Lajme

E preme, 25 prill 2003

Përmbajtja:

• KFOR-i nuk do të lejojë që të nëpërkëmben rezultatet e arritura gjatë katër viteve në Kosovë

• Edhe OSBE kundër nxjerrjes së ligjit për zgjedhjet

• KFOR-i në Minierën e Stantërgut ka gjetur 15 kilogram eksploziv

• UNMIK-u thotë se Parlamenti i Kosovës i ka tejkaluar kompetencat

• Në Prishtinë po i zhvillon punimet një konferencë për sistemin gjyqësor

• Një organizatë suedeze investon 9 milion kruna për rindërtimin e shtëpive afër Prishtinës

• Ç. Brajshou thotë se UNMIK-u është duke punuar intensivisht në ndriçimin e fatit të të zhdukurve

• Drejtuesit e Ballit Kombëtar nuk e përkrahin idenë për moratorium

• SHBA: UNMIK-u duhet të kompletojë bartjen të gjitha kompetencave që nuk janë të rezervuara tek institucionet e Kosovës

• KFOR-it dhe përfaqësuesit komunalë nënshkruan marrëveshjen për pranim-dorëzimin e Kalasë së Prizrenit KFOR-it dhe përfaqësuesit komunalë nënshkruan marrëveshjen për pranim-dorëzimin e Kalasë së Prizrenit

• Futbollisti kosovar Mehmet Dragusha nënshkroi kontratë trevjeçare me Aintrahtin e Frankfurtit

• Dihen shtatë çerekfinalistët Kupës së Kosovës në futboll

• Futboll: Në finale të Kupës UEFA do të luajnë Seltik dhe Porto

• Tetovë: U lirua nga burgu Krenar Osmani, por jo edhe nga aktakuza

• Zëvendëskryeministri serb fton për bisedime shqiptaro-serbe

• Georgievski jep dorëheqje nga kreu i VMRO-DPMNE-së

• Përleshje të dhunshme në periferi të Tiranës

• SHBA-të do të zhvendosin nga Gjermania në Irak edhe 5.000 ushtarë

• Bush thotë se prania ushtarake amerikane në Irak mund të zgjasë deri në dy vjet

• Uashingtoni paralajmëron Teheranin të mos përzihet në punët e brendshme të Irakut

• Edhe Britania sinjalizoi konsekuenca të mundshme për Francën

• Tarik Aziz u dorëzohet forcave amerikane në Bagdad

• Në Bremen të Gjermanisë një burrë i armatosur ka kidnapuar një autobus me të pakten 10 persona

• Ish-gruaja e Nelson Mendeles është dënuar me pesë vjet burg për mashtrim dhe vjedhje

• Në dy incidente në Kashmirin indian janë vrarë katër ushtarë, një civil dhe dy militantë vetëvrasës

• Deri tani janë kapur shumica e 55 irakianëve më të kërkuar

• Presidenti Bush shprehet me optimizëm për të ardhmen e Irakut

• Koreja e Veriut pranon se ka armë bërthamore

• Përparojnë bisedimet në Bagdad

KFOR-i nuk do të lejojë që të nëpërkëmben rezultatet e arritura gjatë katër viteve në Kosovë

 

Gjilan, 25 prill 2003 - Komandanti i kampit ushtarak "Montieth", nënkoloneli Dejvid Sejxh deklaroi sot para mediave se KFOR-i nuk do të lejojë që të nëpërkëmben rezultatet e arritura gjatë katër viteve në Kosovë dhe të gjithë ata që përpiqen të shkelin mbi këto rezultate do të paraburgosen.

 

Komandanti amerikan tha se prioriritet i KFOR-it është sigurimi i kufijve dhe ndalimi i aktiviteteve ekstremiste, duke theksuar se ka rënie të këtyre aktiviteteve.

Lidhur me AKSH-në Dejvid Sejxh tha se beson që është "një grup i vogël njerëzish të cilët si grup ekstremist duan të pengojnë arritjet e gjertanishme". Madje, sipas tij, edhe grafitet që shihen për Gjilan si "AKSH" dhe "Poshtë UNMIK-u" nuk paraqesin rrezik për sigurinë, duke i quajtur ato "lojë fëmijësh".

