Lajme

E hëne, 5 maj 2003

Përmbajtja:

• Presidenti Rugova mori pjesë në përurimin e një nisme të re të Posttelekomit të Kosovës

• Nesër në Prishtinë organizohet një akademi përkujtimore për Fehmi Aganin

• A.Gashi: LDK-ja i kundërshton përpjekjet e Serbisë për ndërhyrje në çështjet e brendshme të Kosovës

• R.Trajkoviq kërkon që ushtarët serbo-malazezë të vijnë në Kosovë në kuadër të forcave ndërkombëtare

• KKSHA-ja do të organizojë më 9 maj një forum publik të ardhmen e Kosovës

• N. Daci: Fërkimet me UNMIK-ut bëhen për shkak se besojmë në forcën tonë për të udhëhequr Kosovën

• Një helikopter i kontigjentit gjerman të KFOR-it në Kosovë është rrëzuar por pa pasoja për ekuipazhin

• Sipas një diplomati në disa fshatra të Maqedonisë kryetarët e komunave po u ndajnë uniforma shqiptarëve

• V. Buçkovski thotë se nuk mund të konfirmojë lajmin se prefektët u shpërndajnë uniforma shqiptarëve

• Presidenti Moisiu ka theksuar se nuk duhet të politizohet mosdekretimi i marrëveshjes ushtarake Shqipëri-Greqi

• Dosta Dimovska ka dhënë dorëheqje

• Ndihmëssekretari amerikan i Shtetit u takua në Ramallah me kryeministrin e ri palestinez

• Nga virusi SARS në Kinë kanë vdekur edhe 9 persona

• Në Bangladesh nga stuhia e erës vdesin 19 njerëz

• Seria e tornadove dhe e erërave të fuqishme në SHBA kanë shkaktuar vdekjen e 29 personave

• Xhej Garner: Udhëheqja e përkohshme kolektive në Irak do të zgjedhet deri nga mesi i majit

• Një seri tornadosh në SHBA kanë shkaktuar vdekjen e të pakten 16 personave

• Nga një shpërthim bombe në Kashmirin indian ka humbur jetën një person dhe janë plagosur 17 të tjerë

• Presidenti Bush e ka përshëndetur nënshkrimin e kartës së Adriatikut

• Kryeministri israelit mund të takohet së shpejti me kryeministrin palestinez

• Ramsfeld: Lufta në Irak i ka dërguar një mesazh të fuqishëm vendeve të tjera

• Papa shenjtëron 5 figura të tjera të Kishës Katolike

• Pauell paralajmëron Sirinë për "pasoja"

• "Soyuz"-i kthehet i sigurtë nga Gjithësia

Presidenti Rugova mori pjesë në përurimin e një nisme të re të Posttelekomit të Kosovës

 

Prishtinë, 5 maj 2003 - Posttelekomi i Kosovës bëri sot prezentimin e nismës "Kosova Broadband Initituive", në të cilën përfshihet ofrimi i shërbimeve të gjera të telekomunikacionit, mbulimin i rrjetit në mbarë Kosovën, ofrimi i shërbimeve të shpejta në Internet etj.

 

Në këtë mënyrë qytetarët e Kosovës mund të kryejnë shërbime të ndryshme në fushë të postës, të telefonisë dhe të Internetit. Kjo do t'u mundësoje shfrytëzuesve të Kosovës shërbime të lira e të shpejta, u tha me këtë rast.

Në një solemnitet të organizuar me këtë rast mori pjesë edhe presidenti i Kosovës Ibrahim Rugova dhe zyrtarë të tjerë të Kosovës dhe të komunës së Prishtinës.

Presidenti Rugova përkrahu këtë nismë të telekomunikacionit duke shprehur falënderimet e tij për kompaninë amerikane, e cila në Kosovë mund të ndihmojë në bashkëpunim me PTK-në. "Duhet bërë çmos që kompani të ndryshme të vijnë në Kosovë dhe të zhvillojnë rrjetin e postëtelefonisë në Kosovë", theksoi me këtë rast presidenti Rugova.

 

Ai tha se në Kosovë janë shënuar përparime në fushën e komunikimit me internet dhe është bërë mjaft për dinamizimin e përdorimit të Internetit.

