Lajme

E marte, 22 prill 2003

Përmbajtja:

• Presidenti Rugova përuroi Fabrikën e tullave në Prishtinë

• Podujevë: Agim Veliu nderohet me medalje nga Batalioni i Dytë i KFOR-it çeko-sllovak

• Nëpër vendbanimet serbe pronat do të regjistrohen me ndihmën e policisë

• Gjenerali amerikan Daniel Kif thotë se vija kufitare e Kosovës me Serbinë vëzhgohet 24 orë në ditë

• Radio-Gjilani nuk ka probleme me komunën, por me punëtorët e vet

• Në seancën e ardhshme të Kuvendit diskutohet rreth nxjerrjes së ligjit për zgjedhjet dhe për dy projektligje

• Kërkohen masa urgjente për mbrojtjen dhe parandalimin e ndotjes së mjedisit në Kosovë

• SHPK ka marrë një raport për ekzistimin e një varreze masive në Rahovec

• Në muajin maj Kosovën do ta vizitojnë kardiokirurgë të njohur italianë

• Disa deputetë të Parlamentit të Kosovës kanë përgatitur një projektrezolutë të re për vlerat e luftës

• B. Fleçër: Shumë rrallë kemi takuar shqiptare të Kosovës të involvuara në prostitucion

• R.Osmani: Veprim i PDSH-së është i koordinuar me ish-partnerin e saj të dikurshëm, VMRO-DPMNE

• Tirana zyrtare e shqetësuar me deklarimet e fundit nga përfaqësues të forcave në Maqedoni

• BE kundërshton shpalljen e moratoriumit nga ana e PDSH-së

• Beogradi lëshon urdhërarrest ndërkombëtar për Shefqet Musliun

• Maqedonia dërgon në Irak një njësit prej 39 ushtarakëve

• B. Cërvenkovski kundërshton qëndrimet e Georgievskit dhe Xhaferit se Marrëveshja e Ohrit është koncept i shkatërruar

• Ambasadorët e NATO-s, SHBA-ve, BE-së dhe OSBE-së në Shkup theksojnë se kufijtë e Maqedonisë janë të pacënueshëm

• Paskal Milo formon një parti të re

• Policia e Tivarit në Mal të Zi ka konfiskuar 16 kilogram heroinë

• Arrestohet shefi i policisë së aeroportit të Tiranës

• Në Pakistan është arrestuar gruaja e parë e dyshimtë për lidhje me Al-Kaidën

• Nga disa shpërthime në Kashmirin indian janë vrarë gjashtë civilë dhe shumë të tjerë janë plagosur

• Nga përmbytja e dy trapave në Bangladesh kanë humbur jetën rreth 100 njerëz

• Departamenti i Shtetit paralajmëronr qytetarët amerikanë

• I dërguari amerikan për rindërtimin e Irakut mbërrin në Bagdat

• Ramsfelld thotë se SHBA nuk po shqyrtojnë asnjëfarë pranie ushtarake afatgjatë në Iraq

• Sadam Huseini është gjallë dhe vazhdon të qarkullojë brenda Irakut

• Iraku i shkatërroi armët kimike muajin e kaluar

• Koreja e Jugut pranon propozimin e Koresë së Veriut

• Shitët mblidhen për pelegrinazh në Qerbela

• Amerikanët bëjnë arrestimin e gjashtë

• Njeriu e ka kafshuar qenin

Presidenti Rugova përuroi Fabrikën e tullave në Prishtinë

 

Prishtinë, 22 prill 2003 - Pas modernizimit nga partneri italian, sot u përurua Fabrika e Tullave në Prishtinë, dhe e cila tash e tutje do të quhet "Ital Kosova".

Duke bërë përurimin e kësaj fabrike presidenti i Kosovës Ibrahim Rugova tha se tani do të fillojë edhe procesi i privatizimit i cili do të jetë proces më i komplikuar, por do të bëhen përpjekje që ekonomia e Kosovës, konkretisht ajo pjesë që quhet shtetërore të privatizohet sa më shpejt.

 

Pas fazës së parë të emergjencës dhe rindërtimit të parë, Kosova po hyn në fazën e zhvillimit ekonomik, e cila duhet të ketë përkrahjen e institucioneve ekonomike, financiare vendore e ndërkombëtare, tha presidenti Rugova.

Investuesi nga Italia Françesko Anello tha se është i lumtur që ka arritur sot në Prishtinë dhe premtoi se do të përpiqet që të me teknologjinë e re të zhvillohet kjo fabrikë.

Ndërkaq sipas menaxherit të saj Blerim Sfirca riparimi dhe modernizimi i kësaj fabrike ka zgjatur 18 muaj dhe ajo po e rifillon punën në fazën më të duhur kur Kosova po fillon periudhën e rindërtimit të saj. Në këtë fabrikë do të punësohen rreth 250 punëtorë, kurse aktualisht janë të punësuar 195 punëtorë.

Ndërkaq Ismet Beqiri, kryetar i komunës së Prishtinës, tha se vetëm prodhimi është baza e cila krijon perspektivë për qutetarët në rimëkmëbjen e vendit.

Drejtuesit e fabrikës premtuan prodhime me cilësi të lartë dhe me çmime të arsyeshme për standardin e qyetarëve të Kosovës.

