Lajme

E marte, 13 maj 2003

Përmbajtja:

• Dështojnë bisedimet mes UNMIK-ut e Beogradit, Çoviq braktis takimin

• Shtajner shpall të ligjshme rregulloren mbi të drejtën për shfrytëzimin e tokës

• Nxirret për shqyrtim para Kuvendit rezoluta për njohjen e vlerave të luftës çlirimtare të popullit të Kosovës

• Programi kompjuterik për drejtshkrimin shqip ka hyrë në fazën finale

• Malsore Gashi kryetare e re e Degës IV të FR të LDK-së në Prishtinë

• Komandanti i NATO-së për Evropën Juglindore Xhonson ka shfaqur kënaqësinë me përparimin e arritur në Kosovë

• UNMIK-u kundërshton idenë e ministrit të jashtëm serbo-malazez për territorializimin e Kosovës

• Shqetësime të panevojshme të Ombudspersonit Novicki rreth fondit librar në gjuhën serbe në Gjilan

• Nesër e pasnesër pritet kohë me shi dhe rënie të temperaturës

• Ombudsersoni i Kosovës sot shkon në Beograd

• Kryetari i Kuvendit komunal të Prishtinës është kërcënuar nga Armata Kombëtare Shqiptare

• Paqeruajtësit rusë tërhiqen nga Ballkani deri më 1 gusht

• Qytetarët e Kosovës me kartona të gjelbër filluan të hyjnë në Maqedoni

• Sipas një hulumtimi, qytetarët e Kosovs kanë besim të madh në qeveritë lokale

• Dokumentari "Jeta normale" me temë për fëmijët e Kosovës mori Çmimin më të lartë

• Tiranë: Kreu i opozitës shqiptare dhe një grup gazetarësh kanë kërkuar një debat për lirinë e shtypit

• Sipas Nanos, 'Ligji i luftës' me Greqinë është abroguar

• Ministri i brendshëm maqedonas takohet me përfaqësues të bashkësive vendore të tri fshtarave të Tetovës

• Më 22 dhe 23 maj të këtij viti do të mbahet në Ohër konferenca ndërkombëtare e vendeve të rajonit

• Tiranë: Qeveria përpiqet të rifillojnë bisedimet me ish të përndjekurit politikë

• Sipas Çoviqit vendimi i Shtajnerit për shfrytëzimin e tokës është edhe një provokim për Beogradin

• Ministri i Mbrojtjes Pandeli Majko ka arritur në një vizitë zyrtare në Shtetet e Bashkuara të Amerikës

• Njoftohet për 29 veta të vrarë në Riad

• Vetëvrasësit me bomba në Riad mund të kenë vrarë deri në 10 persona dhe të kenë plagosur mbi 160 të tjerë

• Ekspertja irakiane e armëve biologjike iu dorëzua amerikanëve

• Është zbuluar një varrezë masive në Basra

• Franca përballet me protesta

• Pauell i dha fund turneut në Lindjen e Mesme

• KS debaton rreth situatës në Kongo

• Ushtarët amerikanë kanë zbuluar në Irak një laborator

• Presidenti Bush do të vizitojë sot me helikopter dhe këmbë rajonet e goditura rëndë nga stuhitë

• SHBA-të nuk planifikojnë të rishkruajnë ose të rinogociojnë projektplanin për paqen në Lindjen e Mesme

Dështojnë bisedimet mes UNMIK-ut e Beogradit, Çoviq braktis takimin

 

Prishtinë, 13 maj 2003 - Ka dështuar takimi i sotëm në Prishtinë ndërmjet autoriteteve të UNMIK-ut dhe atyre të Beogradit. Shtajner tha para mediave se nuk është nënshrkuar as protokolli për njohjen e targave të Kosovës në territorin e Serbisë.

 

Çoviq pa përfunduar takimi ka braktisur sallën në shenjë revolte për shkak se UNMIK-u ka refuzuar t'ia dorëzojë Serbisë ish- udhëheqësin e UÇPMB-së Shefqet Musliun.

 

Gjithashtu Çoviq i revoltuar ka thënë se nuk do të ketë bisedime me UNMIK-un pa u përmbushur kushti që kërkon Beogradi - pra Shefqet Musliu t'i dorëzohet organeve serbe.

Bëhet e ditur se Çoviq ka pasur vërejtje edhe për rregulloren e UNMIK-ut për rregullimin e tokës.

