Lajme

E shtune, 17 maj 2003

Përmbajtja:

• Uolfovic misionin e trupave amerikane në Kosovë e cilsoi si një nga më të rëndësishmit

• Shtajner thotë se nuk bëhet fjalë për kurrëfarë rehabilitimi të raporteve me Beogradin

• Kryeministri i Kosovës ka shprehur keqardhje për shkak të vendimit të UNMIK-ut

• Kryeparlamentari Daci thotë se vendimi i Shtajnerit është një vendim i nxituar

• Zyrat perëndimore në Prishtinë e kanë përkrahur vendimin e Shtajnerit

• Pritet që në Kosovë të privatizohen rreth 280 ndërmarrje

• Grevistët kërkojnë dorëheqjen e drejtorit të Qendrës së Studentëve, ngase sipas tyre ai është përgjegjës për helmimin

• Gjenerali Klajn thotë se situata në Mitrovicës po përmirësohet

• Përleshje ndërmjet të rinjve shqiptarë dhe maqedonas në Tetovë - plagosen tre të rinj

• SHBA-të dhe NATO do të mbeten në Ballkan deri në vendosjen e stabilitetit të përhershëm

• Kryeministri serb thotë se bisedimet për statusin e Kosovës do të fillojnë së shpejti

• Në Tiranë u nënshkrua marrëveshja e ripranimit mes Shqipërisë dhe Bashkimit Evropian

• Ka arritur në 40 numri i të vrarëve në një sulm vetëvrasës në Kazablanka të Marokut

• Britania e Madhe paralajmëron mundësinë e atentateve të reja

• Bush ende i hidhruar në Qeverinë gjermane

Uolfovic misionin e trupave amerikane në Kosovë e cilsoi si një nga më të rëndësishmit

 

Kampi Bondstill afër Ferizajit, 17 maj 2003 - Zv.sekretari amerikan i Mbrojtjes Pol Uolfovic sot vizitoi kampin amerikan Bondstill afër Ferizajit. Me këtë rast Uolfovic misionin e trupave amerikane në Kosovë e cilsoi si një nga më të rëndësishmit për SHBA-të.

"Jemi duke shënuar arritjen e inkurajimin e kosovarëve që të marrin përsipër sa më shumë përgjegjësi mbi vete", tha Uolfovic, duke shtuar se përkundër arritjeve ende ka edhe shumë punë për t'u bërë.
Zv.sekretari amerikan i Mbrojtjes sot do të shkojë edhe në Shkup për të biseduar me krerët më të lartë maqedonas.

 

 

Shtajner thotë se nuk bëhet fjalë për kurrëfarë rehabilitimi të raporteve me Beogradin

 

Prishtinë, 17 maj 2003 - Shefi i UNMIK-ut Mihael Shtajner ka deklaruar se vendimi që t'u ndalohet zyrtarëve të Kosovës pjesëmarrja në tubime ndërkombëtare për rajonin, nuk do të dëmtojë raportet e UNNIK-ut me institucionet e Kosovës dhe se nuk bëhet fjalë për kurrëfarë rehabilitimi të raporteve me Beogradin.

 

 

Kryeministri i Kosovës ka shprehur keqardhje për shkak të vendimit të UNMIK-ut

 

Prishtinë, 17 maj 2003 - Kryeministri i Kosovës Bajram Rexhepi ka shprehur keqardhje për shkak të vendimit të UNMIK-ut që përfaqësuesit e institucioneve të përkohshme të Kosovës të mos përfshihen në delegacionet e UNMIK-ut në tri takimet e ardhshme ndërkombëtare.

Në një komunikatë të nënshkruar nga kryeministri Rexhepi thuhet se UNMIK-u ka nevojë për institucionet e përkohshme dhe anasjelltas, ndërkaq Qeveria e Kosovës mbetet e përkushtuar ndaj proceseve që janë në vijim e sipër si ai i bartjes së kompetencave.

Kryeministri Rexhepi në letrën që ua ka dërguar edhe nikoqirëve të konferencës së Ohrit ka thënë se i vjen keq për rastin e humbur për të përfaqësuar pikëpamjet e Kosovës rreth gjendjes aktuale, veçanërisht kur është fjala për konferencën për sigurinë kufitare që do të mbahet në Ohër, e cila për institucionet e Kosovës ishte një rast i jashtëzakonshëm për të dëshmuar evropianizimin e pikëpamjeve.

