Zyra e SHBA-ve dënon vrasjen e dyfishtë me paramendim të Ilir dhe Feride Selimajt

Z. Rino Harnish

Prishtinë, 15 prill 2003 – Z. Rino Harnish, shefi i Misionit të Zyrës së SHBA-ve në Prishtinë, dënon fuqimisht vrasjen e dyfishtë të z. Ilir Selimaj dhe kushërirës së tij Feride Selimajt, të cilët u vranë në rajonin e Pejës më 14 prill. Edhe tre anëtarë tjerë të familjes Selimaj u plagosën në këtë sulm, Dema (37), Drita (14) dhe Kushtrimi (4). Duke folur nga Zyra e SHBA-ve, z. Harnish tha: "Edhe një herë, në mënyrë të gjakftohtë u vra një dëshmitar i një gjykimi për vrasje. Ende nuk është vërtetuar se a është kjo vrasje e lidhur me gjykimin në të cilin dëshmoi z. Selimaj, por mbetet fakti se vetëm në katër muajt e fundit kjo është hera e dytë që në rajonin e Pejës vriten dëshmitarët e gjykimeve për vrasje, me gjakftohtësi dhe në prita të planifikuara me kujdes". "Këto vrasje aq të pamëshirshme – ku në cak janë vënë edhe fëmijët, duke shpërfillur jetën njerëzore në mënyrë të pandjenjë – duket se kanë për qëllim terrorizimin e bashkësisë më të gjerë të Kosovës dhe minimin e sundimit të ligjit.

 

Të jemi të qartë lidhur me këtë. Vrasjet e tilla nuk bëjnë vetëm eliminimin e dëshmitarëve dhe frikësimin e tjerëve që të mos dëshmojnë kundër elementeve kriminale të Kosovës, por ato poashtu e pengojnë Kosovën në arritjen e standardeve që ajo duhet t"i plotësojë para se të mund të diskutohet për statusin përfundimtar".

"Fakti që vrasës të tillë janë të gatshëm që qëllimisht të sulmojnë edhe fëmijët dhe anëtarët e familjes, pikërisht sikurse në janar kur u vra Tahir Zemaj bashkë me djalin dhe nipin e tij, flet shumë për vlerat të cilat i përfaqësojnë këta vrasës të njerëzve të pafajshëm.

 

Edhe një herë, është e qartë se në shoqërinë kosovare ka elemente, vlerat e të cilëve përfshijnë dhunën dhe frikësimin si mjete legjitime të të shprehurit në Kosovën e pasluftës".

"Qeveria e SHBA-ve kërkon nga çdokush që ka informata në lidhje me këto vrasje që të paraqitet dhe t'i tregojë policisë atë që din. Ne të gjithë duhet të bëjmë çdo gjë që është e mundur për të sjellur autorët e krimit para drejtësisë, përmes sistemit ligjor i cili është i lirë nga frikësimet dhe dhuna".

"Në emër të Qeverisë së Shteteve të Bashkuara dhe Zyrës së SHBA-ve, unë në mënyrën më të fuqishme dënoj këto akte qyqare e të paramenduara të vrasjes dhe i shpreh ngushëllimet tona më të thella familjes Selimaj si dhe lutjet tona për shërim të shpejtë të viktimave që mbijetuan", përfundon z. Harnish.

Copyright©2000-2003 Trepca.net - Të gjitha të  drejtat e rezervuara.