OPINIONE

KOMENT

Kundërshtarët e LDK-së të mësojnë nga kryeparlamentari Nexhat Daci !

Distancimi i akademik Dacit nga papërgjegjësia e burokracisë unmikase vie në momentin e fundit, kur dihet se Kosova zë vendin e parë në Ballkan e më gjerë për papunësi të madhe përkundër resurseve të saja natyrore dhe ndihmave që vijnë nga bashkësia ndërkombëtare;  pastaj kur dihet se krimi politik e ekonomik ka përfshirë shoqërinë e Kosovës përkundër prezencës së numrit të madh të policëve të UNMIK-ut; edhe kur dihet se institucionet e Kosovës çdo ditë e më tepër po bëhen detyrimisht "institucione kukull" dhe institucione të instrumentalizara të bashkësisë ndërkombëtare, pa arritur të çojnë as edhe  ndonjë proces përpara!

2 maj 2003 / Shkruan: Besim KRASNIQI

Në këto rrethana politiko-ekonomike në të cilat gjendet Kosova për më tepër  në stilin "një hap para-dy prapa", kritikat e fundit të Kryetarit të Kuvendit të Kosovës akademik z.Nexhat Daci drejtuar burokracisë së UNMIK-ut janë pozicionime politike vërtetë të papritura për UNMIK-un, dhe kjo u pa edhe në përgjigjen e "rreptë" të z.Hasellock! Kritikat e hapura dhe reale të z.Daci në adresë të burokracisë unmikase ka shprishur përfundimisht "tezën" propagandistike majtiste për kinse "servilizmin e LDK-së" kundrejt bashkësisë ndërkombëtare, me anë të së cilës provohej të promovohej LDK-ja si parti kinse e gatshme për çdo kompromis politik e sidomos kur është fjala për statusin e Kosovës. Në kohën kur PDK-ja arriti të bëhej "zëdhënese" e Shtajnerit dhe e UNMIK-ut me idenë absurde të "ngrirjes" së procesit të njohjes edhe formale të pavarësisë së Kosovës, akademik Daci reflektoi pozicionimin e LDK-së në mbrojtje të integritetit, të dinjitetit dhe vlerave kombëtare të shqiptarëve të Kosovës, qytetarëve të Kosovës të cilët as sot e kësaj dite nuk po arrijnë të jetojnë një jetë normale me rrymë, me punë të përditshme, me paga të mira e të sigurta, me siguri të plotë individuale e grupore anembanë Kosovës etj.

Rezistimi dhe mospajtueshmëria aq e hapur e z.Daci kundrejt burokracisë së UNMIK-ut pas kaq vitesh të funksionimit të institucioneve të Kosovës (pa kompetenca reale) duhet të jetë shembull edhe për subjektet politike të spektrit të majtë, të cilat kanë filluar edhe haptas t'i vejnë pengesa procesit të pavarësimit të Kosovës, duke iu bërë krah elementeve anti-pavarësi brendapërbrenda UNMIK-ut dhe asociacioneve tjera ndërkombëtare akoma të pranishme në Kosovë. Distancimi i akademik Dacit nga papërgjegjësia e burokracisë unmikase vie në momentin e fundit, kur dihet se Kosova zë vendin e parë në Ballkan e më gjerë për papunësi të madhe përkundër resorëve të saj natyrorë dhe përkundër ndihmave që vijnë nga bashkësia ndërkombëtare;  pastaj kur dihet se krimi politik e ekonomik ka përfshirë shoqërinë e Kosovës përkundër prezencës së numrit të madh të policëve të UNMIK-ut; edhe kur dihet se institucionet e Kosovës çdo ditë e më tepër po bëhen detyrimisht "institucione kukull" dhe institucione të instrumentalizuara të bashkësisë ndërkombëtare, pa arritur të çojnë as edhe  ndonjë proces përpara!

Pra, përsëri është LDK-ja (akademik Daci i është anëtar i LDK-së) ajo parti politike e cila merr iniciativën për ndërprerjen e kësaj situate tragjikomike në të cilën gjendet Kosova si shtet nën protektoratin e OKB-së, duke mos lejuar viktimizimin dhe shkatërrimin e mëtejmë të proceseve zhvillimore të Kosovës në të gjitha sferat, vetëm për shkak të një pjese të burokratizuar të UNMIK-ut, e cila është e interesuar për pushtet të pakufijshëm në Kosovë. Në anën tjetër, Presidenti i Kosovës dhe kryetari i LDK-së dr.Rugova ia hodhi poshtë PDK-së, Thaçit dhe Shtajnerit  idenë e të ashtuquajturit "moratorium" për statusin e Kosovës, që parasheh uljen dhe "ngrirjen" e intensitetit të procesit të njohjes së pavarësisë së Kosovës, duke kërkuar e ripërsëritur publikisht realizimin e vullnetit të lirë politik të shqiptarëve të Kosovës - pavarësinë e Kosovës. Kjo nënkupton se LDK-ja as në kohën e okupimit serbosllav por as sot e kësaj dite, kur  udhëheqja, anëtarësia  dhe simpatizuesit e saj janë të rrezikuar nga zbatuesit e krimit politik në Kosovë, nuk i largohet me asnjë çmim opsionit politik për pavarësimin e Kosovës dhe se për realizimin e këtij opsioni LDK-ja është  e koordinuar dhe e vendosur si asnjëherë më parë.

Copyright©2000-2003 Trepca.net - Të gjitha të  drejtat e rezervuara.