nevojë Kosova", thotë Patrik Mur.

Ndërkaq duke komentuar pohimet e UNMIK-u dhe zyrtarëve perëndimorë se ende nuk është koha për bisedime kushtuar statusit përfundimtar të Kosovës, analisti Mur mbron idenë e hedhur që statusi të zgjidhet herët dhe jo vonë.

 

Ka një arsye për këtë, thotë Mur, ngase zhagitja dhe pasiguria do të bëhen burim problemesh dhe derisa gjërat të mbeten të paqarta, probleme të ndryshme përfshirë ato që prekin pakicat, refugjatët, dhe krimin e organizuar do të mbeten dhe do të përkeqësohen.

"Ka ardhur koha që në Kosovë të shqyrtohet ajo që është bërë një veprimtari konstante burokratike dhe të lihen njerëzit të marrin në dorë punët e tyre. Kosova nuk do të bëhet kurrë një demokraci e qëndrueshme nëse komuniteti ndërkombëtar do vazhdojë t'i trajtojë kosovarët si fëmijë", thotë në analizën e tij Patrik Mur.

 

 

Senatori Bajden kërkon që banorët e Kosovës nëpërmjet referendumit të përcaktojnë të ardhmen politike

 

Uashington, 19 maj 2003 - Senatori amerikan Xhozef Bajden ka paraqitur para Senatit amerikan një projektrezolutë për Kosovën.

Në këtë projektrezolutë Xhozef Bajden kërkon që Shtetet e Bashkuara të përkrahin banorët e Kosovës që me referendum që të përcaktojnë të ardhmen e tyre politike.

 

Por më parë kërkohet që të arrihet një përparim në institucionet demokratike, në sundimin e ligjit, të mundësohet kthimi i të zhvendosurve dhe riintegrimi i tyre në institucionet vendore, si dhe të sigurohet mbrojtja e të drejtave të pakicave, sipas standardeve të OKB-së.

 

 

KMDLNJ dënon vrasjen në Vërboc të Vitisë

 

Prishtinë, 19 maj 2003 - Më 17 maj, në orët e vona të mbrëmjes në një kanal në fshatin Vërboc të Vitisë ushtarët e KFOR-it kanë gjetur trupin e pajetë të Zoran Mirkoviqit (41) nga Vërboci, vetëm disa orë pasi që ai është parë për herë të fundit derisa me biçikletë po shkonte për në arën e tij në dalje të fshatit.

KMDLNJ gjithnjë ka dënuar aktet e vrasjes si dhe të forrmave të tjera të shprehura të dhunës, pa marrë parasysh se kush janë autorët e kush viktimat. KMDLNJ dënon edhe vrasjen e fundit, si dhe prononcimet kuturu të disa politikanëve serbë, të cilat prejudikojnë rastet e këtilla pa pasur ende njoftime zyrtare të rezultateve të hetimeve.

KMDLNJ kërkon që organet përkatëse të ndjekjes të gjejnë autorin apo autorët e vrasjes dhe që ata të përgjigjen para organeve të drejtësisë, me çka do t'u ndërpritej rruga spekulimeve paushalle. Po ashtu, KMDLNJ u nëm thirrje qytetarëve të Kosovës që të bashkëpunojnë me organet e policisë në ndriçimin e këtij akti dhe të akteve të tjera kriminele, në mënyrë që të funksionoj rendi, siguria, drejtësia dhe ligji.

 

 

Në fshatin Vërboc të Vitisë u gjet i vrarë një serb

 

Viti, 19 maj 2003 - Paqeruajtësit e KFOR-it e kanë gjetur të vrarë dhe të hedhur në një kanal Zoran Mirkoviqin, arsimtar serb nga fshati Vërboc i Vitisë. Trupi i tij i pajetë është gjetur të shtunën në orët e vona të mbrëmjes. Zyrtarët e policisë së UNMIK-ut thonë se nuk kanë ndonjë të arrestuar dhe nuk i dinë motivet e vrasjes, por janë ndërmarrë aksione të gjëra hetimesh.

Zëdhënësi i Misionit të UNMIK-ut, Andrea Annjeli tha se viktima është profesor, i moshës 41 vjeçare dhe kishte dy plagë plumbash në kokë. Bazuar në hetimet e para, i ndjeri ishte vrarë në ndonjë vend tjetër dhe më pas është gjuajtur në hendek, ku edhe është gjetur kufoma e tij.

