Lajme

E hëne, 28 prill 2003

Përmbajtja:

• Forcat amerikane njoftuan se një ushtarak i tyre është gjetur i vdekur në afërsi të fshatit Dobërçan të Gjilanit

• Një ushtar danez i KFOR-it ka vdekur në një incident trafiku që ndodhi në afërsi të Zubin Potokut

• Daci kërkon nga Shtajneri që ta shtyjë afatin për nënshkrimin e katër ligjeve

• KK i Podujevës emëron ushtrues të detyrës së Kryeshefit ekzekutiv Sadik Poterën dhe 12 ushtrues të drejtorëve të drejtorive

• Një grup eprorësh të TMK-së është kthyer nga SHBA-të ku kishte kryer një kurs të gjuhës angleze

• Në konferencën për gjyqësinë u kërkua mosndërhyrja e pushtetit ekzekutiv në punët e gjykatave

• KFOR-i dhe policia UNMIK-ut thonë se gjendja e sigurisë në rajonin e Gjilanit është e qëndrueshme

• Në fazën e tashme të proceseve demokratike në Kosovë nevojitet një model si ai i demokracisë amerikane

• Zëvendësshefi i Misionit të KE angazhohet për krijimin e njësive nënkomunale në 30 komuna të Kosovës

• Zyra e UNMIK-ut për Persona të Zhdukur do të vazhdojë gjurmimin për fatin e të zhdukurve

• Në Llozhan të Pejës u varrosën Kamber, Daut, Salih, Halil dhe Albert Hoxha, të cilët humbën jetën nga shembja e dheut

• Autoritetet spitalore në Shkup kanë porositur me urgjencë pajisje të posaçme për mbrojtje kundër virusit SARS

• Eduard Xhozef nga Grupi Ndërkombëtar i Krizave thotë se deklaratatat e Georgievskit dhe Xhaferit janë të papërgjegjshme

• Është vrarë sot një nga komandantët ushtarak të një fraksioni kryengritës të Bregut të Fildishtë

• Raketa ruse Sojuz ka zbarkuar sot me sukses në stacionin ndërkombëtar të gjithësisë

• Italia kundërshton krijimin e minialeancës ushtarake brenda Bashkimit Evropian

• Kidnapuesi libanez i autobusit në Berlin ka paraqitur kërkesa politike para se të dorëzohet

• Takim i gjeneralit Garner me udhëheqëit politikë, fetarë dhe etnikë të Irakut

• Vizitë e sekretarit Ramsfeld në Gjirin Persik dhe në Afganistan

• 314 veta kanë vdekur nga SARS-i dhe gati 5 mijë të tjerë janë prekur prej tij

• Baradei kundër idesë së amerikanëve për kërkim armësh

• Koreja e Jugut i kërkon shpjegime Veriut

• Ushtria amerikane do të qëndrojë në Irak derisa gjendja atje të jetë stabilizuar

• Tarik Azizi thotë se e ka parë Sadamin të gjallë pas bombardimeve të 19 marsit dhe të 7 prillit

• Koreja e Jugut dhe ajo e Veriut kanë vazhduar bisedimet për përmirësimin e marrëdhënieve dypalëshe

• SARS epidemia e parë globale e shekullit të 21

• Peronisti Menem në avantazh pas raundit të parë të presidencialeve

• Pas luftës mjedisi në Irak në gjendje katastrofale

• Ushtria izraelite ka zbrasur një ngulim të paligjshëm hebraik në Jordanin Perëndimor

Forcat amerikane njoftuan se një ushtarak i tyre është gjetur i vdekur në afërsi të fshatit Dobërçan të Gjilanit

 

Gjilan, 28 prill 2003 - Forcat paqeruajtëse amerikane njoftuan se një ushtarak i tyre është gjetur i vdekur në mëngjesin e ditës së djeshme. Shërbimi për Informim i këtyre trupave në kampin amerikan "Bondstill" në Kosovën Lindore, sektor ky i kontrolluar nga forcat amerikane, thanë se trupi i pajetë i ushtarit është gjetur në afërsi të fshatit Dobërçan të komunës së Gjilanit.

 

Bëhet fjalë për një kapiten të ushtrisë ameriakne, Senford Skot Saliven (35), i cili ka plagosur vetveten dhe pastaj nga plagët ka vdekur.

