Lajme

E enjte, 8 maj 2003

Përmbajtja:

• Sipas një gazete austriake, Shtajner largohet nga Kosova  

• Deputetët miratuan Kodin penal të Kosovës, atë të procedurës penale dhe tri ligje të të tjera

• Mbrëmë në Prishtinë u bë promovimi i bankës së fuqishme austriake "Raiffeisen Bank"

• Grupi Parlamentar i LDK-së shpreh keqardhje për incidentin ndërmjet deputetëve Gani Koci e Fadil Geci

• LDK shpreh shqetësimin për kërcënimin ndaj anëtarit të Kryesisë dhe deputetit Fatmir Rexhepi

• Një delegacion i Degës së LDK - Prizren vuri kurora lulesh mbi varrin e komandant Ekrem Rexha "Drini"

• Policia e UNMIK-ut ndërpret bashkëpunimin me dy gazetarët e Kohës ditore" në Pejë

• Gjendja shëndetësore e katër të lënduarve mbrëmë është stabile, policia nuk ka arrestuar askënd

• Fëmijët jetimë nga Kosova qëndrojnë në Ulqin

• PVD e pakënaqur me zhvillimet në luginën e Preshevës

• Për shkak të një incidenti mes dy deputetëve ende nuk ka filluar seanca e sotme Kuvendit të Kosovës

• Një fond austriak njofton kosovarët me mundësitë e dëmshpërblimit nga regjimi nacional-socilist

• Në fshatin Suhadoll të Mitrovicës një grup ekstremistësh serbë u përplas me forcat e KFOR-it

• R. Harnish: Për momentin bashkësia ndërkombëtare nuk është e gatshme që të merret me statusin përfundimtar të Kosovës

• Sot në Kosovë sillen trupat e pajetë të 52 shqiptarëve të ekshumuar në varrezën masive afër Beogradit

• SHBA-të ndihmojnë me mbi 14 milion dollarë kthimin e të zhvendosurve dhe refugjatëve në Kosovë

• Mbrëmë nga një shpërthim i fuqishëm në Prishtinë janë lënduar katër të rinj

• Në Kuvendin komunal të Dardanës është arritur marrëveshja qeverisjeje mes LDK-së dhe AAK-së

• Futboll: Në çerekfinale të Kupës së Kosovës, Prishtina mundi Dritën e Gjilanit me rezultat 2:1

• Liga e Kampionëve: Milan – Inter 0:0

• Në takimin e Selanikut do të kërkohet nga vendet e Ballkanit Perëndimor që të ndërmarrin reforma të shpejta

• Marrëveshja që qytetarët e Kosovës mund të hyjnë me veturat e tyre në Maqedoni hyn në fuqi prej sot

• Ambasadori gjerman në Beograd thotë se ende është herët të thuhet nëse Kosova do të bëhet shtet i pavarur

• Ministri i brendshëm maqedonas thotë nuk ka të dhëna për shpërndarjen e uniformave për shqiptarët

• Tiranë: Hapet procesi i legalizimit të Bathores

• Presidenti Bush pret Kryeminsitrin e Spanjë Aznar

• Bler: Vendet kundërshtare të luftës së Irakut të bashkëpunojnë për rindërtimin e tij

• Gjermania nuk do të marrë pjesë në trupën e planifikuar paqeruajtëse për Irakun

• Autoritetet amerikane kanë siguruar shumë dorëshkrime dhe objekte arti nga Muzeu Kombëtar në Bagdad

• Departamenti i Shtetit ka futur në listën e grupeve terroriste partinë baske në Spanjë Batasuna

• Një helikopter izraelit ka vrarë në qytetin Gaza të pakten një person

• Numri i përgjithshëm i të vdekurve nga virusi SARS ka kaluar sot (të enjten) shifrën 500

• Janë arrestuar tre burra palestinezë në lidhje me sulmet me bombë

• Në autobusin e aksidentuar gjerman në Hungari kanë humbur jetën 32 veta

• SHBA paraqesin në KS një projektrezolutë për heqjen e sanksioneve

• SHBA do të zbusin bazën ligjore për sanksionet kundër Irakut

• KS pritet të miratojë nesër një rezolutë për fillimin e eksportit të naftës së Irakut

• Të pakten 27 udhëtarë të një autobusi gjerman turistik kanë humbur jetën në Hungari

• Ushtarët izraelitë kanë vrarë një palestinez, të veshur në rroba tradicionale arabe

• Në Xhakartë filloi gjykimi kundër një militanti islamik

  

Sipas një gazete austriake, Shtajner largohet nga Kosova

  

Vjenë, 8 maj 2003 - Në Kosovë do të ketë ndryshime në krye të administratës së KB-ve, vlerëson sot gazeta e Vjenës, "Presse".

Gazeta në fjalë paralajmëron se diplomati gjerman Mihael Shtajner, i cili që nga janari i vitit 2002 ndodhet në funksionin e të dërguarit të posaçëm të KB-ve në Kosovë, planifikon që ta dorëzojë funksionin e tij.

Për pasardhës të Shtajnerit prej kohësh përmendej ambasadori suedez në KB në Gjenevë, Pjer Shori por për shkak të qëndrimit të tij negativ ndaj luftës në Irak, SHBA-të dhe Britania e Madhe nuk dëshirojnë ta mbështesin kandidaturën e tij.

Si zëvendës të mundshëm të Shtajnerit në Kosovë përmenden deputeti i mëpërparshëm i Bashkimit Evropian në Maqedoni, francezi Alen lë Rua, diplomati amerikan Zhan Poll Klajn dhe finlandezja Elizabet Ren.

 

  

Deputetët miratuan Kodin penal të Kosovës, atë të procedurës penale dhe tri ligje të të tjera

 

Prishtinë, 8 maj 2003 - Për shkak të një incidenti ndërmjet dy deputetëtve, me një orë e gjysmë vonesë seanca e sotme e Kuvendit të Kosovës i vazhdoi punimet me rendin e ditës të caktuar më herët.

