E mërkure, 23 prill 2003

23.04.2003 - Trepca.net

Lajme

E mërkure, 23 prill 2003

Përmbajtja:

Nga takimi Rugova - Shefer: OSBE-ja do të jetë shumë e përkushtuar në Kosovë
Kryeministri e quan KEK-un ndërmarrje të sëmurë
Komisioni për Gatishmëri Emergjente propozon zgjerimin e tij
KFOR-i ka shtuar patrullimet në kufijtë e Kosovës me Serbinë dhe Maqedoninë
KFOR-i do të përdor të gjitha mjetet që të luftojë grupet të cilat paraqesin kërcënim për sigurinë në Kosovë
Trupat e KFOR-it kanë ndërmarrë një operacion kontrolli në lagjen e Lushtakëve në fshatin Prekaz
Hasellok thotë se autoritetet në Kosovë asnjëherë nuk e kanë mohuar ekzistimin e AKSH-së
Ende nuk është konfirmuar identiteti i të vrarëve në incidentin e urës në afërsi të Zveçanit
Në Prishtinë u mbajt një takim mes përfaqësuesve të Shqipërisë dhe Kosovës për bashkëpunim tregtar
Në pesëvjetorin e Akademisë së Mbrojtjes së Kosovës është prezentuar brezi i parë i oficerëve të kësaj akademie
Popullata duhet të paguajë dhe të kursejë energjinë elektrike, thotë përfaqësuesi i UNMIK-ut
Është arrestuar Shefqet Musliu, ish-komandanti i UÇPMB-së
Në Gjilan thyhet për herë të tretë Fabrika e radiatorëve
Arrestohet një person në Mitrovicë i dyshuar se ka lidhje direkte me shpërthimin e urës afër Zveçanit
Në Vushtrri u mbajt manifestimi poetik i poeteshave shqiptare "Vushtrria 2003"
A. Ahmeti: Populli nuk më mbështeti për të ndarë Maqedoninë
Ilir Meta thotë se rajoni nuk ka nevojë për një Bosnje të dytë
B. Mustafaj: PD nuk mbështet asnjë ide që çon në cënimin e integritetit territorial të Maqedonisë
Bigman: Këto ide kanë shkaktuar lumenj gjaku këtu në Ballkan
Një delegacion ushtarak nga Shqipëria viziton Maqedoninë
VMRO-DPMNE i ka drejtuar shumë kërkesa qeverisë aktuale maqedonase
Në Serbi është hequr gjendja e jashtëzakonshme
Bush thotë se s'ka plan për farë aksioni të ri ushtarak pas konfliktit në Irak
Në Pnom Pen është vrarë një gjykatës i lartë kamboxhian në pikë të ditës
Protesta antimerikane në Qerbela
Xhef Hun beson se Sadam Huseini ende ndodhet në Irak
Ushtria amerikane ka vrarë sot në Afganistan vrasësin e një punëtori të Kryqit të Kuq Ndërkombëtar
Pauell: Franca do të bartë konsekuencat për kundërshtimin e luftës në Irak
Në Xhakartë ka filluar gjykimi kundër klerikut radikal, Abu Beker Beshir
Mijëra ushtarë amerikanë hynë në qytetin e tensionuar të Mosulit
Franca bën thirrje për ndërprerjen e menjëhershme të sanksioneve të OKB-së kundër Irakut
Nis dialogu me koreanoveriorët
Opozita kundërshton rezultatin

Nga takimi Rugova - Shefer: OSBE-ja do të jetë shumë e përkushtuar në Kosovë


Pra, gjatë kësaj kohe, tha Presidenti, Kosova ka pasur tri palë zgjedhje. Me ndihmën e OSBE-së është krijuar një polici e mirë dhe proceset e tjera demokratike.

Presidenti Rugova ritheksoi kërkesën e tij për një Kosovë demokratike, paqësore e të pavarur, të integruar në BE e në NATO. Tani punohet së bashku me UNMIK-un e me OSBE-në në ndërtimin e institucioneve dhe në zhvillimin ekonomik, tha Presidenti i Kosovës pas takimit me ministrin Shefer.
Nga ana e tij, zoti Shefer tha para gazetarëve: "Ishte një privilegj për ta takuar presidentin Rugova. Eshtë shumë me rëndësi të nënvizoj që OSBE-ja, organizatën që unë e përfaqësoj, është shumë e përkushtuar për kryerjen e detyrave në Kosovë. Presidenti na njoftoi se këtu është bërë një progres i madh, mirëpo ka mbetur ende punë për t'u bërë", tha ai.
Ministri Shefer në vazhdim tha se OSBE-ja për vitin e ardhshëm ka në axhendën e saj organizimin e zgjedhjeve të ardhshme dhe përcjelljen e situatës së gjithëmbarshme politike. Meqë Holanda sivjet është kryesuese e radhës së OSBE-së, ajo është e interesuar që këto struktura të integrohen.

Për t'u arritur këto qëllime, tha Shefer, ka shumë punë, por OSBE-ja gjithmonë do të ndihmojë në mënyra të ndryshme për t'u arritur këto qëllime, kështu që OSBE-ja, është, ka qenë dhe do të jetë shumë e përkushtuar, nënvizoi kryesuesi i radhës së OSBE-së e ministri i Jashtëm i Holandës, Jap de Hup Shefer.


