Lajme

E enjte, 24 prill 2003

Përmbajtja:

• Kryeparlamentari Daci ka kritikuar ashpër administratën e UNMIK-ut dhe ka kërkuar reduktimin e stafit të saj

• Kuvendi i Kosovës miratoi nismën e nxjerrjes së ligjit për zgjedhjet dhe dy projektligje

• Në Prishtinë u nënshkrua një marrëveshje ndërmjet postave të Kosovës dhe Maqedonisë

• Motrat Zeqiri nga Prishtina marrin "Grand prix" në një festival të filmit në Francë

• Kryesuesi i radhës së OSBE-së thotë se BE duhet që Kosovën ta mbajë lart në axhendën politike të saj

• Veturat që qarkullojnë pa targa KS do të konfiskohen nga policia

• Në Gjilan ka një ulje të dukshmne të shkallës së krimit, thotë komandanti i policisë së UNMIK-ut

• Kosovës i nevojitet ligji për zgjedhjet, u tha gjatë debatit të sotëm në Kuvendin e Kosovës

• Biznismenët kosovarë dhe ata maqedonas thonë se bashkëpunimi ekonomik i vendeve fqinje është i domosdoshëm

• Një prokuror ndërkombëtar ka ngritur aktakuzë kundër Millan Ivanoviqit

• Edhe PPD kërkon protektorat ndërkombëtar në Maqedoni

• Për deputetët maqedonas, Lidhja e Prizrenit është lëvizje "terroriste"

• Subjektet politike shqiptare vlerësojnë se arrestimi i Shefqet Musliut nuk i kontribuon stabilizimit në Luginën e Preshevës

• Beogradi kërkon nga shefi i UNMIK-ut që Musliu t'u dorëzohet organeve të drejtësisë serbe

• Kryetari i BDI-së Ali Ahmeti dhe kryetari i PDK-së Arbër Xhaferi nuk arriten të kuptohen edhe pas takimit të djeshëm triorësh

• Filloi lirimi nga burgu i Shupkës i ish-pjesëtarëve të UÇK-së

• Bisedimet Pauëll - Dë Vilpën

• I hapet rruga aktivitetit të një qeverie të re palestineze

• Amerika kap irakianë të tjerë

• Arrihet marrëveshja për qeverinë palestineze

• Shifra marramendëse të viktimave të dhunës shtetërore në Kolumbi

• Një vetëvrasës palestinez me bombë e ka vrarë një person dhe ka plagosur edhe 13 persona të tjerë

• Nga rrëshqitja e dheut në Guatemalë ka pësuar një fshat dhe kanë humbur jetën të pakten 10 persona

• Kryengritësit muslimanë në Filipine kanë vrarë 12 civilë

• Në Xhakartë kanë shpërthyer dy bomba, por s’ka pasur viktima

• Guerilët muslimanë në Filipine kanë vrarë të pakten një civil, kurse dhjetëra të tjerë i kanë marrë peng

• Pas Juventusit dhe Interit, në gjysmëfinale të Ligës së Kampionëve edhe Real Madrid e Milan

Kryeparlamentari Daci ka kritikuar ashpër administratën e UNMIK-ut dhe ka kërkuar reduktimin e stafit të saj

 

Prishtinë, 24 prill 2003 - Kryetari i Kuvendit të Kosovës Nexhat Daci ka akuzuar administratën ndërkombëtare në Kosovë për burokraci, duke kërkuar njëherit reduktimin e stafit të UNMIK-ut. Këto komente Daci i ka bërë gjatë një bisede me disa gazetarë holandezë që po qëndrojnë në Prishtinë në përcjellje të kryesuesit të radhes së OSBE-së.

Z. Daci ka thënë se është e pakuptimtë zvarritja e kompetencave dhe se UNMIK-u ka shtyrë shumë gjatë procesin e bartjes së kompetencave të vërteta tek institucionet e Kosovës, madje edhe ato që parashihen me kapitullin V të Kornizës Kushtetuese, të cilat janë pjesë e përgjegjësive të vendorëve.

 

Sipas kryeparlamentarit Daci mosbartja e kompetencave nuk lejon institucioneve të Kosovës që të nxjerrin ligje, ndërkaq kur ato ligje miratohen në Kuvend është administrata ndërkombëtare ajo që pengon zbatimin e tyre.

"Gjatë tri vjetëve të pasluftës një vend i varfër si Kosova ka suficit buxhetor prej 100 milion eurosh, a nuk është kjo e pakuptimtë, kur dihet se pensionet dhe rrogat në Kosovë janë tepër të ulëta", tha Daci. Ai me shembuj konkretë ka shpjeguar si është kjo në praktikë: rroga e tij, e presidentit të Kosovës, apo e kryeministrit, është më e vogël sesa rroga e pastrueses në zyrën e administratorit Shtajner.

