Lajme

E shtune, 10 maj 2003

Përmbajtja:

• Presidenti Rugova ngushëlloi familjet e viktimave, eshtrat e të cilave janë sjellë në Kosovë

• Agim Çeku ka shkarkuar nga detyra tre oficerë të lartë të TMK-së

• Në Oslo organizohet Konferenca për Ballkanin Perëndimor dhe integrimet euroatlantike

• Janjeva me një solemnitet shënoi 700-vjetorin e themelimit

• Kryeministri Rexhepi është ftuar të marrë pjesë në mbledhjen e parë të Forumit Ekonomik Botëror për Evropën Juglindore

• Në Prishtinë po i zhvillon punimet konferenca dyditore për vlerësimin dhe akreditimin e arsimit të lartë

• Serbët e Shtërpces bllokuan rrugën që çon në fshatrat shqiptare

• Mbrëmë në Prishtinë me shumë sukses u shfaq "Apologjia...", ku shkëlqeu aktori Mirush Kabashi

• Në Maqedoni kërkohet zgjidhja e problemit për 15 mijë shqiptarët që e kanë refuzuar shërbimin ushtarak

• NATO e inkurajon Shqipërinë që t'i vazhdojë reformat ushtarake dhe institucionale

• Athinë: Kundërshtohet marrëveshja për bazën e Bishtit të Pallës

• Është dënuar me vdekje personi, që akuzohej për vrasjen e tre mjekëve amerikanë në Jemen

• Këshilli i Sigurimit po debaton për projektin amerikan të një rezolute të re për Irakun e pasluftës

• Është kapur personi që besohet të ketë vrarë dje një person në një universitet amerikan

• Në aksidentin e helikopterit të rrëzuar amerikan kanë humbur jetën tre anëtarë të ekuipazhit

• Kina ka njoftuar sot edhe për pesë raste të reja të vdekjes nga virusi SARS

• Ukraina mohon se ka pasur viktima në aeroplanin "Il-76" në Kongo

• Bush anagzhohet për krijimin e dy shteteve, Izraelit e Palestinës

• Reporterja e gazetës "Boston glob" vdiq në një aksident trafiku në Irak

 

Presidenti Rugova ngushëlloi familjet e viktimave, eshtrat e të cilave janë sjellë në Kosovë

 

Prishtinë 10 maj 2003 - Presidenti i Kosovës Ibrahim Rugova u ka shprehur ngushëllime familjeve të viktimave të luftës, eshtrat e të cilëve janë kthyer në Kosovë.

"Me rastin e sjelljes nga Serbia në Kosovë të eshtrave të viktimave që janë llogaritur të zhdukur, familjeve u shpreh ngushëllmet e mia dhe të popullit të Kosovës.

Familje të nderuara, bëhuni të forta në kët momente të rënda, sepse e gjithë Kosova është me ju. Ata janë vrarë nga forcat barbare të vendit fqinjë që e kishte okupuar vendin tonë. Ata janë dëshmorë që ranë për lirinë deh pavarësinë e Kosovës. Ju do të gëzoni kujdesin tonë shtetëror.

Ata do të pushojnë të qetë në tokën e Kosovës së dashur.

Zoti i bekoftë! Zoti e bekoftë Kosovën", thuhet në një mesazh të presidentit Rugova drejtuar familjeve të viktimave, eshtrat e të cilave janë sjellë para dy ditësh në Kosovë.

 

 

Agim Çeku ka shkarkuar nga detyra tre oficerë të lartë të TMK-së

 

Prishtinë, 10 maj 2003 - Për shkak të përfshirjes së një pjesëtari të Zonës së Katërt të TMK-së në aktin e dëmtimit të urës afër Zveçanit, komandanti i TMK-së, gjeneral Agim Çeku ka shkarkuar nga detyra tre oficerë të lartë.

 

Nga detyra është shkarkuar komandanti i deritashëm i Zonës së Katërt gjeneral-brigade Kadri Kastrati, komandanti i deritashëm i Batalionit të katërmbëdhjetë gardist të Zonës së katërt nënkolonel Isa Hajrizi dhe oficeri komandues i Inspektoriatit të rendit në Zonën e katërt të Mbrojtjes, kapiteni Vllaznim Sahiti.