Që nga 12 qershori i vitit 1999 kur trupat e NATO-s kanë hyrë në Kosovë për t'i dhënë fund luftës gati dyvjeçare mbi 70 ushtarë të KFOR-it kanë humbur jetën në incidente e aksidente të ndryshme në mbarë Kosovën.

 

 

Një ushtar danez i KFOR-it ka vdekur në një incident trafiku që ndodhi në afërsi të Zubin Potokut

 

Mitrovicë, 28 prill 2003 - Një ushtar danez i KFOR-it ka vdekur në një aksident trafiku, që ndodhi në rrugën ndërmjet Zubin Potokut dhe Zveçanit. Press Qendra e KFOR-it në Mitrovicë ka njoftuar se aksidenti ka ndodhur gjatë një kthese kur automjeti kishtë rënë në një gropë në rrotët e para, ndërkaq njeri nga ushtarët ishte zënë mes automjetit dhe dheut.

 

Helikopterët e KFOR-it kanë shkuar shpejt në vendin e ngjarjes dhe ushtarin e lënduar e kishin dërguar në spitalin fushor francez për operacion, mirëpo përpjekjet e mjekëve ishin të kota pasi ushtari danez kishte vdekur.

 

 

Daci kërkon nga Shtajneri që ta shtyjë afatin për nënshkrimin e katër ligjeve

 

Prishtinë, 28 prill 2003 - Kryetari i Kuvendit të Kosovës Nexhat Daci i ka drejtuar sot shefit të UNMIK-ut Mihael Shatjenr një letër me të cilën kërkon që ai të shtyjë afatin e caktuar për nënshkrimin e katër ligjeve që bien ndesh me rezolutën 1244 deri më 8 maj.

 

Në këtë datë duhet të mbahet mbledhja e Kuvendit të Kosovës. Daci e ka justifikuar kërkesën për shtyrjen afatin për shkak se komisionet përkatëse nuk kanë arritur të përfundojnë punën në shqyrtimin e propozimamandmenteve ndaj këtyre ligjeve. Ndërkaq pritet këtë punë komisionet do ta përfundojnë deri në mbledhjen e ardhshme të kuvendit më 8 maj.

Ndërkohë Kuvendi i Kosovës nuk do të takohet në senacës e radhës të enjtën për shkak të festës së 1 maj.
Njoftohet se kryeadministratori Shtajner pritet të japë përgjigje në letrën e kryeparlamentarit Daci sot pasdite.
Shtajner më parë kishte kërkuar nga Kuvendi i Kosovës që deri më 30 prillit të bëhet amandamentimi i katër ligjeve, ndryshe ai do t'i nënshkruante këto ligje, dhe se do t'i merrte parasysh vetëm vërejtjet e inkorporuara të UNMIK-ut e jo edhe të Kuvendit të Kosovës.

 

 

KK i Podujevës emëron ushtrues të detyrës së Kryeshefit ekzekutiv Sadik Poterën dhe 12 ushtrues të drejtorëve të drejtorive

 

Podujevë, 28 prill 2003 – Kuvendi i komunës i Podujevës mbajti sot seancën urgjente në të cilën u morën vendime të rëndësishme në funksion të ndërtimit të organeve qeverisës, të cilën e udhëhoqi Agim Veliu, kryetar, e ku mori pjesë edhe përfaqësuesi i UNMIK-ut Shahzad Bangash, përfaqësues të OSBE-së, etj.

KK i Podujevës me shumicë votash emëroi për ushtrues detyre të kryeshefit ekzekutiv juristin Sadik Potera si dhe 12 ushtrues të drejtorive. Kuvendi ua vazhdoi kontratat e punës të gjithë të punësuarve në administratën civile të komunës.

Kryetari Veliu paraqiti para anëtarëve të Kuvendit dorëheqjen e Ilmie Bulliqit nga radhët e LDK-së nga Kolegji intervistues, nga Komiteti për politikë e financa dhe nga anëtarja e Kuvendit si dhe propozoi Hyra Salihun.

 

Propozimi i kryetarit të komunës për caktimin e ushtruesve të detyrave të Kryeshefit ekzekutiv dhe të drejtorëve të drejtorive u kundërshtua nga PDK e cila përkrahu ish-kryeshefin e mëparshëm. Mirëpo, kundër vendimeve të Kuvendit, përkundër asaj se vendimet e tilla ishin marrë unanimisht në grupin parlamentar të LDK-së, votuan edhe 3-4 këshilltarë të LDK-së.