Ndërkaq, drejtoresha e PTK-së, Leme Xhema, u shpreh se është optimiste në realizimin e kësaj nisme, duke shtuar se kjo nismë një fushë e re e Postëtelekomit të Kosovës, por shpreson se kompaninë amerikane Broadband (BB) do ta përkrahin të gjitha institucionet e Kosovës.

 

Ajo tha se është një nismë mjaft me rëndësi që do t'i sjellë Kosovës rezultate, të cilat do të mundësojnë shërbime më të mira për mbulimin e tërë territorit të saj. Sipas zonjës Xhema kjo është mënyrë e vetme për të mundur Postëtelekomi i Kosovës të përgatitet për konkurrencë, sepse ndryshe PTK-ja nuk do të mund të jetë konkurrente në treg, tha ajo.

Gjithashtu edhe Agron Rrustemaj, drejtor i Dardanetit, tha se me projektin në fjalë do të përfitojnë qytetarët e Kosovës, por edhe firmat e huaja dhe të vendit.

 

Sipas tij, realizimi i kësaj nisme do të mundësojë shërbime shumë më të mira për qytetarët e Kosovës dhe që ata të mos presin më para PTK-së për shëbime. Rrustemaj tha se projekti pas tri vjetëve do të ketë 600 mijë konsumatorë.

 

 

Nesër në Prishtinë organizohet një akademi përkujtimore për Fehmi Aganin

 

Prishtinë, 5 maj 2003 - Me rastin e 4-vjetorit të vrasjes së akademik Fehmi Aganit, Lidhja Demokratike e Kosovës, nesër, më 6 maj, organizon një akademi përkujtimore, e cila mbahet në në orën 12.00, në Teatrin Kombëtar në Prishtinë.

Për figurën prej politikani e shkencëtari të Fehmi Aganit në këtë akademi përkujtimore do të flasin presidenti i Kosovës Ibrahim Rugova dhe akademik Rexhep Ismajli.

 

Fehmi Agani u ekzekutua mizorisht nga forcat kriminale serbe më 6 maj të vitit 1999.

 

 

A.Gashi: LDK-ja i kundërshton përpjekjet e Serbisë për ndërhyrje në çështjet e brendshme të Kosovës

 

Prishtinë, 5 maj 2003 - Duke komentuar deklaratat serbe për themelimin e të ashtuquajturit "Këshill shtetëror serb për Kosovën", Dr.Alush Gashi, sekretar për marrëdhënie me jashtë të LDK-së dhe deputet në Parlamentin e Kosovës, i deklaroi QIK-ut se Lidhja Demokratike e Kosovës i kundërshton përpjekjet e vazhdueshme të Serbisë për ndërhyrje në çështjet e brendshme të Kosovës. Qëndrimet e tilla i pamundësojnë përpjekjet e shumicës në Kosovë që të bëjë më shumë për minoritetin serb në Kosovë, thotë z.Gashi.

"Ne e njohim të drejtën për interesim për pakicën serbe, por e kundërshtojmë veprimin e Serbisë për vendosje në emër të pakicës serbe", nënvizon Dr.Alush Gashi.

 

 

R.Trajkoviq kërkon që ushtarët serbo-malazezë të vijnë në Kosovë në kuadër të forcave ndërkombëtare

 

Beograd, 5 maj 2003 - Deputetja e kolacionit serb "Kthimi" në Kvendin e Kosovës Rada Tarjkoviq kërkon që njësitët e ushtrisë serbo-malazeze të përfshihen në forcat ushtarake ndërkombëtare në Kosovë, njoftojnë mediat serbe.

 

Duke marrë parasysh se ushtria serbo-malazeze është "rehabilituar", thotë ajo, dhe se pjesëtarët e saj ndodhen në Timorin Lindor në kuadër të misionit të OKB-së, ajo mendon se nuk ka pengesa që të jenë prezente edhe në forcat e OKB-së në Kosovë. Dhe sipas zonjës Trajkoviq këto forca do të kishin për qëllim të mbrojnë jo vetëm qytetarët e rrezikuar joshqiptarë por edhe ata shqiptarë!

Zyrtarët e Beogradit kanë kërkuar vazhdimisht që forcat ushtarake policore të kthehen në Kosovë, por kjo kërkesë e tyre është hedhur poshtë vendosmërisht nga KFOR-i dhe UNMIK-u.