 

 

Kryeparlamentari Daci thotë se vendimi i Shtajnerit është një vendim i nxituar

 

Prishtinë, 17 maj 2003 - Kryetari i Kuvendit të Kosovës, Nexhat Daci, duke komentuar vendimin e administratorit Shtajner për ndëshkimin e institucioneve të Kosovës, ka thënë se ky është një vendim i nxituar dhe tepër i katalizuar nga senduiçi në të cilin gjendet ai prej sulmeve nga Beogradi. Sipas mendimit të tij instititucionet e Kosovës kanë qenë të suspenduara prej fillimit në politikën ndërkombëtare.

 

Z. Daci tha se ky vendim është kundër UNMIK-ut pasi pengimi i institucioneve të Kosovës për t'u përfaqësuar jashtë ka dëmtuar vetë UNMIK-un. Megjithatë Daci tha se nuk don ta fajësojë njëshin e UNMIK-ut pasi Shtajner po mundohet në shumë vende që ta përfaqësojë mirë Kosovën siç, ishte rasti me përfaqësimin në Vjenë. "Unë këtë vendim dua ta kuptoj si vendim të nxjerrë me dhunë", thotë Daci.

"Me përgjegjësi të plotë them se vendet e bashkësisë ndërkombëtare në Kosovë kanë reaguar me një nervozizëm të pahijshëm për të tentuar që mosmarrëveshjet në nivel botëror t'i projektojnë mbi supat e dobëta të Kosovës", ka thënë Daci dhe ka shtuar se kosovarët kanë forcë që të bashkëpunojnë edhe më tutje me gjithë bashkësinë ndërkombëtare. Ai shpreson se ky vendim nuk do të ndikojë në procesin e bartjes së kompetencave.

 

 

Zyrat perëndimore në Prishtinë e kanë përkrahur vendimin e Shtajnerit

 

Prishtinë, 17 maj 2003 - Zyrat perëndimore, përkatësisht zyrat e pesëshes në Prishtinë e kanë përkrahur vendimin e kryeadministratorit të Kosovës Mihael Shtajner. Në një komunikatë të tyre thuhet se tejkalimi i ndasive brendashqiptare është i mirëseardhur, por Kuvendi i Kosovës vlerësohet si një institucion në të cilin janë bashkarisht edhe shqiptarët edhe serbët.

 

 

Pritet që në Kosovë të privatizohen rreth 280 ndërmarrje

 

Prishtinë, 17 maj 2003 - Privatizimi i pronës shoqërore nënkupton investime të reja dhe fillimin e një periudhe historike për Kosovën. Kështu kanë vlerësuar autoritetet e AKM-së në një takim me gazetarët në Prishtinë.

 

Pas shpalljes së procesit të privatizimit për gjashtë kompani të ish-sektorit shoqëror, Bordi i Agjencisë Kosovare të Mirëbesimit ka njoftuar se do të shpallë tenderët për privatizimin edhe të 12 ndërmarrjeve të tjera.

 

Anëtari i Bordit të AKM-së Jurgen Vos tha se fillimi i procesiti të privatizimit ka qenë i lidhur ngusht me miratimin e Rregullores për shfrytëzimin e tokës dhe se pas nënshkrimit të saj nga ana e shefit të UNMIK-ut pritet që të fillojë ky proces për të gjitha ndërmarrjet që konsiderohet se mund të privatizohen.

 

Ai ka shtuar se kthimi i kompanive nga prona shoqërore në investime private nënkupton investime të reja, struktura të reja menaxhuese, dhe shpreson se kjo do të nënkuptojë rivitalizimin e ekonomisë së Kosovës.

Ministri për Tregti dhe Industri në Qeverinë e Kosovës Ali Jakupi ka thënë se me fillimin e procesit të privatizimit Kosova fillon të familjarizohet me ekonominë e tregut. Ai ka shtuar se nuk duhet krijuar iluzione se me fillimin e këtij procesi do të zbutet dukshëm papunësia si problemi më i madh aktualisht në Kosovë.