 

 

Shtajner shpall të ligjshme rregulloren mbi të drejtën për shfrytëzimin e tokës

 

Prishtinë, 13 maj 2003 - Kryeadministratori i Kosovës Mihael Shtajner ka shpallur të ligjshme rregulloren mbi të drejtën për shfrytëzimin e tokës. Me këtë rregullore janë kapërcyer pengesat e fundit ligjore për fillimin e privatizimit të ndërmarrjeve shoqërore në Kosovë.

 

Ndërkohë ky ligj ka udhëtuar edhe në Nju-Jork në zyrën ligjore të OKB-së për t'u shqyrtuar ku edhe ka marrë pëlqimin për t'u nënshkruar.

Rregullorja për të drejtën e shfrytëzimit të tokës është diskutuar gjerësisht në Kosovë ndërmjet qeverisë dhe aksionerëve të ndërmarrjeve derisa është rënë dakord për fillimin e procesit të privatizimit.

Ftesat për tenderë për gjashtë ndërmarrje të para tashmë të parapara për privatizim nga Bordi i Agjencionit Kosovar të Mirëbesimit do të shpallen së shpejti, tha kreu i UNMIK-ut Shtajner.

 

Nëpërmjet transformimit të së drejtës për shfrytëzimin e tokës në pasuri të llojit të pronësisë kjo rregullore do ta ngrisë në masë të madhe vlerën e ndërmarrjeve shoqërore që do të privatizohet dhe në këtë mënyrë do të kontribuohet edhe në zhvillimin e ekonomisë së Kosovës.

Një pjesë e të ardhurave të shitjes nga privatizimi do t'u shpërndahet punëtorëve të ndërmarrjeve shoqërore të privatizuara dhe kjo shumë do të arrijë në 20 për qind të ofertave të paguara.

 

 

Nxirret për shqyrtim para Kuvendit rezoluta për njohjen e vlerave të luftës çlirimtare të popullit të Kosovës

 

Prishtinë, 13 maj 2003 - Kryesia e Kuvendit të Kosovës, në mbledhjen e saj të rregullt ka konfirmuar rendin e ditës për seancën e 15 majit dhe ka përcaktuar rendin e punës për seancën e 22 majit.

Kryesia ka vendosur që për këtë të enjte ta nxjerrë për miratim para deputetëve Rezolutën për njohjen e vlerave të luftës çlirimtare të popullit të Kosovës për liri dhe pavarësi.

 

Në mbledhje është thënë se rezoluta ka gjetur mbështetjen e shumicës së grupeve parlamentare në Kuvendin e Kosovës, se teksti i ri i rezolutës është më përcaktues dhe eviton dykuptueshmërinë e mesazheve që sjell. Gjithashtu u tha se gjatë dy ditëve të ardhshme shefat e grupeve parlamentare mund ta harmonizojnë edhe më tekstin e rezolutës.

Në këtë seancë do të shqyrtohet për herë të dytë projektligji për kooperativat bujqësore si dhe rekomandimet e Këshillit Gjyqësor dhe Prokurorial të Kosovës për emërimin e gjyqëtarëve.

Kryesia e Kuvendit të Kosovës, ndërkaq, nuk e ka mbështetur mocionin e Grupit parlamentar "Kthimi" lidhur me amendamentet e miratuara më 8 maj në Ligjin për tregtinë me Jashtë, në Ligjin për telekomuinikacionin dhe në Ligjin për Menaxhimin e Financave Publike dhe Pëlrgjegjësitë.

Kryesia, nën pikën e rendit të ditës “të ndryshme” ka debatuar edhe lidhur me incidentin ndërmjet deputetëve Fadil Geci e Gani Koci. Është thënë se kryetari i Kuvendit i ka marrë masat që parashihen me rregulloren e punës së Kuvendit dhe është uruar që raste të tilla që e ulin prestigjin e organit legjislativ të Kosovës, të mos përseriten në të artdhmen.

 

  

Programi kompjuterik për drejtshkrimin shqip ka hyrë në fazën finale

 

Prishtinë, 13 maj 2003 - Programi kompjuterik për drejtshkrimin shqip ka hyrë në fazën finale. Qendra për Edukim dhe Përparim paralajmëroi se projekti "Gjuha shqipe dhe kompjuteri" do t'i dorëzohet më 15 korrik Ministrisë së Shërbimeve Publike të Kosovës. Ky program është përgatitur nga një grup të rinjësh.

 

Me këtë ata synojnë të krijojnë programin për drejtshkrim sikur te disa gjuhë të mëdha botërore.

