Lajme

E premte, 9 maj 2003

Përmbajtja:

• M. Shtajner: Duhet vazhduar puna për ta bërë Kosovën shembull për sundimin e ligjit dhe të stabilitetit

• Në Kosovë u kthyen trupat e 37 shqiptarëve të vrarë gjatë luftës e të zbuluar në Batajnicë të Beogradit

• KFOR-i thekson se ata që tentojnë të pengojnë qarkullimin e lirë të qytetarëve do të përballen me ligjin

• Një serb i Zubin Potokut ka kërcënuar një zyrtar të UNMIK-ut dhe një shqiptar

• AAK: Përfaqësuesit e zgjedhur duhet të kenë sjellje të respektueshme

• AKSH mohon se ka kërcënuar deputetin Fatmir Rexhepi

• E.Busek: Pakti i Stablitetit mund të financojë korridorin 10 Nish-Prishtinë dhe lidhjen Prishtinë-Shkup

• Përgatitet plani për kthimin e 22 mjekëve serbë në Qendrën Klinike Universitare të Prishtinës

• Në dy incidente të ndara në veri të Kosovës lëndohen katër policë

• Eskpertët e mjekësisë ligjore fillojnë ekzaminimin e 37 kufomave

• Nga Kosova tërhiqen 140 ushtarë gjermanë

• Gjermania ndihmon Shqipërinë në luftimin e korrupsionit

• KE thotë se është i zhgënjyer me Shqipërinë pas nënshkrimit të marrëveshjes me SHBA-të

• Braun: Vendimi amerikan për të furnizuar me pajisje Beogradin nuk do të ketë ndikim në marrëdhëniet e SHBA-ve me Kosovën

• Parlamenti maqedonas nuk aprovoi propozimin për të ndryshuar Kushtetutën që do të pengonte përgjimet e telefonatave

• Prokurorët në Hagë kërkojnë edhe gjashtë muaj për të përfunduar procesi kundër Millosheviqit

• Filmi "Exit" i motrave Zeqiri mori pjesë në festivalin ndërkombëtar të filmit në Oberhauzen

• Në Gjakovë ka filluar manifestimi tradicional letrar "Mitingu i poezisë shqipe"

• Trupat amerikane kanë vrarë sot një irakian 56 vjeçar

• Palestinezët kanë gjuajtur dy raketa në Izrael dhe kanë plagosur një fëmijë

• Armitixh optimist i përmbajtur mbi marrëdhëniet midis Indisë dhe Pakistanit

• Shrëder: Gjermania dhe Shtetet e Bashkuara më shumë janë unike se sa të përçara

• Refugjatëve nga Kosova në Gjermani mund t'u anulohet njohja e të drejtës së azilit

• Doganierët spanjollë kanë konfiskuar të enjtën 3.600 kg kokainë

• Izraeli i gatshëm të rifillojë bisedimet me Sirinë

• Një uragan ka përfshirë periferinë e qytetit Mur të Oklahomës dhe ka lënduar mbi 100 njerëz

• Në një aksident trafiku në Panxhap të Pakistanit kanë humbur jetën 24 veta

• Gjykata federaleamerikane ka ngritur aktpadinë kundër një gruaje të dyshimtë si agjente e dyfishtë kineze

• Vriten dy ushtarë amerikanë nga goditje me snajper në Irak

• Zgjedhjet presidenciale të vitit 2004 sfiduese si për Bushin ashtu edhe demokratët

• SHBA kërkon heqjen e sanksioneve kundër Irakut

• Senati amerikan mbështeti zgjerimin e NATO-s

  

M. Shtajner: Duhet vazhduar puna për ta bërë Kosovën shembull për sundimin e ligjit dhe të stabilitetit

 

Vjenë, 9 maj 2003 - Kryeadministratori i Kosovës Mihael Shtajner tha se lufta kundër krimit të organizuar, forcimi i sundimit të ligjit dhe prishja e strukturave paralele janë përparësitë e komunitetit ndërkombëtar në Kosovë.

 

Shtajner i bëri këto komente në një fjalim të mbajtur dje në në Këshillin e Përhershëm të OSBE-së në Vjenë. Ai tha se krimi i organizuar helmon klimën në Ballkan dhe kërcënon sigurimin në Evropë, ndërkaq ekzistenca e strukturave paralele minon vet sundimin e ligjit.

Z. Shtajner tha se misioni i OKB-së ka hyrë ndoshta në fazën e tij më kritike dhe delikate ku po transferohen përgjegjësitë nga komuniteti ndërkombëtar tek organet vendore. Këto përgjegjësi, tha ai, duhet të transferohen gradualisht në mënyrë që institucionet të jenë në gjendje t'i përballojnë ato.

 

Por me transferimin e përgjegjësive, theksoi z. Shtajner duhet shtuar vëzhgimin për to për të parë se si po zbatohen ato. Me përvojen e saj, tha shefi i UNMIK-ut, OSBE-ja ka cilësi të duhura për të luajtur një rol udhëheqës në këtë proces kritik.

