OPINIONE

Pase ka mangësi tek UNMIK-u dhe KFOR-i kur janë në pyetje shqiptarët...?

  SI DO TA ARSYETOJË UNMIKU SJELLJEN E PAKICËS SERBE NË MITROVICË?

 

Përderisa UNMIK-u dhe KFOR-i nuk do të jenë në gjendje t'i mbajnë nën kontroll ekstremistët serbë dhe derisa mungon vullneti dhe angazhimi serioz i pakicës serbe për t'u integruar në shoqërinë e Kosovës sipas normave të parapara ligjore që dalin nga institucionet e Kosovës, edhe përmbushja e standardeve nga ana e shqiptarëve do të mbetet krejtësisht e paefekt, sepse atëherë kemi të bëjmë me standarde të njëanshme të cilat do të kontestohen vazhdimisht nga njëra apo tjetra palë.

9 maj 2003 / Shkruan: Besim KRASNIQI

Siç janë informuar lexuesit tanë, në mbrëmjen e së dielës së kaluar (me 4.maj 2003) kriminelët serbë rrahën rëndë z.Shaip Zhilivodën me shufra të metalit dhe boksa hekuri, i cili në atë kohë kthehej për në shtëpinë e tij në pjesën veriore të Mitrovicës, duke e lënë të shtrirë për toke dhe të përgjakur, plotësisht pa vetëdije.

Të gjithë jemi dëshmitarë të faktit se bashkësia ndërkombëtare përveq zotimeve të saj për zgjidhjen e çështjes së Mitrovicës së enklavizuar nga serbët, nuk ka bërë aspak në këtë drejtim dhe aq më pak është bërë në mbrojtjen e qytetarëve shqiptare të cilët banojnë në pjesën veriore të qytetit nga ekstremistët serbë, sikurse dëshmon edhe rasti i fundit i Shaip Zhilivodës si dhe i rasteve tjera të serbëve të Suhodollit të Epërm! Në anën tjetër, nga shqiptarët UNMIK-u dhe administrata ndërkombëtare në krye me z.Shtajner kërkojnë përmbushjen e standardeve, e në veçanti ato që kanë të bëjnë me të drejtat e pakicave nacionale në Kosovë, duke i mbyllur vazhdimisht sytë përpara akteve esktremiste të pakicës serbe kundër shqiptarëve!?

Ky "model i përmirësimit" të marëdhënieve ndërnacionale në mes të shqiptarëve dhe pakicës serbe, duke shkelur dhe duke dominuar mbi të drejtat e shumicës së shqiptarëve për hir të pakicës serbe, e pastaj të kërkohet edhe tolerancë më e madhe nga qytetarët shqiptarë, është vërtetë "model" që i tejkalon kufijtë e reciprocitetit dhe standardeve të parashtruara para shqiptarëve.

Andaj, si mund ta arsyetojë UNMIK-u rrahjen gati për vdekje të qytetarit të lirë shqiptar, i cili nuk i ka patur askujt borxh që t'ia shkallmojnë kokën me shufra metali e boksa hekuri? Ku është siguria UNMIK-ase për shqiptarët e pjesës veriore të Mitrovicës, derisa në Kishën serbe në Prizren dhe enklavat serbe, serbët ruhen ditë e natë nga forcat e KFOR-it? Pse tolerohen veprimet e tilla kriminale të pakicës serbe nga UNMIK-u dhe KFOR-i? A mund të konsiderohen këto sjellje të bashkësisë ndërkombëtare ndaj shqiptarëve si të ballancuara dhe të drejta? Kursesi jo!       

Përderisa UNMIK-u dhe KFOR-i nuk do të jenë në gjendje t'i mbajnë nën kontroll ekstremistët serbë dhe derisa mungon vullneti dhe angazhimi serioz i pakicës serbe për t'u integruar në shoqërinë e Kosovës sipas normave të parapara ligjore që dalin nga institucionet e Kosovës, edhe përmbushja e standardeve nga ana e shqiptarëve do të mbetet krejtësisht e paefekt, sepse atëherë kemi të bëjmë me standarde të njëanshme të cilat do të kontestohen vazhdimisht nga njëra apo tjetra palë.

Duhet pranuar haptas se veprimet energjike dhe efikase të UNMIK-ut dhe KFORI-it në pjesën veriore të Mitrovicës si dhe aty ku janë krijuar enklavat serbe mungojnë sot e kësaj dite, andaj edhe parimi "Zero tolerancë krimit" kalon në parim poashtu të njëanshëm, që nënkputon se ky "parim shtajnerian" vlen vetëm për shqiptarët, edhe nëse shqiptarët në të shumtën e rasteve janë viktimë (në vendin e tyre) e mostolerancës dhe e urrejtjes serbe!?

Kryetari i Kuvendit të Komunës z.Faruk Spahija me të drejtë dhe me kohë e ka paralajmëruar UNMIK-un dhe KFOR-in për neglizhencën e tyre, për pasojat e paparashikueshme si dhe për përgjegjësinë që bie mbi UNMIK-un dhe KFOR-in. Duke mos përjashtuar këtu edhe mosangazhimin e partive politike në tejkalimin e rrethanave të tilla siç është enklavizimi i Kosovës dhe "serbizimi" i Mitrovicës së veriut, mendojmë është koha e fundit që për hir të ikjes së situatave konfliktuoze dhe të tensionuara në mes të shqiptarëve dhe serbëve, klasa politike e Kosovës nëpërmes institucioneve legjitime duhet të angazhohet makismalisht që:

- t'i bëhet presion politik bashkësisë ndërkombëtare dhe z.Shtajner që "problemi i Mitrovicës" të zgjidhet njëherë e përgjithmonë, duke i burgosur kriminelët e njohur serbë, duke ia mundësuar kështu edhe shqiptarëve në veriun e Mitrovicës një jetë të lirë e të qetë;

- që të kërkohet nga UNMIK-u dhe KFOR-i që t'i zhbëjnë sa më parë enklavat tashmë të njohura serbe nëpër tërë territorin e Kosovës;

- që të kërkohet nga pakica serbe rrespektimin dhe zbatimin e ligjeve të dalura nga Korniza Kushtetuese si dhe nga institucionet e Kosovës, dhe t'i qojnë duart nga politika shoviniste antishqiptare e Beogradit.

Deri më sot shqiptarët janë treguar të gatshëm për kooperim dhe kanë treguar tolerancë ndaj të gjitha pakicave nacionale në Kosovë. Kjo gatishmëri është treguar edhe në kohën kur shqiptarët sundoheshin me dhunë nga pakica serbe, mirëpo pakica serbe ishte gjithmonë ajo që i ka prirë dhunës dhe krimeve ndërnacionale duke patur vazhdimisht përkrahjen e pushtetit kriminal të Millosheviqit. Mirëpo, askush nuk ka të drejtë të kërkojë nga shqiptarët t'a urrejnë vetëveten dhe ta duan dikë tjetër për hirë të bashkëjetesës me pakicat tjera, të cilat përkrahen sa herë që ato rrebelohen kundër shqiptarëve!

Copyright©2000-2003 Trepca.net - Të gjitha të  drejtat e rezervuara.