 

 

Podujevë: Agim Veliu nderohet me medalje nga Batalioni i Dytë i KFOR-it çeko-sllovak

 

Podujevë, 22 prill 2003 – Në përfundim të misionit paqësor në Kosovë, komandanti i Batalionit të Dytë çeko-sllovak nënkoloneli Peter Prohaska, sot u prit në një takim lamtumirës nga kryetari i komunës Agim Veliu. Në këtë takim mori pjesë edhe komandanti i ri nënkoloneli Josef Kopecki dhe shefi i CIMIC-ut mbitogeri Pavel Mraz.

Agim Veliu falënderoi KFOR-in çeko-sllovak për kontributin në ruajtjen e paqes dhe të sigurisë në regjionin e komunës së Podujevës, kurse nënkoloneli Prohaska tha se bashkëpunimi me institucionet komunale është i rëndësishëm në interes të përparimit dhe përmirësimit të kushteve të jetës së popullatës në Podujevë.

 

"Jemi përpjekur që gjatë misionit tonë të ndihmojmë njerëzit në nevojë edhe pse e dijmë se zhvillimi i Podujevës kërkon më shumë angazhim dhe punë", tha nënkoloneli Prohaska.

Kryetari i komunës Agim Veliu ftoi komandantin e ri të Batalionit të tretë nënkolonelin Josef Kopecki për një bashkëpunim të ngushtë në interes të të gjithë qytetarëve të Llapit. Ndërkaq komandanti i ri premtoi se do të vazhdojë punën e mirë që ka bërë Batalioni i Dytë me nënkolonelin Prohaska.

Nënkoloneli Peter Prohaska në shenjë falënderimi për bashkëpunim me institucionet e komunës nderoi Agim Veliu me medaljen e Batalionit të Dytë çeko-sllovak. Ndërkaq CIMIC-u nderoi me mirënjohje Drejtorinë për Demokratizim dhe Marrëdhënie me Publikun.

 

 

Nëpër vendbanimet serbe pronat do të regjistrohen me ndihmën e policisë

 

Gjilan, 22 prill 2003 - Ndërsa qytetarëve të tjerë të komunës së Gjilanit tashmë u kanë arritur edhe faturat e para të tatimit vjetor për pronën, komuniteti serb po refuzon ende të bashkëpunojë me regjistruesit e pronës. Qëndrim të njëjtë ndaj këtij procesi kanë mbajtur deri tani edhe vetë liderët e serbëve.

Por, paralajmërimet e administratorit komunal, Bob Simons, se ky proces do të kryhet me ndihmën e policisë, ndoshta do t`i bindë serbët lokalë që të ndryshojnë mendjen rreth këtij obligimi.

Është shumë e nevojshme që matjet e pronës të bëhen edhe nëpër vendbanimet serbe të komunës së Gjilanit, ka thënë z. Bob Simons, sipas të cilit, në fshatin Cërnicë, që ka një popullsi të përzier, shumica e familjeve kanë regjistruar pronën.

 

Duket se liderët e serbëve nuk kanë provuar fare në këtë drejtim për ta bindur komunitetin që përfaqësojnë, ndërsa kanë dhënë përgjegje negative në emër të tyre.

Pas disa takimeve që kishte me komunitetin serb, administratori lokal i UNMIK-ut për Gjilan, Bob Simons ka thënë në Komitetin për Siguri dhe Emergjencë se është vlerësuar që ky proces duhet të kryhet me ndihmën e policisë.

Lutfi Haziri, kryetar i komunës tha se mbështetja e regjistruesve nga policia e komunitetit, do të jetë e nevojshme vetëm në fazën e parë, ndërsa ai beson se më vonë serbët nuk do të refuzojnë t`i përgjigjen këtij obligimi, sepse ai garanton zhvillim të infrastrukturës për të gjithë banorët e komunës së Gjilanit.

 

 

Gjenerali amerikan Daniel Kif thotë se vija kufitare e Kosovës me Serbinë vëzhgohet 24 orë në ditë

 

Gjilan, 22 prill 2003 - Kreu i Brigadës Shumëkombëshe të Lindjes, gjenerali Daniel Kif dje doli para gazetarëve për të treguar përkushtimin e tij në ushtrimin e kontrollit ushtarak të zonës së Lindjes. Duke qëndruar përpara një helikopteri "Apaçi" gjenerali Kif tha se mjetet e sofistifikuara po japin mundësi që të vëzhgohet sidomos vija kufitare e Kosovës me Serbinë për 24 rresht.

 

 

Radio-Gjilani nuk ka probleme me komunën, por me punëtorët e vet

 

Gjilan, 22 prill 2003 - Radio-Gjilani, njëri ndër mediat më të hershme lokale në Kosovë, pas Radio-Ferizajt, ndodhet në një pozitë të palakmueshme dhe rrezikon të mbyllet.

Drejtori Agim Kajtazi e ka fajësuar komunën për gjendjen e tashme të Radio-Gjilanit, e cila e ka fituar të drejtën e zotërimi të teknikës së emitimit, në procedurë gjyqësore, pasi kolektivi ishte ndarë përgjysmë dhe shtatë punëtorë kanë ngelur jashtë punës.