 

 

Në Prishtinë themelohet Instituti Ligjor i Kosovës

 

Prishtinë, 19 maj 2003 - Në Prishtinë u themelua Insituti Ligjor i Kosovës, i cili përbëhet nga një bord nënëtanëtarësh. Ndërkaq, kryetari i Kuvednit të Kosovës Nexhat Daci, kryetari i Gjykatës Supreme Rexhep Haxhimusa dhe Jurgen Vos, zv.shef i Shytllës së katërt të UNMIK-ut do të jenë disa nga anëtarët e Bordit. Themelimi i këtij instituti ka për qëllim ndihmën shkencore dhe profesionale për institucionet e Kosoves.

Kryeparlamentari Daci vlerësoi me këtë rast se Kosovës i nevojitet një institucion i tillë, i cili do ta ndihmonte parlamentin në nxjerrjen e ligjeve të nevojshme. Ai tha se një pjesë e mediave bënte presion që të nxirreshin sa më shpejt ligje, ndërkaq qëndrimi i parlamentit ishte se ai nuk guxon që njerrjen e ligjeve ta shndërrojë në "darvinizëm".

 

Sipas Dacit, kjo do të bëhej lehtë po të kopjoheshin ligjet e Bundestagut gjerman ose të parlamentit francez, apo të kongresit amerikan brenda një muaji Kosova të kishte tërë strukturën ligjore.

Nexhat Daci tha se Insituti Ligjor do të ketë karakter ndërkombëtar dhe do ta furnizojë Kuvendin e Kosovës me ligjet e nevojshme, të cilat do të jenë në harmoni të plotë me standardet e Bashkimit Evropian.

 

 

Sipas Dr. Dedushajt, helmimi i studentëve është shkaktuar nga një bakterie e grupit të salmonelave

 

Prishtinë, 19 maj 2003 - Drejtori i Institutit të Shëndetit Publik Dr. Jusuf Dedushaj, pas analizave të bëra në këtë institut, lidhur me helmimet në mensën e studentëve, thotë se helmimet janë shkaktuar nga një bakterie nga grupi i salmonelave.

 

Ai thotë se instituti do të dalë me një komunikatë zyrtare për helmimet e shkaktuara në mensën e studentëve, me rekomandime të qarta për eliminimin e burimeve që shkaktuan helmimin e studentëve.

 

Dr.Dedushaj dyshon se ndonjëri nga punëtorët brenda mensës është bartës i këtij virusi, ndërkohë që kërkimet janë në zhvillim e sipër për identifikimin e rastit.

Studentët e helmuar kanë kaluar lehtë, thotë ai, dhe prej të shtunës në Qendrën Klinike nuk ndodhet asnjë i student i sëmurë. Dr. Dedushaj mohoi mundësinë që studentët e helmuar të kenë pasoja edhe në të ardhmen.

Ministria e Arsimit më herët ka bërë të ditur se vetëm pas publikimit të rezultateve të helmimit do të marrë masa përkatasëe në Qendrën e Studentëve.

 

 

Qytetarët e Kaçanikut paralajmërojnë një protestë më 25 maj kur Shkupi do të vërë gurët e kufirit

 

Kaçanik, 19 maj 2003 - Qytetarët e Kaçanikut kanë paralajmëruar një protestë gjithëpopullore pas njoftimeve se qeveria e Shkupit më 25 maj do të vërë gurët e kufirit ndërmjet Kosovës dhe Maqedonisë. Ndryshimi i kufijve është i papranueshëm për qytetarët e kësaj zone dhe çdo tendencë e implementimit të marrëveshjes do të ngrisë tensione të mëdha, thotë kryetari i komunës së Kaçanikut Tahir Çaka.

Sipas një marrëveshjeje ndërmjet Shkupit dhe Beogradit një pjesë e territorit që gjithmonë ka qenë i Kosovës do t'i takojë Maqedonisë. Bëhet fjalë për 2500 hektarë të territorit të Kosovës, i cili sa kohë është kontestuar nga qytetarët e kësaj zone se i takon vendit fqinjë.