Drejtori i Qendrës për Edukim dhe Përparim Lulëzim Shishani thotë se programi do t'i dorëzohet për përdorim së pari Ministrisë së Shërbimeve Publike në mënyrë që të evitohen gabimet drejtëshkrimore në shkresat zyrtare. Programi ka thënë ai do të përfshijë 2 milionë trajta të ndryshme.

Programi përfshin leksikun e shqipës së sotme, fjalorin e shprehjeve të huaja, emrat gjeografikë të Shqipërisë dhe të Kosovës, emrat e njerëzve, fjalorët terminologjikë, fjalorin e gjeologjisë, fjalorin e termave të ekonomisë, të transportit, fjalorin e pedagogjisë, fjalorin e mekanikës.

Ky program është realizuar me ndihmën dhe bashkëpunimin e Institutit të Gjuhësisë dhe Letërisë në Tiranë dhe me ekspertë e gjuhësisë nga Kosova.

 

 

Malsore Gashi kryetare e re e Degës IV të FR të LDK-së në Prishtinë

 

Prishtinë, 13 maj 2003 - Me pjesëmarrjen e 45 delegatëve dhe të mysafirëve dje u mbajt Kuvendi i Pestë Zgjedhor i Degës IV të Forumit të Rinisë të LDK-së. Kuvendin e përshëndetën Sejdë Tolaj, nënkryetar i FR të LDK-së dhe Shasivar Sadiku, kryetar i degës IV të LDK-së, të cilët vlerësuan rolin dhe kontributin e jashtëzakonshëm të të rinjve të cilët gjithmonë u dëshmuan si shtylla më e fortë e LDK-së.

 

Në Kuvend u paraqit raporti i punës dyvjeçare, i cili u miratua unanimisht nga delegatët e pranishëm. Në fund të punimeve të Kuvendit nga lista me më shumë kandidat, me vota të fshehta u zgjodh kryesia e re 11 anëtarëshe.

 

Kryetare e re u zgjodh juristja Malsore Gashi, nënkryetarë u zgjodhën Korab Goçi dhe Mirand Tafarshiku, ndërsa sekretare e përgjithshme u zgjodh Adelina Selimi. Kuvendi zgjodhi edhe 7 delegat për Kuvendin qendror të FR të LDK-së.

 

 

Komandanti i NATO-së për Evropën Juglindore Xhonson ka shfaqur kënaqësinë me përparimin e arritur në Kosovë

 

Prishtinë, 13 maj 2003 - Komandanti i forcave për Evropën Juglindore Gregori Xhonson ka qëndruar dje në Kosovë. Ai në një takim me shefin e UNMIK-ut Mihael Shtajner ka diskutuar rreth çështjeve të sigurisë, si dhe për zhvillimet e fundit në Kosovë dhe në rajon.

Komandanti i NATO-s për Evropën Juglindore, Gregori Xhonson ka shfaqur kënaqësinë me përparimin e arritur në Kosovë. Megjithatë ai nuk deshi të spekulonte se kur do të mund të largoheshin trupat ndërkombëtare nga Kosova.

 

 

UNMIK-u kundërshton idenë e ministrit të jashtëm serbo-malazez për territorializimin e Kosovës

 

Prishtinë, 13 maj 2003 - Përfaqësuesit e UNMIK-ut nuk do të pranojnë kurrëfarë idesh që do të ishin në kundërshtim me parimet për Kosovën e integruar. Këto komente u bënë pas deklaratave të ministrit të jashtëm të Unionit Serbi - Mali i Zi, Zoran Svillanoviq, i cili ka propozuar "territorializim të pranisë serbe në Kosovë".

Zëdhënësja e Misionit të UNMIK-ut Izabela Karlovic citohet të ketë thënë se pozicioni i UNMIK-ut është i qartë: pavarësisht nga propozimet teorike statusi i Kosovës do të përcaktohet në KS të OKB-së dhe se çdo ide sikurse ajo e ministrit Svillanoviq është kundër parimeve të tilla. Në Kosovë nuk do të pranohen kurrëfarë organizimesh njëetnike, ka theksuar kjo zëdhënëse e UNMIK-ut.

Edhe zëdhënësi tjetër i UNMIK-ut Sunil Narula tha se nuk është punë e UNMIK-ut apo dikujt në Beograd që të vendosë për ndonjë model në Kosovë. "Ne duam një Kosovë të bashkuar dhe nëse shikoni komentet që vijnë nga kryeqytetet perëndimore mund të shihni se ata përkrahin qartë qëndrimin e UNMIK-ut për këtë çështje", tha Narula.