Në Kosovë sipas shënimeve të AKM-së pritet që të privatizohen rreth 280 ndërmarrje dhe tenderët që do të shpallen për këto ndërmarrje sipas zyrtarëve të këtij agjencioni janë të njëjta si për investitorët nga Kosova, ashtu edhe për ata nga jashtë.

 

 

Grevistët kërkojnë dorëheqjen e drejtorit të Qendrës së Studentëve, ngase sipas tyre ai është përgjegjës për helmimin

 

Prishtinë, 17 maj 2003 - Studentët grevistë të Universitetit të Prishtinës me çdo kusht kërkojnë dorëheqjen e udhëheqësit të Qendrës së Studentëve meqë, sipas tyre, ai është përgjegjës për helmimin e studentëve.

 

Krahas kërkesës për dorëheqjen e drejtorit të Qendrës së Studentëve, studentë grevistë kanë paraqitur dje edhe një kërkesë për Ministrinë e Arsimit, Shkencës dhe Teknologjisë në Qeverinë e Kosovës: të caktojë një komision sanitar që merret ekspertizën e ushqimit në menzë e që në përbërje të ketë edhe disa studentë.

Ekspertët thonë se të hënën do të përfundojnë analizat e mostrave të ushqimit, që ka gjasë të ketë shkaktuar helmimin e mbi 100 studentëve.

 

 

Gjenerali Klajn thotë se situata në Mitrovicës po përmirësohet

 

Mitrovicë, 17 maj 2003 - Situata në Mitrovicë po përmirësohet përkundër pranisë së ekstremistëve në këtë qytet, ka thënë komandanti i Brigadës Veri-Lindje, gjenerali francez Mishel Klajn, të cilit pas një jave i përfundon misioni në kuadër të KFOR-it në Kosovë.

Ai ka theksuar se Brigada Verilindje përveç aksioneve të sigurisë ka sendërtuar edhe projekte ekonomike dhe rindërtim, që kishin për qëllim të ndihmonin zhvillimin e jetës normale të të gjithë qytetarëve të rajonit të Mitrovicës.

 

 

Përleshje ndërmjet të rinjve shqiptarë dhe maqedonas në Tetovë - plagosen tre të rinj

 

Tetovë, 17 maj 2003 - Gjatë natës së mbrëmshme në Tetovë janë plagosur tre të rinj gjatë një përleshjeje ndërmjet disa të rinjve shqiptarë dhe maqedonas. Incidenti ka ndodhur rreth orës 22.00 para kafiterisë "Arbi" në qendër të qytetit, ku nxënësit shqiptarë po kremtonin mbrëmjen e maturës.

 

Ndërkohë përleshje ka pasur edhe në kafiterinë tjera, ku zbaviteshin të rinjtë maqedonas. Me këta rast janë përdorur edhe armë zjarr nga të cilat janë plagosur Argjend Islami, i cili ka marrë plagë të rënda dhe është transferuar në spitalin e Shkupit, Mevlude Selimi dhe një i ri maqedonas.

Pas ndërhyrjes së policisë situata është qetësuar.

 

 

SHBA-të dhe NATO do të mbeten në Ballkan deri në vendosjen e stabilitetit të përhershëm

 

Sarajevë, 17 maj 2003 - Ndihmëssekretari amerikan i Mbrojtjes Pol Uolfovic ka deklaruar në Sarajevë se trupat e Shteteve të Bashkuara dhe aleatëve të NATO-së do të qëndrojnë në Ballkan aq gjatë sa do të jetë e nevojshme për të vendosur stabilitet të përhershëm në rajon.

 

Trupat amerikane nuk janë në mision humanitar në Bosnje dhe është plotësisht e qartë se stabiliteti në Ballkan është pjesë e luftës kundër terrorizmit, ka thënë ky zyrtar amerikan.

Uolfovic ndodhet në një turne pesëditëshe në Evropë, ku përveç Bosnje e Hercegovinës do të vizitojë Kosovën, Maqedoninë, Francën dhe Rumaninë.