 

Kuvendi ua vazhdoi kontratat të punësuarve në shërbimin civil deri në zgjedhjen e Kryeshefit Ekzekutiv. Kryetari i kuvendit Agim Veliu bëri të ditur se pranim-dorëzimi i detyrave do të bëhet ditën e martë dhe të mërkurë.

 

 

Një grup eprorësh të TMK-së është kthyer nga SHBA-të ku kishte kryer një kurs të gjuhës angleze

 

Prishtinë, 28 prill 2003 - Një grup eprorësh të SHP të TMK-së është kthyer dje nga Indiana e Shteteve të Bashkuara të Amerikës. Ata kishin kryer një kurs intensiv të gjuhës angleze. Katër eprorët e TMK-së patën mundësi që për dy muaj të trajnohen dhe të përfitojnë nga eksperienca e trajnuesve amerikanë.

 

 

Në konferencën për gjyqësinë u kërkua mosndërhyrja e pushtetit ekzekutiv në punët e gjykatave

 

Prishtinë, 28 prill 2003 - Në përfundim të konferencës triditëshe për gjyqësinë e Kosovës u tha se institucionet vendore dhe ndërkombëtare duhet të jenë më të vëmendshme në procesin e ndërtimit të procesit gjyqësor.

 

Në këtë takim gjithashtu është kërkuar edhe mosndërhyrja e pushtetit ekzekutiv në punët e gjykatave. Avokatët kanë theksuar se sistemi gjyqësor është duke u cënuar nga kryeadministratori i Kosovës dhe nga KFOR-i. Këtë konferencë triditore e organizoi KMDLNJ me seli në Prishtinë.

 

 

KFOR-i dhe policia UNMIK-ut thonë se gjendja e sigurisë në rajonin e Gjilanit është e qëndrueshme

 

Gjilan, 28 prill 2003 - Përgjegjësit për çështjet e sigurisë në komunën e Gjilan, të KFOR-it dhe policisë, janë shprehur se gjendja e sigurisë është e qëndrueshme dhe ekziston liria e plotë lëvizjeve për të gjithë banorët, pa dallim kombësie.

Komandanti i kampit ushtarak amerikan Dejvid Sejxh është shprehur sot para mediave se banorët serbë lëvizin lirisht gjatë tërë kohës dhe ai personalisht ka përcjellë lëvizjen e tyre. Ai tha se ka gjashtë që ka ardhur këtu dhe nuk ka dëgjuar të ketë pasur incidente apo që serbët të jenë sulmuar.

Të njëjtin mendim e ka edhe komandanti i policisë rajonale të UNMIK-ut, Sem Ajvi, i cili thotë se përditë sheh duke lëvizur lirisht qyetarët serbë nëpër qytet, pa përcjellje dhe pa frikë. Edhe ai mohon të ketë incidente ndëretnike në këtë rajon.

Gjithashtu edhe banorët serbë janë shprehur për mediat lokale se nuk kanë probleme gjatë qarkullimit të tyre prej fshatit në qytet.

Por mediat serbe të Beogradit, duke njoftuar për situatën në Anomoravë të Gjilanit informojnë krejt ndryshe. Kështu agjencia zyrtare e lajmeve e Beogradit Tanjug njofton sot se serbët këtushëm jetojnë në frikë dhe kanë kërkuar kthimin e ushtrisë dhe të policisë serbe, sepse është rrezikuar "jo vetëm prosperiteti por edhe ekzistenca në vatrat e tyre".

 

 

Në fazën e tashme të proceseve demokratike në Kosovë nevojitet një model si ai i demokracisë amerikane

 

Prishtinë, 28 prill 2003 - Në Prishtinë përfundoi punimet konferenca me temën: "Demokracia amerikane model për zhvillimet në Kosovë", të cilën e organizoi Forumi i Rinisë së LDK-së.

 

Në këtë takim kryeparlamentari, Nexhat Daci, ka theksuar se në momentin e tashëm duhet shkëputur nga një burokraci e instaluar e UNMIK-ut me qëllime shumë të mira, por me rezultate relativisht të mangëta.

