Lajme

E shtune, 26 prill 2003

Përmbajtja:

• Pesë kushërinj kanë humbur jetën në një fatkeqësi në Luzhan të Pejës nga rrëshqitja e madhe e dheut

• Hasellok i hedh poshtë kritikat e kryeparlamentarit Daci në adresë të UNMIK-ut

• Boks: Sonte Luan Krasniqi do të ndeshet me Saletën

• Nesër mbahet konferenca me temën: "Demokracia amerikane, model për zhvillimet në Kosovë"

• Sipas Zyrës amerikane, bartja e kompetencave tek institucionet e Kosovës duhet të bëhet deri në fund të këtij viti

• Zgjedhjet e ardhshme në Kosovë do të mbahen atëherë kur UNMIK-u nuk do të jetë këtu

• KE ka aprovuar për këtë vit 53 milionë euro për rindërtimin e Kosovës

• U nënshkrua marrëveshja që transporti i udhëtarëve dhe mallrave të zhvillohet normalisht dhe i sigurt

• Raporti i OKB-së për Kosovën është befasues për Kryeministrin e Kosovës

• Ambasadori amerikan në Shkup thotë se Marrëveshja e Ohrit do të zbatohet me, ose pa angazhimet e PDSH-së

• Presidenti maqedonas ka thënë para deputetëve se nuk ka në plan t'i nënshtrohet asnjë trysnie

• Raketa ruse Sojuz me dy astronautë është shkatërruar në gjithësi

• Në serinë e shpërthimeve në një depo armësh në Bagdad, kanë humbur jetën 40 irakianë

• Forcat amerikane kapin shefin e shërbimit irakian të spiunazhit

• Presidenti Bush do të shpallë së shpejti përfundimin e luftës në Irak

• Në një seri shpërthimesh në një depo armësh në Bagdad, kanë vdekur të pakten pesë civilë irakianë

• Një ushtar amerikan ka vdekur sot gjatë luftimeve të djeshme në Afganistan

Pesë kushërinj kanë humbur jetën në një fatkeqësi në Luzhan të Pejës nga rrëshqitja e madhe e dheut

 

Pejë, 26 prill 2003 - Pesë kushërinj kanë kanë humbur jetën dje pasdite në komunës së Pejës. Fatkeqësia ka ndodhur në fshatin Lozhan kur ata ishin duke hapur një kanal ujësjellësi.

 

Një masë e madhe dheu kishte rrëshqitur dhe ka zënë të paktën gjashtë vetë, pesë prej të cilëve kanë mbetur të vdekur në vend, ndërsa një tjetër ka shpëtuar dhe aktualisht ndodhet në gjendje të rëndë në Spitalin e Pejës.

Nga shembja e dheut kanë humbur jetën Salih Hoxha, Halil Hoxha, Daut Hoxha, Kamber Hoxha dhe Albert Hoxha, të gjithë kushërinj nga fshati Llozhan i Pejës. Ka shpëtuar vetëm Hilmi Hoxha, i cili ka marrë lëndime të rënda trupore dhe ndodhet në shërim në spitalin e përgjithshëm në Pejë.

 

 

Hasellok i hedh poshtë kritikat e kryeparlamentarit Daci në adresë të UNMIK-ut

 

Prishtinë, 26 prill 2003 - Drejtori për informim i administratës së UNMIK-ut, Sajmon Hasellok i ka hedhur poshtë akuzat e kryeparlamentarit Nexhat Daci, i cili administratën ndërkombëtare e akuzoi për burokraci dhe kërkoi reduktimin e saj.

 

Sipas z. Hasellok kritikat që i janë bërë UNMIK-ut, veçanërisht këtë javë, janë shumë dëshpruese. "Niveli i debateve të disa njerëzve është i ashpër, përfshirë këtu edhe kryetarin e Kuvendit të Kosovës.

 

Dhe sërish problemi qëndron te ne, pra meqë jemi siç thuhet burokratë, më duhet të them se ne jemi burokraci dhe niveli i kësaj burokracie është çështje e hapur për t'u diskutuar", tha Hasellok, duke shtuar se çdo institucion dhe çdo qeveri është burokratike.

