OPINIONE

PRO ET CONTRA

PSE ËSHTË KËRCËNUAR DEPUTETI I LDK-SË DHE JO I NDONJË SUBJEKTI TJETËR POLITIK?

Pavarësisht nga deklaratat pompoze të shefave të "AKSH"-së mbi atë se "AKSH"-ja i takon popullit", edhe pse deri më sot "AKSH" akoma nuk ka dalur zyrtarisht me ndonjë deklaratë se e njeh vullnetin e lirë politik të shqiptarëve të Kosovës; e njeh dhe respekton dr.Ibrahim Rugovën për kryetar legjitim të shqiptarëve të Kosovës; se i jep përkrahje të plotë politikës kombëtare dr.Rugovës dhe kabinetit të tij presidencial për sa i përket çështjes së Kosovës; se respekton pluralizmin politik në Kosovë etj.,  çështje këto që do t'i qartësonin edhe më qartë pozicionimet politike të AKSH-së.

14 maj 2003 / Shkruan: Besim KRASNIQI

Kohëve të fundit opinionin tonë e kanë "bombarduar" disa komunikata, deklarata dhe intervista të "AKSH"-së, të shpeshtuara e të publikuara nëpër faqet elektronike të saj dhe në ato të shtypit majtist, të nëshkruar nga "gjeneralë" të vetëshpallur të "AKSH"-së, "aktivitet" ky i tëri deri më tani praktik i strukturave politiko-ushtarake të "AKSH"-së në "ribashkimin e trojeve etnike shqiptare", përjashtuar këtu shkatërrimin e urës hekurudhore në Zveçanit, për çfarë  pasoi edhe e shpallja e "AKSH"-së organizatë terroriste nga ana e administratorit të OKB-së në Kosovë z.Shtajner.

Përpiluesit e komunikatave dhe deklaratave në emër të "AKSH"-së (emrat dhe e kaluara e të cilëve tashmë janë të njohur për opinionin tonë) janë angazhuar vazhdimisht që "AKSH"-në ta paraqesin si "ushtri e dalur nga populli", "armatë e popullit", apo "ushtri me platformë politike gjithëkombëtare" etj., duke ua bashkangjitur komunikatave dhe deklaratave disa tituj bombastik vetëm e vetëm sa për të tërhequr vëmendjen e njerëzve të painformuar dhe naiv.

Pavarësisht nga deklaratat pompoze të shefave të "AKSH"-së mbi atë se "AKSH"-ja i takon popullit", edhe pse deri më sot "AKSH" akoma nuk ka dalur zyrtarisht me ndonjë deklaratë se e njeh vullnetin e lirë politik të shqiptarëve të Kosovës; e njeh dhe respekton dr.Ibrahim Rugovën për kryetar legjitim të shqiptarëve të Kosovës; se i jep përkrahje të plotë politikës kombëtare dr.Rugovës dhe kabinetit të tij presidencial për sa i përket çështhjes së Kosovës; se respekton pluralizmin politik në Kosovë etj.,  çështje këto që do t'i qartësonin edhe më qartë pozicionimet politike të AKSH-së.

Prandaj, ne do të ndalemi në tre raste konkrete që argumentojnë të kundërtën e teorisë së proklamuar aksh-iste, d.m.th. që argumentojnë se protagonistët e AKSH-së gënjejnë rëndë kur deklarojnë se "AKSH" respekton vullnetin politik të shqiptarëve. Rasti parë konkret është "konflikti" i AKSH-së me ish-ushtarin e komandantit Sali Çekaj dhe veprimtarin e aktivit të LDK-së z.Ismet Çekajn nga fshati Irzniq i Deçanit si dhe rasti i dytë konkret është kërcënimi me shkrim i AKSH-së i bërë ndaj deputetit të LDK-së z.Fatmir Rexhepit, kërcënim ky të cilin nuk e pranoi AKSH-ja si vepër të saj, por vepër "e atyre që nuk ia duan të mirën AKSH-së"!?

"Sigurimi i Atdheut" - "produkt alibie" i "AKSH"-së

Për të mbuluar turpin e "maskave të zeza" të cilat veprojnë nëpër fshatrat e Deçanit por tashmë edhe nëpër pjesë tjera të Kosovës, shefat e  "sigurimit të AKSH"-së respektivisht  të "Shërbimit Informativ Ushtarak" (SHIU-t) me anë të një njoftimi publik njoftojnë për kompletimin e dosjeve të zeza për "ata që po e diskreditokan emrin e shenjtë të AKSH-së" dhe se "maskat e zeza" në komunën e Deçanit qenkan pjesëtarë të "Sigurimit të Atdheut", (organizatë kjo e panjohur për opinionin, e paraqitur deri më sot vetëm "online" me anë të një komunikate "Komunikatë Nr.001") dhe se udhëheqës i tyre në Deçan qenka z.Ismet Çekaj, i cili do të del sipas njoftimit publik të "AKSH"-së "para ligjit dhe drejtësisë"!