Ai ka shtuar se ditë e përditë me sjelljet konkrete duhet ndjekur traditat e demokracisë perëndimore.
Ndërkaq, akademik Esat Stavileci ka thënë se në Kosovë ende nuk ka demokraci, sepse qytetarët e saj ende nuk janë as shtetas, madje as qytetar të mirëfilltë.

Edhe këshilltarja politike në Zyrën amerikane, Viktoria Malsomek, e ka cilësuar pozitive një nismë të tillë, duke premtuar përkrahje, aq më tepër kur kjo konferencë i shërben instalimit të demokracisë amerikane në Kosovë.

Ndërkaq, Lulzim Zeneli, kryetar i Forumit të Rinisë së LDK-së ndër të tjera tha se institucionet e Kosovës dhe Kosova në përgjithësi po ecin nëpër një rrugëtim, i cili do të varet edhe prej modeleve të cilat aplikohen drejt realizimeve të synimeve tona.

 

 

Zëvendësshefi i Misionit të KE angazhohet për krijimin e njësive nënkomunale në 30 komuna të Kosovës

 

Prishtinë, 28 prill 2003 - Zëvendësshefi i Misionit të KE Xhorxhi Bergou angazhohet për krijimin e njësive nënkomunale në 30 komuna të Kosovës. Ai ka theksuar se zonat ku komunitetet jetojnë në shumicë për këto komuntete mund të ketë një nivel të vetëqeverisjes lokale, apo një autonomi më të vogël, por edhe ajo do të ndërtohet sipas sistemit të përgjithshëm të Kosovës.

 

KE ka vlerësuar se numri i tashëm prej 30 komunave në një të ardhme të afërt do të jetë i vogël për Kosovën, kurse numri prej 400 ish-bashkësive lokale konsiderohet numër i lartë për t'i shndërruar ato në autoritete komunale. Prandaj ky mision nuk e përjashton mundësinë që këto 100 njësi nënkomunale një ditë të jenë edhe 100 komuna të reja të Kosovës.

Zëvendësshefi i Misionit të KE Xhorxhi Bergou ka thënë se standardet evropiane parashohin, që një autoritet komunal të përfshijë një territor të caktuar me 20 deri më 25 mijë banorë, ndërkaq vetëm Prishtina, si një komunë e vetme i ka rreth 500 mijë banorë.

Bergov po ashtu ka theksuar se standardet evropiane nuk parashohin decentralizimin mbi parimin etnik.

 

 

Zyra e UNMIK-ut për Persona të Zhdukur do të vazhdojë gjurmimin për fatin e të zhdukurve

 

Prishtinë, 28 prill 2003 - Zyra për Persona të Zhdukur do të vazhdojë gjurmimin për fatin e tyre, ka thënë përfaqësusi i UNMIK-ut Simon Burger, duke iu drejtuar disa mijëra shqiptarëve të tubuar në Mejë të Gjakovës, që të përkujtojnë 374 shqiptarë të zhdukur katër vite më parë vetëm nga ai lokalitet.

 

Lideri i PLK-së Gjergj Dedaj, i cili në këtë fshat nga familja e ngushtë e ti ka të zhdukur 12 anëtarë, ka thënë se tubimi ishte njëherit edhe protestë, sepse pas katër vitesh asgjë nuk dihet për fatin e të zhdukurëve.

 

 

Në Llozhan të Pejës u varrosën Kamber, Daut, Salih, Halil dhe Albert Hoxha, të cilët humbën jetën nga shembja e dheut

 

Pejë, 28 prill 2003 - Në fshatin Llozhan të Pejës dje u varrosen Kamber, Daut, Salih, Halil dhe Albert Hoxha, të cilë para dy ditë aksentalisht humbën jetën nga shembja e dheut derisa hapnin një kanal të ujërave të zeza.

 

Ceremonia e përcjelljes është mbajtur në oborrin e shkollës ku ishin tubuar mijëra njerëz nga fshatrat përreth dhe më larg. Duke u ndarë i fundit nga të ndjerët në emër të fshati Haxhi Mulaj veç tjerash ka thënë për të ndjerin Halil Hoxha ashtu siç ishte shembull në luftën e Kosharës, ishte shembull edhe në ndërtimin e jetës në Kosovën e lirë.

Ndërkaq, kryetari i komunës së Pejës Ali Lajçi dhe drejtori i shkollës Daut Shala kanë bërë thirrje që t'u ndihmohet familjeve të të ndjerëve dhe kanë premtuar ndihmën e institucioneve të tyre.