"Nëse i shikojmë institucionet e Kosovës çfarë shohim: nuk shohim efekte, por shumë diskutime dhe shumë retorikë. Mendojmë se ka ardhur koha që në vend të kritikohemi pa arsyee, njerëzit duhet të punojnë.

 

Prandaj mendoj se njerëzit fillimisht duhet t'i zgjidhin punët e brendshme, para se t'i shikojnë çështjet e tjera", ka thënë Hasellok në një intervistë për radion "Evropa e lirë".

Hasellok ka theksuar se faji për mosnënshkrimin e disa ligjeve nga Mihael Shtajner nuk qëndron tek administrata ndërkombëtare. Ndërkaq lidhur me bartjen e kompetencave, Hasellok thotë se institucionet vendore nuk i përmbushin as ato kompetenca që aktualisht i kanë.

 

 

Boks: Sonte Luan Krasniqi do të ndeshet me Saletën

 

Prishtinë, 26 prill 2003 - Sonte boksieri shqiptar, me nënshtetësi gjermane, Luan Krasniqi, në luftë drejt titullit të kampionit evropian në kategorinë e rëndë, edhe një here do të ndeshet me boksierin polak Premislav Saleta. Këta dy boksierë jan takuar më 20 korrk të vitit të kaluar kur, siç dihet Luan Krasniqi pas rundit të tetë e pat dorëzuar meçin dhe humbi edhe titullin e kampionit evropian në kategorinë e rëndë.   Sonte është rast i mirë për Luanin që t'i revanshohet boksierit polak. Luan Krasniqi deri më tash i ka zhvilluar 23 duele dhe në 22 prej tyre ka dalë fitimtar. Titullin e kapionit evropian e mban turku Sinan Samil San i cili ndërkohë ka mundur Saletën. Ai sonte për të mbrojtur titullin do të ndeshet me anglezin Julius Francis. Nga ora 20.30, RTK transmeton drejtpërdrejt (për rrjetin tokësor) këtë duel.

 

   

Nesër mbahet konferenca me temën: "Demokracia amerikane, model për zhvillimet në Kosovë"

 

Prishtinë, 26 prill 2003 - Nesër, më 27 prill, në mjediset e hotelit "Grand" në Prishtinë, në orën 11:00, organizuar nga Forumi i Rinisë i LDK-së mbahet konferenca me temën: "Demokracia amerikane, model për zhvillimet në Kosovë".

Pjesmarrës në këtë konferencë do të jenë përfaqësues të institucionëve vendore dhe ndërkombëtare dhe përsonalitete të tjera të jetës publike.

Gjithashtu në konferencë do të marrin pjesë edhe krerët e institucioneve të Kosovës, thuhet në një njoftim të organizatorit të kësaj konference.

 

 

Sipas Zyrës amerikane, bartja e kompetencave tek institucionet e Kosovës duhet të bëhet deri në fund të këtij viti

 

Prishtinë, 26 prill 2003 - Shtetet e Bashkuara të Amerikës konsiderojnë se Misioni i UNMIK-ut në Kosovë duhet ta bëjë bartjen e kompetencave jo të rezerevuara tek institucionet e përkohshme me kohë deri në fund të vitit, thuhet në një komunikatë të Zyrës Amerikane në Prishtinë.

 

Kërkohet nga UNMIK-u dhe përfaqësuesi special i sekretarit të përgjithshëm të OKB-së që të vendosin rreth mundësive për zbatimin e bartjes së kompetencave.

Shefi i Zyrës amerikane në Prishtinë Rino Harnish nëpërmjet një komunikate për shtyp në emër të Departamentit të Shtetit ka thënë se, ashtu siç ia ka bërë të qartë ambasadori Riçard Uiliamson KS të OKB-së më 23 prill, Shtetet e Bashkuara të Amerikës konsiderojnë se UNMIK-u duhet të përfundojë transferin e të gjitha kompetencave jo të rezervuara tek institucionet e përkohshme të Kosovës sipas orarit deri në fund të këtij viti.

Ashtu siç tregon edhe deklarata e ambasadorit Uiliamson në KS, thotë Harnish, situata në Kosovë vazhdon të jetë me një rëndësi të madhe për SHBA-të.