Komandanti i KFOR-it ritheksoi se gjendja e sigurisë në vijën kufitare është e qetë dhe e qëndrueshsme.

 

 

Edhe OSBE kundër nxjerrjes së ligjit për zgjedhjet

 

Prishtinë, 25 prill 2003 - Misioni i OSBE- së në Kosovë i ka paralajmëruar institucionet e Kosovës se organizimi i zgjedhjeve dhe nxjerrja eventuale e ligjit zgjedhor është në kompetencën e UNMIK -ut dhe të shefit të tij, Shtajner.

 

Në një reagim ndaj vendimit të Kuvendit të Kosovës për ta miratuar nismën e LDK që në njërën nga mbledhjet e ardhshme të shqyrtojë dhe miratojë ligjin zgjedhor, zëdhënësi i Misionit të OSBE-së në Kosovë, Sven Lindholm ka deklaruar se Kuvendi i Kosovës mund të diskutojë për çfarëdo qoftë, por ai duhet ta respektojë Rezolutën 1244 të KS të KB dhe Kornizën kushtetuese.

 

 

KFOR-i në Minierën e Stantërgut ka gjetur 15 kilogram eksploziv

 

Mitrovicë, 25 prill 2003 - Trupat paqeruajtëse të KFOR-it kanë ndërmarrë dje një aksion të gjerë kërkimi në Minierën e Stan Tërgut në Mitrovicë dhe katër fshatrave përreth saj, ku janë gjetur rreth 15 kilogram eksploziv, pajisje ushtarake, maska mbrojtëse kundër armëve kimike dhe biologjike të prodhimit serb, si dhe një sasi municioni e dokumente të dyshimta.

 

Ky operacion është bërë në kuadër të hetimeve për ndriçimin e minimit të urës hekurudhore në veri të Kosovës, përkatësisht në kërkim të pjesëtarëve të AKSH-së. Zyrtarët e KFOR-it thanë se tash për tash nuk janë gjetur persona të dyshimtë.

"Prej disa kohësh ne kemi vënë nën vëzhgim këtë zonë dhe ne kemi parë lëvizje të dyshimta dhe tashmë jemi të bindur se aty ka terroristë që veprojnë. Unë nuk kam informacione të tjera, përveç faktit se z. Shtajner e ka cilësuar AKSH-në terroriste", ka thënë komandanti i trupave të KFOR-it për Kosovën veriore gjenerali Mishel Klajn. Ai thotë se bastisjet në rajonin e Mitrovicës do të vazhdojë edhe disa ditë.

Tash për tash nuk ka pasur të arrestuar, përveç faktit se dy veta janë ndaluar meqë kanë ndjekur nga afër punën e ushtarëve të KFOR-it. Gjenerali Klejn tha se synimi i forcave të tij është lufta kundër terroristëve, që është në përgjegjësi të trupave të KFOR-it.

 

 

UNMIK-u thotë se Parlamenti i Kosovës i ka tejkaluar kompetencat

 

Prishtinë, 25 prill 2003 - Nga Zyra e kryeadministratorit të Kosovës Mihael Shtajner është njoftuar se vendimi i Kuvendit të Kosovës për fillimin e procedurës për hartimin e ligjit për zgjedhje i tejkalon kompetencat që i ka Parlamenti i Kosovës.

 

Në këtë njoftim thuhet se sipas paragrafit 11 të Rezolutës 1244 të KS të OKB-së të gjitha çështjet lidhur me mbajtjen e zgjedhjeve janë në tërësi në kompetencë të UNMIK-ut.

 

 

Në Prishtinë po i zhvillon punimet një konferencë për sistemin gjyqësor

 

Prishtinë, 25 prill 2003 - Organizuar nga Këshilli për Mbrojtjen e të Drejtave e të Lirive të Njeriut, në Prishtinë po mbahet Konferenca rajonale për punën e sistemit gjyqësor.

 

Në Konferencë po marrin pjesë personalitete nga fusha e gjyqësisë nga Kosova, Shqipëria, Maqedonia, Mali i Zi dhe nga Lugina e Preshevës.