 

 

Autoritetet spitalore në Shkup kanë porositur me urgjencë pajisje të posaçme për mbrojtje kundër virusit SARS

 

Shkup, 28 prill 2003 - Autoritetet spitalore në Shkup kanë porositur me urgjencë pajisje të posaçme për mbrojtje kundër virusit SARS. Dy mjekë të klinikës infektive u kanë dërguar letra kryeministrit Cërvenkovski dhe ministrit të shëndetësisë Selmani dhe drejtorit të Qendrës Klinike me të cilën kërkojnë që mjekët të kenë kushte pune me pacientët e sëmurë eventualisht nga SARS-si.

 

Në kërkesën e dy mjekëve thuhet se ekziston rreziku që Maqedonia të përfshihet shumë shpejt në zonën e prekur nga virusi vdekjeprurës SARS dhe luten autoritetet qeveritare që për një kohë sa më të shkurtër çështje orësh të përgjigjen se çfarë hapësirash dhe pajisjesh u lejojnë në dispozicion mjekëve në mënyrë që këta të ndërmarrin masa për mbrojtje më të efektshme kundër viruesit.

 

 

Eduard Xhozef nga Grupi Ndërkombëtar i Krizave thotë se deklaratatat e Georgievskit dhe Xhaferit janë të papërgjegjshme

 

Shkup, 28 prill 2003 - Deklaratatat e Georgievskit dhe Xhaferit janë të papërgjegjshme, thotë Eduard Xhozef nga Grupi Ndërkombëtar i Krizave. Ai ka shtuar se ky është një gabim, sepse bëhet fjalë për një vendim që ka të bëjë me dëshprimin dhe mossuksesin e dy politikanëve, që i humbën zgjedhjet e fundit në Maqedoni.

Ata janë nënshkrues të Marrëveshjes së Ohrit dhe pa marrë parasysh vlerësimet e tyre se në çfarë shkalle është zbatuar kjo marrëveshje, apo a do të ketë sukses, ata kanë ndërmarrë një detyrë formale dhe unë e konsiderojë të papërgjeshme shmangien nga ky obligim.

I pyetur se si e sheh qëndrimin e Georgievskit lidhur me ndarjen e Maqedonisë, z. Xhozef ka thënë:
"Kjo është një papërgjegjësi dhe shkurtpamësi, ngase me këtë u dërgohet një mesazh elementëve radikalë që ende janë të rrezikshëm për sigurinë e Maqedonisë që inkurajohen mendimet e tyre se Marrëveshja e Ohrit nuk është fundi i çështjeve të hapura. Kjo është shumë e rrezikshme.

 

Të themi pse një shqiptar tani ta respektojë marrëveshjen mes Beogradit dhe Shkupit për demarkacionin e vijës kufitare, kur Georgievski sapo tha se Marrëveshja e Ohrit nuk vlen dhe se ne patjetër do të duhet të shënojmë kufijtë e rinj".

Ai dhe Arbër Xhaferi e sollën veten në një konflikt me bashkësinë ndërkombëtare", ka thënë ky përfaqësues i Grupit Ndërkombëtar të Krizave.

 

 

Është vrarë sot një nga komandantët ushtarak të një fraksioni kryengritës të Bregut të Fildishtë

 

Abixhan, 28 prill 2003 – Një nga komandantët ushtarak të një nga tri fraksioneve kryengritëse të Bregut të Fildishtë, është vrarë sot (të hënën) në pritë afër kufirit me Liberinë, bëhet e ditur në një deklaratë të Lëvizjes Popullore të Bregut të Fildishtë, njofton Rojter.

 

Në deklaratë më tej thuhet se rreshteri Feliks Doh, lider i kësaj Lëvizjeje, është plagosur në një pritë, që i është vënë të premten dhe pastaj "është kapur dhe është ekzekutuar".

 

Doh është vrarë në një zonë, ku kryengritësit janë përleshur me ish-aleatët e Liberisë dhe të Siera Leonës, që janë të pakënaqur me marrëveshjen e paqes, me të cilën i jipet fund luftës shtatëmuajshe.