Kryeministri e quan KEK-un ndërmarrje të sëmurë

Prishtinë, 23 prill 2003 - Në mbledhjen e sotme të Qeverisë së Kosovës u tha se për avancimin e KEK-ut duhet të mirren masa radikale në mënyrë që të tejkalohet gjendja e vështirë energjetike në vend.

Kryeministri Bajram Rexhepi pas mbledhjes u shpreh edhe për qëndrimin e Qeverisë për ndarjen e suficitit prej 17 milionë eurosh nga buxheti i Kosovës.

Qeveria kohë më parë ka kërkuar raport mbi gjendjen dhe shpenzimet e bëra në KEK, mirëpo ky raport nuk është realizuar asnjëherë, prandaj pala qeveritare nuk ka qenë e pajtimit për ndarjen e suficit nga buxheti i Kosovës.

Ai tha se KEK-u duhet të qëndrojë në baza të shëndosha dhe në bazë të ligjeve të tregut, e jo nga suficiti i buxhetit, duke kërkuar një transparencë të plotë se çka po ndodh në KEK.
Rexhepi deklaroi se KEK-u është një ndërmarrje e sëmurë dhe për të nevojiten masa radikale.
Qeveria ka diksutuar edhe lidhur me një deklaratë të ministres serbe të transportit për kontrollimin e hapësirës ajrore të Kosovës nga ana e Beogradit.

Ndërkaq kryeministri tha se kjo nuk duhet nënçmuar dhe se për këtë çështje duhet gjetur një mënyrë e përshtatshme, duke shtuar se për momentin hapësirën ajrore të Kosovës e mbikqyr Islanda.

Ai tha se vendimi do të merret bashkarisht Qeveria, Shtylla e kartërt e UNMIK-ut dhe Ministria e Transportit.


Komisioni për Gatishmëri Emergjente propozon zgjerimin e tij

Prishtinë, 23 prill 2003 - Komisioni për Gatishmëri Emergjente, i kryesuar nga Agim Krasniqi, kryetar, sot ka shqyrtuar propozimin e këtij komisioni për zgjerimin edhe me nga një anëtar nga Presidenca, Parlamenti dhe Qeveria e Kosovës, në Komisionin e emëruar për reformimin dhe përcaktimin e kompetencave dhe përgjegjësive të Trupave Mbrojtëse të Kosovës (TMK).
Antarët e Komisionit për Gatishmëri Emergjente kanë miratuar propozimin në fjalë dhe njëkohësisht kanë vendosur që përmes një shkrese, këtë propozim t'ua dërgojnë kryeadministratorit të Kosovës Mihael Shtajner, komandantit të KFOR-it, Fabio Mini, Shtabit të Përgjithshëm të Trupave Mbrojtëse të Kosovës, Presidencës, Parlamentit dhe Qeverisë së Kosovës.
Ndrëkaq, një delegacion i Komisionit për Gatishmëri Emergjente në fund të këtij muaji do të bëjë një vizitë zyrtare Parlamentit të Shqipërisë, ku do të takohen me komisionet përkatëse të Parlamentit. Gjithashtu, komisioni i lartpërmendur do të ketë takime edhe në nivelin qeveritar.


KFOR-i ka shtuar patrullimet në kufijtë e Kosovës me Serbinë dhe Maqedoninë

Gjilan, 23 prill 2003 - KFOR-i amerikan në Kosovë, që është përgjegjës për sigurinë në sektorin e lindjes, mbetet i vendosur të mos lelojë aktivitete ekstremiste në rajon, ka thënë sot koloneli Dejvid Sejxh gjatë takimit me kryetarin e komunës së Gjilanit, Lutfi Haziri.
Përndryshe, komandanti i kampit "Montith" në Gjilan, Devid Sejxh e ka vlerësuar të mirë gjendjen e sigurisë, ndërsa e ka njohur z. Haziri se KFOR-i i ka shtuar patrullimet përgjatë vijës kufitare me Serbinë dhe Maqedoninë, për të penguar çdo tendencë destruktive.
Rreth shqetësimeve që kanë shprehur banorët e fshatrave në afërsi të kufirit me Serbinë, kryetari i komunës, Lutfi Haziri tha se ka biseduar disa herë me zyrtarët e KFOR-it, por ata thonë se nuk kanë asnjë argument të besueshëm që xhandarmëria serbe të ketë hyrë në pjesën e Kosovës, ndërsa ai është i bindur se ushtria amerikane është në gjendje të garantojë siguri të plotë në rajonin që mbikëqyrë ajo.
Ndërkaq, në lidhje me problemin e Muçibabës dhe të disa fshatrave tjera të pjesës lindore të Kosovës, kapiteni Stankoviç nga kampi ushtarak amerikan në Gjilan, ka thënë në mbledhjen e Komitetit për siguri dhe emergjencë të Kuvendit komunal se nuk e përjashton plotësisht mundësinë që forcat serbe të kenë lëvizur në pjesën ku, banorët e atjeshëm deklarojnë se i kanë parë, por askush prej tyre nuk ishte në gjendje ta pohonte këtë gjatë takimit që ka pasur me popullatën, tha ai.

Për pjesën e kufirit me Maqedoninë, kapiteni Stankoviç tha se është duke u përkujdesur një grup i ushtarëve norvegjezë.


