E shtune, 19 prill 2003

19.04.2003 - Trepca.net

Lajme

E shtune, 19 prill 2003

Përmbajtja:

Presidenti Rugova uroi besimtarët dhe qytetarët e Kosovës me rastin e Festës së Pashkëve
Presidenti Rugova përgëzoi Papën Gjon Pali II
Presidenti Rugova përgëzoi imzot Mark Sopin
Kryetari i Partisë së Re të Kosovës, Dr. Bujar Bukoshi përgëzoi imzot Mark Sopin
Shtajner thotë se UNMIK-u dhe forcat NATO-s nuk do të lejojnë veprimin e asnjë grupi të armatosur në Kosovë
Policia e UNMIK-ut paralajmëron hetime për zbulimin e pjesëtarëve të AKSH-së në Kosovë
Kryesuesi i radhës së OSBE-së më 23 prill viziton Kosovës
P. Shtruk thotë se trupat ndërkombëtare garantojnë paqen në Bosnje e Hercegovinë dhe në Kosovë
Kryetari i Bashkësisë Islame Rexhep Boja i ka dërguar Ipeshkëvisë Katolike të Kosovës një telegram urimi për pashkët
Komuna e Gjilanit është e vendosur të garantojë të drejtën e qytetarëve në pronë
Komisioni për persona të humbur dhe të kindapuar, u takua me asociacionët e familjarëve serbë
Kryetari i degës së PDSH-së në Tetovë ka dhënë dorëheqje
Pjesëtarët e njësitit special "Luanët" kanë dorëzuar armët në bazën ushtarake të Krivollakut
Kompanitë shqiptare të gatshme për kontrata në Irak
Presidenti Moisiu thotë se problem kryesor në Shqipëri është që të ulet niveli i varfërisë
Tre shqiptarë nga Ligina e Preshevës akuzohen për veprimtari armiqësore nga gjykata e Vranjës
Trupat izraelite kanë vrarë sot një kameraman palestinez
Protesta kundër pranisë ushtarake amerikane në Irak
Në një nga burgjet më të mëdha të Venezuelës janë therur me thika 11 të burgosur
Forcat amerikane dhe britanike ka liruar 887 të burgosur irakianë
Fqinjët e Irakut kërkojnë tërheqjen e amerikanëve
Policia irakiane në Bagdad ka zënë ish-ministrin irakian të financave, Hikmet Ibrahim al-Azavi
Guerilët marksistë në Kolumbi kanë vrarë tre persona

Presidenti Rugova përgëzoi Papën Gjon Pali II



Presidenti Rugova uroi besimtarët dhe qytetarët e Kosovës me rastin e Festës së Pashkëve

Prishtinë, 19 prill 2003 - Presidenti i Kosovës, Dr. Ibrahim Rugova, ka përgëzuar sot të gjithë besimtarët dhe qytetarët e Kosovës për Festën e Pashkëve.

Në urimin e Presidentit Rugova thuhet:
"Dita e Pashkëve është ditë e bardhë, ditë e ringjalljes së Krishtit dhe forcimit të besimit në Zotin.
Dhashtë Zoti që Pashkët e ardhshme t'i festojmë me njohjen formale të Pavarësisë së Kosovës nga miqtë tanë.
Urime të mira u shprehim UNMIK-ut dhe përfaqësive diplomatike në Prishtinë.
Urime të përzemërta u shprehim ushtarëve të NATO-s, KFOR-it dhe gjeneralit Mini", thuhet në urimin e Presidentit Rugova.


Presidenti Rugova përgëzoi imzot Mark Sopin

Prishtinë, 19 prill 2003 - Presidenti i Kosovës, Dr. Ibrahim Rugova, me rastin e festës së Pashkëve, ka përgëzuar edhe imzot Mark Sopin, ipeshkv i Ipeshkvisë së Kosovës, me urimet e tij më të ngrohta dhe të popullit të Kosovës.
"Gjithnjë e çmojmë lart veprën Tuaj për mirëkuptim dhe dashuri midis nesh si dhe për njohjen formale të Pavarësisë së Kosovës.
Me fat Pashkët dhe paçit shëndet të mirë!", thuhet në urimin e Presidentit Rugova dërguar imzot Mark Sopit.


Kryetari i Partisë së Re të Kosovës, Dr. Bujar Bukoshi përgëzoi imzot Mark Sopin

Prishtinë, 19 prill 2003 / TN – Kryetari i Partisë së Re të Kosovës, Dr. Bujar Bukoshi, me rastin e festës së Pashkëve, ka përgëzuar imzot Mark Sopin, ipeshkv i Ipeshkvisë së Kosovës.