"Nuk e akuzoj, por e kritikoj që bën shumë pak", ka thënë zoti Daci për shefin e UNMIK-ut Shtajner për të cilin tha se ka ardhur me një ekip të vogël dhe ka gjetur këtu një burokraci të Kombeve të Bashkuara. Daci për Shtajnerin thotë se nuk është pragmatik, flet gjëra të ëmbla dhe premton shumë gjëra të mira.

 

"Ai është në gjendje të nënshkruajë diçka për veriun e Mitrovicës që ne e përkrahim, por që të nesërmen harron se çka ka nënshkruar. Për këtë arsye kemi edhe situatën kur kërkohet edhe ndarja e Kosovës në bazë të gjendjes në terren", thotë Daci duke shtuar se një e treta e Kosovës nuk kontrollohet dhe nuk administrohet nga UNMIK-u.

"Unë, presidenti Rugova apo kryeministri Rexhepi as që kemi qasje fizike në atë pjesë dhe as që mund ta vizitojmë veriun e Kosovës", ka thënë veç tjerash kryeparlamentari i Kosovës, i cili për KFOR-in, ka pasur vetëm fjalë lavdëruese, duke thënë se do të ishte i lumtur që qytetarët e Kosovës t'i besojnë atij sa i besojnë KFOR-it.

 

 

Kuvendi i Kosovës miratoi nismën e nxjerrjes së ligjit për zgjedhjet dhe dy projektligje

 

Prishtinë, 24 prill 2003 - Pas shumë diskutimeve të zhvilluar, Kuvendi i Kosovës me shumicë votash miratoi nismën e grupit paralmentar të LDK-së dhe të Komisionit legjislativ për nxjerrjen e ligjit për zgjedhjet.

 

Ndërkohë deputetët kërkuan nga Qeveria që të nisë hartimin e një projektligji për zgjedhjet, i cili do t'u përcillej komisioneve përkatëse për procedurë të mëtejshme. Kundër kësaj nisme kanë qenë deputetët e koalicionit serb "Kthimi" dhe disa deputetë të minoriteteve të tjera.

Gjithashtu deputetët me shumicë votash dhe vetëm me një kundër miratuan në parim edhe projektligjin për rrugët. Shjegimet hyrëse për këtë projektligji i dha ministri i Transportit dhe i Telekomunikacionit Zef Morina, i cili tha se miratimi i një ligji për rrugët është një ndër përparësitë e mëdha të ministrisë që ai kryeson.

Ndërkaq ministri i Bujqësisë dhe Pylltarisë Goran Bogdanoviq, pasi paraqiti projektlgjin për plehrat artificiale, deputetët edhe këtë projektligj e miratuan sot në parim, i cili do të vazhdojë me procedurën e mëtejshëm.

 

 

Në Prishtinë u nënshkrua një marrëveshje ndërmjet postave të Kosovës dhe Maqedonisë

 

Prishtinë, 24 prill 2003 - Ndërmjet postave të Kosovës dhe të Maqedonisë sot në Prishtinë u nënshkrua një marrëveshje bashkëpunimi, e cila për Kosovën, siç u tha me këtë rast, është edhe një rrugë më tepër.

Drejtoresha e përgjithshme Leme Xhema, pas nënshkrimit të kësaj marrëveshjeje, theksoi se do të merren edhe hapa të tjerë për të vazhduar në integrimin apo pjesëmarrjen e postave të Kosovës në postat evropiane në bazë të normativave të Evropës.

Në emër të delegacionit nga Maqedonia marrëveshjen e nënshkroi drejtori i përgjithshëm Taip Jakupi. Ai tha se me këtë marrëveshje edhe komunikimi ndërmjet dy postave do të jetë më i ngushtë.

 

 

Motrat Zeqiri nga Prishtina marrin "Grand prix" në një festival të filmit në Francë

 

Paris, 24 prill 2003 - Me filmin "Exit" (Dalja), motrat Lendita dhe Blerta Zeqiri nga Prishtina kanë fituar "Grand prix" (Çmimin e madh) në Festivalin e metrazhit të shkurtër në qytetin Kaen (Caen) të Francës.   Ky është një film i shkurtër artistik që flet për tre persona të mbyllur në një banesë gjatë luftës në Kosovë. Mungesa e ushqimit, mungesa e informatave nga jashtë, si dhe frika, bëjnë që këta tre persona të jenë shumë afër njeri tjetrit. Mirëpo në të njejtën kohë nuk kanë qenë asnjëherë më larg me njëri tjetrin.