KFOR-i do të përdor të gjitha mjetet që të luftojë grupet të cilat paraqesin kërcënim për sigurinë në Kosovë

Prishtinë, 23 prill 2003 - Zyrtarë të forcave paqeruajtësve në Kosovë thanë dje se edhe Aleanca Veriatlantike mbështet fuqishëm vendimin e shefit të administratës Mihael Shtajner për shpalljen e Armatës Kombëtare Shqiptare organizatë terroriste dhe së bashku me UNMIK-un do të bëjnë të pamundurën që të pengojnë veprimet e ekstremistëve, të cilët synojnë rikthimin e Kosovës në gjendje çfarë ka qenë vite më parë.
Zëdhënësi i forcave paqeruajtëse në Kosovë, Benester Grin deklaroi se KFOR-i do të përdorë të gjitha mjetet që të luftojë grupet, të cilat paraqesin kërcënim për sigurinë në Kosovë.
"Grupe të vogla të këtilla vazhdojnë të jenë pengesë e zhvillimeve demokratike dhe ekonomike në Kosovë, megjithëse nuk kanë ndonjë mbështetje të madhe te popullata vendore.

KFOR-i dhe UNMIK-u do të punojnë së bashku që të luftojnë kërcënimet nga grupet e këtilla, por mbështetja dhe bashkëpunimi i popullatë kosovare dhe udhëheqësve politikë është e domosdoshme për të parandaluar elementet e këtilla kriminale", tha zëdhënësi i KFOR-it.
Gjatë javës së kaluar në bashkëpunim me SHPK-në dhe UNMIK-un pjesëtarët e KFOR-it kanë konfiskuar 13 pushkë, katër pistoleta dhe dy raketa.


Trupat e KFOR-it kanë ndërmarrë një operacion kontrolli në lagjen e Lushtakëve në fshatin Prekaz

Prekaz, 23 prill 2003 - Trupat franceze të KFOR-it kanë ndërmarrë një operacion kontrolli në lagjet Lushtaku e Kodra në fshatin Prekaz të Skënderajt.

Banorët pohojnë se operacioni i kontrollimit ka zgjatur rreth pesë orë dhe në këtë aksion trupat e KFOR-it francez kanë kontrolluar vetëm shtëpitë e familjes Lushtaku në Prekaz. Sipas tyre shtëpitë janë rrethuar rreth orës pesë të mëngjesit të djeshëm. Madje janë bastisur edhe kalimtarët që hynin e dilnin nga andej.
Familjarët Lushtaku thonë se bastisja është bërë vetëm në shtëpitë e tyre. Ata thanë se bastisjet ishin korrekte.
Kjo është hera ë katër që trupat e KFOR-it kontrollojnë shtëpitë e Lushtakëve në Prekaz. Ukshin Lushtaku, ka theksuar se nuk i dinte arsyet e kësaj bastisjeje.
Ndërkohë, zyrtarë të Brigadës Shumëkombëshe të Veriut kanë theksuar se ky operacion ishte një operacion i zakonshëm për kërkimin e armëve. Megjithatë gjatë këtij operacioni nuk është gjetur asgjë.


Hasellok thotë se autoritetet në Kosovë asnjëherë nuk e kanë mohuar ekzistimin e AKSH-së

Prishtinë, 23 prill 2003 - Zëdhënësi i UNMIK-ut Sajmon Hasellok tha se autoritetet në Kosovë asnjëherë nuk e kanë mohuar ekzistimin e AKSH-së, por nënvizoi se ata nuk kanë pasur deri sot dëshmi që ta ndërlidhin atë me veprime siç tha terroriste.
"Ne kemi thënë se nuk kemi pasur dëshmi që të mbështesim pohimet për veprimin e kësaj organizate deri tash. Kur ka ndodhur një veprim i caktuar dhe për të cilin e ka marrë përgjegjësinë kjo organizatë. Dhe ne tashti kemi kufoma të njerëzve që kanë kryer aktin dhe kjo është një dëshmi e fuqishme se ata ekzistojnë", tha zëdhënësi Hasellok.

Ai shtoi se UNMIK-u është në dijeni të veprimit të grupeve të tjera të vogla, ose të individëve që paraqesin pakicën dhe të cilët janë të përfshirë në aktivitete të dhunës.

Sipas tij këto grupe kanë kryer një numër veprash kriminale dhe të vjedhjeve dhe shtrohet pyetja, tha Hasellok nëse ato janë të ndërlidhura me organizata të tjera, ose janë grupe të shpërndara që veprojnë në rajonet rurale.


Ende nuk është konfirmuar identiteti i të vrarëve në incidentin e urës në afërsi të Zveçanit

Prishtinë, 23 prill 2003 - Policia ndërkombëtare në Kosovë thotë se pëveç tre personave ndaj të cilëve ka filluar gjykimi në Gjilan me akuza për vepra terroriste dhe anëtarësim në Armatën Kombëtare Shqiptare, asnjë person tjetër nuk po mbahet në burg.
Zëdhënësi i policisë ndërkombëtare Beri Fleçër ka thënë se ende nuk është konfirmuar identiteti i të vrarëve në incidentin e urës hekurudhore në afërsi të Zveçanit.
"Ne ende po presim testin e ADN-së dhe ne ende nuk mund të konfirmojmë se kush ishin ata persona, pasi trupat e tyre janë shumë të dëmtuar dhe çfarëdo identifikimi është i pamundshëm", tha zëdhënësi Beri Fleçër.
Ndërkaq, zëdhënësi i KFOR-it, Benester Grin ka njoftuar se dy persona po mbahen të arrestuar në kampin e KFOR-it amerikan Bondstill, por, nuk ka dashur të precizojë nëse ata janë pjesëtarë të AKSH-së, duke thënë se ata paraqisnin kërcënim për sigurinë në Kosovë.