Kosova mbetet për Evropën një çështje parësore dhe urgjente për sa i përket sigurisë megjithë sfidat në rritje në rajone të tjera të botës, tha Shatjner.

Pas investimit të madh të bërë në Kosovë, tha z. Shtajner duhet të vazhdojë puna për ta bërë Kosovën një shembull për sundimin e ligjit dhe një eksportuese të stabilitetit. Ai u bëri thirrje serbëve të Kosovës të marrin pjesë ploatësisht në jetën politike. Fjala bojkotim, tha ai, duhet të hiqet nga fjalori politik i Kosovës.

Shtajner është angazhuar për shpejtimin e procesit të kthimit të refugjatëve dhe personave të zhvendosur nga Kosova. Ai ka thënë gjithashtu se pjesëtarët e pakicave nacionale duhet të pranojnë realitetet e reja dhe të veprojnë nëpërmjet institucioneve legale. Sa për krimin e organizuar Shtajner ka thënë se ai nuk njeh kufij dhe është problem rajonal që kërkon zgjidhje rajonale.

 

 

Në Kosovë u kthyen trupat e 37 shqiptarëve të vrarë gjatë luftës e të zbuluar në Batajnicë të Beogradit

 

Mërdar, 9 maj 2003 - Trupat e 37 shqiptarëve të vrarë gjatë luftës të zbuluar në Batajnicë afër Beogradit njëra nga tri varrezat masive të zbuluar deri më tash në territorin e Serbisë, u kthyen dje pasdite në Kosovë. Ishte ky grupi i parë i kufomave të gjetura në një varrezë masive në Batajnicë afër Beogradit, një kamp stërvitjesh i forcave serbe të sigurimit.

 

Shefi i Zyrës së UNMIK-ut për Persona të Zhdukur Hoze Pablo Baraibar në vendkalimin kufitar në Mërdare ndërmjet Kosovës dhe Serbisë, ku edhe është bërë transferimi i kufomave, tha se kjo paraqet një ngjarje të rëndësishme dhe të dhembshme për Kosovën.

 

Ai tha se megjithë paralajmërimet se do të kthehen 52 trupa është vendosur që të kthehen 37 për arsye se familjeve do t'u kthehen të gjithë të zhdukurit përnjëherësh për të përmbushur kësisoj dëshirat e tyre. Ai tha se në varrezën e Batajnicës ndodhen trupat e njerëzve të vrarë në disa raste.

 

Atje ka trupa të vrarëve në Suharekë, në Gjakovë, në fshatin Mejë të kësaj komune, por edhe në vende të tjera. Aktualisht po punohet në përshpejtimin e procesit të kthimit të gjithë trupave të zbuluar. Deri më tash në këto varreza janë zbuluar trupat e të paktën 800 shqiptarëve të vrarë.

Sipas të dhënave të fundit zyrtare edhe 4057 persona të tjerë vazhdojnë të figurojnë në listat e të zhdukurëve.

 

 

KFOR-i thekson se ata që tentojnë të pengojnë qarkullimin e lirë të qytetarëve do të përballen me ligjin

 

Mitrovicë, 9 maj 2003 - Zyra për Informim e trupave paqeruajtëse të KFOR-it në Mitrovicë nëpërmjet një komunikate për shtyp ka bërë të ditur se ata të cilët tentojnë të pengojnë qarkullimin e lirë të qytetarëve do të përballen me ligjin. Sipas kësaj komunikate incidentet e fundit në pjesën veriore të Mitrovicës janë pasojë e ekstremistëve që kanë për qëllim të pengojnë kthimin e normalitetit në vend.

 

Në këtë prononcim po ashtu theksohet se incidentet si ai i fundit në veri të Mitrovicës janë të përgatitura nga provokatorët ekstremistë të cilët në këtë mënyrë po u bien në qafë qytetarëve që kërkojnë të punojnë dhe jetojnë në paqe.

 

Trupat paqeruajtëse kërkojnë nga qytetarët e Mitrovicës që të mos i përkrahin ekstremistët, të cilët po pengojnë kthimin e normalitetit në rajon. Në komunikatë po ashtu theksohet se KFOR-i së bashku me policinë e UNMIK-ut do të marrin masa ligjore kundër atyre që provojnë të pengojnë lëvizjen e lirë të qytetarëve.

 

 

 

Një serb i Zubin Potokut ka kërcënuar një zyrtar të UNMIK-ut dhe një shqiptar

 

Zubin Potok, 9 maj 2003 - Një serb i Zubin Potokut ka kërcënuar një zyrtar të UNMIK-ut dhe një shqiptar pasi ata filluan ndërtimin e një shkolle në fshatin Bajë të kësaj komune, ka bërë të ditur Zyra për Informim e policisë në Mitrovicë.

 

Zëdhënësi rajonal i SHPK-së Besim Hoti tha se i dyshuari ka thënë se toka ku ata kishin filluar ndërtimin e objektit i takon atij. Ai tha se asnjë person nuk është arrestuar lidhur me këtë rast, por hetimet janë duke vazhduar.