 

Kryeparlamentari Nexhat Daci incidentin e quajti teknik dhe tha se ka marrë vendim që të dy deputetët të përjashtohen nga mbledhja e sotme dhe se Kuvendi duhet t'i vazhdojë punimet, duke proceduar me rendin e ditës.

 

Daci bëri thirrje për një unitet veprues të cilin ky kuvend e ka pasur prej një vit e gjysmë. Ndërkohë deputeti Berat Luzha në emër të Grupit parlamentar të PDK-së lexoi një deklaratë të ashpër lidhur me incidentin e shkaktuar mes deputetëve Fadil Geci (LDK) e Gani Koci (PDK).

 

Deklarata e PDK-së veprimin e Fadil e Gecit e quan "akt kriminal" dhe se është kryer për motive politike. Gjithashtu deklarata kërkon nga LDK-ja që të distancohet nga Fadil Geci, ndjekje penale kundër Gecit dhe që ai të përjashtohet përgjithmonë nga Kuvendi i Kosovës.

Pas leximit të deklaratës deputetët e PDK braktisën seancën e sotme.

Kryeparlamentari Daci ndërkaq kërkoi që kjo deklaratë, për shkak të fjalorit të saj, të mos hyjë në procesverbal.

Kuvendi i vazhdoi punimet me procedimin nen për nen të kodit penal të Kosovë bashkë me amandamentet e paraqitura nga komisionet respektive. Me gjithë kundërshtimet e deputetëve serbë Kodi penal u miratua me shumicë votash dhe Kodi i procedurës penale.

Gjithashtu pas rekomandimeve të komisioneve respektive u miratuan amandamentimet e Ligjit për transport, telekomunikacion si dhe amandementimi i ligjit për menaxhim të financave publike dhe Ligji për aktivitetet e tregtisë me jashtë. Të gjitha këto ligje më herët ishin kthyer për rushqyrtim nga shefi i UNMIK-ut Mihael Shtajner.

 

 

Mbrëmë në Prishtinë u bë promovimi i bankës së fuqishme austriake "Raiffeisen Bank"

 

Prishtinë, 8 maj 2003 - Me moton "Jeto më mirë" mbrëmë në mjediset e hotelit "Grand" në Prishtinë u bë promovimi i bankës së fuqishme austriake "Raiffeisen Bank" e cila hyn në sistemin bankar të Kosovës. Kjo bankë do ta ketë selinë e Bankës Amerikane në Prishtinë, e cila në dhjetor të vitit të kaluar ia shiti bankës austriake 76 për qind të aksioneve.

Stefen Grunerud, drejtor i Raiffesienit në Kosovë, tha në promovimin e kësaj banke se Kosova është një vend shumë i mirë për të zhvilluar biznes, duke u bërë thirrje investitorëve të huaj të ndërrojnë kahjen e zhvillimeve të biznesit dhe të ekonomisë së Kosovës për të mirë të vendit. "Është një vend i shkëlqyeshëm. Ne erdhëm në Kosovë që të zhvillojmë sektorin bankar aksionar", tha Grunerud.

Në promovimin e Raifeisenit morën pjesë personalitetet më të larta të Kosovës, Presidenti Ibrahim Rugova, Kryeministri Bajram Rexhepi, si dhe disa ministra të Qeverisë së Kosovës.

Presidenti Rugova, duke folur në këtë solemnitet, krijimin e bankës së re, pas shitjes së shumicës së aksioneve Raiffeissen Bank nga Austria, e ka quajtur këtë proces bashkimi të bankave të fuqishme një ngjarje të rëndësishme për Kosovën.

Presidenti Rugova tha se veprimtaria e Bankës Amerikane ishte në funksion të mirë të qytetarëve të Kosovës, duke shprehur bindjen që "Raifessen Bank", do të bëhet një bankë e fuqishme e Kosovës, e cila do të shërbejë në të mirë të ekonomisë së Kosovës dhe do të forcojë sistemin bankar të vendit.

Presidenti Rugova paralajmëroi krijimin e bankës nacionale të Kosovës. "Ne jemi në rrugë të krijimit të Bankës Nacionale, jemi në bisedime me UNMIK-un dhe se ajo do të ketë mbështetjen e institucioneve të Kosovës, e cila do të ndikojë në forcimin e sistemit bankar të Kosovës", tha ai.

Ndërkaq, kryeministri i Kosovës, Bajram Rexhepi, duke folur për këtë bankë të re, shfaqi bindjen se kjo bankë po bashkohet në rrugën e përballimit të sfidave të ardhshme në Kosovë.

 

Ai u shpreh optimist se kjo bankë do të ndikojë në dinamizimin e biznesit në Kosovë, veçanërisht atij të vogël dhe të mesëm, zhvillimin i të cilëve do të jetë bazë për ekonominë e ardhshme të Kosovës.

 

"Banka Amerikane arriti objektivat e saj, siguroi treg të shëndoshë të parasë, e cila ka rëndësi të madhe për ekonominë kombëtare", tha Rexhepi.

Shefi i USAID-it për Kosovën (agjencioni që e themeloi ABK-në). Dejl Fajfer tha se kur ABK ka arritur t'ia shesë pjesën më të madhe të aksioneve Raiffeisenit vetëm një vit pas themelimit të saj paraqet një të arritur shumë të madhe.

Kjo bankë do të kontribuojë në zhvillimin e sektorit të kredive, ngase në Kosovë janë 428 milionë euro të depozituara, ndërsa vetëm 160 milionë, apo një e katërta e tyre janë ndarë për kredi", tha zëvendësi i shtyllës së katërt të UNMIK-ut Jurgen Vos.