Në Prishtinë u mbajt një takim mes përfaqësuesve të Shqipërisë dhe Kosovës për bashkëpunim tregtar

Prishtinë, 23 prill 2003 - Në Prishtinë u mbajt një takim mes përfaqësuesve të Shqipërisë dhe Kosovës për bashkëpunim tregtar, ku u shkëmbyen informacione për të identifikuar fushat e interesit reciprok të bashkëpunimit për tregti të lirë mes dy vendeve.
Delegacioni i Kosovës ishte në përbërje të përfaqësuesve të Shtyllës së Katërt të UNMIK-ut dhe të Ministrisë së Tregtisë dhe Industrisë.
Përfaqësuesit e të dy vendeve kanë biseduar për listën e mallrave që do të përjashtohen nga tregtia e lirë e menjëhershme, e cila nuk ka qenë e paraparë në marrëveshje me Maqedoninë, duke shpresuar se në takimin e ardhshëm do të nënshkruhet marrëveshja për tregëtinë e lirë.
Raundin e parë të bisedimeve mbi marrëveshjen për tregti të lirë ndërmjet Shqipërisë dhe Kosovës, Andrea Vitkovski, këshilltar për politikat ekonomike në administratën e UNMIK-ut e ka vlerësuar si një ditë historike për Kosovën.

Ai ka theksuar se kjo është hera e parë që po zhvillohet biseda për tregtinë e lirë me Shqipërinë dhe sipas tij kjo nuk do të jetë hera e fundit.


Në pesëvjetorin e Akademisë së Mbrojtjes së Kosovës është prezentuar brezi i parë i oficerëve të kësaj akademie

Prishtinë, 23 prill 2003 - Në pesëvjetorin e Akademisë së Mbrojtjes së Kosovës është prezentuar brezi i parë i oficerëve të kësaj Akademie. Gjithashtu është zbuluar lapidari i heroit Hamzë Jashari, emrin e të cilit e mbanë kjo akademi.
"Akademia e Mbrojtjes në kuadër të TMK-së është shtyllë kyçe në përpjekje që Kosova të integrohet në strukturat perëndimore, përfshirë këtu edhe Aleancën Veriatlantike. Gjenerata e parë e shkollës së oficerëve obligohet për bartje të dijes ushtarake në konsolidimin struktural si formacion, ashtu edhe kadrovik, është thënë me këtë rast, eprori i lartë i TMK-së Rrustem Berisha.
Stiv Benet, drejtor i Akademisë së Policisë në Vushtrri me këtë rast ka theksuar: "Eshtë shënuar një përparim i madh dhe unë ju përgëzoj me besim të plotë se dy akademitë tona në të ardhmen do të kenë një bashkëpunim të ngushtë për arritjen e synimeve tona".


Popullata duhet të paguajë dhe të kursejë energjinë elektrike, thotë përfaqësuesi i UNMIK-ut

Prishtinë, 23 prill 2003 - Duke komentuar ndarjen e 17 milionë euro për KEK-un nga ana e kryeadministratorit të Kosovës, Mihael Shtajner, që u kundërshtua fuqishëm nga Qeveria e Kosovës, shefi për informim në administratën e UNMIK-ut, Sejmon Haselllok ka thënë se parat është dashur të ndahen, sepse njerëzit nuk i paguajnë borgjet që i kanë.
"Shuma të mëdha borxhi kanë edhe ministritë dhe vetë Qeveria e Kosovës. Kërkesat janë më të mëdha se sa prodhimi i energjisë elektrike dhe ajo nuk kursehet nga qytetarët", ka thënë Hasellok.

Ai ka shtuar se paratë kanë qenë të bashkësisë ndërkombëtare dhe njëherit ka bërë thirrje që popullata duhet të paguajë dhe të kursejë energjinë elektrike.


Është arrestuar Shefqet Musliu, ish-komandanti i UÇPMB-së

Gjilan, 23 prill 2003 - Paqeruajtësit amerikanë në sektorin e lindjes, njoftuan zyrtarë të KFOR-it kanë arrestuar një person të dyshuar se paraqet kërcënim për sigurinë e mjedisit në Kosovë.
Paqeruajtësit në Kosovë megjithatë nuk kanë dhënë asnjë hollësi të aksionit, i cili mësohet të jetë kryer pasditen e së martës, por kanë saktësuar se ai u bë në përputhje me autoritetin e dalë nga Rezoluta 1244 e Këshillit të Sigurimit.
Ndërkohë, mjetet serbe të informacionit kanë saktësuar se i arrestuari është ish-komandanti i Ushtrisë Çlirimtare për Preshevë, Medvegjë dhe Bujanoc, Shefket Musliu, për të cilin autoritetet policore serbe kishin lëshuar një fletë-arresti tre ditë më parë.
Burimet serbe të informacionit thonë se Shefket Musliu është kërkuar nga policia serbe për shkak të siç thuhet, sulmeve, armëmbajtjes pa leje dhe se mund të jetë i rrezikshëm.