 

 

KKSHA-ja do të organizojë më 9 maj një forum publik të ardhmen e Kosovës

 

Uashington, 5 maj 2003 - Këshilli Kombëtar Shqiptaro-Amerikan (KKSHA) do të organizojë një forum publik me zyrtare të Departamentit amerikan të Shtetit për të diskutuar të ardhmen e Kosovës. Ky forum do të mbahet më 9 maj në Nju Jork.

Janë ftuar të marrin pjesë në këtë forum Donald Braun, zëvendës-drejtor për Kosovën në Zyren e Çështjeve të Evropes Qendrore dhe Jugore ne Departamentin e Shtetit Amerikan, Z. Joshua Black, zyrtar mbi ceshtjet e Kosoves dhe Martin Vulaj, Drejtor i Pergjithshem i KKSHA-se, si dhe përfaqësues të organizatave shqiptaro-amerikane dhe anëtarë të komunitetit shqiptar në Amerikë.

Në këtë forum, zyrtarët e Departamentit të Shtetit do të diskutojnë perspektivat dhe qëndrimin politik të qeverisë amerikane mbi të ardhmen e Kosovës, si dhe do te flasin mbi sfidat që po has Kosova sot gjatë procesit të ndërtimit të institucioneve demokratike.

 

 

N. Daci: Fërkimet me UNMIK-ut bëhen për shkak se besojmë në forcën tonë për të udhëhequr Kosovën

 

Gjilan, 5 maj 2003 - "Fërkimet e fundit me UNMIK-ut bëhen për shkak se besojmë në forcën tonë për të udhëhequr Kosovën", ka deklaruar kryeparlamentari Nexhat Daci dje në fshatin Zhegër të Gjilanit, në përurimin e shtëpisë së komandantit të UÇK-së Agim Ramadani.

Z. Daci me këtë rast ka thënë: "Ne po kërkojmë frutat e arave tona, që ne i kemi mbjellë dhe i kemi korrë ne t'i disponojmë. Ne besojmë se do t'ia dalim". Sipas tij tashmë është fituar përkrahja e Zyrës austriake.

 

Qëndrim të ngjashëm ka edhe Zyra britanike, e cila shprehet se përgjegjësitë, obligimet, që u takojnë kosovarëve duhet të kalojnë tek institucionet vendore, ka thënë kryeparlamentari Daci, duke shtuar se vetëm kështu do të kryhej edhe misioni i UNMIK-ut.

 

 

Një helikopter i kontigjentit gjerman të KFOR-it në Kosovë është rrëzuar por pa pasoja për ekuipazhin

 

Prizren, 5 maj 2003 - Një helikopter i kontigjentit gjerman të KFOR-it në Kosovë është rrëzuar për shkaqe të panjohura. Të katërt anëtarët e ekuipazhit kanë shpëtuar dhe nuk janë plagosur. Helikopteri luftarak u rrëzua në një lumë 15 kilometra në veriperëndim të Prizrenit.

 

Ekspertët e KFOR-it do të hetojnë shkakun e këtij aksidenti, tha një zëdhënës i sektorit të përbashkët gjermano-italian në Kosovë.

 

 

Sipas një diplomati në disa fshatra të Maqedonisë kryetarët e komunave po u ndajnë uniforma shqiptarëve

 

Shkup, 5 maj 2003 - Një diplomat i huaj në Shkup ka thënë se ka të dhëna se që në disa fshatra të Maqedonisë kryetarët e komunave po u ndajnë uniforma shqiptarëve, duke e cilësuar këtë si pjesë të skenarit për destabilizimin e Maqedonisë.

 

Njëkohësisht Misioni ndërkombëtar në Maqedoni ka pranuar se posedon të dhëna se në disa fshatra të Malit të Sharrit në rrethinat e Tetovës dhe Kumanovës kryetarët e këtyre komunave janë duke ndarë uniforma shqiptarëve vendorë.

 

Sipas një diplomatit të panjëjtësuar perëndimor kryetarët e komunës së Tetovës dhe Kumanovës janë duke ndarë uniforma dhe se këta dy drejtues komunalë janë anëtar të Partisë Demokratike Shqiptare. Bashkësia ndërkombëtare ka fotografinë e plotë se çfarë po ndodh saktësisht në terren.

 

Shërbimet e fshehta ndërkombëtare kanë të dhëna se kohët e fundit janë duke iu ndarë uniforma banorëve shqiptarë në malet e Sharrit dhe atyre të rrethinës së Kumanovës, thekson ky diplomat perëndimor.