 

 Ata janë angazhuar në detyra të reja brenda TMK-së.

 

 

Në Oslo organizohet Konferenca për Ballkanin Perëndimor dhe integrimet euroatlantike

 

Prishtinë, 10 maj 2003 - Kryetari i Asociacionit të Komunave të Kosovës dhe kryetari i Kuvendit Komunal të Gjilanit, Lutfi Haziri udhëton nesër për në kryeqytetin norvegjez në Oslo, ku do të marrë pjesë në Konferencën për Ballkanin Perëndimor dhe integrimet euroatlantike.

Kjo konferencë konsiderohet me rëndësi të veçantë për Kosovën, dhe organizohet me mbështetjen e Ministrisë së Punëve të Jashtme të Norvegjisë, ndërsa punimet e Konferencës do të fillojnë nga 13 maji dhe do të zgjasin dy ditë.

Në këtë Konferencë, Lutfi Haziri do të prezentohet me një fjalë rreth zhvillimeve rajonale dhe ndikimit në integrime.

Të përkujtojmë se Kuvendi Komunal i Gjilanit, ditë më parë ka nënshkruar një marrëveshje bashkëpunimi ndërkufitar me Kumanovën (FYROM) dhe Preshevën (Serbi), marrëveshje kjo e cila është e njohur si iniciativë mikroregjinale evropiane.

Në këtë konferencën nga Kosova do të marrin pjesë edhe Besim Beqaj, koordinator i Kosovës në Paktin e Stabilitetit dhe Endi Berpark, përfaqësues i UNMIK-ut në Kosovë.

 

 

Janjeva me një solemnitet shënoi 700-vjetorin e themelimit

 

Janjevë/Prishtinë 10 maj 2003 - Janjeva dje me një solemnitet shënoi 700-vjetorin e themelimit të kësaj qyteze, 15 km larg Prishtinës, e ku morën pjesë edhe kryeadministratori i Kosovës Mihael Shtajner dhe kryeministri Bajram Rexhepi.

Z.Rexhepi duke folur në këtë përvjetor tha se Janjeva është oazë e paqes dhe e tolerancës ndëretnike, i cili ka ftuar pjesëtarët e pakicës kroate që të kthehen në Kosovë, ku do ta kenë përkrahjen e shumicës shqiptare.

 

Kryeministri Rexhepi me këtë rast ka vizituar edhe shtëpinë e Shtjefën Gjeçovit dhe ka premtuar se Ministria e Kulturës do të marrë përsipër renovimin e kësaj shtëpie për ta vënë atë shtëpi muze.

Manifestimin e djeshëm e ka përshëndetur me një telegram edhe presidenti i Kosovës Ibrahim Rugova, ndërkohë që në këtë përvjetor të rëndësishëm merrnin pjesë krerët e Kishës Katolike të Kosovës dhe Kroacisë, të Serbisë dhe të Malit të Zi. Në mesin e klerikëve të lartë që morën pjesë në meshën solemne ishte edhe ipeshkvi i Kosovës imzot Mark Sopi.

 

Ai ka thënë me këtë rast se "ne si popull shqiptar besimtarë katolikë siç na mëson feja gjithëherë, përherë edhe në të kaluarën edhe para lufte, gjatë luftës dhe tash premtojmë se do të përpjekemi që të jetojmë në paqe me të gjithë".

Mark Sopi e ka vlerësuar Janjevën një shembull të toleranës ndëretnike e ndërfetare në Kosovë.

 

 

Kryeministri Rexhepi është ftuar të marrë pjesë në mbledhjen e parë të Forumit Ekonomik Botëror për Evropën Juglindore

 

Prishtinë, 10 maj 2003 - Kryeministri i Kosovës Bajram Rexhepi është ftuar të marrë pjesë në mbledhjen e parë të Forumit Ekonomik Botëror për Evropën Juglindore, i cili mbahet në kryeqytin grek më 23 dhe 24 maj.

 

Takimi do të drejtohet nga Xhorxh Soros, drejtues i fondacionit "Soros" dhe nga guvernatori i Bankës Kombëtare në Greqi. Forumi do të tubojë investitorë ndërkombëtarë, udhëheqës të bizneseve rajonale, si dhe kryetar shtetesh dhe qeverishë.