Duke e njohur mirë personalitetin e Ismet Çekajt si individ por edhe si familje kombëtare, "AKSH"-ja demanton vetveten se është "ushtri në shërbim të popullit dhe se nuk i takon asnjë subjekti politik" derisa ajo denoncon dhe akuzon pa asnjë argument veprimtarin politik të LDK-së i cili faktikisht është përfaqsues politik legjitim i LDK-istëve të fshatit Irzniq, dhe dëshiron ta vë atë para "ligjit dhe drejtësisë", pa e sqaruar këtu se për cilin ligj dhe cilën drejtësi e ka fjalën "shërbimi informativ ushtarak i AKSH"-së?! Pastaj, të gjitha deklaratat, njoftimet si dhe një apo dy intervista të shefave të "AKSH"-së kanë gjetur vend në faqet e një fletushke ditore majtiste që përkrah dhe nxit haptas krimin politik ndaj veprimtarëve të LDK-së, e cila fletushkë qysh moti është dashur të shpallet e paligjshme nga ana e institucioneve të drejtësisë legjitime në Kosovë dhe jo të dënohen gazetat ditore që e luftojnë krimin politik.

Sikurse e theksuam më lartë, në njoftimin e saj publik "AKSH" shprehet për "maskat e zeza" se qenkan pjesëtarë të "Sigurimit të Atdheut", që tregon faktin se "AKSH" paska informacione të sakta se kush qenka "Sigurimi i Atdheut" dhe kush qëndron prapa kësaj organizate!

Thënë më konkretisht, "AKSH" qenka ajo që e paska formuar organizatën "Sigurimi i Atdheut" respektivisht ajo e paska nxjerrë "Komunikatën nr.001 të "Sigurimit të Atdheut" për opinion, duke e paraqitur "Sigurimin e Atdheut" si "organizatë e cila është kundër krimit politik dhe të afërt me politikën e dr.Rugovës", në mënyrë që "AKSH" të ketë "alibi" për veprimtarinë e saj destruktive kundër aktivistëve politik të LDK-së, në njërën anë, si dhe për t'i dhënë mundësi medias enveriste në Kosovë për të sulmuar dhe kompromituar figurën politike të dr.Rugovës me tituj bombastik si "Rugova e formoi ushtrinë e tij" e tituj tjerë kompromitues, e tërë kjo nën moton " me një grusht të mbyten dy miza". Nëse nuk është kështu, atëherë "AKSH"-ja e ka për detyrim t'i publikojë "dosjet e zeza" që i paska mbledhur diku (?!) dhe t'i publikojë përfaqsuesit e "Sigurimit të Atdheut", përndryshe "alibia" e saj bie në ujë dhe nuk ka më efekt!

Kush e kërcënoi me vrasje deputetin e LDK-së Fatmir Rexhepin?

Rasti i dytë tejet spekulativ, është rasti i kërcënimit me shkrim i të deputetit të parlamentit të Kosovës, përfaqsuesit të LDK-së z.Fatmir Rexhepit, i bërë në emër të "AKSH"-së. "Sekretariati Vendimmarrës i Frontit Për Bashkim Kombëtar Shqiptar dhe Shtabi i Përgjithshëm i AKSH-së" janë distancuar publikisht nga ky kërcënim me vrasje, mirëpo, mbetet e paqartë çështja se pse është kërcënuar mu deputeti i LDK-së dhe jo i ndonjë subjekti tjetër politik si dhe pse kërcënimi përmban logon dhe firmën e "AKSH"-së dhe jo të ndonjë organizate tjetër? 

Natyrisht që tani "AKSH"-ja nuk mund ta përdorë "Sigurimin e Atdheut" si "alibi", sepse "Sigurimi i Atdheut" sipas AKSH-së është me LDK-në, dhe t'i lihet faji asaj për kërcënim me vrasje ndaj deputetit të LDK-së nuk ka më logjikë! Kësaj rradhe "Sigurimi i Atdheut" mbetet kartë e djegur në duar të AKSH"-së! Pra, siç po shihet, shumë gjëra po mbeten pezull, pa u sqaruar mirë, dhe kjo siq duket është edhe strategjia e aksh-istëve të sprovuar dhe specializuar për propagandë dhe agjitacion, që të përhapet sa më shumë pasiguri dhe paqartësi në popull, urrejtje ndërvllazërore, mospajtime brendashqiptare dhe me këtë edhe rritja e numrit të vrasjeve politike ndaj veprimtarëve politik të LDK-së.