 

Ai ka thënëse se kjo është pjesë e destabilizimit të Maqedonisë në të cilën janë duke marrë pjesë Arbër Xhaferi dhe Menduh Thaçi. Ky i fundit para disa ditëve ka kërcënuar destabilizimin e Maqedonisë.

 

 

V. Buçkovski thotë se nuk mund të konfirmojë lajmin se prefektët u shpërndajnë uniforma shqiptarëve

 

Shkup, 5 maj 2003 - Ministri maqedonas i Mbrojtjes Vllado Buçkovski ka deklaruar se nuk mund të konfirmojë pohimet sipas të cilave në disa fshatra të Kumanovës dhe Tetovës prefektë shqiptarë shpërndajnë uniforma për vendësit e tyre.

 

Ai ka nënvizuar se nëse një gjë e tillë konfirmohet qeveria e tij do të ndërmarrë masa energjike dhe do t'i pengojë të gjitha përpjekjet për destabilizimin e Maqedonisë.

 

 

Presidenti Moisiu ka theksuar se nuk duhet të politizohet mosdekretimi i marrëveshjes ushtarake Shqipëri-Greqi

 

Tiranë, 5 maj 2003 - Presidenti i Shqipërisë Alfred Moisiu ka paralajmëruar që të mos politiizohet mosdektretimi nga ana e tij e marrëveshjes ushtarake mes Shqipërisë dhe Greqisë. Moisiu e ka quajtur politizimin për këtë çështje pasojë për mosfirmosjen dhe ka paraqitur rezervat vetëm të natyrës teknike për disa formulime.

 

Ministri i Mbrotjes të Shqipërisë Pandeli Majko paralajmëroi se Shqipëria do të tregohet e matur në raportet e saj me Greqinë në konfliktin që lidhet me legalizimin e emigrantëve shqiptarë.

 

 

Dosta Dimovska ka dhënë dorëheqje

 

Shkup, 5 maj 2003 - Dosta Dimovska ka dhënë dorëheqje nga funksioni drejtoreshës së Agjencisë së Zbulimit të Maqedonisë.

Në një letër dërguar presidentit Trajkovski, në të cilën justifikohen arsyet e dorëheqjes, Dimovska thotë se kjo ka qenë e domosdoshme për shkak të fushatës së pashembullt që është zhvilluar kundër saj.

Mbi Dosta Dimovskën kanë rënduar akuza të ndryshme, por atë e ka falur me një dekret presidenti maqedonas Boris Trajkovski, duke shkaktuar reagime të shumta në vend.

 

 

Ndihmëssekretari amerikan i Shtetit u takua në Ramallah me kryeministrin e ri palestinez

 

Ramallah, 5 maj 2003 – Një emisar i lartë amerikan ka zhvilluar sot (e hënë) bisedime me kryeministrin e ri palestinez, Mahmud Abas, duke anashkaluar presidentin Jaser Arafat në kontaktet e nivelit të lartë për paqe, njofton Rojter.

 

Ndihmëssekretari i amerikan i Shtetit, Uilliam Bërns, gjatë kësaj vizite, po e përgatit terrenin para vizitës së sekretarit të Shtetit, Kolin Pauell, që pritet të bëjë më vonë gjatë javës me qëllim të bashkërendimit të proceseve paqësore në rajon.

 

Njoftohet se projektplani amerikan për paqe, që synon t'i japë fund dhunës 31 muajëshe izraelito-palestineze dhe krijimin e shtetit palestinez deri në vitin 2005, ka qenë në axhendë të bisedimeve ndërmjet Bërnsit dhe Abasit, që u zhvilluan në Ramallah të Bregut Perëndimor.

 

 

Nga virusi SARS në Kinë kanë vdekur edhe 9 persona

 

Pekin, 5 maj 2003 - Nga virusi SARS në Kinë kanë vdekur edhe 9 persona, ndërkohë që janë paraqitur edhe 163 të sëmurë të rinj, ka bërë sot të ditur Ministria kineze e Shëndetësisë. Numri i viktimave nga SARS-i në Kinë ka arritrur 260 vetë.

Ndryshe në Pekin mbretëron panik i vërtetë në mesin e popullsisë. Autoritetet kineze kanë ndaluar notin, peshkimin dhe lundrimin me vela, si dhe është ndaluar hyrja në rezervoaret e ujit.