Në Gjilan thyhet për herë të tretë Fabrika e radiatorëve

Gjilan, 23 prill 2003 - Fabrika e radiatorëve në Gjilan mbrëmë ka qenë shënjestër e plaçkitësve, për herë të tretë.
Kjo ka ndodhur vetëm pak muaj pas një tentimi tjetër për të plaçkitur kasafortën e fabrikës së radiatorëve dhe tani kur në Kosovë pritet të fillojë privatizimi, i cili parasheh që kjo kompani të jetë ndër të parat në Gjilan, që mund të nënshtrohet këtij procesi.
Fabrikën e radiatorëve e ka vizituar sot edhe kryetari i komunës, Lutfi Haziri. Drejtori Shefqet Aliu e ka njoftuar z. Haziri se vjedhësit nuk kishin arritur të merrnin asgjë, por ai ishte i shqetësuar nga guximi i tyre për të hyrë kaq shpesh në ndërmarrje, pasi që herën e parë e kishin plaçkitur kasafortën e saj.
Kryetari i komunës Lutfi Haziri tha se policia duhet të jetë më këmbëngulëse në hulumtimin e rasteve të këtilla, sikundër që duhet të jenë më rigoroze edhe gjyqet në ndëshkimin e krimit, ndërsa drejtoria e fabrikës së radiatorëve, gjithsesi duhet ta rishikojë organizimin dhe besueshmërinë e rojave të objektit, meqenëse po ndodh që fabrika të thyhet për herë të tretë, pas luftës.


Arrestohet një person në Mitrovicë i dyshuar se ka lidhje direkte me shpërthimin e urës afër Zveçanit

Mitrovicë, 23 prill 2003 - Forcat speciale të policisë së UNMIK-ut kanë arrestuar mbrëmë në Mitrovicë një person të dyshuar se ka lidhje direkte me shpërthimin që ndodhi më 12 prill, afër Zveçanit.

Sipas zëdhënësit të kësaj policie Xhorxhi Kakuk gjatë arrestimti të këtij personi nuk pati incidente, ndërkohë që identiteti i personit të arrestuar nuk u bë i ditur.

Por, zëdhënësi Kakuk megjithatë saktësoi se i dyshuari është i moshës 38-vjeçare dhe akuzohet se është i lidhur në mënyrë direkte me shpërthimin në urën hekurudhore, afër Zveçanit. Rasti lidhur me këtë shpërthim mbetet i hapur dhe me këtë rast janë duke u marrë hetuesit e policisë nga Prishtina.
Siç dihet, përgjegjësinë për shpërthimin në urën hekurudhore afër Zveçanit e ka marrë AKSH, e cila disa ditë vonë është shpallur organizatë terroriste nga shefi i UNMIK-ut Mihael Shtajner.


Në Vushtrri u mbajt manifestimi poetik i poeteshave shqiptare "Vushtrria 2003"

Vushtrri, 23 prill 2003 - Në Vushtrri dje u mbajt manifestimi poetik tradicional letrar takimet e poeteshtave shqiptare "Vushtrria 2003", në të cilin morën pjesë më se 30 poete nga të gjitha trevat shqiptare. Në këtë manifestim u theksua se femra shqiptare është vetë vlera, është vetë kultura, është vetë tradita.
Në përfundim të këtij manifestimi juria profesionale ndau tri shpërblime për poezinë më të mirë. Vendi i parë i takoi poeteshës Vjollca Dibra, vendi i dytë Olimpi Velajt dhe vendi i tretë Shkurte Kadriut.


A. Ahmeti: Populli nuk më mbështeti për të ndarë Maqedoninë

Shkup, 23 prill 2003 - "Mua populli nuk më mbështeti për ta ndarë Maqedoninë. Unë u deklarova dhe kam qenë shumë besnik: Maqedonia është atdheu im...

Ky është vendi im dhe për këtë vend unë do të luftoj dhe do të përpiqem deri në jetësimin e plotë të të drejtave të shqiptarëve", deklaroi Ali Ahmeti kryetar i BDI-së. Ai tha se nuk ka dalë me obsione për ndarje, për copëtime, por për të drejta të shqiptarëve, ku edhe e ka gjetur mbështetjen.
"Pikërisht me këtë koncept dola edhe në zgjedhjet e vitit 2002 që u zhvilluan në Maqedoni, dhe pikërisht për këtë koncept ma dha votën populli shqiptar në Maqedoni dhe unë do të përpiqem deri në maksimum që ky elektorat, populli im të mos zhgënjehet", tha për "Zërin e Amerikës", Ali Ahmeti.


Ilir Meta thotë se rajoni nuk ka nevojë për një Bosnje të dytë

Tiranë, 23 prill 2003 - Shqipëria ka shprehur keqardhje për deklaratat e kreut të opozitës maqedonase Georgievski për ndarjen e territorit mes Shqipërisë dhe Maqedonisë. Ministri i Jashtëm i Shqipërisë Ilir Meta ka deklaruar dje se rajoni nuk ka nevojë për një Bosnje të dytë.

Ai ka theksuar se ky koncept është në kundërshtim me Marrëveshjen e Ohrit si dhe fakti ky deklarim vjen nga ata që e kanë nënshkruar atë marrëveshje. Ministri i jashtëm i Shqipërisë vlerësoi është integrimi dhe jo ndarja.