 

Skenarin dhe regjinë e kanë bërë vetë motrat Lendita dhe Blerta Zeqiri. Ndërkaq rolet kryesore i interpretojnë: Vedat Bajrami, Osman Azemi, Blerim Qeriqi, Alban Ukaj, Alush Gashi etj...

Lendita aktualisht është duke i vijuar studimet në Degën e artit dhe filozofisë në seksionin: estetika e filmit, në Universitetin Paris 8. Më herët ajo ka kryer Fakultetin e Artit në Prishtinë.

Ndërkaq Blerta pasi kishte kryer dy vitet e para në Fakultetin e Arteve në Prishtinë, në Degën e dramaturgjisë, tani është duke i ndjekur studimet në Degën e kinematografisë në Universitetin e Paris 8, në Paris.

 

 

Kryesuesi i radhës së OSBE-së thotë se BE duhet që Kosovën ta mbajë lart në axhendën politike të saj

 

Prishtinë, 24 prill 2003 - Kryesuesi i radhës së OSBE-së Jap de Hup Shefer, pas takimeve që pati dje me përfaqësuesit vendorë dhe ndërkombëtarë, tha se nga këto takime ka krijuar bindjen se në Kosovë edhe më tutje do të ketë nevojë për praninë e misionit të OSBE-së.

Procesi i bartjes së kompetencave duhet të vazhdojë dhe të bëhet në përputhje me Rezolutën 1244, ka thënë Shefer. Ai ka theksuar se BE duhet që Kosovën ta mbajë lart në axhendën politike të saj dhe shtoi se ambiciet e Holandës si kryesuese e ardhshme e BE-së janë që ajo të ndihmojë integrimin e këtij rajoni në struktura evroatlantike.

"Unë mbështes qëndrimin e UNMIK-ut për standardet para statusit dhe po largohem nga Kosova me përshtypjen se ende nuk është koha për zgjidhjen e statusit përfundimtar të Kosovë", tha Jap de Hup Shefer.

Ministri holandez në rolin e kryesuesit të radhës së OSBE-së gjatë qëndrimit në Kosovë solli edhe mesazhin se misioni i këtushëm i OSBE-së do të ketë rol parësor në zgjedhjet e ardhshme parlamentare. Në këtë aspekt ai u angazhua për legjislacion të mirëfilltë, i cili do të garantonte zgjedhje fer dhe demokratike.

 

 

Veturat që qarkullojnë pa targa KS do të konfiskohen nga policia

 

Mitrovicë, 24 prill 2003 - Administrata e UNMIK-ut ka hapur një zyrë në pjesën veriore të Mitrovicës, e cila do të mbikëqyrë të gjitha lëvizjet në trafikun rrugor në këtë pjesë të Kosovës.

 

Kështu, prej tash të gjitha veturat që qarkullojnë pa targa të Kosovës, apo kanë targa të huaja dhe nuk kanë paguar doganën apo tatimin do të konfiskohen nga policia.

 

 

Në Gjilan ka një ulje të dukshmne të shkallës së krimit, thotë komandanti i policisë së UNMIK-ut

 

Gjilan, 24 prill 2003 - Komandanti rajonal i policisë së UNMIK-ut në Gjilan, Geri Mekkreri, disa ditë para largimit nga kjo detyrë, ka thënë se gjatë kohës sa ai ka shërbyer në Kosovë, ka mundur t`i vërejë shumë gjëra që kanë ndryshuar për të mirë dhe përgjithësisht një lëvizje të këtij rajoni nga progresi dhe e ardhmja që e synojnë njerëzit e këtushëm.

Në një takim të Komitetit për Siguri dhe Emergjencë të komunës së Gjilanit, ku ai ka marrë pjesë për herë të fundit, Mekkreri tha se krimi po shënon rënie të dukshme dhe për këtë meritat i adresoi jo vetëm te policia e UNMIK-ut dhe SHPK-ja, por edhe tek institucionet vendore dhe qytetarët.

Komandanti i policisë e ka argumentuar këtë pohim me shifrat krahasuese të krimeve që kanë ndodhur në katërmujorin e parë të vitit të kaluar si dhe periudhën e njëjtë të këtij viti, ku shihet një ulje për 232 raste.