Një studim ka treguar se virusi SARS mund të jetojë 24 orë ndërkaq në kanalizim katër ditë.

 

 

Në Bangladesh nga stuhia e erës vdesin 19 njerëz

 

Daga, Bangladesh, 5 maj 2003 - Një erë e fuqishme tropikale që ka përfshirë mbrëmë disa fshatra në Bangladeshin Lindor, rreth 80 km larg kryeqytetit Daka, ka marrë jetën e 19 njerëzve, ndërkaq disa persona konsiderohen si të zhdukur. Trupat e të vdekurve janë nxjerrë nën gërmadhat e shtëpive, të cilat për shkak të stuhisë së fuqishme janë shembur.

 

 

Seria e tornadove dhe e erërave të fuqishme në SHBA kanë shkaktuar vdekjen e 29 personave

 

Qyteti Piersi, SHBA, 5 maj 2003 – Seria e tornadove dhe e erërave të fuqishme, që i kanë goditur tri shtete të SHBA-ve, kanë shkaktuar vdekjen e 29 personave dhe kanë shkatërruar një brez të gjerë prej një qerek mile, njofton AP.

 

Stuhia e tornadove ka kapur shtetet qendrore të SHBA-ve: Kanzas, Misuri dhe Tenesi. Kështu, në qytetin Piersi, prej rreth 1,400 banorësh, pothuajse s'ka mbetur shtëpi apo biznes i paprekur.

 

Drurët janë shkulur, linjat elektrike janë këputur, copërat e xhamave të thyer kanë bërë të pamundur ecjen nëpër rrugët e qytetit.

 

 

Xhej Garner: Udhëheqja e përkohshme kolektive në Irak do të zgjedhet deri nga mesi i majit

 

Bagdad, 5 maj 2003 – Administratori civil amerikan, Xhej Garner ka deklaruar sot (e hënë) se udhëheqja e përkohshme kolektive në Irak do të zgjedhet deri nga mesi i majit, njofton Rojter.

 

Garner gjithashtu ka thënë se ai pret që këtë grup udhëheqës ta përbëjnë deri në nëntë irakianë. Në këtë grup do të marrin pjesë disa irakianë të kthyer nga ekzili dhe disa vendës, me një përfaqësim të spektrit etnik dhe religjioz të Irakut.

 

 

Një seri tornadosh në SHBA kanë shkaktuar vdekjen e të pakten 16 personave

 

Kanzas, SHBA, 5 maj 2003 – Në Kanzas dhe në Misuri të SHBA-ve, një seri tornadosh kanë shkaktuar vdekjen e të pakten 16 personave, bën të ditur UPI në një njoftim të sotëm (e hënë). Rrethi i Lorensit në Misuri duket të ketë qenë më së shumti i goditur nga tornadot, pasi atje kanë humbur jetën 12 veta.

 

Tornado atje ka zgjatur 30 minuta dhe shkatërruar edhe shumë shtëpi dhe linja të energjisë elektrike.

 

 

Nga një shpërthim bombe në Kashmirin indian ka humbur jetën një person dhe janë plagosur 17 të tjerë

 

Xhamu/Indi, 5 maj 2003 – Kryengritësit separatistë muslimanë kanë vënë një bombë në një stacion autobusash përplot udhëtarë në Kashmirin indian, e cila ka shpërthyer fuqishëm dhe kështu ka shkaktuar vdekjen e një personi dhe plagosjen e 17 personave të tjerë, njofton Rojter. Policia ka thënë se deri tash asnjë grup s’e ka marrë përgjegjësinë për këtë shpërthim në Doda, 110 mila në lindje të Xhamusë. Katër të plagosur janë në gjendje të rëndë.

 

 

Presidenti Bush e ka përshëndetur nënshkrimin e kartës së Adriatikut

 

Ushington, 5 maj 2003 - Presidenti i Shteteve të Bashkuara të Amerikës Xhorxh Bush ka përshëndetur nënshkrimin e kartës SHBA - Adriatiku, e cila premton mbështetjen e vendit të tij për Shqipërinë, Kroacinë dhe Maqedoninë për pranimin e tyre në Aleancën Veriatlantike. Ky pohim doli nga deklarata e Shtëpisë së Bardhë.