 

 

AAK: Përfaqësuesit e zgjedhur duhet të kenë sjellje të respektueshme

 

Prishtinë, 9 maj 2003 - "Ngjarjet e djeshme në Kuvend janë një turp për demokracinë tonë të re. Ato janë, gjithashtu, një fyerje ndaj njerëzve tanë, të cilët ua dhanë besimin e tyre përfaqësuesve të zgjedhur", thuhet në një reagim kryetari i të AAK-së Ramush Haradinaj.

 

"Unë iu jam drejtuar liderëve të LDK-së dhe të PDK-së dhe kam kërkuar bashkëpunimin e tyre, që të sigurojnë se ngjarje të tilla të mos ndodhin kurrë më në të ardhmen. Unë, gjithashtu, u jam drejtuar deputetëve të AAK-së në Kuvendin e Kosovës për t'u siguruar se ata e kuptojnë qëndrimin tim ndaj një sjelljeje të tillë. Ne të gjithë e ndajmë përgjegjësinë për një sjellje të drejtë në institucionet tona të qeverisjes".

 

"Ashtu siç ne veprojmë në drejtim të ndërtimit të Kosovës së lirë dhe të pavarur, në veçanti, përfaqësuesit e zgjedhur duhet të kuptojnë që ata duhet të kenë sjellje të drejtë dhe të respektueshme. Ata janë përfaqësuesit e popullit.

 

Si politikanë të një vendi e populli që po angazhohet për shtet të pavarur e demokratik, detyra jonë është tek njerëzit të ndërtojmë nder dhe besim në proces dhe jo zhgënjim", thuhet në reagimin e kreuut të AAK-së.

 

 

AKSH mohon se ka kërcënuar deputetin Fatmir Rexhepi

 

Prishtinë, 9 maj 2003 - AKSH shpreh keqardhje lidhur me letrën kërcenuese që i është drejtuar anëtarit të Kryesisë së LDK-së dhe deputetit të Parlamentit të Kosovës Fatmir Rexhepi, thuhet në njoftim që u është shpërndarë mediave nga AKSH-ja.

 

Kjo organizatë thotë se dënon ashpër këtë akt të paprecedent dhe hedh poshtë me neveri insinuatat se gjoja pas këtij veprimi kriminal qëndrojnë pjestarë të AKSH.

"Deklarojmë se në AKSH nuk ekziston asnjë person me emrin Spartak Tusha dhe se në strukturat e kësaj Armate nuk ekziston emërtimi i funksionit të "Shefit Ekzekutiv"!

"Distancohemi kategorikisht nga akti i kryer kunder deputetit Fatmir Rexhepi", thuhet në këtë njoftim.
Të përkujtojmë se deputeti i LDK-së Fatmir Rexhepi ka gjetur në kutinë e tij për materiale në Kuvendin e Kosovës një letër kërcënuese nga AKSH e të nënshkruar Kostaq Tushi.

 

 

E.Busek: Pakti i Stablitetit mund të financojë korridorin 10 Nish-Prishtinë dhe lidhjen Prishtinë-Shkup

 

Pragë, 9 maj 2003 - "Ne po shohim mundësinë që të përfshijmë Kosovën në marrëveshjet e tregtisë së lirë, sepse këshilltarët ligjorë të Kombeve të Bashkuara na kanë thënë se është e mundur një gjë e tillë përmes UNIMK-ut", tha Erhard Busek, bashkërendues i Paktit të Stabilitetit për Evropën Juglindore.

Në një intervistë dhënë radios "Evropa e lirë", Busek theksoi se Kosova po bashkangjitet në projektet për luftën kundër krimit të organizuar dhe në aktivitete të tjera. "Nga pikëpamja teknike ne po përpiqemi të integrojmë Kosovën pasi nuk duhet që Kosova të jetë një vrimë e zezë në hartën e rajonit", thotë Busek.

Busek si një problem të përgjithshëm theksoi statusin e Kosovës që po bllokon gjithçka. "Dhe derisa statusi nuk është i zgjidhur një numër gjërash nuk mund të zhvillohen. Por mendoj dhe po e përsëris sërish se kjo nuk është një çështje që është detyrë e Paktit të Stabilitetit", theksoi.

I pyetur se kur do të fillojë Pakti i Stabilitetit të financojë ndërtimin e largpërçuesit të energjisë elektrike mes Prishtinës dhe Tiranës, Busek tha se nëse punët shkojnë rrugës së duhur atëherë se është e mundur të ndërtohet ky largpërçues 300 kilovatësh.

 

"Ideja është të lidhim Kosovën me Shqipërinë, pasi nga ana e Shqipërisë kemi burime energjitike ujore, ndërsa nga ana e Kosovës burimet energjitike janë përmes qymyrit", tha ai.

Pyetjes se sa projekte ka Pakti për Kosovën dhe cila është vlera e përgjithshme financiare e tyre, bashkërenduesi i Paktit të Stabiliteit tha se nuk ka asnjë projekt, pasi në Kosovë Pakti nuk ka pasur fazën e quajtur zhvillim projektesh.

"Mendoj se projekti për të cilin po shohim mundësinë e zbatimit dhe që ndoshta mund të jemi në gjendje ta vëmë në jetë është ai i korridorit 10 që shkon nga Nishi në Prishtinë dhe lidhjen Prishtinë- Shkup.