Në urimin e Kryetarit të PReK-ut, Dr. B. Bukoshi thuhet:

“Të gjithë besimtarëve shqiptarë dhe atyre ndërkombetar të besimit Katolik, i’u urojmë Gezuar për shumë mot Pashkët . Urojmë të kaloni Pashkë të Bardha.

Vet simbolika e kësaj feste në të cilën shprehet ringjallja e Krishtit për ne shqiptarët është edhe një arsye me tepër që të festojmë së bashku dhe të gëzuar me shpresën e madhe për ringjalljen e besimit në zot dhe ne të vertetën.

Shpresojmë se në Truallin e Shën Florit dhe Shën Laurit do të ngritet së shpejti shtëpia e zotit , Katedralja e Shenjtë e cila do të jetë simbolikë qytetëruese e Kosovarëve të sotëm dhe Dardanëve të djeshëm.

Imzot SOPI, pranoni përgëzimet tona me të përzemërta dhe me të sinqerta për ketë ditë të Shenjtë. Me ketë rast këto përgëzime nëpër mes jush si prijes i Ipeshkvisë së Kosovës u’a dërgojmë të gjithë vellezërve tanë të besimit katolik kudo që ndodhen.

Ketë vit kremta e Pashkëve për ne shqiptarët ka një vlerë të veçantë se ne mes të dy festave të mëdha , Pashkëve dhe Krishtlindjeve , do të bëhët nga Selia e Shenjtë Shënjterimi i Nenës Tereze, Nenës sonë të madhe. Kjo ngjarje për shqiptarët do të jetë e paharruar.

Urojmë Pashkë të Bardha,” thuhet në urimin e Kryetarit të PreK-ut, Dr. Bujar Bukoshi.


Shtajner thotë se UNMIK-u dhe forcat NATO-s nuk do të lejojnë veprimin e asnjë grupi të armatosur në Kosovë

Mitrovicë, 19 prill 2003 - Kryeadministratori i Kosovës Mihael Shtajner thotë se UNMIK-u dhe forcat ndërkombëtare, të udhëhequra nga NATO-ja nuk do të lejojnë veprimin e asnjë grupi të armatosur në Kosovë.

Shtajner këto komente i bëri dje në Mitrovicë dhe me atë rast u shpreh i sigurt për përkrahjen e bashkësisë ndërkombëtare për vendimin e tij që ta shpallë AKSH-në si organizatë terroriste.

Ai u zotua se një qëndrim të njëjtë do të mbajë edhe ndaj të gjitha formacioneve të ngjashme kudoqofshin ato dhe nënvizoi se UNMIK-u ka ndjekur nga afër të gjitha zhvillimet e ndërlidhura me AKSH-në, posaçërisht shpërthimin e fundit në urën hekurudhore në veri të Kosovës, që siç tha ishte pamëdyshje një veprim terrorist.

Prandaj, tha Shtajner, nuk ka dyshim se AKSH-ja është organizatë terroriste. Ai shtoi se UNMIK-u asnjëherë nuk ka mohuar por as pohuar ekzistimin e AKSH-së, duke ndjekur me kujdes zhvillimet rreth kësaj dukurie, por tash nuk ka më kuptim që të fshihet e vërteta, nënvizoi Shtajner.
"Nëse dikush sillet si organizatë terrorsite dhe i ka të gjitha tiparët e tilla, atëherë duhet të cilësohet si organizatë e tillë, ka thënë z. Shtajner, duke shpjeguar se kualifikimin e AKSH-së e kishte bërë sipas legjislacionit që ka Kosova kundër terrorizmit", tha Shtajner.


Policia e UNMIK-ut paralajmëron hetime për zbulimin e pjesëtarëve të AKSH-së në Kosovë

Prishtinë, 19 prill 2003 - Policia e UNMIK-ut në Prishtinë thotë se do t'i fillojë hetimet për zbulimin e veprimtarisë dhe të pjesëtarëve të Armatës Kombëtare Shqiptare në Kosovë. Zëdhënësi Beri Fleçër ka thënë se me marrjen e përgjegjësisë për sulmin mbi urën hekurudhore në afërsi të Zveçanit, AKSH-ja filloi veprimtarinë e saj dhe kjo mjafton për policinë që ajo të veprojë kundër.
Sipas Fleçerit, që nga janari i vitit 1999 janë arrestuar 3 persona nga rajoni i Gjilanit, të cilët e kanë identifikuar veten si pjesëtarë të Armatës Kombëtare Shqiptare.