 

 

Raketa ruse Sojuz ka zbarkuar sot me sukses në stacionin ndërkombëtar të gjithësisë

 

Moskë, 28 prill 2003 – Raketa ruse Sojuz, e cila është anija e parë e parë kosmike e lancuar në gjithësi pas raketës amerikane Kolumbia, e cila qe shkatërruar në shkurt, ka zbarkuar sot (e hënë) me sukses në stacionin ndërkombëtar të gjithësisë, njofton Rojter.

 

Kapsula Sojuz, e cila është lancuar të shtunën nga kosmodromi rus Baikonur në Kazakistan, barte komandantin rus Juri Malençenko, 41-vjeçar dhe inxhinierin amerikan Eduard Lu.

 

 

Italia kundërshton krijimin e minialeancës ushtarake brenda Bashkimit Evropian

 

Romë, 28 prill 2003 – Në prag të samitit të katër vendeve për mbrojtje, Italia ka tërhequr vërejtjen kundër krijimit të minialancës ushtarake brenda Bashkimit Evropian, njofton BBC.

 

Ministri i jashtëm, Franko Fratini ka thënë se përpjekjet e Francës, të Gjermanisë, Belgjikës dhe Luksemburgut për të krijuar lidhje më të ngushta do të shikohen "me sy shumë kritik".

 

 

Kidnapuesi libanez i autobusit në Berlin ka paraqitur kërkesa politike para se të dorëzohet

 

Berlin, 28 prill 2003 – Policia gjermane ka njoftuar sot (të hënën) se libanezi që ka kidnapuar (të shtunën) autobusin në Berlin ka paraqitur kërkesa politike para se të dorëzohej pas 45 minutave, njofton Rojter.

 

Zëdhënësi i policisë ka thënë se rrëmbyesi 27-vjeçar, i cili ka mbajtur peng tetë udhëtarë dhe shoferin e autobusit të qytetit ka kërkuar tërheqjen e Izraelit nga territoret e okupuara palestineze, por policia e kishte bindur të dorëzohej. Njoftohet se askush nga udhëtarët nuk është lënduar.

 

 

Takim i gjeneralit Garner me udhëheqëit politikë, fetarë dhe etnikë të Irakut

 

Bagdad, 28 prill 2003 - Gjenerali amerikan në pension, Xhej Garner pritet të zhvillojë një takim me udhëheqëit politikë, fetarë dhe etnikë të Irakut sot në Bagdad, qëllim i të cilit është krijimi i një qeveria të re në vend.

Zyrtarët amerikanë thonë se udhëhqësit e mundshëm pritet të dalin nga ky takim, ku do të marrin pjesë 300 deri në 400 vetë, të gjithë kundërshtarë të regjimit të Saddam Husseinit. Takimi i sotëm është një formë më e zgjeruar e diskutimeve të dy javëve më parë në qyteitin jugor Nasiryja.

 

 

Vizitë e sekretarit Ramsfeld në Gjirin Persik dhe në Afganistan

 

Uashington, 28 prill 2003 - Sekretari amerikan i Mbrojtjes, Donald Ramsfeld, u takua me udhëheqësin e Emirateve të Bashkuara Arabe, në fillim të turneut të tij në vendet e Gjirit Perik dhe në Afganistan.

Ramsfeld po bën një turne të vullnetit të mirë për të falenderuar udhëheqësit rajonalë për mbështetjen e tyre në luftën e udhëhequr nga Shtetet e Bashkuara në Irak dhe për të diskutuar të ardhmen e dislokimeve ushtarake në rajon. Këshilltarët e Sekretarit Rumsfeld, iu shmangën konfirmimit të lajmeve se ai ka si synim të vizitojë edhe Irakun.

 

 

314 veta kanë vdekur nga SARS-i dhe gati 5 mijë të tjerë janë prekur prej tij

 

Taipeh, 28 prill 2003 - Taivani njoftoi për një karantinë të detyruar për të gjithë personat, që hyjnë nga vende të goditura rëndë nga Sindroma e Rëndë Akute e Rrugëve të Frymëmarrjes, ose Sarsi.

Duke filluar nga sot, çdo njeri që mbrrin në Taivan nga Kina, Hong Kongu, Singapori ose Kanadaja do të qëndrojë në karantinë për 10 ditë. Banorët taivanezë, që kthehen nga këto vende mund të qëndrojnë në karantinë në shtëpitë e tyre.