"Në mesin e çështjeve që vazhdojnë ta brengosin janë krimi i organizuar, frikësimi i dëshmitarëve, tensionet ndëretnike dhe dhuna ekremiste", thuhet në komunikatë.

 

Po ashtu theksohet se përfaqësuesi special i sekretarit të përgjithshëm të OKB-së Mihael Shtajner duhet të punojë bashkë me institucionet e përkohshme për të siguruar një legjislacion të mirëfilltë, ndërsa institucionet e Kosovës duhet të respektojnë objektivat e parapara me Rezolutën 1244.

 

UNMIK-u dhe përfaqësuesi special i OKB-së duhet të vendosin rreth hollësive për zbatimin e bartjes.

 

Mirëpo, atmosfera në Kosovë shton edhe më shumë rëndësinë e konsultimit të përfaqësuesit special të sekretarit të përgjithshëm me kohë dhe në hollësi me të gjitha palët, thuhet në komunikatë.

 

 

Zgjedhjet e ardhshme në Kosovë do të mbahen atëherë kur UNMIK-u nuk do të jetë këtu

 

Prishtinë, 26 prill 2003 - Zgjedhjet e ardhshme në Kosovë do të mbahen atëherë kur UNMIK-u nuk do të jetë këtu. Kështu ka deklaruar këshilltari i kryetarit të Kuvendit të Kosovës, Ramush Tahiri. Ai shtoi se UNMIK-u duke dashur ta ruajë mandatin e vet në Kosovë nuk është duke lëvizur gjërat përpara dhe nuk është duke shënuar asnjë përparim.

 

Sa i përket Ligjit për zgjedhjet në Kosovë ai tha se UNMIK-u nuk duhet të frikësohet se çfarë do të ndodhë kur ky ligj do të zbatohet nga kosovarët, pasi që atëherë, sipas tij, UNMIK-ut nuk do t'i mbetet asnjë kompetencë.

 

 

KE ka aprovuar për këtë vit 53 milionë euro për rindërtimin e Kosovës

 

Bruksel, 26 prill 2003 - Komisioni Evropian ka miratuar një program për vitin 2003 që parashikon një paketë ndihmash në një shumë prej 53 milionë euro për rindërtimin, zhvillimin dhe stabilizimin e Kosovës.

 

Nga kjo shumë 30 milionë euro do të përdoren për rindërtimin e ekonomisë kosovare, 12 milionë euro për forcimin e institucioneve, ndërkaq, 5 milionë të tjera do të jenë për zhvillimin social të Kosovës. Shuma e mbetur do të investohet në projektet e asistencës teknike.

Në një komunikatë të posaçme për shtyp theksohet se KE i ka ndarë këto mjete financiare me qëllim të ndihmës humanitare për Kosovën.

 

 

U nënshkrua marrëveshja që transporti i udhëtarëve dhe mallrave të zhvillohet normalisht dhe i sigurt

 

Prishtinë, 26 prill 2003 - Mes Ministrisë së Transportit, UNMIK-ut dhe SHPK-së është arritur një marrëveshje e cila ka për qëllim që transporti i udhëtarëve dhe mallrave të zhvillohet normalisht dhe i sigurt. Kjo marërveshje u nënshkrua nga ministri Zef Morina dhe shefi i policisë së trafikut të Kosovës Gill Gibertson.

Ministri Morina ka theksuar se kjo marrëveshje ka për qëllim mbarvajtjen e punëve në komunikacion, duke respektuar ligjin dhe rregullat, si dhe në bashkëpunim me policinë e komunikacionit, inspektorët tanë të bëjnë kontrollimin e automjeteve të cilat bartin mallrat.

Sipas kësaj marrëveshjeje do të ndërmerren masa ligjore për largimin e automjeteve transportuese jolegale nga trafiku.