Përfundimet e kësaj konference do të jenë pjesë e takimit ndërqeveritarë për procesin e integrimit ballkanik në Bashkimin Evropian.

 

 

Në Prishtinë po i zhvillon punimet konferenca dyditore për vlerësimin dhe akreditimin e arsimit të lartë

 

Prishtinë, 10 maj 2003 - Në Prishtinë dje dhe sot po i zhvillon punimet konferenca dyditore për vlerësimin dhe akreditimin e arsimit të lartë në Kosovë. Qëllimi i kësaj konference është këmbimi i përvojave dhe kontributit në themelimin e agjencisë për akreditim të arsimit në Kosovë.

 

Kjo konferencë është model i skicimit të kësaj agjencie, e cila parasheh të jetë strukturë tërësisht akademike.

Ministri i Arsimit, Shkencës dhe Teknologjisë Rexhep Osmani, duke folur për rëndësinë e akreditimit tha se së shpejti ligji për arsimin e lartë do të nënshkruhet nga kryeadministratori Shtajner dhe do të hapet rruga për fillimin e zbatimit dhe implementimit të ligjit.

Luis Perse, udhëheqës i Zyrës në Asociacionin e universiteteve evropiane e sheh shumë të rëndësishme këtë konferencë për akreditim, sepse do të sjellë përvoja të reja nga partnerët evropianë, të përfshirë në këtë sistem.

 

 

Serbët e Shtërpces bllokuan rrugën që çon në fshatrat shqiptare

 

Shterpcë, 10 maj 2003 - Serbët e Shtërpces në shenjë proteste për kthimin e 50 familjeve shqiptare në rajonin e kësaj komune bllokuan dje rrugën që çon në fshatrat shqiptare. Zyrtarët e UNMIK-ut, të KFOR-it dhe Kuvendit komunal, si dhe përfaqësues serbë kanë mbajtur një takim të përbashkët për të gjetur një zgjidhje.

 

 

Mbrëmë në Prishtinë me shumë sukses u shfaq "Apologjia...", ku shkëlqeu aktori Mirush Kabashi

 

Prishtinë, 10 maj 2003 - Mbrëmë në Teatrin Kombëtar në Prishtinë me shumë sukses u shfaq monodrama "Apologjia e vërtetë e Sokratit" të shkrimtarit grek Kostas Varnadis, e në regji të Gëzim Komës, ku shkëlqeu aktori i mirënjohur shqiptar Mirush Kabashi.

Publiku i kryeqendrës së Kosovës që kishte mbushur përplot sallën, e priti ngrohtësisht interpretimin e Mirush Kabashit, duke e duatrokitur gjatë në fund të shdaqjes.

Ndryshe Mirush Kabashi me këtë shfaqje ka korrë sukses të madh në vitet e kaluara kudo që është paraqitur. Mes tjerash ai me këtë rol ka fituar çmimin e parë, "Statuja artë", më 1997 në një festival në Kajro të Egjiptit.

 

 

Në Maqedoni kërkohet zgjidhja e problemit për 15 mijë shqiptarët që e kanë refuzuar shërbimin ushtarak

 

Shkup, 10 maj 2003 - Në Maqedoni ende mbetet problem i pazgjidhur çështja e personave, të cilët nuk u janë përgjigjur thirrjes për kryerjen e sherbimit ushtarak. Ministri i Drejtësisë Ismail Dardhishta ka deklaruar se bëhet fjalë për 15 shqiptarë.

Ai ka theksuar se në Maqedoni mbisundon mendimi se duhet të nxirret një ligj i veçantë për amnisti, i cili do të falë të gjithë ata persona, të cilët gjenden në vuajtje të dënimit dhe ndaj të cilëve është ngritur procedurë për ndjekje, ose pritet që të ngritet procedurë për ta.

Në anën tjetër, Ministria e Mbrojtjes ka bërë të ditur se e mështet iniciativën për faljen e të gjithë atyre personave që nuk u janë përgjigjur thirrjeve për kryerjen e shërbimit ushtarak.