Në ditën e parë folën Pajazit Nushi, Zejnullah Gruda, Luan Omari nga Shqipëria, Osman Kadriu nga Tetova etj.

"Kosova dhe ne si institucion për mbrojtjen e të drejtave të njeriut (KMDLNJ) jemi vitalisht të interesuar për miratimin e një ligji autonom, ku veçoritë dhe specifikat e kosovarëve do të ishin të konceptuara në atë mënyrë që do të avanconin zhvillimin e Kosovës dhe të shoqërisë së pavarur", tha Pajazit Nushi nga KMDLNJ.

Ndërkaq, prof. Zejnulla Gruda foli në temën ndarja e pushteteve, demokracia dhe pavarësia e gjykatave.

Mysafiri nga Shqipërai Luan Omari diskutoi për kushtetutën e Shqipërisë dhe pushtetin gjyqësor, duke bërë disa krahasime lidhur me sistemin aktual gjyqësor të Shqipërisë dhe Kosovës.

 

 

Një organizatë suedeze investon 9 milion kruna për rindërtimin e shtëpive afër Prishtinës

 

Stokholm, 25 prill 2003 - Agjencia suedeze për Zhvillim dhe Këmbim Ndërkombëtar SIDA, ka lejuar dhe miratuar një projekt të organizatës së krishterë për donacione Erikshjälpen, me të cilin planifikohet vazhdimi i rindërtimit të shtëpive të shkatërruara nga lufta në Kosovë.

Që nga përfundimi i luftës në Kosovë në vitin 1999, kjo organizatë e mbështetur nga Sida ka meremetuar deri tani 412 shtëpi. Projekti i fundit është kryer në Fushë Kosovë ku u ndërtuan dhe meremtuan 161 shtëpi.

Projekti më i ri i miratuar nga SIDA parasheh ndarjen e afër 9 milion krunave suedeze të cilat do të përdoren gjithashtu për meremetim dhe ndërtim të shtëpive të reja. Angazhimet do të përqendrohen përreth Prishtinës ku do të ndërtohen 90 shtëpi.

 

 

Ç. Brajshou thotë se UNMIK-u është duke punuar intensivisht në ndriçimin e fatit të të zhdukurve

 

Gjakovë, 25 prill 2003 - Zëvendëskryeadministratori i Kosovës Çarlls Brajshou dje ka vizituar Gjakovën, ku është takuar me zyrtarët komunalë të Gjakovës, si dhe me përfaqësues të administratës ndërkombëtare në këtë komunë.

 

Brajshou pati një takim të veçantë edhe me Shoqatën për Persona të Zhdukur në Gjakovë, në të cilin u tha se tash katër vjet shumë familjarë nuk dinë për më të dashurit e tyre.

 

Vetëm komunës së Gjakovës i mungojnë 700 persona që po i presin të afërmit e tyre e e premtimet akoma vazhdojnë, i thanë me këtë rast z. Brajshou përfaqësuesit e kësaj shoqate në Gjakovë.

Ndërkaq, z. Brajshou ka thënë se dihet se janë 4000 persona të zhdukur të të gjitha bashkësive etnike fati i të cilëve nuk dihet. "UNMIK-u është duke punuar intensivisht për t'i zgjidhur këto raste", ka thënë me këtë rast z. Brajshou.

 

 

Drejtuesit e Ballit Kombëtar nuk e përkrahin idenë për moratorium

 

Prishtinë, 25 prill 2003 - Drejtuesit e Ballit Kombëtar nuk e përkrahin idenë e kreut të PDK-së për moratorium mbi statusin përfundimtar të Kosovës dhe kërkojnë që për çështje me interes madhor të ketë koncensus ndërpartiak, pa marrë parasysh madhësinë e partive.

Kryetari i Ballit Kombëtar Kajtaz Fazlia ka thënë se zvarritja e statusit përfundimtar të Kosovës do të ndikojë negativisht në të gjitha segmentet e jetës në Kosovë, veçanërisht në zhvillimin ekonomik.

 

Ai ka shtuar se çdo hap i cili merret për shpejtimin e pavarësisë së Kosovës do të përkrahet nga Balli Kombëtar.