Se çfarë është qëndrimi i AKSH-së ndaj LDK-së si subjekti më i madh politik shqiptar në Kosovë, tregon qartë shkrimi i artikullshkruesit Bashkim Hoxha me titull bombastik: "Ribashkimi i Shqipërisë - çelës stabiliteti rajonal", ku ndër tjerash thotë: "Duke filluar me propagandën në  disfavor të luftës, bllokimin e mjeteve financiare të mbledhura nga populli (populli i kishte dhënë për tu çliruar nga prangat shekullore), dhe sobotime të tjera të panumërta të cilat do të merrnin mjaft kohë dhe hapsirë për tu përmendur të gjitha.

Partia e quajtur LDK me satelitët e saj, si dhe "institucionet" fiktive legale këmbëngulësisht tentonin që me çdo kusht, madje duke përdorur të gjitha mjetet, herë hapur e herë fshehur, (diverzive) në mënyrë perfide t'i shuanin lëvizjet çlirimtare"- fund i citatit. A nuk të kujton ky citat shkrimet denigruese të majtistëve të Kosovës kur janë në pyetje LDK-ja, institucionet legjitime të Kosovës dhe presidenti i Kosovës?!

Nënshkruar nga njëfarë "komandant Rrapi", një letër kërcënuese e "AKSH"-së iu është dërguar edhe kryetarit të komunës së Prishtinës z.Ismet Beqiri. Siç dihet edhe z.Beqiri vie nga rradhët e LDK-së ("çfarë koiçidence", do të thonë këta të "AKSH"-së), dhe përsëri pritet që "AKSH-ja zyrtare" ta dënojë ashpër këtë kërcënim të "dikujt që nuk ia do të mirën AKSH-së"!? Andaj, të jesh me popullin tënd dhe të jesh përfaqsues i denjë i tij, këtë duhet treguar me fakte dhe veprime konkrete në dobi të tij, dhe jo të manipulohet me ndjenjat e qytetarëve me anë të frazave demagogjike të mbështjellura me patriotizëm folklorik, pa ndonjë sens të ndershmërisë.

Padyshim se shqiptarët janë të interesuar për çlirimin dhe bashkimin e trojeve etnike shqiptare dhe se ky interesim daton historikisht shumë më herët, mirëpo synimet politike të shqiptarëve nuk arrihen me "gjyqe dhe drejtësi" ilegale, me kërcënime dhe vrasje të aktivistëve dhe përfaqsuesve legjitim të popullit, me një politikë përçarëse dhe kokë më vete, me monopolizim të çështjes së procesit të bashkimit të trojeve shqiptare, me imponime dhe presione, me kërcënime dhe dënime të përfaqsuesve të fjalës së lirë (shih "Deklaratën për shtyp nr. (3)1 të datës: 19.maj 2002, Dosja nr.5 - 19-05/002-6/1, ku kërcënohen redaktori i gazetës kombëtare "Bota sot" B. Ajeti dhe bashkëpuntori i saj B. Krasniqi) si dhe me veprime të tjera të shkëputura nga realiteti politik në të cilin gjenden shqiptarët sot.

Përgjatë procesit të pavarësimit të Kosovës nga Serbia institucionet e Kosovës kanë mjaft shtresime dhe probleme të natyrave të ndryshme qoftë në raport me bashkësinë ndërkombëtare apo qoftë edhe me pakicën serbe, momente këto të cilat kërkojnë maturi dhe mençuri për t'i tejkaluar ato, pa i bërë dëm ardhmërisë politike të Kosovës, prandaj Kosovës dhe qytetarëve të saj nuk i duhen diferenca të reja, probleme të reja ndërshqiptare, problemet që i krijojnë vetë disa koka të nxehta për interesa të ngushta personale e karrieriste.

Në këtë kontekst, identiteti i "AKSH"-së si "Armatë Kombëtare Shqiptare" do të mbetet vetëm një frazë boshe e faqeve të internetit, në qoftë se ajo:

- nuk e respekton vullnetin politik të shumicës së shqiptarëve në Kosovë;

- nuk e njeh presidentin Rugova për kryetar të shtetit të Kosovës;

- nuk distancohet nga veprimet kriminale ndaj figurave politike të LDK-së dhe subjekteve tjera politike me orientim kombëtar e demokratik;

- nuk sqaron realisht se kush qëndron prapa organizatës së ashtuquajtur "Sigurimi i Atdheut", të cilën po e përdor AKSH- si "alibi" sa herë që i duhet asaj;

- nuk i kontribuon klimës pozitive politike në skenën politike të Kosovës;

- nuk i tërheq "maskat e zeza" nga Kosova;

- vazhdon të bëjë dallime partiake e ideologjike në mes të shqiptarëve;

Copyright©2000-2003 Trepca.net - Të gjitha të  drejtat e rezervuara.