 

 

Raporti i OKB-së për Kosovën është befasues për Kryeministrin e Kosovës

 

Uashington, 26 prill 2003 - Duke komentuar raportin e fundit të OKB-së për Kosovën, kryeministri i Kosovës Bajram Rexhepi tha se ai ishte "një raport befasues prezantimi nga Sekretari i Përgjithshëm ku flitet për dhunën ndëretnike, për pasigurinë, për lëvizjen e lirë të komuniteteve minoritare, në radhë të parë të atij serb, për pamundësinë që të shprehen në gjuhën e tyre nëpër gjyqe".

 

Sipas Rexhepit, ato ishin disa segmente që nuk përkojnë me realitetin dhe adresimi është i gabuar, pasi këto janë të drejta të rezervuara.

"Unë kam përshtypjen që fjalori i përdorur në lidhje me sigurinë, lëvizjen e lirë, enklavat e të gjitha, i përngjante mjaft fjalorit të qeverisë serbe, konkretisht të zotit Çoviç dhe indirekt mund të mendohet se ajo pjesë e raportit ishte pjesë e raportit të dërguar nga qeveria serbe", ka thënë kryeministri Rexhepi për "Zërin e Amerikës".

 

 

Ambasadori amerikan në Shkup thotë se Marrëveshja e Ohrit do të zbatohet me, ose pa angazhimet e PDSH-së

 

Shkup, 26 prill 2003 - Ambasadori amerikan në Shkup Lorens Batler ka thënë se Marrëveshja e Ohrit do të zbatohet me ose pa angazhimet e Partisë Demokratike Shqiptare. Megjithatë ai tha se dëshiron që t'i shohë deputetët e kësaj partie opozitare shqiptare në një rol aktiv brenda Parlamentit të Maqedonisë.

 

Ambasadori amerikan ka theksuar se ishte i habitur kur kishte parë se në seancën e kaluar të Parlamentit në fillim të javës kur debatohej mbi dërgimin e ushtarëve të Maqedonisë në Irak mungonin deputetët e PDSH-së.

 

Ai tha se kishte mbetur i zhgënjyer edhe pasi kishte biseduar me ta, miqtë e tij të PDSH-së, siç i quajti ai. Por theksoi dëshirën e tij që t'i shihte në Parlament deputetët e PDSH-së në një rol aktiv. "Sipas parimit të demokracisë nëse fitoni zgjedhjet dhe përfaqësoni elektoratin atëherë ju keni përgjegjësi që në mënyrë aktive të merrni pjesë në parlament", tha ambasadori amerikan Batler.

 

 

Presidenti maqedonas ka thënë para deputetëve se nuk ka në plan t'i nënshtrohet asnjë trysnie

 

Shkup, 26 prill 2003 - Presidentii Maqedonisë Boris Trajkovski u ka thënë deputetëve të Parlamentit maqedonas se ai nuk ka në plan të nënshtrohet përballë asnjë trysnie apo shantazhi, pavarësisht nga burimi dhe synimi i tyre përfundimtar.

 

Trajkovski me këtë rast i ka akuzuar politikanët e opozitës se po minojnë autoritetin në besueshmërinë e tij dhe po degradojnë dinjitetin e familjes së tij. Prokurorët akuzuan shefin e Shërbimit maqedonas të Zbulimit, Dosta Dimovska se kishte përgjuar bisedat telefonike të politikanëve dhe gazetarëve gjatë një periudhe dyvjeçare në kohën që e drejtonte Ministrinë e rendit.

 

 

Raketa ruse Sojuz me dy astronautë është shkatërruar në gjithësi

 

Baikonur, Kazakistan, 26 prill 2003 – Një raketë ruse me dy anëtarë të ekuipazhit ka shpërthyer sot (e shtunë), njofton AFP. Në njoftim thuhet se ky ishte fluturimi i parë në gjithësi pas shkatërrimit të raketës Kolumbia tre muaj më parë.

 

Raketa ruse, në të cilën ndodhej komandanti Juri Malenshenko dhe inxhinieri astronaut amerikan, Eduard Lu, janë nisur sot nga kosmodromi Baikonur në Kazakistan dhe kanë pasur të aterojnë në Stacionin Ndërkombëtar të Gjithësisë të hënën në mengjes. Raketa Sojuz është shqyer në gjithësi si një portokall duke lëshuar re tymi.