Veprimtaria e AKSH-së sipas disa informacioneve të policisë së UNMIK-ut shtrihet në rajonin e Gjilanit dhe atë të Kaçanikut, ndërkaq nuk jepen detaje rreth informacioneve që vendet fqinje i posedojnë dhe i kanë dorëzuar policisë së UNMIK-ut lidhur me AKSH-në duke i konsideruar këto informacione si sekrete.
"Ne besojmë se ky është një grup i vogël me disa individë, të cilët janë të prirë të përdorin terrorin dhe dhunën për t'i arritur qëllimet e vetat pa i pasur parasysh pasojat", ka thënë Fleçër.


Kryesuesi i radhës së OSBE-së më 23 prill viziton Kosovës

Prishtinë, 19 prill 2003 - Kryesuesi i radhës së OSBE-së, ministri i Jashtëm i Holandës, Jap de Hop Shefer (Jaap de Hoop Scheffer), më 23 prill arrin për një vizitë në Kosovë.
Gjatë qëndrimit në Prishtinë ai do të takohet me udhëheqësit më të lartë të Kosovës - Presidentin Ibrahim Rugova dhe Kryeministrin Bajram Rexhepi, si dhe me përfaqësues të partive politike dhe të admnistratës ndërkombëtare në Kosovë.


P. Shtruk thotë se trupat ndërkombëtare garantojnë paqen në Bosnje e Hercegovinë dhe në Kosovë

Prishtinë, 19 prill 2003 - Trupat ndërkombëtare garantojnë paqen në Ballkan që nga mesi i viteve të nëntëdhjeta SFOR-i në Bosnje e Hercegovinë, ndërkaq KFOR-i që nga viti 1999 në Kosovë. Kështu ka deklaruar në përfundim të vizitës në Ballkan, ministri gjerman i Mbrojtjes, Peter Shtruk.

Ai ka theksuar se ushtria gjermane, luan një rol të rëndësishëm në të dyja këto formacione ndërkombëtare. Shtruk ka theksuar se si në Bosnje ashtu edhe në Kosovë, prania e ushtarëve ndërkombëtarë do të vazhdojë të jetë e nevojshme edhe për një të ardhme të afërt.
Ndonëse edhe sot 26.000 ushtarë të KFOR-it për çdo ditë e ruajnë paqen dhe sigurinë në Kosovë, megjithatë, këto forca, ende nuk e kanë përmbushur detyrën e tyre, thotë Shtruk dhe prandaj sipas tij, këto trupa do të qëndrojnë në Kosovë. Nga kontigjenti gjerman parashikohet që të mbeten në Kosovë rreth 3000 ushtarë, ka thënë ministri gjerman i Mbrojtjes.

Ai ka nënvizur se komandantët e KFOR-it e vlerësojnë gjendjen si ende të pastabilizuar, duke shtuar se mund të reduktohet gradualisht edhe kontigjenti gjerman. Por kusht kryesor është garantimi i sigurisë dhe i stabilitetit në rajon, veçanërisht për pakicat kombëtare, ka thënë ministri gjerman i Mbrojtjes.


Kryetari i Bashkësisë Islame Rexhep Boja i ka dërguar Ipeshkëvisë Katolike të Kosovës një telegram urimi për pashkët

Prishtinë, 19 prill 2003 - Kryetari i Bashkësisë Islame Rexhep Boja i ka dërguar Ipeshkvisë Katolike të Kosovës dhe ipeshkvit të saj Mark Sopi një telegram urimi për pashkët, në të cilin shpreh kënaqësinë e tij të veçantë që në emër të Kryesisë së kësaj bashkësie t'u përcjell urimet dhe dëshirat më të ngrohta për lumturinë dhe mirëqenien.


Komuna e Gjilanit është e vendosur të garantojë të drejtën e qytetarëve në pronë

Gjilan, 19 prill 2003 - Lutfi Haziri, kryetar i komunës së Gjilanit, ka thënë në mbledhjen e së premtes pasidite të Komitetit për siguri dhe emergjencë se qeveria lokale është e vendosur të garantojë të drejtat e qytetarëve mbi pronat e tyre të ligjshme, pavarësisht se ku gjenden ato.
Këto komenete z. Haziri i bëri në pjesën e debatit rreth kërkesave të serbëve lokalë në Budrigë, për t`iu krijuar kushte në të cilat ata do të mund t`i zotëronin pronat e tyre në Zhegër, të çështje e ngriti administratori Bob Simons.