 

Edhe shefja e misionit austriak në Kosovë, znj.Gerda Vogl, tha se hapja e kësaj banke për biznismenët austriakë, duhet të jetë shembull guximi dhe inkurajimi për të investuar këtu.

 

 

Grupi Parlamentar i LDK-së shpreh keqardhje për incidentin ndërmjet deputetëve Gani Koci e Fadil Geci

 

Prishtinë, 8 maj 2003 - Në një deklaratë të lëshuar nga Grupi Parlamentar i LDK-së në Kuvendin e Kosovës shprehet keqardhje për incidentin ndërmjet deputetëve të Kuvendit të Kosovës Gani Koci e Fadil Geci.

"Konsiderojmë që rreth këtij rasti do të veprohet në bazë të kodit të mirësjelljes të deputetit në Kuvendin e Kosovës.

Grupi Parlamentar i LDK-së shpreson dhe angazhohet që ky incident nuk do të prodhojë raporte të këqija politike ndërmjet partive në Kuvend, duke ndjekur përvojën e bashkëpunimit të deritashëm, qoftë në Kuvend të Kosovës, qoftë në Qeverinë e koalicionit", thuhet në fund të deklaratës së Grupit parlamentar të LDK-së, lidhur me incidentin që ndodhi sot në Kuvendin e Kosovës.

 

 

LDK shpreh shqetësimin për kërcënimin ndaj anëtarit të Kryesisë dhe deputetit Fatmir Rexhepi

 

Prishtinë, 8 maj 2003 - Në një reagim të saj, Kryesia e Lidhjes Demokratike të Kosovës shpreh shqetësimin e vet për letrën kërcënuese e cila i është drejtuar anëtarit të Kryesisë dhe deputetit të LDK-së, z.Fatmir Rexhepi.

Kryesia e LDK-së, duke dënuar këtë dhe akte të tjera kërcënuese, kërkon nga organet e drejtësisë që të ndërmarrin masa adekuate.

 

Një delegacion i Degës së LDK- Prizren vuri kurora lulesh mbi varrin e komandant Ekrem Rexha "Drini"

Prizren, 8 maj 2003 - Në përvjetorin e tretë të ramjes së Ekrem Rexhës - Komandant-DRINI, një delegacion i Degës së LDK - Prizren, në përbërje Besim Telaku, Sefer Rexhaj , Islam Bajrami dhe Nderim Gashi, vizitoi varrezat e dëshmorëve ( në Landovicë ) me at rast u vu kurora lulesh në varrin e Ekrem Rexhës.

Me kët rast u vizitua familja e Ekrem Rexhës , ku u pritën nga nëna dhe anëtarët e tjerë të familjes Rexha.

 

Policia e UNMIK-ut ndërpret bashkëpunimin me dy gazetarët e Kohës ditore" në Pejë

 

Pejë, 8 maj 2003 - Policia e UNMIK-ut në Pejë paralajmëron arrestimin e disa personave të dyshimtë të involvuar në disa vrasje që kanë shqetësuar qytetarët e Pejës dhe të Kosovës. Ndërkohë janë duke u zhvilluar hetime intensive.

Poashtu u bë e ditur se policia e UNMIK-ut ka ndërprerë për tre muaj bashkëpunimin me dy korrespondentët e gazetës "Koha ditore" nga Peja për shkak të një informacioni të botuar në këtë gazetë se kinse policët e UNMIK-ut janë përzier në prostitucion në komunën e Pejës. Vendimin e ka marrë zëdhënësi i policisë së UNMIK-ut në Prishtinë Derek Çaepll.

 

 

Gjendja shëndetësore e katër të lënduarve mbrëmë është stabile, policia nuk ka arrestuar askënd

 

Prishtinë, 8 maj 2003 - Gjendja shëndetësore e katër të lënduarve nga shpërthimi i mbrëmshëm në Prishtinë është stabile. Ndërkaq një prej tyre ka shkuar në shtëpi, kurse tre të tjerë ndodhen në Qendrën Klinike për kurim të mëtejshëm. Sipas mjekëve të kësaj qendre gjendjen më të rëndë e ka Armend Braholli i cili ka pasur një operacion të komplikuar.

Lidhur me shpërthimin e mbrëmshëm policia është ende duke i zhvilluar hetimet dhe sipas zëdhënësit të saj Refki Morina, nuk është arrestuar askush. Pas mbledhjes së faktve policia do të njoftojë për rezultatet e hetimeve, thotë ai.

Jozyrtarisht mësohet se shpërthimi i mbrëmshëm është pasojë e një konflikti ndërmjet disa personave.

 

Fëmijët jetimë nga Kosova qëndrojnë në Ulqin

Prishtinë, 8 maj 2003 - Në Ulqin më 10 maj do të mbahet manifestimi "Të gjithë për turizëm", me të cilin shënohet hapja e sezonit turistik 2003. Manifestimi do të përcillet me një varg të aktiviteteve të ndryshme kulturore, përkatësisht program të posaçëm artistik-muzikor.

Sezonin turistik në mënyrë simbolike do ta shpallin të hapur 120 fëmijë jetimë nga Kosova, (që i kanë humbur prindët gjatë luftës) të cilët do të jenë të vendosur në familjet ulqinake.

Më saktësisht, në organizim të Këshillit për Mbrojtjen e të Drejtave e të Lirive të Njeriut 120 fëmijë jetimë nga vise të ndryshme të Kosovës (Skënderaj, Vushtrri, Mitrovicë, Therandë (Suharekë) dhe fshati Lybeniq i Pejës), do të qëndrojnë në Ulqin prej 7 - 11 maj 2003.

Gjithashtu në organizim të Asamblesë komunale të Drenasit 100 fëmijë jetimë nga kjo komunë do të qëndrojnë në Ulqin prej 7 11 maj 2003.

Të gjitha shpenzimet për fëmijët jetimë i ka mbuluar nikoqiri, agjencionet turistike të Ulqinit si edhe qytetarët e Ulqinit.