 

Përfshirja e drejtpërdrejtë në realizimin e këtij projekti nuk ka ekzistuar më parë", theksoi në fund të intervistës Erhard Busek.

 

 

Përgatitet plani për kthimin e 22 mjekëve serbë në Qendrën Klinike Universitare të Prishtinës

 

Prishtinë, 9 maj 2003 - Në bazë të njoftimeve ende të pakonfirmuara, këshilltari ndërkombëtar pranë Ministrisë së Shëndetësisë Dr.Hanu Vori është duke përgatitur planin për kthimin e 22 mjekëve serbë në Qendrën Klinike Universitare të Prishtinës.

 

Por në Ministrinë e Shëndetësisë nuk kanë njohuri për këtë nismë të këshilltarit ndërkombëta. Ndërkaq Hanu Vori u deklaroi mediave se komentet e tij do t'ia japë vetëm me shkrim komitetit respektiv.

 

Gjithashtu as mjekët e QKU nuk dinë për këtë nismë të Hanu Vorit.

 

 

Në dy incidente të ndara në veri të Kosovës lëndohen katër policë

 

Mitrovicë, 9 maj 2003 - Persona të panjohur mbrëmë në afërsi të Leposaviqit në pjesën veriore të Koosvës kanë shtie me armë zjarri një patrullë të policisë së UNMIK-ut. Sipas zëdhënësit të SPK të Mitrovicë Besim Hoti asnjëri nga policët që ndodheshin në veturë nuk është lënduar, por vetëm shihen gjurmët e sulmit në veturë. Policia po i kryen hetimet ndërkohë që nuk ka të arrestuar.

Ndërkaq në një incident tjetër që ndodhi në një fshat afër Zveçanit janë lënduar katër policë. Zëdhënësi i policisë thotë se policët kanë ndërhyrë në një incident famuiljar, kurse një person i përzier në këtë incident ka sulmuar policët, të cilët kanë marrë lëndime të lehta. Sulmuesi është arrestuar.

 

 

Eskpertët e mjekësisë ligjore fillojnë ekzaminimin e 37 kufomave

 

Rahovec, 9 maj 2003 - Pas sjelljes së 37 kufomave dje nga Beogradi, sot në morgun e Rahovecit ka filluar inspektimi i tyre nga eskpertët e mjekësisë ligjore të Prishtinës dhe ata ndërkombëtarë. Përparësi në ekzaminimin e kufomave do të kenë ato të viktimave të zhdukur në grup për të bërë të mundshëm rivarrimin e tyre grupor.

 

Përfaqësuesi i UNMIK-ut Hoze Pablo Baraibar tha se fillimisht do të bëhet inspektimi i kufomave kurse që nga dita e nesërme edhe ekzaminimi i tyre. Ai tha se kthimi i kufomave që ndodhen në Serbi do të bëhet deri në mesin e qershorit.

 

 

Nga Kosova tërhiqen 140 ushtarë gjermanë

 

Prizren, 9 maj 2003 - Ushtria gjermane do të zvoglojë numrin e ushtarëve të saj në Kosovë. Siç njoftohet deri më datën 19 maj nga Kosova do të tërhiqen 140 ushtarët të aviacionit, të cilët ishin ngarkuar me sigurimin e katër kampeve gjermane në Prizren.

 

Shkak për këtë hap janë mungesat në personel. Kompania gjermane do të zëvëndësohet prej ushtarëve nga Gjeorgjia (Gruzia), ka bërë të ditur një zëdhënës i KFOR-it në Prizren.

 

 

Gjermania ndihmon Shqipërinë në luftimin e korrupsionit

 

Tiranë, 9 maj 2003 - Në mes të këtij muaji në Shqipëri do të qëndrojnë disa prokurorë të grupit kundër korrupsionit të landit Shlesvig-Holshtajn, mes tyre prokurori i përgjithshëm i këtij landi Erhard Reks dhe drejtuesi i njësisë kundër korrupsionit Hybner.

 

Lidhur me veprimtarinë e kësaj njësie hetimore kundër korrupsionit prokurori i përgjithshëm Erhard Reks shpjegon: "Në rast se një prokuror ulet në tryezën e tij të punës dhe pret t'i vijnë dosjet që lidhen me korrupsionin, atëherë pret më kot, sepse të tilla nuk do t'i vijnë ndonjëherë", njofton DV.

Ftesa për të shkruar në Shqipëri erdhi prej BE, i cili kontribuon për ngritjen e sistemit të drejtësisë në Shqipëri si dhe pala shqiptare, e përfaqësuar prej prokurorit të përgjithshëm të Shqipërisë.

 

"Kjo kërkesë lidhet me faktin se ne në landin Shlesvig-Holshtajn kemi një njësi të specializuar për luftimin e korrupsionit, e cila është lavdëruar edhe prej organizatave të tilla ndërkombëtare që merren me luftimin e korrupsionit, si bashkimi ndërkombëtar kundër korrupsionit "Transparency International", - shpjegon Reks.