Sipas këtij zyrtari të policisë, ndër shkaktarët kryesorë që mund t`i motivojnë njerëzit për të kryer vepra të këtilla, siç janë vjedhjet, vjedhjet me thyerje dhe rrahjet, mund të jenë edhe problemet sociale dhe papunësia.
Rreth paralajmërimeve të mëhershme për pavarësimin e stacionit të policisë në Gjilan, më 15 maj 2003, Geri Mekkreri ka thënë se do të ketë një shtyrje prej një muaji, meqenëse nuk ishin kryer ende të gjitha përgatitjet e nevojshme teknike.

Krahas procesit për mvetësimin e stacionit të policisë në Gjilan, po punohet edhe për hapjen e një nënstacioni në Zhegër, ku do të jenë të angazhuar rreth 20 policë të SHPK-së si dhe të një nënstacioni tjetër në fshatin Cërnicë, i cili do të vepronte vetëm në raste të caktuara, ka thënë ai.

 

 

Kosovës i nevojitet ligji për zgjedhjet, u tha gjatë debatit të sotëm në Kuvendin e Kosovës

 

Prishtinë, 24 prill 2003 - Në seancën e sotme të Kuvendit të Kosovës deputetët po diskutojnë lidhur me nismën për nxjerrjen e ligjit për zgjedhjet, por në rend ditë është edhe projektligji për rrugët dhe ai për plehërat artificiale.

Nismën e LDK-së për nxjerrjen e një ligji për zgjedhjet është përkrahur nga të gjitha grupet parlamentare shqiptare në kuvend, por u kundërshtua nga deputetët e koalicionit serb "Kthimi".

 

Deputetët serbë kërkuan në fillim të seancës të hiqet nga rendi i ditës nisma për ligjin e zgjedhjeve, sepse kjo sipas tyre është në kundërshtim me Kornizën kushtetuese. Pas një votimi që u bë, kërkesa e tyre u hodh poshtë.

Duke folur për nevojën e nxjerrjes së një ligji për zgjedhjet, diskutuesit thanë se pas organizimit të tri palë zgjedhjeve në Kosovë nga OSBE-ja ka ardhur koha që institucionet e Kosovës të hartojnë një ligj dhe të organizojnë zgjedhjet.

Duke folur në emër të Grupit parlamentar të LDK-së, dr. Alush Gashi tha se "jemi të zotuar ta bëjmë Kosovën me ligje bashkëkohore. Në këtë angazhim jemi të përcaktuar të bashkëpunojmë me faktorin vendor dhe ndërkombëtar në të mirë të të gjithë qytetarëve të Kosovës si dhe të paqes dhe stabilitetit".

Në vazhdim ai tha se deri më tani zgjedhjet në Kosovë janë organizuar në bazë të rregullores së hartuar nga OSBE-ja, në konsultim me vendorët, por ishte një kohë kur Kosova nuk kishte Kuvend, President dhe Qeveri, porse tani në këtë fazë të zhvillimit, Kosovës i nevojitet ligji për zgjedhjet, tha dr. Gashi.

Ai bëri të ditur se në OSBE është duke punuar Grupi punues për zgjedhje, i cili i zhvillon punimet me dyer të mbyllura. Por, sipas tij, është më mirë që debati të zhvillohet në Kuvendin e Kosovës për të qenë më transparent dhe më gjithëpërfshirës, gjë që nuk është në kundërshtim me rezolutën 1244 të KS.

Duke pasur parasysh se në kuadër të OSBE-s punon një numër i konsiderueshëm ekspertësh ndërkombëtarë për zgjedhje, do të ishte një ndihmesë shumë e mirë për institucionet e Kosovës që të shfrytëzohen njohuritë e tyre për hartimin e ligjit për zgjedhje, theksoi Alush Gashi, duke shtuar se nuk do të harxhoheshin fonde të mëdha për rregullore vetëm për një parë zgjedhje.

Në anën tjetër, sipas tij, ndihma e OSBE-s në hartimin e ligjit për zgjedhje do të ishte dëshmi e mirë e bashkëpunimit në mes institucioneve vendore dhe atyre ndërkombëtare, tha dr.Alush Gashi.
Lidhur me këtë temë diskutuan edhe disa deputetë të tjerë dhe debati po vazhdon.

 

 

Biznismenët kosovarë dhe ata maqedonas thonë se bashkëpunimi ekonomik i vendeve fqinje është i domosdoshëm

 

Prishtinë, 24 prill 2003 - Bashkëpunimi i Kosovës i vendeve fqinje është i domosdoshëm, sidomos në fushën e ekonomisë. Mirëpo, duhet të ekzistojë bashkëpunimi i mirëfilltë dhe simetrik, sepse nëse veprohet njëanshëm nuk do të ketë bashkëpunim afatgjatë, kanë thënë dje përfaqësuesit e bisnesit kosovar në takimin që zhvilluan me kolegët e tyre maqedonas në Prishtinë.