 

 

SHBA: UNMIK-u duhet të kompletojë bartjen të gjitha kompetencave që nuk janë të rezervuara tek institucionet e Kosovës

 

Nju-Jork, 25 prill 2003 - Si shqiptarët ashtu edhe serbët e kanë sfiduar gjithnjë e më shumë autoritetin e UNMIK-ut që është përgjegjës për administrimin e Kosovës, u tha gjatë debatit në KS që është mbajtur parëmbrëmë vonë.

 

Ndihmëssekretari i përgjithshëm i OKB-së për operacione paqeruajtëse Hedi Anabi, duke informuar KS ka thënë se Kosova ka edhe do rrugë të bëjë për vendosjen e institucioneve përfaqësuese dhe funksionale.

Ndërkaq, zëvendësambasadori amerikan në Kombet e Bashkuara Riçard Uiliamson i ka bërë thirrje KS të OKB-së që të bëjë shtytje për sendërtimin e reformave të shtruara nga përfaqësuesi special, Miahael Shtajner.

"Ne duhet t'i shfrytëzojmë të gjitha levat që kemi në disponim për të inkurajuar respekt për të gjitha qëllimet e shtruara në Rezolutën 1244. Ne duhet të bëjmë gjithë atë që mundemi për të inkurajuar qeveritë përgjegjëse. Kjo është arsyeja e mbështetjes së Shteteve të Bashkuara për procesin e standardeve", tha zyrtari i amerikan.

 

Ai ka theksuar se Shtetet e Bashkuara angazhohen që UNMIK-u duhet të kompletojë bartjen të gjitha kompetencave që nuk janë të rezervuara tek institucionet e përkohshme të Kosovës, ashtu siç është paraparë deri në fund të vitit, ka thënë Uiliamson gjatë debatit në KS të OKB-së për Kosovën.

 

 

KFOR-it dhe përfaqësuesit komunalë nënshkruan marrëveshjen për pranim-dorëzimin e Kalasë së Prizrenit KFOR-it dhe përfaqësuesit komunalë nënshkruan marrëveshjen për pranim-dorëzimin e Kalasë së Prizrenit

 

Prizren, 25 prill 2003 - Në Prizren u nënshkrua marrëveshja për pranim -dorëzimin e Kalasë së Prizrenit midis autoriteteve të KFOR-it dhe zyrtarëve komunalë. Kryetari i Komunës së Prizrenit Eqrem Kryeziu e falënderoi KFOR-in gjerman për kontributin e dhënë në katër vitet e pasluftës si dhe për mbajtjen e rendit dhe të qetësisë në rajon.

 

Ky akt për z. Kryeziu ishte shumë madhështor sepse sipas tij njëri ndër monumentet më të vjetra të qyteti, Kalaja, do të jetë e lirë edhe për vizitorë.

Ndërkaq zyrtari i KFOR-i Shtefan Diero tha veç tjerash se nënshkrimi i pranim-dorëzimit të Kalasë së Prizrenit është në rrugë e drejtë e transferimit të saj nga KFOR-i tek institucionet vendore.

Sipas përfaqësuesve të KFOR-it Kalaja e vjetër e qytetit të Prizrenit zyrtarisht do të lirohet nga patrullat e KFOR-it më 6 maj të këtij viti.

 

 

Futbollisti kosovar Mehmet Dragusha nënshkroi kontratë trevjeçare me Aintrahtin e Frankfurtit

 

Frankfurt, 25 prill 2003 - Futbollisti kosovar Mehmet Dragusha, ka nënshkruar kontratë trivjeçare me skuadrën Aintraht Frankfurt. Kjo skuadër ka gjasa të mëdha që edicionin e ardhshëm të bëjë gara në elitën e futbollit gjerman.

Në këtë kontratë ekziston një opsion për ta shtyrë atë edhe një vit tjetër, nëse palët do të jenë të kënaqura me njëra-tjetrën. Mehmet Dragusha aktualisht është futbollist i Aintrahtit të Trierit në Bundesligën 2, por marrëveshja me këtë klub skadon në muajin qershor.

Në skuadrën e Aintrahtit nga Frankfurti, aktualisht luan edhe futbollisti i kombëtares shqiptare, Ervin Skela. "Është një futbollist i shkëlqyer.

