Lajme

E mërkure, 14 maj 2003

Përmbajtja:

• Daci: Misioni i OKB-së do të bartë të gjitha përgjegjësitë te populli i Kosovës

• Kosova ka nevojë të ndihmohet si nga SHBA-të ashtu edhe nga Bashkimi Evropian, tha kryeministri Rexhepi

• Ministri i jashtëm irlandez po qëndron në Kosovë dhe është takuar me Shtajnerin

• Së shpejti vijnë në Kosovë 169 oficerë policie nga India

• BE nuk dëshiron që aktivitetet në Kosovë t'i zgjerojë edhe jashtë ndihmës ekonomike, shkruan gazeta "Standard"

• Bordi i Drejtorëve të RTK-së është kundër Draftligjit

• Ministrat e brendshëm gjermanë bisedojnë për kthimin e refugjatëve

• Komuna e Gjilanit i dorëzon ministrit Zef Morina projektin e rrugës Gjilan-Stançiq

• S. Hasellok mohon t'u ketë deklaruar mediave serbe se nuk e ka kuptuar vendimin e Shtajnerit për privatizim

• P. Fieski do të fillojë takimet me institucionet e Kosovës nga të cilat do të kërkojë përmirësimin e gjendjes së pakicave

• Kryetari i Kuvendit komunal të Shterpcës ka dhënë dorëheqje

• Kryeparlamentari Daci Daci priti një delegacion tetëanëtarësh të Bundestagut gjerman

• Në veri të Mitrovicës ka ndodhur një incident ndërmjet shqiptarëve dhe serbëve

• Kosova bëhet anëtare e asociacionit ndërkombëtar në luftë kundër drogës dhe narko-biznesit

• Në Prekaz të Skënderajt u shënua 22-vjetori i rënies heroike të Tahir e Nebih Mehës

• Në Maqedoni fillon dhënia e dokumenteve në gjuhën shqipe

• Çoviq pas kthimit në Beograd tha se nuk do të ketë bashkëpunim me UNMIK-un

• Banorët shqiptarë të Malësisë së Tetovës pranuan që familjarët e policëve të vrarë maqedonas të bëjnë homazhe

• Filip Vujanoviq është shpallur edhe zyrtarisht fitues i zgjedhjeve presidenciale në Mal të Zi

• Gregori Xhonson thotë se gjendja e sigurisë në Maqedoni është përmirësuar dukshëm

• Tre serbë në Hagë për Srebrenicën

• Futboll: Zhvillohen ndeshjet e kthimit të çerekfinales së Kupës së Kosovës

• Liga e Kampionëve: Milan është finalisti i parë

• Të pakten 10 persona janë vrarë në një sulm të ri vetëvrasës në Çeçeni

• Nga një varrë masiv në pjesën qendrore të Irakut janë zhvarrosur sot eshtrat e 3, 000 trupave të pa jetë

• Në një shpërthim në një gjykatë në Jemen është plagosur një gjykatës

• Është gjetur grupi prej 17 turistëve evropianë, të zhdukur në Algjeri dy muaj më parë

• Afër stacionit të trenit në Romë janë përplasur dy trena ndërurbanë

• Forcat izraelite kanë vrarë tre pjesëtarë të sigurimit palestinez

• Në një minierë të Kinës humbën jetën 63 minatorë

• Bush tha se nuk çuditet po qe se Al-Kaida ka lidhje me shpërthimet në Arabinë Saudite

• Hamnei: Rivendosja e lidhjeve me Amerikën do të ishte kapitullim i plotë për Iranin

• Amerika dëbon 14 diplomatë kubanë

• Diplomatët amerikanë lënë Riadin

• Zbulohet varrezë masive me 15 mijë trupa

• Amerika paralajmëron për padinë kundër Frenks

• Parlamenti Evropian për mbrojtjen e mjedisit

• Menem mund të braktisë zgjedhjet

Daci: Misioni i OKB-së do të bartë të gjitha përgjegjësitë te populli i Kosovës

 

Pejë, 14 maj 2003 - "Konsiderohet se misioni i Kombeve të Bashkuara në Kosovë është i suksesshëm. Ky mision, duke pasur për bazë zgjedhjet e suksesshme, lokale dhe qendrore në Kosovë dhe ndërtimin e institucioneve qeverisëse, si edhe aplikimin e ligjeve e standardeve demokratike, do të bartë të gjitha përgjegjësitë te populli i Kosovës, tek organet e zgjedhura të tij dhe do të kalojë në mision mbikqyrës dhe këshilldhënës", tha kryetari i Kuvendit të Kosovës sot në një ceremoni përkujtimore në fshatin Qyshk të Pejës, me rastin e 4-vjetorit të masakrës serbe mbi banorët e këtij fshati më 1999 kur u vranë 62 civilë shqiptarë.

 

 

Kosova ka nevojë të ndihmohet si nga SHBA-të ashtu edhe nga Bashkimi Evropian, tha kryeministri Rexhepi

 

Prishtinë, 14 maj 2003 - Kryeministri i Kosovës Bajram Rexhepi deklaroi se Kosova ka nevojë të ndihmohet si nga SHBA-të ashtu edhe nga Bashkimi Evropian, ndërkaq sa u takon kundërthënieve ndërmjet tyre ajo çështje që nuk u takon kosovarëve, tha zoti Rexhepi duke komentuar një deklaratë të koordinatorit të Paktit të Stabilitetit Erhard Busek që BE-ja të marrë përgjegjësinë për Kosovën.