 

 

Shkrimtari amerikan Ollen Batller do të ligjërojë nesër në Prishtinë

 

Prishtinë, 19 maj 2003 – Të martën, më 20 maj, në orën 18:00, në mjediset e Bibliotekës Kombëtare dhe Universitare në Kosovë, shkrimtari amerikan Robert Ollen Batller, fitues i çmimit "Pulicer", do të diskutojë si është jeta në SHBA për shkrimtarë.

 

Fillimisht Zyra amerikane në Prishtinë do ta dhurojë një koleksion të librave të autorëve amerikanë për qendrën e ardhshme të bibliotekës "Qendrën amerikane".

Ollen Batller është duke udhëtuar anembanë Kosovës dhe Ballkanit për të diskutuar si është jeta në SHBA për shkrimtarë dhe si të zbulohet procesi kreativ.

 

Batller ka botuar 10 libra që nga viti 1981 dhe i ka shkruar disa skenare të metrazhit të gjatë për kinostudiot si New Regency, (Një rexhensi), Universal Pictures (Juniverzal pikçers) dhe Disney (Dizni).

 

 

U zgjodh udhëheqësia e re e Shoqatës së të Burgosurve Politikë të Kosovës

 

Prishtinë, 19 maj 2003 – Pas Kuvendit të tretë të Shoqatës së të Burgosurve Politikë të Kosovës, mbajtur me 10 maj 2003, me ç'rast ishte zgjedhur kryesia e re, në përbërje: Gani Krasniqi, Lumnije Morina, Basri Musmurati, Ilmi Ramadani, Xhevat Haziri, Hyda Dobruna dhe Selatin Novosella, u mbajt mbledhja e parë e kësaj Kryesie ku u vlerësua se Kuvnedi i tretë i SHBPK-së kishte zhvilluar punimet dhe kishte përfunduar me sukses.

Në këtë mbledhje të Kryesisë u zgjodhën, me vota unanime, Selatin Novosella, kryetar dhe Xhevat Haziri sekretar të SHBPK-së.

Kryesia e SHBPK-së e përshëndeti Rezolutën e Kuvendit të Kosovës për luftën çlirimtare të popullit të Kosovës për liri e pavarësi.

 

 

KFOR-it në Prizren i bashkohen 147 paqeruajtës nga Gjeorgjia

 

Prizren, 19 maj 2003 - Brigadës Shumëkombëshe të KFOR-it në Prizren që nga dita e sotme do t'i bashkohen 147 paqeruajtës nga Gjeorgjia të cilët do t'i zëvendësojnë ushtarët gjermanë në sigurimin e kampeve në këtë pjesë të Kosovës, njoftojnë burimet e KFOR-it në Prizren.

 

 

Privatizimi i pronës siguron pronarët e ardhshëm

 

Prishtinë, 19 maj 2003 - Rregullorja e re e UNMIK-ut për privatizimin e pronës shoqërore në Kosovë, siguron pronarët e ardhshme se nuk janë të detyruar t'i pranojnë të gjithë punëtorët në kompaninë e re, nëse nuk kanë nevojë. Pronari i ri është për 99 vjet i garantuar se nuk do të ketë ndryshime pronësoro-juridike.

 

Kjo gjë i siguron ata edhe nga pretendimet e ndryshme për pronësinë mbi tokën e privatizuar, të cilat konteste do të zgjidhen nëpërmjet odës speciale, thotë përfaqësuesi i AKM-së.

 

 

Greva e studentëve të Universitetit të Prishtinës ka hyrë në ditën e pestë

 

Prishtinë, 19 maj 2003 - Greva e studentëve të Universitetit të Prishtinës ka hyrë në ditën e pestë. Ndryshe nga ditët e mëparshme gjendja e tyre shëndetësore thuhet se është keqësur. Studentët thonë se nuk do ta ndërpresin grevën derisa të mos plotësohen kërkesat e tyre.

 

Madje ata pohojnë se nëse nuk do të japë dorëheqje drejtori i Qendrës së Studentëve, atëherë është e mundur që sot të bojkotohet edhe procesi mësimor në Universitetin e Prishtinës dhe greva të shndërrohet në protestë gjithëstudentore.

Studentët grevistë dje i vizitoi personeli mjekësor dhe rektori i Universitetit të Prishtinës, Zenel Kelmendi.