Akuzave në adresë të komunës, kryetari Lutfi Haziri iu ka përgjegjur duke thënë se komuna nuk ka asnjë problem me Radio-Gjilanin, por drejtori Agim Kajtazi ka problem me shtatë punëtorë të kësaj medie.

 

Haziri tha se komuna nuk ka nevojë të implikohet në këtë mosmarrëveshje, por ka qenë kategorik kur ka theksuar se komuna do ta mbrojë pronën e vetë që e ka në Radio-Gjilan.

Ndërkaq, ombduspersoni Marek Novicki nuk e ka parë të arsyeshme të deklarohet rreth rastit të Radio-Gjilanit, pasiqë çështja ndodhet në procedurë të gjyaktës supreme të Kosovës.

 

 

Në seancën e ardhshme të Kuvendit diskutohet rreth nxjerrjes së ligjit për zgjedhjet dhe për dy projektligje

 

Prishtinë, 22 prill 2003 - Në takimin e rregullt të Kryesisë së Kuvendit të Kosovës u diskutua sërish rreth rezolutës për mbrojtjen e vlerave të luftës çlirimtare të popullit të Kosovës. Sipas anëtarit të Kryesisë, Bajram Kosumi kjo rezolutë ka gjasa të shqyrtohet në takimin e ardhshëm të Kryesisë e pastaj të shtrohet në rend dite të seancës së ardhshme të Kuvendit të Kosovës.

 

Ai tha se në kryesi ekziston vullnet i mirë që kjo çështje të hyjë në rend dite e pastaj të diskutohet. Aprovimi i kësaj rezolute, sipas Kosumit është i rëndëshëm për qytetarët e Kosovës e cila do të hapte derën për nxjerrjn e ligji për mbrojtjen e vlerave të luftës, të invalidëve të luftës dhe të familjeve të dëshmorëve. Sipas tij rezoluta është një akt juridiko-politik e cila i hap derën qeverisë që të propozojë projektligjin për vlerat e luftës.

Në takimin e sotëm u përkrah propozimi i grupit parlamentar të LDK-së dhe të Komisionit legjislativ të Kuvendit për nxjerrjen e ligjit për zgjedhjet. Ndërkohë pritet që Kuvendi në seancën e radhës së të enjtës ta hapë debatin për këtë ligj.

Poashtu njoftohet se komisionet janë duke punuar në harmonizimin e vërejtjeve të Zyrës ligjore të UNMIK-ut me ligjet që nuk janë nënshkruar nga kryeadministratori Shtajner. Rishqyrtimi i ligjeve të miratuara nga Kuvendi do të bëhet për vazhdimin e bashkëpunimit me bashkësinë ndërkombëtare dhe në interes të qytetarëve, tha këshilltari i kryeparlamentarit Daci, Ramush Tahiri.

Poashtu në seancën e së enjtës deputetët do të diskutojnë për projekltligjin për rrugët dhe për plehërat artificiale.

 

 

Kërkohen masa urgjente për mbrojtjen dhe parandalimin e ndotjes së mjedisit në Kosovë

 

Prishtinë, 22 prill 2003 - Partia e të Gjelbërve të Kosovës kërkon nga UNMIK-u që të ndërmarrë masa urgjente për mbrojtjen dhe parandalimin e ndotjes së mjedisit nga çimentorja e Hanit të Elezit dhe nga termocentrali "Kosova A".

 

Kjo part është e mendimit se natyra e Kosovës përmballet me një gjendje të rëndë dhe si pasojë edhe qytetarët e saj. Parandalimi i mbrojtjes së mjedisit mund të bëhet me ndërhyrjet në termocentralin "Kosova A" dhe në Çimentoren e Hanit të Elezit, dy nga ndotësit më të mëdhenj të mjedisit në Kosovë.

Kryetari i PGJK Daut Maloku tha se po qe se deri më 5 qershor, kur është Dita ndërkombëtare e mjedisit UNMIK-u e Shtajneri nuk ndërmarrin masa, posaçërisht për Hanin e Elezit, atëherë kjo parti do të organizohet dhe do ta bllokojë kufirin Kosovë-Maqedoni për të mos lejuar të hyjë në Kosovë pronari i çimentores i cili nuk po respekton vendimet për mbrojtjen e mjedisit në Han të Elezit.

Si masë tjetër kërkohet që këto objekte të mbyllen sidomos gjatë muajve të verës.

 

 

SHPK ka marrë një raport për ekzistimin e një varreze masive në Rahovec

 

Prizren, 22 prill 2003 - Një zëdhënës i Shërbimit Policor të Kosovës në Prizren, tha se kanë marrë një raport lidhur me dyshimin për ekzistimin e një varreze të madhe masive në Rahovec. Ai tha se një qytetar i Rahovecit ka raportuar tek pjesëtarët e KFOR-it se dyshon që një gropë e mëhershme në këtë qytet që ka një sipërfaqe të madhe të jetë varrezë e mundshme masive.

 

 

Në muajin maj Kosovën do ta vizitojnë kardiokirurgë të njohur italianë

 

Prishtinë, 22 prill 2003 - Në gjysmën e dytë të muajit maj Kosovën do ta vizitojnë kardiokirurgë të njohur italianë në lëmin e pediatrisë për të realizuar kështu një 25 ndërhyrje të drejtpërdrejta kardiokirurgjike në zemër, të cilat deri tash nuk janë bërë në vendin tonë.