"Komuna do të kujdeset që të mbrojë jetën dhe pronën e qytetarëve të saj, për aq sa ka mundësi ta bëjë këtë dhe nuk jemi kursyer as deri tashti për të punuar në krijimin e rrethanave, të cilat komunitetit serb do t`i lejonin qasje në tokat e tyre në Zhegër dhe në këtë drejtim ne kemi inkurajuar disa herë dialogun ndëretnik" - tha kryetari Haziri, duke paralajmëruar edhe një takim me banorët e atjeshëm, gjatë javës së ardhshme.
Administratori Bob Simons mendon se ky proces po zhvillohet me ritëm të ngadalshëm, ndërsa ka ankesa për shfrytëzim të kundërligjshëm të këtyre tokave, ka thënë ai.


Komisioni për persona të humbur dhe të kindapuar, u takua me asociacionët e familjarëve serbë

Prishtinë, 19 prill 2003 - Komisioni për persona të humbur dhe të kindapuar, i udhëhequr nga Flora Brovina, kryetare, të premtën për herë të parë është takuar me asociacionët e familjarëve serb, të cilët kanë persona të zhdukur në Kosovë.
Në këtë takim morën pjesë edhe përfaqësues të Komisionit Qeveritar për persona të humbur dhe të kindapuar, përfaqësues të zyrës së UNMIK-ut për persona të zhdukur, përfaqësues të Komisionit Ndërkombëtarë për persona të zhdukur, përfaqësues të Komitetit Ndërkombëtar të Kryqit të Kuq që vepron në Kosovë, përfaqësues të Këshillit për Mbrojtjen e të Drejtave dhe Lirive të Njeriut në Kosovë dhe përfaqësuesit e asociacionëve të familjeve të të humburve dhe të kidnapuarve shqiptarë në Kosovë.
Në këtë mbledhje, biseda rodhi e qetë dhe konstruktive, me respekt për viktimat dhe me shpresë që të kontribohet për zbardhjen e fatit të të rrëmbyerve të pagjetur.
Antarët e Komisionit për persona të humbur dhe të kindapuar vendosën që në mbledhjen e ardhshme të hartojë programin e punës në bazë të raportit, të cilin ky komision e ka prezantuar para Parlamentit, si dhe në bazë të rezolutës të cilën e ka aprovuar Kuvendi i Kosovës.
Komisioni në fjalë vlerësoi se diskutimet në mbledhjen e sotme do të ndihmojnë në hartimin e programit të punës për tremujorin e ardhshëm të këtij komisioni.


Kryetari i degës së PDSH-së në Tetovë ka dhënë dorëheqje

Tetovë, 19 prill 2003 - Daut Rexhepi i njohur si ish-komandant i Ushtrisë Çlirimtar Kombëtare me pseudonimin "Leka" gjatë kohës së konfliktit në Maqedoni, ka dhënë dorëheqje të parevokueshme nga posti i kryetarit të Degës së PDSH në Tetovë.

Përmes një letre ai ka njoftuar Kryesinë e PDSH-së se dorëheqje jep për disa arsye: "Marrëveshja e Ohrit nuk po zbatohet, ligji për amnisti nëpërkëmbët, ndërkaq luftëtarët e UÇK-së janë bërë peng të vullneteve të tyre dhe të shtrënguar të ngujohen në ambiente që tash për tash janë të sigurta.

Ndiehem i zhgënjyer nga këto procese stagnuese nga bartësit vendorë dhe vëzhguesit apatikë ndërkombëtarë, që në mënyrë të rrezikshme riciklojnë forma të vjetra të armiqësisë".
Zëdhënësi i PDSH-së ka vlerësuar se dorëhqeja e z. Rexhepi vjen në një çast shumë të rëndësishëm pasi u janë uzurpuar të gjitha të drejtat shqiptarëve.


Pjesëtarët e njësitit special "Luanët" kanë dorëzuar armët në bazën ushtarake të Krivollakut

Shkup, 19 prill 2003 - Pjesëtarët e njësitit special apo paramilitar siç janë quajtur "Luanët", tani të shpërbërë, dje kanë dorëzuar armët në bazën ushtarake të Krivollakut. "Luanët" i dorëzuan armët ngase sot përfundon afati ligjor.