Për fëmijët jetimë nga Theranda materialisht kanë kontribuar Asamblea Komunale e Therandës dhe donatorët lokal si edhe KMDLNJ, ndërkaq kontribut për të gjithë fëmijët jetimë ka siguruar Bali Mekaj, pronar i firmës “Eksim Kosova” nga Peja.

KMDLNJ i informon familjarët e fëmijëve jetimë se fëmijët kanë udhëtuar shumë mirë, janë sistemuar në familjet ulqinake dhe se në pritjen e tyre ka marrë pjesë i tërë qyteti.

  

PVD e pakënaqur me zhvillimet në luginën e Preshevës

 

Preshevë, 8 maj 2003 - Kryesia e Partisë për Veprim Demokratik (PVD) shqyrtoi rrjedhat aktuale politike në Luginën e Preshevës, duke vlerësuar se procesi politik pas konflikteve të armatosura të viteve 2000 dhe 2001, edhe më tutje vazhdon të jetë shumë i ngadalshëm.

Mirëpo, aktualisht në dyvjetorin e fillimit të procesit politik, që në bazë të planit dhe programit të dy qeverive duhet të realizohet brenda tri viteve, Kryesia e PVD-së përmes një komunikate konstaton se në shumë fusha të rëndësishme jetësore ende nuk kanë filluar të bëhen as hapat e parë ndërsa në komunën e Medvegjës, ku edhe më tutje vazhdon të jetë gjendja më e vështirë, ende nuk janë krijuar kushtet elementare për kthimin e popullatës shqiptare.

 

Mirëpo, edhe në ish zonën e sigurisë tokësore dhe në zonën me gjërësi prej 5 km nga kufiri i Maqedonisë vazhdon edhe më tutje gjendje jonormale meqë ka probleme serioze me shfrytëzimin e pronës private dhe qarkullimin e lirë të qytetarëve për shkak të koncentrimit të madh të forcave ushtarake dhe të policisë speciale.

 

Edhe me këtë rast u vlerësua se pengesa kryesore për zhvillimin e një procesi të mirëfilltë politik është vonesa dyvjeçare në transformimin e Trupit Koordinues të angazhuar për zgjidhjen e krizës në Luginën e Preshevës, në të cilin mbizotërojnë përfaqësuesit ushtarakë dhe policorë.

Është e patolerueshme që për problemet e rënda dhe specifike të Luginës së Preshevës të vendoset pa përfaqësuesit legjitim të shqiptarëve, thuhet në komunikatë.

Gjithashtu nuk ka filluar të zgjidhen as problemet shumë të ndieshme në këtë rajon multietnik, në arsim e kulturë, në mbrojtje shëndetësore dhe sociale, në aplikimin zyrtar të gjuhës shqipe dhe në përdorimin e lirë të simboleve kombëtare.

Kryesia e PVD-së vlerëson se edhe përskaj incidenteve sporadike dhe tensionet që i përcjellin këto incidente mbetet i paluhatshëm orientimi i subjekteve politike shiptare, brenda të cilave janë aktivisht të kyçur edhe ish pjesëtarët e UÇPMB-së, për zgjidhjen politike të të gjitha problemeve me të cilat ballafaqohen shqiptarët e Luginës së Preshevës.

Kryesia e PVD-së e analizoi veprimin joparimor të partive opozitare shqiptare, PBDSH dhe LPD, të cilat shpesh së bashku me partitë serbe SPS dhe SPO, po mundohen ta paralizojnë punën e Kuvendit Komunal të Preshevës, thuhet mes tjerash në këtë komunikatë të PVD-së.

 

 

Për shkak të një incidenti mes dy deputetëve ende nuk ka filluar seanca e sotme Kuvendit të Kosovës

 

Prishtinë, 8 maj 2003 - Seanca e sotme e Kuvendit të Kosovës e cila është dashur të fillojë në orën 10.00 është shtyrë mbi një orë e më tepër për shkak të një incidenti që ndodhi ndërmjet dy deputetëve në hollin e Kuvendit.

 

Deputeti i LDK-së Fadil Geci dhe ai i PDK-së Gani Koci kanë shkëmbyer grushta mes vete. Në këtë incident si duket më së shumti ka pësuar deputeti Gani Koci i cili ka kërkuar edhe ndihmën e mjekut.

Ndërkohë është mbledhur Grupi parlamentar i PDK-së për të diskutuar gjendjen e krijuar pas këtij incidenti.

Ndërkohë rreth orës 11.30, Kuvendi i filloi punimet me rendin e ditës, por në sallë nuk ndodhen deputetët e Grupit parlamentar të PDK-së.

 

 

Një fond austriak njofton kosovarët me mundësitë e dëmshpërblimit nga regjimi nacional-socilist

 

Prishtinë, 8 maj 2003 - Organizuar nga Fondi austriak i vëllazërimit - asistencë për skllevërit dhe punëtorët me mëditje të regjimit nacional-socialist në territorin e Austrisë, dje në Prishtinë është mbajtur një konferencë me gazetarë.

 

Kjo konferencë kishte për qëllim informimin e qytetarëve kosoavarë, që personat, të cilët janë keqpërdorur nga regjimi nacional-socilist, të njoftohen me mundësitë e dëmshpërblimit, në qoftë se u takojnë kategorive që i mbulon ky fond.

 

 

Në fshatin Suhadoll të Mitrovicës një grup ekstremistësh serbë u përplas me forcat e KFOR-it

 

Mitrovicë, 8 maj 2003 - Dje në fshatin Suhadoll në veri të Mitrovicës një grup prej 50 ekstremistëve serbë u përplas me forcat paqeruajtëse daneze të KFOR-it.