 

 

Basketboll: Në garat përfundimtare të Ligës ABK do të luajnë këto skuadra: MEB Prishtina, Dukagjini, Mabetex-i dhe Drita

 

Prishtinë, 19 maj 2003 -Të shtunën dhe të dielen (më 17 dhe 18 maj) u zhvillua xhiroja e 28-të Ligës ABK në basketboll. Kjo njëherit ishte edhe xhiroja e fundit e pjesës së rregullt të kampionatit të sivjetshëm. Për garat përfundimtare të Play – off-it u kualifikuan këto skuadra: MEB Prishtina, Dukagjini, Mabetex-i dhe Drita.

Ndeshjet e para gjysmëfinale të Play-off-it do të zhvillohen më 27 dhe 28 maj ku do të takohen MEB Prishtina - Drita dhe Dukagjini – Mabetex.

 

  

Kryeministri i Serbisë e përjashton mundësinë që Kosova të bëhet e pavarur

 

Beograd, 19 maj 2003 - Kryeministri i Serbisë Zoran Zhivkoviq tha se e përjashton mundësinë që Kosova të bëhet e pavarur, duke thënë se ajo është "pjesë e Serbisë" dhe se kjo nuk është çështje që varet nga mëshira e Bashkimit Evropian apo Shteteve të Bashkuara të Amerikës.

"Më tregoni një dokument të së drejtës ndërkombëtare i cili e arsyeton pavarësinë e Kosovës", ka thënë Zhivkoviq në një intervistë për revistën gjerman "Shpigel", duke iu përgjigjur pyetjes nëse sipas mendimit të tij mund të pengohet pavarësimi i Kosovës.

Zhivkoviq ka thënë se aktualisht nuk është momenti për hapjen e negociatave për statusin përfundimtar të Kosovës, duke akuzuar bashkësinë ndërkombëtare se nuk ka plotësuar asnjë të tretën e detyrimeve në lëmin e sigurisë në Kosovë.

 

 

Nxënësit shqiptarë sërish bllokuan hyrje-daljet e Kumanovës

 

Kolombo, 19 maj 2003 – Numri i të vdekurve në vershimet në Sri Lanka është ngritur sot (e hënë) në të pakten 200 veta, kurse numri i të zhdukurve është edhe më i madh, njofton Rojter.

 

Autoritetet vendore kanë thënë se vërshimet dhe rrëshqitjet e dheut ende po vazhdojnë. Rreth 100 mijë njerëz kanë mbetur pa kulm mbi kokë. Këto janë vershimet më shkatërrimtare në 60 vitet e fundit.

 

 

AKSH-ja ka marrë përgjegjësinë për sulmin me disa projektile kundër kazermave të ushtrisë në Tetovë

 

Shkup, 19 maj 2003 - Organizata e quajtur Armata Kombëtare Shqiptare ka marrë përgjegjësinë për sulmin me disa projektile kundër kazermave të ushtrisë në Tetovë në orët e hershme të ditës së shtunë.

 

Në një komunikatë të saj thuhet se projektilët ishin shkrepur kundër kazermave të ushtrisë për të dëmtuar potencialet ushtarake të lidershipit maqedonas, të cilin e akuzon se përgatitet të ushtrojë dhunë kundër shqiptarëve. Policia e Maqedonisë kishte konfirmuar se disa projektilë ishin shkrepur, por tha se asnjera nuk ka qëlluar kazermat.

 

 

Ish-presidenti slloven Kuçan do të dëshmojë në procesin gjyqësor kundër Millosheviqit

 

Lubjanë, 19 maj 2003 - Ish-presidenti i Sllovenisë, Millan Kuçan sot shkon në Hagë që të dëshmojë në procesin gjyqësor kundër ish-presidentit jugosllav Sllobodan Millosheviq si dëshmitar i Prokurorisë së Tribunalit të Hagës për Krime Lufte. Millosheviq gjykohet për krime lufte në Kosovë, në Kroaci dhe në Bosnje e Hercegovinë.

 

 

Truproja e Osama bin Ladenit të pakapshëm është bërë komandant ushtarak i Al Kaidës

 

Singapur, 19 maj 2003 – Egjiptiani që e ka ruajtur Osama bin Ladenin e pakapshëm është bërë komandant ushtarak i Al Kaidës dhe kështu e ka pasuar Khalid Sheik Muhamedin e arrestuar, i cili është një nga kryeorganizatorët e 11 shtatorit, ka bërë të ditur sot (e hënë) një ekspert i terrorit, njofton Rojter.