Ali Jakupi, ministër i Tregtisë dhe Industrisë tha se brenda katër viteve të pasluftës Kosova ka një asimetri të theksuar në sferën e këmbimit të mallrave, ngase në vitin 2002 importi nga Maqedonia ka qenë 145 milionë euro, ndërkaq eksporti i Kosovës me këtë vend ka qenë vetëm 3 milionë e 300 mijë euro.

Kryetari i Odës Ekonomike të Maqedonisë Dushan Petrevski ka theksuar se bashkëpunimi mes dy vendeve ka qenë tradicional dhe ka vazhduar vite me radhë. Dëshmi për këtë është edhe bashkëpunimi ekonomik gjatë bllokadave edhe gjatë luftës.

 

Në atë kohë dhe në kohët e sotme bashkëpunojnë miqtë dhe njerëzit të cilët zgjidhjet afariste i kanë ndërtuar me dekada në vitet paraprake që mendojnë se kanë perspektivë në afarizëm, ka thënë Petrevski.

 

 

Një prokuror ndërkombëtar ka ngritur aktakuzë kundër Millan Ivanoviqit

 

Prishtinë, 24 prill 2003 - UNMIK-u njofton se një prokuror ndërkombëtar në Kosovë ka ngritur aktakuzë kundër Millan Ivanoviqit, kryetar i të ashtuquajturit "Këshilli nacional serb" në Mitrovicë për siç thuhet udhëheqjen e një grupi, që ka kryer krime dhe për sulme kundër forcave të rendit.

 

 

Edhe PPD kërkon protektorat ndërkombëtar në Maqedoni

 

Tetovë, 24 prill 2003 - Edhe PPD me seli në Tetovë vlerëson se një protektorat ndërkombëtar mund të shmangë krizën në Maqedoni. Kështu thotë sekretari i përgjithshëm i PPD-së Naser Zyberi, i cili ka shtuar se tendencat e fundit të subjekteve serioze politike kontestojnë tërësinë territoriale të Maqedonisë dhe shprehin dilemat e tyre për pamundësinë e funksionimit të shtetit multietnik.

 

Sipas Zyberit, PPD do t'i kërkojë faktorit ndërkombëtar që Maqedonia të jetë protektorat ndërkombëtar. Një protektorat ndërkombëtar në Maqedoni ditë më parë e ka kërkuar edhe partia tjetër shqiptare - PDSH e Arbër Xhaferit, e cila e ka "ngrirë" aktivitetin e vet partiak.

 

 

Për deputetët maqedonas, Lidhja e Prizrenit është lëvizje "terroriste"

 

Shkup, 24 prill 2003 - Në një njoftim nga Shkupi thuhet se Komisioni për kulturë i Kuvendit të Maqedonisë nga shtatë ngjarjet e propuzuara nga shqiptarët për shënuar sivjet, ka miratuar se vetëm dy ngjarje mund të shënohen gjatë këtij viti në Maqedoni.

Deputetët maqedonas kanë votuar kundër kremtimit të 125-vjetorit të Lidhjes Shqiptare të Prizrenit, madje këtë ngjarje të madhe historike për shqiptarët e kanë quajtur si "lëvizje terroriste" për formimin e Shqipërisë së madhe.

 

 

Subjektet politike shqiptare vlerësojnë se arrestimi i Shefqet Musliut nuk i kontribuon stabilizimit në Luginën e Preshevës

 

Preshevë, 24 prill 2003 - Kryetari i Kuvendit të Preshevës, Skënder Destani ka deklaruar se arrestimi i ish-luftëtarëve të UÇPMB-së të demobilizuar Shefqet Musliut dhe Bekim Tahirit, nuk do t'i kontribuojë stabilizimit të gjendjes në Luginën e Preshevës.

 

Ndërkaq Orhan Rexhepi nga LPD ka thënë se pala serbe qartas është interesuar që të destabilizojë situatën në këtë rajon, duke dëshiruar që përziejë edhe faktorin ndërkombëtar në Kosovë në këtë rast. Ai akuzon autoritetet serbe se me inicimin e arrestimimeve e kanë shkelur Marrëveshjen e Konçulit.

 

 

Beogradi kërkon nga shefi i UNMIK-ut që Musliu t'u dorëzohet organeve të drejtësisë serbe

 

Beograd, 24 prill 2003 - Qendra bashkërenduese serbe për Kosovën ka kërkuar dje nga shefi i UNMIK-ut Mihael Shtajner që udhëheqësi i ish-UÇPMB-së Shefqet Musliu, i arrestuar pardje në Kosovë nga trupat e KFOR-ut t'u dorëzohet sa më parë organeve të drejtësisë serbe.