 

Trazirat shpërthyen kur ushtarët e KFOR-it provuan të heqin barrikadat që serbët i kishin vendosur në në këtë fshat në veri të Mitrovicës me qëllim të pengimit të qarkullimit për banorët shqiptarë që jetojnë në atë pjesë të qytetit.

Një zëdhënës i forcave franceze, tha se protestuesit serbë hodhën gurë mbi automjetet e KFOR-it, ndërkaq këta të fundit u përgjigjen me gaz lotësjellës dhe bomba paralizuese për të shpërndarë turmën e serbëve të cilët kishin bllokuar rrugën në fshatin Suhadoll. Zyrtarë të KFOR-it thonë se asnjë ushtar i KFOR-it nuk është lënduar gjatë trazirave dhe se situata është nën kontrollë.

 

 

R. Harnish: Për momentin bashkësia ndërkombëtare nuk është e gatshme që të merret me statusin përfundimtar të Kosovës

 

Prishtinë, 8 maj 2003 - Shefi i Zyrës Amerikane në Prishtinë ka sqaruar për BBC-në se qëndrimet e SHBA-ve për moratoriumin e propozuar nga udhëheqësi i PDK-së janë se për momentin është mirë që tehu i veprimit të forcave politike të përqëndrohet në përmbushjen e standardeve para statusit.

 

Sipas tij tash për tash bashkësia ndërkombëtare nuk është e gatshme që të merret me statusin përfundimtar të Kosovës.

I pyetur pse SHBA-të nuk e mbështesin afatizimin kohor dhe mekanizmat për statusin përfundimtar të Kosovës, ambasadori Harnish u përgjigj:

"Afatizimi kohor nuk është diçka që është përcaktuar akoma. Unë personalisht mendoj se duhet të vendoset së shpejti. Ne duhet ta caktojmë një datë diku, por nuk e dimë se kjo do të ndodhë".

 

Ambasadori Harnish ka theksuar se Kosova tash për tash është në fazën kur duhet të përmbushë standardet para statusit dhe vetëm pasi që kjo të ndodhë, tha ai, Përfaqësuesi Special i Sekretarit të Përgjithshëm të OKB-së do të reagojë në emër të bashkësisë ndërkombëtare për nismen e diskutimeve për statusin përfundimtar të Kosovës.

Rino Harnish ka thënë se bashkësia ndërkombëtare nuk po merret tash për tash me këtë çështje, prandaj as nuk mund të thuhet se kur do të mund të zgjidhet statusi përfundimtar i Kosovës. "Duhet të shohim se kur është e gatshme bashkësia ndërkombëtare të kemi diskutime për këtë çështje. Nuk mund të them nëse kjo do të bëhet më 2005, 2006 apo 2007", tha z. Harnish.

 

 

Sot në Kosovë sillen trupat e pajetë të 52 shqiptarëve të ekshumuar në varrezën masive afër Beogradit

 

Merdar, 8 maj 2003 - Sot në Merdar UNMIK-ut do t'i dorëzohen kufomat e identifikuara të viktimave shqiptare nga Kosova, që janë gjetur në varrezat masive te poligoni i policisë serbe në Batajnicë afër Beogradit.

 

Në Petrovo Sello, Batajnicë dhe në liqenin Perugja - Vaina Bashta, u gjetën kufomat e 800 viktimave shqiptare, të cilat forcat serbe i varrosën atje për t'u humbur gjurmët e krimit. Siç njoftoi UNMIK-u pas dorëzim-pranimit, kufomat do të vendosen në morgun e Rahovecit.

 

 

SHBA-të ndihmojnë me mbi 14 milion dollarë kthimin e të zhvendosurve dhe refugjatëve në Kosovë

 

Prishtinë, 8 maj 2003 - Z. Rino Harnish, shef Misioni i Zyrës së SHBA-ve në Prishtinë, njoftoi se Qeveria amerikane është duke i akorduar 14,400,000 dollarë për të përkrahur procesin e kthimit të personave të zhvendosur dhe refugjatëve në Kosovë. Kjo shumë është mbi dyfishin e shumës së shpenzuar vitin e kaluar për kthimet (5,731,461), dhe është një demonstrim i qartë i përkushtimit të popullit amerikan për banorët e zhvendosur të Kosovës.

Sipas z. Harnish, "ky financim tregon për prioritetin e lartë që të kthimet kanë për Qeverinë amerikane. Shtetet e Bashkuara janë fuqishëm të përkushtuara të ndihmojnë qeverinë dhe popullin e Kosovës në përmbushjen e tetë standardeve që ne i zhvilluam së bashku me partnerët tonë ndërkombëtarë për të ndihmuar Kosovën të demonstrojë aftësitë e saja për një vetëqeverisje efektive.

 

Njëri nga këto standarde nënkupton zgjidhjen e problemit të qytetarëve që janë të zhvendosur nga shtëpitë e tyre, posaçërisht ata të komuniteteve pakicë".

Me këtë shumë 14 milionë dollarësh, thekson më tutje z.Harnish "Shtetet e Bashkuara i demonstrojnë popullit të Kosovës dhe çdonjërit në rajon se ne besojmë që tani është koha e përshtatshme që personat e zhvendosur të kthehen në shtëpitë e tyre nëse ata dëshirojnë të bëjnë një gjë të tillë.

 

Tani i përket liderëve lokalë dhe politikë në Kosovë, Sërbi, Mal të Zi dhe Maqedoni që të punojnë së bashku në mënyrë konstruktive në zgjidhjen e kërkesave për pronësi, që t'i ndihmojnë qytetarët të kthehen në shtëpitë e tyre nëse ata dëshirojnë një gjë të tillë, apo të integrohen në bashkësitë në të cilat ata tani jetojnë, nëse kjo është zgjedhja e tyre".

 

Por njëkohësisht kërkohet që liderët në Serbi dhe Mal të Zi të japin një pasqyrë të saktë të situatës për të kthyerit në Kosovë, ashtu që personat e zhvendosur të jenë në gjendje që vetë të zgjedhin duke u bazuar në informata të sakta dhe duke punuar me institucionet e Kosovës për të ndihmuar kthimin e tyre.