 

Koka e Saif al-Adelit, që besohet të ketë hyrë në të 40-tat në muajin e kaluar, është vlerësuuar 25 milionë dollarë në listën e FBI-së të terroristëve më të kërkuar. SHBA-të e kanë akuzuar atë për bombardimet e ambasadave amerikane në Kenia dhe në Tanzani më 1998.

 

Thuhet se Al-Adel mund të sjellë stil tjetër në sulmet e ardhshme. Ai besohet se fshihet njësoj si Bin Ladeni përgjatë kufirit pakistanezo-afgan.

 

 

Britaniku i lidhur me sulmin në Tel Aviv është gjetur i vdekur

 

Jerusalem, 19 maj 2003 – Ekspertët mjekoligjorë kanë konstatuar sot (e henë) se trupi i pajetë, i gjetur në bregdetin izraelit, është i një britaniku të dyshimtë se e ka ndihmuar bombëhedhësin vetëvrasës britanik, i cili kishte vrarë tre persona në Tel Aviv, kanë bërë të ditur burimet e sigurimit, njofton Rojter.

 

Me testin e ADN-së është konstatuar se trupi është i Omar Sharifit, 27-vjeçar, qytetar britanik me prejardhje pakistaneze. Shkaku i saktë i vdekjes së tij ende nuk dihet.

 

Policia izraelite ka thënë se Omar Sharif, ka planifikuar të kryejë një sërë bombardimesh në bregdetin e Tel Avivit më 30 prill, por pasi ka dështuar, ka ikur.

 

Tre anëtarë të familjes së Sharifit qenë arrestuar kohë më parë në Britani lidhur me sulmin me bomba në një klub nate në Tel Aviv. Gruaja dhe vëllai i i tij qenë liruar, kurse motra e tij ka mbetur ende në burg.

 

 

Dështojnë bisedimet për paqe me separatistët në Indonezi

 

Xhakartë, 19 maj 2003 - Njoftimet nga kryeqyteti provincial, Banda Aceh, thonë se ushtria indoneziane goditi me raketa pozicionet e rebelëve, duke sinjalizuar kështu fillimin e operacioneve ushtarake.

Presidentja e Indonezisë, Megawati Sukarnoputri, miratoi operacionet ushtarake pasi bisedimet e fundit për paqe ndërmjet qeverisë indoneziane dhe Lëvizjes së Lirë Aceh, përfunduan pa sukses dje në Tokio të Japonisë.

 

Zonja Megawati shpalli gjendjen e luftës në provincë, duke thënë se rebelët kishin hedhur poshtë ofertën e Xhakartës për autonomi të veçantë, si shkëmbim për çarmatimin e tyre.

 

 

Dollari ka rënë sot në paritetin më të ulët në katër vitet e fundit kundrejt euros

 

Londër, 19 maj 2003 – Dollari ka rënë sot (e hënë) në paritetin më të ulët në katër vitet e fundit kundrejt euros, ndërsa në pikën më të ulët në dy vitet e fundit kundrejt jenit, njofton Rojter.

 

Rënia e tillë e dollarit ka ndodhur pasi sekretari amerikan i Thesarit, Xhon Snou, ka thënë se Uashingtoni është i kënaqur me dollarin e dobët. Snou ka thënë kështu pas takimit të ministerave të finanacave të Grupit të të Shtatëve në Doville të Francës.

 

Qendrimi i tillë amerikan ka forcuar bindjet e tregtarëve se Uashingtoni jozyrtarish e ka braktisur politikën e dollarit të fortë.

 

 

Dy shpërthime godasin Jerusalemin

 

Jerusalem, 19 maj 2003 - Të paktën 7 izraelitë u vranë dhe 20 të tjerë u plagosën dje nga një shpërthim vetëvrasës në Jerusalem. As një orë më vonë, një sulm tjetër vetëvrasës ndodhi pranë vendit të shpërthimit të parë.

Sulmi i parë kishte në shënjestër një autobus pranë lagjes French Hill në Jeruzalemin verior në fillim të orëve të mëngjesit me qarkullim të dendur. Policia e bllokoi zonën, ndërkohë që ambulancat dërgonin me shpejtësi të plagosurit në spitalet pranë.