 

Kryeministri shtoi se pa rolin udhëheqës të SHBA-ve në aspektin politik e të sigurisë BE-ja për momentin nuk ka kapacitete të nevojshme. Mirëpo, sa i takon aspektit ekonomik dhe integrimit, në këtë drejtim me siguri që BE-ja është më afër dhe ka dhënë ndihmesa më të mëdha.

Ndërkaq duke folur për takimin e sotëm të qeverisë, Bajram Rexhepi tha se është përkrahur kërkesa e invalidëve të luftës për trajtimin e tyre në një qendër rehabilitimi në Slloveni ku hyjnë edhe pagesat për protezat e gjymtyrëve që i kanë humbur gjatë luftës. Është arritur pajtimi me Ministrinë e Shëndetësisë për mbulimin e këtyre shpenzimeve.

Rexhepi njoftoi mediat edhe për pjesëmarrjen e tij në konferencën e Ohrit dhe në atë të Forumit ekonomik që do të mbahet në Athinë.

 

 

Ministri i jashtëm irlandez po qëndron në Kosovë dhe është takuar me Shtajnerin

 

Prishtinë, 14 maj 2003 - Ministri i Punëve të Jashtme të Irlandës Brajan Kouen po qëndron sot në Kosovë në kuadër të një turneu nëpër vendet e Ballkanit Perëndimor. Ministri irlandez fillimisht bisedoi me shefin e UNMIK-ut Mihael Shatjner, kurse pasdite do të takohet edhe me presidentin e Kosovës Ibrahim Rugova dhe kryeministrin Bajram Rexhepi.

Shtajner pas takimit, tha se administrata e UNMIK-ut gëzon mbështetjen e plotë të Republikës së Irlandës, duke shtuar se shefin e diplomacisë së këtij vendi e ka njoftuar me punën e UNMIK-ut në Kosovë.

 

Shtajner e vlerësoi vizitën të rëndësishme edhe për faktin se Irlanda do ta marrë presidencës e radhës së Bashkimir Evropian në gjashtë e parë të vitit të ardhshëm dhe ai pret që angazhimi i BE-së gjatë kësaj periudhe të vazhdojë edhe më tutje sipas ritmeve të gjertanishme.

Ministri Kouen nga ana e tij tha se Irlanda gjatë kohës që do të kryesojë me BE-në do të angazhohet për standardet demokratike evropiane në Ballkan, duke përfshirë edhe Kosovën. Brenda një periudhe të shkurtër në Kosovë është arritur një përparim i madh, por ende mbetet shumëçka për t'u bërë, theksoi në një prononcim për media ministri i Jashtëm i Irlandës.

 

 

Së shpejti vijnë në Kosovë 169 oficerë policie nga India

 

Nju Jork, 14 maj 2003 – Burime të Kombeve të Bashkuara kanë bërë të ditur se në kuadër të pranisë më të madhe të Indisë në ruajtjen e paqes në botë, së shpejti 169 oficerë policie indianë do të nisen për në Kosovë për të marrë pjesë në Misionin e Kombeve të Bashkuara për ruajtjen e paqes. Policët indianë do të kryejnë më parë një trajnim pesëditor.

 

 

BE nuk dëshiron që aktivitetet në Kosovë t'i zgjerojë edhe jashtë ndihmës ekonomike, shkruan gazeta "Standard"

 

Vjenë, 14 maj 2003 - Kërkesa e koordinatorit të Paktit të Stabilitetit për Evropën Juglindore, Erhard Busek, që Bashkimi Evropian të marrë përsipër kujdesin për Kosovën, ka hasur në mbështetje të rezevruar në Bruksel, pohon gazeta e Vjenës "Standard".

BE për përcjell me kujdes zhvillimet në Kosovë dhe tashmë ka marrë disa detyra, siç është rindërtimi dhe ndihma ekonomike, citon gazeta burimet nga zyra e përfaqësuesit për politikë të jashtme dhe siguri të BE Havier Solana. Gjithashtu theksohet se BE aktualisht nuk dëshiron që aktivitetet e veta t'i zgjerojë edhe jashtë ndihmës ekonomike.

 

Bashkimi Evropian mbështet plotësisht politikën e shefit të UNMIK-ut Mihael Shtajner, theksojnë në zyrën e Solanës. "Prapa skenës, edhe përkundër rezervimit zyrtar, në Bruksel ekziston vetëdija për problemin e Kosovës. Shefat e diplomacive të vendeve anëtare të BE në takimin e ardhshëm do të diskutojnë edhe për çështjen e Kosovës", paralajmëron gazeta "Standard".

 

 

Bordi i Drejtorëve të RTK-së është kundër Draftligjit

 

Prishtinë, 14 maj 2003 - Bordi i Drejtorëve i Radiotelevizionit të Kosovës, pasi ka shqyrtuar draftligjin për Komisionin e Pavarur të Mediave, ka konstatuar se ky draftligj, në parametrat substancialë është i konceptuar ashtu që të vendosë kontroll të fortë politik mbi RTK-së dhe ta rrënojë njërin nga burimet e financimit të tij, thuhet në një komunikatë të këtij bordi.