 

 

Disa deputetë të Parlamentit të Kosovës kanë përgatitur një projektrezolutë të re për vlerat e luftës

 

Prishtinë, 22 prill 2003 - Një grup prej 40 deputetëve të Parlamentit të Kosovës ka përgatitur një projektrezolutë për vlerat e luftës e cila sipas nismëtarëve të saj ka siguruar nënshkrimet e nevojshme të deputetëve për të rihyrë në ren dite të Parlamentit të Kosovës.

 

Sipas shefit të grupit parlamentar të AAK-së edhe teksti i variantit të ri të kësaj projektrezolute ka pësuar ndryshime, të cilat sipas tij e kanë bërë më gjithëpërfshirës, siç është ndihma e bashkësisë ndërkombëtare në çlirimin e Kosovës, por edhe rezistenca e fundit me mjete paqësore që e ka bërë populli i Kosovës. Këto janë elemente shtesë që iu kanë shtuar kësaj projektrezolute.

 

 

B. Fleçër: Shumë rrallë kemi takuar shqiptare të Kosovës të involvuara në prostitucion

 

Prishtinë, 22 prill 2003 - Policia e Kosovës dhe ajo ndërkombëtare kanë arrestuar gjatë tre muajve të fundit rreth 20 persona për të cilët dyshohet se ushtrojnë trafikim ilegal të femrave. Vetëm brenda tre muajve të fundit janë mbyllur 19 kafiteri nate si dhe janë shpëtuar 24 femra që janë detyruar të ushtrojnë prostitucion.

Zëdhënësi i policisë së UNMIK-ut, Beri Fleçër thotë se janë më se 200 lokale të regjistruara në listat e policisë ku stafit ndërkombëtar i ndalohet hyrja. Deri në fund të muajit mars janë arrestuar 13 persona, por numri i atyre ka arritur në mbi 20.

"Mund të them se shumë rrallë kemi takuar shqiptare të Kosovës të involvuara në biznese të tilla, përkatësisht në prostitucion. Ndoshta ka femra kosovare që merren me prostitucion në shtete të tjera mirëpo në Kosovë një gjë e tillë ndodhë shumë rallë", ka thënë Fleçër.

 

 

R.Osmani: Veprim i PDSH-së është i koordinuar me ish-partnerin e saj të dikurshëm, VMRO-DPMNE

 

Tetovë, 22 prill 2003 - Duke vlerësuar veprimin e fundit të Partisë Demokratike Shqiptare dhe nëse ky ishte një zhvillim i befasishëm në skenën politike të Maqedonisë, Rufi Osmani, analist politik, thotë se kryesisht bëhet fjalë për një lojë fjalësh.

 

Veprimi i PDSH-së është i përsëritur dhe se ajo një veprim të ngjashëm e ka inskenuar në skenën politike në Maqedoni edhe në vitin 1995. Ai mendon se nuk bëhet fjalë për një veprim të papritur.

Sipas zotit Osmani, ky veprim i PDSH-së "është i koordinuar edhe me ish-partnerin e tij të qeverisë së dikushme, me partinë e Lupço Georgievskit (VMRO-DPMNE)". Këto dy subjekte, thotë Osmani, si parti opozitare tentojnë që të hedhin ide të reja destabilizuese në skenën politike në Maqedoni, me një objektiv që të detyrojnë pushtetin aktual të shpallë zgjedhje të parakohshme.

Rufi Osmani konstaton se "idetë e Arbër Xhaferit dhe të Lupçe Georgievskit për krijimin e shteteve autonome etnike janë në kundërshtim të plotë me proceset integrative aktuale, si në aspektin ekonomik, politik dhe atë të sigurimit".

"Mendoj se idetë e kësaj natyre janë në kundërshtim me realizimin e aspiratave të çështjes shqiptare dhe në veçanti këto dëmtojnë interesin strategjik të popullit shqiptar në Kosovë, për realizimin e shtetit të pavarur të Kosovës në kuadër të kufijve aktualë", tha Rufi Osmani në një intervistë për radion "Evropa e lirë".

 

 

Tirana zyrtare e shqetësuar me deklarimet e fundit nga përfaqësues të forcave në Maqedoni

 

Tiranë, 22 prill 2003 - Ministria e Punëve të Jashtme të Shqipërisë po ndjek me vëmendje dhe shqetësim deklarimet e fundit nga përfaqësues të rëndësishëm të forcave të ndryshme politike opozitare në Maqedoni, të cilët bëjnë thirrje për "krijimin e shteteve etnikisht të pastra", dhe për "shkëmbime territoresh" në funksion të këtij qëllimi, thuhet në një komunikatë të kësaj ministrie.

Ajo i dënon me forcë deklarime të tilla si regresive, pasi ato jo vetëm që bien ndesh me filozofinë e re integruese që ka përfshirë rajonin e Evropës Juglindore dhe që po e afron atë çdo ditë e më tepër me Bashkimin Evropian dhe NATO-n, por revokojnë një model të dështuar që i solli shumë vuajtje e gjakderdhje këtij rajoni.