 

Pak më vonë, autori i një sulmi tjetër vetëvrasës hodhi veten në erë pranë një udhëkryqi, jo larg vendit të sulmit të parë. Policia izraelite tha se autori i sulmit humbi jetën, por shpërthimi nuk shkaktoi viktima të tjera.

 

 

U martua pasi bëri grevë urie

 

Nju Delhi, 19 maj 2003 - Një vajzë indiane nga shtetit jugor Pondiçeri ia doli të detyrojë të dashurin e saj për t'u martuar, duke bërë grevë urie para shtëpisë së tij.

Selvi Kamaraj (21) bëri grevë urie para shtëpisë së të dashurit të saj Anandua, gjë që e shtyri policinë lokale t'i detyrojë për t'u martuar.

Fillimisht martesa u ndal kur prindërit e Ananduos kërkuan prikë (miraz), ndërkaq Anandua ishte tepër i druajtshëm për të kundërshtuar. Kjo e shtyri Selvin që të pijë helm. Mirëpo me kohë u transferua në spital dhe shpëtoi. Pastaj Selvi vendosi të bëjë gervë urie.

Kur para shtëpisë së Ananduos u tubua masa e njerëzve, policiasë iu desh të reagojë. E dërguan Selin në stacionin e policisë dhe vendosën të ndëshkojnë prindërit e Ananduos. Me ndërmjetësimin e policisë familjet pranuan martesën.

 

 

Dy vëzhgues të Misionit të Kombeve të Bashskuara janë vrarë egërsisht në Kongo

 

Bunia, Kongo, 19 maj 2003 - Dy vëzhgues ndërkombëtarë nga Misioni i fuqishëm prej 700 pjesëtarësh i Kombeve të Bashkuara janë vrarë sot (e hënë) egërsisht në pjesën verilindore të Republikës Demokratike të Kongos, ka bërë të ditur zëdhënësi i KB-së, njofton BBCWorld. Ushtarët, njëri nigerian, kurse tjetri jordanian, kanë qenë zhdukur të martën e kaluar në një vend, 70 kilometra në veri të qytetit Bunia, ku është i vendosur pjesa dërrmuese e stafit të KB-së.

 

 

Një palestinez vetëvrasës në biçikletë ka sulmuar sot trupat izraelite me bombë

 

Jerusalem, 19 maj 2003 – Një palestinez vetëvrasës në biçikletë ka sulmuar sot (e hënë) në Rripin e Gazës trupat izraelite me bombë, por, përpos vetëvetës, s'ka pasur sukses të vrasë askë, ndërkaq, i ka lënduar tre ushtarë izraelitë, që është një nga sulmet e fundit në spiralën e dhunës, e cila ka zbehur shpresat për planin e ri amerikan të paqes, njofton Rojter.

 

Bombëhedhësi ka kryer këtë sulm afër kolonisë hebraike Kfar Darom në Gazën qendrore, një ditë pasi militanti i kamufluar si religjiopz ebre, e hodhi vetën në erë me bombë në një autobus në Jerusalem, ku janë vrarë 7 persona.

Kryeministri izraelit, Ariel Sharon, menjëherë e ka braktisur planin për të vizituar SHBA-të për bisedimet paqësore dhe ka urdhëruar ndalimqarkullimin në zonat palestineze.

 

 

Në tri aksidente të veçanta në Irak janë vrarë tre ushtarë amerikanë

 

Uashington, 19 maj 2003 - Tre ushtarë amerikanë janë vrarë dhe katër të tjerë janë plagsur në tri aksidente të veçanta në Irak, ka bërë të ditur dje Komanda Qendrore Amerikane në Kuvajt, njofton Rojter. Një ushtar amerikanë ka humbur jetën, kurse tre të tjerë janë plagosur në një shpërthim në Bagdad.

 

Ndërkaq, një ushtar amerikan ka vdekur nga një plagë e marrë nga një e predhë aksidentale, kurse ushtari i tretë amerikan ka humbur jetën në një aksident trafiku, ku është lënduar edhe një ushtar tjetër.