 

Nga UNMIK-u kërkohet që organeve të judikaturës serbe t'u dorëzohen edhe personat e tjerë të cilët do të arrestohen dhe ndaj të cilëve është shpallur edhe fletarrestimi ndërkombëtar i Interpolit - Besim Tahirit, i quajtur "Çeçeni" dhe Lirim Jakupit i quajtur "Nazisti".

 

 

Kryetari i BDI-së Ali Ahmeti dhe kryetari i PDK-së Arbër Xhaferi nuk arriten të kuptohen edhe pas takimit të djeshëm triorësh

 

Tetovë, 24 prill 2003 - Kryetari i BDI-së Ali Ahmeti dhe kryetari i PDK-së nuk arritën të merren vesh për asgjë në një takim triorësh që e patën dje në Tetovë. Takimi u mbajt pas situatës së krijuar me shpalljen e moratoriumit të PDSH-së.

Ali Ahmeti tha pas takimit se nuk është arritur asgjë konkrete për t'i tejkaluar vështirësitë e krijuara. "Dallimet sigurisht se janë të dukshme, megjithatë ne do të përpiqemi edhe në të ardhmen që këto biseda të vazhdojnë.

 

Në këtë takim shpreha optimizmin që kam për materializimin e plotë të Marrëveshjes së Ohrit, shpreha bindje që një ndihmesë mjaft të madhe kemi edhe nga komuniteti ndërkombëtar".

Ndërkaq, në emër të PDSH-së Menduh Thaçi ka deklaruar shkurt se qëndrimet e kësaj partie me ato të BDI-së diametralisht janë të kundërta dhe se nuk është arritur që ta bindin njëra-tjetrën për qëndrime e tyre.

 

 

Filloi lirimi nga burgu i Shupkës i ish-pjesëtarëve të UÇK-së

 

Shkup, 24 prill 2003 - Autoritetet e Maqedonisë që nga dje kanë fillur të lirojnë nga burgu ish-pjesëtarët e Ushtrisë Çlirimtare Kombëtare.

 

Kryetari i Këshillit për Lirimin e të Burgosurve Politikë në Maqedoni Abdurrahim Masuti deklaroi se dje nga burgu i Shupkës janë liruar tre pjesëtarë të ish-UÇK-së nga Maqedonia. Ndërkaq, gjatë ditëve të ardhshme priten të lirohen edhe ish-pjesëtarët tjerë të UÇK-së nga Maqedonia dhe nga Kosova.

 

 

Bisedimet Pauëll - Dë Vilpën

 

Paris, 24 prill 2003 - Ministri i Jashtëm i Francës, Dominik dë Vilpën, i cili i telefonoi i pari Sekretarit Pauëll, ndërsa ishte duke bërë një vizitë në Jordani, është duke mbrojtur veprimet e Francës gjatë krizës së Irakut.

Zyrtarë të Departamentit të Shtetit kanë theksuar se të dy vendet do të mbeten aleatë. Ata shtuan se zoti Pauëll dhe homologu i tij francez bënë shaka me ato që ata i konsideruan si njoftime të zmadhuara të shtypit rreth aludimeve lidhur me komentet e Sekretarit Pauëll, gjatë intervistës që ai i dha të martën në mbrëmje rrjetit televiziv, C-B-S.

Por zëdhënësi i Departamentit të Shtetit, Riçard Buaçer po i përmbahet idesë që do të ketë pasoja për atë që ai tha se nuk ishte thjesht një përplasje pikëpamjesh mbi Irakun, por një ndikim aktiv lobist i Francës kundër përpjekjeve diplomatike të Shteteve të Bashkuara para luftës me Irakun.

 

 

I hapet rruga aktivitetit të një qeverie të re palestineze

 

Tel Aviv, 24 prill 2003 - Kryeministri i Izraelit, Ariel Sharon, thotë se qeveria e tij do të bëjë gjithçka varet prej saj për të arritur një zgjidhje politike që do të çonte në vendosjen e paqes me palestinezët.

 

Sharon e bëri këtë deklartë në përgjigje të lajmit se udhëheqësi palestinez, Jaser Arafat dhe kryeministri i moderuar, Mahmud Abas, ranë dje dakord për një kabinet të ri.

Zoti Sharon i tha radios izraelite po dje se të gjithë izraelitët e duan paqen, por shtoi se është me rëndësi që edhe pala tjetër ta dojë arë.