 

 

KE thotë se është i zhgënjyer me Shqipërinë pas nënshkrimit të marrëveshjes me SHBA-të

 

Bruksel, 9 maj 2003 - Komisioni Evropian tha se ishte i zhgënjyer me vendimin e Shqipërisë për të nënshkruar një marrëveshje dypalëshe me Shtetet e Bashkuara që u njeh imunitet shtetasve amerikanë nga ndjekja e Gjykatës Penale Ndërkombëtare.

Por, pas bisedimeve në Bruksel ndërmjet ministrit të jashtëm, Ilir Meta, dhe komisionerit evropian për çështjet e jashtme, Kris Paten, një zëdhënëse e Komisionit Evropian tha se kjo nuk do të ndikonte në vazhdimin e negociatave me Shqipërinë.

Sipas BBC-së Tirana duhet ta rishikojë këtë marrëveshje në mënyrë që kërkesa e saj për anëtarësim në Bashkimin Evropian të merret seriozisht nga Brukseli.

Javën e kaluar Shqipëria u bë vendi i 32-të që nënshkroi një marrëveshje dypalëshe me Shtetet e Bashkuara për mosndjekjen e shtetasve amerikanë nga Gjykata Penale Ndërkombëtare.

Të enjten qeveria shqiptare e miratoi marrëveshjen e nënshkruar pak ditë më parë në Tiranë nga kryeministri Fatos Nano dhe sekretari amerikan i shtetit, Kolin Pauell.

Kjo marrëveshje tashmë duhet të ratifikohet nga parlamenti shqiptar.

Mosmarrëveshjet për Gjykatën Penale Ndërkombltare i acaruan mardhëniet mes Bashkimit Evropian dhe Amerikës verën e kaluar.

 

 

Braun: Vendimi amerikan për të furnizuar me pajisje Beogradin nuk do të ketë ndikim në marrëdhëniet e SHBA-ve me Kosovën

 

Uashington, 9 maj 2003 - Donald Braun, nëndrejtor për Kosovën në Zyrën e Departamentit amerikan të Shtetit për Evropën Jugore dhe Qendrore i tha "Zërit të Amerikës" se vendimi i presidentit Bush për të furnizuar me pajisje ushtarake Serbinë dhe Malin e Zi nuk do të ketë ndonjë ndikim në marrëdhëniet e Shteteve të Bashkuara me Kosovën.

 

Ai shtoi se SHBA-të e mbështesin plotësisht punën e OKB-së dhe të administratorit të saj në Kosovë, Mihael Shtajner.

Duke u përgjigjur në pyetjen se si e vlerësojnë SHBA-të përparimin që Kosova ka bërë në përmbushjen e standardeve të shpallura nga UNMIK-u si dhe si e vlerëson ritmin e transferimit të kompetencave nga administrata ndërkombëtare tek institucionet e Kosovës, z. Braun ka thënë:

 

"Këshilli e shqyrtoi në hollësi raportin e sekretrit të përgjithshëm dhe arriti në përfundimin se në drejtim të përmbushjes së standardeve që i janë caktuar Kosovës rezultatet janë të përziera.

 

Për shembull për mëse një viti janë ngritur dhe po funksionojnë institucionet demokratike, janë kapërcyer disa prej problemeve me të cilat ndeshej fillimisht parlamenti dhe po shohim përshpejtimin e ritmeve në proceset legjislative, gjë që është një shenjë shumë e mirë".

Ky zyrtari i lartë i Departamentit amerikan të Shtetit ka theksuar se në përgjithësi në Kosovë janë organizuar tri palë zgjedhje demokratike shumë të mira, është arritur përparim në drejtim të forcimit të sistemit gjyqësor...

Ndërkaq, për sa i përket kalimit të përgjegjësive nga administarata e UNMIK-ut tek institucionet e Kosovës, z. Braun ka thënë se SHBA-të mbështetën deklaratën e KS që brenda këtij viti të barten të gjitha kompetencat jo të rezervuara në duar të autoriteteve të Kosovës.

 

 

Parlamenti maqedonas nuk aprovoi propozimin për të ndryshuar Kushtetutën që do të pengonte përgjimet e telefonatave

 

Shkup, 9 maj 2003 - Deputetët në Kuvendin e Maqedonisë nuk aprovuan propozimin e dhënë nga Qeveria për të ndryshuar Kushtetutën i cili do të mundësonte të përligjen përgjimet e telefonatave dhe korrespondencave private.

 

Për të miratuar këtë propozim nevojiteshin dy të tretat e votave çka nënkuptonte edhe votat e partisë më të madhe opozitare VMRO-DMNE, e cila votoi kundër. Kjo parti tha se nuk i besonte Qeverisë aktuale dhe prandaj nuk e përkrahu propozimin për ndryshimin e Kushtetutës.