 

 

Mbrëmë nga një shpërthim i fuqishëm në Prishtinë janë lënduar katër të rinj

 

Prishtinë, 8 maj 2003 - Mbrëmë rreth orës 21.40 në diskotekën "Nju-Jork" në lagjen Dardania të Prishtinës ka ndodhur një shpërthim i fuqishëm. Katër persona janë lënduar, prej të cilëve tre rëndë. Ata ndodhën në Qendrën Klinike Universitare të Prishtinës. Sipas policisë janë lënduar:

 

Fitim Berisha (1984), Xhemshit Gashi (1985), Arben Braholli (1984), mësohet se është nga Kodra e Trimave, gjithashtu edhe Armend Braholli (1984) banor i Lagjes së spitalit, të gjithë nga Prishtina.

 

Ndërkaq sipas mjekëve në Qendrën Klinike në emergjencë njoftohet se tre prej tyre janë më të lënduar, ndërkaq njëri prej tyre ka marrë lëndime më të lehta trupore.

Policia nuk ka dhënë hollësi për këtë shpërthim dhe se ende nuk ka asnjë të arrestuar.

 

 

Në Kuvendin komunal të Dardanës është arritur marrëveshja qeverisjeje mes LDK-së dhe AAK-së

 

Dardanë, 8 maj 2003 - Pas disa muajsh zvarritjeve në punën e Kuvendit komunal të Dardanës është arritur marrëveshja mes LDK-së dhe AAK-së për të bashkëpunuar në periudhën katërvjeçare dhe kështu është siguruar funksionaliteti i Kuvendit.

 

Marrëveshja u bë e ditur në mbledhjen e djeshme të jashtëzakonshme të Asamblesë komunale të Dardanës, në të cilën u formua edhe kolegji për intervestimin e kandidatëve për drejtorë të drejtorive.

 

Kjo marrëveshje është e rëndësishme për faktin se asnjë subjekt politik nuk ka fituar shumicën e votave dhe faktikisht katër këshilltarët serbë ishin ata të cilët vendosnin për ndonjë vendim në kuvend.

 

Përkundër kësaj marrëveshje 9 këshilltarët e PDK-së nuk morën pjesë as në mbledhjen e djeshme, duke qenë të vendosur në qëndrimin e tyre rreth zgjedhjes së kryeshefit, por 14 këshilltarët e LDK-së dhe katër të AAK kalojnë 50 për qindshin për të marrë vendime dhe kështu qëndrimi i këshilltarëve serbë nuk do të jetë më vendimtar.

 

 

Futboll: Në çerekfinale të Kupës së Kosovës, Prishtina mundi Dritën e Gjilanit me rezultat 2:1

 

Prishtinë, 8 maj 2003 – Dje u zhvilluan ndeshjet e para të çerekfinales së Kupës së Kosovës në futboll. Vetëm takimi në Pejë, në mes të Shqiponjës dhe Vëllaznimit përfundoj pa gola (0:0), ndërkaq në tri takimet tjera çerekfinale fitore shënuan skuadrat vendëse.

 

Fitoren më të lartë e arriti Gjilani, i cili mposhti Drenicën me rezultat të thellë 5:0 dhe me këtë rezultat ata me një këmbë janë në gjysmëfinale të Kupës së Kosovës.

Prishtina mundi Dritën, por me rezultat minimal 2:1, kështu që gjysmëfinalisti nga ky duel megjithatë do të përcaktohet në Gjilan. Edhe Liria, përkundër lojës së mirë që bëri nuk arriti më shumë se në gol të shënojë në takimin kundër KEK-ut, skuadër kjo nga Liga e dytë e Kosovës.

Rezultatet komplete të çerekfinales janë:

Prishtina – Drita 2:1

Liria – KEK-u 1:0

Gjilani – Drenica 5:0

Shqiponja – Vëllaznimi 0:0

Ndeshjet e kthimit të çerekfinales zhvillohen pas një jave.

 

 

Liga e Kampionëve: Milan – Inter 0:0

 

Milano, 8 maj 2003 – Mbrëmë në stadiumin e njohur të Milanos "Giuseppe Meazza" u zhvillua ndeshja e parë e gjysmëfinales së dytë të Ligës së Kampiuonëve, në mes të skuadrave milaneze, Milan dhe Inter.

Edhe pse kishte raste për gola në të dy anët, si nga Milan ashtu edhe nga Inter, megjithatë ndeshja përfundoi pa gola (0:0). Kështuqë në ndeshjen e kthimit Interi shkon me nje përparësi të vogel ndaj Milanit.

 

 

Në takimin e Selanikut do të kërkohet nga vendet e Ballkanit Perëndimor që të ndërmarrin reforma të shpejta

 

Shkup, 8 maj 2003 - Delegacioni i Komisionit Evropian në Maqedoni bëri të ditur se në takimin e nivelit të lartë të Selanikut që do të mbahet së shpejti, vendeve të Ballkanit Perëndimor do t'u kërkohet që atë ndërmarrin reforma të shpejta për të mirën e popujve, por edhe për interesin e përbashkët të popujve të vendeve të BE-së.

 

Zyrtarët e kësaj organizate i bënë këto komente në Shkup me rastin e festës së "Ditës së Evropës" më 9 maj. Kjo ditë e ka zanafillën me shpalljen e Deklaratës për një Evropë të bashkuar në vitin 1950 nga ministri i atëhershëm gjerman Robert Shuman.