 

 

Amerika kap irakianë të tjerë

 

Bagdad, 24 prill 2003 - Forcat e drejtuara nga Amerika në Irak kanë arrestuar tre persona të tjerë që përfshihen në listën e tyre të irakianëve më të kërkuar.

Mes tyre është dhe kreu i shërbimit informativ irakjan, Gjen. Zuhair al Nakib.

Si shef i shërbimit informativ ushtarak, Al-Nakib mund të ketë informata rreth udhëheqësve të tjerë ushtarakë irakianë dhe mundësisht për armët e shkatërrimit në masë.

Zyrtarët amerikanë shpresojnë se ai mund të jetë në dijeni edhe të lidhjeve të mundshme me ndonjë organizatë terroriste.

I arrestuari tjetër është Muzahim Sa'b Hassan al-Tikriti, i dhjeti në listën e më të kërkuarve nga Amerika.

Irakjani i tretë në duart e amerikanëve është ish-ministri i Tregtisë, ose numri 42 në listë.

Personi i katërt, nuk është në listën e më të kërkuarve, por ai është një oficer i shërbimit sekret që mund të ketë informata për veprimtarinë e agjentëve të Irakut në Shtetet e Bashkuara .

 

 

Arrihet marrëveshja për qeverinë palestineze

 

Ramallah, 24 prill 2003 - Autoriteti Palestinez njoftoi se është zgjidhur mosmarrëveshja mes Jaser Arafatit dhe kryeministrit të tij të ri, Mahmud Abas.

Mosmarrëveshja kërcënonte shtyrjen e bisedimeve rreth një plani të ri paqeje për Lindjen e Mesme dhe zyrtarë arabë, evropianë dhe amerikanë i bën thirrje z. Arafat që të lëshonte pe.

Më në fund, z. Arafat ra dakord me z.Abas në përbërjen e kabinetit të ri qeveritar pas një negociimi në momentin e fundit të një të dërguari të posaçëm egjiptian.

Marrëveshja u arrit pas katër ditëve përplasjesh mes z. Arafat dhe kryeministrit të tij të ri.

 

 

Shifra marramendëse të viktimave të dhunës shtetërore në Kolumbi

 

Bogota, 24 prill 2003 – Komiteti i përhershëm i të drejtave të njeriut ka publikuar raportin e vet vjetor për dhunën shtetërore në Kolumbi, shifrat e të cilit janë marramendëse, njofton BBCworld.

 

Numri i viktimave të dhunës, thuhet në raport, janë më ta larta se në vendet me luftë në shkallë të gjerë, duke e radhitur kështu Kolumbinë ndër shtetet më të rezikshme në botë.

 

Kështu, bëhet e ditur se gjatë vitit të kaluar në Kolumbi kanë ndodhur 32 mijë vrasje të njerëzve, pesë mijë e pesëqind vrasje të motivuara politikisht, pesë mijë vrasje të njerëzve të krahut të djathtë, kurse mesatarja është 30 vrasje në 100 mijë banorë.

 

Këto informacione nuk do të jenë të këndshme për presidenti Alvaro Uribe, i zgjedhur me premtimin se do të vërë rend dhe ligj në vend, pas një konflikti 39-vjeçar.

 

 

Një vetëvrasës palestinez me bombë e ka vrarë një person dhe ka plagosur edhe 13 persona të tjerë

 

Tel Aviv, Izrael, 24 prill 2003 – Një vetëvrasës palestinez me bombë e ka hedhur veten në erë sot në orët e hershme të mëngjesit (e enjte) në një stacion treni në qytetin izraelit Kfar Saba, jo larg Tel Avivit dhe kështu, pos vetvetës ka vrarë edhe rojën e sigurimit dhe ka plagosur edhe 13 persona të tjerë, njofton Rojter.

 

Ky është sulmi i parë i tillë brenda muajit në Izrael dhe ndodh pas marrëveshjes së të merkurës për formimin e kasbinetit palestinez, që ka hapur rrugën për paqe sipas nismës amerikane, të cilën po e kundërshtojnë ashpër militantët palestinezë.

 

 

Nga rrëshqitja e dheut në Guatemalë ka pësuar një fshat dhe kanë humbur jetën të pakten 10 persona

 

Las Barrankas, Guatemalë, 24 prill 2003 – Një shpat mali në pjesën perendimore të Guatemalës ka rrëshqitur sot (të enjten) dhe ka rënë mbi një fshat, të cilit i ka shkaktuar shkatërrime të mëdha, duke mbytur kështu të pakten 10 persona, prej tyre pesë fëmijë, kurse tetë të tjerë janë të zhdukur në baltën, që i ka mbuluar, njofton Rojter. Dheu ka zënë krejtësisht gjashtë shtëpi, kurse ka shkatërruar edhe 16 të tjera.