 

 

Shqetësime të panevojshme të Ombudspersonit Novicki rreth fondit librar në gjuhën serbe në Gjilan

 

Gjilan, 13 maj 2003 - Duke iu referuar ankesave nga pala serbe për kinse agjësimin e fondit librar në gjuhën serbe në bibliotekën e Gjilanit, ombudspersoni Marek Novicki, përmes një letre i ka shprehur mospajtimet e tij te Drejtoria për kulturë e kësaj komune.

Në përgjegjen e Drejtorisë për z. Novikci thuhet se nuk ka arsye për shqetësime, sepse shkrimet në mediat serbe për kinse shkatërrimin e librave në këtë gjuhë janë vetëm shpifje.

Biblioteka e qytetit "Fan Noli" në Gjilan, sikur edhe të gjitha bibliotekat tjera regjionale në Kosovë, nga data 15 qershor - 25 korrik 2002, ka punuar në përpunimin, klasifikimin, formimin e fondeve rezervë si dhe çregjistrimin e librave të dëmtuara, sipas projektit të përbashkët të Ministrisë për Kulturë, Rini, Sporte dhe Çështje Jorezidente dhe UNMIK-ut.

Fjala është për çregjistrimin e librave të dëmtuara e të grisura, proces ky që është bërë në mbështetje të normave mbi pasurimin dhe spastrimin e fondit librar, sipas standardeve profesionale botërore nga veprimtaria bibliotekare.

Përdorimi i materialeve referative të vjetra mund t'i japë përdoruesit informacion të papërshtatshëm. Prandaj, këtij procesi u janë nënshtruar njësoj edhe librat në gjuhën shqipe e turke.

 

 

Nesër e pasnesër pritet kohë me shi dhe rënie të temperaturës

 

Prishtinë, 13 maj 2003 - Pas vapës së madhe që po mbretëron prej shumë ditësh në rajonin e Evropës Juglinodre, meteorologët parashikojnë freskim dyditësh të kohës, të shoqëruar me shi dhe bubullima.

 

Nesër pasdite pritet kohë me vranësira dhe me shi, e cila do të ulë temperaturën. Kohë e ngjashme do të jetë edhe të enjtën, me vranësira të kohëpaskohshme. Por të premtën sërish do të jetë mot me diell dhe i thatë.

Dje në mesditë në disa pjesë të Kosovës ra shi i dobët, por që fare nuk ndikoi në uljen e temperaturës.

 

 

Ombudsersoni i Kosovës sot shkon në Beograd

 

Prishtinë, 13 maj 2003 - Z. Marek Antoni Nowicki, Ombudspersoni i Kosovës filloi sot vizitën triditore në Beograd, së bashku me zëvendësin e tij, Lubinko Todoroviq.

Gjatë kësaj vizite, Ombudspersoni do të takohet me zyrtarët më të lartë të Unionit serbo-malazez.
Qëllimi i kësaj vizite është takimi me udhëheqjen e re të Unionit SM dhe informimi mbi të drejtat e njeriut në Kosovë në kontekst të zhvillimeve politike në Ballkan, si dhe në kontekst të integrimit në Evropë.

 

 

Kryetari i Kuvendit komunal të Prishtinës është kërcënuar nga Armata Kombëtare Shqiptare

 

Prishtinë, 13 maj 2003 - Kryetari i Kuvendit komunal të Prishtinës Ismet Beqiri të shtunën në një pliko ka marrë një kërcënim nga Armata Kombëtare Shqiptare. Ai e ka konfirmuar këtë para gazetarëve duke thënë:

 

"Ditën e shtunë në një pliko më ka ardhë një shkresë, të cilën në emër të AKSH-së e ka nënshkruar komandant Rrapi. Pavarësisht nga ky kërcënim, unë do të vazhdoj të punoj për interesat e qytetarëve të Prishtinës deri në maksimum", ka thënë z. Beqiri.

 

 

Paqeruajtësit rusë tërhiqen nga Ballkani deri më 1 gusht

 

Moskë, 13 maj 2003 - Minsitri rus i Mbrojtjes Sergej Ivanov deklaroi sot se Rusia në periudhën prej gjysmës së majit e deri më 1 gusht të do të tërheqë kontigjentin e saj nga përbërja e forcave paqeruajtëse në Bosnjë e në Kosovë.

Ivanov në takimin e Këshillit Rusi-NATO, që ka filluar sot në Moskë, saktësoi se ushtarakët dhe teknika do të tërhiqen me tren dhe me aeroplanë transportues.