Ai i kushtoi vëmendje të veçantë rolit të faktorit shqiptar në Maqedoni dhe posaçërisht qëndrimit më të fundit të z. Arbër Xhaferi. Meta shfaqi shpresën se z, Xhaferi një nga autorët kryesor të Marrëveshjes së Ohrit nuk do t'i devijojë angazhimet e tija politike të sankcionuara edhe për këtë marrëveshje.


B. Mustafaj: PD nuk mbështet asnjë ide që çon në cënimin e integritetit territorial të Maqedonisë

Tiranë, 23 prill 2003 - Opozita demokratike në Tiranë ka hedhur poshtë angazhimet e fundit të partive maqedonase, por edhe ato shqiptare që ishin në pushtet deri para një viti.
Partia Demokratike e bëri të qartë qëndrimin e saj në mbështetje të proceseve integruese dhe jo ndarëse në rajon nëpërmjet sekretarit për marrëdhënie ndërkombëtare, Besnik Mustafajt.
Ai ka shprehur shqetësimin e partisë së tij për përmbajtjen antievropiane, antiintegruese të këtyre deklarimeve dhe ka theksuar qëndrimin tashmë të njohur të kësaj partie se e ardhmja e Maqedonisë është vetëm si një shtet multietnik me standarde moderne të respektimit të drejtave për të gjithë.
Z. Mustafaj tha se "PD nuk mbështet asnjë ide dhe asnjë veprim që çonë në cënimin e integritetit territorial të Maqedonisë. Nga ana tjetër shqiptarët në Maqedoni ende kanë shumë të drejta të parealizuara, por shpresojmë se këtë të drejta do të përmbushen nëpërmjet zbatimit të Marrëveshjes së Ohrit".


Bigman: Këto ide kanë shkaktuar lumenj gjaku këtu në Ballkan

Shkup, 23 prill 2003 - Nikolas Bigman, ambasador i NATO-s në Shkup, duke komentuar vendimet e PDSH-së për shpalljen e moratoriumit, për idenë e formimit të shtetit etnik dhe qëndrimin e Lubço Georgievskit për ndarjen e Maqedonisë tha se kjo mënyrë e mendimit është e vjetruar dhe i takon shekullit XIX apo XX. "Këto ide kanë shkaktuar lumenj gjaku këtu në Ballkan dhe kudo në botë.

Bashkësia ndërkombëtare tanimë është alergjike kur bëhet fjalë për shtete të pastra etnike", tha z. Bigman për radion "Evropa e lirë".
Ai theksoi se kjo nuk funksionon dhe NATO është 100 për qind kundër kësaj ideje, pa marrë parasysh ku i ka burimet e veta.
Ndërkaq lidhur me idenë e hedhur nga PDSH për krijimin e një farë protektorati në Maqedoni, Bigman tha se "kjo është një non-sens, sepse qytetarët e Maqedonisë tanimë kanë treguar se dinë se si duhet t'i zgjidhin vetë çështjet e hapura".
Qytetarët e Maqedonisë e kanë Marrëveshjen e Ohrit dhe të gjithë që e nënshkruan këtë Marrëveshje duhet t'i përmbahen asaj – edhe Georgievski edhe Xhaferri, theksoi ambasadori i NATO-s në Shkup.


Një delegacion ushtarak nga Shqipëria viziton Maqedoninë

Shkup, 23 prill 2003 - Një delegacion i lartë ushtarak nga Shqipëria, i kryesuar nga shefi i Shtatmadhorisë së Armatës shqiptare, gjeneralmajori Pëllumb Qazimi, po qëndron për një vizitë dyditore në Maqedoni.
Njoftohet se shefi i delegacionit gjeneralmajori Qazimi nesër do të takohet me ministrin e Mbrojtjes të Maqedonisë, Vllado Buçkovski, si dhe do të ketë takime edhe me shefin e Shtatmadhërisë së Armatës sëkëtij vendi, gjeneralnënkolonelin Metodi Stamboliski, njofton MIA në gjuhën shqipe.


VMRO-DPMNE i ka drejtuar shumë kërkesa qeverisë aktuale maqedonase

Shkup, 23 prill 2003 - Partia më e madhe opozitare maqedonase VMRO-DPMNE, i ka drejtuar Qeverisë së Branko Cërvenkovskit disa kërkesa, si kthimin e maqedonasve në Mateç, të nxënësve maqedonas në shkollën e Shemshovës, kthimin e emrit të shkollës në Shemshovë "Dame Gruev", largimin e busttit të Jumni Jonuzit.
Poashtu kjo parti kërkon heqjen e flamurit shqiptar në Likovë dhe të ndalet shpërngulja e maqedonasve nga Çairi, Gazi Baba, Tetova, Struga dhe nga komunat dhe qytetet e tjera të vendit.
VMRO-DPMNE pret realizimin e këtyre kërkesave, të cilat, sipas zyrtarëve të saj, janë të paraqitura në pajtim me ligjet, me barazinë e qytetarëve, me dëshirat e deklaruar për bashkëjetësë dhe sigurim të deklaruar në tërë territorin, njofton MIA në gjuhën shqipe.