Organet e Komisionit të Pavarur të Mediave, Këshilli dhe veçmas Zyra e Drejtorit Ekzekutiv, në fakt janë konceptuar si organe ekzekutive të transmetuesit publik, me kompetenca të pakufizuara kontrolli dhe arbitrariteti. Në rast se do të miratohej ky draft-ligj, ai praktikisht do ta bënte inekzistent dhe të tepërt Bordin e RTK-së dhe menaxhmentin e tij, duke krijuar precedentin e kontrollit të fortë politik dhe administrativ mbi politikat editoriale të RTK-së.

 

Praktikisht zgjedhja e anëtarëve të Bordit të RTK-së sipas kësaj skeme, do të bëhej nga pjesëtarët e asociacioneve që kontrollohen nga rivalë privatë të transmetuesit publik, që është një gjë krejtësisht e palogjikshme dhe e papranueshme.

Më tutje në këtë komunikatë thuhet se Draftligji ka ofruar shumë zgjidhje jologjike, kontradiktore dhe jofunksionale edhe në aspekte të tjera, duke e quajtur të papranueshëm. Gjithashtu theksohet se Drafti i propozuar paraqet kompilim të njëanshëm dhe të qëllimshëm të praktikave më restriktive të vendeve të ndryshme në të cilat tregu medial dhe ambienti politik ndryshojnë shumë nga ai në Kosovë.

 

Si i tillë ky draft pasqyron tendencën jo vetëm për dobësimin e RTK-së në tregun e kufizuar medial të Kosovës, por qartazi shpreh qëllimin për eliminimin e plotë të këtij shërbimi publik nga spektri medial kosovar.

Për shkak të arsyeve të lartpërmendura Bordi i RTK-së ka vendosur që të suspendojë mandatin e anëtarit të vet në Grupin Punues për vlerësimin e draft-ligjit dhe njëherësh ka kërkuar nga Kryeministri i Kosovës, Dr. Bajram Rexhepi.

Në rast se ky drafligj në këtë formë miratohet, Bordi i Drejtorëve i RTK-së njofton opinionin se nuk merr përgjegjësi për pasojat që do të shkaktoheshin jo vetëm në dëm të transmetuesit të vetëm publik kosovar, por në dëm të gjithë qytetarëve dhe në dëm të procesit të demokratizimit të shoqërisë kosovare, thuhet mes tejrash në ktë komunikatë të nënshkruar nga kryetari i Borditë të Drejtorëve të RTK-së, Adem Demaçi.

 

 

Ministrat e brendshëm gjermanë bisedojnë për kthimin e refugjatëve

 

Berlin, 14 maj 2003 - Komesariati i lartë i Kombeve të Bashkuara për refugjatë ka apeluar te ministrat e brendshëm të bundeslandeve gjermane që të mos nguten me kthimin e refugjatëve afganë. Gjendja e sigurisë në Afganistan është përkeqësuar muajve të fundit, thuhet në një deklaratë.

 

Ministri i brendshëm gjerman Oto Shili takohet sot në Erfurt me ministrat e brendshëm të bundeslandeve gjermane për të diskutuar mbi kthimin e refugjatëve nga Iraku, Kosova dhe Afganistani.

Sipas vlerësimeve të UNHCR-it gjendja në Kosovë për minoritetet vazhdon të mbetet e theksuar. Qeveria gjermane dhe administrata e OKB-së në Kosovë kanë një marrëveshje sipas të cilës kthimi i refugjatëve mund të bëhet vetëm në grupe të vogla.

 

Përfaqësuesit e minoritetit serb apo romët e Kosovës janë të përjashtuar prej dëbimeve nga Gjermania deri më 21 mars të vitit 2004.

 

 

Komuna e Gjilanit i dorëzon ministrit Zef Morina projektin e rrugës Gjilan-Stançiq

 

Gjilan, 14 maj 2003 - Ministri i Transportit dhe Telekomunikacionit, Zef Morina me bashkëpunëtorë ka vizituar Gjilanin dhe disa nga fshtarat e kësaj komune dhe në bisedë me zëvendëskryetarin e Kuvendit, Xhemajl Hyseni dhe kryeshefin ekzekutiv, Enver Muja, është njoftuar për gjendjen në infrastrukturën rrugore dhe të telekomunikacionit.

Udhëheqja komunale i ka dorëzuar ministrit Morina projektin e rrugës Gjilan-Stançiq, e cila e lidh Kosovën me Maqedoninë dhe rajonin, që ka gjatësi prej 30 kilometra dhe kërkon një vlerë investive rreth 13 milionë euro.

Zef Morina premtoi se do të hulumtojë të gjitha mundësitë për të siguruar mjetet e nevojshme për këtë projekt, i cili i hap Kosovës një portë të rëndësishme në koridorin e tetë ndërkombëtar të komunikacionit rrugor.