 

 

Qytetarët e Kosovës me kartona të gjelbër filluan të hyjnë në Maqedoni

 

Hani i Elezit, 13 maj 2003 - Në bazë të Memorandumit për njohjen e ndërsjellë të qarkullimti të lirë të automjeteve ndërmjet Kosovës e Maqedonisë, që nga mesnata qytetarët e dy vendeve tani e tutje me kartona të gjelbër mund të hynë pa paguar sigurimin e domosdoshëm për autopërgjegjësinë.

Sipas njoftimeve nga Shkupi, gjatë ditës së sotme shumë qytetarë të Kosovës me automjetet e tyre kanë mundur të hynë në Maqedoni vetëm me kartona të gjelbër.

Pas Shqipërisë, Maqedonia është vendi i dytë me të cilin Kosova ka nënshkruar një memorandum të tillë.

 

 

Sipas një hulumtimi, qytetarët e Kosovs kanë besim të madh në qeveritë lokale

 

Prishtinë, 13 maj 2003 - Qytetarët e Kosovs kanë besim të madh në qeveritë lokale. Ky është rezultat që ka dalë nga një hulumtim i UNDP me rreth 6 mijë qytetarë në të gjitha komunat e Kosovës.

Por qytetarët presin të realizojnë detyrat e veta gjatë muajve dhe viteve të ardhshme. 73 për qind e dinë se cili është kryetari i komunës së tyre.

Shefi i zyrës së UNDP për Kosovë Robert Fajfer tha se këto të dhëna janë mjaft inkurajuese dhe se ky është një rezultat i mirë krahasuar edhe me vendet e zhvilluara, ku shkalla e demokracisë është e lartë.

Ndërkaq për shërbimet publike qytetarët janë shprehur ndryshe. Ndërsa shërbimet emergjente, ambulancat, shkollat dhe shërbimet e zjarrfikësve janë vlerësuar lart nga qytetarët, ndërkaq për energjinë elektrike, pensionet dhe mirëmbajtjen e rrugëve ata kanë kanë dhënë vlerësim të dobët.

 

 

Dokumentari "Jeta normale" me temë për fëmijët e Kosovës mori Çmimin më të lartë

 

Nju Jork, 13 maj 2003 – Në festivalin e filmit "Trebeca" të Nju Jorkut, bashkëthemelues i të cilit është aktori i njohur Robert de Niro, çmimin më të lartë e për film dokumentar e kanë fituar autorët Elizabet Çei Vasarheli dhe Hugo Berkeli me dokumentarin "Jeta normale" ("A Normal Life"), i cili ka për temë zhvendosjen e fëmijëve të Kosovës gjatë luftës së fundit, njofton bashkëpunëtori ynë nga Nju Jorku.

 

 

Tiranë: Kreu i opozitës shqiptare dhe një grup gazetarësh kanë kërkuar një debat për lirinë e shtypit

 

Tiranë, 13 maj 2003 - Lideri i Partisë Demokratike Sali Berisha kërkoi një debat në Parlamentin e Shqipërisë lidhur me lirinë e shtypit. Sipas z. Berisha shtypi i pavarur po kërcënohet nga presioni i qeverisë e cila po e vë atë përballë alternativës së falimentimit apo të nënshtrimit.

Të njëjtin shqetësim ka shprehur edhe një grup gazetarësh të pavarur, të cilët apelojnë për të ruajtur të drejtën e informimit të publikut në kushtet kur qeveria aktuale po bënë presione për të kufizuar informacionin mbi veprimtarinë e qeverisë me pasqyrimin e jetës politike në vend.

 

 

Sipas Nanos, 'Ligji i luftës' me Greqinë është abroguar

 

Tiranë, 13 maj 2003 - Kryeministri shqiptar Fatos Nano ka konfrimuar se i ashtuquajturi 'Ligj i luftës' ndërmjet Shqipërisë dhe Greqisë është abroguar me nënshkrimin e Traktatit të Miqësisë midis të dy vendeve.

Duke folur në një seancë parlamentare të kërkuar nga opozita pas paqartësive nëse ekzistonte ende ligji, Fatos Nano tha se kjo i ishte konfirmuar atij edhe nga kryeministri grek Kostas Simitis gjatë një takimi të fundit.