Ministria e Punëve të Jashtme vlerëson se rruga e vetme e zgjidhjes së problemeve ndëretnike në Maqedoni është ajo e zbatimit të plotë të Marrëveshjes së Ohrit. Çdo alternativë tjetër, vetëm sa do të cenonte paqen e sigurinë në Maqedoni dhe më gjerë, duke e vonuar gjithë rajonin në rrugën e nisur të integrimit euroatlantik, thuhet në fund të kësaj komunikate.

 

 

BE kundërshton shpalljen e moratoriumit nga ana e PDSH-së

 

Shkup, 22 prill 2003 - Bashkimi Evropian e ka kundërshtuar shpalljen e moratoriumit nga ana e Partisë Demokratike Shqiptare dhe nuk pajtohet me kritikat që janë dhënë rreth zbatimit të Marrëveshjes së Ohrit. Irena Gjuzelovs, zëdhënëse e BE-së, ka deklaruar se nuk pajtohet me qëndrimet e PDSH-së se nuk po realizohen dispozitat e Marrrëveshjes së Ohrit.

"Ekziston përparim i madh në drejtim të zbatimit të obligimeve që dalin nga Marrëveshja e Ohrit. Gjendja nuk mund të krahasohet me atë që ishte vetëm para një viti e gjysmë dhe këto rezultate janë falë kursit të politikës aktuale, por edhe të asaj të kaluarës, ku merrte pjesë edhe PDSH-ja", thotë Gjuzelova, zëdhënëse e BE-së.

 

Nuk ka alternativë tjetër pos jetësimit të Marrëveshjes së Ohrit, thotë ajo, sepse kjo marrëveshje është kusht për integrimin e Maqedonisë në BE.

Ndërkaq lidhur me idenë të po kësaj partie se nga kjo gjendje mund të dilet vetëm nëse Maqedonia shpallet protektorat, zëdhënësja e BE-së Gjuzelova hedh poshtë këtë ide në mënyrë të prerë, duke shtuar se Maqedonia asnjëherë nuk do të jetë protektorat. Sipas saj kjo ide nuk do të ketë përkrahjen e as një organizate ndërkombëtare, apo qeverie perëndimore.

 

 

Beogradi lëshon urdhërarrest ndërkombëtar për Shefqet Musliun

 

Beograd, 22 prill 2003 - Policia e Bujanocit (në luginën e Preshevës) ka lëshuar urdhërarrestin ndërkombëtar të Interpolit për ish-liderin e UÇPMB-së Shefqet Musliun. Urdhërarresti është vendosur në sajtin (faqen) e Interpolit.

 

Ndërkaq në kërkesën për arrestimin e Shefqet Musliut thuhet se ai kërkohet për shkak të sulmeve, reketimit dhe posedimti ilegal të armëve, dhe se "mund të jetë i rrezikshëm", njoftojnë mediat serbe.

 

 

Maqedonia dërgon në Irak një njësit prej 39 ushtarakëve

 

Shkup, 22 prill 2003 - Parlamenti i Maqedonisë mori vendim për dërgimin e një njësiti prej 39 ushtarakëve të Maqedonisë në misionin paqësor në Irak. Dërgimin e këtij njësiti e përkrahën të gjitha grupet parlamentare.

Ndërkohë Parlamenti i Maqedonisë miratoi Ligjin për ratifikimin e Marrëveshjes për statusin e forcave të Maqedonisë në Kuvajt.

Kuvendi e vazhdoi punën me debat lidhur me Propozim-vendimin për dërgimin e njësiteve të ARM-së për pjesëmarrje në misionin paqesor në Irak.

"Ushtarët e Maqedonisë do të jenë me mision të madh - mision për ndërtimin e demokracisë së re, për pengimin e prodhimit dhe shitjen e armëve për shkatërrim në masë dhe se me këtë mision Maqedonia është në anën e paqes dhe stabilitetit, tha ministri i Mbrojtjes Vllado Buçkovski.

 

 

B. Cërvenkovski kundërshton qëndrimet e Georgievskit dhe Xhaferit se Marrëveshja e Ohrit është koncept i shkatërruar

 

Shkup, 22 prill 2003 - Kryeministri maqedonas Branko Cërvenkovski tha se shpallja e Marrëveshjes së Ohrit në kohë të njëjtë nga ana e dy nënshkruesve si koncept i shkatërruar tregon qartë se z. Georgievski, Xhaferi dhe Thaçi kanë bashkërendim.

 

Skenarët e tillë të promovuar në mënyrë publike do të thonë nxitje e ektremizmit dhe radikalizmit dhe i bëjnë thirrje aktivizimit të nëntokës politike dhe kriminale në Maqedoni.

Cërvenkovski porositi se Qeveria maqedonase do t'i shfrytëzojë të gjitha mekanizmat institucionale të garantuara me kushtetutë dhe se nuk do të lejojë destabilizimin e sërishëm të vendit.

 

Ai shtoi se e ardhmja e Maqedonisë është në paqe dhe jo në luftë, në bashkësi dhe jo në spastrimin etnik, në integrime dhe jo në ndarje, në pranimin e vlerave civilizuese dhe jo në ngjalljen e koncepteve "fashisoide dhe mesjetare", siç i quajti ai.