Në Serbi është hequr gjendja e jashtëzakonshme

Beograd, 23 prill 2003 - Në Serbi është hequr gjendja e jashtëzakonshme që u vendos në vend muajin e kaluar pas vrasjes së ish kryeministrit Zoran Gjingjiq. Kryeministri aktual Zoran Zhivkoviq tha se propozimi për heqjen e gjendjes së jashtëzakonshme, ishte miratuar njëzëri nga ministrat e kabinetit qeveritar.
Në Serbi gjendja e jashtëzakonshme u vendos menjëherë pas vrasjes së kryeministrit Gjingjiq në Beograd më 12 mars.
Policia thotë se ai ishte vrarë nga një eksponent i forcave speciale të policisë të njohura me emrin 'Beretat e Kuqe', Zvezdan Jovanoviq, i cili ndodhet nën arrest. Megjithatë personi që thuhet se organizoi operacionin për vrasjen e kryeministrit, Milorad Lukoviq, i njohur ndryshe si Legija, vazhdon t'i fshihet drejtësisë.
Sipas shifrave zyrtare, të cilat u bënë publike të martën, më shumë se 10 mijë vetë janë marrë në pyetje pas vendosjes së gjendjes së jashtëzakonshme; 4500 vetë janë arrestuar dhe janë ngritur akuza ndaj 3200 syresh.


Bush thotë se s'ka plan për farë aksioni të ri ushtarak pas konfliktit në Irak

Uashington, 23 prill 2003 – Presidenti amerikan, Xhorxh Bush, ka thënë se s'ka plan për farë aksioni të ri ushtarak pas konfliktit në Irak, njofton Rojter. Ai gjithashtu zhdavariti frikën rreth fundamentalizmit shiit, duke thënë se irakianët tash janë të kënaqur me lirinë e shprehjes së religjionit.

Z. Bush i ka bërë këto komente në një takim me reporterë të biznesit, që ishin ftuar në Shtëpinë e Bardhë për të biseduar rreth planeve të tij ekonomike. Ka pasur spekulime se pas rrëzimit të Sadamit, SHBA-të mund ta kthejnë shikimin nga Siria, Irani ose Koreja e Veriut.

"Unë nuk mund të marr me mend farë momenti specifik apo farë incidenti specifik, që mund të kërkojë aksion ushtarak", ka thënë Bush.


Në Pnom Pen është vrarë një gjykatës i lartë kamboxhian në pikë të ditës

Pnom Pen, 23 prill 2003 – Një gjykatës i lartë kamboxhian është vrarë sot (të merkurën) në pikë të ditës në Pnom Pen, duke shkaktuar frikë për valë të reja të dhunës gjatë zgjedhjeve të përgjithshme, që do të mbahen në korrik të këtij viti në këtë vend të Azisë juglindore, njofton Rojter.

Gjykatësi Sok Sethamoni është qëlluar katër herë me armë zjarri nga një biçiklist i armatosur, ka deklaruar një polic vendor, i cili kishte parë atentatin.

Gjykatësi kishte vdekur sapo ishte dërguar në spital. Motivi i vrasjes mbetet i paqartë, ndonëse ky gjykatës është i njohur për pjesëmarrje në gjykimin e të arrestuarve në trazirat kundërtajlandeze në janar. Ai poashtu kishte krysuar gjykimin e një grupi gueril kundërqeveritar.


Protesta antimerikane në Qerbela

Qerbela, 23 prill 2003 - Disa mijëra muslimanë shiitë, gjatë haxhillëkut në qytetin e shenjtë irakian Qerbela, morën pjesë edhe sot në protestat antiamerikane, duke kërkuar tërheqjen e forcave amerikane nga Iraku.
"As amerika, as Sadami, po islamit", brohoritën muslimanët e tubuar në sheshin e madh para mauzoleumit të imamit Husein, nipit të profetit Muhamed, i cili është vrarë në Qerbela në vitin 680, njofton AFP.

Që nga dita e djeshme në Qerbela po mbahen solemnitetet kushtuar imamit Husein në të cilat kanë ardhur disa qindra mijëra haxhinj nga nbarë Iraku.


Xhef Hun beson se Sadam Huseini ende ndodhet në Irak

Um Kasër, 23 prill 2003 - Sekretari britanik i Mbrojtjes Xhef Hun deklaroi se sot se lideri irakian Sadam Husein me siguri ende ndodhet në Irak.
"Vlerësimi ynë është se ai, sipas të gjitha gjasave ende ndodhet në Irak", u tha Hun gazetarëve gjatë vizitës në qytetin jugor irakian Um Kasër, duke iu përgjegjur pyetjes nëse beson që lideri i përmbysur ende është në vend, njofton Rojter.

"Ne po kërkojmë vendet në të cilat ai mund të fshehet. Kjo çështje është ende e hapur, por sipas të gjitha gjasave ai ende është në vend", tha Hun.


Ushtria amerikane ka vrarë sot në Afganistan vrasësin e një punëtori të Kryqit të Kuq Ndërkombëtar

Bagram, 23 prill 2003 – Ushtria amerikane ka thënë sot (të merkurën) se gjatë një shkëmbimi zjarri ka vrarë një afgan, i cili besohet të jetë përgjegjës për vrasjen e një punëtori të Kryqit të Kuq në muajin e kaluar, njofton Rojter.

Fjala është për Rikardo Munguia, një salvadorian, që punonte për Komitetin ndërkombqëtar të Kryqit të Kuq, të cilin militantët talibanë të provincës jugore të Kandaharit, më 27 mars, e patën nxjerrë nga makina e tij dhe e patën vrarë me armë zjarri.