 

 

Numri i të vdekurve në vershimet në Sri Lanka është ngritur sot në të pakten 200 veta

 

Kolombo, 19 maj 2003 – Numri i të vdekurve në vershimet në Sri Lanka është ngritur sot (e hënë) në të pakten 200 veta, kurse numri i të zhdukurve është edhe më i madh, njofton Rojter. Autoritetet vendore kanë thënë se vërshimet dhe rrëshqitjet e dheut ende po vazhdojnë. Rreth 100 mijë njerëz kanë mbetur pa kulm mbi kokë. Këto janë vershimet më shkatërrimtare në 60 vitet e fundit.

 

 

Papa Gjon Pali i Dytë festoi 83-vjetorin e lindjes

 

Varshavë, 19 maj 2003 - Papa Gjon Pali i Dytë festoi 83 vjetorin e lindjes, duke kanonizuar 4 katolike të shenjta. Rreth 50 peligrinë morën pjesë në ceremoninë e sotme në sheshin e Shën Pjetrit, duke përfshirë edhe një numër të madh qytetarësh polakë, mes tyre edhe presidentin Aleksandër Kvashnjevski.

Papa shenjtëroi 4 gra, 2 italiane dhe 2 polake, themeluese urdhërash fetarë. Ati i shenjtë ka kanonizuar 473 të shenjtë, më shumë se çdo Papë tjetër në historinë e kishës katolike. Papa u kërkoi gjithashtu besimtarëve që të vazhdojnë të luten për të.

Dje, një zyrtar i lartë i Vatikanit pranoi për herë të parë se Papa vuan nga sëmundja e Parkinsonit dhe shtoi se lutjet e kanë ndihmuar Papën që të përballojë këtë sëmundje.

 

 

Izraeli kufizon lëvizjen e palestinezëve

 

Telv Aviv, 19 maj 2003 - Izraeli ka mbyllur kufijtë me Bregun Perëndimor dhe Rripin e Gazës, në përgjigje ndaj dy sulmeve vetëvrasëse ku u vranë 9 vetë, përfshirë edhe dy kamikazët.

Kryeministri Ariel Sharon, i cili ka shtyrë nisjen për bisedime në Uashington, ka fajësuar për sulmet e fundit udhëheqësin palestinez Jaser Arafat.

Sulmet e së dielës u bënë pak orë pasi zoti Sharon kishte takuar homologun e tij palestinez, Mahmud Abas, në takimin e nivelit më të lartë mes të dy palëve për më shumë se dy vjet.

 

 

Ushtria indoneziane fillon ofanzivën në Aceh

 

Xhakartë, 19 maj 2003 - Armata indoneziane ka filluar një ofensivë kundër forcave rebele në krahinën e trazuar Aceh, vetëm disa orë pas dështimit të bisedimeve paqesore dhe pas pesë muajsh armëpushimi.
Sulmet vijnë pas një deklarate formale të ligjit të luftës.

Rreth pesëqind trupa u lëshuan me parashuta në bazën ajrore në Acehun perëndimor, derisa përfaqësues të medias po vështronin.

Një zëdhënës i armatës, gjeneral majori Erwin Sujono, tha se aeroplanët hapën zjarr në bazën e rebelëve në afërsi të kryeqytetit të krahinës, Banda Aceh, dhe ka patur përleshje me forcat rebele në lindje.

 

 

Vërshime të mëdha në Shri Lankë

 

Kolombo, 19 maj 2003 - Kryqi i Kuqi i Shri Lankës thotë se beson se më shumë se dyqind njerëz janë mbytur në vërshimat e mëdha në jug të vendit. Radioja shtetërore njoftoi se njëqind e pesëdhjetë persona vdiqën, shumica pas rrëshqitjes së dheut, por tha se edhe shumë të tjerë janë zhdukur.

Përpjekjet për shpëtim po vazhdojnë, por shumë fshatra janë të shkëputura nga bota. Dhjetëra mijëra qytetarë janë bllokuar nga vërshimat, të cilat vlerësohet të jenë më të rëndat që kanë goditur vendin pas shumë vjetësh.

Kryqi i Kuq apeloi për ndihmë nga jashtë dhe brenda vendit dhe tha se vërshimat kanë shkatërruar shtëpi, kanë bllokuar rrugë dhe penguar rrjetin energjetik.

Copyright©2000-2003 Trepca.net - Të gjitha të  drejtat e rezervuara.