 

Mund të na ndihmojë shumë për t'i pëmbyshur synimet tona", ka pohuar para gazetarëve gjerman, Ervin Skela, pas nënshkrimit të kontratës mes Aintrahtin e Frankfurtit dhe Mehmet Dragushës.

 

 

Dihen shtatë çerekfinalistët Kupës së Kosovës në futboll

 

Prishtinë, 25 prill 2003 – U zhvilluan ndeshjet e kthimit të së tetës së finales të Kupës së Kosovës në futboll. Dihen shtatë skuadra çerekfinaliste, ndërkaq çerekfinalisti i tetë do të përcaktohet nga dueli, Flamurtari-Gjilani, i cili për shkak të terrenit të mbuluar me ujë nga reshjet e shiut, nuk u zhvillua fare.

Mbajtësja e këtij trofeu, Besiana, nuk arriti dot ta përmbysë epërsinë e thellë të Dritës nga ndeshja e parë, 4:0, edhe pse ajo mundi Dritën me rezultat 3:2.

 

Kështu skuadrës së Shqiponjës së Pejës, e cila pjesëmarrjen në çerekfinale e siguroi të martën, duke e mposhtur skuadrëne Ligës së Parë Kosovën e Prishtinës edhe në takimin e dytë me po të njëjtin rezultat (2:1), iu bashkangjitën edhe: KEK-u, Prishtina, Liria, Drita, Vëllaznimi dhe Drenica.

Në shtatë takimet e zhvilluara u shënuan gjithsej 25 gola.

Rezultatet komplete:

Kosova(V) - KEK-u 3:2 (0:3)

2 Korriku(P) – Liria 1:1 (0:2)

Shqiponja - Kosova(P) 2:1 (2:1)

Besa – Prishtina 0:1 (0:2)

Deçani – Drenica 1:1 (0:7)

Ramiz Sadiku – Vëllaznimi 3:4 (1:2)

Besiana – Drita 3:2 (0:4)

Flamurtari - Gjilani (0:1) u shty

Shorti për çerekfinale do të hidhet më 30 prill në orën 12.00, në lokalet e Shtëpisë së Sporteve në Prishtinë. Ndeshjet para të çerekfinales do të zhvillohen më 7 maj ndërsa ato të kthimit më 14 maj.

 

 

Futboll: Në finale të Kupës UEFA do të luajnë Seltik dhe Porto

 

Prishtinë, 25 prill 2003 – Në finale të kupës së UEFA-së do të luajnë Seltik nga Gllazgou dhe skuadra portugeze, Porto.

Seltik me golin e suedezit Henrik Larson në minutën e 79, si mysafir, mundi skuadrën portugeze Boavista. Takimi i parë pat përfunduar me rezultat 1:1.

Në takimin tjetër gjysmëfinal, Lacio luajti baras (0:0) me Porton. Kështuqë Porto u kualifikua për në finale të Kupës së UEFA-së pasiqë në takimin e paradyjavësh kishte mundur Lacion me rezultat bindës 4:1.

 

Ndeshja finale e Kupës UEFA ndërmjet Portos dhe Seltikut, do të zhvillohet më 21 maj, në qytetin spanjoll Sevila.

Rezultatet gjysmëfinale:

 

Boavista – Seltik 0:1 (1:1)

Lacio – Porto 0:0 (1:4)

Në kllapa janë rezultatet e takimit të parë gjysmëfinal.

 

 

Tetovë: U lirua nga burgu Krenar Osmani, por jo edhe nga aktakuza

 

Tetovë, 25 prill 2003 - Dje është liruar nga vuajtja e dënimit Krenar Osmani, ish-pjesëtar i Ushtrisë Çlirimtare Kombëtare. Z. Osmani nga Gjykata në Shkup kohë më parë ishte dënuar me 6 vjet heqje lirie nën akuzën se gjatë krizës të vitit 2002 ka kryer krime ndaj njerëzimit.

 

Megjithatë, Krenar Osmani nuk është liruar nga aktakuza për gjenocid. Lirimin e tij e kishte kërkuar edhe Komiteti Maqedonas i Helsinkit. Për lirimin e tij në Tetovë u organizuan protesta, si dhe ishte bllokuar rruga kryesore që lidhte këtë qytet me Shkupin.