 

 

Marrëveshja që qytetarët e Kosovës mund të hyjnë me veturat e tyre në Maqedoni hyn në fuqi prej sot

 

Shkup, 8 maj 2003 - Zëdhënësi i Qeverisë maqedonase, Sasho Çollakovski, duke komentuar marrëveshjen ndërmjet UNMIK-ut dhe Maqedonisë që qytetarët e Kosovës mund të hyjnë në këtë vend me automjetet e tyre pa pagesën e obligueshme, ka thënë:

 

"Marrëveshja e nënshkruar midis Byrosë kombëtare në Shkup dhe administratës së UNMIK-ut do të lehtësojë komunikimin midis qytetarëve të Maqedonisë dhe të Kosovës dhe si e tillë është në interesin e tyre. Ajo hyn në fuqi që prej sot".

 

 

Ambasadori gjerman në Beograd thotë se ende është herët të thuhet nëse Kosova do të bëhet shtet i pavarur

 

Beograd, 8 maj 2003 - Ambasadori gjerman në Beograd Kurt Leonmberger në Beograd deklaroi se është ende herët të thuhet nëse Kosova do të bëhet shtet i pavarur apo jo. Ai sugjeroi që bisedimet për statusin e Kosovës nuk mund të zhvillohen pa Beogradin. Sipas tij është detyrë e UNMIK-ut që të sigurojë respektimin e standardeve më të larta të të drejtave të njeriut.

Ambasadori gjerman pastaj ka theksuar se Gjermania së bashku me partnerët e saj në KS të OKB-së ka konstatuar se statusi i Kosovës është i pazgjidhur dhe ka shtuar se ka mirëkuptim të plotë për iniciativën e të ndjerit kryeministër Zoran Gjingjiq, që Beogradi të inkuadrohet intenzivisht në shqyrtimin e statusit të Kosovës.

Ambasadori Leonberger i bëri këto komente gjatë një vizite në qytetin e Nishit.

 

 

Ministri i brendshëm maqedonas thotë nuk ka të dhëna për shpërndarjen e uniformave për shqiptarët

 

Shkup, 8 maj 2003 - Ministri i brendshëm maqedonas, Hari Kostov e ka vlerësuar gjendjen e sigurisë më të mirë krahasuar dhe ka shtuar se nuk ka kurrëfarë të dhënash për shpërndarjen e uniformave në mënyrë të organizuar.

 

Por ai thotë se ka grupe që sipas tij kanë qëllime kriminale dhe terroriste. Kostov ka thënë se janë 5-10 persona dhe sipas tij nuk mund të ndërmerren veprime frontale me pajisje të mekanizuar, por ndërmerren aksione si ai në Bogovinë.

 

 

Tiranë: Hapet procesi i legalizimit të Bathores

 

Tiranë, 8 maj 2003 - Më shumë se 40 mijë banorë të rinj të Tiranës, ata të zonës së Bathores, për herë të parë dje kanë marrë frymë disi të lehtësuar, kur kanë dëgjuar vendimet e Këshillit të Rregullimit të Territorit të Republikës.

Ky Këshill, i kryesuar nga kryeministri Nano, e ka cilësuar dje Bathoren "qendër urbane", gjë që do të thotë hapje e procesit të legalizimit të banesave.

Sipas BBC, tani më të lehtë do ta kenë ata pak banorë që janë vendosur në Bathore duke blerë truallin e banesës tek ish-pronarët e tokës.

Këshilli i Rregullimit ka vendosur që të bëhet studimi i planit të zhvillimit strategjik urban për këtë zonë.
Vendimet lidhur me Bathoren merren pas protestës së dhunshme të dy javëve më parë të banorëve të kësaj zone, të cilët, të vendosur aty në vitet pas regjimit komunist, ankohen tashmë jo vetëm për statusin e paligjshëm të ndërtesave, por edhe për prapambetjen në shërbimet jetësore si furnizimi me ujë, energji elektrike etj.

 

 

Presidenti Bush pret Kryeminsitrin e Spanjë Aznar

 

Uashington, 8 maj 2003 - Presidenti Bush e ftoi Kryeministrin spanjoll, Aznar, në Shtëpinë e Bardhë për ta falenderuar personalisht atë për mbështetjen në luftën me Irakun. Por ai e bëri të qartë se aleatëve u mbetet ende shumë punë për të bërë, si në Irak ashtu edhe në Kombet e Bashkuara.

Zoti Bush tha se Shtetet e Bashkuara, Britania e Madhe dhe Spanja do të paraqesin një rezolutë në Këshillin e Sigurimit për heqjen e sanksioneve që iu vunë Irakut pas pushtimit të Kuvajtit nga Saddam Husseini në vitin 1990. Ai tha se sanksionet kishin si objektiv një regjim që nuk sundon më në Irak.

 

 

Bler: Vendet kundërshtare të luftës së Irakut të bashkëpunojnë për rindërtimin e tij

 

Londër, 8 maj 2003 - Kryeministri britanik, Toni Bler u ka kërkuar kundërshtarëve të luftës së Irakut, si Franca, Gjermania dhe Rusia që të bashkëpunojnë në rindërtimin e Irakut.

 

E kaluara tani duhet lënë pas vetes dhe të synohen rezoluta të përbashkëta të OKB-së, për të arritur më të mirën për popullin irakian, tha Bler pas një takimi në Londër me kryeministrin australian, Xhon Houard.

 

Tani duhet të garantohet që Iraku të bëhet një vend stabil dhe i lulëzuar, me një qeveri të zgjedhur nga populli, tha Bler. Iraku mund të bëhet forcë shtytëse për më shumë stabilitet në rajon, tha kryeministri britanik.

 

 

Gjermania nuk do të marrë pjesë në trupën e planifikuar paqeruajtëse për Irakun

 

Berlin, 8 maj 2003 - Qeveria gjermane ka refuzuar një propozim përkatës nga pala polake. Ministri gjerman i Mbrojtjes Peter Shtruk, gjatë një vizite në Kopenhagen, ra dakort megjithatë me homologët e tij nga Danimarka dhe Polonia për vënien e oficerëve polakë të korpusit gjermano-danezo-polak të Veri-lindjes në dispozicion të kësaj trupe për Irakun.