Përndryshe, komuna e Gjilanit ka arritur deri tani të përmirësojë sadopak gjendjen e infrastrukturës rrugore lokale, por në projektet që kërkojnë investime më të mëdha, siç janë rrugët Gjilan-Pogragjë, Gjilan-Bujanoc, Gjilan-Ferizaj dhe rruga qarkore në pjesën lindore të qytetit, ajo ka nevojë për përkrahjen e Ministrisë dhe të donatorëve të jashtëm, tha Xhemajl Hyseni.

Fshatrat e kësaj komune kanë nevojë edhe për rrjetin e telefonisë fikse dhe sinjalin e RTK-së, i cili në disa vende nuk ka parnim të mirë, ose edhe mungon fare.

 

 

S. Hasellok mohon t'u ketë deklaruar mediave serbe se nuk e ka kuptuar vendimin e Shtajnerit për privatizim

 

Prishtinë, 14 maj 2003 - Në mediat e shkruara dhe elektronike serbe është emetuar një deklaratë e zëdhënësit të UNMIK-ut Sejmon Hasellok, ku ai citohet të ketë thënë se nuk i kupton qëndrimet e kryeadministratorit Mihael Shtajner për vendimin e privatizimit të pronës shoqërore në Kosovë.

 

Mirëpo Hasellok përgënjeshtroi këto pohime duke nënvizuar se i ka të përbashkta qëndrimet me Shtajnerin. Ai ka kritikuar Çoviqin për mosnënshkrimin e protokollit për njohjen e ndërsjellë të targave të automjeteve, i cili do të mundësonte lëvizjen e lirë të të gjithë qytetarëve të Kosovës.

 

 

P. Fieski do të fillojë takimet me institucionet e Kosovës nga të cilat do të kërkojë përmirësimin e gjendjes së pakicave

 

Prishtinë, 14 maj 2003 - Udhëheqësi i Misionit të OSBE-së në Kosovë, ambasadori Paskal Fieski do të fillojë javën e ardhshme një sërë takimesh me institucionet e Kosovës, për të kërkuar prej tyre të ndërmarrin veprime të nevojshme për përmirësimin e gjendjes së pakicave.

 

Ambasadori Fieski do të adresojë këtë çështje të bazuar në rekomandimet dhe vlerësimet të OSBE-së dhe të UNHCR-së për situatën e pakicave etnike në Kosovë.

 

 

Kryetari i Kuvendit komunal të Shterpcës ka dhënë dorëheqje

 

Shterpcë, 14 maj 2003 - Kryetari i Kuvendit komunal të Shterpcës Sllagjan Iliq ka dhënë dorëheqje nga ky funksion i pakënaqur me sjelljen e anëtarëve të koalicionit vendor serb me përfaqësuesit e misionit ndërkombëtar dhe me qëndrimin e Qeverisë së Serbisë ndaj serbëve në Kosovë.

 

Në arsyetimin me shkrim të dorëheqjes Iliq thekson se koalicioni të cilit i takon, i ka tradhtuar shpresat e tij që për hir të interesave personale disa anëtarë të tij kanë rrezikuar interesat e bashkësisë serbe.

 

 

Kryeparlamentari Daci Daci priti një delegacion tetëanëtarësh të Bundestagut gjerman

 

Prishtinë, 14 maj 2003 - Kryetari i Kuvendit të Kosovës Nexhat Daci priti dje pasdite një delegacion tetanëtarësh të Komisionit për Çështje të Brendshme të Bundestagut gjerman. Kryeparlamentari Daci u ka thënë me këtë rast anëtarëve të këtij delegacioni se Kosova dëshiron që Gjermania të ndihmojë gjithmonë Kosovën dhe që miqësia shumëvjeçare me këtë vend të vazhdojë edhe mëtutje.

"Unë u mundova që në mënyrën më të mirë t'u japë një prezentim për gjendjen në Kosovë dhe në parlament. Shpreha dëshirën që Bundestagu të jetë gjithmonë si ndihmesë e parlamentit tonë të ri dhe në këtë aspekt mora përkrahjen e plotë nga ky delegacion", ka thënë z. Daci.

Ndërkaq, kryesuesja e delegacionit gjerman, zonja Korneli ka thënë se është dëshirë e madhe e saj që Kosova sa më shpejtë që është e mundur të zhvillohet me demokracinë e saj të re që të mund të flitet për një Kosovë paqësore dhe shumetnike dhe që parlamenti të ketë suverenitetin e tij të plotë.

 

 

Në veri të Mitrovicës ka ndodhur një incident ndërmjet shqiptarëve dhe serbëve

 

Mitrovicë, 14 maj 2003 - Grupe të shqiptarëve dhe serbëve shkëmbyen gurë ndërmjet veti në një incident që ndodhi dje në orët e pasditës në afërsi të "Lagjes së Boshnjakëve" në veri të Mitrovicës.

 

Zëdhënësi rajonal i SHPK-së Besim Hoti tha se policia ka ndërhyrë për të qetësuar situatën, ndërkaq nuk pati të lënduar gjatë incidentit. Nuk dihen arsyet e këtij incidenti, por policia ka arrestuar një serb lidhur me këtë rast, tha zëdhënësi Hoti.