 

 

Kryeministri serb thotë se bisedimet për statusin e Kosovës do të fillojnë së shpejti

 

Beograd, 17 maj 2003 - Sipas kryeministrit të Serbisë, Zoran Zhivkoviq, bisedimet për statusin përfundimtar të Kosovë, ku do të përfshiheshin, sipas tij, Beogradi, shqiptarët e Kosovës, Bashkimi Evropian, Shtetet e Bashkuara dhe Kombet e Bashkuara, do të fillojnë së shpejti.

 

Në një intervistë për Rojtersin Zhivkoviq ka thënë gjithashtu se Serbia do të vazhdojë të bashkëpunojë me Tribunalin e Hagës dhe se do të dorëzojë të gjithë të akuzuarit që ndodhen në arrati në territorin e saj.

 

 

Në Tiranë u nënshkrua marrëveshja e ripranimit mes Shqipërisë dhe Bashkimit Evropian

 

Tiranë, 17 maj 2003 - Në Tiranë është nënshkruar zyrtarisht marrëveshja e ripranimit mes Shqipërisë dhe Bashkimit Evropian, e cila ishte miratuar një javë më parë nga ana e Qeverisë së Shqipërisë.

 

Në emër të Qeverisë shqiptare marrëveshja është nënshkruar nga ministri i integrimit Sokol Nako. Ajo parashikon ripranimin e shtetasve shqiptarë pa dokumenta që jetojnë në vendet e Bashkimit Evropian dhe shtetasve të huaj që kalojnë nga Shqipëria.

 

 

Ka arritur në 40 numri i të vrarëve në një sulm vetëvrasës në Kazablanka të Marokut

 

Rabat, 17 maj 2003 – Të pakten 40 veta janë vrarë mbrëmë dhe rreth 100 të tjerë janë plagosur në një sulm vetëvrasës me bombë në qytetin më të madh të Marokut, Kazablanka, kanë bërë të ditur sot (e shtunë) burimet diplomatike në Rabat, njofton Rojter.

 

Në shenjestër kanë qenë Qendra e komunitetit hebraik dhe një klub dhe restoran spanjoll në qendër të Kazablankës. Asnjë grup nuk e ka marrë përgjegjësinë për këto sulme, të cilat janë aktet e para të tilla të dhunës në mbretërinë muslimane të Aftrikës së Veriut në vitet e fundit.

 

 

Britania e Madhe paralajmëron mundësinë e atentateve të reja

 

Londër, 17 maj 2003 - Qeveria britanike ka zgjeruar paralajmërimet për sulme terroiste në Afrikën Lindore edhe në gjashtë vende të tjera. Në Ugandë, Etiopi, Tanzani, Somali, Eritre dhe në Xhibuti ka shenja për mundësinë e atentateve, ka sqaruar Ministria e jashmte në Londër. Që nga e enjta për shkak të rrezikut nga sulme të reja, Britania e Madhe ka ndërprerë fluturimet e aeroplanëve për në Kenia.

Edhe Ministria e Jashtme në Berlin ka paralajmëruar qytetarët gjermanë të jenë të kujdeshëm nga sulme të mundshm ne Kenia dhe në Malajzi. Megjithatë, një pralajmërim të drejtpërdrejtë për mos udhëtim në këto vende nuk është dhënë. Ndërkaq, Ministria amerikane e Punëve të Jashtme ka paralajmëruar për atentate të tjera në Arabinë Sudite.

 

 

Bush ende i hidhruar në Qeverinë gjermane

 

Visbaden, 17 maj 2003 - Presidenti amerikan Xhorxh Bush, sipas fjalëve të kryeministrit të landit Hesen, Roland Koh, është edhe më tej i hidhëruar me qeverinë gjermane. Koh, njëri nga udhëheqësit e opozitës ishte të enjtën në Shtëpinë e Bardhë dhe në një formë pak të pazakonshme është takur me presidentin amerikan Bush.

 

Pas kthimit të tij në Gjermani, Koh theksoi se presidenti Bush ishte i pakënaqur me qëndrimin gjerman gjatë luftës në Irak. Kancelari gjerman Shrëder duhet të marrë iniciativën për afrim me qeverinë amerikane, ka kërkuar politikani i opozitës Koh.

Copyright©2000-2003 Trepca.net - Të gjitha të  drejtat e rezervuara.