 

Gjermania me këtë refuzim vazhdon politikën e saj ndaj luftës së Irakut tha zëdhënësi i qeverisë gjermane në Berlin Bela Anda. Zëdhënësi i ministrit gjerman të mbrojtjes ka bërë të ditur se rreth 50 ushtarë polakë do të lirohen për misionin në Irak.

 

Vizita e Struk në Kopenhagën bëhet me rast e takimit të ministrave të mbrojtjes së Gjermanisë, Danimarkës dhe Polonisë me homologët e tyre nga Estonia, Letonia dhe Lituania.

 

 

Autoritetet amerikane kanë siguruar shumë dorëshkrime dhe objekte arti nga Muzeu Kombëtar në Bagdad

 

Uashington, 8 maj 2003 - Siç u bë e ditur zyrtarisht në Uashington ndër to bëjnë pjesë dhe një amforë 7000 vjet e lashtë dhe një pllakë guri me mbishkrime nga koha e mbretit Nebukadnezar. Antikat kishin humbur gjatë plackitjeve të muzeut pas rrëzimit të regjimit irakian.

 

Më tej autoritetet amerikane bëjnë të ditur se një numër objektesh arti të deklaruar të humbur janë rigjetur në qilaret e muzeumeve.

 

Mendohet se ato janë vendosur në qilare për arsye sigurie në fillim të luftës. Trupat amerikane po bashkëpunojnë me drejtuesit dhe punonjësit e muzeumeve për hartimin e listave me objektet që rezultojnë vërtet të humbura.

 

 

Departamenti i Shtetit ka futur në listën e grupeve terroriste partinë baske në Spanjë Batasuna

 

Uashington, 8 maj 2003 - Siç u bë e ditur zyrtarisht futja në këtë listë ka si pasojë ngrirjen e të gjitha pasurive të kësaj partie në SHBA. Partia baske Batasuna është e afërt me organizatën terroriste ETA.

 

Njoftimi për futjen e saj në listen e grupeve terroriste i paraprin vizitës në Uashington të kryeministrit spanjoll Hoze Maria Aznar. Qeveria në Madrid pati mbështetur në mënyrë të vazhdueshme kursin amerikan gjatë luftës së Irakut. Spanja është aktualisht një nga anëtarët jo të përhershëm të Këshillit të Sigurimit të Kombeve të Bashkuara.

 

 

Një helikopter izraelit ka vrarë në qytetin Gaza të pakten një person

 

Gaza, 8 maj 2003 – Një helikopter izraelit ka shkrehur dy predha në një veturë në qytetin Gaza dhe kështu ka vrarë sot (të enjten) të pakten një person, kanë bërë të ditur burimet e policisë palestineze dhe dëshmitarët, njofton Rojter.

 

Një burim izraelit ka deklaruar se predhat kanë vënë në shenjestër një militant islamik të grupit të Hamasit. Policia palestineze ka thënë në vendngjarje se ka ndodhur një vrasje, po nuk mund të idfentifikojnë menjëherë viktimën.

 

 

Numri i përgjithshëm i të vdekurve nga virusi SARS ka kaluar sot (të enjten) shifrën 500

 

Pekin, 8 maj 2003 – Numri i përgjithshëm i të vdekurve nga virusi SARS ka kaluar sot (të enjten) shifrën 500 pasi Kina ka njoftuar edhe pesë vdekje të reja, njofton Rojter. Ministria e shëndetësisë ka deklaruar se edhe 146 njerëz të tjerë janë infektuar dhe kështu, numrin e rasteve të tilla në botë e kanë ngritur në 4,698 sosh.

 

 

Janë arrestuar tre burra palestinezë në lidhje me sulmet me bombë

 

Tripoli, Liban, 8 maj 2003 – Autoritet libaneze kanë arrestuar gjatë natës tre burra palestinezë, të dyshimtë në lidhje me sulmet me bombë kundër një restorani perendimor për ushqim të shpejtë, kanë bërë të ditur sot (e enjte) burimet e sigurimit libanez dhe palestinez, njofton Rojter.

 

Arrestimet janë bërë një ditë pasi zyrtarët libanezë kanë deklaruar se anëtarët e rrjetit të fajësuar për këto bombardime, kishin planifikuar të vrasin edhe ambasadorin amerikan Vinsent Batle në veri të qyteti të Tripolit.

 

 

Në autobusin e aksidentuar gjerman në Hungari kanë humbur jetën 32 veta

 

Budapest, 8 maj 2003 – Sipas burimeve të AFP-së, në aksidentin e trafikut kur, siç kemi njoftuar në edicionet e mëhershme, janë përplasur një autobus turistik gjerman me një tren udhëtarësh në Hungari, kanë humbur jetën të pakten 32 persona nga autobuisi gjerman.

 

 

SHBA paraqesin në KS një projektrezolutë për heqjen e sanksioneve

 

Nju Jork, 8 maj 2003 - SHBA do të paraqesin brenda kësaj javë në Këshillin e Sigurimit të Kombeve të Bashkuara një projekt-rezolutë për heqjen e sanksioneve të Kombeve të Bashkuara kundër Irakut. Kjo u bë e ditur nga ministri amerikan i punëve të jashtme Kolin Pauell pas një bisede me sekretarin e OKB-së Kofi Anan.

 

Pauell tha se projekt-rezoluta synon krijimin e kushteve më të mira të jetës për irakianët. Në debatin për projekt-rezolutën nuk do të ketë kthim në polemikën e së kaluarës ka thënë Pauell duke iu referuar polemikave përpara luftës së Irakut. Kombet e Bashkuara patën vendosur sanksionet kundër Irakut në verën e vitit 1990 pas pushtimit prej tij të Kuvajtit fqinj.