Në anën tjetër udhëheqësit e partisë shqiptare në pushtet BDI kanë deklaruar se do të hiqen të gjitha akuzat kundër ish-pjesëtarëve të UÇK-së.

 

 

Zëvendëskryeministri serb fton për bisedime shqiptaro-serbe

 

Beograd, 25 prill 2003 - Zëvendëskryeministri i Serbisë Nebojsha Çoviq ka ftuar për bisedime shqiptaro-serbe, por në të cilat nuk do të diskutohej rreth statusit përfundimtar të Kosovës, por për çështje morale që i rëndojnë marrëdhëniet midis serbëve dhe shqiptarëve.

 

Ai ka theksuar se është me rëndësi që sa më parë dhe në fillim të dialogut të eliminohen dyshimet morale midis serbëve dhe shqiptarëve, duke shtuar se në këtë rrafsh pret ndihmën e bashkësisë ndërkombëtare, por jo me anë të qasjeve të njëannshme.

 

Çoviq ka nënvizuar se pala serbe për hir të spastrimit të vet është e gatshme t'u thotë shqiptarëve se vërtet kanë vuajtur nën regjimin e Millosheviqit, ndonëse as serbët nuk e kanë pasur më mirë.

Sipas Çoviqit, si politikanët e sotëm serbë, ashtu edhe ata shqiptarë kanë mjaft arsye për turp dhe pendim, duke shtuar se "sa më gjatë të shtyhet momenti i pendimit më e madhe do të jetë vuajtja dhe mosndjenja e mirë.

 

 

Georgievski jep dorëheqje nga kreu i VMRO-DPMNE-së

 

Shkup, 25 prill 2003 - Lideri i VMRO-DPMNE-së Lubço Georgievski përmes një deklarate me shkrim ka bërë të ditur se tërhiqet nga kreu i partisë dhe se ai vendim është përfundimtar dhe i pandryshueshëm.

"Si lider i VMRO-DPMNE-së treiherë me radhë partinë e solla në humbje. Zgjedhjet presidenciale në vitin 1999, zgjedhjet lokale në vitin 2000 dhe veçanërisht ato parlamentare në vitin 2002, të cilat sipas madhësisë së humbjes ishin evidente.

 

Duke u nisur nga rregullat e shkruara demokratike evropiane ky fakt është i mjaftueshëm të bëhet ndryshim i liderit", thekson Georgievski në deklaratën e tij.

 

 

Përleshje të dhunshme në periferi të Tiranës

 

Tiranë, 25 prill 2003 - Dje në zonën e Bathores në periferi të Tiranës, janë zhvilluar protesta të dhunshme ku ka pasur konfrontime të përgjakshme mes banorëve dhe forcave të rendit.

 

Protestuesit kërkonin të bllokonin rrugën nacionale dhe ta transferonin protestën e tyre në qendrën e Tiranës. Por forcat e policisë nuk i lejuan duke ju kundërvënë masës së njerëzve. Nga përplasjet kanë mbetur të plagosur të paktën 6 anëtarë të forcave speciale, ndërkohë qe nuk bëhet e ditur mbi arrestime ndër rradhët e protestuesve.

 

Banorët e kësaj zone mjaft të varfër dhe me probleme të një infrastrukture rë rënduar, kanë kërkuar që t'u legalizohen banesat e tyre, të ndërtuara pas viteve 1990 si edhe përmirësimin e kushteve të tyre minimale të jetesës.

 

 

SHBA-të do të zhvendosin nga Gjermania në Irak edhe 5.000 ushtarë

 

Baumholder, 25 prill 2003 - SHBA-të do të zhvendosin nga Gjermania në Irak edhe 5.000 ushtarë të tjerë. Një zëdhënës i ushtrisë amerikane tha se divizioni tankist do të kontribojë në stabilizimin e paqes në Irak. Ushtarët do të fluturojnë brenda dy javësh nga baza ajrore amerikane e Ramshtajnit fillimisht drejt Kuvajtit.