Qeveria e Shkupit dy muaj më parë urdhëroi shpërbërjn e këtij njësiti special që ishte formuar gjatë konfliktit të vitit 2001. Me vendimin e Qeverisë maqedonase rreth 600 pjesëtarë të këtij njësiti do të pranohen në forcat e rregullta të rendit.
Aktualisht veprimtaria e këtij njësiti është në qendër të debatit pas akuzave se ishin stërvitur nga njësia serbe e njohur me emrin "Beretat e kuqe" e përfshirë në vrasjen e ish-kryeministrit serb, Zoran Gjingjiq.


Kompanitë shqiptare të gatshme për kontrata në Irak

Tiranë, 19 prill 2003 - Në Tiranë USAID, Agjensia Amerikane e Ndihmës, u ka dorëzuar autoriteteve shqiptare ftesën për pjesëmarrjen e kompanive shqiptare në rindërtimin e Irakut të pasluftës.
Ndërsa pritet të hidhen hapat e para në organizimin e firmave kandidate, biznesmenët shqiptar thonë se janë të gatshëm të marrin pjesë në këtë eveniment. Kështu i deklaroi BBC-së Shkëlqim Bumçi, drejtori ekzekutiv i Shoqatës së Ndërtuesve të Shqipërisë. Sipas Bumçit sot në Shqipëri ka shumë firma prestigjioze që mund të marrin përsipër të kryejnë të gjitha llojet e punëve, si në infrastrukturë, rrugë, ura, ujësjellesa, në ndërtimin dhe rindërtimin e shkollave, apartamenteve, zyrave qeveritare etj.


Presidenti Moisiu thotë se problem kryesor në Shqipëri është që të ulet niveli i varfërisë

Tiranë, 19 prill 2003 - Presidenti i Shqipërisë, Alfred Moisiu, tha të premten në Shkodër se problemi kryesor në vend është ulja e nivelit të varfërisë. Ai tha se u ka kërkuar dikastereve përkatëse përpilimin e një strategjie të hollësishme për uljen e varferisë në shkallë kombëtare.

Presidenti Moisiu tha gjithashtu se është i domosdoshëm hartimi dhe zbatimi i politikave nxitëse për të luftuar ata faktorë, që i detyrojnë njerëzit të emigrojnë.

"Me shumë se nevoje është domosdoshmëri hartimi dhe zbatimi i politikave nxitëse duke luftuar ata faktore që i detyrojnë njerëzit të emigrojnë", thatë z. Moisiu për të shtuar duhet të hartohen strategji konkrete per angazhimin në punë të kësaj armate të rinjsh.


Tre shqiptarë nga Ligina e Preshevës akuzohen për veprimtari armiqësore nga gjykata e Vranjës

Vranjë, 19 prill 2003 - Prokuroria e Qarkut në Vranjë (Serbi) ka kërkuar fillimin e procedurës hetimore kundër ish-pjesëtarëve të UÇPBM-së Shefket Musliu nga Konçuli, Besim Tahiri, me nofkën "Çeçen", nga Suhama dhe Lirim Jakupi, i quajtur "Nacist", nga Bujanoci. Ata dyshohen nga prokruria e Vranjës për vepra penale "bashkim për veprimtari armiqësore dhe terrorizëm".
"Pas shpërbërjes së UÇPBM, gjatë vitit 2001 ata dushohen se kanë themeluar organizatën e re terroriste Armata Kombëtare e Shqiptarëve", thotë Prokuroria Publike e Vranjës.

Gjithashtu thuhet se Musliu, Tahiri dhe Jakupi "qëllimet e veta kriminale janë duke u përpjekur t'i realizojnë me kërcënime dhe për frikësimin e bashkëkombasve të vet, për ta anëtarësuar numrin sa më të madh të popullsisë në këtë organizatë terroriste".


Trupat izraelite kanë vrarë sot një kameraman palestinez

Nablus, 19 prill 2003 – Trupat izraelite kanë vrarë sot (të shtunën) një kamereman palestinez gjatë përleshjeve me palestinezë të armatosur në qytetin Nablus të Bregut Perendimor, kanë bërë të ditur dëshmitarët dhe burimet spitalore palestineze, njofton Rojter.

Dhjetëra ushtarë izraelitë kanë sulmuar sot qytetin e vjetër historik Nablus, ku janë ndeshur me të rinjtë paleztinezë, të cilët kanë filluar t'i gjuajnë me gurë.

Palestinezët e armatosur gjithashtu kanë hapur zjarr dhe si pasojë e këtyre luftimeve ka humbur jetën kamermani i lartpërmendur palestinez, i cili së bashku me gazetarët dhe kameramanët e mediave të tjera po i përcillnin dhe po xhironin luftimet.