Taivani njoftoi sot për vdekjen e parë nga Sindroma e Rëndë Akute e Rrugëve të Frymëmarrjes. Kina njoftoi për 9 vdekje të tjera nga Sarsi dhe 161 infeksione të reja. Hong Kongu njoftoi për 12 të vdekur të tjerë dhe 16 infeksione të reja. Dy vdekje të tjera u njoftua sot në Singapor.

 

 

Baradei kundër idesë së amerikanëve për kërkim armësh

 

Nju Jork, 28 prill 2003 - Kreu i Agjencisë Ndërkombëtare Atomike, Mohamed el - Baradei tha se nuk sheh ndonjë arsye pse SHBA duhet të marrë përsipër kërkimin për armë të shkatërrimit në masë në Irak.

 

Zoti El-Baradei që ka qenë përgjegjës për mbikqyrjen e inspektimeve bërthamore para luftës në Irak tha se nuk ishte e nevojshme të bëhej kjo gjë.

"Ne jemi ata që kemi kredibilitetin gjithandej, thjesht sepse ne jemi perfaqësues të komunitetit ndërkombëtar dhe bashkë me të vjen pavarësia jonë dhe transparenca.

 

Në rast se do të aprovoheshin konkluzione, veçanërisht në botën arabe dhe myslimane lipset që inpektorët e OKB-së të jenë pjesë qëndrore e atij procesi", thotë Baradei.

 

 

Koreja e Jugut i kërkon shpjegime Veriut

 

Seul, 28 prill 2003 - Delegacioni i Koresë së Jugut që merr pjesë në raundin e dytë të bisedimeve tre ditore interkoreano në Penian ka paralajmëruar se nuk do të nënshkruajë ndonjë deklaratë të përbashkët derisa Korea e Veriut të jetë dakord të adresojë çështjen e zhvillimit të armëve bërthamore.

Delegacioni thotë se deri më tani nuk ka patur asnjë shpjegim nga Korea e Veriut përsa i përket një pretendimi amerikan se Korea e Veriut kishte pranuar ekzistencën e armëve bërthamore.

 

 

Ushtria amerikane do të qëndrojë në Irak derisa gjendja atje të jetë stabilizuar

 

Abu Dabi, 28 prill 2003 - Ushtria amerikane sipas ministrit të Mbrojtjes së SHBA do të qëndrojë në Irak derisa gjendja atje të jetë stabilizuar. Detyrat në Irak kërkojnë shumë vëmendje dhe kohë është shprehur Ramsfeld.

Ramsfeld ndërkohë ka mbërritur në Abu Dabi të Emirateve të Bashkuara. Në qendër të bisedimeve që ai do të zhvillojë pritet të jetë gjendja në Irak.

Ushtarët amerikanë kanë kapur një tjetër anëtar të regjimit të rrëzuar të Sadam Huseinit. Komanda qëndrore e trupave amerikane në Doha të Katarit bëri të ditur se bëhet fjalë për Hossan Mohamed Amin i cili më parë kishte shërbyer në funksionin e personit të kontaktit me inspektorët e armëve të Kombeve të Bashkuara.

 

 

Tarik Azizi thotë se e ka parë Sadamin të gjallë pas bombardimeve të 19 marsit dhe të 7 prillit

 

Uashington, 28 prill 2003 – Ish-zëvendëskryemionistri irakian, Tarik Aziz, iu ka deklaruar hetuesve amerikanë se Sadam Hyseini u ka shpëtuar dy bombardimeve ajrore, të kryera me qëllim për të vrarë atë dhe dy djemtë e tij, njofton Rojter sipas një shkrimi të sotëm (e hënë) të "USA Today".

 

Tarik Azizi, që po merret në pyetje në një vend të panjohur, ka thënë se ai e ka parë Sadamin të gjallë në Bagdad pas bombardimeve të 19 marsit dhe të 7 prillit. Gazeta në fjalë thotë se hetuesit s'i kanë bësuar Tarik Azizit në këtë deklaratë.

 

 

Koreja e Jugut dhe ajo e Veriut kanë vazhduar bisedimet për përmirësimin e marrëdhënieve dypalëshe

 

Phenian, 28 prill 2003 - Koreja e Jugut dhe ajo e Veriut kanë vazhduar bisedimet për përmirësimin e marrëdhënieve dypalëshe.