 

 

Prokurorët në Hagë kërkojnë edhe gjashtë muaj për të përfunduar procesi kundër Millosheviqit

 

Hagë, 9 maj 2003 - Prokurorët e Gjykatës Ndërkombëtare të OKB-së për Krimet e Luftës dhe krimet kundër njerëzimit në Hagë kanë kërkuar së paku edhe gjashtë muaj më shumë kohë për të përfunduar procesi gjyqësor kundër ish-presidentit jugosllav Sllobodan Millosheviq. Prokurorët thanë se ata shpresojnë të thrrasin edhe mëse 100 dëshmitarë.

 

 

Filmi "Exit" i motrave Zeqiri mori pjesë në festivalin ndërkombëtar të filmit në Oberhauzen

 

Paris, 9 maj 2003 - Filmi i shkurtër artistik "Exit" i motrave Lendita dhe Blerta Zeqiri mori pjesë në konkurrencën zyrtare në edicionin e 49-të të Festivalit ndërkombëtar të filmit dokumentar dhe të shkurtër në Oberhauzen të Gjermanise, festival ky më prestigjiozi dhe më i vjetri i metrit të shkurtër në botë.

Në edicionin e sivjetshëm kishin konkurruar rreth 4800 filma nga mbarë bota, por janë seleksionuar për t'u shfaqur vetëm 80, në mesin e tyre edhe filmi "Exit".

Festivali u mbajt prej datës 1-6 maj 2003 dhe u përmbyll me filmin "Exit" dhe kjo është pjesëmarrja e parë e një filmi nga Kosova në këtë festival.

Ditë më parë filmi "Exit" i motrave Zeqiri fitoi "Grand prix" në festivalin e Koenit në Francë.

 

 

Në Gjakovë ka filluar manifestimi tradicional letrar "Mitingu i poezisë shqipe"

 

Gjakovë, 9 maj 2003 - Sot në Gjakovë ka filluar manifestimi tradicional letrar "Mitingu i poezisë shqipe".
Manifestimi ka filluar me një tribunë letrare që sivjet ka për temë antologjitë shqipe. Ndërkaq në orët e mbrëmjes organizohet mbrëmja qendrore letrare, ku do të ndahen disa çmime tradicionale letrare.

 

 

Trupat amerikane kanë vrarë sot një irakian 56 vjeçar

 

Bagdad, 9 maj 2003 – Trupat amerikane kanë vrarë sot (të premten) në Bagdad një irakian 56 vjeçar, njofton Rojter. Incidenti ka ndodhur pasi një patrullë ushtarke amerikane kishte parkuar automjetin në trotuar, kanë thënë dëshmitarët. Dëshmitarët kanë thënë se ai ishte vrarë pa kurrfarë motivi. Ushtria amerikane ende s'ka dhënë koment.

 

 

Palestinezët kanë gjuajtur dy raketa në Izrael dhe kanë plagosur një fëmijë

 

Jerusalem, 9 maj 2003 – Dy raketa prodhim vendi janë shkrehur sot (e premte) nga Rripi i Gazës dhe kanë goditur qytetin jugor izrelit Sderot, ku kanë plagosur një fëmijë, njofton Rojter. Incidenti ka ndodhur vetëm një ditë pasi Izraeli ka vrarë militantin e Hamasit me një sulm nga helikopteri.

 

Kjo gjkaderdhje izraelito-palestineze bëhet në prag të arritjes të shtunën të sekretarit amerikan të Shtetit, Kolin Pauell, për vizitë në Izrael dhe në territoret palestineze, për të paraqitur palnin amerikan për paqe në Lindjen e Mesme.

 

 

Armitixh optimist i përmbajtur mbi marrëdhëniet midis Indisë dhe Pakistanit

 

Islamabad, 9 maj 2003 - Zëvendëssekretari amerikan i Shtetit Riçard Armitixh shprehu optimizëm të përmbajtur mbi zhvillimin e marrëdhënieve midis Indisë dhe Pakistanit.

 

Pas një takimi me zyrtarë pakistanezë Armitixh tha në Islamabad se takimi i kryeministrave të të dy vendeve javën e kaluar ishte shpresëdhënës. Në kuadër të shtendosjes në marrëdhëniet midis dy fuqive bërthamore qeveria në Nju Delhi emëroi një ambasador në vendin fqinjë.

 

 

Shrëder: Gjermania dhe Shtetet e Bashkuara më shumë janë unike se sa të përçara

 

Berlin, 9 maj 2003 – Kancelari Gerhard Shrëder ka deklaruar sot (të premten) se Gjermania dhe Shtetet e Bashkuara më shumë janë unike se sa të përçara, njofton Rojter. Kështu, Shrëder është përpjekur të riparojë lidhjet e shkëputura dhe të heqë shijen e hidhur të kundërshtimit verbal të luftës së udhëhequr nga amerikanët në Irak.

 

"Gjermania dhe Shtetet e Bashkuara janë të lidhura me një miqësi vërtet jetike. Kjo miqësi është krijuar mbi një bazë solide të përvojës dhe vlerave të përgjithshme", ka thënë Shrëder.