Burimet spitalore kanë thënë se në këto luftime janë plagosur edhe të pakten 18 palestinezë të tjerë.


Protesta kundër pranisë ushtarake amerikane në Irak

Bagdad, 19 prill 2003 - Mijëra irakianë dolën dje nëpër rrugë për të protestuar praninë ushtarake amerikane në vendin e tyre. Rreth 12 mijë vetë vërshuan në qendër të Bagdadit pasi disa klerikë myslimanë bënë thirrje kundër Shteteve të Bashkuara në lutjet e të premtes. Disa klerikë kritikuan atë që e cilësuan si pushtim amerikan të Irakut.
Disa demonstrues jashtë një xhamie në Bagdad mbanin në duar Kuranin dhe bënin thirrje për një shtet islamik për të zëvendësuar regjimin e përmbysur të Sadam Husseinit. Forcat e koalicionit thonë se i shikojnë protestat si një shënjë të mirë që tregon se Iraku po kthehet në një vend të lirë.


Në një nga burgjet më të mëdha të Venezuelës janë therur me thika 11 të burgosur

Karakas, 19 prill 2003 – Njëmbëdhjetë të burgosur venezuelas janë therur me thika dhe kështu janë mbytur, dyve prej tyre u është hequr koka gjatë një përleshjeje me një bandë rivale, të armatosur me thika, revole dhe pushkë në një nga burgjet më të mëdha të Venezuelës, njofton Rojter. Gjatë këtyre përleshjeve janë plagosur edhe 40 të burgosur të tjerë. Policia ka intervenuar dhe e ka vënë rendin.


Forcat amerikane dhe britanike ka liruar 887 të burgosur irakianë

Uashington, 19 prill 2003 – Forcat amerikane dhe britanike kanë liruar 887 të burgosur irakianë, por vazhdojnë të mbajnë në burg edhe 7,000 të tjerë, kryesisht ushtarë, që kanë marrë pjesë në luftimet në Irak, kanë bërë të ditur burimet e Pentagonit, njofton Rojter.


Fqinjët e Irakut kërkojnë tërheqjen e amerikanëve

Riad, 19 prill 2003 - Fqinjët rajonalë të Irakut kanë bërë thirrje të gjitha forcave amerikane dhe britanike që të terhiqen sa më shpejt të jetë e mundur.
Në një takim në kryeqytetin e Arabisë Saudite, Riad, grupi prej 6 vendeve që ndodhen në kufi me Irakun, si dhe Egjipti dhe Bahrein thanë se dëshironin një krijim të shpejtë të qeverisë përfaqësuese në Bagdad.
Takimi rajonal përfundoi me thirrjet që forcat e koalicionit që të tërhiqen nga Iraku sa më shpejt të jetë e mundur dhe të lejohen irakianët që të qeverisin vehten.


Policia irakiane në Bagdad ka zënë ish-ministrin irakian të financave, Hikmet Ibrahim al-Azavi

Bagdad, 19 prill 2003 – Policia irakiane në Bagdad ka zënë ish-ministrin irakian të financave, Hikmet Ibrahim al-Azavi dhe ua kanë dorëzuar forcave të koalicionit, kanë bërë të ditur zyrtarët e Komandës Qendrore amerikane në Katar, njofton BBCWorld.

Z. Azavi ka qenë gjithashtu ndihmëskryeministër dhe është i 45-ti në radhën e listës së 55 më të kërkuarëve nga forcat e koalicionit, të cilët e kanë mbështetur Sadam Hyseinin. Ai tash ndodhet në burgun e marinsave amerikanë.


Guerilët marksistë në Kolumbi kanë vrarë tre persona

Bogota, 19 prill 2003 - Guerilët e dyshimtë marksistë të Forcave Revolucionare të Armatosura (FARC) të Kolumbisë kanë sulmuar procesionin religjioz në provincën qendrore dhe kanë vrarë tre persona, kurse kanë plagosur edhe dy të tjerë, njofton BBCWorld.

Duket se rebelët kolumbianë iu kanë përgjigjur premtimit të qeverisë se do t’i mbrojnë qytetarët gjatë fundjavës së shenjtë.

Njerëzit e Dolloresit nga provinca Tolima marshonin në qytet në një procesion religjioz kur rebelët e FARC-ut hapen zjarr në pjesëtarët e forcave të sigurimit, që shoqëronin procesionin.