 

 

Ambasadorët e NATO-s, SHBA-ve, BE-së dhe OSBE-së në Shkup theksojnë se kufijtë e Maqedonisë janë të pacënueshëm

 

Shkup, 22 prill 2003 - Ambasadorët e vendeve dhe organizatave me ndikim në Maqedoni si NATO, Shtetet e Bashkuara, Bashkimit Evropian dhe OSBE-së në një komunikatë të përbashkët, theksojnë se kufijtë e Maqedonisë janë të pacënueshëm, nuk ka vend për dhunën dhe Marrrëveshja e Ohrit duhet zbatuar plotësisht në mënyrë që të shmangen tragjeditë e së kaluarës, theksojnë ata.

 

Kjo marrëveshje është rruga e vetme drejt së ardhmes dhe partitë politike dhe përfaqësuesit e tyre, nënshkrues të saj, kanë përgjegjësi që t'i bashkohen në mënyrë aktive procesit që ai të jetë i suksesshëm, thuhet në komunikatë.

Ambasadorët e NATO-s, SHBA-ve, BE-së dhe të OSBE-së theksojnë se nuk guxon të pengohet zbatimi i Marrëveshjes me veprime që bien ndesh me angazhimet e mëparshme.

Ata i kanë bërë këto komente pas një deklarate të ish-kryeministrit Georgievski për ndarjen e Maqedonisë në baza etnike.

 

 

Paskal Milo formon një parti të re

 

Tiranë, 22 prill 2003 - Ish-ministri i jashtëm, Paskal Milo së bashku me disa anëtarë të Kryesisë së Partisë Socialdemokrate kanë shpallur zyrtarisht krijimin e një partie të re të quajtur Partia Demokracia Sociale.

 

Gjatë një takimi me gazetarë në Tiranë, Milo tha se kishin qenë të detyruar të largoheshin nga Partia Socialdemokrate për shkak të mungesës së theksuar të demokracisë së brendshme, si dhe për shfaqes së papranueshme autoritare dhe abuzimet e kryetarit aktual Skënder Gjinushi.

 

Partia Demokracia Sociale, e cila do të regjistrohet sot në Gjykatën e Tiranës pretendon se ka 60 për qind të elektoratit të Partisë Socialdemokrate.

 

 

Policia e Tivarit në Mal të Zi ka konfiskuar 16 kilogram heroinë

 

Bar, 22 prill 2003 - Policia e Tivarit në Malin e Zi ka konfiskuar dje 16 kilogram heroinë, ndërkaq një shtetas italian është arrestuar. Kjo sasi e drogës u gjet në një makinë që drejtohej nga Toni Rozina, i cili vinte nga porti i Durrësit.

 

 

Arrestohet shefi i policisë së aeroportit të Tiranës

 

Tiranë, 22 prill 2003 - Policia ka arrestur drejtuesin e Komesariatit të policisë së Rinasit Enriko Sylejmanin nën akuzën e favorizimin të trafikut për emigrantë dhe kladestinë.

 

Së bashku me Sylejmanin nën pranga përfunduan edhe dy bashkëpunëtorët e tij, kryekontrollori i aeroportit, si dhe një person i katërt, i cili mendohet të ketë pasur rolin e ndërmjetësit për të ndihmuar emigrantët klandestinë për të udhëtuar lirisht drejt Beogradit.

 

Arrestimet e firmosura nga prokuroria u bënë pas zbulimit të një linje trafiku mes Tiranës dhe Beogradit. Javën e shkuar shtatë persona u kthyen prapa nga Beogradi në Tiranë për shkak të dokumentacionit jo të rregullt.

 

 

Valltarët e ansamblit të fëmijëve të Prishtinës po marrin pjesë ë festivalin ndërkombëtar të folklorit në Turqi

 

Silviri- Turqi, 22 prill 2003 - Në qytetin Silviri të Turqisë dje ka filluar festivali profesional ndërkombëtar i asambleve të folklorit të fëmijëve "23 PrillI", në të cilin po marrin pjesë 20 valltarë të ansamblit folklorik të fëmijëve të Qendrës së Pionierëve të Prishtinës. Fëmijët e Prishtinës do të prezentohen me vallen e Rugovës.

 

 

Në Pakistan është arrestuar gruaja e parë e dyshimtë për lidhje me Al-Kaidën

 

Uashington, 22 prill 2003 – Një grua e dyshimtë për lidhje me Al-Kaidën është arrestuar sot (të martën) në Pakistan, e cila ka qenë e kërkuar nga FBI për t'u marrë në pyetje, njofton UPI. Ajo është Afia Sidikui, 31-vjeçare, ish-banuese në Boston.

 

Në njoftim thuhet se organet pakistaneze, që e kishin arrestuar atë s'kanë qenë të njohura se ajo ishte e kërkuar nga FBI dhe se administrata e Bushit kërkon ekstradimin e saj dhe të disa qytetarëve të tjerë me origjinë pakistaneze.