 

 

Kosova bëhet anëtare e asociacionit ndërkombëtar në luftë kundër drogës dhe narko-biznesit

 

Prishtinë, 14 maj 2003 - Kosova prej dje është anëtare e asociacionit ndërkombëtar në luftë kundër drogës dhe narko-biznesit. Në një konferencë me temën: "Metodat e reja në luftë kundër varshmërisë ndaj narkotikëve dhe drogë" e mbajtur dje në Prishtinë u tha se ky asociacion mbledh rreth vetes të gjithë të interesuarit për evitimin e përdorimit të drogës.

 

Kjo konferencë nxori në pah shumë aspekte të verifikimit dhe të luftimit të kësaj dukurie negative. Gjithashtu u shtjelluan disa programe që ndihmojnë reahabilitimin e personave që janë të varur nga droga dhe narkotikët.

 

 

Në Prekaz të Skënderajt u shënua 22-vjetori i rënies heroike të Tahir e Nebih Mehës

 

Prekaz, 14 maj 2003 - Në lagjen Mehaj në Prekaz të Skënderajt dje u shënua 22-vjetori i rënies heroike të Tahir e Nebih Mehës. Në këtë tubim përkujtimor ishin të pranishëm përfaqësues të institucioneve komunale të Skenderajt si edhe qytetarë të shumtë.

 

Për veprimtarinë patriotike të Tahir Mehës me këtë rast foli kolonel Zenun Kodra, i cili mes tjerash tha se lufta e Tahir Mehës ishte një vazhdimësi e luftës për liri, të cilën e bëri edhe komandanti legjendar Adem Jashari.

Për nder të Tahir Mehës u mbajtë dje edhe një akademi përkujtimore në Teatrin Kombëtar në Prishtinë.

 

 

Në Maqedoni fillon dhënia e dokumenteve në gjuhën shqipe

 

Shkup, 14 maj 2003 - Ministria e Punëve të Brendshme prej nesër do të fillojë dhënien e letërnjoftimeve edhe në gjuhën dhe alfabetin që e përdorin qytetarët të cilët flasin në gjuhën zyrtare që dallohet nga ajo maqedonase, bëri të ditur kjo Ministri.

Formularët për letërnjoftim do të jenë në dy gjuhë - maqedonisht dhe shqip.

Letërnjoftimet e reja janë pjesë e procesit të zbatimit të plotë të Marrëveshjes së Ohrit, në pajtim me ligjet e nxjerra dhe me ndryshimet kushtetuese - me Ligjin për ndryshimin dhe për plotësimin e Ligjit për letërnjoftimin.

Deri në fund të këtij viti parashihet që MPB-ja të vazhdojë, në mënyrë suksesive, zbatimin praktik të ndryshimeve të tjera ligjore lidhur me dhënien edhe të dukementeve të tjera personale në dy gjuhë - të pasaportave, të patentave dhe të lejave të qarkullimit dhe të të gjitha dokumenteve të tjera, njofton MIA në gjuhën shqipe.

 

 

Çoviq pas kthimit në Beograd tha se nuk do të ketë bashkëpunim me UNMIK-un

 

Beograd, 14 maj 2003 - Zëvendëskryeministri serb Nebojsha Çoviq, i cili e braktisi takimin e djeshëm në Prishtinë me kryeadministratorin Mihael Shtajner, pas kthimit në Beograd ritheksoi se nuk do të ketë bashkëpunim me UNMIK-un pa dorëzimin e Shefket Musliut.

 

Çoviq fajësoi UNMIK-un dhe Shtajnerin për mosrealizimin e Marrëveshjes për Mitrovicën. Ai tha se në takimin e djeshëm ka kundërshtuar edhe vendimin për privatizimin e pronës shoqërore në Kosovë.

 

 

Banorët shqiptarë të Malësisë së Tetovës pranuan që familjarët e policëve të vrarë maqedonas të bëjnë homazhe

 

Tetovë, 14 maj 2003 - Në Maqedoni përfundoi me kompromis takimi i përfaqësuesve ndërkombëtarë, ministrit të brendshëm të Maqedonisë dhe kryetarit të BDI-së me këshillin protestues të fshatrave të Malësisë së Tetovës. Banorët e këtyre rajoneve pranuan që familjarët e policëve të vrarë në vitin 2001 të bëjnë homazhe në varret e tyre.

Ministri i Brendshëm Hari Kostov tha se ende janë të freskta kujtimet e popullatës nga konflikti i kaluar dhe në mungesë të informatave ata i kanë bllokuar rrugët që të shtunën e kaluar. Nëse do të përdoreshin masat e dhunshme për hapjen e rrugës do të ndodheshin tensione dhe destabilizimi i gjendjes.

Ai bëri të ditur se ditëve të ardhshme anëtarët e familjeve të policëve të vrarë do të mund ta mund ta vizitojnë vendin e vrasjes së tyre.

Ndërkohë, Ali Ahmeti tha se të gjitha palët kishin mirëkuptim midis vete dhe konfirmoi atë që tha ministri i brendshëm Kostov para tij.

 

 

Filip Vujanoviq është shpallur edhe zyrtarisht fitues i zgjedhjeve presidenciale në Mal të Zi

 

Podgoricë, 14 maj 2003 - Filip Vujanoviqi është shpallur edhe zyrtarisht fitues i zgjedhjeve presidenciale në Mal të Zi pasi ka marrë rreth 60 për qind të votave. Vujanoviqi i cilësuar si kandidati pro-pavarësisë ka deklaruar pak pas komunikimit të rezultateve se pas tri vjetësh do të mbahet referendumi ku qytetarët do të vendosin nëse bashkësia Serbi-Mali i Zi do të ekzistojë apo jo.