 

 

NATO e inkurajon Shqipërinë që t'i vazhdojë reformat ushtarake dhe institucionale

 

Bruksel, 10 maj 2003 - NATO e inkurajon Shqipërinë që t'i vazhdojë reformat ushtarake dhe institucionale. Zyrtarët e NATO-s citohen t'i kenë shprehur mirënjohje Shqipërisë për të arriturat për reformimin dhe modernizimin e forcave ushtarake shqiptare, por kanë kërkuar që më shumë të bëhet në reformat e ligjeve dhe asaj ekonomike, të cilat po ashtu janë të rëndësishme për NATO-n.

 

Ky takim është zhvilluar në kuadër të planit të veprimit për anëtarësim në të cilin Shqipëria tashmë ka pasur katër cikle vjetore bisedimesh me Aleancën. NATO-ja edhe me këtë rast ka vlerësuar lart rolin pozitiv që e ka luajtur Shqipëria në rajonin e Ballkanit që nga shpërthimi i krizave të këtushme.

 

 

Athinë: Kundërshtohet marrëveshja për bazën e Bishtit të Pallës

 

Athinë, 10 maj 2003 - Një komision i parlamentit grek ka kthyer mbrapsht për rishikim një marrëveshje midis qeverive të Shqipërisë e Greqisë për rikonstruksionin e një baze ushtarake shqiptare në bregdetin e Adriatikut.

Komisioni i politikës së jashtme dhe mbrojtjes në parlamentin grek nuk e ka miratuar marrëveshjen për rikonstruksionin e bazës ushtarake të Bishtit të Pallës me arsyetimin se ajo nuk merr parasysh interesat e Greqisë.

Deputetët janë shprehur me fjalë shumë të ashpra kundër marrëveshjes, çka e ka detyruar zëvendësministrin grek të Mbrojtjes, Lukas Apostolidis, i cili e kishte nënshkruar marrëveshjen para disa muajsh në Tiranë, të deklarojë se e tërheq atë.

 

 

Është dënuar me vdekje personi, që akuzohej për vrasjen e tre mjekëve amerikanë në Jemen

 

Sana, 10 maj 2003 – Një gjykatë e Jemenit ka dënuar me vdekje personin, që akuzohej për vrasjen e tre amerikanëve në dhjetorin e kaluar, të cilët kanë punuar në një spital kristian, njofton BBCWorld.

 

I dënuari, Abid Abdulrezak Kamal, 30-vjeçar, i cili atëherë shtihej si pacient dhe kishte futur fshahtas armën në spital në qytetin jugor Xhibla dhe pastaj kishte vrarë tre mjekë amerikanë, përfshirë drejtorin e spitalit dhe një mjeke, vetëm pse ishin të krishetër. SHBA-të kanë bërë hetime në ka qenë Al Kaida e përzier në këto vrasje.

 

 

Këshilli i Sigurimit po debaton për projektin amerikan të një rezolute të re për Irakun e pasluftës

 

Kombet e Bashkuara, 10 maj 2003 - Në Këshillin e Sigurimit është duke u zhvilluar debati për projektin amerikan të një rezolute të re për administrimin e pasluftës së Irakut.

Pjesa qendrore e tekstit të propozuar ka të bëjë me heqjen e sanksioneve kundër këtij vendi. Sipas këtij plani, OKB-ja do të kishte rol dytësor, kryesisht rol konsulatativ në Irak, gjë që të paktën deri më tash kundërshtohet nga i ashtuquajturi "lob anti-luftë" - Franca, Gjermania dhe Rusia.

Amerikanët dhe britanikët janë rikthyer në Këshillin e Sigurimit, i cili refuzoi të lejojë luftën në Irak dhe kërkojnë nga ky forum dritën jeshile për administrimin e Irakut.

 

 

Është kapur personi që besohet të ketë vrarë dje një person në një universitet amerikan

 

Klevlend, SHBA, 10 maj 2003 – Një person i armatosur, që besohet të ketë vrarë dje një person dhe të ketë plagosur të pakten edhe një tjetër në një universitet amerikan, është kapur sot (e shtunë), njofton Rojter.

 

Personi i paidentifikuar ka plagosur dy veta para se të dorëzohet dhe gjatë ndjekjes sikur ka lozur me policinë "si maca me miun", duke u fshehur nëpër ndërtesën e shkollës së biznesit, ka thënë policia e Klevlendit. Personit në fjalë i janë kapur dy armë, njëra syresh automatike.