 

"Ne e kemi kërkuar atë, por s'kemi pasur informacione rreth saj", ka thënë një zyrtar pakistanez. Sidikui, jo vetëm ka qenë e lidhur me rrjetin Akl-Kaida të Osama bin Ladenit, por ishte e lidhur edhe me grupet radikale të Pakistanit. Si qytetare amerikanë ajo do të ekstradohet menjëherë, thonë zyrtarët pakistanezë.

 

 

Nga disa shpërthime në Kashmirin indian janë vrarë gjashtë civilë dhe shumë të tjerë janë plagosur

 

Srinagar, 22 prill 2003 – Seperatistët e dyshimtë musliman kanë hedhur sot (të martën) një bombë të prodhimit vetjak në një vathë bagëtish në Kashmirin indian dhe kështu kanë vrarë të pakten gjashtë civilë, bëjnë të ditur burimet policore vendore, njofton Rojter.

 

Po kështu, bëhet e ditur se në një sulm tjetër në fshatin Tral, në jug të kryeqytetit verior Srinagar, nga një bombë e vënë, po nga seperatistët muslimanë, janë plagosur, gjithashtu sot (të martën) edhe të pakten 13 civilë të tjerë.

 

Bomba ishte vënë në një fushë, nëpër të cilën kanë kaluar fshatarët, që shkonin për të mjelë bagëtinë në vathën komunale. Vetëm disa orë më vonë janë plagosur edhe katër ushtarë, të cilët me makinën e tyre kanë rënë në një minë tokësore afër fshatit Kazikund, kanë bërë të ditur burimet policore. Deri trash asnjë grup s’e ka marrë përgjegjësinë për këto shpërthime.

 

 

Nga përmbytja e dy trapave në Bangladesh kanë humbur jetën rreth 100 njerëz

 

Alipur, 22 prill 2003 – Rreth 100 njerëz kanë humbur jetën dhe shumë të tjerë janë zhdukur pasi dy trapa, që janë mjete të thjeshta transporti të njerzve në Bangladesh, janë përmbytur sot (të martën) nga stuhia, që ka përfshirë disa pjesë të Bangladeshit, kanë bërë të ditrur burimet policore, njofton Rojter. Numri i viktimave mund të jetë edhe më i madh se shifra që është dhënë tash për tash.

 

 

Departamenti i Shtetit paralajmëronr qytetarët amerikanë

 

Uashington, 22 prill 2003 - Departamenti i amerikan i Shtetit ka paralajmëruar qytetarët amerikanë që për shkak të luftës në Irak që u udhëhoq nga SHBA-të, mund të rritet mundësia e kërcënimeve të grupeve terrroriste ndaj amerikanëve në botë. Ky është paralajmërimi i parë anembanë botës për shtetasit amerikanë që nga fillimi i luftës në Irak më 20 mars.

 

 

I dërguari amerikan për rindërtimin e Irakut mbërrin në Bagdat

 

Uashington, 22 prill 2003 - Gjenerali amerikan në pension, Xhej Garner, i cili është emëruar të kryesojë qeverinë kalimtare të Irakut dhe të mbikëqyrë përpjekjet masive për rindërtimin e këtij vendi, mbërriti në Bagdad, ndërkohë që forcat amerikane morën nën arrest një zyrtar tjetër irakian të kërkuar.

Gjenerali Garner tha se përparësia e tij kryesore është rifillimi sa më shpejt që të jetë e mundur i shërbimeve bazë, si furnizimi me rrymë elektrike dhe ujë. Gjenerali Garner nuk pranoi të caktonte ndonjë afat për misionin e tij, për të cilin ai tha se do të vazhdojë për sa kohë që të shihet e nevojshme.

 

 

Ramsfelld thotë se SHBA nuk po shqyrtojnë asnjëfarë pranie ushtarake afatgjatë në Iraq

 

Uashington, 22 prill 2003 - Sekretari amerikan i Mbrojtjes Donald Ramsfeld hodhi poshtë me forcë një artikull të faqes së parë të numrit të së djelës të gazetës "Nju Jork Tajms," ku prentendohej se Shtetet e Bashkuara kanë në plan të vendosin marrëdhënie afatgjatë me Irakun që do t'i garantonin Pentagonit mundësinë e përdorimit të bazave kryesore.

Sekretari Ramsfelld e quajti artikullin të padobishëm dhe sipas tij "kryekëput të gënjeshtërt. "Shtetet e Bashkuara nuk kanë dëshirë të qendrojnë atje gjatë. Thjesht ne nuk kemi synime të tilla. Ky është fakt i pakundërshtueshëm".

Sekretari i mbrojtjes tha se tema e një pranie të përhershme apo madje afatgjatë ushtarake amerikane në Irak, as që është përmendur në diskutime të nivelit të lartë.

 

 

Sadam Huseini është gjallë dhe vazhdon të qarkullojë brenda Irakut

 

Bagdad, 22 prill 2003 - Udhëheqësi i Kongresit Kombëtar Irakian, Ahmed Çelebi, thotë se Sadam Huseini është gjallë dhe vazhdon të qarkullojë brenda Irakut.

Ish udhëheqësi i opozitës irakiane në mërgim tha se ka marrë informacione rreth Sadam Huseinit dhe të dy djemve të tij, por lëvizjet e tyre ai i ka mësuar vetëm 24 orë pasi ata janë parë në një zonë të caktuar. Zoti Çelebi thotë se grupi i tij do të punojë për të siguruar më shumë informacion rreth vendndodhjes së udhëheqësit të përmbysur irakian.