 

 

Gregori Xhonson thotë se gjendja e sigurisë në Maqedoni është përmirësuar dukshëm

 

Shkup, 14 maj 2003 - Komandanti i forcave të NATO-s për Evropën Juglindore Gregori Xhonson, gjatë vizitës së tij të djeshme në Shkup, ka vlerësuar se gjendja e sigurisë në Maqedoni është përmirësuar dukshëm gjatë dy viteve të fundit.

Pas takimeve me zyrtarët maqedonas, komandanti Xhonson ka nënvizuar se po vazhdon puna për zbatimin e reformave në fushën e mbrojtjes në Maqedoni.

 

 

Tre serbë në Hagë për Srebrenicën

 

Hagë, 14 maj 2003 - Tre serbë të Bosnjës dalin të mërkurën para gjykatës së Hagës me akuzën se kanë marrë pjesë në masakrën e Srebrenicës të vitit 1995.

Dy prej tyre, Vladoje Blagojevic dhe Dragan Obrenoviq akuzohen për genocid për pjesëmarrje në vrasjet e mbi 7 mijë myslimanëve civilë.

Ata komandonin forcat e serbëve të Bosnjës që morrën Srebrenicën në kontroll në kohën kur ndodhi masakra. I akuzuari i tretë, Dragan Jokiq, përballet me akuza më të lehta për krime lufte.

Të tre të akuzuarit nuk i kanë pranuar akuzat ndaj tyre.

 

 

Futboll: Zhvillohen ndeshjet e kthimit të çerekfinales së Kupës së Kosovës

 

Prishtinë, 14 maj 2003 – Sot zhvillohen ndeshjet e kthimit të çerekfinales së Kupës së Kosovës në futboll. Përveq skuadrës së Gjilanit i cili qysh në takimin e parë para një jave kur mundi Drenicën me rezultat të thellë (5:0), pothuajse e ka siguruar plasmanin në gjysmëfinale, Prishtina dhe Liria e Prizrenin edhepse në ndeshjet e para kanë shënuar fitore minimale kundër Dritës së Gjilanit gjegjësisht KEK-ut, asgjë nuk kanë të sigurtë për t'u kualikuar në gjysmëfinale.

Takimi në Gjakovë ndërmjet Vëllaznimit dhe skuadrës nga Liga e Dytë e Kosovës, Shqiponjës nga Peja do të zhvillohet të mërkurën e ardhshme, më 21 maj.

Rezultatet e ndeshjeve të para të çerekfinales janë:

Drita – Prishtina (1:2)

KEK-u – Liria (0:1)

Drenica – Gjilani (0:5)

Vëllaznimi – Shqiponja (0:0)

Ndeshjet e kthimit të çerekfinales zhvillohen sot në ora 16.30.

 

 

Liga e Kampionëve: Milan është finalisti i parë

 

Milano, 14 maj 2003 – Mbrëmë në stadiumin e Interit në Milano ishin mbledhur rreth 80.000 shikues për ta përcjellë takimin e kthimit në mes të skuadrave lokale Inter dhe Milan. Edhepse Inter ndeshjen e zhvilloi si vendës dhe kishte një rezultat të favorshëm nga takimi i parë (0:0) megjithatë nuk arriti të kualifikohet në finale të Ligës së Kampionëve Evropian.

Edhe takimi i dytë mes këtyre dy skuadrave përfundoi me rezultat të barabartë 1:1 por pasi që Milan kishte shënuar gol si "mysafir" u kualifikua në finale. Golin për Milanin e shënoi Shevçenko në minutën e fundit të pjesës së parë, ndërkaq golin e barazimit për Interin e shënoi rezervisti Martins në minutën e 86 të takimit. Inter pas barazimit kishte edhe një rast shumë të mirë që të shënojë gol dhe të kualifikohet për finale por futbollisti me numër 3 Kalom nga një afëri nuk arriti që të shënoj.

Milan në finale të Ligës së Kampionëve do të takohet me fituesin e takimit Juventus – Real Madrid (1:2 – takimi parë) ndeshje kjo që zhvillohet sonte në orën 20.45.

 

 

Të pakten 10 persona janë vrarë në një sulm të ri vetëvrasës në Çeçeni

 

Moskë, 14 maj 2003 – Të pakten 10 persona janë vrarë sot (e merkurë) në një sulm të ri vetëvrasës me bombë në Çeçeninë kryengritëse, ka bërë të ditur Kremlini, njofton Rojter.

 

Zëdhënësja e zyrës së Kremlinit në Çeçeni ka thënë se sulmi ka ndodhur në qytetin Iliskhan, në lindje të kryeqytetit Grozni. Numri i të plagosurve ende nuk dihet, ka thënë ajo.

 

 

Nga një varrë masiv në pjesën qendrore të Irakut janë zhvarrosur sot eshtrat e 3, 000 trupave të pa jetë

 

Bagdad, 14 maj 2003 – Në pjesën qendrore të Irakut, fshatarët irakianë kanë zhvarrosur sot (e merkurë), një nga një, eshtrat e 3.000 trupave të pa jetë nga një varrë masiv. Ata dyshohet të jenë vrarë gjatë revoltës shite më 1991 kundër regjimit të Sadam Hyseinit, njofton AP.