 

 

Kryengritësit muslimanë në Filipine kanë vrarë 12 civilë

 

Maigo, Filipine, 24 prill 2003 – Forcat qeveritare filipinase kanë ndërmarrë sot (e enjte) një operacion ndëshkimi me helikopterë dhe automjete të blinduara kundër gueriles muslimane pasi qindra syresh kishin sulmuar më parë dy qytete të afërme, ku kishin vrarë 12 civilë dhe kishin marrë peng dhjetëra të tjerë, njofton Rojter.

 

Zyrtarët ushtarakë dhe policorë kanë thënë se kryengritësit kanë ikur nga qytetet Kolambugan dhe Magio, në të cilat kishin hyrë dhe kishin kaluar në ujëdhesën jugore Mindanao, por ende nuk dihet në kanë pasur të vrarë dhe në janë duke i majtur ende pengjet.

 

 

Në Xhakartë kanë shpërthyer dy bomba, por s’ka pasur viktima

 

Xhakartë, 24 prill 2003 – Dy bomba të prodhimit shtëpiak kanë shpërthyer sot heret (të enjten) në Xhakrtë, afër zyreve të Kombeve të Bashkuara, por tash për tash s’ka të dhëna për viktima, njofton Rojter. Njoftohet se edhe një bombë tjetër e pashpërthyer është gjetur në të njëjtin vend. Bomba ka shkatërruar pakëz urën e afërme.

 

 

Guerilët muslimanë në Filipine kanë vrarë të pakten një civil, kurse dhjetëra të tjerë i kanë marrë peng

 

Zamboanga, Filipine, 24 prill 2003 – Rreth 500 guerilë muslimanë kanë filluar sot (të enjten) një sulm në një qytet në jug të Filipineve dhe gjatë këtyre luftimeve kanë vrarë të pakten një civil, kurse dhjetëra të tjerë, përfshirë edhe policë, i kanë marrë peng, kanë bërë të ditur burimet vendore ushtarake, njofton Rojter.

 

 

Pas Juventusit dhe Interit, në gjysmëfinale të Ligës së Kampionëve edhe Real Madrid e Milan

 

Prishtinë, 24 prill 2003 – Mbrëmë u zhvilluan edhe dy ndeshjet e kthimit të çerekfinales së Ligës së Kampionëve. U takuan Mançester Junajted – Real Madrid dhe Millano – Ajaksi.

Mançester Junajted edhe pse në fund të takimit arriti ta mund Real Madridin me rezultat minimal 4:3, nuk arriti të kualifikohet për në gjysmëfinale pasiqë epërsia e Realit nga takimi i parë (3:1) ishte e paarritshme për anglezët.

 

Për Mançester Junajtedin golat i shënuan:

Van Nistelroij 43', Helguera 52'(autogol) dhe Bekam 71' dhe 85'.

Ndërkaq për Real madrid të gjithë golat i shënoi futbollisti numër 1 në botë braziliani Ronaldo:12', 50', 59.
Në gjysmëfinale të Ligës së Kampionëve u kualifikua edhe skudra e tretë italiane Milan nga Millano. Ajo me mjaft vështirësi elimnoi skuadrën holandeze Ajaks, me golin që në kohën shtesë prej tre minutash e shënoi Tomason. Meritat për këtë gol gjithsesi i kishte Inzagi.

 

Golat për Milanon i shënuan:

Ndërkaq për Ajaksin shënuan: Litmanen 63 dhe Pinar 78'.

Në gjysmëfinale një ditë më parë janë kualifikuar edhe dy skuadrat tjera italiane Juventusi dhe Interi.

Reazultatet komplete të çerekfinales janë:

    

Mançester Junajted – Real Madrid 4:3 (1:3)

Milan – Ajaks 3:2 (0:0)

Valensia – Inter 2:1 (0:1)

Barcelona – Juventus 1:2 (1:1).

(në kllapa janë rezultatet e takimit të parë çerekfinal)

Në gjysmëfinale do të takohen:

Real Madrid - Juventus dhe Milan - Inter.

Sonte do të zhvillohen edhe ndeshjet e kthimit të gjysmëfinales së Kupës së UEFA-së.
Takohen, Seltik – Boavista (1:1) dhe Porto – Lacio (4:1)

Copyright©2000-2003 Trepca.net - Të gjitha të  drejtat e rezervuara.