 

 

Në aksidentin e helikopterit të rrëzuar amerikan kanë humbur jetën tre anëtarë të ekuipazhit

 

Uashington, 10 maj 2003 – Në aksidentin e helikopterit amerikan "Fajkoi i zi", që është rrëzuar të premten në lumin Tigër afër qytetit irakian Samara, kanë humbur jetën tre anëtarë të ekuipazhit, kurse një tjetër është plagosur, kanë bërë të ditur sot (e shtunë) zyrtarët e mbrojtjes, njofton Rojter. Buri thotë me kusht anonimiteti se s'kanë vërejtur të ketë pasur sulm armiqësor në helikopter para se të rrëzohet. Hetimet po vazhdojnë.

 

 

Kina ka njoftuar sot edhe për pesë raste të reja të vdekjes nga virusi SARS

 

Pekin, 10 maj 2003 – Kina ka njoftuar sot (e shtunë) edhe për pesë raste të reja të vdekjes nga virusi SARS dhe për 85 të tjerë të infektuar, duke e ngritur kështu numrin e të vdekurve në 235 dhe numrin e rasteve të infektuara në 4, 884 sosh.

 

Ministria e Shëndetësisë ka thënë se dy raste vdekjesh kanë ndodhur në Pekin, që aktualisht është vendi më i goditur në botë nga SARS-i.

 

 

Ukraina mohon se ka pasur viktima në aeroplanin "Il-76" në Kongo

 

Kiev, 10 maj 2003 - Shefi i qendrës për informim pranë Ministrisë së Mbrojtjes së Ukrainës Konstantin Kivrenko ka mohuar njoftimet, sipas të cilave të paktën 120 pasagjerë të aeroplanit ukrainas "Ilushin 76" kanë vdekur në aksidentin ajror i cili ndodhi të enjtën në mbrëmje mbi Kongo dhe deklaroi se viktima nuk ka pasur.

Autoritetet e Kongos më herët kanë njoftuar se të paktën 160 nga 200 pasagjerë në linjën Kinshas -Lumumbash kanë vdekur, pasi që i kishte hedhur presioni nëpër derën e aeroplanit, që ishte hapur gjatë fluturimit, në një lartësi prej 2000 metrash.

 

 

Bush anagzhohet për krijimin e dy shteteve, Izraelit e Palestinës

 

Uashington, 10 maj 2003 - Presidenti amerikan Xhorxh Bush ka ofruar perspektivën për një partneritet të ri ekonomik me shtetet arabe, por thotë gjithashtu se ato duhet të modernizohen.

 

Duke folur në një universitet në Karolinën e Jugut, zoti Bush tha se po dërgonte sekretarin e Shtetit, Kolin Pauell, në Lindjen e Mesme për të shprehur angazhimet e tij personale për krijimin e dy shteteve, Izraelit e Palestinës.

Presidenti Bush ka bërë thirrje për krijimin e një zone të lirë tregëtie midis Shteteve të Bashkuara dhe Lindjes së Mesme me qëllim që të shpërblejë vendet që ndjekin rrugën e reformave politike dhe ekonomike.

Zoti Bush tha se bota arabe kishte një traditë të madhe kulturore, por nuk kishte mundur të bënte përparim ekonomik.

Ai tha se atje duhet të ketë arsimim më të gjerë dhe më të mirë, sidomos për gratë arabe, duhet të vendoset sundimi i ligjit dhe të goditet korrupsioni.

Zoti Bush tha se zona e tregtisë së lirë mund të vendoset brenda një dekade.

 

 

Reporterja e gazetës "Boston glob" vdiq në një aksident trafiku në Irak

 

Bagdad, 10 maj 2003 - Reporterja e gazetës amerikane "Boston glob" Elizabet Nefer ka vdekur në një aksident trafiku dje në Irak, dhe raportonte për ngjarjet pas përmbysjes së regjimit të Sadam Huesinit.

Njoftohet se Elizabet Nefer (46) pësoi në aksidentin e trafikut duke u kthyer nga Tikriti rrugës për në Bagdad.

Copyright©2000-2003 Trepca.net - Të gjitha të  drejtat e rezervuara.