 

Varreza masive ndodhet në një fshat, 60 milje në jug të Bagdadit. Kjo është varreza më e madhe që është zbuluar në Irak, qëkur forcat amerikane kanë përmbysur Sadamin dhe qeverinë e partisë së tij. Njoftohet se trupa të panumërt ende mbeten nën dhe.

 

 

Në një shpërthim në një gjykatë në Jemen është plagosur një gjykatës

 

Sana, 14 maj 2003 – Një gjykatës i Jemenit është plagosur sot (e mërkurë) në një shpërthim të vogël në një sallë të gjykatës, ku është dënuar me vdekje kësaj jave një burrë për vrasjen e një mjeku amerikan misionar dhe dy kolegëve të tij, njofton Rojter.

 

Shkalla e plagëve të gjykatësit ende nuk dihet, por dëshmitarët kanë thënë se shpërthimi i sotëm në provincën Eb, 105 mila në jug të kryeqytetit Sana, besohet të jetë shkaktuar nga një granatë dore. Koment zyrtar ende s’ka.

 

 

Është gjetur grupi prej 17 turistëve evropianë, të zhdukur në Algjeri dy muaj më parë

 

Berlin, 14 maj 2003 – Është gjetur një grup prej 17 turistëve evropianë, ndër të cilët 10 austriakë, 6 gjermanë dhe një suedez, të cilët qenë zhdukur në Algjeri dy muaj më parë, kanë bërë të ditur ministrat e jashtëm të këtyre vendeve, njofton Rojter.

 

Gjithsej 32 turistë evropianë qenë zhdukur para dy muajsh në një rajon të largët shkretëtire në jug të Algjerisë, i njohur për vendvarre antike.

 

 

Afër stacionit të trenit në Romë janë përplasur dy trena ndërurbanë

 

Romë, 14 maj 2003 – Dy trena ndërqytetorë janë përplasur sot në orët e hershme të mëngjesit (e mërkurë) afër stacionit Tiburtina të Romës kur ishin në shpejtësinë më të madhe. Në këtë aksident janë lënduar shumë njerëz, bën të ditur zëdhënsi i hekurudhave të Italisë, njofton Rojter.

 

Policia ka thënë se lokomativa dhe gjashtë vagona të njërit tren kanë dalë nga binarët. Ende nuk është e qartë për gjendjen e të lënduarve, në janë të lënduar rëndë apo vetëm lehtë.

 

 

Forcat izraelite kanë vrarë tre pjesëtarë të sigurimit palestinez

 

Gaza, 14 maj 2003 – Forcat izraelite në Rripin e Gazës kanë vrarë sot (e merkurë) në një shkëmbim zjarri tre pjesëtarë të sigurimit palestinez dhe kanë plagosur të pakten 20 veta në një sulm tjetër në një kamp të refugjatëve palestinezë, kanë bërë të ditur zyrtarët dhe dëshmitarët palestinezë, njofton Rojter.

 

Gjakderdhja, që pasoi sulmin me bomba mortaje kur u plagosën 10 ushtarë izraelitë, tregon se përpjekjet e reja amerikane për paqe pas luftës në Irak kanë pasur efekt të vogël në dhunën e përditshme të konfliktit izraelito-palestinez.

 

 

Në një minierë të Kinës humbën jetën 63 minatorë

 

Pekin, 14 maj 2003 - Nga shpërthimi i gazit në një minierë të thëngjillit në Kinën Jugore kanë humbur jetën të paktën 63 minatorë, ndërkaq për 23 të tjerë edhe më tutje gjurmohet, njoftuan sot në mëngjes (e mërkurë) autoritetet lokale.

Shpërthimi ka ndodhur të martën pasdite në minierën afër qytetit Hefei në provincën Anhui, rreth 1000 km në jug të Pekinit.

 

 

Bush tha se nuk çuditet po qe se Al-Kaida ka lidhje me shpërthimet në Arabinë Saudite

 

Uashington, 14 maj 2003 - Presidenti amerikan Bush thotë se nuk do të çuditej, po qe se zbulohej që terroristët e Al-Kaidës ishin autorë të shpërthimeve vetëvrasëse në Arabinë Saudite, nga të cilët humbën jetën të paktën 29 vetë. Presidenti Bush thotë se duhet të bëhen hetime të hollësishme, por e shpreh qartë se dyshon për lidhje të Al-Kaidës.

"Nuk mund të them ende me siguri se përgjegjëse për shpërthimet është Al-Kaida. Por nuk do të çuditesha po të ishte kështu".

Zoti Bush foli me gazetarët ndërkohë që po inspektonte zonat e dëmtuara nga një ciklon vdekjeprurës, që goditi qytetin Pirs në shtetin Misuri, javën e kaluar.

 

 

Hamnei: Rivendosja e lidhjeve me Amerikën do të ishte kapitullim i plotë për Iranin

 

Teheran, 14 maj 2003 - Udhëheqësi suprem i Iranit, Ajatollah Ali Hamnei, tha se rivendosja e marrëdhënieve me Shtetet e Bashkuara do të ishte një kapitullim i plotë nga ana e Iranit.

