OPINIONE

TREVA E RUGOVËS HUMBI STËRNIPIN E KAÇAKUT TË MALEVE TË RUGOVËS AGAN SEKUT, ILIR SELIMAJ

Vrasja e ushtarit të UÇK-së Ilir Selmanaj ka prapavijë politike

Edhe në periudhën e lavdishme të "Lidhjes Shqiptare të Prizrenit" familja e Ilir Selimajt ka patur luftëtar të njohur siç ishte Hys Haxhi (stërgjyshi i Ilirit), i cili pat marrë pjesë në luftërat e krerëve të "Lidhjes së Prizrenit" kundër pushtetit otoman të Turqisë. Për sa i përket gjeneratave të reja, babai i Ilirit njihej si përkrahës i Lidhjes Demokratike të Kosovës ndërsa djali i xhaxhait të Ilirit Rrustem Selimaj është njëri ndër aktivistët dhe drejtuesit e njohur të LDK-së në Lluga të Drinit, afër Nabërgjanit të Pejës.

22 prill 2003 / Shkruan: Besim KRASNIQI

Ish-ushtari i UÇK-së Ilir Selimaj, njëri ndër dëshmitarët kryesor të procesit tashmë të njohur gjyqësor "Grupi i Dukagjinit" i vrarë këto ditë në pritë dhe pabesisht në Osuja afër Nabërgjanit të Pejës rrjedh nga një familje e njohur historikisht si familje patriotike. Për t'i ikur propagandës së mundshme të mediave majtsite në Kosovë si dhe për lexuesit që nuk e njohin historinë e trungut familjar të Ilir Selimaj theksojmë se të parët e tij ishin të kyçur vazhdimisht nëpër lëvizjet atdhetare të cilat ia kthyen pushkën armiqve serbomalazezë në trevën e Rugovës.

Po të shfletojmë historinë e Rugovës, do të hasim në emra të njohur të luftëtarëve dhe komandantëve të lëvizjeve kaçake të asaj ane, me të cilët krenohej edhe vetë ushtari i UÇK-së Ilir Selimaj. Xhaxhai i Ilirit Sadri Bajrami njihej si kaçak trim i "Lidhjes kaçake" të trevës së Rugovës dhe si i burgosur disa herë nga pushteti serbomalazez. Bashkë me Sadri Bajramin ishte edhe Agan Seku (gjyshi i Ilir Selimajt), i njohur poashtu si kapoband dhe aktivist i "Lidhjes Kaçake" në vitet 1944-45.

Haxhi Ymeri (kushëri i gjakut me babain e Ilirit, Brahimin) i njohur si kryetar i "Ballit Kombëtar" për Rugovë, i ndjekur dhe i burgosur poashtu vazhdimisht nga pushtetarët komunist të serbosllavisë. Edhe në periudhën e lavdishme të "Lidhjes Shqiptare të Prizrenit" familja e Ilir Selimajt ka patur luftëtar të njohur siç ishte Hys Haxhi (stërgjyshi i Ilirit), i cili pat marrë pjesë në luftërat e krerëve të "Lidhjes së Prizrenit" kundër pushtetit otoman të Turqisë. Për sa i përket gjeneratave të reja, babai i Ilirit njihej si përkrahës i Lidhjes Demokratike të Kosovës ndërsa djali i xhaxhait të Ilirit Rrustem Selimaj është njëri ndër aktivistët dhe drejtuesit e njohur të LDK-së në Lluga të Drinit, afër Nabërgjanit të Pejës.

Duke marrë për bazë historikun e familjes Selimaj nga Haxhaj të Rugovës, e njohur si familje nacionaliste dhe kundërshtare e rreptë e ideologjisë komuniste, por edhe kontributin e ushtarit Ilir Selimaj gjatë luftës çlirimtare, sikurse edhe dëshminë e tij para organeve të drejtësisë në lidhje me rastin e zhdukjes respektivisht vrasjes së katër ushtarëve të Brigadës "Mërgimi" mund të konkludojmë se vrasja në pabesi e Ilirit është vrasje e paramenduar, e organizuar dhe me motive politike nga forcat e errëta e antikombëtare.

Gjetja e maskave dhe e thikave në vendin e ngjarjes tragjike, tregon qartë se maskat e zeza në Kosovë janë të organizuara nga ata të cilëve po iu pengon nacionalizmi i Lidhjes Demokratike të Kosovës, të cilëve iu pengon këmbëngultësia e Dr.Ibrahim Rugovës për realizimin e vullnetit të lirë të popullit shqiptar të Kosovës - Pavarësia e Kosovës, të cilëve po iu pengon demokracia e vërtetë. Rol të veçantë në mbijetimin e krimit politik në Kosovë po luajnë edhe mediat ideologjike të shkruara dhe elektronike, të cilat përkrahin politikën e Thaçit ("Epoka e re") dhe të Haradinajt ("24 Orë"), vazhdojnë krrokatjet e tyre të mjera, duke akuzuar të tjerët për nxitje të vëllavrasjeve derisa vrasjet politike të kryera ndaj drejtuesve dhe përkrahësve të LDK-së i konsiderojnë si vrasje jopolitike, duke shkuar aq larg sa që e akuzojnë vetë LDK-në apo "shërbimin sekret" të saj se kinse ajo po i vritka aktivistët e saj!

Në këtë kontekst duhet parë edhe vrasjen e ish-ushtarit të UÇK-së Ilir Selimaj, i cili siç dihet ka qenë dëshmitar i ngjarjeve tragjike dhe i veprimeve kriminele të disa drejtuesve të UÇK-së në pjesën e Rrafshit të Dukagjinit, andaj, janë të kota protestat e organizuara nëpër Deçan e gjetiu për t'a ndryshuar mendjen e qytetarëve të Kosovës për "pafajsinë" e "Grupit të Dukagjinit", derisa vazhdohet me eliminimin e dëshmitarëve të kohës së luftës. Siç e kemi theksuar edhe më parë, tentimvrasjet ndaj Vesel Muriqit, pastaj vrasja e kolonel Tahir Zemës si dhe vrasja e Ilir Selimajt janë të motivuara politikisht, dhe përgjegjësia për këto vrasje politike bie mbi ata të cilët dëshirojnë t'u ikin të vërtetave historike përgjatë periudhës 1998-1999 e këndej.           

Copyright©2000-2003 Trepca.net - Të gjitha të  drejtat e rezervuara.