"Kryeministri Simitis rikonfirmoi se çështja e ligjit të luftës me Shqipërinë politikisht dhe juridikisht përfundimisht është mbyllur me Traktatin e Miqësisë dhe të bashkëpunimit të ratifikuar nga të dy parlamentet, ai i Greqisë dhe i Shqipërisë, duke i dhënë fund në mënyrë ligjore këtij kazusi," tha kryeministri shqiptar duke ju referuar traktatit të arritur në vitin 1996, njofton BBC.

Mirëpo, sipas udhëheqësit të opozitës Sali Berisha se "nuk ekziston një situatë lufte me Greqinë, kjo është jorealiste".

"Traktati i Miqësisë parashikon bashkëpunimin e gjithanshëm, përfshirë bashkëpunimin ushtarak midis të dy vendeve," tha ai.

Lideri i opozitës e akuzoi qeverinë socialiste se nuk ka bërë sa duhet për zgjidhjen e këtyre çështjeve në rrugë institucionale.

 

 

Ministri i brendshëm maqedonas takohet me përfaqësues të bashkësive vendore të tri fshtarave të Tetovës

 

Shkup, 13 maj 2003 - Ministri i Punëve të Brendshme i Maqedonisë Hari Kosov, ambasadori amerikan Lorens Batler, përfaqësues të OSBE-së, të Bashkimit Evropian dhe të misionit "Konkordia" prej paraditës po qëndrojnë në fshatin Sellcë të Malit Sharr.

Siç njofton MIA në gjuhën shqipe, në shkollën fillore "Rilindja" janë duke mbajtur mbledhje me përfaqësuesit e bashkësive vendore të Vijcës, të Sellcës dhe Llacës në të cilën merr pjesë edhe lideri i BDI-së, Ali Ahmeti.

Temë e takimit janë çështjet që kanë të bëjnë me bllokimin e së shtunës me të cilën u parandalua ardhja e familjarëve dhe e miqve nga Manastiri dhe nga viset e tjera të vendit të cilët dëshironin ta vizitonin vendin ku para dy vitesh u vranë tetë pjesëtarë të forcave maqedonase të sigurimit dhe të njëjtëve t'u bëjnë homazh

 

 

Më 22 dhe 23 maj të këtij viti do të mbahet në Ohër konferenca ndërkombëtare e vendeve të rajonit

 

Shkup, 13 maj 2003 - Qeveria maqedonase edhe zyrtarisht ka njoftuar se më 22 dhe 23 maj të këtij viti do të mbahet në Ohër një konferencë ndërkombëtare e vendeve të rajonit.

 

Në këtë konferencë, ku do të marrin pjesë kryaeministrat dhe ministrat e mbrotjes dhe punëve të brendshme të vendeve të rajonit, për herë të parë pritet të marrë pjesë edhe kryeministri i Kosovës Bajaram Rexhepi, ku do të takohet me homologët e tij të vendeve të rajonit.

Në këtë konferencë, Pakti i Stabilitetit në bashkëpunim me NATO-n, OSBE-ja dhe BE do t'i obligojnë shtetet e rajonit të Ballkanit që t'i hapin kufijtë sipas standardeve evropiane dhe t'i menjanojnë dallimet dhe mosmarrëveshjet ndërkufitare.

 

Po kështu pritet që të merret vendim që deri në vitin 2005 kontrolli i kufijve nga ushtritë të kalojë në duart e policisë.

 

 

Tiranë: Qeveria përpiqet të rifillojnë bisedimet me ish të përndjekurit politikë

 

Tiranë, 13 maj 2003 - Përfaqësues të qeverisë në Tiranë thonë se po përpiqen që të vazhdojnë bisedimet me ish të përndjekurit politikë për kompensimet e tyre financiare. Sipas llogaritjeve në bazë të një projektligji, bëhet fjalë për një shumë prej mbi 1 miliardë e gjysëm dollarësh, e cila vlerësohet si tepër e madhe për ekonominë e brishtë të Shqipërisë.

 

 

Sipas Çoviqit vendimi i Shtajnerit për shfrytëzimin e tokës është edhe një provokim për Beogradin

 

Beograd, 13 maj 2003 - Duke komentuar vendimin e kryeadministratorit të Kosovës për shfrytëzimin e tokës, zëvendëskryeministri serb Nebojsha Çoviq citohet të ketë thënë se ky vendim paraqet plaçkitjen e pronës shoqërore.

 

"Ky është edhe një provokim ndaj Beogradit, i cili nuk është konsultuar fare për këtë vendim", tha Çoviq, duke shtuar se kjo do të jetë një prej çështjeve të para të cilën do ta shtrojë në takimin e delegacionit serb me Shtajnerin, që pritet të zhvillohet sot në Prishtinë.