Koloneli Dagllas Leforxh u ka deklaruar gjithashtu sot gazetarëve në bazën e Bagramit se gjatë këtyre luftimeve, kur është vrarë vrasësi i dyshimtë, janë zënë edhe shtatë persona të tjerë.


Pauell: Franca do të bartë konsekuencat për kundërshtimin e luftës në Irak

Uashington, 23 prill 2003 – Sekretari amerikan i Shtetit, Kolin Pauell, ka thënë se Franca do të bartë konsekuencat për kundërshtimin e luftës në Irak, duke shprehur kështu zemërimin e Uashingtonit për qëndrimin e Francës ndaj kësaj lufte, ka bërë të ditur një ndihmës i lartë i presidentit Bush, njofton AFP.

I pyetur nëse do të ndëshkohet Parisi për qëndrimin kundër luftës, Pauell ka përsëritur shkurt: "Po. Ne duhet të rishikojmë marrëdhëniet. Ne duhet të shikojmë në këtë dritë të gjitha aspektet e marrëdhënieve tona me Francën", i ka deklaruar Pauell televizionit PBS.
Këto komente Pauell i ka bërë pasi zyrtarët e lartë amerikanë po përgatisin masat e rrepta kundër Francës, përfshirë edhe anashkalimin e Parisit në NATO, në përfitimet e pasluftës në Irak dhe masa të tjera ndëshkuese.


Në Xhakartë ka filluar gjykimi kundër klerikut radikal, Abu Beker Beshir

Xhakartë, 23 prill 2003 – Sot në Xhakartë ka filluar gjykimi kundër klerikut radikal indonezian, Abu Beker Beshir, njofton BBCworld. Ky lider plak musliman është akuzuar për komplot për të përmbysur qeverinë e Xhakartës dhe për të bërë Indonezinë një shtet islamik, por ai që në fuillim të seancës gjyqësore ka mohuar të gjitha këto akuza kundër tij.

Policia indoneziane ka bërë të ditur gjithashtu se fill pas fillimit të këtij gjykimi ka arrestuar edhe 17 persona të tjerë, të gjithë pjesëtarë të Xhihadit Islamik, udhëheqës i të cilit është Abu Beshir.


Mijëra ushtarë amerikanë hynë në qytetin e tensionuar të Mosulit

Mosul, 23 prill 2003 - Mijëra ushtarë amerikanë hynë në qytetin e tensionuar të Mosulit në Irakun verior.
Ushtarët amerikanë patrulluan rrugët e qytetit dje, duke krijuar një atmosferë relativisht të qetë për herë të parë që kur qyteti ra para gati 2 javësh.
Tanke dhe automjete luftarake amerikane ishin dislokuar afër aeroportit të Mosulit dhe helikopterët fluturonin mbi të. Ushtarët thanë se shumë prej banorëve të Mosulit i mirëpritën ata.
Komandantët e ushtrisë amerikane thonë se shumë irakianë nuk e kanë dëgjuar ende mesazhin se Sadam Huseini dhe regjimi i tij kanë marë fund dhe se forcat paraushtarake irakiane ka të gjarë të hapin zjarr kundër trupave amerikane.


Franca bën thirrje për ndërprerjen e menjëhershme të sanksioneve të OKB-së kundër Irakut

Paris, 23 prill 2003 - Franca po bën thirrje për një ndërprerje të menjëhershme të sanksioneve të Kombeve të Bashkuara kundër Irakut, një propozim i përkrahur fuqishëm nga Shtetet e Bashkuara.

Ambasadori francez Zhan-Mark dë la Sabier, i tha Këshillit të Sigurimit dje se embargoja 12-vjeçare në tregti dhe investime kundër Irakut duhet të ndërpritet menjëherë, ndërsa embargoja e armëve duhet të qendrojë në fuqi.
Presidenti Bush thotë se ai gjithashtu beson që sanksionet ndaj Irakut nuk kanë një qëllim të dobishëm.


Nis dialogu me koreanoveriorët

Peking, 23 prill 2003 - Bisedimet për zgjidhjen e çështjes së programit bërthamor të Koresë së Veriut filluan të mërkurën në Pekin pas disa muajsh ndërprerjeje.
Xhems Keli ndihmëssekretari i shtetit për çështjet e Azisë Lindore drejton delegacionin amerikan do të takohet me homologët e tij kinez dhe koreanoverior.
Shtetet e Bashkuara dhe Koreja e Veriut kanë rënë dakord lidhur me formatin e diskutimeve, por nuk dihet ende se cilat janë gjasat që këto bisedime të shënojnë progres.


Opozita kundërshton rezultatin

Nigeri, 23 prill 2003 - Komisioni Zgjedhor në Nigeri ka njoftuar se Olesegun Obasanjo është rizgjedhur president i vendit, por opozita nuk e ka njohur këtë rezultat.
Komisioni tha se zoti Obasanjo ka marrë 62 për qind të votave, gati dyfishin e votave të mara nga rivali i tij, ish udhëheqësi vendit Muhamadu Buhari.
Përpara se të shpalleshin rezultatet e zgjedhjeve zyrtarët të lartë të opozitës pushtuan zyrat e Komisionit Zgjedhor.