 

 

Bush thotë se prania ushtarake amerikane në Irak mund të zgjasë deri në dy vjet

 

Uashington, 25 prill 2003 - Presidenti amerikan Xhorxh Bush ka thënë se deri tani në Irak nuk janë gjetur armë të shkatërrimit në masë. Megjithatë SHBA-të do të zbulojnë nëse Sadam Huseini i ka shkatërruar apo fshehur këto armë, tha Bush në një fabrikë tankesh në shtetin federal Ohajo.

 

Sipas presidenti Bush prania ushtarake amerikane në Irak mund të zgjasë deri në dy vjet. Trupat amerikane do të largohen nga ky vend sapo të kenë përmbushur misionin, tha Bush në një intervistë televizive.

 

 

Uashingtoni paralajmëron Teheranin të mos përzihet në punët e brendshme të Irakut

 

Teheran, 25 prill 2003 - Tonet midis SHBA-ve dhe Iranit janë acaruar. SHBA-të e paralajmëruan Republikën Islamike që të mos përzihet në punët e brendshme të vendit fqinj, Irakut. Zëdhënësi i Shtëpisë së Bardhë Ari Fleisher tërhoqi vëmendjen tek njoftimet sipas të cilave agjentët iranianë po përpiqen të ndikojnë mbi shiitët në jug të Irakut.

 

 

Edhe Britania sinjalizoi konsekuenca të mundshme për Francën

 

Londër, 25 prill 2003 - Pas SHBA-ve edhe Britania e Madhe sinjalizoi konsekuenca të mundshme për Francën për arsye të politikës së saj ndaj Irakut. Në stacionin BBC Ministri i Jashtëm britanik Xhek Stro tha se qëndrimi i Francës dhe i disa shteteve të tjera para luftës në Irak është thjesht i pashpjegueshëm për shumicën e amerikanëve.

 

Vendimet kanë konsekuenca vazhdoi Stro. Sipas tij lufta kundër Irakut mund të ishte shmangur në rast se Franca dhe Rusia do të kishin mbështetur SHBA-ës dhe Britaninë e Madhe duke i vendosur Sadam Huseinit një ultimatum vërtetë të fortë.

 

 

Tarik Aziz u dorëzohet forcave amerikane në Bagdad

 

Uashington, 25 prill 2003 - Ish-zëvendëskryeministri i Irakut Tarik Aziz, udhëhqësi më i njohur irakian pas Sadam Huseinit, është tani në duart e Shteteve të Bashkuara.

Tarik Azis, zyrtari i 43-të në listën e 55 zyrtarëve më të kërkuar irakianë, ishte këshilltari kryesor i Sadam Huseinit për politikën e jashtëme dhe personi kryesor që mbante lidhjet e Bagdadit me Perëndimin.

 

Zoti Aziz ishte gjithashtu i vetmi anëtar i krishterë i rrethit më të ngushtë të Saddamit dhe besohet se ai kishte shumë pak influencë në qeverinë irakiane pasi ai nuk ishte mysliman.

 

 

Në Bremen të Gjermanisë një burrë i armatosur ka kidnapuar një autobus me të pakten 10 persona

 

Berlin, 25 prill 2003 – Në qytetin verior gjerman, Bremen, një burrë i armatosur ka kidnapuar një autobus, në të cilin kanë qenë të pakten 10 persona, ka bërë të ditur policia gjermane sot (të premten), njofton Rojter.

 

Autobusi udhëtonte në drejtim të Hanoverit, ka deklaruar zëdhënësi i policisë në Bremen. Policia po përpiqet të vërë kontakt me kidnapuesin. Detaje më të hollësishme nuk janë dhënë ende.

 

 

Ish-gruaja e Nelson Mendeles është dënuar me pesë vjet burg për mashtrim dhe vjedhje

 

Pretoria, 25 prill 2003 – Vini Medikizela-Mendela, ish-gruaja e ish-presidentit të Afrikës së Jugut, Nelson Mendela, është dënuar me pesë vjet burg për mashtrim dhe vjedhje, kurse një vit burg i është hequr, njofton AFP.

 

Ndërkaq, bashkëpaditësin, Adi Mulmen, gjykata e Pretorias e ka dënuar me shtatë vjet burg dhe atij ia ka hequr dy vjet burg. "Vetëm të marrët mund të luajnë rolin tuaj në histrorinë e vendit", i ka thënë gjykatësi Xonson Vini Mendeles me rastin e shqiptimit të dënimit.