 

 

Ministri i Mbrojtjes Pandeli Majko ka arritur në një vizitë zyrtare në Shtetet e Bashkuara të Amerikës

 

Uashington, 13 maj 2003 - Ministri i Mbrojtjes Pandeli Majko ka udhëtuar dje në një vizitë pune në Shtetet e Bashkuara të Amerikës. Ai e filloi vizitën me një takim me gazetarë dhe ekspertë të Ballkanit në qendrën ndërkombëtare "Udro Uillson" në Ushington ku foli për përpjekjet e Shqipëris për t'u integruar në strukturat evroatlantike.

 

Gjatë vizitës në SHBA ministri Majko do të takohet me zyrtarë të lartë të Departamentit amerikan të Mbrojtjes për të biseduar rreth përparimeve që ka bërë Shqipëria drejt reformimit të forcave të saj të armatosura.

 

 

Njoftohet për 29 veta të vrarë në Riad

 

Riad, 13 maj 2003 - Arabia Saudite ka thënë se 29 veta, përfshirë 7 amerikanë dhe 9 bombëhedhës të dyshimtë, javë vrarë në tri sulmet vetëvrasëse që kanë ndodhur në Riad të hënën mbrëma. Thuhet se 194 persona janë lënduar nga shpërthimet e njëpasnjëshme të autobombave, njofton Rojter.

 

 

Vetëvrasësit me bomba në Riad mund të kenë vrarë deri në 10 persona dhe të kenë plagosur mbi 160 të tjerë

 

Riad, 13 maj 2003 – Vetëvrasësit me bomba mund të kenë vrarë deri në 10 persona dhe të kenë plagosur mbi 160 amerikanë dhe shtetas të tjerë në tri sulmet e mbrëmshme vetëvraswse në kompleksin e të huajve në Riad, kanë bërë të ditur diplomatët në Arabinë Saudite, njofton Rojter.

Sekretari amerikan i Shtetit, Kolin Pauell, i cili fluturoi me aeroplan nga Jordani në kryeqytetin saudit vetëm disa orë pas bombardimit, ka thënë se sulmet më të fundit antiperendimore në vendlindjen e islamit mbajnë vulën e al Kaidës dhe të liderit të saj Osama bin Laden, të lindur në Arabinë Saudite.

 

 

Ekspertja irakiane e armëve biologjike iu dorëzua amerikanëve

 

Bagdad, 13 maj 2003 - Zyrtarë amerikanë në Bagdad pohuan se një eksperte irakiane e armëve biologjike mbahet nga autoritetet amerikane. Një zëdhënës i Komandës Qendrore amerikane u tha gazetarëve se Doktoresha Rihab Rashid Taha, u dorëzua vullnetarisht pas negociatave rreth kushteve të dorëzimit.

Zonjës Taha i ishte dhënë nofka Doktresha Mikrobi për punën e saj për krijimin e antraksit të cilësisë së armëve dhe mendohet të ketë informacion që mund të ndihmojë procesin e vazhdueshëm të kërkimit për armë të shkatërrimit në masë brenda Irakut.

 

 

Është zbuluar një varrezë masive në Basra

 

Basra, 13 maj 2003 - Një varrezë masive është zbuluar në qytetin jugor të Irakut në Basra. Zyrtarët e një xhamie në qytet thonë se kanë zbuluar eshtrat e njëqind e njëzet e gjashtë personave.

Vetëm dymbëdhjetë trupa janë identifikuar deri tashti. Zyrtarët e xhamisë thanë se tre janë pushkatuar në të njëjtën kohë me një klerik me ndikim në vitin 1999.

 

Ata ishin së bashku me klerikun, Mohhamed Sadeq al Sadr, i cili u nderua si martir nga miliona shiitë të Irakut. Besohet se ai u ekzekutua për shkak të kundërshtimeve ndaj Saddam Husseinit.

Kjo varrezë masive duket se është e re dhe jo prej luftës Iran-Irak të viteve 1980.

 

 

Franca përballet me protesta

 

Paris, 13 maj 2003 - Punonjësit francezë të sektorit publik sot mbajnë një grevë të përgjithshme në shenjë proteste ndaj reformave të planifikuara në sistemin pensionist.

Një e katërta e punëtorëve francezë janë të punësuar në sektorin publik dhe ndalimi i punës do të mbyllë shkollat, spitalet, do të pengojë linjat e transportit dhe zyrat qeveritare gjithandej vendit.