 

 

Iraku i shkatërroi armët kimike muajin e kaluar

 

Bagdad, 22 prill 2003 - Njoftohet se një shkencëtar irakian, i cili ka punuar për më shumë se dhjetë vjet në programin e armëve kimike të këtij vendi, u tha ushtarakëve amerikanë se Iraku i shkatërroi armët kimike dhe laboratorët për armë biologjike muajin e kaluar, vetëm pak ditë para se të fillonte lufta.

Në numrin e saj të djshëm, gazeta "Nju Jork Tajms" njofton se shkencëtari tregoi vendet ku janë groposur agjentë kimike të nevojshme për prodhimin e armëve të ndaluara.

Njoftohet se shkencëtari irakian, i cili nuk është identifikuar, u tha ekspertëve amerikanë se Iraku ka dërguar fshehurazi në Siri armë dhe teknologji, dhe se regjimi i Sadam Huseinit ka bashkëpunuar me rrjetin terrorist al-Kaida.

 

 

Koreja e Jugut pranon propozimin e Koresë së Veriut

 

Seul, 22 prill 2003 - Koreja e Jugut bën të ditur se ka pranuar një propozim të Koresë së Veriut për bisedime dypalëshe javën e ardhshme në Phenian që pritet të përqendrohen pjesërisht në çështje ekonomike.

Mesa duket, Koreja e Veriut po përpiqet të ulë edhe tensionet para bisedimeve të kësaj jave në Pekin me zyrtarë amerikanë dhe kinezë.

Ky do të jetë takimi i parë i drejtpërdrejtë midis zyrtarëve amerikanë dhe koreanoveriorë, që nga fillimi i krizës rreth programit bërthamor të Phenianit gjashtë muaj më parë.

 

 

Shitët mblidhen për pelegrinazh në Qerbela

 

Qerbela, 22 prill 2003 - Në qendër të Irakut qindra mijëra pelegrinë myslimanë u mblodhën për festivalin fetar Shiit për kulminacionin e pelegrinazhit, që qe ndaluar më se një çerek shekulli.

Kjo qe hera e parë pas 25 vjetësh që besimtarëve Shia iu krijua mundësia të bënin shërbesat e rastit në qytetin e shenjtë Qerbela.

Korrespondenti i BBC-së i përshkroi si të mrekullueshme pamjet nga qyteti Qerbela.

Gati gjysëm milioni njerëz ishin mbledhur në qendër për të festuar.

Ata kaluan në rradhë të gjata duke kënduar pranë faltoreve të shenjta të mysliamanëve Shia.

Faltoret qëndrojnë në krah të përmendores Beteja për Karbalën, që kujton luftën e 300 vjetëve të shkuara kur myslimanët luftuan me njëri-tjetrin për të vendsour se kush qe ndjekësi më i drejtë i profetit Muhamed.

 

 

Amerikanët bëjnë arrestimin e gjashtë

 

Bagdad, 22 prill 2003 - Ushtria amerikane ka deklaruar se forcat amerikane në Irak kanë kapur ish- ministrin e Sadam Huseinit për arsim të lartë dhe kërkime shkencore.

Në një deklaratë të lëshuar nga komanda qendrore amerikane në Katar thuhet se ish-ministri irakjan Abd al-Khalq Gafar, është arrestuar në Iran të shtunën.

Në një zhvillim tjetër, një parti politike irakjane deklaroi se tek ajo është dorëzuar dhëndërri i Sadam Huseinit, Jamal Mustafa Sultan.

 

 

Njeriu e ka kafshuar qenin

 

Nju Jork, 22 prill 2003 – Pol Rasell, 33-vjeçar, e ka kafshuar qenin e vogël 3-vjeçar të racës gjermane "Reni", që i shërbente policisë lokale, njofton CNN sipas një shkrimi të një gazete njujorkase, e cila një ngjarje të tillë e kishte cilësuar si përmbysje të botës.

 

Ky incident "i kafshimit të qenit nga ana e njeriut" kishte ndodhur kur polici lokal e kishte dëbuar me qen të dresuar nga një bar Pol Rasellin e dehur tapë pasi, si i tillë, kishte shkaktuar trazira në bar.

 

I hedhuur në trotuar nga polici dhe i përgjakur në kokë, Pol Rasell e kishte rrëmbyer qenin e policit dhe e kishte kafshuar atë në fyt dhe në qafë. Polici e kishte qëlluar pastaj dy herë Rasellin në fytyrë me grusht dhe kështu ai është detyruar ta lëshojë qenin.

 

Policia e ka akuzuar Rasellin për lëndim të shtazës, për kundërshtim të arrestimit dhe pengim të administratës qeveritare. Ndërkaq, Raselli ka thënë se ka qenë i dehur dhe se nuk i kujtohej ta ketë kafshuar qenin. Ai, gjithashtu, ka thënë se e ka hundën të thyer dhe dy sytë të nxirë.

 

Raselli është trajtuar në spital dhe e ka kaluar natën në burg.

Copyright©2000-2003 Trepca.net - Të gjitha të  drejtat e rezervuara.