 

 

Refugjatëve nga Kosova në Gjermani mund t'u anulohet njohja e të drejtës së azilit

 

Lajpcig, 9 maj 2003 - Gjykata administrative federale e Gjarmanisë në Lajpcig ua ka lehtësuar zyrave të strehimit politik anulimin e njohjes së të drejtës së azilit. Pas tre vendimesh të shpallura dje, veçanërisht refugjatët nga Kosova duhet të llogarisin me anulime të shtuara në rast se e kanë fituar të drejtën e azilit nëpërmjet proceve gjyqësore, por njohja e të drejtës ka ndodhur pas hyrjes së trupës së paqes të OKB-së KFOR në qershor 1999.

Në rastet e shqyrtuara dje, shqiptarët nga Kosova i kishin fituar me rrugë gjyqësore gjatë konfliktit në pranverën e vitit 1999 në Kosovë të drejtat e azilit. Enti federal për njohjen e refugjatëve të huaj i pati respektuar vendimet e gjykatave, por i pati lëshuar aktet e njohjes së azilit pas hyrjes së trupave të KFOR-it në Kosovë.

 

Enti i anuloi aktet e njohjes së azilit me arsyetimin se pas hyrjes së trupave të OKB-së në Kosovë shqiptarët nuk kërcënoheshin më me përndjekje. Kjo ishte arsyeja përse refugjatët ngritën padi.

 

Ata u mbështetën në parimin se zakonisht autoritetet mund ta anullojnë një vendim favorizues vetëm në rast se kushtet ndryshojnë rrënjësisht. Rastet e tyre nuk ishin të tilla pasi akti i njohjes së azilit ishte shpallur pas hyrjes së trupave të KFOR-it në Kosovë.

Por siç vendosi tani gjykata administrative federale parimi i përgjithshëm nuk vlen në rastin kur zyrat e strehimit politik zbatojnë vendimet e gjykatave. Në të tilla raste vendimtare është gjendja në kohën e vendimimmarrjes.

 

Edhe në rast se më pas gjendja ndryshon gjykata administrative federale ka të drejtë ta zbatojë fillimisht vendimin e gjykatës dhe ta anullojë më vonë njohjen e së drejtës së azilit, thuhet në një raport të DW.

 

 

Doganierët spanjollë kanë konfiskuar të enjtën 3.600 kg kokainë

 

Londër, 9 maj 2003 - Doganierët spanjollë kanë konfiskuar të enjtën 3.600 kg kokainë gjatë një kontrolli në Oqeanin Paqësor. Fjala është për një nga aksionet më të mëdha të konfiskimit të drogës deri më tash, e cila ishte dedikuar për tregun e siujdhesës Iberike, ka thënë zëdhënësi i doganave britanike, duke theksuar se vlera e kësaj droge është 400 milionë dollarë.

 

Me atë rast është arrestuar kapiteni i anijes me prejardhje nga Republika Dominikane dhe shtatë anëtarët e ekuipazhit nga Greqia, të cilët po i merr në pyetje policia spanjolle. Doganierët kishin hipur në anije të ndihmuar nga një luftanije britanike.

 

 

Izraeli i gatshëm të rifillojë bisedimet me Sirinë

 

Tel Aviv, 9 maj 2003 - Kryeministri izraelit Ariel Sharon ka deklaruar se është i gatshëm të rifillojë bisedimet me Sirinë, tri vjet pas ndëroprejes së tyre për shkak të kontestit rreth rrafshnaltës së Golanit, të cilën Izraeli e ka pushtuar në vitin 1967.

Sharon ka theksuar se nga qeveria e Damaskut ka marrë një mesazh indirekt në të cilën paralajmërohet gatishmëria për bisedime.

Ndërkaq autoritetet e Sirisë kanë reaguar ndaj deklaratës së Sharonit me një dozë skepiticizmi, duke shfaqur shpresën se oferta është e sinqertë, dhe duke theksuar se edhe më tutje kanë rezerva serioze.

 

 

Një uragan ka përfshirë periferinë e qytetit Mur të Oklahomës dhe ka lënduar mbi 100 njerëz

 

Mur, Oklahoma, 9 maj 2003 – Një uragan i fuqishëm ka përfshirë periferinë e qytetit Mur të Oklahomës dhe kështu ka shkatërruar ndërtesa, ka shkulur shtyllat e linjave elektrike dhe ka lënduar më shumë se 100 njerëz, por lajmi më i mirë është se për fat s'ka konfirmim për të vdekur, njofton Rojter.

 

Uragani ka dëmtuar 1,500 shtëpi dhe ka shkatërruar të pakten 3oo syresh. Zyrtarët e shpëtimit kanë thënë se të pakten 103 veta janë lënduar, 12 syresh kanë marrë lëndime të rënda dhe janë në gjendje kritike.

 

 

Në një aksident trafiku në Panxhap të Pakistanit kanë humbur jetën 24 veta

 

Maltan, Pakistan, 9 maj 2003 – Një autobus është përplasur sot (e premte) me një autocisternë në provincën Panxhab në Pakistanin qendror dhe në këtë aksident trafiku kanë humbur jetën të pakten 24 njerëz dhe 20 të tjerë janë lënduar, kanmë bërë të ditur burimet policore dhe spitalore, njofton Rojter.