Të hënën, në një fjalim para studentëve në Teheran, Ajatollah Hamnei kritikoi ashpër reformistët iranianë që kërkojnë marrëdhënie më të mira me Amerikën, në mënyrë të veçantë pas fitores së shpejtë të koalicionit të udhëhequr nga Shtetet e Bashkuara në Irak.

 

 

Amerika dëbon 14 diplomatë kubanë

 

Uashington, 14 maj 2003 - Shtetet e Bashkuara urdhëruan dëbimin e 14 diplomatëve kubanë, duke përfshirë shtatë që punonin në misionin e Kubës pranë Kombeve të Bashkuara.

 

Një zyrtar amerikan tha se diplomatët kubanë po dëbohen sepse merreshin me veprimtari që konsiderohen të dëmshme për Shtetet e Bashkuara - terminologji diplomatike kjo që zakonisht nënkupton spiunazhin.

Shtatë diplomatët e tjerë punojnë në Seksionin e Interesave Kubane në Uashington. Dëbimet bëhen në atmosferën e keqësimit të marrëdhënieve midis Uashingtonit dhe Havanës.

 

 

Diplomatët amerikanë lënë Riadin

 

Riad, 14 maj 2003 - Departamenti amerikan i Shtetit ka urdhëruar familjet e diplomatëve dhe stafin dytësor të ambasadës amerikane në Arabinë Saudite, që të largohen nga vendi, pas sulmeve të të hënës që lanë të paktën 29 të vrarë.

Po ashtu, shtetasit amerikanë janë këshilluar që të largohen nga vendi pas sulmeve të të hënës në tre zonat rezidenciale të Riadit të banuara nga perëndimorë.

Ndërkohë, FBI po dërgon një ekip agjentësh në Arabi Saudite për të ndihmuar në hetimin e sulmeve vetëvrasëse .

 

 

Zbulohet varrezë masive me 15 mijë trupa

 

Bagdad, 14 maj 2003 - Eshtrat e rreth 10-15 mijë personave janë nxjerrë në jug të Bagdadit pranë qytetit Hila. Vullnetarë vendas thanë se më shumë se tre mijë trupa janë nxjerrë deri më tani. Ata shihnin nga njëra anë e gropës së hapur kur eksavatori nxirrte të vdekurit.

Irakianë që kishin pritur për më shumë se një dekadë për një fjalë nga të dashurit e tyre gërrmonin tokën me duart e tyre duke gjetur katër - pesë trupa në çdo grumbull dheu. Disa kishin plagë plumbi në kokë. Disa ishin varur. disa ishin gra dhe fëmijë. Shumë prej tyre ende kishin karta identifikimi.

 

 

Amerika paralajmëron për padinë kundër Frenks

 

Uashington, 14 maj 2003 - Ushtria amerikane ka paralajmëruar Belgjikën për pasojat e dëmshme që mund të ketë ngritja e padisë në Bruksel kundër komandantit të forcave amerikane në Irak.

Një avokat belg ka deklaruar se ai do të ngrejë padi të mërkurën kundër gjeneralit amerikan Tomi Frenks në emër të 19 irakjanëve që pretendohet se janë viktima të veprimeve ushtarake amerikane.

Shefi i Shtabit të Ushtrisë Amerikane, Gjen. Riçard Majers, tha se kjo çështje mund të ndikojë në disa takime të rëndësishme të NATO-s që e ka selinë pikërisht në Bruksel.

Gjen. Majers tha se qeveria amerikane e vlerëson situatën si shumë serioze.

Padia ndaj gjen. Frenks, do të ngrihet në bazë të një ligji belg që lejon ngritjen e padive në Belgjikë pavarësisht nga vendi se ku janë kryer krimet për të cilat bëhet fjalë në padi.

 

 

Parlamenti Evropian për mbrojtjen e mjedisit

 

Bruksel, 14 maj 2003 - Parlamenti evropian do të votojë të mërkurën për disa masa të reja, sipas të cilave, kompanitë që shkaktojnë dëmtimin e mjedisit, do të paguajnë për këtë.

Deri tani janë propozuar dy versione të këtyre masave.

Njëri prej versioneve është mbështetur nga disa kompani dhe grupe të mbrojtjes së mjedisit.

Pasi legjislacioni në fjalë të votohet në Parlamentin Evropian, ai do të dikutohet edhe nga qeveritë e vendeve të Bashkimit Evropian.

 

 

Menem mund të braktisë zgjedhjet

 

Buenos Ajres, 14 maj 2003 - Njoftohet se ish-presidenti i Argjentinës, Karlos Menem është gati të lërë garën presidenciale para zgjedhjeve të së dielës.

I gjithë spekulimi bazohet në deklarata të ndihmësve të z. Menemit që thonë se ai do të largohet nga gara zgjedhore.

Shumica e figurave të larta në kampin e ish-presidentit po takohen në selinë e tij në Buenos Aires duke pritur një deklaratë zyrtare.

Nëse njoftimet janë të vërteta, atëherë rivali i tij Nestor Kirshner, automatikisht mund të shpallet president.

Copyright©2000-2003 Trepca.net - Të gjitha të  drejtat e rezervuara.