Një demonstratë e madhe është paralajmëruar të zhvillohet në Paris.

 

 

Pauell i dha fund turneut në Lindjen e Mesme

 

Uashington, 13 maj 2003 - Sekretari amerikan i Shtetit, Kolin Pauell e përfundoi turneun e tij në Lindjen e Mesme me vizitën në Arabinë Saudite, kryeqyteti i të cilës u trondit të martën nga disa shpërthime.

Zoti Pauell qëndroi në Jordani ku iu kërkua më shumë angazhim nga ana e Amerikës për përmirësimin e kushteve të jetesës për palestinezët.

Ministri i jashtëm jordanez, Marëan Muasher tha se duhen marrë menjëherë masa për të ndryshuar kushtet katastrofike - siç u shpreh ai - në të cilat jetojnë palestinezët në Gaza dhe Bregun Perëndimor.

 

 

KS debaton rreth situatës në Kongo

 

Nju Jork, 13 maj 2003 - Këshilli i Sigurimit i Kombeve të Bashkuara ka debatuar për mënyrën e pengimit të përshkallëzimit të dhunës etnike në verilindje të Republikës Demokratike të Kongos.

Disa zyrtarë i kanë krahasuar vrasjet e fundit me përshkallëzimet raciste në rajon në fillim të gjenocidit të Ruandës të vitit 1994.

Gjatë ditës së parë të bisedimeve, udhëheqësi i operacioneve paqeruajtëse të Kombeve të Bashkuara, Jean Marie Guehenno, ka tërhequr vërejtjen se pa një aksion vendimtar do të ketë një gjakderdhje të madhe në krahinën Ituri të Kongos, ndërmjet shumicës Lendu dhe pakicës Hema.

Civilët janë zënë mes pëplasjeve të armatosura dhe thuhet se rreth 4 mijë njerëz po strehohen tani në aeroportin e qytetit Bunia.

 

 

Ushtarët amerikanë kanë zbuluar në Irak një laborator

 

Bagdad, 13 maj 2003 - Ushtarët amerikanë kanë zbuluar në Irak një laborator ku supozohet të jenë prodhuar armët kimike-biologjike. Zëdhënësi i SHBA Ari Fleicher ka njoftuar se laborfatori mobil në një kamion po hetohet ndërkohë.

 

Edhe më tej mendohet se në Irak gjinden armët për shfarosje masive. Më parë qenë arrestuar dy pjestarë të njohur të ish udhheqjes irakiane nën mbikqyrjen amerikane.

 

Fjala është për udhëheqësin e sypozuar të programit irakian për armët biologjike, shkencëtarin Rihab Taha, dhe ish shefin e armatës izraelite. Në Bagdad ka arritur administratori i i ri i emërtuar nga presidenti amerikan Bush, Pol Bremer.

 

 

Presidenti Bush do të vizitojë sot me helikopter dhe këmbë rajonet e goditura rëndë nga stuhitë

 

Indiapolis, 13 maj 2003 – Presidenti Bush do të vizitojë sot (e martë) me helikopter dhe këmbë rajonet e goditura rëndë nga stuhitë, njofton Rojter. Bushi është takuar privatisht me grupin e liderëve republikanë fill pasi ka arrritur dje në Indianapolis. Presidenti Bush me këtë rast në një fjalim të tij, që pritet ta mbajë sot (e martë) do të flasë për uljen e taksave dhe shqetësimet e tij për deficitin e buxhetit.

 

 

SHBA-të nuk planifikojnë të rishkruajnë ose të rinogociojnë projektplanin për paqen në Lindjen e Mesme

 

Aman, 13 maj 2003 – Sekretari amerikan i Shtetit, Kolin Pauell, ka deklaruar sot (e martë) se Shtetet e Bashkuara nuk planifikojnë të rishkruajnë ose të rinogociojnë projektplanin për paqen në Lindjen e Mesme, njofton Rojter. Pauelli ka thënë gjithashtu se plani, që është pranuar nga palestinezët, por jo edhe nga Izraeli, ishte "i vetmi shteg" për paqe.

 

Plani paqësor kërkon që Izraeli të pranojë një shtet të pavarur palestinez më 2005, të heqë kibucet e ndërtuara në territoret palestineze dhe të ngrijë aktivitetet e ndërtimit të mëtejshëm të kolonive ebraite.

Copyright©2000-2003 Trepca.net - Të gjitha të  drejtat e rezervuara.