 

 

Në dy incidente në Kashmirin indian janë vrarë katër ushtarë, një civil dhe dy militantë vetëvrasës

 

Shringar, 25 prill 2003 – Të pakten tre militantë kanë kryer sot (të premten) një sulm vetëvrasës në kampin ushtarak në Bandipur, 35 mile në veri të Shrinagarit, në Kashmirin indian dhe kanë vrarë dy ushtarë dhe një civil, njofton Rojter.

 

Në këtë incident, po kështu janë vrarë dy nga tre sulmuesit, kurse i treti ia ka dalë të ikën. Njëri nga sulmuiesit ka pasur të lidhur eksplozivin rreth trupit dhe kështu ka vrarë, pos vetes, edhe një civil afër derës së kampit ushtarak.

 

Po kështu, njoftohet se të premten heret në mengjes janë vrarë edhe një oficer i armatës dhe një ushtar, kurse tre të tjerë janë plagosur në një pritë, që i kanë vënë guerilët separatistë një patrulle ushtarake në fshatin e afërm Sum.

 

 

Deri tani janë kapur shumica e 55 irakianëve më të kërkuar

 

Uashington, 25 prill 2003 - Sekretari amerikan i Mbrojtjes, Donald Ramsfeld, tha se forcat e koalicionit kanë kapur deri tani shumicën e 55 irakianëve më të kërkuar. Zoti Ramsfeld i tha agjencisë së lajmeve Associated Press se zyrtarët amerikanë do t'i identifikojnë ata sapo të jenë konfirmuar identitetet e tyre.

 

Të mërkurën, zyrtarët amerikanë njoftuan për kapjen e tre ish zyrtarëve irakianë, duke përfshirë edhe personin e 10-të në listë, Muhazim Sa'b Hasan al-Tikriti, komandanti i forcave irakiane të mbrojtjes. Zyrtarët thanë gjithashtu se kanë nën vërrejtje edhe ish ministrin e Tregtisë së Irakut dhe ish shefin irakian të zbulimit.

 

 

Presidenti Bush shprehet me optimizëm për të ardhmen e Irakut

 

Ohajo, 25 prill 2003 - Presidenti u përshëndet me ovacione në një uzinë të mbrojtjes në shtetin Ohajo, që prodhon tanke për ushtrinë. Ai i informoi të pranishmit për ecurinë e luftës dhe për punën që duhet bërë në Bagdad.

“Ende ekzistojnë rreziqe dhe sfida. Por një gjë është e sigurt, Saddam Husseini nuk është më në pushtet”.

Presidenti tha se demonstratat që po zhvillohen tani në Irak, përbëjnë një shenjë që tregon se liria po hedh rrënjë dhe se njerëzit tani mund të flasin hapur dhe të praktikojnë besimin e tyre pa patur frikë se do të ndëshkohen.

 

 

Koreja e Veriut pranon se ka armë bërthamore

 

Phenian, 25 prill 2003 - Njoftohet se Koreja e Veriut u ka deklaruar Shteteve të Bashkuara në bisedimet e Pekinit se ajo ka armë bërthamore. Zyrtarë amerikanë që kërkuan të mos identifikohen u thanë disa agjencive të lajmeve se Peniani e bëri këtë deklaratë gjatë bisedimeve tripalëshe që përfuan sot dhe ku merrnin pjesë delegacionet amerikane, koreanoveriore dhe kineze.

 

 

Përparojnë bisedimet në Bagdad

 

Bagdad, 25 prill 2003 - Ministritë e qeverisë irakiane mund të rihapen në fund të javës së ardhshme, njoftoi administratori amerikan për Irakun Xhej Garner.

Zoti Garner u bëri thirrje punonjësve të sektorit publik që të rikthehen në punë sa më shpejt të jetë e mundur, duke u premtuar atyre se do të paguhen fillmisht për punën e një jave dhe pastaj do të marrin rrogë mujore.

Copyright©2000-2003 Trepca.net - Të gjitha të  drejtat e rezervuara.