 

Policia ka thënë se autobusi është përplasur në cisternë duke u pëerpjekur ta tejkalojë një automjet tjetër. Cisterna ka eksploduar.

 

 

Gjykata federaleamerikane ka ngritur aktpadinë kundër një gruaje të dyshimtë si agjente e dyfishtë kineze

 

Uashington, 9 maj 2003 – Gjykata federale e Shteteve të Bashkuara ka ngritur sot (e premte) aktpadinë kundër një gruaje të dyshimtë të ketë qenë agjente e dyfishtë kineze me akuzat se ilegalisht ka marrë, ka kopjuar dhe ka mbajtur dokumente sekrete, njofton Rojter.

 

Aktpadia e ngarkon Katrarina Leung se ka marrë dokumentet nga Xhejms Smith, ish-agjent i FBI-s, i cili ka qenë ai që e ka rekrutuar atë për spiune dhe dashnore. Znj. Leung është akuzuar me pesë akuza nga juria e madhe e Gjykatës në Los Angjelos, ku është aktualisht në burg.

 

 

Vriten dy ushtarë amerikanë nga goditje me snajper në Irak

 

Uashington, 9 maj 2003 - Kreu i Komandës Qendrore të Shteteve të Bashkuara, gjenerali Tomi Frenks, thotë se pret që Iraku të mbetet një vend i rrezikshëm në të ardhmen e afërt, pas vrasjes së dy ushtarëve amerikanë gjatë ditës së djeshme në dy incidente të veçanta.

Gjenerali Frenks tha se pret të shohë sjellje të vrazhda në Irak për një të ardhme të afërt. Por ai shtoi se trupat amerikane janë të përgatitura ta përballojnë situatën.

Ai i bëri këto komente pasi një snajper vrau një ushtar amerikan në Bagdad.

 

 

Zgjedhjet presidenciale të vitit 2004 sfiduese si për Bushin ashtu edhe demokratët

 

Uashington, 9 maj 2003 - Fitorja ushtarake në Irak ka shtuar mbështetjen e publikut amerikan për Presidentin Bush dhe anketat tregojnë se mbi 70 për qind e miratojnë vijën politike që po ndjek ai, një tregues shumë i lartë ky një vit para zgjedhjeve presidenciale.

Por Presidenti e ka mirë parasysh se çfarë ndodhi me babanë e tij. Pas luftës në Gjirin Persik në vitin 1991, rezultatet e anketave ishin shumë të larta në mbështetje të Presidentit Bush, megjithatë ai i humbi zgjedhjet ndaj demokratit Bill Klinton, një vit më vonë për shkak të ngecjes ekonomike të vendit.

Edhe pse presidenti Bush tani e ka përqendruar vemendjen tek përmirësimi i ekonomisë, ekipi që merret me përgatitjet për rizgjedhjen e tij duhet të punojë intensivisht në muajt e ardhëshëm për t’i vënë në dukje zgjedhësve meritat e tij për çështjet e sigurimit kombëtar.

 

 

SHBA kërkon heqjen e sanksioneve kundër Irakut

 

Nju Jork, 9 maj 2003 - Shtetet e Bashkuara, Britania e Madhe dhe Spanja pritet të paraqesin sot një rezolutë në Kombet e Bashkuara, që do t'i jepte fund sanksioneve të vëna ndaj Irakut më shumë se një dekadë më parë.

Rezoluta parashikon heqjen e menjëhershme të sanksioneve ekonomike të OKB-së të vëna ndaj Irakut pas pushtimit të Kuvajtit nga ky i fundit në vitin 1990.

 

Rezoluta parashikon gjithashtu edhe heqjen gjatë një periudhe 4-mujore të programit të Kombeve të Bashkuara, naftë-për-ushqim, që ka pasur si qëllim lehtësimin e barrës së sanksioneve mbi popullin irakian. Iraku do të lejohet të shesë përsëri naftë pa kontrollin e OKB-së.

Franca, Rusia dhe Kina kanë thënë se nuk do të miratojnë asnjë rezolutë për heqjen e sanksioneve para se inspektorët e Kombeve të Bashkura të kthehen në Irak për të vërtetuar se ky vend nuk ka më armë të shkatërrimit në masë.

 

 

Senati amerikan mbështeti zgjerimin e NATO-s

 

Uashington, 9 maj 2003 - Senati amerikan shprehu mbështetje për raundin e dytë të zgjerimit të NATO-s, duke votuar njëzëri për pranimin e 7 vendeve të Evropës Lindore në Organizatën e Atlantikut Verior.

Në praninë e ministrave të jashtëm të Bullgarisë, Rumanisë, Sllovakisë, Sllovenisë, Estonisë, Letonisë dhe Lituanisë, senatorët vunë në dukje se votimi i tyre në favor të zgjerimit të Natos bëhej në përvjetorin e fitores së aleatëve në Luftën e Dytë Botërore.

Udhëheqësi i shumicës së senatit, Bill Frist, theksoi mbështetjen e të shtatë vendeve në luftën e udhëhequr nga Shtetet e Bashkuara kundër Irakut.

Copyright©2000-2003 Trepca.net - Të gjitha të  drejtat e rezervuara.