Pala koreano-jugore kërkon të bëjë edhe njëherë të qartë se zotërimi i armëve bërthamore nga Koreja e Veriut është një shkelje serioze e deklaratës dypalëshe të vitit 1992 për një gadishull korean të pastër nga këto armë, njoftojnë nga kryeqyteti koreanoverior mediet koreano-jugore.

 

Dje në hapje të raundit të ri ndërministror të bisedimeve që pritet të zgjasin tre ditë, Koreja e Jugut kërkoi nga Koreja e Veriut heqjen dorë nga programi i armëve bërthamore.

 

 

SARS epidemia e parë globale e shekullit të 21

 

Londër, 28 prill 2003 - SARS epidemia e parë globale e shekullit të 21. Drejtuesja e OBSH-së Gro Harlem Brutland u bëri thirrje vendeve të prekura për marrjen e masave të rrepta parandaluese. Ende egziston mundësia e shmangies së përhapjes së epidemisë në masën e SIDë-s ka thënë Brutland në një intervistë për stacionin e lajmeve BBC.

 

Shumë vende aziatike kanë lajmëruar ndërkohë kontrolle më të forta të udhëtarëve. Qeveria në Taivan ka vendosur një karantenë 10-ditore për të gjithë personat që vijnë nga zonat e infektuara.

 

Dje u njoftua se një person humbi jetën në Taivan nga pasojat e SARS-it. Numri i viktimave të sëmundjes së mushkërive në të gjithë botën është rritur në 317 vetë.

 

 

Peronisti Menem në avantazh pas raundit të parë të presidencialeve

 

Buenos Ajres, 28 prill 2003 - Peronisti Menem në avantazh pas raundit të parë të presidencialeve. Dy peronistët Karlos Menem dhe Nestor Kirchner do të ndeshen përsëri me njëri-tjetrin në zgjedhjet e balotazhit në 18 maj. Nga numërimi i pothuaj dy të tretave të votave rezultoi se Menem kishte marrë 24% të votave.

 

Me këtë rezultat ai ndodhet në avantazh të lehtë kundrejt rivalit të tij në parti Kirchner i cili mori 22% të votave. Të 16 kandidatët e tjerë për postin e presidentit ishin ndjeshëm prapa në rezultat. Për fitoren e menjëhershme një kandidati i duhen 45% e votave ose 40% me një avantazh 10 pikësh nga i dyti në rezultat.

 

 

Pas luftës mjedisi në Irak në gjendje katastrofale

 

Paris, 28 prill 2003 - Pas luftës mjedisi në Irak në gjendje katastrofale. Shefi i programit të Kombeve të Bashkuara për ambientin Klaus Tëpfer ka kërkuar kontrollin e pikave të furnizimit me ujë të pijshëm në Irak si dhe të situatës humanitare atje.

 

Për këtë është i nevojshëm dërgimi sa më shpejt i specialistëve në Irak ka kërkuar Tëpfer në mbyllje të një takimi treditor të ministrave të ambientit të vendeve të G-8 i cili u mbajt në kryeqytetin francez.

 

Sipas një studimi të Kombeve të Bashkuara dy dekada luftra, keqadministrim dhe sanksione kanë lënë prapa në Irak një gjendje katastrofale. Zyrtarisht programi i Kombeve të Bashkuara për Ambjentin nuk ka paraqitur ende një kërkesë për dërgimin e specialistëve në Irak.

 

 

Ushtria izraelite ka zbrasur një ngulim të paligjshëm hebraik në Jordanin Perëndimor

 

Jeruzalem, 28 prill 2003 - Ushtria izraelite ka zbrasur një ngulim të paligjshëm hebraik në Jordanin Perëndimor. Kjo u bë e ditur nga Ministria izraelite e Mbrojtjes. Më parë qeveria kishte njoftuar zbrasjen e dy ngulimeve të tilla të paligjshme. Në këtë mënyrë Izraeli kërkon t'u përgjigjet kërkesave të izraelitëve thuhet në deklaratën e qeverisë.

 

Nesër parlamenti palestinez pritet të japë votëbesimin për qeverinë e re të kryeministrit të emëruar Mahmdud Abaz. Ky hap është kusht për paraqitjen e planit të paqes të së ashtuquajturit "kuartet për Lindjen e Afërme" i cili parashikon krijimin e një shteti të pavarur palestinez deri në vitin 2005.

Copyright©2000-2003 Trepca.net - Të gjitha të  drejtat e rezervuara.