 

 

Kryeministri israelit mund të takohet së shpejti me kryeministrin palestinez

 

Tel Aviv, 5 maj 2003 - Mjetet izraelite të informimit njoftojnë se kryeministri Ariel Sharon, mund të takohet së shpejti me kryeministrin palestinez, Mahmud Abbaz.

Burime të qeverisë izraelite kanë thënë se bisedimet ka të ngjarë të zhvillohen pasi sekretari amerikan i Shtetit të vizitojë rajonin këtë javë.

Në përgatitje të vizitës së sekretarit Pauell, i dërguari amerikan në Lindjen e Mesme, Uiliam Bërns, u takua me zyrtarët izraelitë dje për të diskutuar planin ndërkombëtar të paqes, i cili parashikon përfundimin e konfliktit izraelito-palestinez deri në vitin 2005.

 

 

Ramsfeld: Lufta në Irak i ka dërguar një mesazh të fuqishëm vendeve të tjera

 

Uashington, 5 maj 2003 - Sekretari amerikan i Mbrojtjes, Donald Ramsfeld, tha se lufta në Irak i ka dërguar një mesazh të fuqishëm vendeve të tjera që të mos përpiqen të zotërojnë armë të shkatërrimit në masë apo të mbështesin terrorizmin.

Sekretari Ramsfeld tha të dielën për rrjetin televiziv Fox se lufta në Irak mund të bëhet shkak për ndryshimin e qendrimeve të vendeve që përpiqen të zotërojnë armë të shkatërrimit në masë apo që mbështesin terroristët.

Sekretari Ramsfeld shprehu besimin se forcat e koalicionit në Irak do të gjejnë eventualisht udhëheqësin e përmbysur, Sadam Husein, dhe prova të armëve kimike dhe biologjike.

 

 

Papa shenjtëron 5 figura të tjera të Kishës Katolike

 

Madrid, 5 maj 2003 - Papa Gjon Pali i Dytë shenjtëroi në Madrid edhe 5 udhëheqës të Kishës Katolike. Papa 82 vjeçar kryesoi ceremoninë gjatë një meshe përjashta të dielën në Sheshin Kolon të kryeqytetit spanjoll, ku morën pjesë rreth 1 milion besimtarë.

 

Shenjtorët e rinj ishin të gjithë priftërinj dhe murgesha spanjolle, që jetuan në shekullin e 20-të dhe janë të njohur për punën e tyre me të varfërit. Gjatë shërbimit të tij, Papa Gjon Pali i Dytë ka shenjtëruar gjithsejt 469 shenjtorë, më shumë se çdo Papë tjetër në histori.

 

 

Pauell paralajmëron Sirinë për "pasoja"

 

Uashington, 5 maj 2003 - Sekretari amerikan i Shtetit, Kolin Pauell ka paralajmëruar Sirinë se do të ketë pasoja nëse nuk bën pjesën që i takon për paqen në rajon.

Z. Pauell foli pas vizitës së tij të parë në Lindjen e Mesme që nga rënia e ish-presidentit irakjan, Sadam Husein dhe nga publikimi i një plani të ri paqësor për rajonin.

Z. Pauell tha se është me rëndësi që Siria të luajë një rol pozitiv në rajon duke siguruar kufirin e saj me Irakun dhe duke mbyllur zyrat e disa grupeve palestineze të vijë së ashpër me seli në Damask.

 

 

"Soyuz"-i kthehet i sigurtë nga Gjithësia

 

Bajkonur, 5 maj 2003 - Ekipi prej tre vetash i Stacionit Ndërkombëtar Hapësinor, i bllokuar pas shkatërrimit të anijes kozmike "Kolumbia" në shkurt, është kthyer i sigurtë në tokë, por jo pa probleme.

Zyrtarët rusë humbën kontaktet me anijen "Soyuz", dhe i dërguan ekipet shpëtimtare me një flotë prej pesëmbëdhjetë aeroplanësh dhe pesëdhjetë makinash për ta pastruar shketëtirën në Kazakistan.

Ekipi u gjet dy orë më vonë dhe dy amerikanë dhe dy rusë nga ekipi, hapën fluturaken dhe zbritën nga ajo. Lëshimi u bë katërqind kilometra larg nga vendi i caktuar për aterim.

Copyright©2000-2003 Trepca.net - Të gjitha të  drejtat e rezervuara.