 

 

Në serinë e shpërthimeve në një depo armësh në Bagdad, kanë humbur jetën 40 irakianë

 

Bagdad, 26 prill 2003 – Sipas njoftimeve më të reja të Rojterit në serinë e shpërthimeve të fuqishme në një depo armësh në periferi të Bagdadit, kanë humbur jetën 40 irakianë.

 

Trupat amerikane kanë fajësuar sulmuesit e paidentifikuar të kenë hedhur në depo lëndë ndezëse, por vendësit janë parë të zemruar në amerikanët, që kanë ardhur të ndihmojnë viktimat dhe ndaj tyre janë hedhur gurë.

 

 

Forcat amerikane kapin shefin e shërbimit irakian të spiunazhit

 

Uashington, 26 prill 2003 - Zyrtarë amerikanë thonë se shefi i shërbimit irakian të spiunazhit, i cili ka mundësi të ketë patur lidhje me organizatën terroriste Al-Kaida, ndodhet në duart e forcave amerikane. Autoritetet amerikane thonë se Faruk Hixhazi u kap në afërsi të kufirit sirian dje, disa orë pasi ish zëvendës-kryeministri, Tarik Aziz, iu dorëzua zyrtarëve amerikanë.

Faruk Hixhazi ishte një nga agjentët kryesorë të zbulimit të Irakut kur operativët irakianë u përpoqën të vrisnin Presidentin Bush 10 vjet më parë në Kuvajt. Besohet se ai është takuar edhe me Osama Bin Ladenin në vitin 1998.

 

 

Presidenti Bush do të shpallë së shpejti përfundimin e luftës në Irak

 

Uashington, 26 prill 2003 - Zyrtarët e Shtëpisë së Bardhë thonë se Presidenti Bush do të shpallë së shpejti përfundimin e luftimeve në Irak. Zoti Bush do ta bëjë këtë njoftim që javën e ardhshme në një fjalim ku do të parashtrojë planet e tij për rindërtimin e këtij vendi të shkatërruar nga lufta.

Këshilltarët e Presidentit thonë se fjalimi nuk është shkruar ende pasi presidenti po pret raportin e komandantit të operacioneve në Irak, gjeneralit, Tomi Frenks, për përfundimin e luftimeve.

Zyrtarët amerikanë thonë se ndoshta presidenti do ta mbajë fjalimin të enjten kur të vizitojë një aeroplanmbajtëse që po kthehet nga lufta. Është fjala për aeroplanmbajtësen, U-S-S Abraham Lincoln që do të lundrojë drejt San Diegos në Kaliforni në rrugën e saj të kthimit nga Gjiri Persik.

 

 

Në një seri shpërthimesh në një depo armësh në Bagdad, kanë vdekur të pakten pesë civilë irakianë

 

Bagdad, 26 prill 2003 – Të pakten pesë civilë irakianë besohet të kenë humbur jetën sot (të shtunën) dhe shumë të tjerë të jenë plagosur në një seri shpërthimesh të fuqishme në një depo armësh në periferi të Bagdadit, njofton Rojter.

 

Trupat amerikane kanë fajësuar sulmuesit e paidentifikuar të kenë hedhur në depo lëndë ndezëse, por vendësit janë parë të zemruar në amerikanët, që kanë ardhur të ndihmojnë viktimat dhe ata janë gjuajtur me gurë. Korrespondenti i CNN-it ka dëgjuar njerëzit në vendngjarje të kenë thënë se 14 persona janë vrarë kur një raketë tokë-tokë nga depoja e armëve gabimisht ka goditur një shtëpi.

 

 

Një ushtar amerikan ka vdekur sot gjatë luftimeve të djeshme në Afganistan

 

Uashington, 26 prill 2003 – Një ushtar tjetër amerikan ka vdekur sot (të shtunën) nga plagët, që kishte marrë gjatë luftimeve të djeshme në Afganistanin juglindor dhe kështu pra ky është ushtari i dytë amerikan, që është vrarë në këto luftime, njofton Rojter. Ndërkaq, për katër ushtarët e tjerë të plagosur në këto luftime, njoftohet se janë në gjendje stabile.

Copyright©2000-2003 Trepca.net - Të gjitha të  drejtat e rezervuara.